Tapusa nga ang Imong Sulo Gasiga pa Gihapon

Ni Presidente Dieter F. Uchtdorf

Ikaduhang Magtatambag sa Unang Kapangulohan

Sa karaang pahanon sa Greece, ang mga managan misalmot sa lumba sa dagan nga gitawag og lampadedromia.¹ Sa lumba, ang managan magdala og sulo ug ipasa kini ngadto sa sunod modagan hangtud nga ang katapusang sakop sa team makaabut sa finish line.

Ang premyo dili iganti ngadto sa team nga kinakusgan nga nanagan—iganti kini ngadto sa unang team nga nakaabut sa finish line nga ang sulo nagsiga pa gihapon.

Adunay halawom nga leksyon niini, nga gitudlo sa mga karaan ug modernong propeta: samtang importante nga sugdan ang lumba, mas importante nga atong humanon uban sa sulo nga nagsiga gihapon.

Si Solomon Misugod nga Lig-on

Ang bantogan nga si Haring Solomon usa ka ehemplo sa usa ka tawo kinsa misugod nga lig-on. Sa dihang batan-on pa siya, siya “nahigugma sa Ginoo, naglakaw sa kabalaoranan ni David nga iyang amahan” (1 Mga Hari 3:3). Ang Dios nahimuot kaniya ug miingon, “pangayo kong unsay akong ihatag kanimo” (1 mga Hari 3:5).

Imbis mangayo og katigayunan o taas nga kinabuhi, si Solomon nangayo og “masinabtanong kasingkasing sa paghukom sa imong katawhan, aron maila ko ang kalainan sa maayo ug dautan” (1 Mga Hari 3:9).

Kini nakapahimuot sa Ginoo pag-ayo nga Siya mipanalangin ni Solomon dili lamang sa kaalam apan usab sa katigayunan nga dili masukud ug taas nga kinabuhi.

Bisan og si Solomon maalamon gayud ug nakahimo og daghang talagsaong butang, wala siya motapos nga lig-on. Subo lang, sa ulahing bahin sa iyang kinabuhi, si “Solomon nagbuhat niadtong dautan sa pagtan-aw sa Ginoo, ug wala maglakat nga hingpit sa Ginoo” (1 Mga Hari 11:6).

Pagtapus sa Atong Kaugalingong Lumba

Pila ka higayon nga atong gisugdan ang usa ka butang ug wala tapusa? Mga pag-diet? Mga programa sa ehersisyo? Mga pasalig sa pagbasa sa mga kasulatan kada adlaw? Mga desisyon nga mahimong mas maayong mga disipulo ni Jesukristo?

Kapila man nato himoa ang mga resolusyon sa Enero ug determinado kaayong mopadayon niini sulod sa pipila ka adlaw, pipila ka semana, o bisan pipila ka bulan nga sa pagka Oktobre, ang determinasyon sa gipanaad mapalong na nga lupig pay bugnawng abo?

Usa ka adlaw nakakita ko og kataw-anan nga hulagway sa usa ka iro nga naghigda tupad sa papel nga iyang gikunis-kunis. Mabasa kini nga, “Sertipiko sa Pagbansay sa Pagkamasulundon nga Iro.”

Ingon ta niana usahay.

Aduna kitay maayong mga tumong; nagsugod ta nga lig-on; gusto natong mahimong kinamaayohan. Apan sa katapusan atong pasagdan ang atong mga resolusyon nga makunis-kunis, mabasura, ug mahikalimtan.

Tawhanong kinaiya nga mapandol, mapakyas, ug usahay gustong moundang sa lumba. Apan isip disipulo ni Jesukristo nanaad ta nga dili lang mosugod sa lumba apan sa pagtapus usab niini—ug tapuson kini uban sa sulo nga hayag pang nagsiga. Ang Manluluwas misaad sa Iyang mga disipulo, “Apan ang molahutay hangtud sa katapusan mamaluwas” (Mateo 24:13).

Tuguti ko sa pagbatbat sa unsay gisaad sa Manluluwas sa atong panahon: Kon kita mosunod sa Iyang mga sugo ug motapos uban sa atong sulo nga nagsipa pa gihapon, kita makabaton og kinabuhing dayon, diin mao ang labing mahinungdanon sa tanan nga mga gasa sa Dios (tan-awa sa D&P 14:7; tan-awa usab sa 2 Nephi 31: 20).

Ang Kahayag Nga dili Gayud Mamatay

Usahay human sa pagkapandol, kapakyas, o gani pag-undang, mawad-an kita sa kadasig ug magtuo nga ang atong kahayag napalong ug napildi na sa lumba. Apan ako mopamatuod nga ang Kahayag ni Kristo dili mahimong palungon. Nagdan-ag kini sa kinangitngitan nga kagabhion ug modan-ag pag-usab sa atong mga kasingkasing kon ato lang ikiling ang akong mga kasingkasing ngadto Kaniya (tan-awa sa 1 Mga Hari 8:58).

Dili importante kon kapila o sa unsang paagi nga napukan kita, ang Kahayag ni Kristo hayag kaayo nga nagsiga. Ug bisan sa malisud nga panahon, kon maningkamot lang gyud kita sa pagsunod Kaniya, ang Iyang kahayag mobuntog sa atong mga kalisud, ug molig-on sa atong mga kalag.

Kining lumba sa pagkadisipulo dili lumba sa mubo lang nga panahon; usa kini ka maraton. Ug dili kaayo mahinungdanon kon unsa ka paspas ang atong paglambo. Sa pagkatinuod, ang bugtong paagi nga mapildi kita sa lumba mao ang pagpadala sa mga tintasyon ug pag-undang.

Kon atong ipadayon ang atong paningkamot ug padayon nga mopaduol ngadto sa atong Manluluwas, magmalampuson kita uban sa atong sulo nga hayag nga magsiga.

Tungod kay ang sulo dili mahitungod kanato o sa unsay atong gibuhat.

Kini mahitungod sa Manluluwas sa kalibutan.

Ug mao kana ang Kahayag nga dili gayud maawop. Mao kini ang kahayag nga molamoy sa kangitngit, moayo sa atong mga espirituhanong samad, ug molig-on bisan sa tunga-tunga sa kinalawman nga kasubo ug sa dili masukod nga kasakit.

Mao kini ang Kahayag nga milapaw sa panabut.

Hinaut nga matag usa kanato motapos sa dalan nga atong gisugdan. Ug uban sa tabang sa atong Manluluwas ug Manunubos, si Jesukristo, kita malipayong motapos ug uban sa atong mga sulo nga nagsiga lang gihapon.