Ang Akong Pagpangita sa Kamatuoran
Ang tagsulat nagpuyo sa California, USA.
Kanunay akong gitudloan nga walay Dios, apan mihukom ko nga akong sutaon mismo sa akong kaugalingon.
Paghulagway pinaagi ni Dan Burr
Gipadako diha sa usa ka dili palupig ug dili relihiyusong nasud sa Asya, sa kanunay aduna koy dakong tinguha nga magmalampuson nga tawo, apan wala koy bisan unsang mahangturon nga baruganan o kamatuoran aron mogiya kanako. Sa akong nasud, ang “kalampusan” nagpasabut og kaadunahan ug gahum.
Ang akong mga ginikanan kanunayng nagtudlo nako nga walay Dios. Alang nila, ang relihiyon o ang Dios binuang lang ug alang lamang sa huyang nga mga tawo. Sulod sa dugayng panahon gikonsiderar nako ang akong kaugalingon nga usa ka ateyista. Ilaha kong gitudloan nga kinahanglan dili ko mosalig ni bisan kinsa gawas lang sa akong kaugalingon. Busa gikan sa pagkabatan-on migamit ko sa akong taas nga ambisyon isip pagana sa akong pagtuon ug tumang pagtrabaho.
Ang akong mga ginikanan taas og pagdahum kanako. Buot nila nga kanunayng taas ang akong mga grado sa tanang higayon. Makapaguol nako ang makita ang ilang mga panagway nga mahiubos o makadungog nilang maglalis sa higayon nga bati ang akong grado. Uban sa akong regular nga buluhaton sa eskwelahan, kinahanglan usab ko nga mobuhat og dugang nga homework sa tapus semana aron magpabilin kong makakuha og gradong A.
Bisan nakatuman na sa mga tumong nga akong gitakda, gibati nako nga aduna pay daghang matuman sa akong kinabuhi. Sa kahiladman sa akong kasingkasing, kahibalo ko nga siguradong naa pa gayuy daghan niini.
Usa ka adlaw mihukom ko nga akong sutaon mismo kon aduna ba gyuy Dios. Kon anaa Siya, gusto kong makahibalo unsay Iyang gusto alang nako o kon ang relihiyon usa lang ba ka binuang nga gimugna sa imahinasyon sa katawhan. Wala ko nahadlok nga makadawat og bisan hain niining duha ka mga tubag. Gusto lang gyud nako ang kamatuoran.
Sa samang higayon, nasuod nako ang usa sa akong ka-team sa basketball nga ginganlan og Taylor. Usa ka buntag mihangyo ko nga iya kong pasakyon paingon sa eskwelahan. Misanong siya, apan kinahanglan mosayo kog usa ka oras aron mouban niya ngadto sa seminary. Nagduhaduha ko sa pagsanung, wala kahibalo kon unsa kana. Nalingaw ko sa seminary, bisan tungod sa unsay akong nabati kay sa unsay akong nakat-onan.
Wala madugay human niana, si Taylor mihangyo nako nga mosimba uban niya. Sa sinugdanan naghunahuna ko nga medyo laay ug wirdo, apan sa katapusan natandog ko sa mainiton ug malinawon nga pagbati nga akong nabati atol sa service.
Hinoon, wala pa gihapon ko maagni nga ang maayong pagbati may kalabutan sa Dios. Giunsa nako pagkahibalo nga dili ni gikan nako? Giunsa nako pagkahibalo nga wala nako buhata nga mibati ko sa ingon anang paagi?
Human sa daghang panaglantugi sa akong kaugalingon, akong giadto ang mama ni Taylor sa pagpangita og mga tubag. Miingon siya nako nga makadawat ko sa akong tubag pinaagi sa pagbasa sa mga kasulatan ug pag-ampo bahin sa mga tubag nga akong gipangita. Nag-ampo ko nga walay nadawat nga bisan unsang tubag ug nanlimbasug sa pagsunod sa mga lagda ug kasugoan nga ako pang gitun-an. Kadaghan kong nasagmuyo. Nagpaabut kog kahibulongan ug makapaukyab [dramatic] nga pagpakita sa Dios o ba kaha milagroso nga panghitabo aron maprobaran nga ang Dios tinuod. Una gyud, gusto ko og dili matandog nga pagpamatuod diha-diha dayon. Ang tinuod, sa dihang mas nag-ampo ko, mas klaro ang akong nabati bahin sa akong kinabuhi. Dihang mas misunod ko sa mga kasugoan, nahimo kong mas malipayon. Dihang mas mibasa ko sa kasulatan, nagkadaghan ang mga padayag nga akong nadawat. Sa hinay-hinay, ang akong pagpamatuod mitubo, sama sa nagsubang nga adlaw sa buntag.
Miabut og duha ka tuig una ko mihukom nga magpabunyag aron mamiyembro sa Ang Simbahan ni Jesukristo sa mga Santos sa Ulahing mga Adlaw. Bisan nagsunod ko sa una sa mga sumbanan sa moralidad ug mga baruganan, makaingon ko karon nga nakaplagan nako ang mahangturon ug labing mahinungdanong kamatuoran: ang Dios buhi. Si Jesus mao ang Kristo ang atong Manluluwas ug Manunubos. Mibukas ang kalangitan. Usa ka propeta sa Dios anaa sa yuta karon. Ang Pag-ula ni Jesukristo tinuod. Ang Dios mopasaylo gayud sa tanang makasasala nga mahinulsulon. Dili man ko sama ka utokan o sama ka maayo sa ubang tawo, apan ang kahibalo nga akong naangkon bililhon kaayo.