Talagsaong Batan-ong mga Lalaki ug Batan-ong mga Babaye diha sa mga Kasulatan
Ang tagsulat, kinsa usa ka magtutudlo sa seminary, nagpuyo sa Germany ug namatay niadtong 2012.
Makakat-on ug makasunod kamo sa mga ehemplo sa daghang matarung nga kabatan-onan kansang mga istorya gipreserbar diha sa mga kasulatan.
Paghulagway pinaagi ni Andrew Bosley
Ang Ginoo nahigugma sa mga kabatan-onan sa Simbahan. Siya adunay dakong pagsalig diha kaninyo. Sa matag panahon, ang Ginoo nagdasig sa maisug nga batan-ong mga lalaki ug batan-ong mga babaye sa paggiya ug sa pagpanalangin sa Iyang mga katawhan. Nagkinahanglan Siya sa ilang kamamugnaon, kaisug, ug pagkaorihinal. Kini mao na gayud kanunay ug magpadayon nga maingon niana.
Ang daghang mga ehemplo sa batan-ong mga bayani bililhon kaayo nga makita diha sa mga kasulatan. Bisan tuod sila nanimuyo sa dugay nang panahon, kamo makasunod sa ilang mga ehemplo ug makasabut sa ilang kinabuhi. Sila adunay mga problema sa pamilya; sila nagpuyo taliwala sa dili matarung nga mga katawhan; sila nag-atubang sa “Mga Goliath,” apan ang ilang kaisug, pagkamasulundon, ug hugot nga pagtuo kang Jesukristo nakatabang nga mabuntog ang ilang mga hagit—sama nga kini nga mga kinaiya makatabang usab kaninyo.
Abraham
Ang determinasyon, kaisug, ug kaandam ni Abraham sa pagpataas sa iyang tingog batok sa kadautan talagsaon kaayo—mas labaw pa ka talagsaon kon hunahunaon nga ang iyang amahan nagsimba og mga dios-dios. Isip usa ka batan-ong lalaki, maisugon siyang mibarug alang sa pagkamatarung nga siya hapit mapatay isip usa ka sakripisyo. (Tan-awa sa Abraham 1:2–7.)
Jose sa Ehipto
Siya 17 anyos sa dihang ang iyang magulang nga igsoong mga lalaki mibaligya kaniya ngadto sa pagkaulipon, apan uban sa mga panalangin sa Ginoo, si Jose mao ang nakahimo og usa ka butang nga maayo gikan niining lisud nga sitwasyon. Siya wala mabuntog, tungod kay nagdumili siya sa pag-undang. Ang iyang pagsalig sa Ginoo padayon. Ang kahalangdon sa pagkatawo ni Jose napakita sa halangdong paagi nga iyang gipasaylo ang mga inhustisya nga gihimo ngadto kaniya. (Tan-awa sa Genesis 37; 45.)
David
Isip usa ka tin-edyer si David usa ka magbalantay sa karnero, ug siya nakig-away batok sa usa ka oso ug usa ka leon sa pagpanalipod sa mga karnero sa iyang amahan. Ang iyang pagsalig sa kaugalingon wala magagikan sa iyang mga abilidad isip usa ka magbalantay sa karnero; nagagikan kini sa iyang hugot nga pagtuo sa Langitnong Amahan, sama sa gipakita sa iyang pakig-away batok ni Goliath. (Tan-awa sa 1 Samuel 17:32–54.)
Ester
Determinado siya sa pagbutang sa iyang kaugalingong kinabuhi sa peligro aron sa pagluwas sa iyang katawhan. Dili ang kaanyag ni Ester apan ang iyang espirituhanong mga kinaiya nakapahimo kaniya nga usa ka talagsaon nga tawo. (Tan-awa sa Ester 4–5.)
Daniel
Paghulagway pinaagi ni Andrew Bosley
Mituman siya sa balaod sa Ginoo sa panglawas bisan ang uban nga naglibut kaniya wala magbuhat sa ingon. Nag-ampo siya, bisan tuod ang pag-ampo ngadto sa Langitnong Amahan supak sa mando sa hari. Tungod sa iyang pagkamatarung ug kamadayagon sa inspirasyon sa Espiritu, gipanalanginan si Daniel sa Ginoo og gasa sa paghubad sa mga damgo ug panan-awon. Nakadawat siya og gahum ug kaalam gikan sa Langitnong Amahan nga sa panahon sa kakuyaw, ang gahum sa langit iyang magamit. (Tan-awa sa Daniel 1; 6.)
Nephi
Si Nephi mao ang usa ka talagsaon nga ehemplo sa dihang miingon siya, “Ako moadto ug mobuhat sa mga butang nga ang Ginoo nagsugo” (1 Nephi 3:7). Siya adunay kaisug sa pagbuhat sa unsay gisugo kaniya. Nagpuyo ba siya og komportable nga panimalay? Wala, nagpuyo siya sa kamingawan sulod sa daghang mga tuig. Maayo ba ang dagan sa iyang kinabuhi? Dili, ang iyang igsoong mga lalaki nasuko kanunay kaniya ug usahay mosulay sa pagpatay kaniya. Bisan niining tanan, siya misunod sa sugo sa Ginoo.
Duha ka Libo nga Batan-ong mga Ammonites
Kining batan-ong mga lalaki nga gipadako sa matinud-anong mga ginikanan, ug ang ilang hugot nga pagtuo sa mga pulong sa ilang mga inahan mipanalangin kanila. Nakakat-on sila sa pagpaminaw ug pagsunod sa hingpit, ug sa ilang mga pakig-away sila wala magduhaduha nga ang ilang Amahan sa Langit manalipod kanila. (Tan-awa sa Alma 56:45–48.)
Mormon
Sa dihang 15 anyos pa siya, ang Ginoo mibisita kaniya tungod kay siya mapainubsanon, limpyo, ug putli, bisan pa sa kahugaw sa mga tawo nga naglibut kaniya. Usab sa edad nga 15, si Mormon nahimong lider sa kasundalohan. Sa wala madugay gisangunan siya sa pagtipig sa mga kasulatan. (Tan-awa sa Mormon 1–2.)
Joseph Smith
Sa edad nga 14 siya nagsiksik sa mga kasulatan ug nag-ampo aron masayud hain nga simbahan ang apilan. Ang Ginoo mitawag kaniya sa pagpahiuli sa ebanghelyo ug sa Simbahan ni Jesukristo. Gipahinungod ni Joseph ang iyang tibuok kinabuhi sa pagtuman niana nga buluhaton, bisan pa sa daghang mga babag ug mga kalisdanan. Sa edad nga 17 gibisitahan siya ni anghel Moroni, kinsa mipakita kaniya sa bulawan nga mga palid. Bisan pa sa kabatan-on, si Joseph Smith usa ka gamhanan nga magtutudlo ug usa ka talagsaong ehemplo niadtong naglibut kaniya. (Tan-awa sa Joseph Smith—Kasaysayan 1.)
Sa Inyong Adlaw
Milabay na ba ang panahon sa talagsaong batan-ong mga lalaki ug babaye? Wala! Ang anghel nga si Moroni misulti ni Joseph Smith nga ang panagna ni Joel hapit na matuman:
“Igabu-bu ko [ang Ginoo] ang akong espiritu ibabaw sa tanan nga unod; ug ang inyong mga anak nga babaye ug ang inyong mga anak nga lalaki managpanagna, ang inyong mga tawong tigulang managdamgo sa mga damgo, ang inyong batan-ong mga lalaki makakita sa mga panan-awon:
“Ug ingon man usab ibabaw sa mga sulugoon nga lalaki ug ibabaw sa sulugoong mga babaye niadtong mga adlawa igabu-bu ko ang akong espiritu” (Joel 2:28–29; tan-awa sa Joseph Smith—Kasaysayan 1:41).