Librarya
Hugot nga Pagtuo diha ni Jesukristo

“Hugot nga Pagtuo diha ni Jesukristo,” Mga Hilisgotan ug Mga Pangutana (2023)

Imahe
painting ni Jesukristo

Giya sa Pagtuon sa Ebanghelyo

Hugot nga Pagtuo diha ni Jesukristo

Pagsalig sa Iyang gahom, sa Iyang kaalam, ug sa Iyang gugma

Normal ra nga usahay mobati nga dili angay, nabug-atan, ug bisan dili kabalo unsay buhaton. Ang pagduol ngadto ni Jesukristo mao kanunay ang sulbad nianang mga pagbati. Kon magbaton kita og hugot nga pagtuo ni Jesukristo, kita mosalig Kaniya—nagsalig sa Iyang walay kinutoban nga gahom, kaalam, ug gugma. Kita nagtuo nga bisan tuod wala kita makasabot sa tanan, Siya nakasabot. Tungod kay Iyang nasinati ang tanan natong mga sakit, ug mga kaguol, Siya nakahibalo kon unsaon sa pagtabang kanato sa pag-atubang sa atong mga hagit. (Tan-awa sa Alma 7:11–13.)

Unsa ang Hugot nga Pagtuo diha ni Jesukristo?

Ang hugot nga pagtuo kang Jesukristo mao ang unang baroganan sa ebanghelyo. Kini nagpasabot nga dili lang motuo diha kaniya apan pagbutang sa imong pagsalig Kaniya. Ang pagbaton og hugot nga pagtuo naglakip sa paglaom ug pagtuo sa mga butang nga tinuod, bisan kon ikaw dili makakita o makasabot sa hingpit niini. Ang hugot nga pagtuo usa ka baroganan sa paglihok ug gahom nga modasig sa atong mga inadlaw-adlaw nga mga kalihokan.

Kinatibuk-ang pagpasabot sa hilisgotanan: Hugot nga Pagtuo diha ni Jesukristo

May kalabotan nga mga giya sa pagtuon sa ebanghelyo: Jesus Christ, Hope, Charity, Repentance, Miracles

Seksiyon 1

Pagpalig-on sa atong Hugot nga Pagtuo diha ni Jesukristo Makatabang Kanato sa Pagbuntog sa mga Hagit

Imahe
painting sa mga lalaki nga naa sa usa ka sakayan ug ang hapit na malunod nga tawo nangayo og tabang

Ang Manluluwas nag-ingon, “Kon may pagtuo kamo nga ingon og liso sa mustasa, … walay magmakuli alang kaninyo” (Mateo 17:20). Ang usa ka liso sa mustasa gamay kaayo, apan motubo kini ngadto sa usa ka dako nga kahoy.

Mao nga unsaon ninyo pagpalambo sa inyong pagtuo diha sa Manluluwas? Si Presidente Russell M. Nelson mipasabot nga “ang pagpalambo sa inyong hugot nga pagtuo ug pagsalig ni [Jesukristo] nagkinahanglan og paningkamot.” Siya Namahayag: “Ang Ginoo wala magkinahanglan og hingpit nga hugot nga pagtuo aron kita makagamit sa Iyang hingpit nga gahom. Apan mihangyo Siya kanato nga motuo.” Ang pagtuo diha ni Jesukristo motabang nimo nga mobati nga madasig sa pagtuon sa mga kasulatan ug sa mga pulong sa mga propeta sa ulahing adlaw ug sa pag-ampo sa balaang giya. Samtang ikaw magkat-on kang Jesukristo ug mobati sa Iyang gugma ug sa Iyang Espiritu, ang imong hugot nga pagtuo Kaniya motubo.

Mga butang nga angay hunahunaon

  • Tan-awa ang bidyo “Exercise Faith in Christ” (1:43). Unsa ang gitudlo ni Elder David A. Bednar mahitungod sa paglihok diha sa hugot nga pagtuo? Unsa ang imong buhaton aron imong magamit ang hugot nga pagtuo diha ni Jesukristo?

  • Ang hugot nga pagtuo diha ni Jesukristo dili dali nga moabot, ug dili ikaw kanunay hingpit nga mogamit sa imong hugot nga pagtuo. Hunahunaa ang mahitungod sa kasinatian ni Apostol Pedro diha sa Mateo 14:25–33. Sa unsang paagi si Jesukristo makatabang kanimo kon ikaw mogamit bisan sa usa ka gamay kaayo nga pagtuo Kaniya?

  • Ang propeta sa Basahon ni Mormon nga si Alma mitudlo nga kon kita motanom sa liso sa ebanghelyo sa atong kasingkasing ug moamuma niini uban sa atong hugot nga pagtuo, atong mapatubo sa hinayhinay ang atong kaugalingong lig-ong pagpamatuod sa ebanghelyo ni Jesukristo. Tun-i ang Alma 32:21–43 ug paghunahuna mahitungod kon unsaon nimo sa paggamit ang hugot nga pagtuo aron motubo ang imong kaugalingong pagpamatuod.

Kalihokan alang sa pagkat-on uban sa laing tawo

  • Mahimong dungan kang mobuhat og pipila ka pisikal nga mga pag-ehersisyo ug maghisgot mahitungod unsa ang mabuhat sa pag-ehersisyo alang sa lawas. Dayon basaha ang bahin sa pakigpulong ni Elder Juan Pablo Villar “Pagbansay sa Atong Espiritwal nga mga Kaunoran,” gikan sa Abril 2019 nga kinatibuk-ang komperensiya, ug maghisgot mahitungod unsa ang gipasabot sa paggamit sa hugot nga pagtuo diha ni Jesukristo.

Pagkat-on pa og dugang

Seksiyon 2

Ang Hugot nga Pagtuo Mao ang Usa ka Baroganan sa Gahom

Imahe
painting sa usa ka buta nga tawo mikab-ot ni Jesus

Pinaagi sa hugot nga pagtuo diha ni Kristo, kita makakuha og gahom sa Dios, maghimong posible sa pagbuhat unsa ang gipangayo sa Dios kanato. Ang tinuod nga hugot nga pagtuo magdala og mga milagro sumala sa kabubut-on sa Dios. Pinaagi sa hugot nga pagtuo kita makadawat og kalig-on sa pagbuhat og malisod nga mga butang ug motubo sa espirituhanon nga paagi. Kita usab mas mamaayo sa pag-atubang sa atong temporal nga mga panginahanglan ug sa lisod nga mga sitwasyon kon motuo kita sa Ginoo ug mosalig sa Iyang mga saad. Ang sinsero nga pag-ampo mao ang paagi aron makagamit sa gahom sa Dios—kita mangayo sa hugot nga pagtuo alang sa balaang tabang ug direksyon nga atong gikinahanglan (tan-awa sa Enos 1:15).

Mga butang nga angay hunahunaon

  • Basaha ang Marcos 5:21–42. Unsay papel nga gidala sa hugot nga pagtuo niini nga mga milagro? Sa unsang paagi kini nga istorya naghulagway sa mga paagi nga ang imong hugot nga pagtuo mahimong masulayan?

  • Basaha o tan-awa ang pakigpulong ni Elder Brent H. Nielson sa “Wala Na Bay Tambal diha sa Gilead?” Giunsa ni Elder Nielson pag-ila ang mga panalangin nga iyang nadawat? Hunahunaa kon unsaon nimo sa pagpangita sa mga panalangin bisan atol sa malisod nga mga panahon. Sa unsang paagi nga ang pagbuhat sa ingon makapalig-on sa imong hugot nga pagtuo diha ni Jesukristo?

Kalihokan alang sa pagkat-on uban sa laing tawo

  • Tan-awa ang bidyo “Mountains to Climb” (5:05). Dayon mahimong dungan ninyong trabahoon aron makahimo og usa ka lista sa mga paagi nga si Jesus ug ang Langitnong Amahan mipanalangin kaninyo. Sa unsang paagi nga ang pagbansay sa hugot nga pagtuo kang Jesukristo nakatabang nimo sa paglahutay ug pagbuntog sa mga hagit?

Pagkat-on pa og dugang

Seksiyon 3

Pag-angkon sa Hugot nga Pagtuo Nagkinahanglan og Taas nga Panahon ug Pagpailob

Imahe
litrato sa usa ka batan-ong babaye nga nagluhod ug nagtan-aw sa gawas sa bentana

Mahimong makasinati ka og mga panahon diin mobati ka nga ang imong mga pag-ampo wala dungga o ang imong mga hagit labaw kaysa imong makaya. Kausa niana usa ka tawo miduol ngadto ni Jesukristo uban sa sama niana nga sitwasyon. Ang iyang anak nga lalaki nagkinahanglan nga maayo, ug ang tawo mihangyo ni Jesus nga panalanginan siya. Sa dihang si Kristo mipasabot nga ang tanang butang posible niadtong kinsa motuo, ang tawo mituaw, “Nagtuo ako, tabangi ang pagtuo ko nga nakulangan.” (Tan-awa sa Marcos 9:14–27.) Siya adunay igong pagtuo aron mangayo, apan siya nasayod nga ang iyang pagtuo dili hingpit. Kon mag-ampo ka og tabang aron madugangan ang imong pagtuo, ikaw nagpakita nga nasayod ka nga si Jesus motabang nimo—ug Siya motabang.

Matag tawo talagsaon ang kasinatian sa pagpalambo sa hugot nga pagtuo diha ni Jesukristo. Kon ang mga tawo nga imong minahal nanlimbasog sa ilang hugot nga pagtuo, hinumdomi ang pagtubag uban sa kalumo ug kaluoy. Kon sila moduol kanimo uban sa mga pangutana, ikaw mahimong mahigugmaon ug mapailobon nga maminaw kanila ug mosuporta kanila sa ilang pagpangita sa kamatuoran. Ikaw usab makatabang kanila sa pagpangita og masaligan nga mga kapanguhaan diin sila makapangita sa mga tubag. Ug ikaw makasulti kanila unsa sila kamahal ni Jesus.

Mga butang nga angay hunahunaon

  • Si Elder Jeffrey R. Holland mitudlo nga kon kamo adunay mga pangutana o mga pagduhaduha, kamo makahimo nga ”[mo]gunit og hugot sa unsay inyo nang nahibaloan ug barog nga malig-on hangtod moabot ang dugang nga kahibalo.” Sa unsang mga paagi nga ang hugot nga pagtuo diha ni Jesukristo makatabang nimo sa wala pa matubag nga mga pangutana?

Pagkat-on pa og dugang

Ubang mga Kapanguhaan mahitungod sa Hugot nga Pagtuo

Iprinta