Makahimo Kamo sa Pagpundok sa Israel!
Sigurado gayod ako nga kamong kabatan-onan makahimo niini tungod sa unsay anaa sa inyong pagkatawo ug sa dakong gahom sulod kaninyo.
Dul-an sa tulo ka tuig na ang milabay, si Presidente Russell M. Nelson midapit sa tanang kabatan-onan sa Ang Simbahan ni Jesukristo sa mga Santos sa Ulahing mga Adlaw nga “moapil sa grupo sa kabatan-onan sa Ginoo aron motabang sa pagpundok sa Israel” sa duha ka habig sa tabil. Miingon siya, “Kana nga panagpundok mao ang labing importanting butang nga nahitabo sa yuta karon.”1 Sigurado gayod ako nga kamong kabatan-onan makahimo niini—ug maayo kaayong mohimo niini—tungod sa (1) unsay anaa sa inyong pagkatawo ug (2) dakong gahom sulod kaninyo.
Kap-atan ug usa ka tuig ang milabay, duha ka misyonaryo sa atong Simbahan nadasig nga moadto sa usa ka balay sa New Jersey, sa Estados Unidos. Paglabay sa panahon, sa milagrosong paagi, ang duha ka ginikanan ug tanang 10 ka anak nabunyagan. Sa mga pulong sa propeta, ilang “gipatigbabaw ang Dios labaw sa tanan”2 diha sa ilang mga kinabuhi. Angay kong mosulti nga “among mga kinabuhi.” Ako ang ikatulo nga anak. Sa dihang ako 17 anyos nakahukom ko nga mohimo og permanenteng pakigsaad nga mosunod ni Jesukristo. Apan tag-ana kon unsa pa ang akong nahukman? Dili ko moserbisyo og full-time nga misyon. Sobra na kaayo na. Ug dili sila magdahom niini kanako, di ba? Bag-o pa kaayo ko nga miyembro sa Simbahan. Wala akoy kwarta. Gawas pa, bisan og bag-o lang ko nga migradwar gikan sa labing lisod nga high school sa duol nga West Philadelphia ug misagubang og pipila ka peligroso nga mga hagit, nahadlok ko sa tago nga mobiya sa balay sulod sa duha ka tuig.
Ang Inyong Tinuod nga Pagkatawo
Apan bag-o lang ko nga nakat-on nga ako ug ang tanang katawhan nakapuyo uban sa atong Langitnong Amahan isip Iyang espiritu nga mga anak sa wala pa kita matawo. Ang uban kinahanglang masayod, sama sa akong nasayran, nga gusto Niya nga ang tanan Niyang mga anak makatagamtam sa kinabuhing dayon uban Kaniya. Busa, sa wala pa ang tawo sa yuta, gipresentar Niya sa tanan ang Iyang hingpit nga plano sa kaluwasan ug kalipay, uban ni Jesukristo nga maoy atong Manluluwas. Makasubo kaayo, si Satanas misupak sa plano sa Dios.3 Sumala sa basahon nga Gipadayag, “may gubat didto sa langit”!4 Si Satanas igmat nga milingla sa ikatulo nga bahin sa espiritung mga anak sa Langitnong Amahan nga siya ang ipatigbabaw imbis nga ang Dios.5 Apan dili kamo! Nakita ni Apostol Juan nga inyong nabuntog si Satanas “sa pulong sa [inyong] pagpanghimatuod.”6
Ang pagkasayod sa akong tinuod nga pagkatawo, inabagan sa akong patriyarkal nga panalangin, mihatag kanako og kaisog ug pagtuo nga modawat sa pagdapit ni Presidente Spencer W. Kimball sa pagpundok sa Israel.7 Mao usab kini kaninyo, minahal nga kahigalaan. Ang pagkasayod nga inyong nabuntog si Satanas pinaagi sa pulong sa inyong pagpamatuod kaniadto motabang kaninyo sa paghigugma, pagpaambit, ug pagdapit8 karon ug sa kanunay—sa pagdapit sa uban nga moduol ug motan-aw, moduol ug motabang, ug moduol ug magpasakop, samtang kanang samang gubat alang sa mga kalag sa mga anak sa Dios nagpadayon.
Ang Gamhanang Pagtuo sulod Kaninyo
Unsa na man ang dakong gahom sulod kaninyo? Hunahunaa kini: misinggit kamo sa kalipay9 aron moanhi sa napukan nga kalibotan diin ang tanan mag-atubang og pisikal ug espiritwal nga kamatayon. Dili gayod kita makabuntog bisan asa niana nga kita ra. Dili lamang kita mag-antos gumikan sa atong kaugalingong mga sala apan sa mga sala usab sa uban. Ang katawhan mosinati sa halos tanang mahunahunaan nga matang sa kadaot ug kasagmuyo10—ang tanan tabonan og tabil sa kalimot sa atong mga hunahuna ug ang labing daotan nga kaaway sa kalibotan padayong magpunting ug magtintal kanato. Ang tanang paglaom nga makabalik nga nabanhaw ug limpyo sa balaang presensya sa Dios hingpit nga mag-agad sa usa ka Binuhat nga motuman sa Iyang saad.11
Unsa ang nagduso kaninyo nga modawat sa plano ug moanhi sa yuta? Si President Henry B. Eyring mitudlo, “Gikinahanglan ang pagtuo diha ni Jesukristo sa pagpaluyo sa plano sa kalipay ug ang papel ni Jesukristo niini kon gamay pa kaayo ang inyong nahibaloan kabahin sa mga hagit nga inyong sagubangon diha sa mortalidad.”12 Sa dihang misaad si Jesukristo nga moanhi Siya sa mortalidad ug mohatag sa Iyang kinabuhi sa pagpundok13 ug pagluwas kanato, wala lamang kamo motuo Kaniya. Kamo nga “halangdong mga espiritu”14 adunay “hilabihan ka dako nga hugot nga pagtuo” nga inyong nakita ang Iyang saad nga sigurado.15 Dili Siya makapamakak, mao nga Siya inyong nakita nga mipaagas na sa Iyang dugo alang kaninyo, sa dugayng panahon nga wala pa Siya matawo.16
Sa simbolikanhong mga pulong ni Juan, kamo “nakadaug batok [ni Satanas] pinaagi sa dugo sa Cordero.”17 Si Presidente Dallin H. Oaks mitudlo nga niana nga kalibotan “[kamo] nakakita sa katap[o]san gikan sa sin[o]gdanan.”18
Pananglit usa ka adlaw sa wala pa ka mobiya padulong sa eskwelahan usa sa imong mga ginikanan mihimo og tinuod nga saad nga imong makaon ang imong paboritong pagkaon sa imong pagpauli! Mahinamon kaayo ka! Samtang naa sa eskwelahan naghunahuna ka nga nagkaon niana nga pagkaon, ug matilawan na nimo kini. Natural lang, imong gipaambit ang imong nindot nga balita ngadto sa uban. Ang pagpaabot nga makapauli nakapalipay kaayo nimo nga ang mga pasulit ug mga hagit sa eskwelahan daw gaan ra. Walay makapawagtang sa imong kalipay o makapaduhaduha nimo tungod kay sigurado kaayo ang saad! Sa samang paagi, sa wala pa kamo halangdong mga espiritu matawo, nakakat-on kamo sa pagtan-aw sa mga saad ni Kristo niini nga siguradong paagi, ug kamo nakatilaw sa Iyang kaluwasan.19 Ang inyong dakong pagtuo daw mga muskulo nga magkakusgan ug magkadako samtang dugangan ninyo ang pag-ehersisyo niini, apan anaa na kini sa sulod kaninyo.
Unsaon ninyo sa pagpukaw sa inyong dakong pagtuo diha ni Kristo ug sa paggamit niini sa pagpundok sa Israel karon ug magmadaugon na usab batok ni Satanas? Pinaagi sa pagkat-on og usab nga magpaabot ug motan-aw uban sa samang kasiguroan sa saad sa Ginoo sa pagpundok ug pagluwas karon. Siya kasagarang migamit sa Basahon ni Mormon ug sa Iyang mga propeta sa pagtudlo kanato unsaon. Sa dugayng panahon nga wala pa si Kristo, ang Nephite nga “mga propeta, ug … mga pari, ug … mga magtutudlo … [mikabig sa katawhan] sa pagpaabot ngadto sa Mesiyas, ug motuo diha kaniya nga moanhi ingon og siya mianhi na.”20 Si propeta Abinadi mitudlo, “Ug karon kon si Kristo wala pa moanhi sa kalibutan, namulong sa mga butang nga moabut ingon nga sila nangabut na, wala unta ang katubsanan.”21 Sama ni Alma, si Abinadi “[mi]lantaw] uban ang mata sa hugot nga pagtuo”22 ug nakakita sa siguradong saad sa Dios nga kaluwasan nga natuman na. Sila “nakadaog batok [ni Satanas] pinaagi sa dugo sa Cordero ug sa pulong sa ilang pagpanghimatuod” sa dugay nga panahon nga wala pa matawo si Kristo, sama sa inyong gibuhat. Ug ang Ginoo mihatag kanila og gahom sa pagdapit ug pagpundok sa Israel. Mao usab ang Iyang buhaton alang kaninyo samtang kamo magpaabot uban sa pagtuo, motan-aw nga napundok ang Israel—sa tibuok kalibotan ug sa inyong kaugalingong “mga grupo”23—ug modapit sa tanan!
Gatosan ka mga misyonaryo mipalambo sa ilang gamhanang premortal nga pagtuo kang Kristo pinaagi sa pagtan-aw niadtong ilang nakontak ug gitudloan nga nagsul-ob sa sinina sa bunyag ug sa templo. Sa usa ka pakigpulong nga giulohan og “Begin with the End in Mind [Sugdi nga Maghunahuna sa Tumong],”24 si Presidente Nelson mipaambit og personal nga ehemplo sa paghimo niini ug misugo sa mga lider sa misyon sa pagtudlo sa atong mga misyonaryo sa pagbuhat sa ingon. Ang pagkasayod nga migamit sila niining dakong pagtuo diha ni Jesukristo didto sa premortal nga kalibotan nakatabang pag-ayo sa atong minahal nga mga misyonaryo sa “pagpaminaw Kaniya”25 ug sa paggamit sa ilang dakong pagtuo sa pagpundok sa Israel sama sa gisaad sa Ginoo.
Siyempre, ang paghunahuna og mga bakak makadaot sa pagtuo.26 Akong mga higala, ang tinuyo nga paghunahuna o pagtan-aw sa mga butang nga sukwahi kon si kinsa gayod kamo, ilabi na sa pornograpiya, makapahuyang sa inyong pagtuo kang Kristo ug kon walay paghinulsol makagun-ob niini. Palihog gamita ang inyong mga imahinasyon sa pagdugang og pagtuo kang Kristo, dili sa pagdaot niini.
Ang Programa sa Kabataan ug Kabatan-onan
Ang programa sa Kabataan ug Kabatan-onan usa ka propetikanhong himan sa pagtabang kaninyo kabatan-onan nga mapaandar ang inyong dakong pagtuo. Si Presidente Oaks mitudlo, “Kini nga programa gidisenyo aron sa pagtabang ninyo nga mahimong mas sama sa atong Manluluwas sa upat ka aspeto: espiritwal, sosyal, pisikal, ug intelektwal.”27 Samtang kamo mga batan-on—mangulo—sa pagsunod sa ebanghelyo, pag-amuma sa uban, pagdapit sa tanan nga modawat sa ebanghelyo, paghiusa sa mga pamilya alang sa kahangturan, ug pag-organisar og makalingaw nga mga kalihokan,28 ang dakong pagtuo kang Kristo nga anaa kaninyo sa premortal nga kinabuhi motunga og balik ug mohatag kaninyo og gahom sa paghimo sa Iyang buhat niini nga kinabuhi!
Usab, ang personal nga mga tumong, “ilabi na ang mubo og tagal nga mga tumong,”29 motabang kaninyo nga mapalambo og balik ang inyong gamhanang pagtuo. Kon mohimo kamo og maayo nga tumong, naglantaw kamo sa umaabot, sama sa inyong gibuhat kaniadto, ug makakita kon unsa ang gusto sa inyong Langitnong Amahan nga kamo o ang laing tawo mamahimo.30 Dayon kamo magplano ug maningkamot pag-ayo sa pagkab-ot niini. Si Elder Quentin L. Cook mitudlo, “Ayaw ipakaminos ang importansya sa pagplano, paghimo og mga tumong … , ug [pagdapit sa uban]—ang tanan uban sa bug-os nga pagtuo.”31
Anaa kaninyo ang pagpili! Ang Ginoo miingon mahitungod kaninyo, “Ang gah[o]m [sa pagpili] anaa kanila.”32 Si Elder Neil L. Andersen mipasabot, “Ang inyong pagtuo molambo dili pinaagi sa sulagma, apan pinaagi sa pagpili.”33 Siya usab miingon, “[Ang bisan unsang] matinuorong mga pangutana [nga aduna kamo] … mahusay sa pailob ug [sa] mata sa hugot nga pagtuo.”34
Mopamatuod ko nga (1) ang inyong tinuod nga pagkatawo ug (2) ang dakong gahom sa pagtuo kang Kristo sulod kaninyo makapahimo kaninyo nga “motabang sa pag-andam sa kalibotan alang sa pagbalik sa Manluluwas pinaagi sa pagdapit sa tanan nga moduol ngadto ni Kristo ug modawat sa mga panalangin sa Iyang Pag-ula.”35 Hinaot nga kitang tanan moambit sa hingpit nga kalipay sa sigurado nga saad sa Basahon ni Mormon:
“Ang mga matarung nga nagpatalinghug ngadto sa … mga propeta, ug … naglantaw sa umaabut ngadto kang Kristo uban ang pagkamakanunayon … bisan pa sa tanan nga pagpanggukod … dili mamatay.
“Apan [si Kristo] … moalim kanila, ug sila makaangkon og kalinaw uban kaniya.”36
Sa ngalan ni Jesukristo, amen.