Mga Pagpamalandong
Mga Pumpkin o mga Melon?
Ang tagsulat nagpuyo sa Utah, USA.
Usahay walay sayop nga pagpili. Adunay usa lamang ka pagpili.
Paghulagway pinaagi ni Carolyn Vibbert
Ang akong amahan nasurprisa sa pagdiskubre nga ang mga liso sa pumpkin nga iyang gitanom sa miaging tuig mitubo sa tunga-tunga sa dapit sa melon karong ting-init. Maayo og tubo ang mga melon—mao usab ang mga pumpkin. Maayo kaayo, gani, nga ang akong amahan gusto nga magpadayon og tubo ang mga pumpkin. Apan siya nasayud nga kon buhaton niya kini, ang mga pumpkin mopugong sa pagtubo sa mga melon.
Mao nga kinahanglan siyang mopili. Mahimo niyang ibton ang mga pumpkin aron ang melon dunay mas maayong higayon sa pagtubo o pasagdan ang pumpkin nga motubo ug posibling mopig-it sa mga tanom nga melon, nga makapakunhod sa abut sa duha. Mga pumpkin o mga melon? Kini nga pagpili tali sa duha ka maayo nga mga opsyon.
Sa pagtimbang-timbang sa duha, ang akong amahan mihukom sa pag-ibut sa mabungahong tanom nga pumpkin. Dili lamang nga ulahi kini mitubo, apan siya mihukom nga gusto niya ang giplano nga mga melon labaw pa kay sa iyang gusto sa surprisa nga mga pumpkin.
Kini nga kasinatian nakaaghat kanako sa paghunahuna mahitungod sa mga pagpili nga atong himoon, ilabi na sa atong mga pakigrelasyon sa uban. Bisan sa atong pamilya, atong mga higala, atong employer, o kadtong atong gika-date o minyoan, kon ang pagpili tali sa duha ka maayo nga mga butang, ang pag-ila sa husto o labing maayo nga opsyon usahay lisud, ilabi na kon kita gusto nga molikay sa sayop nga mga pagpili. Ang kahadlok sa paghimo og sayop nga pagpili usahay dili makapalihok nato, ug kana nga kahadlok makapugong nato sa pagpadayon diha sa hugot nga pagtuo. Apan ang tinuod, usahay walay sayop nga pagpili. Adunay lay kapilian. Sa kaso sa akong amahan, iyang gibase ang iyang desisyon sa unsay mas bililhon kaniya. Dili siya ganahan nga motan-aw nga mamatay ang mga pumpkin, apan siya nasayud nga iyang pagabasulan ang kadaot nga mahimo niini ngadto sa mga melon unya.
Sa kinabuhi, pipila ka mga pagpili nga atong giatubang sa kasagaran dili importante, sama sa, unsa nga pagkaon ang akong kan-on sa pamahaw? Unsa ang kolor sa sinina ang akong isul-ob karon? Kon mag-atubang og pagpili tali sa duha ka maayo nga mga butang, tingali mahimo natong buhaton sama sa gibuhat sa akong amahan ug mangutana, “Unsa man ang mas bililhon nako?” Dayon maghimo og desisyon ug magpadayon diha sa hugot nga pagtuo, magsalig sa Ginoo sa pagkorihir kanato kon kita masayop.
Apan ang pipila ka mga pagpili importante kaayo. Si Presidente Thomas S. Monson kausa miingon: “Ang mga desisyon anaa kanunay sa atong atubangan. Aron sa paghimo niini sa maalamong paagi gikinahanglan ang kaisug—ang kaisug nga mosulti og dili, ang kaisug nga mosuti og oo. Ang mga desisyon mao ang motino sa kapalaran,” (“Ang Tulo ka mga K sa Pagpili,” Liahona, Nob. 2010, 68). Kon mag-atubang niining mga matanga sa mga pagpili, ang usa ka mas maayo nga ipangutana mao ang, “Unsay mas bililhon sa Ginoo?” Kon kita nasayud sa tubag niana nga pangutana, ang kinahanglan natong buhaton mao ang pagpahiangay sa atong mga mithi sa Iyaha ug dayon sundon kana nga pagpili. Sa kanunay kini mao ang sakto.