Nganong Mahinungdanon ang Dalan sa Pakigsaad
Ang kalainan sa dalan sa pakigsaad talagsaon ug mahangtoron og kahulogan.
Sa tibuok niya nga pagpangalagad, si Presidente Russell M. Nelson nagtuon ug nagtudlo kabahin sa mga pagkigsaad sa Dios ngadto sa Iyang mga anak. Siya mismo usa ka dayag nga ehemplo sa tawo kinsa naglakaw sa dalan sa pakigsaad. Sa iyang unang mensahe isip Presidente sa Simbahan, si Presidente Nelson mipahayag:
“Ang inyong pasalig nga mosunod sa Manluluwas pinaagi sa paghimo og mga pakigsaad uban Kaniya ug dayon sa pagtuman niadto nga mga pakigsaad moabli sa pultahan ngadto sa tanang espirituhanong mga panalangin ug pribilehiyo nga mahimong maanaa sa mga lalaki, babaye, ug mga anak bisan asa.
“… Ang mga ordinansa sa templo ug ang mga pakigsaad nga inyong gihimo didto mahinungdanon sa pagpalig-on sa inyong kinabuhi, sa inyong kaminyoon ug pamilya, ug sa inyong abilidad sa pagbatok sa mga pag-atake sa kaaway. Ang inyong pagsimba sa templo ug ang inyong pagserbisyo didto alang sa inyong mga katigulangan mopanalangin kaninyo og dugang nga personal nga pagpadayag ug kalinaw ug molig-on sa inyong pasalig nga magpabilin diha sa dalan sa pakigsaad.”1
Unsa ang dalan sa pakigsaad? Mao kana ang bugtong dalan nga modala kanato ngadto sa celestial nga gingharian sa Dios. Kita mosulod niana nga dalan diha sa ganghaan sa bunyag ug dayon “mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa pagla[o]m, ug usa ka gugma sa Dios ug sa tanan nga mga tawo [ang duha ka dagkong mga sugo] … hangt[o]d sa katap[o]san.”2 Sa pagpadayon diha sa dalan sa pakigsaad (nga, agig dugang, magpadayon latas sa mortalidad), kita makadawat sa tanang mga ordinansa ug mga pakigsaad kalabot sa kaluwasan ug kahimayaan.
Ang atong pinakataas nga pasalig sa pakigsaad mao ang pagbuhat sa kabubut-on sa Dios “ug magmasulundon sa iyang mga sugo diha sa tanan nga mga butang nga siya mosugo kanato.”3 Ang pagsunod sa mga baroganan ug mga sugo sa ebanghelyo ni Jesukristo kada adlaw mao ang labing malipayon ug makatagbaw nga paagi sa kinabuhi. Usa pa niana, ang usa ka tawo makalikay sa daghang mga problema ug mga pagmahay. Tugoti kong motandi niini ngadto sa dula [sports]. Sa tennis, adunay gitawag nga wala gipwersa nga mga sayop. Lakip niini ang paghapak sa maayong pagkapasa nga bola ngadto sa net o pagkasayop og kaduha samtang nag-serve. Ang wala gipwersa nga mga sayop gitan-aw nga resulta sa sipyat sa magdudula kay sa sipyat nga gipahinabo tungod sa kahanas sa kontra.
Kasagaran ang atong mga problema o mga hagit ato rang binuhatan, ang resulta sa atong dili maayo nga mga pagpili, o matawag nato, nga resulta sa “wala gipwersa nga mga sayop.” Kon kita makugihon nga nagsubay sa dalan sa pakigsaad, kita natural lang nga makalikay sa daghang “wala gipwersa nga mga sayop.” Malikayan nato ang daghang matang sa pagkaadik. Dili kita mahulog sa kimba sa mga bakak ug dili matinud-anong gawi. Makatabok kita sa bung-aw sa pagka-imoral ug pagluib. Atong malabyan ang mga tawo ug mga butang nga, bisan ilado, makapapilegro sa atong pisikal ug espiritwal nga kaayohan. Atong malikayan ang mga pagpili nga makadaot o makabentaha sa uban ug hinuon makaangkon sa mga batasan sa pagdisiplina sa kaugalingon ug pagserbisyo.4
Si Elder J. Golden Kimball nailhan nga miingon, “Dili tingali ko [permi] nga naglakaw sa higpit ug pig-ot nga dalan, apan [gisulayan] nako nga makatabok niini kutob sa akong [mahimo].”5 Sa mas seryoso nga gutlo, nakasiguro ko nga si Brother Kimball mouyon nga ang pagpadayon, dili lang kay pagtabok, diha sa dalan sa pakigsaad mao ang atong labing dakong paglaom nga makalikay sa malikayan nga kasubo sa usa ka bahin ug malamposong mosagubang sa dili malikayan nga mga kaalaot sa kinabuhi sa laing bahin.
Ang uban tingali moingon, “Makahimo ko og maayong mga pagpili bisan gibunyagan o wala, wala ko magkinahanglan og mga pakigsaad aron mahimong halangdon ug malamposon nga tawo.” Sa tinuod, adunay daghan kinsa, samtang wala sila mismo diha sa dalan sa pakigsaad, nagpakabuhi sa paagi nga nagsalamin sa mga pagpili ug mga kontribusyon niadtong kinsa anaa sa dalan. Tingali makaingon mo nga sila nakaani sa mga panalangin sa paglakaw sa usa ka “susama sa pakigsaad” nga dalan. Nan, unsa man, ang kalainan sa dalan sa pakigsaad?
Sa tinuod, ang kalainan talagsaon ug mahangtoron og kahulogan. Naglakip kini sa matang sa atong pagkamasulundon, sa kinaiya sa pasalig sa Dios ngari kanato, sa balaanong tabang nga atong madawat, sa mga panalangin kalabot sa pagpundok isip mga tawo sa pakigsaad, ug labing mahinungdanon, sa atong mahangtoron nga kabilin.
Gipasalig nga Pagkamasulundon
Ang una mao ang kalidad sa atong pagkamasulundon ngadto sa Dios. Labaw pa kay sa basta lang adunay maayong mga katuyoan, kita ligdong mipasalig sa pagpuyo sumala sa matag pulong nga migula gikan sa baba sa Dios. Niini nga paagi, kita nagsunod sa panig-ingnan ni Jesukristo, kinsa, pinaagi sa pagpabunyag, “siya mipakita ngadto sa mga katawhan nga, sumala sa unod siya nagpaubos sa iyang kaugalingon atubangan sa Amahan, ug nagsaksi sa Amahan nga siya magmasulundon ngadto kaniya sa paghupot sa iyang mga sugo.”6
Uban sa pakigsaad, kita may katuyoan nga labaw pa kay sa paglikay sa mga sayop o sa pagkamaalamon diha sa atong mga desisyon. Atong gibati nga may tulubagon ngadto sa Dios alang sa atong mga pagpili ug sa atong mga kinabuhi. Kita midala sa atong mga kaugalingon sa ngalan ni Kristo. Kita nakatutok diha ni Kristo—sa pagkamaisugon diha sa atong pagpamatuod ni Jesus sa pagpalambo sa kinaiya ni Kristo.
Uban sa mga pakigsaad, ang pagkamasulundon sa mga baroganan sa ebanghelyo migamot sa ato mismong kalag. Naa koy nailhan nga magtiayon diin, panahon sa ilang kaminyoon, ang asawa dili aktibo sa Simbahan ug ang bana wala gyod mamiyembro sa Simbahan. Ako silang tawagon nga si Mary ug John, dili ilang tinuod nga mga ngalan. Sa dihang nakabaton na sa ila og mga anak, lawom ang pagbati ni Mary sa pagpadako kanila, sama sa gisulti sa kasulatan, “diha sa pagmatuto ug pagpahamatngon sa Ginoo.”7 Si John masuportahon. Si Mary mihimog dagko nga mga sakripisyo aron mogahin og panahon sa balay aron sa pagtudlo sa ebanghelyo kanunay. Iyang gisiguro nga ang pamilya hingpit nga mopahimulos sa pagsimba ug mga kalihokan sa Simbahan. Si Mary ug John nahimong sulundon nga mga ginikanan, ug ang ilang mga anak (tanan pulos maabtik nga mga lalaki) midako diha sa hugot nga pagtuo ug debosyon sa mga baroganan ug mga sumbanan sa ebanghelyo.
Ang mga ginikanan ni John, ang mga apohan sa mga batang lalaki, nahimuot sa maayo nga mga kinabuhi ug sa mga kalamposan sa ilang mga apo, apan tungod sa ilang pagkadili maayog buot sa Simbahan, gusto nilang ipahinungod kini nga kalamposan ngadto lamang sa kahanas ni John ug Mary sa pagkaginikanan. Si John, bisan tuod dili miyembro sa Simbahan, mihagit niana nga paghukom. Siya miinsister nga sila nakasaksi sa mga bunga sa mga pagtulon-an sa ebanghelyo—sa unsay nasinati sa iyang mga anak diha sa simbahan ingon man sa unsay nahitabo sa panimalay.
Si John mismo naimpluwensya sa Espiritu, sa gugma ug ehemplo sa iyang asawa, ug sa mga pag-awhag sa iyang mga anak nga lalaki. Sa tukmang panahon, siya gibunyagan, sa dakong kalipay sa mga miyembro ug sa mga higala sa ward.
Samtang ang ilang kinabuhi ug sa ilang mga anak wala gyod bulagi sa mga hagit, si Mary ug John tibuok kasingkasing mipamatuod nga ang mga pakigsaad sa ebanghelyo sa tinuod maoy tinubdan sa ilang mga panalangin. Nakita nila ang mga pulong sa Ginoo ngadto ni Jeremias nga natuman sa kinabuhi sa ilang mga anak ingon man sa ilang kaugalingon: “ibutang ko ang akong sugo sa ilang kaisipan ug isulat ko sa ilang kasingkasing. Ug mahimo ako nga ilang Dios ug sila akong katawhan.”8
Nabugkos ngadto sa Dios
Ang ikaduhang talagsaong aspeto sa dalan sa pakigsaad mao ang atong relasyon ngadto sa Dios. Ang mga pakigsaad nga gitanyag sa Dios ngadto sa Iyang mga anak makahimo og labaw pa kay sa paggiya kanato. Kini mobugkos kanato ngadto Kaniya, ug, kay nabugkos ngadto Kaniya, kita makabuntog sa tanang mga butang.9
Usa ka higayon nakabasa ko og usa ka artikulo gikan sa kulang og impormasyon nga reporter sa mantalaan kinsa mipasabot nga ang atong paagi sa pagbunyag sa mga patay mao ang paghumol og mga rinolyo nga microfilm diha sa tubig. Dayon katong mga ngalan nga makita diha sa microfilm ikonsiderar nga nabunyagan na. Kana nga paagi paspas kaayo, apan nagbaliwala kini sa walay kataposan nga bili sa matag kalag ug sa dakong importansya sa personal nga pakigsaad ngadto sa Dios.
“Si [Jesus] miingon … : Sulod kamo sa higpit nga ganghaan; kay higpit ang ganghaan, ug pig-ot ang agianan nga paingon sa kinabuhi, ug pipila lamang ang makakaplag niini.”10 Sa pasumbingay nga pagkasulti, kini nga ganghaan hilabihan ka pig-ot nga usa lang ang tugotan nga makasulod sa matag higayon. Ang matag tawo mohimo og indibidwal nga pasalig ngadto sa Dios ug agig tubag makadawat gikan Kaniya og usa ka personal nga pakigsaad, pinaagi sa ngalan, nga hingpit niya nga masaligan karon ug sa kahangtoran. Uban sa mga ordinansa ug mga pakigsaad, “ang gah[o]m sa pagkadiosnon mapakita” diha sa atong mga kinabuhi.11
Balaan nga Tabang
Kini naggiya kanato sa paghunahuna sa ikatulo nga espesyal nga panalangin sa dalan sa pakigsaad. Ang Dios nag-andam og halos dili matugkad nga gasa aron motabang sa mga tighimo og pakigsaad nga mahimong mga tigtuman sa pakigsaad: ang gasa sa Espiritu Santo. Kini nga gasa mao ang katungod sa kanunay nga pakig-uban, proteksyon, ug giya sa Balaang Espiritu.12 Nailhan usab isip ang Maghuhupay, ang Balaang Espiritu “mopuno uban sa pagla[o]m ug hingpit nga gugma.”13 Siya “nasay[o]d sa tanan nga mga butang, ug nagpamatuod sa Amahan ug sa Anak,”14 kang kinsa kita mipasalig nga mahimong mga saksi.15
Sa dalan sa pakigsaad makakaplag kita sa kinahanglanon nga mga panalangin sa kapasayloan ug paglimpyo gikan sa sala. Kini mao ang tabang nga moabot lamang pinaagi sa balaanong grasya, nga ipangalagad sa Espiritu Santo. “Karon mao kini ang sugo,” ingon sa Ginoo, “Paghinulsol, kamong tanan nga mga lumulupyo sa yuta, ug duol ngari kanako ug magpabunyag diha sa akong ngalan, aron kamo mahimo nga pagasantoson pinaagi sa pagdawat sa Espiritu Santo, aron mobar[o]g nga walay lama sa akong atubangan sa katap[o]san nga adlaw.”16
Pakig-uban sa Pundok sa Mga Katawhan sa Pakigsaad
Ikaupat, kadtong nagsunod sa dalan sa pakigsaad makakaplag usab og talagsaong mga panalangin diha sa nagkalainlaing sagradong nakatakda nga mga pagpundok. Mga panagna kabahin sa literal nga mga pagpundok sa dugay nang natibulaag nga mga tribo sa Israel ngadto sa mga yuta nga ilang kabilin makita diha sa tibuok nga kasulatan.17 Ang katumanan niana nga mga panagna ug mga saad nagpadayon karon diha sa pagpundok sa mga katawhan sa pakigsaad ngadto sa Simbahan, ang gingharian sa Dios dinhi sa yuta. Si Presidente Nelson mipasabot, “Kon maghisgot kita kalab[o]t sa pagpundok, nagsulti lamang kita niining sukaranang kamatuoran: ang matag usa sa mga anak sa atong Langitnong Amahan … angayang makadungog sa mensahe sa gipahiuli nga ebanghelyo ni Jesukristo.”18
Ang Ginoo nagmando sa mga miyembro sa Ang Simbahan ni Jesukristo sa mga Santos sa Ulahing mga Adlaw sa “[pag]tindog ug [pag]pakita aron ang inyong kahayag mao ang usa ka sukaranan alang sa tanan nga mga nasod; … nga ang panagpundok sa yuta sa Zion, ug diha sa iyang mga istaka, alang sa usa ka panalipod, ug alang sa usa ka dangpanan gikan sa unos, ug gikan sa kaligutg[o]t sa diha nga kini ibu-bu nga walay pagkuto diha sa tibuok yuta.”19
Usab adunay sinemana nga panagpundok sa mga katawhan sa pakigsaad ngadto sa balay alampoanan sa adlaw sa Ginoo, nga kita unta “labaw nga moamping sa [atong] mga kaugalingon nga walay buling gikan sa kalib[o]tan.”20 Panagpundok kini aron sa pag-ambit sa pan ug tubig sa sakramento sa paghinumdom sa Pag-ula ni Jesukristo ug usa ka panahon “sa pagpuasa ug sa pag-ampo, ug sa pagpakigsulti sa usag usa mahitungod sa kaayohan sa [atong] mga kalag.”21 Isip usa ka tin-edyer, ako rang usa ang miyembro sa Simbahan sa akong klase sa high school. Nalingaw ko sa pakig-uban sa daghan sa akong maayong mga higala sa eskwelahan, apan akong nabantayan nga dako ang akong pagdepende sa mga pagpundok panahon sa Igpapahulay matag semana aron mapresko ug mabag-o ko sa espiritu, ug gani sa panglawas. Grabe ang atong gibati sa pagkawala niining regular nga panagpundok sa pakigsaad atol niining pandemya karon, ug mahinamon kitang nagpaabot sa panahon nga magkauban na usab kita sama sa una.
Ang mga tawo sa pakigsaad magpundok sa templo, sa balay sa Ginoo, aron modawat sa mga ordinansa, mga panalangin, ug pagpadayag nga didto lamang maangkon. Si Propeta Joseph Smith mitudlo: “Unsa ang katuyoan sa pagpundok sa … katawhan sa Dios sa bisan unsa nga panahon sa kalibutan? … Ang unang katuyoan mao ang pagtukod ngadto sa Ginoo og usa ka balay diin Siya mopadayag ngadto sa Iyang katawhan sa mga ordinansa sa Iyang balay ug sa himaya sa Iyang gingharian, ug sa pagtudlo sa katawhan sa paagi sa kaluwasan; kay adunay piho nga mga ordinansa ug mga bar[o]ganan nga, kon kini itudlo ug lihokon, gikinahanglan nga buhaton sa usa ka dapit o balay nga gitukod alang niana nga katuyoan.”22
Angkona ang mga Saad sa Pakigsaad
Sa kataposan, diha lamang sa pagsubay sa dalan sa pakigsaad nga kita makapanunod sa mga panalangin ni Abraham, Isaac, ug ni Jacob, ang pinakataas nga mga panalangin sa kaluwasan ug kahimayaan nga ang Dios lang ang makahatag.23
Ang gihisgotan sa kasulatan nga mga katawhan sa pakigsaad kasagaran nagpasabot niadto mismong mga kaliwat ni Abraham o ang “balay ni Israel.” Apan ang mga katawhan sa pakigsaad naglakip usab sa tanan kinsa modawat sa ebanghelyo ni Jesukristo.24 Si Pablo mipasabot:
“Gibunyagan kamo aron mahiusa kang Kristo busa nakaambit kamo sa kinaiya ni Kristo. …
“[Ug] kon kamo iya na ni Kristo, mga kaliwat kamo ni Abraham ug madawat ninyo ang gisaad sa Dios.”25
Kadtong matinud-anon sa ilang mga pakigsaad “motungha diha sa pagkabanhaw sa mga makiangayon.”26 Sila “[m]ahimo nga hingpit pinaagi ni Jesus ang tigpataliwala sa bag-o nga pakigsaad. … Kini mao sila kansang mga lawas mga celestial, kansang himaya ingon niana sa adlaw, gani ang himaya sa Dios, ang labing halangdon sa tanan.”27 “Busa, ang tanan nga mga butang ila, gani kinabuhi ug kamatayon, o mga butang karon, o mga butang nga moab[o]t, ang tanan ila ug sila kang Kristo, ug si Kristo sa Dios.”28
Mopatalinghog kita sa tawag sa propeta sa pagpabilin diha sa dalan sa pakigsaad. Si Nephi nakakita kanato ug sa atong panahon ug misulat, “Ako, si Nephi, nakakita sa gah[o]m sa Kordero sa Dios, nga kini mikunsad diha sa mga santos sa simbahan sa Kordero, ug diha sa katawhan sa pakigsaad sa Ginoo, kinsa nagkatibulaag diha sa ibabaw sa yuta; ug sila gisangkapan sa katar[o]ng ug uban sa gah[o]m sa Dios sa dako nga himaya.”29
Sama kang Nephi, “ang akong kalag nahimuot” sa mga pakigsaad sa Ginoo.”30 Niining Domingo sa Pagkabanhaw, ako mohatag sa akong pagpamatuod ni Jesukristo, kansang Pagkabanhaw mao ang atong paglaom ug ang kasigurohan sa tanan nga gisaad diha ug sa kataposan sa dalan sa pakigsaad. Sa ngalan ni Jesukristo, amen.