Librarya
Paghinulsol

“Paghinulsol,” Mga Hilisgotan ug mga Pangutana (2023)

Imahe
babaye nga nagtan-aw gawas sa bentana

Giya sa Pagtuon sa Ebanghelyo

Paghinulsol

Pagtubo ug paglambo pinaagi sa gugma ug kaluoy ni Jesukristo

Ang Langitnong Amahan nahigugma kanato. Labaw pa sa bisan unsa, Siya gusto nga kita makabalik ngadto Kaniya. Apan ang atong mga sala ug mga pagkadili hingpit maghimulag kanato gikan sa Dios. Makababag kini sa atong pagbalik aron mopuyo sa Iyang presensya ug sa pagkahimong sama Kaniya. Apan, adunay paglaom. Tungod kay ang Langitnong Amahan nahigugma pag-ayo kanato, Siya mipadala sa Iyang Anak, si Jesukristo, sa pagluwas kanato. Si Kristo sa Iyang kaugalingon andam nga mikuha sa atong mga sala ug sa mga pagkadili hingpit aron kita mapasaylo, mopadayon sa pagtubo, ug sa kadugayan makabalik sa pagpuyo uban sa atong Amahan sa Langit. Kining dakong gasa gitawag og Pag-ula ni Jesukristo. Kita magsugod sa pagdawat sa mga panalangin sa pag-ula ni Kristo samtang kita mogamit sa hugot nga pagtuo ngadto Kaniya ug maghinulsol sa atong mga sala.

Unsa ang Paghinulsol?

Ang paghinulsol usa ka pag-usab sa hunahuna ug kasingkasing—usa ka pagbiya gikan sa sala ug pagbalik ngadto sa Dios. Kini usa ka pag-aghat kon kita makasinati og diosnong kasubo tungod sa pagpakasala (tan-awa sa 2 Mga Taga-Corinto 7:9–11). Kon kita maghinulsol, kita matinuoron nga moangkon sa atong mga sayop ug sa atong mga sala, atong himoon kutob sa atong mahimo aron mahusto kini, kita maningkamot sa tanang gikinahanglan nga mga pag-usab nga atong mahimo, ug kita mapainubsanong mosalig sa gahom sa Manluluwas sa pag-usab sa dili nato kaya nga usbon. Ang sinsero nga paghinulsol mahitabo samtang kita mogamit sa hugot nga pagtuo diha ni Jesukristo ug sa Iyang abilidad nga mohimo natong limpyo.

Kinatibuk-ang pagpasabot sa hilisgotan: Paghinulsol

May kalabotan sa mga giya sa pagkat-on sa ebanghelyo: Faith in Jesus Christ, Atonement of Jesus Christ, Sacrament, Obedience

Seksiyon 1

Malimpyo pinaagi sa Paghinulsol: “Giunsa Kini Pagbuhat?”

Imahe
tawo nga nag-ampo

Diha sa Basahon ni Mormon, ang propetang si Enos naghulagway sa “[iyang] pakigbisog sa atubangan sa Dios” samtang siya nangayo sa kapasayloan sa iyang mga sala. Sa dihang sa kataposan ang iyang “kasaypanan nakuha sa hingpit” siya nangutana nga tingali inyong gikatingala: “Ginoo, giunsa kini pagbuhat?” Basaha ang mahitungod sa iyang kasinatian sa Enos 1:1–8. Sa unsang paagi si Enos nausab? Unsay imong makat-onan sa pamaagi nga iyang gihulagway sa iyang paghinulsol?

Siyempre, ang bugtong paagi aron hingpit nga masabtan ang paghinulsol mao ang pagsinati niini. Samtang ikaw maghinulsol ug mobati sa kalinaw ug hingpit nga kalipay sa pagpasaylo, ikonsiderar ang pagsulat kabahin sa imong kasinatian. Mahimong ikaw mobati nga madasig sa pagpakigbahin niini diha sa usa ka sakop sa pamilya o higala.

Mga butang nga angay hunahunaon

  • Unsaon nato sa pag-akses sa makalimpyo nga gahom sa Manluluwas diha sa atong mga kinabuhi? Ikaw mahimong makakita og mga tubag niini nga pangutana sa mensahe ni Presidente Dallin H. Oaks“Malimpyo Pinaagi sa Paghinulsol.” Hunahunaa ang mga pagtulun-an nga makita diha sa unang seksiyon, piho nga giulohan og “Paghinulsol”. Pamalandongi unsay gusto sa Ginoo nga imong buhaton aron makadawat og kapasayloan sa imong mga sala.

    • Usisaha kon unsa ang gisulti sa Manluluwas kabahin sa Iyang maulaong sakripisyo alang kanato diha sa 3 Nephi 9:13–14 ug Doktrina ug mga Pakigsaad 19:16–19. Unsa kaha ang mga mensahe sa Ginoo alang kanimo, ilabi na, sa Iyang mga pulong?

    • Bantayi ang mga pulong ug hugpong sa mga pulong nga naghulagway sa pagpasaylo diha sa Jeremias 33:6–9; Alma 5:21. Unsa ang gisugyot niini nga mga pulong ug hugpong sa mga pulong diha kanimo kabahin sa paghinulsol ug kapasayloan sa sala?

Kalihokan alang sa pagkat-on uban sa laing tawo

  • Ang propeta Isaias misulti sa paghugas ug paglimpyo sa dihang nagtudlo siya mahitungod sa paghinulsol. Ikonsiderar ang pagbasa sa Isaias 1:16–18 isip usa ka pamilya samtang dungan nga manglimpyo, sama sa sinina o mga hugasan. Unsa ang makahimong posible alang niini nga mga butang nga mahimong limpyo? Unsa ang makahimog posible alang kanato nga mahimong limpyo sa espirituhanon—o malimpyo gikan sa atong mga sala (tan-awa sa 3 Nephi 27:19–20).

    Mahimo usab nimong ikompara kon unsay bation nga malimpyo sa pisikal ngadto sa unsay bation kon mapasaylo gikan sa atong mga sala.

Pagkat-on pa og dugang

Seksiyon 2

Ang Paghinulsol Nagpasabot nga Pag-usab—ug Kini alang sa Tanan

Imahe
babaye nga nagtan-aw gawas sa bentana

Ang mga kasulatan naghatag ug daghang mga ehemplo sa mga tawo kinsa dili katuohan nga mag-usab apan kinsa, pinaagi sa gahom ni Jesukristo, naghinulsol ug nahimong matarong. Ang Apostol Pablo, daghan sa mga Lamanita, ug si Alma nga Batan-on tanan nakasinati og usa ka dako, makapahingangha nga pag-usab sa kasingkasing. Ilang gitalikdan ang pagpakasala ug miduol sa Manluluwas, mitugot Kaniya nga mousab sa ilang kinabuhi. Usahay kini nga kausaban murag kalit nga nahitabo; kasagaran hinayhinay nga kausaban. Bisan asa, usa kini ka milagro nga si Jesukristo mitanyag sa tanan kinsa maghinulsol. Ug mao kana nga milagro ang atong gikinahanglan, “sanglit nakasala man ang tanan, ug nakabsan sa himaya sa Dios” (Mga Taga-Roma 3:23).

Mga butang nga angay hunahunaon

  • Tun-i ang mga ehemplo sa paghinulsol diha sa Mga Buhat 22:3–21 (mahitungod kang Pablo); Alma 24:6–19 (mahitungod sa usa ka grupo sa Lamanita); ug Alma 36 (mahitungod ni Alma nga Batan-on). Unsay gihimo niining mga tawhana sa paghinulsol? Ngano nga bililhon ang pagbasa sa ilang mga kasinatian? Pamalandongi ug irekord unsa ang imong nakat-onan.

  • Unsa nga mga kausaban nga nadasig kang himoon sa imong kinabuhi? Samtang imong pamalandongan kini, tun-i ang Santiago 4:17; Mosiah 4:29–30; Alma 5:26; ug ang mensahe ni Presidente Russell M. Nelson “Kita Makabuhat og Mas Maayo pa ug Mahimong mas Maayo.” Unsay imong gibati nga gusto sa Ginoo nga ikaw molambo ug motubo?

Mga kalihokan alang sa pagkat-on kauban sa uban

  • Ang kalibotan puno sa mga ehemplo sa impresibo nga kausaban—usa ka gamay nga liso mahimong usa ka dakong kahoy, usa ka ulod mahimong alibangbang, usa ka itlog nga mahimong agila. Ikaw o imong pamilya mahimong mosusi sa pipila niini nga mga ehemplo ug basahon ang 2 Mga Taga-Corinto 5:17. Kini mahimong mopadulong ngadto sa usa ka pakighinabi mahitungod sa pag-usab nga kini posible pinaagi ni Jesukristo.

  • Ang gagmay nga mga bata mahimong malingaw sa pagkat-on kabahin sa paghinulsol gikan sa Mga Sugilanon sa Ang Basahon ni Mormon, sama sa mga ehemplo diha sa “Kapitulo 18: Si Alma nga Batan-on Naghinulsol” ug “Kapitulo 26: Ang mga Katawhan ni Ammon.” Sa unsang paagi ang Manluluwas mitabang niini nga katawhan nga mausab?

  • Mahimong maghimo pod ka og usa ka lista sa pipila ka hiyas sa Langitnong Amahan ug ni Jesukristo (ang himno “Dugang Kabalaan Hatagi Ako” naghisgot og daghan). Sa unsang mga paagi kita mausab aron mahimong mas sama Kanila? Unsaon Nila pagtabang nato sa pagbuhat niana?

Pagkat-on pa og dugang

Seksiyon 3

Ang Paghinulsol Malipayon

Imahe
batan-ong lalaki nga nagpahiyom

Tungod kay ang pag-usab mahimong lisod, usahay atong bation ang kahadlok sa paghinulsol. Seguro kita maghunahuna nga kini usa ka butang nga miserable o makapaguol o lisod kaayo. Apan ang plano sa Langitnong Amahan usa ka plano sa kalipay. Pinaagi sa paghinulsol, kita mahimong mas buotan, mahigugmaon, mapailobon, mapainubsanon, ug malipayon.

Ang sala nagdala og kaalaotan—paghinulsol ang paagi nga kita makalingkawas nianang kaalaotan.

Mga butang nga angay hunahunaon

Mga kalihokan alang sa pagkat-on kauban sa uban

  • Mahimo nimong tan-awon ang usa o ang duha niini nga mga bidyo kauban ang uban aron makat-on pa og dugang mahitungod sa hingpit nga kalipay diha sa paghinulsol “The Shiny Bicycle” (3:04) ug “The Goal: A Story of Faith, Friendship, and Forgiveness” (7:27). Samtang magtan-aw ka sa mga bidyo, pangitaa ang (1) mga butang nga nakapasubo sa tawo diha sa bidyo ug (2) mga butang nga nakapahimo sa tawo nga malipayon. Mahimo usab ka nga mangita niini nga mga butang diha sa mga sumbingay sa Lucas 15.

  • O mahimong maghisgot ka mahitungod sa usa ka panahon sa dihang ang usa ka tawo naulian gikan sa usa ka sakit o kadaot ug ikompara kana nga kasinatian ngadto sa paghinulsol. Basaha ang 3 Nephi 9:13–14, ug maghisgot mahitungod sa hingpit nga kalipay nga atong bation kon ang Manluluwas moayo kanato sa espirituhanong paagi samtang kita maghinulsol. Unsa kaha ang atong isulti aron tabangan ang usa ka tawo kinsa mibati og kahadlok sa paghinulsol?

Pagkat-on pa og dugang

Iprinta