Si Sister Spafford Namulong Kanako

Sandy Howson, Ohio, USA

Nagdula ko og restaurant game sa internet usa ka gabii sa dihang milabay ang akong bana ug mipahibalo nga matulog na siya.

“Mosulod ra ko dayon,” giingnan nako siya.

“Motuo ko kon makakita na ko,” miingon siya.

Nagdula ko og usa ka game sa internet diin nagluto ko og virtual nga pagkaon sa virtual nga restaurant alang sa virtual nga mga customer. Akong gitan-aw ang screen sa computer ug miingon, “Sa tinuod lang, aduna koy pagkaon nga mahuman na sulod sa 15 minutos.”

Aron magpalabay sa oras samtang naghulat ko, mipunit ko sa Anak nga mga Babaye sa Akong Gingharian: Ang Kasaysayan ug Buhat sa Relief Society, nga diha ra sa lamesa sukad nga ako kining nadawat sa Relief Society. Gisugdan nako og basa ang pasiuna. Sa ikatulo nga pahina akong nakaplagan ang mosunod nga pahayag ni Belle S. Spafford, ikasiyam nga kinatibuk-ang presidente sa Relief Society.

“Ang kasarangan nga babaye karon, nagtuo ko,” siya misulat, “maayong mohatag og bili sa mga butang nga siya interesado, motimbang-timbang sa mga kalihokan nga iyang apilan, ug unya molihok aron nga masayon ra ang iyang kinabuhi, ug mopahimutang og una sa mga butang nga dunay importansya, naghatag og gibug-aton sa mamahimong ganti nga labing talagsaon ug labing malungtaron, ug ilikay ang iyang kaugalingon sa mga kalihokan nga minus ang bili” (2011, xiii).

Gawas sa mga kasulatan, walay bisan unsang butang nga akong nabasa nga naka-impluwensya kanako og maayo. Kini nga babaye kinsa namatay kapin na sa 30 ka tuig namulong ngari kanako. Ang iyang mga pulong ingon og mas may kalabutan sa karon kay sa panahon nga iya kining gisulti.

Diha-diha dayon akong nahibaloan nga dili na gyud ko magdula pag-usab sa Internet. Gipalung nako ang computer, mihigda, ug akong gisultihan ang akong bana sa akong desisyon. Pagkasunod adlaw wala gani nako gi-on ang computer. Hinoon, gihunahuna nako kon pila ka oras ang akong nausik niadtong mga dula sa kada adlaw.

Gi-multiply nako ang tulo ka oras sa 365 (ka adlaw sa usa ka tuig) ug mibahin sa 24 (oras sa usa ka adlaw). Nahingangha ko sa pagkahibalo nga aduna koy giusikan nga 45.62 ka adlaw matag tuig. Kadtong bililhon nga mga takna ug adlaw nawala hangtud sa kahangturan. Unta akoa kadtong gigahin sa pagbasa sa akong mga kasulatan, nakig-uban sa akong bana ug mga anak, nagsebisyo sa uban, o naghimo sa akong mga calling.

Ang mga General Authority kanunayng naghisgut bahin niini atol sa kinatibuk-ang komperensya. Apan wala gyud nako masabti kining mensahe, ug naghunahuna ko nga dili kini magamit ngari kanako.

Mapasalamaton ko nga ang Espiritu Santo mitabang nako nga makaamgo nga ang mga General Authority—ug si Belle S. Spafford—namulong ngari kanako.