Mensahe sa Visiting Teaching
Diosnong Kinaiya ni Jesukristo: Puno sa Gugma nga Putli ug Paghigugma
Tun-i sa mainampuong paagi kini nga materyal ug tinguhaa nga masayud unsay angay nga ipakigbahin. Sa unsang paagi nga ang pagsabut sa balaanong mga kinaiya sa Manluluwas makapalambo sa inyong hugot nga pagtuo diha Kaniya ug mopanalangin niadtong inyong giamuma pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Ang Impluwensiya sa Matarung nga mga Babaye, ni Julie Rogers
Ang Giya ngadto sa mga Kasulatan naghubit sa gugmang putli isip “ang pinakataas, pinakahalangdon, pinakalig-on nga matang sa gugma” (“Gugma nga Putli”). Kini mao ang tiunay nga gugma ni Jesukristo. Samtang kita magkat-on ni Jesukristo ug maningkamot nga mahimong sama Kaniya, kita magsugod sa pagbati sa Iyang tiunay nga gugma sa atong mga kinabuhi ug mahimong madasig sa paghigugma ug pagserbisyo sa uban sama sa Iyang gihimo. “Ang gugmang putli mao ang pagbaton og pailub sa usa ka tawo kinsa mipakyas kanato,” miingon si Presidente Thomas S. Monson. “Kini ang pagbatok sa aghat sa pagkadaling masilo. Kini ang pagdawat sa kahuyang ug mga kasaypanan. Kini ang pagdawat sa mga tawo kon unsa man gayud sila. Kini ang pagtan-aw lapas sa pisikal nga panagway ngadto sa mga kinaiya nga dili mapalong sa pagdagan sa panahon. Kini ang pagbatok sa aghat sa pagkategoriya sa uban.”1
Sa Basahon ni Mormon, atong nakat-unan ang importanting kamatuoran nga kita “mag-ampo ngadto sa Amahan uban sa tibuok kusog sa kasingkasing, nga kamo unta mapuno niini nga gugma, diin siya mitugyan diha sa tanan kinsa tinuod nga mga sumusunod sa iyang Anak, nga si Jesukristo; aron mahimo kamo nga mga anak sa Dios; nga kon siya moabut kita mahisama kaniya, kay kita makakita kaniya nga mao gihapon; nga kita mahimo nga makabaton niini nga paglaum; aron mahimo kita nga putli ingon nga siya putli” (Moroni 7:48).
Dugang nga mga Kasulatan
Juan 13:34–35; 1 Mga Taga-Corinto 13:1–13; 1 Nephi 11:21–23; Ether 12:33–34
Gikan sa Atong Kasaysayan
“Usa ka sister nga bag-o lang nabiyuda mapasalamaton sa mga visiting teacher kinsa nagbangutan uban kaniya ug mihupay kaniya. Siya misulat: ‘Hilabihan ang akong panginahanglan og tawo kinsa akong maduol; usa ka tawo nga maminaw kanako. … Ug sila naminaw. Sila mihupay kanako. Mibakho sila uban kanako. Ug sila migakos kanako … [ug] mipagawas kanako gikan sa kawalay paglaum ug kasubo sa unang mga bulan sa pag-inusara.’
“Laing babaye ang mi-summarize sa iyang pagbati dihang nadawat niya ang tinuod nga gugmang putli gikan sa usa ka visiting teacher: ‘Nahibalo ako nga labaw pa ako kaysa numero lang nga naa sa mga record book nga iyang bisitahanan. Nahibalo ako nga naghunahuna siya kanako.’”2
Sama niini nga mga sister, daghang mga Santos sa Ulahing mga Adlaw sa tibuok kalibutan ang makapamatuod sa kamatuoran niini nga pahayag ni Presidente Boyd K. Packer (1924–2015), Presidente sa Korum sa Napulog Duha ka mga Apostoles: “Pagkamakahupay nga masayud nga bisan asa ang [usa ka pamilya] moadto, ang Church family nagahulat kanila. Gikan sa adlaw nga sila moabut, mahisakop sila sa usa ka korum sa priesthood ug siya mahisakop sa Relief Society.”3