Mga Pangutana ug mga Tubag
“Sa dihang ang akong mama nagmasakiton, nagpuasa ug nag-ampo mi alang kaniya, apan siya namatay gihapon. Unsaon nako aron makadawat niana?”
Subo kini nga panahon sa imong kinabuhi. Normal ra nga gusto og kahupayan ug tubag sa imong daghang mga pangutana: “Nganong wala siya mabuhi? Makita pa ba nako siya pag-usab? Unsaon nako sa pagpadayon kon wala siya?”
Ang ebanghelyo ni Jesukristo nagtanyag og kahupayan ug mga tubag. Ang Ginoo misaad, “Bulahan silang tanan nga nagbangutan, kay sila pagahupayon” (3 Nephi 12:4). Tinguhaa ang Espiritu Santo, kay Siya ang Maghuhupay.
Naghunahuna ka kon natubag ba ang imong mga pag-ampo. Makasiguro ka: ang Langitnong Amahan kanunay maminaw sa atong mga pag-ampo. Ang mga kasulatan ug buhing mga propeta nagsaad kanato nga kana tinuod. Unsa ang gisulti sa Ginoo ngadto ni Joseph Smith mao usab kanimo: “Ang imong mga pag-ampo ug pag-ampo sa imong mga kaigsoonan miabut sa akong dunggan” (D&P 90:1). Apan kinahanglan natong hinumduman nga ang Langitnong Amahan motubag sa atong mga pag-ampo base sa usa ka mahangturon nga panglantaw (tan-awa sa Isaias 55:8–9). Mao nga kita mosunod sa ehemplo sa Manluluwas sa pagpangayo og mga panalangin apan sinserong mangayo sa kabubut-on sa Amahan nga maoy matuman (tan-awa sa Lucas 22:42).
Bisan tuod kini lisud, kini nga pagsulay mahimong usa ka panahon sa pagtubo alang kanimo. Ikaw makakat-on sa pagbaton og hugot nga pagtuo sa kabubut-on sa Dios, bisan kon nagpasabut kana nga ang imong mama wala maayo. Siyempre ikaw gusto nga siya mabuhi. Apan ang pagsulay niining mortal nga kinabuhi mao ang pagsalig sa Dios sa tanang panahon—ilabi na kon kini lisud. Kon ikaw mosalig Kaniya, “tanan nga mga butang maghiusa sa paglihok alang sa inyong kaayohan” (D&P 90:24).
Ang Kamatayon Kabahin sa Plano sa Dios
Sumala sa plano sa kalipay sa atong Langitnong Amahan alang kanato, ang atong pagbalik ngadto sa Iyang presensya gibase sa kamatayon ug pagkabanhaw, nga makatabang kanato sa pag-usab gikan niining mortal nga kahimtang ngadto sa usa ka imortal nga kahimtang. Kinahanglan lang ka nga modawat sa kamatuoran nga ang kamatayon kabahin sa plano ug motuo nga usa ka adlaw ikauban nimo pag-usab ang imong namatay nga inahan. Hibaloi nga ang imong inahan atua sa kalibutan sa espiritu ug nga siya naghulat kanimo.
David M., edad 18, Western Kasai, Democratic Republic of the Congo
Siya atua sa Kalibutan sa Espiritu
Ang akong inahan nadayagnos nga adunay kanser duha ka tuig na ang milabay. Wala ko ganahi nga nagtan-aw kaniya nga nagping-it sa kasakit, ug nanghinaut ko nga dunay mahimo. Ug bisan tuod nga miarang-arang ang akong inahan, kadto usa ka lisud nga kasinatian. Ang imong inahan atua sa usa ka dapit diin siya dili mobati og kasakit o pag-antus. Lisud ang dili na makakita kaniya, apan wala gayud ikaw mag-inusara. Kanunay siyang mahigugma kanimo, ug ang atong Langitnong Amahan kanunay nga anaa ra sa pagbayaw kanimo kon ikaw nagsubo. Dili gayud ikaw biyaan. Si Jesukristo nag-antus sa kasakit sa kalibutan; Siya nasayud kon unsay imong gibati ug unsa ang imong nasinati. Buhata sama sa akong gibuhat sa akong panahon sa pagsulay: duol ngadto Kaniya ug Siya mohimo sa imong mga palas-anon nga gaan.
Shiloh W., edad 18, Chihuahua, Mexico
Ang Imong Pamilya Magkahiusa Pag-usab
Ang akong inahan namatay sa dihang ako nag-edad og 12 anyos. Nianang higayuna dili pa ko miyembro sa Simbahan. Sa dihang siya nasakit, nag-ampo ko og maayo nga ang akong inahan mamaayo ra. Ako adunay dakong pagtuo, ug ako misalig sa Dios sa paglaum nga unta ang iyang maayong panglawas mabalik ra. Subo lang wala siya mamaayo. Nakapangutana ko ngano nga siya mamatay sa sayong pangidaron ug mibiya nako samtang ako usa pa ka tin-edyer. Nasuko ko ug miabut sa punto diin ako nagduha-duha kon duna bay Dios. Karon nga ako usa ka miyembro sa Simbahan, ako nakasabut sa plano sa kaluwasan. Ako nasayud nga siya naghulat kanako ug nga ang among pamilya magkahiusa pag-usab.
Inaê L., edad 19, Minas Gerais, Brazil
Ang mga Pagsulay Motudlo Kanato
Ang akong mama namatay tulo ka tuig na ang milabay. Ang imong relasyon sa imong Langitnong Amahan ug sa Manluluwas motubo kon ikaw modangup Kanila sa imong panahon sa panginahanglan. Imong makaplagan nga kini nga pagsulay, bisan grabe kaayo, mahimo usab nga usa ka panalangin. Pag-ampo ngadto sa imong Amahan sa Langit alang sa kalinaw ug kahupayan. Salig sa plano sa Ginoo alang kanimo. Dawata nga ang Langitnong Amahan nasayud kon asa kita paingon ug unsay atong gikinahanglan aron makaabut didto. Ang Ginoo nahigugma kanimo ug gusto nga ikaw adunay hingpit nga kalipay. Ang atong mga pagsulay gituyo aron sa pagtudlo ug paglig-on kanato.
Meghan B., edad 18, Ontario, Canada
Ikaw Makakita Kaniya Pag-usab
Ang inahan sa akong mama namatay sa dihang ang akong mama 17 anyos lang. Ang pamilya nagpuasa ug nag-ampo alang kaniya sulod sa pipila ka semana sa wala pa siya mamatay. Gihatagan usab siya og panalangin sa priesthood. Ang labing importante nga butang nga nakahatag sa akong mama og kalinaw mao ang pagkasayud nga iyang makita ang iyang inahan pag-usab sa sunod nga kinabuhi. Ang tumong sa akong mama mao ang pagpakabuhi aron siya mahimo nga takus niana nga panalangin. Masulub-on ko nga dili gayud nako siya makita niini nga kinabuhi, apan ako naghinam-hinam sa panahon nga kami magkita sa katapusan.
Cari R., edad 15, Utah, USA