COVID-19 ug mga Templo
Ibutang og una sa inyong mga hunahuna ug mga kasingkasing ang inyong mga pakigsaad ug ang mga panalangin sa templo. Pagpabiling matinud-anon sa mga pakigsaad nga inyong gihimo.
Akong pinangga nga kaigsoonan, kita sa tinud-anay nakasinati og espirituhanong pagkabusog. Mapasalamaton kaayo ako alang sa mga pag-ampo, mga mensahe, ug musika sa tibuok komperensiya. Salamat sa matag usa kaninyo sa pagpakig-uban kanamo, bisan asa man kamo.
Sa sayong bahin niini nga tuig, tungod sa COVID-19 nga pandemya ug sa atong tinguha nga mamahimong maayong mga lumulupyo sa tibuok kalibotan, kita mihimo sa lisod nga desisyon sa temporaryong pagsira sa tanang mga templo. Atol sa misunod nga mga bulan, kami mibati nga nadasig nga ablihan pag-usab ang mga templo sa anam-anam pinaagi sa mabinantayon kaayo nga pamaagi. Ang mga Templo karon gipang-ablihan sa upat ka hugna, higpit nga nagsunod sa mga regulasyon ug kahilwasan nga mga protokol sa lokal nga gobyerno.
Alang sa mga templo nga anaa sa hugna 1, kwalipikado nga mga magtiayon kinsa kaniadto nakadawat sa ilang kaugalingong mga pagtuga mahimong masilyo isip bana ug asawa.
Alang sa mga templo nga anaa sa hugna 2, tanang mga ordinansa alang sa mga buhi gipahigayon, lakip ang kaugalingon nga pagtuga, ang pagsilyo sa bana ug asawa, ug pagsilyo sa mga anak ngadto sa mga ginikanan. Kami bag-ohay lang miusab sa mga probisyon sa hugna 2 ug motugot na sa atong kabatan-onan, bag-ong mga miyembro, ug uban nga adunay rekomend nga may limitasyon ang paggamit sa pag-apil sa puli nga mga pagbunyag alang sa ilang mga katigulangan.
Alang sa mga templo nga anaa sa hugna 3, kadtong adunay nakatakda na nga mga appointment mahimong moapil dili lamang sa mga ordinansa alang sa buhi apan sa tanan usab nga puli nga mga ordinansa alang sa patay nga mga katigulangan.
Ang hugna 4 mao ang pagbalik sa hingpit, regular nga kalihokan sa templo.
Mapasalamaton kami alang sa inyong pailob ug mahalaron nga serbisyo atol niining nag-usab-usab ug mahagiton nga panahon. Ako nag-ampo nga ang inyong tinguha sa pagsimba ug pagserbisyo diha sa templo mas magmainiton pa karon kaysa kaniadto.
Kamo tingali naghunahuna kon kanus-a kamo makabalik sa templo. Ang tubag: Ang inyong templo pagaablihan kon ang mga regulasyon sa lokal nga gobyerno motugot niini. Kon ang kaso sa COVID-19 sa inyong dapit anaa sa luwas nga mga limitasyon, ang inyong templo pagaablihan og usab. Buhata ang tanan ninyong mahimo sa pagtabang nga mapakunhod ang gidaghanon sa COVID sa inyong dapit aron ang inyong mga oportunidad sa pag-adto sa templo mas modako.
Mentras tanto, ibutang og una sa inyong mga hunahuna ug mga kasingkasing ang inyong mga pakigsaad ug ang mga panalangin sa templo. Pagpabiling matinud-anon sa mga pakigsaad nga inyong gihimo.
Kita magtukod karon alang sa umaabot! Kwarenta’y uno ka templo sa pagkakaron ang gitukod o giayo. Sa miaging tuig lang, bisan pa sa pandemya, gisugdan ang pagtukod sa 21 ka bag-ong templo!
Gusto namong mas mapaduol ang balay sa Ginoo ngadto sa atong mga miyembro, nga sila unta makabaton sa sagrado nga pribilihiyo nga makatambong sa templo kanunay kutob sa itugot sa ilang mga kahimtang.
Samtang ako mopahibalo sa among plano sa pagtukod og 20 pa ka mga templo, ako namalandong ug midayeg sa mga pioneer—sa miagi ug sa kasamtangan—kansang gipahinungod nga kinabuhi nakatabang sa paghimo niining kasaysayan karon. Usa ka bag-o nga templo ang pagatukoran sa matag usa niini nga mga dapit: Oslo, Norway; Brussels, Belgium; Vienna, Austria; Kumasi, Ghana; Beira, Mozambique; Cape Town, South Africa; Singapore, Republic of Singapore; Belo Horizonte, Brazil; Cali, Colombia; Querétaro, Mexico; Torreón, Mexico; Helena, Montana; Casper, Wyoming; Grand Junction, Colorado; Farmington, New Mexico; Burley, Idaho; Eugene, Oregon; Elko, Nevada; Yorba Linda, California; ug Smithfield, Utah.
Ang mga templo usa ka importante nga bahin sa Pagpahiuli sa ebanghelyo ni Jesukristo sa kahingpitan niini. Ang mga ordinansa sa templo mopuno sa atong kinabuhi sa gahom ug kalig-on nga wala sa ubang paagi. Magpasalamat kita sa Dios alang niana nga mga panalangin.
Samtang atong tapuson kini nga komperensiya, kami sa makausa pa mopahayag sa among gugma alang kaninyo. Kami nag-ampo nga ang Dios mobubo sa Iyang mga panalangin ug pag-amuma sa matag usa kaninyo. Manag-uban kitang kabahin sa Iyang sagrado nga pagserbisyo. Uban sa kaisog, magpadayon ta sa buluhaton sa Dios! Alang niini ako nag-ampo sa sagradong ngalan ni Jesukristo, amen.