Ang Parking Ticket
Ang tagsulat nagpuyo sa Baja California, Mexico.
Fátima!
Paghulagway pinaagi ni Bryan Beach
Miadto ko sa sinehan uban sa akong mga higala sa simbahan. Sa dihang misulod kami sa mall, gihatagan kami og parking ticket alang sa mga parkinganan. Pagkahuman sa salida, nakamatikod mi nga nawala ang parking ticket. Sa sinugdanan nagtuo kami nga makabayad ra mi sa tiket, apan walay usa namo nga dunay 180 pesos nga gikinahanglan alang sa multa.
Ang sangputanan sa dili pagbayad sa parking mabiyaan ang sakyanan diha sa mall ug maguyod, nga mas mahal pa hinoon. Naguol ang akong mga higala, ilabi na sa nagdrayb tungod kay ang sakyanan gipanag-iya sa iyang amahan. Migawas ko aron mag-ampo. Mihangyo ko sa Langitnong Amahan uban sa akong tanang hugot nga pagtuo ug pagpaubos sa paghatag namo og paagi sa pagsulbad sa among problema ug makapauli nga luwas. Dili gayud nako makalimtan unsay nahitabo mga segundo lang pagkahuman nako sa akong pag-ampo.
Samtang ako naglakaw balik ngadto sa sakyanan, dunay nanawag sa akong ngalan sa akong luyo. Si Francisco kadto, usa ka higala sa high school. Nangutana siya unsay akong gibuhat, ug giingnan nako siya kon unsa ang nahitabo. Sa walay pagduha-duha, iyang gikuha ang iyang pitaka ug mihatag kanako og igong kwarta aron ibayad alang sa nawala nga tiket. Kining buhat sa pagkamabination mao ang usa ka direkta nga tubag sa akong pagpangamuyo ngadto sa Langitnong Amahan.
Tingali wala masayud si Francisco kon unsa ka dako nga tabang siya, apan ako nasayud nga ako mapasalamaton kaayo sa tibuok nakong kinabuhi.
Usahay ang mga paagi nga ang Langitnong Amahan motubag sa atong mga pag-ampo katingalahan, apan walay mga pagkaatol lang. Ang atong Langitnong Amahan ug si Jesukristo nakaila nato sa hingpit ug mohatag og giya sa atong mga kinabuhi.
Ako nasayud nga kon kita magpuyo nga matarung, kita makatagamtam sa dili maihap nga mga panalangin nga ang Langitnong Amahan lamang ang makahatag kanato, lakip na ang Iyang saad ngari kanato nga “kon [kita] mohimo niining mga butanga, [kita] ituboy sa katapusan nga adlaw” (Alma 37:37).