Librarya
Pagkamasulundon

“Pagkamasulundon,” Mga Hilisgotan ug mga Pangutana (2023)

Imahe
mapahiyomon nga batan-ong babaye

Giya sa Pagtuon sa Ebanghelyo

Pagkamasulundon

Pagsunod sa Dios uban ang andam nga kasingkasing

Giila sa mga ginikanan ang kaimportante sa pagtudlo sa gagmayng bata nga dili hikapon ang init nga stove o pagdagan paingon sa dalan nga daghan og sakyanan. Kon mosunod ang mga bata, nakasabot man sila kon nganong importante ang pagkamasulundon o wala, makatagamtam sila og mas dako nga kahilwasan ug proteksyon.

Sa atong kinabuhi sa wala pa dinhi sa yuta, gipahayag sa Ginoo nga importante ang paghatag sa mga anak sa Dios og mortal nga kasinatian sa “[pag]sulay kanila … , sa pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila” (Abraham 3:25). Gitinguha sa Dios nga magkat-on kita sa pagsunod Kaniya ug sa pagtuman sa Iyang mga sugo. Kon himoon nato kana, madawat nato ang panalangin sa pagpuyo uban Kaniya “sa usa ka kahimtang nga walay kataposan ang kalipay” (Mosiah 2:41). Pinaagi sa paggamit sa atong moral nga kabubut-on ug sa giya sa Espiritu, makita nato kon nganong gihatagan kita og mga balaod sa Dios nga sundon. Ang Langitnong Amahan misaad og kalipay ug mga panalangin sa tanan nga mopatalinghog sa Iyang mga pulong ug andam nga motuman sa Iyang mga sugo.

Unsa Ang Pagkamasulundon?

Sa ebanghelyo ni Jesukristo, ang pagkamasulundon gipasabot isip pagbuhat sa kabubut-on sa Dios ug pagtuman sa Iyang mga sugo. Naglakip niini ang paggamit sa atong kabubut-on, o kagawasan sa pagpili, aron sundon ang Dios uban ang andam nga kasingkasing. Atong mapakita ang atong gugma alang sa Dios kon mopili kita sa pagsalig ug pagtugyan sa Iyang kabubut-on.

Katibuk-ang pagpasabot sa hilisgotan:Pagkamasulundon

May kalabotan nga mga giya sa pagtuon sa ebanghelyo: Mga Sugo, Paghinulsol, Mga Pakigsaad ug mga Ordinansa, Pagsunod sa Ebanghelyo ni Jesukristo

Seksiyon 1

Gituman ni Jesukristo ang Dios nga Amahan sa Tanang Butang

Imahe
Si Jesus didto sa Getsemani

Si Jesukristo mipahayag, “Ako nanaog gikan sa langit, dili sa pagbuhat sa akong kaugalingong kabubut-on, kon dili sa kabubut-on sa nagpadala kanako” (Juan 6:38). Sa tibuok Niyang mortal nga kinabuhi, gipakita ni Jesus ang pagkamasulundon sa tanang balaod ug mga sugo sa Iyang Amahan. Siya miingon, “Sa kanunay ginabuhat ko man ang makapahimuot kaniya” (Juan 8:29).

Sa Tanaman sa Getsemani, si Jesus nag-ampo, “Amahan, kon buot ka, kuhaa kining kopa gikan kanako; hinoon dili ang akong pagbuot, maoy matuman, kondili ang imo” (Lucas 22:42). Human mag-antos sa Getsemani, mapaubsanon Siyang mitugyan sa kabubut-on sa Iyang Amahan ug gilansang sa krus, nga naghimo sa Iyang kaugalingon nga halad aron tubson kitang tanan (tan-awa ang Mosiah 15:7). Tungod kay si Jesukristo masulundon sa Iyang Amahan sa tanang butang, gihimo Niya ang kaluwasan ug kahimayaan nga posible para sa tanang anak sa Dios.

Sa atong panahon, gihangyo kita sa Ginoo nga sundon ang Iyang mga tunob ug “mopuyo sa matag pulong nga mogawas gikan sa baba sa Dios” (Doktrina ug mga Pakigsaad 98:11; tan-awa usab sa Deuteronomio 8:3). Giklaro ni Jesukristo ang labing importante nga rason nga angay natong sundon ang Dios dihang naghatag Siya og direkta ug yano nga imbitasyon “Kon nahigugma kamo kanako, tumana ninyo ang akong mga sugo” (Juan 14:15).

Mga butang nga angayang hunahunaon

  • Si Jesukristo nagkinabuhi nga walay sala ug balaan nga kinabuhi. Nagdapit Siya kanato sa pagsunod Kaniya. Basaha ang 2 Nephi 31:7–10. Unsay gikinahanglan niadtong nagtinguha nga sundon si Jesukristo?

  • Gipahayag sa Dios nga ang Iyang buhat ug himaya mao ang “pagpahinabo sa pagka-imortal ug kinabuhi nga dayon sa tawo” (Moises 1:39). Basaha ang Doktrina ug mga Pakigsaad 11:20 ug ikonsiderar kon unsay giila sa Dios nga “imong buhat.”

Kalihokan alang sa pagkat-on uban sa laing mga tawo

  • Si Elder Robert D. Hales mitudlo, “Tungod kay masulundon ang atong Manluluwas, gitubos Niya ang atong mga sala, nakapahimong posible nga kita mabanhaw ug nag-andam sa agianan aron kita makabalik sa atong Langitnong Amahan.” Hisgoti kon unsang mga panalangin ang atong natagamtam tungod sa hingpit nga pagkamasulundon ni Jesukristo sa Dios nga Amahan. Unsay gipabuhat kanato sa Dios aron ipakita nga mapasalamaton kita sa daghang panalangin nga atong nadawat?

Pagkat-on pa og dugang

Seksiyon 2

Ang Imong Pagkamasulundon sa Dios Modala ngadto sa Kalipay ug mga Panalangin

Imahe
batan-ong pamilya nagkatawa

Atong nakat-onan sa Basahon ni Mormon nga ang tanang nakadungog sa mahinungdadnong wali ni Hari Benjamin nakabig pag-ayo ngadto kang Jesukristo. Isip resulta, mipahayag sila og kaandam sa pagpakigsaad aron tumanon ang mga sugo sa Dios (tan-awa sa Mosiah 5:1–7). Usa sa mga responsibilidad sa mga miyembro sa Simbahan ni Kristo sa atong panahon mao ang pagtuman sa tanang mga sugo sa Dios (tan-awa sa Doktrina ug mga Pakigsaad 42:78). Si Propeta Joseph Smith mipasabot kon unsa ka importante kini nga katungdanan ngadto kaniya dihang siya miingon, “Ako kining gihimo nga lagda: Kon ang Ginoo mosugo, buhata kini.”

Gipadayag sa atong mahigugmaong Langitnong Amahan ang mahangtorong baroganan nga nagdumala kon sa unsang paagi gihatag ang mga panalangin: “Kon kita makadawat og bisan unsa nga panalangin gikan sa Dios, kini tungod sa pagsunod niana nga balaod diin diha kini gipasikad” (tan-awa ang Doktrina ug mga Pakigsaad 130:20–21). Adunay lainlaing mga rason nga kita mahimong mopili sa pagsunod sa mga sugo sa Dios. Usahay, motuman tingali kita tungod sa kahadlok nga silotan. Usahay gusto lang natong makuha ang gisaad nga ganti. Apan ang labing importante nga rason sa pagkamasulundon mao ang atong gugma sa Langitnong Amahan ug kang Jesukristo ug buot moserbisyo Kanila. Ang Dios “nagkinahanglan sa kasingkasing ug sa usa ka andam nga hunahuna” (Doktrina ug mga Pakigsaad 64:34).

Mga butang nga angayang hunahunaon

  • Hunahunaa ang tanang paagi nga gipakita sa Langitnong Amahan ang Iyang gugma para nimo. Basaha ang Mosiah 2:20–24. Nganong ang atong pagkamasulundon mao lang ang gipangayo sa Dios kanato? Karon basaha ang Mosiah 2:41. Unsaon nimo paghulagway ngadto sa laing tawo kon unsa ka manggihatagon ang Dios niadtong sinserong nagtinguha sa pagtuman sa Iyang mga sugo?

  • Ang pamilya ni Lehi nakasinati og dagkong kalisdanan samtang nagpanaw sa kamingawan sulod sa daghang katuigan. Tungod kay gitinguha nilang tumanon ang mga sugo sa Dios, gipanalanginan sila sa Ginoo. Basaha ang 1 Nephi 17:1–4. Sumala sa bersikulo 3, unsay giandam nga buhaton sa Dios alang niadtong nagtuman sa Iyang mga sugo?

  • Dili nato kanunayng masabtan kon nganong gihatag sa Dios ang mga piho nga sugo. Pero kon gamiton nato ang atong kabubut-on ug pilion ang pagsalig ug pagsunod sa Dios, makasalig kita nga ang tanan mahitabo alang sa atong kaayohan (tan-awa sa Doktrina ug mga Pakigsaad 100:15). Ang Manluluwas misaad kanato: “Kon ikaw maghupot sa akong mga sugo ug molahutay ngadto sa kataposan ikaw makaangkon og kinabuhi nga dayon, diin nga gasa mao ang labing mahinungdanon sa tanan nga mga gasa sa Dios” (Doktrina ug mga Pakigsaad 14:7).

Kalihokan alang sa pagkat-on uban sa laing mga tawo

  • Si Presidente Ezra Taft Benson mipahayag, “Kon atong unahon ang Dios, ang ubang mga butang mapahimutang sa tukma nilang dapit o mawala kini sa atong kinabuhi.” Unsay ipasabot nganha kanimo nga “unahon ang Dios”? Hangyoa ang mga sakop sa grupo nga hisgotan ang mga panahon diin nakita nila nga “ang ubang mga butang mapahimutang sa tukma nilang dapit o mawala kini sa atong kinabuhi.”

Pagkat-on pa og dugang

Iprinta