Mga Bishop—Mga Magbalantay sa Panon sa Ginoo

Ni Elder Quentin L. Cook

Sa Korum sa Napulog Duha ka mga Apostoles

Ang bishop adunay hilabihan kaayo kaimportante nga tahas sa pagpangalagad isip magbalantay aron sa paggiya sa bag-o nga kaliwatan ngadto ni Jesukristo.

Akong minahal nga mga kaigsoonan sa pagkapari, usa sa pinakahalandomon nga mga linya sa gimahal kaayo nga himno nangutana, “Mga batan-on sa Zion motalaw ba?”¹ Ang akong kinasingkasing ug lanog nga pamahayag agig tubag niana nga pangutana mao nga “Dili!”

Aron sa pagsiguro nga kanang tubag tinuod pa gihapon, ako karon mopamatuod nga ang pagsuporta sa bag-o nga kaliwatan sa panahon sa dili kasarangang mga hagit ug mga tentasyon maoy usa ka mahinungdanong katungdanan nga gihatag sa Langitnong Amahan ngadto sa mga ginikanan ug sa mga bishopric.² Tugoti ako sa paghulagway sa kaimportante sa bishopric pinaagi sa usa ka personal nga kasinatian.

Niadtong deacon pa ko, ang akong pamilya mibalhin ngadto sa bag-ong panimalay sa laing ward. Nagsugod pa lang ko ato sa junior high school, mao nga mitungha usab ko sa bag-ong eskwelahan. Adunay nindot kaayo nga grupo sa batan-ong mga lalaki sa korum sa mga deacon. Kadaghanan sa ilang mga ginikanan aktibo nga mga miyembro. Ang akong mama aktibo gayod kaayo; ang akong papa talagsaon sa tanang paagi apan dili aktibo nga miyembro.

Ang ikaduhang magtatambag sa bishopric,³ si Brother Dean Eyre, usa ka matinuoron nga lider. Samtang nag-anad-anad pa ko sa bag-ong ward, gianunsyo ang usa ka amahan ug anak nga lalaki nga kalihokan alang sa Bear Lake—mga 40 ka milya (65 km) ang gilay-on. Wala ko maghunahuna nga moapil nga wala ang akong papa. Apan si Brother Eyre mihimo og espesyal nga imbitasyon aron mokuyog ko niya. Misulti siya og dakong pagdayeg ug pagtahod sa akong papa ug mipasabot sa kahulogan sa akong kahigayonan nga makigkuyog sa ubang mga miyembro sa korum sa mga deacon. Busa mihukom ko nga mokuyog ni Brother Eyre, ug nindot kaayo ang akong kasinatian.

Si Brother Eyre usa ka talagsaong ehemplo sa Kristohanong gugma sa pagpatuman sa katungdanan sa bishopric sa pagsuporta sa mga ginikanan sa pagbantay ug pag-amuma sa mga batan-on. Iya kong gihatagan og maayo kaayo nga pagsugod niining bag-o nga ward ug miagak kanako.

Pipila ka mga bulan sa wala pa ako molakaw para sa misyon niadtong 1960, si Brother Eyre namatay sa cancer sa edad nga 39. Gibiyaan niya ang asawa ug ilang lima ka mga anak, ang tanan bata pa kay sa 16 anyos. Ang iyang kamagulangang anak nga mga lalaki, si Richard ug Chris Eyre, mipasalig kanako nga sa pagkawala sa ilang amahan, ang mga bishopric misuporta ug mibantay kanila ug sa ilang mga manghod nga lalaki ug babaye uban sa Kristohanon nga gugma, nga niini ako mapasalamaton.

Ang mga ginikanan kanunay nga maoy unang responsabli sa ilang mga pamilya.⁴ Ang mga kapangulohan sa korum usab mosangkap sa gikinahanglang suporta ug giya ngadto sa mga miyembro sa korum pinaagi sa pag-abag kanila sa paghimo sa mga katungdanan ug gahom sa Aaronic nga Pagkapari nga mahimong sentro sa ilang mga kinabuhi.⁵

Karon ang akong tumong mao ang pagtutok sa mga bishop ug sa ilang mga magtatambag, kinsa angay nga tawagong “mga magbalantay sa panon sa Ginoo”—hilabi na ang ilang pagkamagbalantay alang sa bag-o nga kaliwatan.⁶ Makaikag kini nga si Apostol Pedro mitawag ni Jesukristo isip “[ang] Magbalantay ug Tig-atiman sa inyong mga kalag.”⁷

Ang bishop adunay lima ka dagkong mga responsibilidad sa pagdumala sa usa ka ward:

Siya mao ang tigdumalang high priest sa ward.⁸
Siya ang presidente sa Aaronic nga Pagkapari.⁹
Siya ang maghuhukom sa kadaghanan.¹⁰
Siya mohan-ay sa buhat sa kaluwasan ug kahimayaan, lakip na sa pag-amuma niadtong nanginahanglan.¹¹
Ug siya modumala sa mga rekord, mga panalapi, ug sa paggamit sa meetinghouse.¹²

Sa iyang tahas isip ang tigdumalang high priest, ang bishop mao ang “espiritwal nga lider” sa ward.¹³ Siya usa ka “matinud-anon nga disipolo ni Jesukristo.”¹⁴

Agig dugang, “ang bishop motabang sa pag-organisar sa buhat sa kaluwasan ug kahimayaan diha sa ward.”¹⁵ Ang bishop kinahanglang mosangon sa adlaw-adlaw nga responsibilidad sa pagpaambit sa ebanghelyo, pagpalig-on sa bag-o ug sa nabalik nga mga miyembro, pagpangalagad, ug buhat sa templo ug kasaysayan sa pamilya ngadto sa mga kapangulohan sa korum sa mga elder ug sa Relief Society.¹⁶ Ang bishop mohan-ay niini nga buhat diha sa konseho sa ward ug sa konseho sa mga batan-on sa ward.

Ang bishop adunay hilabihan kaayo kaimportante nga tahas sa pagpangalagad isip magbalantay aron sa paggiya sa bag-o nga kaliwatan, lakip na sa mga young single adult, paingon ngadto ni Jesukristo.¹⁷ Si Presidente Russell M. Nelson mihatag og gibug-aton sa hilabihan kaayo ka mahinungdanon nga tahas sa bishop ug sa iyang mga magtatambag. Siya mitudlo nga ang ilang “una ug importante nga responsibilidad mao ang pag-atiman sa mga batan-ong lalaki ug sa mga batan-ong babaye sa [ilang] ward.”¹⁸ Ang bishopric mosuporta sa mga ginikanan sa pagbantay ug pag-amuma sa kabataan ug kabatan-onan sa ward. Ang bishop ug ang presidente sa Young Women sa ward magtinambagay. Sila maningkamot sa pagtabang sa kabatan-onan sa pagsunod sa mga sumbanan diha sa Alang sa Kalig-on sa mga Kabatan-onan, mopasarang kanila nga modawat sa mga ordinansa, ug mohimo ug motuman sa sagrado nga mga pakigsaad.

Ikaw tingali mangutana, “Ngano nga ang bishopric gisugo man sa paggahin og daghan kaayong panahon uban sa kabatan-onan?” Ang Ginoo miorganisar sa Iyang Simbahan aron sa pagtuman sa labing importanting mga prayoridad. Sumala pa, ang organisasyon sa Iyang Simbahan adunay istraktura diin ang bishop adunay doble nga kaakohan. Siya adunay kaakohan sa pagtudlo sa doktrina sa tibuok ward, apan duna usab siyay piho nga kaakohan sa pagtudlo sa doktrina sa korum sa mga priest.¹⁹

Ang batan-ong mga lalaki kinsa mga priest ug ang batan-ong mga babaye sa samang pangedaron anaa sa mahinungdanon kaayong ang-ang sa ilang mga kinabuhi ug paglambo. Sa mubo nga panahon, mohimo sila og mga desisyon nga adunay tibuok kinabuhi nga mga resulta. Sila motino kon sila mosarang ba alang sa templo, moserbisyo og misyon,²⁰ maningkamot nga maminyo sa templo, ug mangandam alang sa ilang bulohaton sa kinabuhi. Kini nga mga desisyon, kon mahimo na, adunay lawom nga espiritwal ug praktikal nga mga resulta sa nahabiling bahin sa ilang kinabuhi. Mga bishop, palihog sayri nga ang mubong panahon nga gigahin uban sa usa ka batan-on nga priest o batan-ong babaye makatabang kanila nga makasabot sa gahom nga mahimo nilang mapahimoslan pinaagi sa Pag-ula ni Jesukristo. Makahatag kini og usa ka panglantaw nga adunay lawom nga impluwensya sa tibuok nilang kinabuhi.

Usa sa pinakamaayong mga ehemplo nga akong nakita sa usa ka bishop kinsa mitabang sa paghatag niini nga matang sa panglantaw ngadto sa iyang kabatan-onan mao si Bishop Moa Mahe. Siya ang gitawag nga unang bishop sa San Francisco Tongan Ward.²¹ Usa siya ka langyaw gikan sa Vava’u, Tonga. Ang iyang ward nahimutang duol sa tugpahanan sa San Francisco, California, diin siya nagtrabaho.²²

Ang ward adunay daghan kaayong mga batan-on, kasagaran gikan sa mga pamilya nga bag-ohayng milangyaw ngadto sa Estados Unidos. Si Bishop Mahe wala lang motudlo kanila pinaagi sa pulong ug ehemplo kon unsaon nga mahimong matarong nga mga disipolo ni Jesukristo, apan siya usab mitabang sa paghatag kanila og panglantaw kon unsa ang ilang maabot ug mitabang kanila sa pagpangandam alang sa templo, misyon, edukasyon, ug panarbaho. Miserbisyo siya hapit walo ka tuig, ug ang iyang mga damgo ug tinguha alang sa kabatan-onan nahimong tinuod.

Dul-an 90 ka porsyento sa batan-ong mga lalaki diha sa mga korum sa Aaronic nga Pagkapari miserbisyo og mga misyon. Kinse ka batan-ong mga lalaki ug mga babaye maoy unang mga sakop sa ilang pamilya nga naka-eskwela og kolehiyo.²³ Nakighimamat siya sa principal sa lokal nga high school (dili sa atong tinuohan), ug sila nagkahigalaay ug nagkatinabangay kon unsaon sa pagtabang sa matag batan-on nga makakab-ot sa bililhon nga mga tumong ug makabuntog sa mga problema. Ang principal misulti kanako nga si Bishop Mahe miabag kaniya sa pagtabang sa mga langyaw sa tanang tinuohan kinsa naningkamot. Ang mga batan-on nasayod nga ang bishop nagpangga nila.

Subo lang, si Bishop Mahe namatay samtang nagserbisyo isip bishop. Dili gayod nako makalimtan ang makatandog ug makadasig nga lubong. Dihay dakong pundok sa katawhan. Ang choir gilangkoban sa sobra sa 35 ka matinud-anon nga batan-ong mga miyembro kinsa miserbisyo og mga misyon o nag-eskwela sa kolehiyo ug kinsa kanhi mga batan-on panahon sa iyang pagserbisyo isip bishop. Usa ka mamumulong mipadayag sa lawom nga pagbati sa pasalamat gikan sa kabatan-onan ug sa mga young adult sa iyang ward. Siya mihatag og pahinungod ngadto ni Bishop Mahe alang sa panglantaw nga iyang nahatag kanila sa pagpangandam sa kinabuhi ug matarong nga pagpangalagad. Apan labaw sa tanan, si Bishop Mahe mitabang kanila sa pag-ugmad og hugot nga pagtuo diha ni Ginoong Jesukristo isip ang tukoranan sa ilang mga kinabuhi.

Karon, mga bishop, bisan asa kamo nagserbisyo, sa inyong mga interbyu ug ubang pagpakighinabi, kamo makahatag nianang matang sa panglantaw ug makatukod og hugot nga pagtuo diha ni Jesukristo. Kamo makahatag og gamhanang mga pagdapit sa pag-usab sa kinaiya, pag-andam kanila sa kinabuhi, ug pagdasig kanila nga magpabilin diha sa dalan sa pakigsaad.

Agig dugang, mahimo kamong motabang sa ubang kabatan-onan kinsa nagkasungi sa ilang mga ginikanan tungod sa mga butang nga wala kaayoy hinungdan.²⁴ Sa panahon nga ang mga batan-on ingon og may pinakagrabeng kasungian sa ilang mga ginikanan, ang tawo nga nagdumala sa ilang korum ug kang kinsa sila manubag sa eklesyastikal nga paagi mao usab ang tawo kinsa duolon sa mga ginikanan alang sa rekomend sa templo. Kini mobutang sa bishop sa talagsaon nga posisyon sa pagtambag sa parehong batan-on ug sa ilang mga ginikanan kon ang panagbangi miresulta sa pagka walay panaghiusa. Ang mga bishop makatabang sa pagsabot sa mga butang uban sa mahangturong panglantaw ug pagsulbad sa mga problema nga dinagkoay ug kadtong wala kaayoy hinungdan. Among irekomendar nga ang mga bishop dili sangonan og mga pamilya alang sa pagpangalagad aron sila makatutok sa ilang panahon ug kusog sa pagpangalagad ngadto sa kabatan-onan ug sa ilang mga pamilya sa ingon niini nga mga matang sa sitwasyon.²⁵

Nakaila ko og usa ka bishop kinsa nakasulbad sa grabeng panagsungi sa usa ka anak nga lalaki ug sa iyang mga ginikanan, naghiusa sa panimalay ug mas lig-on nga pasalig ngadto sa ebanghelyo. Ang bishop mitabang sa mga ginikanan sa pagsabot nga ang pagpaningkamot nga mahimong disipolo ni Jesukristo mas importante kay sa unsaon ug kanus-a ang mga buluhaton sa pamilya buhaton.

Aron mas makagahin og dugang nga panahon sa kabatan-onan, bisan asa sila, lakip sa mga kalihokan o kalingawan sa eskwelahan, ang mga bishopric gitambagan nga modelegar sa angay idelegar nga mga miting ug panahon sa pagtambag uban sa mga hamtong. Samtang ang mga bishop makatambag sa grabe ug dinalian nga mga butang, among irekomendar nga ang pagdelegar sa nagpadayon nga pakigtambag kabahin sa sagad, dili kaayo dinalian nga mga butang nga wala magkinahanglan og mga paghukom kalabot sa katakos nga kini ihatag ngadto sa mga miyembro sa korum sa mga elder ug sa Relief Society—kasagaran sa mga kapangulohan o tigpangalagad nga mga brother ug sister. Ang Espiritu mogiya sa mga lider²⁶ sa pagpili sa angay nga mga miyembro nga moapil niini nga pakigtambag. Kadtong makadawat niining gidelegar nga tahas sa pakigtambag adunay katungod nga makadawat og pagpadayag. Sila, dayag lang, kinahanglan gayod nga magpabilin sa estriktong pagkakompidensyal.

Ang mahunahunaon nga mga lider kanunay nga mosakripisyo alang sa bag-o nga kaliwatan. Dinhi niining dapita ang mga miyembro sa bishopric mogahin sa mas dakong panahon sa ilang pagserbisyo sa Simbahan.

Gusto ko karon nga mosulti og pipila ka butang direkta ngadto sa kabatan-onan ug dayon ngadto sa atong mga bishop.

Daghan kaninyo bililhong kabatan-onan tingali walay klarong panan-awon kon si kinsa kamo ug si kinsa kamo nga mamahimo. Apan anaa kamo sa ngilit sa pinakaimportanting mga desisyon nga inyo unyang pagahimoon sa inyong kinabuhi. Palihog pakigtambag sa inyong mga ginikanan ug sa inyong bishop kabahin sa importanteng mga pagpili nga nagpaabot kaninyo. Tugoti ang bishop nga mahimo ninyong higala ug tigtambag.

Kami nasayod nga kamo adunay mga pagsulay ug mga tentasyon nga nagpalibot kaninyo. Kitang tanan kinahanglan nga maghinulsol kada adlaw, sama sa gitudlo ni Presidente Nelson. Palihog pakigsulti sa inyong mga bishop kabahin sa bisan unsang butang diin ang usa ka maghuhukom sa kadaghanan makaabag kaninyo sa paghan-ay sa inyong kinabuhi uban sa Ginoo diha sa pagpangandam sa “mahinungdanon nga buhat” nga Iyang gisangon kaninyo niining kataposang dispensasyon.²⁷ Sa pagdapit kaninyo ni Presidente Nelson, palihog himoang takos ang inyong kaugalingon nga mahimong kabahin sa mga batan-ong batalyon sa Ginoo!²⁸

Karon usa ka tambag alang kaninyo minahal nga mga bishop sa ngalan sa kapangulohan ug sa mga miyembro sa Simbahan. Akong ipadayag ang among dakong pasalamat kaninyo. Sa tanan nga mga kausaban nga kamo gihangyo sa paghimo sa bag-ohay lang nga mga tuig, minahal nga mga bishop, palihog hibaloi unsa kadako ang among gugma ug pasalamat kaninyo. Ang inyong kontribusyon ngadto sa gingharian halos dili mahubit. Ang Simbahan adunay 30,900 ka mga bishop ug mga presidente sa branch nga nagserbisyo sa tibuok kalibotan.²⁹ Among gitahod ang matag usa kaninyo.

Ang ubang mga pulong ug ang sagrado nga mga tawag nga ilang gihulagway nagdala og halos usa ka espiritwal, dili hitupngan nga kamahinungdanon. Ang calling sa bishop sa tinuod anaa sa kinatas-ang hut-ong niana nga mga pulong. Ang pagserbisyo sa Ginoo niini nga kapasidad dalaygon sa daghan kaayong mga paagi. Ang pagtawag, pagpaluyo, ug pagset-apart sa usa ka bishop usa ka dili hikalimtan nga kasinatian. Para nako, usa kini ka halangdon nga mga hitabo tungod sa kalapdon ug kaladmon sa mga pagbati nga gipukaw niini. Anaa kini nahimutang sa han-ay sa bililhong mga hitabo sama sa kaminyoon ug pagkaamahan nga dili matukib sa pipila lang ka mga pulong ang mabati.³⁰

Mga bishop, kami nagpaluyo kaninyo! Mga bishop, gihigugma namo kamo! Kamo sa tinuoray mao ang mga magbalantay sa Ginoo sa Iyang panon. Ang Manluluwas dili mobiya kaninyo diha niini nga mga tawag. Niini ako mopamatuod, niining tapos sa semana nga Pasko sa Pagkabanhaw, sa ngalan ni Jesukristo, amen.