Ang Dan-ag sa Ebanghelyo nga Kamatuoran ug Gugma
Nagpamatuod ako nga ang dan-ag sa ebanghelyo nga kamatuoran ug gugma hayag nga nagsidlak sa tibuok yuta karon.
Ang matahom nga himno sa Santos sa Ulahing mga Adlaw nga “Paminaw, Tanang Kanas[o]ran!” klarong nakakuha sa kadasig ug kahinam sa kahingpitan sa ebanghelyo nga mikatap sa tibuok kalibotan. Niini nga himno kita mokanta:
Si Louis F. Mönch, ang tagsulat niining masadyaon nga teksto, usa ka German nga kinabig kinsa misulat sa dinasig nga mga pulong alang sa himno samtang nagpuyo sa Switzerland atol sa iyang full-time nga misyonaryo nga pagserbisyo sa Europe.2 Ang kalipay nga naggikan sa pagsaksi sa tibuok kalibotan nga epekto sa Pagpahiuli klaro nga gihulagway sa mosunod nga mga pulong sa himno:
Nangita diha sa kangitngit;
Sila nagpaab[o]t sa hingpit.
Miab[o]t nang kamatuoran.
Dinhis kalib[o]tan!3
Salamat sa pagsugod sa nagpadayon nga Pagpahiuli kapin 200 ka tuig lang kaniadto, “ang dan-ag sa ebanghelyo nga kamatuoran ug gugma”4 hayag nga nagsidlak sa tibuok kalibotan karon. Si Propeta Joseph nakakat-on niadtong 1820, ug minilyon pa ang nakakat-on sukad, nga ang Dios, “nagapanghatag ngadto sa tanang mga tawo sa madagayaon gay[o]d ug sa walay pagpamoyboy.”5
Wala madugay human sa organisasyon sa Simbahan niining kataposang dispensasyon, ang Ginoo namulong ngadto kang Joseph Smith ug mipadayag sa iyang dako nga gugma alang kanato sa dihang Siya miingon:
“Busa, Ako ang Ginoo, nahibalo sa katalagman nga moab[o]t diha sa mga lumulupyo sa yuta, mitawag sa akong sulugoon si Joseph Smith, Jun., ug namulong ngadto kaniya gikan sa langit, ug mihatag kaniya og mga sugo; …
“Nga ang akong walay katap[o]san nga pakigsaad unta mapahimutang;
“Nga ang kahingpitan sa akong ebanghelyo mahimo tingali ikapahayag pinaagi sa mahuyang ug yano ngadto sa mga lumulupyo sa kalib[o]tan.”6
Wala madugay human nga nadawat kini nga pagpadayag, misugod sa pagtawag og mga misyonaryo ug gipadala ngadto sa daghang nasod sa kalibotan. Sama sa gipaabot ni propeta Nephi, ang mensahe sa gipahiuli nga ebanghelyo gisugdan og sangyaw ngadto “sa tanan nga mga kanas[o]ran, mga kaliwatan, mga pinulongan, ug mga katawhan.”7
“Ang Simbahan ni Jesukristo sa mga Santos sa Ulahing mga Adlaw pormal nga giorganisar diha sa usa ka gamay nga troso nga balay sa amihanang New York niadtong 1830.
“Milungtad pa og 117 ka tuig—hangtod 1947—aron motubo ang Simbahan gikan sa unang unom ka miyembro ngadto sa usa ka milyon. Usa ka importanting bahin sa Simbahan ang mga misyonaryo gikan sa labing unang mga adlaw niini, nga miabot ngadto sa Native American nga mga yuta, ngadto sa Canada ug, niadtong 1837, lapas pa sa kontinente sa Amihanang Amerika paingon ngadto sa England. Wala madugay human niana, ang mga misyonaryo nagtrabaho sa European nga kontinente ug ingon kalayo sa India ug sa mga Isla sa Pasipiko.
“Ang panahon nga duha ka milyon ang miyembro nakab-ot paglabay lamang sa 16 ka tuig, niadtong 1963, ug ang tulo ka milyon sulod sa dugang nga walo ka tuig.”8
Naghatag og gibug-aton sa paspas nga paglambo sa Simbahan, si Presidente Russell M. Nelson bag-ohay lang miingon: “Karon, ang buhat sa Ginoo sa Ang Simbahan ni Jesukristo sa mga Santos sa Ulahing mga Adlaw paspas nga nagpadayon. Ang Simbahan adunay talagsaon, walay sama nga umaabot.”9
Ang Pagpahiuli sa kahingpitan sa ebanghelyo ni Jesukristo, ang pag-organisar sa buhi nga Simbahan sa Ginoo dinhi sa yuta pag-usab, ug ang talagsaon nga paglambo niini sukad kaniadto mihimo sa mga panalangin sa pagkapari nga maanaa sa tibuok kalibotan. Ang sagrado nga mga ordinansa ug mga pakigsaad nga nagbugkos kanato sa Dios ug nagpahimutang kanato sa dalan sa pakigsaad klaro nga nagpakita sa “gah[o]m sa pagka-diosnon.”10 Samtang moapil kita niini nga sagrado nga mga ordinansa alang sa mga buhi ug alang sa mga patay, atong gipundok ang Israel sa duha ka habig sa tabil ug giandam ang kalibotan alang sa Ikaduhang Pag-anhi sa Manluluwas.
Niadtong 1973, ako ug ang akong mga ginikanan mibiyahe gikan sa among natawhan nga Argentina aron masilyo sa templo. Tungod kay walay mga templo sa tibuok Latin America niadtong higayona, mibiyahe kami sa eroplano og sobra sa 9,700 ka kilometro padulong ug pabalik aron masilyo sa Templo sa Salt Lake. Bisan og dos anyos pa lamang ko niadtong higayona ug wala makahinumdom sa kinatibuk-an niana nga espesyal nga kasinatian, tulo ka tataw nga mga panumdoman gikan niana nga biyahe ang klaro kaayo nakong nahinumdoman ug nagpabilin gayod sukad kaniadto.
Una, nakahinumdom ko nga gipahimutang ko duol sa bentana sa eroplano ug nakakita sa puti nga mga panganod sa ubos.
Kadtong matahom, hayag nga mga panganod nagpabilin sa akong hunahuna nga ingon og higante kini nga mga bola nga gapas.
Lain nga hulagway nga nagpabilin sa akong hunahuna mao ang pipila ka kataw-anan nga tan-awon nga mga karakter sa usa ka kalingawan nga suroyanan dapit sa Los Angeles. Kadto nga mga karakter lisod makalimtan.
Apan ang mas dako og importansya mao ang kining nindot kaayo ug dili makalimtan nga hulagway:
Tataw akong nakahinumdom nga naa sulod sa usa ka sagrado nga lawak sa Templo sa Salt Lake diin gipahigayon ang mga pagsilyo sa mga magtiayon ug mga pamilya alang karon ug alang sa tanan nga kahangtoran. Nakahinumdom ko sa matahom nga altar sa templo ug sa sanag nga kahayag sa adlaw nga misulod agi sa gawas nga bentana sa lawak. Nabati nako kaniadto, ug padayon nga nabati sukad, ang kainit, kahilwasan, ug kahupayan sa dan-ag sa ebanghelyo nga kamatuoran ug gugma.
Mibati ako sa akong kasingkasing sa susama nga mga butang paglabay sa 20 ka tuig, sa dihang misulod ako sa templo aron masilyo pag-usab—niining panahona samtang ako ug ang akong pangasaw-unon nasilyo alang karon ug alang sa tanan nga kahangtoran. Apan, niini nga higayon, wala namo kinahanglana nga mobiyahe og liboan ka kilometro tungod kay natukod ug napahinungod na ang Templo sa Buenos Aires Argentina, ug dali ra ang pagdrayb gikan sa among panimalay.
Kawhaan ug duha ka tuig human sa among kasal ug pagsilyo, napalanginan kami nga makabalik ngadto sa sama nga templo, apan karon uban sa among matahom nga anak nga babaye, ug kami nasilyo isip usa ka pamilya alang karon ug alang sa tanan nga kahangtoran.
Samtang namalandong ko niining sagrado kaayo nga mga higayon sa akong kinabuhi, napuno ako sa lawom, malungtaron nga kalipay. Nabati nako ug padayon nga nabati ang gugma sa usa ka manggiluluy-on nga Amahan sa Langit, kinsa nasayod sa atong indibidwal nga mga panginahanglan ug kinasingkasing nga mga tinguha.
Sa paghisgot sa pagpundok sa Israel sa kataposang mga adlaw, ang Ginoong Jehova miingon, “Ibutang ko ang akong sugo sa ilang kaisipan ug isulat ko sa ilang kasingkasing. Ug mahimo ako nga ilang Dios ug sila akong katawhan.”11 Mibati ako nga mapasalamaton sa kahangtoran nga gikan sa akong batang pangidaron, nagsugod nga adunay lawom ug malungtaron nga impluwensiya kanako ang balaod sa Ginoo pinaagi sa sagrado nga mga ordinansa sa Iyang balaan nga balay. Mahinungdanon kaayo nga masayod nga Siya mao ang atong Dios, nga kita mao ang Iyang katawhan, ug nga bisan unsa pa nga mga kahimtang ang naglibot kanato, kon kita matinud-anon ug motuman sa mga pakigsaad nga atong gisudlan, kita mahimong “liyokan sa kahangt[o]ran sa mga bukton sa iyang gugma.”12
Atol sa sesyon sa kababayen-an sa kinatibuk-ang komperensiya niadtong Oktubre 2019, si Presidente Nelson miingon, “Ang tanan natong mga paningkamot sa pagpangalagad sa usag usa, pagsangyaw sa ebanghelyo, paghingpit sa mga Santos, ug pagtubos sa mga patay mopunting ngadto sa balaan nga templo.”13
Usab, atol sa samang kinatibuk-ang komperensiya, si Presidente Nelson mitudlo: “Siyempre, ang labing importanting bahin sa Pagpahiuli mao ang balaan nga templo. Ang sagradong mga ordinansa ug mga pakigsaad niini importante kaayo sa pag-andam og katawhan nga andam sa pagsugat sa Manluluwas sa Iyang Ikaduhang Pag-anhi.”14
Ang nagpadayon nga Pagpahiuli giubanan sa pagtukod ug pagpahinungod og mga templo nga mas paspas nga gihimo. Samtang magpundok kita sa duha ka habig sa tabil, samtang mohimo kita og mga sakripisyo aron moalagad ug mohimo sa templo nga mahinungdanon kaayo sa atong mga kinabuhi, ang Ginoo nagpalambo gayod kanato—nagpalambo Siya sa iyang katawhan sa pakigsaad.
Gikan sa langitnon nga trono
Nagadan-ag ang ebanghelyo!
Sama sa adlaw ang kahayag
Sa tanan nagbanwag.15
Nagpamatuod ako nga ang dan-ag sa ebanghelyo nga kamatuoran ug gugma hayag nga nagsidlak sa tibuok yuta karon. Ang “usa ka kahibulongan nga buhat ug usa ka katingalahan” nga gipanagna ni propeta Isaias16 ug nakita ni Nephi17 nagkapaspas nga nagahitabo, bisan niining mahagiton nga mga panahon. Sama sa propetikanhong gipahayag ni Joseph Smith, “Ang Sumbanan sa Kamatuoran natukod; walay dili balaan nga kamot ang makapugong sa buhat sa paglambo … hangt[o]d ang mga katuyoan sa Dios matuman, ug ang Halangdong Jehova moingon nga ang buhat nahuman na.”18
Mga kaigsoonan, hinaot andam kita ug modesisyon karon sa pag-apil sa atong mga kaugalingon ug sa atong mga pamilya sa pagpaminaw sa tingog sa langit, gani ang tingog sa atong Manluluwas. Hinaot nga mohimo ug motuman kita og mga pakigsaad ngadto sa Dios, nga maoy lig-ong mokupot kanato diha sa dalan nga mopadulong balik ngadto sa Iyang presensya, ug hinaot nga magmaya kita sa mga panalangin sa mahimayaon nga kahayag ug kamatuoran sa Iyang ebanghelyo. Sa ngalan ni Jesukristo, amen.