Unsa ka Importante Kini?

Kelly Laing, Washington, USA

Atol sa akong pagkadestino sa USS West Virginia, miabut ang usa ka tawag alang sa usa ka opisyal nga makasulti og Portuguese sa pag-adto sa tulo ka semana nga pagbinayloay sa Brazilian nga Navy. Ako lamang ang diha sa submarine force nga makasulti og Portuguese.

Ang akong unang gibati mao ang dili pag-adto. Bag-o lang kong nakahuman sa tulo ka bulan nga pagpatrol ug nagpaabut nga makita na nako ang akong pamilya, apan ang pagbinayloay wala mawala sa akong hunahuna. Midangop ko sa Langitnong Amahan sa pag-ampo, nakadawat og usa ka lig-on nga tubag nga ako kinahanglang moadto, ug midawat sa buluhaton.

Dihay daghang mga babag sa paghimo sa pagpangandam. Dihay higayon nga kaundangon na ko. Naghunahuna ko, “Unsa ka importante kini?” Ang Espiritu Santo, hinoon, midasig kanako sa pagpadayon.

Paghulagway pinaagi ni Allen Garns

Sa katapusan, human sa pipila ka kalangay, miabut ko sa Brazilian nga barko. Sa dihang giubanan ko ngadto sa kan-anan sa mga opisyal, ang kapitan sa barko nagsinggit ug nanulisok sa usa ka batan-ong opisyal. Ang kapitan nakakita kanako, mihunong, ug miingon sa putol-putol nga Iningles, “Ah, ang akong higala nga Amerikano miabut na. Welcome. Mahimo ba akong motanyag kanimo og mainom?”

Mitubag ko sa Portuguese nga ganahan kaayo ko og usa ka inila nga Brazilian nga soft drink nga wala na nako matilawi sukad sa akong misyon. Gisultihan ako niya nga ang barko aduna sa tanang matang sa bino, apan ako mipahayag nga dili ako moinom og alkohol.

Sa wala madugay dihay nanuktok sa akong kamarote. Sa dihang akong giablihan ang pultahan, ang batan-ong opisyal didto sa kan-anan nagbarug.

“Ikaw usa ka Amerikano,” siya miingon. “Ikaw dili moinom og alkohol. Ikaw makasulti og Portuguese. Tingali ikaw usa ka Mormon?”

“Oo, usa ako ka Mormon,” mitubag ko.

Migakos siya nako ug mihilak.

Kini nga opisyal, si Lt. Mendes, bag-o pa kaayo nga kinabig ug bag-ong nakagradwar sa Brazilian Naval Academy. Diha sa barko, nahibaloan dayon niya nga ang kapitan gusto nga siya moapil sa dili maayong mga kalihokan sa mga opisyal kon modunggo sila. Pero si Lt. Mendes kanunay moboluntaryo sa “in-port duty” ug aron makalikay sa port-of-call nga mga kalihokan. Gikapoy ang kapitan niini. Sa dihang misulod ko sa kan-anan, iyang gisinggitan si Lt. Mendes sa wala pag-apil.

“Mokuyog ka sa mga opisyal sa atong sunod nga port of call,” iyang gimandoan ang lieutenant. “Imong ipakita sa bisita nato nga opisyal nga Amerikano kon unsa ang paglingaw-lingaw. Nagpaabut siya niana kanato.”

Sa daghang mga bulan, si Lt. Mendes nag-ampo nga ang iyang kapitan makasabut ug modawat sa iyang mga baruganan. Sa akong pag-abut, ang panaghisgut sa ebanghelyo nahimong sentro sa kadaghanan nga panag-istoryahanay sa kan-anan. Giistoryahan namo ang uban pang mga opisyales mahitungod ni Joseph Smith, sa Pagpahiuli, sa Pulong sa Kaalam, ug sa balaod sa kaputli. Sa wala madugay ang mga pagbati ngadto ni Lt. Mendes nausab. Gikuha sa mga opisyal ang dayag nga gipahimutang nga pornograpiya, ug sa sunod nga pagdunggo nalingaw mi nga nangaon sa usa ka restawran imbis moadto og club.

Hapit na mahuman ang akong tulo ka semana, ug human sa daghan nga mga diskusyon uban sa kapitan ug sa mga opisyal mahitungod sa among mga gituohan, nahumok ang mga kasingkasing sa mga tawo. “Karon ako nakasabut,” gisultihan sa kapitan si Lt. Mendes sa wala pa ko mobiya, midugang nga siya dili na mosugo niya nga supak sa iyang mga baruganan.

Dili gayud nako makalimtan kini nga kasinatian. Si Lt. Mendes ug ako nakakat-on nga ang atong Amahan sa Langit nakaila tagsa-tagsa kanato, nahigugma kanato, ug nagpakabana sa atong personal nga kinabuhi.