Genesis 1:26–27

Unsay buot ipasabut sa gilalang sumala sa panagway sa Dios?

26 Ug miingon ang Dios: Buhaton nato ang tawo sumala sa atong dagway, ingon sa kasama nato: ug magabuot sila sa mga isda sa dagat, ug sa mga langgam sa kalangitan, ug sa mga kahayopan, ug sa tibuok nga yuta, ug sa tanan nga nagakamang sa ibabaw sa yuta.

27 Ug gibuhat sa Dios ang tawo sa iyang kaugalingong dagway, sa dagway sa Dios gibuhat niya sila, lalake ug babaye iyang gibuhat sila.

Ang dagway sa Dios

“Ang pag-ila sa usa ka gahum nga mas taas kay sa kaugalingon dili makapaubos sa bisan unsang paagi; hinoon, kini mohimaya. Kon kita makaamgo lamang nga gilalang kita sa dagway sa Dios, dili kita maglisud og duol ngadto Kaniya. … Kini nga kahibalo, naangkon pinaagi sa hugot nga pagtuo, makahatag og kalma ug halawum nga kalinaw.”

Presidente Thomas S. Monson, “The Lighthouse of the Lord,” Ensign, Nob. 1990, 95–96.

[Buhaton] nato

Kining labaw sa usa [plural] nga pagkasulti ingon og ang Dios dunay lain pang kaistorya—tungod kay Siya dihay kaistorya. Si Joseph Smith mitudlo, “Sa sinugdanan, ang pangulo sa mga Dios mipatawag og konseho sa mga Dios; ug sila nanagtigum ug mimugna og usa ka plano aron paglalang sa kalibutan ug tawhan kini” (History of the Church, 6:308). Kini nga konseho naglakip ni Ginoong Jesukristo ug sa uban (tan-awa sa Moises 2:26–27; Abraham 4:26 –27).

Sumala sa atong panagway

“Ang Dios Mismo usa ka tawo kaniadto sama kanato karon, ug nahimaya nga tawo, ug naglingkod sa trono sa kalangitan! Mao kana ang mahinungdanong sekreto. Kon ang tabil pagabuksan karon, ug … kon kamo makakita Kaniya karon, makakita kamo Kaniya sama sa porma sa usa ka tawo—sama sa inyong mga kaugalingon sa pagkatawo.”

Mga Pagtulun-an sa mga Presidente sa Simbahan: Joseph Smith (2007), 48.

“Ang tawo anak sa Dios, giporma sa balaanon nga panagway ug gitugahan sa balaanon nga mga kinaiya, ug bisan gani ingon nga ang masusong anak nga lalaki sa usa ka yutan-ong amahan ug inahan makasarang sa tukmang panahon nga mahimong usa ka hingkod nga tawo, sa ingon usab nga ang wala pa mapalambo nga anak sa celestial nga ginikanan makasarang, pinaagi sa kasinatian uban sa katuigan ug sa dili masukod nga tagal sa panahon, sa paglambo ngadto sa pagka-Dios.”

Sa Unang Kapangulohan, “The Origin of Man,” Improvement Era, Nob. 1909, 81; Ensign, Peb. 2002, 30.

Magabuot

“Ang yuta ug tanang mga butang niini kinahanglang gamiton sa responsabling paagi sa pagsuporta sa tawhanong pamilya. Bisan pa niana, ang tanan mga tinugyanan—dili mga tag-iya—ibabaw niining yuta ug sa kaabunda niini ug may tulubagon sa atubangan sa Dios alang sa unsay ilang gibuhat sa Iyang mga gilalang.”

“Environmental Stewardship and Conservation,” mormonnewsroom.org; tan-awa usab sa Doktrina ug mga Pakigsaad 104:13–15.

Lalaki ug babaye

“Tanan nga mga lalaki ug babaye may pagkasama sa tibuok kalibutan nga Amahan ug Inahan ug literal nga mga anak sa Dios.”

Ang Unang Kapangulohan, “The Origin of Man,” Improvement Era, Nob. 1909, 78; Ensign, Peb. 2002, 29.

“Ang pagkalalaki ug pagkababaye usa ka mahinungdanon nga kinaiya sa tagsa-tagsa sa kinabuhi nga wala pa dinhi sa yuta, sa pagkamortal, ug sa walay katapusan nga pag-ila ug katuyoan.”

“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129.