Pagserbisyo sa Simbahan
Igo na ba ang Akong Nabuhat?
Ang tagsulat nagpuyo sa Utah, USA.
Ang leksyon mahitungod sa nawala nga karnero nakatabang nako nga masabtan unsaon sa pagtuman ang akong calling sa labing maayo nga paagi.
Paghulagway sa litrato pinaagi ni Mike Boyland/iStock/Thinkstock ug Oleksiy Fedorov/Hemera/Thinkstock
Sa edad nga 23, gitawag ko isip presidente sa Relief Society sa among ward nga minyo nga mga estudyante. Nahinumduman nako kanang pagbati nga dili sarang, inubanan sa tinguha nga buhaton nako ang labing maayo. Mahinangpon ko ug naghinam-hinam sa pag-alagad apan nagduha-duha sa akong abilidad nga mamahimong maayong lider.
Paghuman sa pipila ka bulan isip presidente sa Relief Society, akong gibati nga dili pa igo ang akong nahimo. Gusto ko nga adunay kalabutan uban sa mga sister ug makasabut sa ilang indibidwal nga mga panginahanglan, apan mibati ko nga nagkulang.
Nakig-istorya ko uban sa akong bishop ug mipadayag sa akong mga kabalaka. Gipasabut nako kon sa unsang paagi nga dili gyud nako matabangan ang tanang mga sister nga buot nakong tabangan. Gihulagway nako ang akong tinguha nga lima pa lang unta ko kabuok aron mahuman ang trabaho sa paagi nga angayng humanon. Naningkamot ko nga mapadayag ang akong kabalaka sa pagpakatawa ug dili kaayo siryuso, apan ang akong mga mata napuno dayon sa mga luha sa kawalay kadasig. Si bishop mipahiyum ug mitanyag og pipila sa kinanindotan nga tambag sa pagpangulo nga akong nadawat sukad.
“Pamilyar ka ba sa sugilanon sa magbalantay kinsa, sa dihang nawad-an og usa sa iyang panon, gibiyaan ‘ang kasiyaman ug siyam’ sa pagpangita niini?” nangutana siya (tan-awa sa Lucas 15:4–7). Mitando ko.
“Daw adunay dako kaayong kaalam nga anaa nianang sambingay,” siya mipadayon. “Nasayud ang magbalantay nga ang kasiyaman ug siyam mamaayo ra kon siya mobiya kanila sa pagpangita sa nawala nga karnero.”
Dayon ang akong bishop mitanyag sa mosunod nga tambag:
“Abi nimo, ang kasiyaman ug siyam adunay talagsaong paagi sa pagbantay sa usag usa kon wala ka. Modasig ug magtinabangay kini og maayo sa usag usa. Mosugyot ko nga imong tutokan ang usa nga daw nahisalaag. Ang tanang nahabilin OK ra.”
Nabati nako ang lig-on nga pagsaksi nga unsay iyang gisulti nako tinuod ug nga dili ko kinahanglan magguol bahin sa entiro panon sa usa ka higayon. Ang akong tumong mao ang pagpangita niadtong kinsa nawagtang ug pagdapit kanila sa pagbalik sa panon. Sa ingon ana nga paagi, ang katuyoan sa Langitnong Amahan mapahinabo, ug mamahimo akong himan diha sa Iyang mga kamot.
Samtang akong gisunod ang tambag sa bishop, akong nabati ang dakong pagsabut sa paagi nga ang Ginoo buot nga ako moalagad diha sa Iyang gingharian. Nakadawat usab ko og espirituhanon nga katagbawan nga nagpalig-on kanako diha sa akong calling tungod sa akong pagserbisyo sumala sa gitudlo sa Manluluwas. Pinaagi sa gahum sa Espiritu Santo, ang akong bishop nakahatag nako og talagsaong gasa sa pagsabut ug pag-aninaw.
Ako mopamatuod nga kon kita mag-ampo ug magtinguha sa inspirasyon gikan sa atong mga lider sa priesthood, sila usab madasig sa pagpakita ngari kanato unsaon sa pagpangulo diha sa matarung nga mga pamaagi.