Pagpakabuhi uban sa Tinuod nga Katuyoan
Ni Randall L. Ridd
Nagserbisyo isip unang magtatambag sa kinatibuk-ang kapangulohan sa Young Men gikan sa 2013 hangtud sa 2015
Gikan sa tibuok kalibutan nga debosyonal alang sa mga young adult, “Pagpakabuhi nga may Katuyoan: Ang Kaimportante sa Tinuod nga Katuyoan,” pagkigpulong diha sa Brigham Young University–ldaho niadtong Enero 11, 2015. Alang sa kompleto nga pakigpulong, adto sa devotionals.lds.org.
Ang tinuod nga katuyoan nagpasabut sa paghimo sa hustong butang alang sa hustong rason.
Litrato pinaagi sa Jupiterimages/Stockbyte/Thinkstock
Akong nakat-unan ang kaimportante sa tinuod nga katuyoan sa dihang batan-on pa ko nga estudyante sa seminary. Ang among magtutudlo mihagit kanamo sa pagbasa sa Basahon ni Mormon. Aron masubay ang among paglambo, mihimo siya og tsart nga naa ang among ngalan sa pikas habig ug ang mga basahon sa Basahon ni Mormon ngadto sa ibabaw. Matag higayon nga mobasa kami og basahon, usa ka bitoon ibutang tupad sa among ngalan.
Sa sinugdanan wala kaayo ko maningkamot sa pagbasa, ug wala madugay nabiyaan na kaayo ko nila. Nadasig sa pagbati sa kaulaw ug sa akong hilig sa pakig-indigay, misugod ko sa pagbasa. Matag higayon nga makakuha ko og bituon, nindot ang akong bation. Ug sa nagkadaghan ang akong mga bitoon, mas nadasig ko nga mobasa—sa wala pa ang mga klase, human sa eskwela, matag bakante nga minuto.
Nindot unta ni nga istorya kon makasulti pa ko ninyo nga akoy nag-una sa among klase—pero wala nako mahimo. Ug OK ra na kon makaingon ko nga mas maayo ang akong nakuha kaysa unang mananaug—usa ka pagpamatuod sa Basahon ni Mormon. Apan wala sad gihapon na mahitabo. Wala ko makaangkon og pagpamatuod. Ang akong nakuha mao ang mga bituon. Mga bituon ang akong nakuha tungod mao nay hinungdan nganong mibasa ko. Sa paggamit sa mga pulong ni Moroni, kana mao ang akong “tinuod nga katuyoan.”
Klaro si Moroni sa dihang iyang gihulagway unsaon pagkasayud nga ang Basahon ni Mormon tinuod: “Ug kon kamo makadawat niini nga mga butang, ako moawhag kaninyo nga kamo mangutana sa Dios, ang Amahan sa Kahangturan, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahum sa Espiritu Santo” (Moroni 10:4; emphasis gidugang).
Ang Husto nga mga Rason
Sa paglantaw og balik, akong nakita nga ang Ginoo makiangayon kaayo ngari kanako. Nganong magdahum man ko nga makakita og lahi kay sa akong gipangita? Ang tinuod nga katuyoan nagpasabut sa paghimo sa husto nga butang alang sa husto nga rason; nagbasa ako sa husto nga basahon alang sa sayop nga mga rason.
Milabay pa ang mga katuigan una nako gibasa ang Basahon ni Mormon uban sa tinuod nga katuyoan. Karon ako nasayud nga ang Basahon ni Mormon nagtuman sa balaanong katuyoan niini sa pagpamatuod sa kinabuhi ug misyon ni Jesukristo tungod kay akong nabasa kini uban sa tinuod nga katuyoan.
Ang leksyon nga akong nakat-unan mahitungod sa tinuod nga katuyoan ug sa Basahon ni Mormon magamit kanatong tanan sa tanang aspeto sa atong mga kinabuhi. Sagad kaayo nga monunot lang ta sa mga sumbanan ug mga kinaiya nga milambo sa mga katuigan—magpaundayon lang ta nga dili mainampingon sa paghunahuna sa mga sangputanan sa atong mga pagpili. Ang pagpakabuhi uban sa tinuod nga katuyoan makadugang og pagtutok ug katuyoan sa atong mga kinabuhi ug makahimo sa tanang kalainan. Ang pagpakabuhi uban sa tinuod nga katuyoan nagpasabut nga sabton ang “ngano”—ang mga motibo luyo sa atong mga gipangbuhat. Si Socrates miingon, “Ang wala gisusi nga kinabuhi walay pulos.”1 Busa pamalandongi giunsa ninyo paggahin ang inyong panahon, ug pangutan-a ang inyong kaugalingon sa kanunay, “Ngano man?” Makatabang kini kaninyo nga mapalambo ang abilidad nga makakita lapas sa karon. Mas maayo nga motan-aw sa unahan ug mangutana sa kaugalingon, “Nganong buhaton ko man kana?” kay sa lingion ang nangagi ug moingon, “Ngano, o, nganong gibuhat ko man kadto?”
Paghulaway sa litrato pinaagi ni Sergey Nivens/iStock/Thinkstock
Unsay Gusto sa Ginoo nga Inyong Buhaton?
Sa batan-on pa ko, nakahukom ko nga dili mag-misyon. Human sa usa ka tuig sa kolehiyo ug usa ka tuig sa army, duna koy maayong trabaho sa lokal nga ospital isip X-ray technician. Maayo ra ang dagan sa kinabuhi, ug ang pagmisyon daw wala kaayo kinahanglana.
Usa ka adlaw, si Dr. James Pingree, usa ka surgeon sa hospital, nangimbitar kanako og paniudto. Sa among panag-istoryahanay, iyang nadiskobrehan nga wala ko nagplano sa pagserbisyo og misyon, ug siya nangutana kon ngano. Ako siyang gisultihan nga medyo tigulang na ko ug tingali ulahi na. Miingon siya nako nga dili kaayo kana nindot nga rason, og siya nag-ingon nga nagmisyon siya pagkahuman na niya og eskwela pagkadoktor. Dayon mihatag siya og pagpamatuod sa kaimportante sa iyang misyon.
Ang iyang pagpamatuod adunay dakong epekto ngari kanako. Kini nakapahimo nako sa pag-ampo nga wala pa nako mabuhat sukad—uban sa tinuod nga katuyoan. Makahunahuna kog daghang rason aron dili magmisyon: manggiulawon ako. Aduna koy trabaho nga ganahan ko. Duna koy posible nga scholarship nga mawala na human sa pagmisyon. Labing importante, duna koy uyab nga mihulat nako samtang naa pa ko sa army, ug nasayud ko nga dili na siya makahulat og laing duha ka tuig! Nag-ampo ko aron makakuha og kumpirmasyon nga ang akong mga rason balido ug sakto ko.
Sa akong kasagmuyo, wala nako madawat ang yano nga oo-o-dili nga tubag nga akong gilauman. Dayon ang hunahuna miabut kanako: “Unsay gusto sa Ginoo nga imong buhaton?” Kinahanglan nga akong dawaton nga gusto Niya nga moserbisyo ko sa misyon, ug kini nahimong panahon nga ang akong desisyon mi-impluwensya og maayo sa akong kinabuhi. Buhaton ba nako ang akong gusto nga buhaton o ang kabubut-on sa Ginoo? Kana ang pangutana nga maayong ipangutana sa atong kaugalingon kanunay.
Mapasalamaton, mipili ko nga magmisyon ug didto nadestino sa Mexico North Mission.
Mahangturong mga Sangputanan
Human sa traynta y singko ka tuig, ang akong anak nga lalaki miawhag nako sa pagbisita sa Mexico uban kaniya. Naglaum mi nga makakita og pipila ka mga tawo nga akong natudloan. Nanambong mi og miting sa sacrament sa gamayng lungsod diin didto ko nagsugod sa akong misyon, apan wala akoy nailahan bisan usa. Human sa miting, nakig-istorya mi sa usa sa mga miyembro ug nangutana kon naa ba siyay nailhan bisan usa sa mga tawo nga naa sa akong listahan nga akong natudloan daghan nang katuigan ang milabay. Gisubay namo ang lista nga wala siyay nailhan, hangtud nga naabut mi sa katapusan nga pangalan: Leonor Lopez de Enriquez.
“Oh, oo,” miingon ang tawo. “Kining pamilya anaa sa laing ward, apan dinhi sila nga building mosimba. Mosunod na ang ilang miting sa sakrament.”
Wala na mi maghulat og dugay una nisulod si Leonor sa building. Bisan tuod lapas na siya karon sa 70, nakaila dayon ko niya, ug nakaila siya nako. Dugay mi nga naggakos nga naghilak.
“Nag-ampo mi sulod sa 35 ka tuig nga makabalik ka aron makapasalamat kami nimo sa pagdala sa ebanghelyo sa among pamilya,” siya miingon.
Samtang nanulod na sa building ang ubang mga sakop sa pamilya, nanaggakos ug nakahilak mi. Wala madugay nahibaloan namo nga ang bishop niining ward usa diay sa mga anak nga lalaki ni Leonor, ang chorister iyang apo nga babaye, ang tigduyog sa piano ang iyang apo nga lalaki, ug ingon man ang pipila sa mga young men diha sa Aaronic Priesthood. Usa sa iyang mga anak nga babaye naminyo ngadto sa magtatambag sa stake presidency. Laing anak nga babaye naminyo ngadto sa bishop sa duol nga ward. Kadaghanan sa mga anak ni Leonor nagmisyon, ug karon ang mga apo nagserbisyo na usab og mga misyon.
Nahibaloan namo nga si Leonor mas maayo pa nga misyonaryo kay sa nako kaniadto. Karon ang iyang mga anak mapasalamaton nga mihandom sa iyang walay kakapoy nga paningkamot sa pagtudlo nila sa ebanghelyo. Mitudlo siya kanila nga ang gagmay nga mga desisyon, paglabay sa panahon, moresulta sa hingpit, matarung, ug malipayon nga kinabuhi, ug gitudlo ni nila sa uban. Sa katapusan, kapin sa 500 ka mga tawo mipasakop sa Simbahan tungod niining talagsaong pamilya.
Ug kining tanan masubay og balik ngadto sa usa ka panag-istorya diha sa paniudto. Kanunay kong maghunahuna nga kon mas nakatutok si Dr. Pingree sa iyang panarbaho o ubang kalibutanong tinguha, wala gyud tingali siya makapangutana nganong wala ko magmisyon. Apan ang iyang focus anaa sa uban ug sa pagpadayon sa buhat sa Ginoo. Mitisok siya og liso nga mitubo, namunga, ug mipadayon sa pagdaghan pa gayud (tan-awa sa Marcos 4:20). Ang akong misyon nagtudlo kanako sa mahangturong mga sangputanan sa usa ka desisyon nga buhaton ang kabubut-on sa Ginoo.
Hinumdumi ang Inyong Mahangturong Katuyoan
Kanunay kong maghinumdom sa akong kinabuhi ug maghunahuna nganong lisud kaayo kadto kanako ang paghukom nga magmisyon. Lisud kadto tungod kay nalinga ko; wala na ko makatutok sa akong mahangturong katuyoan—ang tinuod nga katuyoan nganong anaa kita dinhi.
Ang akong mga tinguha ug ang akong kabubut-on wala mahauyon sa kabubut-on sa Ginoo; kon nahimo pa, mas sayon ra unta ang pagdesisyon. Ug ngano nga kini wala mahauyon? Misimba ko ug miambit sa sakrament ma-Dominggo, apan wala ko magtutok sa kahulugan niini. Nag-ampo ko, apan kasagaran gabuhat ko niini nga walay paghunahuna. Nagbasa ko sa mga kasulatan apan panagsa ra ug walay tinuod nga katuyoan.
Ako moawhag kaninyo sa pagpuyo og tinuyo ug nakafocus nga kinabuhi—bisan kon dili kamo nagmakanunayon sa nangagi na. Ayaw kasagmuyo nga maghunahuna sa unsay inyong nabuhat na o wala pa mabuhat. Tuguti ang Manluluwas nga magtangtang sa bati nga mga epekto aron malimpyo ang inyong kinabuhi. Hinumdumi unsay Iyang gisulti: “Ingon sa kanunay nga sila maghinulsol ug mangayo og kapasayloan, uban sa tinuod nga katuyoan, sila pasayloon” (Moroni 6:8; empasis gidugang).
Sugdi karon. Pagpakabuhi nga adunay katuyoan, nakasabut nganong imong gibuhat unsay imong nabuhat ug unsay sangputanan niini. Sa inyong pagbuhat niini, inyong madiskubrehan nga ang labing importanteng “ngano” luyo sa tanan ninyong gibuhat mao nga gihigugma ninyo ang Ginoo ug nakaila sa Iyang hingpit nga gugma kaninyo. Hinaut makakaplag kamo og dakong kalipay sa inyong pagtinguha sa kahingpitan ug sa pagsabut ug pagbuhat sa Iyang kabubut-on.