Kapitulo 25

Padayon sa Unahan uban sa Hugot nga Pagtuo

“Kon adunay usa ka butang nga gikinahanglan nimo ug nako, … [mao kini] ang matang sa hugot nga pagtuo nga modasig kanato nga moluhod ug mangayo ngadto sa Ginoo alang sa paggiya, ug dayon, uban sa usa ka sagrado nga pagsalig, mobarug ug mobuhat aron sa pagtabang nga mahinabo ang gitinguha nga mga resulta.”

Gikan sa Kinabuhi ni Gordon B. Hinckley

“Sa dihang mibiya ko alang sa usa ka misyon [isip usa ka batan-on nga lalaki],” misaysay si Presidente Gordon B. Hinckley, “ang akong buotan nga amahan mihatag kanako og card diin adunay nakasulat nga lima ka pulong. Mao kadto ang mga pulong sa Ginoo ngadto sa punoan sa sinagoga nga nakadawat og balita mahitungod sa kamatayon sa iyang anak nga babaye: ‘Ayaw kahadlok, sumalig ka lamang.’ (Marcos 5:36.)”¹ Samtang ang batan-on nga Elder Hinckley nagserbisyo didto sa England, nakasinati siya og daghan nga mga hagit diin gikinahanglan niya nga makahinumdom niadtong lima ka mga pulong. Sa kaulahian iyang gihulagway ang usa ka samang kasinatian:

“Usa ka adlaw niana ang tulo o upat ka mga pamantalaan sa London nagdala og mga pagsuhid sa usa ka karaan nga basahon, dili makapahimuot ang tono, nagpakita nga ang basahon mao ang usa ka kasaysayan sa mga Mormon. Si Presidente Merrill [ang akong presidente sa misyon] miingon kanako, ‘Gusto ko nga moadto ka sa tigmantala ug mo-protesta niini.’ Mitan-aw ako kaniya ug hapit na mo-ingon nga, ‘Sigurado nga dili ako.’ Apan maaghup ako nga miingon, ‘Oo, sir.’

“Dili ako magpanuko mosulti nga nahadlok ko. Miadto ko sa akong kwarto ug mibati nga sa akong hunahuna sama sa gibati ni Moises sa dihang gihangyo siya sa Ginoo sa pag-adto ug sa pagpakigkita ni Faraon. Mitanyag ako og usa ka pag-ampo. Nagsakit ang akong tiyan (tungod sa kakulba) samtang naglakaw ko padulong sa istasyon sa Goodge Street aron makasakay sa underground nga tren padulong sa Fleet Street. Nakit-an nako ang opisina sa presidente ug gipakita nako ngadto sa tig-abiabi ang akong card. Gikuha niya kini ug miadto sa sulod nga opisina ug sa wala madugay mibalik aron sa pag-ingon nga ang presidente busy ra kaayo aron makigkita kanako. Mitubag ko nga mianhi ko sa lima ka libo ka milya [8,000 ka kilometro] ug nga buot kong maghulat. Sulod sa sunod nga takna kaduha o katulo siya mibalik-balik og adto sa opisina, dayon sa katapusan gidapit ko sa presidente sa pagsulod. Dili gayud nako makalimtan ang akong nakita sa dihang misulod ko. Nanigarilyo siya og taas nga tabako nga ang iyang hitsura mura og nag-ingon nga, ‘Ayaw ko og samoka.’

“Gikuptan nako sa akong kamot ang mga pagsuhid. Dili ko kahinumdom unsay akong gisulti human niana. Mura og adunay laing gahum ang nagsulti pinaagi kanako. Sa una mapanalipdanon siya ug gani makig-awayon. Dayon siya misugod sa pagkamahigalaon. Mitapos siya pinaagi sa pagsaad nga aduna siyay buhaton. Sulod sa usa ka oras adunay usa ka mensahe nga miabut ngadto sa matag dealer og mga basahon diha sa England aron sa pag-uli sa mga basahon ngadto sa tigmantala. Sa dakung gasto miimprinta ug misulat siya sa atubangan sa matag basahon og usa ka pamahayag nga nagsulti nga ang basahon dili angay hunahunaon isip kasaysayan, apan isip usa ka hinimo nga sugilanon lamang, ug nga walay paglapas nga gitumong batok sa Mormon nga mga katawhan. Mga tuig ang milabay mihatag siya og laing pabor nga igo-igo ang bili ngadto sa Simbahan, ug matag tuig hangtud sa panahon sa iyang kamatayon nakadawat ko og usa ka Christmas card gikan niya.”²

Sa pagdawat sa tahas sa pagbisita sa opisina sa tigmantala, si Elder Hinckley mibuhat sa unsay nahimong sumbanan sa tibuok kinabuhi: uban ang hugot nga pagtuo, dawata ang hagit, pangamuyo ngadto sa Ginoo alang sa tabang, dayon adto aron sa pagbuhat.

babaye nagbasa sa mga kasulatan — “Ang hugot nga pagtuo mao, sa katapusan, ang atong bugtong tinuod ug malungtarong paglaum.”

Mga Pagtulun-an ni Gordon B. Hinckley

Ang Hugot nga Pagtuo diha sa Langitnong Amahan ug kang Jesukristo mahimong tubod sa atabay sa mapuslanon nga pagpakabuhi.

Kon adunay usa ka butang nga gikinahanglan nimo ug nako, aron makatabang kanato nga makakaplag og kalampusan ug katumanan niining kinabuhi, mao kini ang hugot nga pagtuo—kanang kulbahinam, gamhanan, kahibulongan nga elemento nga, sama sa gipahayag ni Pablo, ang kalibutan gibuhat (tan-awa sa Mga Hebreohanon 11:3). Wala ko nagpasabut sa usa ka maambong nga konsepto apan sa usa ka praktikal, makatarunganon, naglihok nga hugot nga pagtuo—ang matang sa hugot nga pagtuo nga makadasig kanato nga moluhod ug mangayo ngadto sa Ginoo alang sa paggiya, ug dayon, uban sa usa ka sagrado nga pagsalig, mobarug ug mobuhat aron sa pagtabang nga mahinabo ang gitinguha nga mga resulta. Ang maong hugot nga pagtuo mao ang usa ka kapanguhaan nga mas maayo pa kay sa bisan unsa nga butang. Ang maong hugot nga pagtuo mao, sa katapusan, ang atong bugtong tinuod ug malungtarong paglaum.

… Ang hugot nga pagtuo mahimong tubod sa atabay sa mapuslanon nga pagpakabuhi. Wala nay laing mas makapadani nga kadasig sa mapuslanon nga pagpaningkamot kay sa kahibalo nga kita mga anak sa Dios, nga ang Dios nagdahum nga kita mobuhat og usa ka butang alang sa atong mga kinabuhi, ug nga Siya mohatag kanato og tabang sa dihang ang tabang gitinguha. …

… Sa dihang maghisgot ko sa hugot nga pagtuo, wala ko nagpasabut niini sa usa ka dili klaro nga pagsabut. Nagpasabut ko niini isip usa ka buhi, mahinungdanon nga kusog nga moabut uban ang pag-ila sa Dios isip atong Amahan ug kang Jesukristo isip atong Manluluwas. …

… Ang Hugot nga Pagtuo diha sa usa ka Balaan nga Binuhat, diha sa Makagagahum, mao ang dakong nagpalihok nga gahum nga makapausab sa atong mga kinabuhi.³

Dugay na nga panahon nagtrabaho ko alang sa usa sa mga riles kansang mga dalan miagi sa mga kabukiran. Sa makadaghan misakay ko sa mga tren. Mao kini ang mga panahon nga adunay mga lokomotora nga gipadagan sa alisngaw sa makina [steam locomotives]. Kadto nga mga makina sa mga rilis mga dagko kaayo ug paspas ug makuyaw. Kanunay kong nahibulong giunsa sa inhenyero sa pagpadayon sa dugay nga biyahe sa gabii. Dayon nakaamgo ko nga kini dili usa ka dugay nga biyahe, apan usa ka makanunayon nga pagpadayon sa kadiyot nga biyahe. Ang makina adunay usa ka kusog nga suga sa pangunahan nga naghatag og kahayag sa agianan alang sa gilay-on nga 400 o 500 ka metro. Nakita sa inhinyero ang kadto lang nga gilay-on, ug kadto igo na, tungod kay kini mao ang kanunay anaa sa iyang atubangan sa tibuok gabii hangtud sa kaadlawon sa bag-o nga adlaw. …

Ug sama niini ang atong mahangturon nga biyahe. Mohimo kita og usa ka lakang sa matag higayon. Sa pagbuhat sa ingon moabut kita padulong sa wala mahibaloi, apan ang hugot nga pagtuo naghatag og kahayag sa agianan. Kon amumahon nato ang kanang hugot nga pagtuo, dili gayud kita magalakaw sa kangitngit. …

Ang hagit nga masinati sa matag miyermbro niini nga Simbahan mao ang paghimo sa sunod nga lakang, sa pagdawat niana nga responsibilidad nga siya gitawag, bisan pa nga siya nibati nga dili niya kini makaya, ug sa pagbuhat sa ingon diha sa hugot nga pagtuo uban ang hingpit nga paglaum nga ang Ginoo motabang kaniya nga makasabut unsay iyang sunod buhaton.⁴

Ang hugot nga pagtuo mao ang sukaranan sa pagpamatuod ug ang kalig-on sa buhat sa Ginoo sa yuta.

Ang bugtong tinuod nga katigayunan sa Simbahan anaa sa hugot nga pagtuo sa mga katawhan niini.⁵

Usa ka kahibulongan ug talagsaon nga butang nga liboan ang na-impluwensiyahan pinaagi sa milagro sa Balaang Espiritu, nga sila motuo ug modawat ug mahimong mga miyembro [sa Simbahan]. Sila nabunyagan. Ang ilang mga kinabuhi na-impluwensyahan sa kahangturan alang sa kaayohan. Ang mga milagro mahitabo. Ang diyutay nga hugot nga pagtuo moabut ngadto sa ilang mga kasingkasing. Kini motubo samtang sila nagkat-on. Ug sila modawat og baruganan human sa usa ka baruganan, hangtud nga sila makadawat sa matag usa sa kahibulongan nga mga panalangin nga moabut niadtong naglakaw uban ang hugot nga pagtuo diha niining, Ang Simbahan ni Jesukristo sa mga Santos sa Ulahing mga Adlaw.

… Kining bililhon ug kahibulongan nga gasa sa hugot nga pagtuo, kining gasa gikan sa Dios nga atong Amahan sa Kahangturan, mao gihapon ang kalig-on niini nga buhat ug ang hilom nga gahum sa mensahe niini. Ang hugot nga pagtuo ang sukaranan niining tanan. Ang hugot nga pagtuo ang gigikanan niining tanan. Bisan sa pag-adto sa misyon, pagsunod sa Pulong sa Kaalam, pagbayad sa ikapulo, kining tanan mao ra. Ang hugot nga pagtuo nga ania kanato mao ang maipahayag sa tanan natong buhat.

… Ang kalig-on niini nga katuyoan ug gingharian dili makita sa temporal nga mga kabtangan niini, bisan pa man nga kini madanihon. Makaplagan kini diha sa mga kasingkasing sa mga katawhan niini. Mao nga kini malampuson. Mao nga kini lig-on ug nagtubo. Mao nga kini makatuman sa talagsaong mga butang nga kini nagbuhat. Kining tanan mahimo pinaagi sa gasa sa hugot nga pagtuo, gitugyan sa Labawng Makagagahum ngadto sa Iyang mga anak nga wala nagduha-duha ug wala nahadlok, apan nagpadayon. …

Ang hugot nga pagtuo mao ang sukaranan sa pagpamatuod. Ang hugot nga pagtuo nagpailalum sa pagkamaunongon ngadto sa Simbahan. Ang hugot nga pagtuo nagrepresentar sa sakripisyo, gihatag sa dakong kalipay aron sa pagtabang sa pagpalambo sa buhat sa Ginoo.⁶

Ang ebanghelyo mao ang maayong balita. Kini usa ka mensahe sa kadaugan. Kini usa ka katuyoan nga angay nga hingpit dawaton uban ang tumang kadasig. …

Dili kita mahadlok. Si Jesus mao ang atong lider, ang atong kalig-on, ug ang atong hari.

Kini mao ang panahon diin negatibo ang kinaiya sa daghan nga mga tawo. Ang atong misyon nagkinahanglan og hugot nga pagtuo. Ngadto sa akong mga igsoon nga lalaki ug babaye sa tanang dapit, mohangyo ako kaninyo nga momatuod pag-usab sa inyong hugot nga pagtuo, nga ipauswag kini nga buhat sa tibuok kalibutan. …

“Mga kaigsoonan, kita dili ba mopadayon sa hilabihan nga mahinungdanon nga katuyoan? Padayon ug ayaw pagsibug. Pagmaisugon, mga kaigsoonan; ug sa kanunay, ngadto sa kadaugan!” (D&P 128:22). Si Propetang Joseph misulat sa usa ka salmo sa hugot nga pagtuo.

Mahimayaon kaayo ang kagahapon niining buhat sa Dios. Puno kini og kabayanihon, kaisug, pagkawalay kahadlok, ug hugot nga pagtuo. Ang panahon karon talagsaon kaayo samtang kita mopadayon sa unahan aron mapanalanginan ang mga kinabuhi sa mga katawhan bisan asa man sila mopatalinghug sa mensahe sa mga sulugoon sa Ginoo. Ang umaabot mahimong maanindut kaayo samtang ang Labawng Makagagahum magpadayon sa Iyang mahimayaon nga buhat, nga mo-impluwensiya sa tanan kinsa modawat ug magpakabuhi sa Iyang ebanghelyo, ug gani mokab-ut ngadto sa mahangturon nga panalangin sa Iyang mga anak nga lalaki ug babaye sa tanang mga henerasyon pinaagi sa dili hakog nga pagtrabaho niadtong kansang mga kasingkasing puno sa gugma alang sa Manunubos sa kalibutan. …

Gidapit nako ang matag usa kaninyo, bisan asa man kamo nga mga miyembro niini nga simbahan, nga mobarug sa inyong mga tiil ug uban ang usa ka awit sa inyong kasingkasing nga mopadayon sa unahan, magpakabuhi sa ebanghelyo, maghigugma sa Ginoo, ug maglig-on sa gingharian. Maghiusa kita nga padayong mosunod sa dalan ug magpabilin nga matinud-anon, ang Labawng Makagagahum mao ang atong kalig-on.⁷

Uban ang hugot nga pagtuo, makabuntog kita sa kahadlok ug sa bisan unsa nga babag o hagit sa atong mga kinabuhi.

Kinsa man taliwala kanato ang makasulti nga siya wala mibati og kahadlok? Wala koy nailhan nga nakalingkawas. Adunay pipila, siyempre, nga nakasinati og mas grabe nga kahadlok kay sa uban. Adunay pipila nga makabangon og dali, apan ang uban natanggong ug nabira niini paubos ug gani nadala ngadto sa kapildihan. Nag-antus kita gikan sa kahadlok sa pagtamay, sa kahadlok sa pagkapakyas, sa kahadlok sa pag-inusara, sa kahadlok sa pagkawalay kahibalo. Ang pipila nahadlok sa karon, ang uban sa umaabot. Ang pipila nagdala sa palas-anon sa sala ug buot mohatag sa hapit bisan unsa aron makapalingkawas sa ilang mga kaugalingon gikan niadtong mga palas-anon apan nahadlok nga mag-usab sa ilang mga kinabuhi. Ilhon nato nga ang kahadlok wala naggikan sa Dios, apan nga ang kining samok, magub-anon nga elemento naggikan sa kaaway sa kamatuoran ug pagkamatarung. Ang kahadlok mao ang katugbang sa hugot nga pagtuo. Makapahuyang ang mga epekto niini, gani makapatay.⁸

Misulat si Pablo ngadto kang Timoteo: “Kay kita wala sa Dios hatagig espiritu sa katalaw; kondili sa espiritu sa gahum, ug sa gugma, ug pagpugong sa kaugalingon.

“Busa, ayaw ikaulaw ang pagpanghimatuod alang sa atong Ginoo” (2 Tim. 1:7–8).

Unta ang matag miyembro niini nga simbahan buot mobutang niadto nga mga pulong diin mahimo niya kining makita matag buntag inig sugod niya sa iyang adlaw. Makahatag kini kanato og kaisug nga mosulti, makahatag kini kanato sa hugot nga pagtuo aron mosulay, mas makapalig-on pa kini sa atong lig-on nga pagtuo diha sa Ginoong Jesukristo. Nagtuo ako nga mas daghan pa nga mga milagro ang mahitabo sa ibabaw sa kalibutan.⁹

Jesukristo — “Busa ayaw … ikaulaw ang pagpanghimatuod alang sa atong Ginoo” (2 Timoteo 1:8).

Usa ka adlaw niana mipakigpulong ko sa usa ka higala nga naka-eskapo gikan sa iyang lumad nga yuta. Sa dihang napakyas ang gobyerno sa iyang nasud, gidakop siya ug gibilanggo. Ang iyang asawa ug mga anak naka-ikyas, apan sulod sa tulo ka tuig ug labaw pa usa siya ka binilanggo nga walay komunikasyon sa iyang mga minahal. Ang pagkaon dili maayo, ang kondisyon sa pagpakabuhi lisud, nga walay kahigayunan nga moasenso.

“Unsay nakatabang nimo nga molahutay sa tanan niadtong ngitngit nga mga panahon?” Nangutana ko.

Mitubag siya: “Ang akong hugot nga pagtuo; ang akong hugot nga pagtuo diha sa Ginoong Jesukristo. Gibutang nako ang akong mga pag-antus ngadto kaniya, ug dayon mora og nigaan kini og maayo.”¹⁰

Mosalir ra kining tanan. Ayaw og kabalaka. Mosulti ko niana sa akong kaugalingon matag buntag. Mosalir ra kining tanan. Kon imong buhaton ang imong pinakamaayo, mosalir ra kining tanan. Ibutang ang imong pagsalig diha sa Dios, ug padayon sa unahan uban sa hugot nga pagtuo ug pagsalig diha sa umaabot. Ang Ginoo dili mobiya kanato. Dili Siya mobiya kanato.¹¹

Dili ba maka-ingon ang bisan kinsa kanato nga kon aduna kitay mas dako nga hugot nga pagtuo diha sa Dios makahimo kita og mas maayo kay sa atong gibuhat karon? Walay babag nga dako ra kaayo, walay hagit nga lisud ra kaayo, kon aduna kitay hugot nga pagtuo. Uban sa hugot nga pagtuo makabuntog kita niadtong mga negatibo nga mga elemento sa atong mga kinabuhi nga kanunayng nagbira kanato paubos. Uban sa paningkamot makapalambo kita sa abilidad nga mobuntog niadtong mga kahinayak nga mopadulong ngadto sa makapaunlod ug dautan nga mga buhat. Uban sa hugot nga pagtuo makapugong kita sa atong mga kahinam. Makapaapil kita sa uban nga nawad-an sa paglaum ug napildi, ug makatabang kita kanila pinaagi sa kalig-on ug gahum sa atong kaugalingong hugot nga pagtuo.¹²

Samtang naggamit kita sa atong hugot nga pagtuo, ang Ginoo motabang nga kini molambo.

Samtang naggamit kamo sa inyong panahon ug mga talento diha sa pag-alagad, ang inyong hugot nga pagtuo motubo ug ang inyong mga pagduha-duha mominos.¹³

Ang Simbahan mohangyo kaninyo sa pagbuhat sa daghan nga mga butang. Mohangyo kini kaninyo nga moalagad sa nagkalainlaing mga buhat. Wala kitay binayran nga mga ministro. Kamo ang mahimong mangalagad niini nga Simbahan, ug sa matag higayon nga hangyuon kamo sa pag-alagad moaghat ako kaninyo nga motubag,ug samtang magbuhat kamo sa ingon ang inyong hugot nga pagtuo molig-on ug molambo. Ang hugot nga pagtuo sama sa kaunoran sa akong bukton. Kon kini akong gamiton, kon kini akong amumahon, kini molig-on, mohimo kini og daghang mga butang. Apan kon ako kining ibutang sa usa ka sambilayan [sling] ug dili kini gamiton, kini maluya ug mahimong walay gamit, ug ingon usab kini mahisama kaninyo. Kon inyong dawaton ang matag oportunidad, kon inyong dawaton ang matag calling, ang Ginoo mohimo niini nga mahimo ninyong ipahigayon. Ang Simbahan dili mohangyo kaninyo sa pagbuhat og bisan unsang butang nga dili ninyo mahimo uban ang tabang sa Ginoo.¹⁴

Mao kini ang akong pag-ampo alang kanatong tanan—“Ginoo, dugangi ang among pagtoo” [tan-awa sa Lucas 17:5]. Dugangi ang among hugot nga pagtuo aron makabuntog sa kawalay kasiguroan ug pagduhaduha. …

… Ginoo, dugangi ang among hugot nga pagtuo aron makabuntog sa mga tawo nga nagbuhat og supak niining Imong halangdon ug balaan nga buhat. Lig-ona ang among kabubut-on. Tabangi kami sa pagtukod ug pagpakaylap sa Imong gingharian sumala sa Imong halangdon nga sugo, nga kining ebanghelyo mahimong masangyaw sa tibuok kalibutan isip usa ka saksi ngadto sa tanang nasud. …

… Hatagi kami og hugot nga pagtuo nga makalantaw og saylo pa sa mga problema sa karon ngadto sa mga milagro sa umaabot. Hatagi kami og hugot nga pagtuo nga makabayad sa among mga ikapulo ug mga halad ug mobutang sa among pagsalig diha Kanimo, ang Makagagahum, sa pag-abli sa mga tamboanan sa langit sama sa Imong gisaad. Hatagi kami og hugot nga pagtuo aron sa pagbuhat kanunay sa unsay matarung ug motugot nga mosunod ang sangputanan.

Hatagi kami og hugot nga pagtuo sa panahon nga kami nakiglimbasog sa mga pagsulay ug kami matukmod ngadto sa yuta. Atol sa mga panahon nga kami masakiton unta ang among pagsalig molig-on diha sa mga gahum sa priesthood. Unta kami mosunod sa tambag ni Santiago:

“Aduna ba kaninyoy nagamasakiton? Ipakuha niya ang mga anciano sa iglesia, ug paampoa sila alang kaniya, nga magahaplas kaniya ug lana tungod sa ngalan sa Ginoo:

“Ug ang pag-ampo nga inubanag pagtoo magaayo sa masakiton, ug siya pagabangonon sa Ginoo” (Santiago 5:14–15; italics gidugang). …

Ginoo, sa dihang kami naglakaw sa walog sa landong sa kamatayon, hatagi kami og hugot nga pagtuo nga mopahiyum bisan kon kami magul-anon, nahibalo nga kining tanan kabahin sa mahangturon nga plano sa usa ka mahigugmaon nga Amahan, nga inig kamatay namo kami mosulod sa laing kinabuhi nga mas mahimayaon, ug nga pinaagi sa pag-ula sa Anak sa Dios ang tanan mobangon gikan sa lubnganan ug ang mga matinud-anon moadto ngadto sa kahimayaan.

Hatagi kami og hugot nga pagtuo aron tinguhaon ang buhat sa pagtubos sa mga patay aron ang Imong mahangturon nga mga katuyoan mahimong matuman alang sa Imong mga anak nga mga lalaki ug babaye sa tanang henerasyon.

Amahan, hatagi kami og hugot nga pagtuo nga mosunod og tambag diha sa gagmay nga mga buluhaton nga mahimong makahuluganon kaayo. …

Ginoo, dugangi ang among pagtuo sa usag usa, ug sa among mga kaugalingon, ug sa among kapasidad nga mobuhat og maayo ug mahinungdanon nga mga butang. …

Amahan, dugangi ang among hugot nga pagtuo. Sa tanan namong panginahanglan, sa akong hunahuna ang labing mahinungdanon mao ang pagdugang sa hugot nga pagtuo. Ug unya, mahal nga Amahan, dugangi ang among hugot nga pagtuo diha Kanimo, ug diha sa Imong Hinigugmang Anak, diha sa Imong mahinungdanong mahangturon nga buhat, sa among mga kaugalingon isip Imong mga anak, ug sa among kaantigo nga moadto ug mobuhat sumala sa Imong kabubut-on, ug sa Imong mga lagda, ako mapainubsanon nga nag-ampo diha sa pangalan ni Jesukristo, amen.¹⁵

Mga Sugyot alang sa Pagtuon ug Pagtudlo

Mga Pangutana

Si Presidente Hinckley mitudlo nga ang hugot nga pagtuo diha sa Dios mao “ang dakong nagpalihok nga gahum nga makapausab sa atong mga kinabuhi” (seksyon 1). Unsa nga mga kasinatian ang nakatabang kaninyo nga makat-on mahitungod sa gahum sa hugot nga pagtuo? Giunsa ninyo pagkakita nga kon “moabut kita padulong sa wala mahibaloi, … ang hugot nga pagtuo maghatag og kahayag sa agianan”?
Unsay atong makat-unan gikan sa seksyon 2 mahitungod sa tinubdan sa kalig-on sa Simbahan? Sa unsang paagi nga ang hugot nga pagtuo ug sakripisyo may kalabutan sa usag-usa? Hunahunaa kon unsaon ninyo nga makasunod sa tawag ni Presidente Hinckley nga “ipauswag kini nga buhat sa tibuok kalibutan.”
Ngano kaha nga ang hugot nga pagtuo adunay gahum nga motabang kanato sa panahon sa pagsulay? (Tan-awa sa seksyon 3.) Kanus-a ang hugot nga pagtuo nakatabang kaninyo nga mobuntog sa kahadlok? Kanus-a ang hugot nga pagtuo nakatabang kaninyo nga mobuntog sa uban nga mga babag?
Ribyuha ang pag-ampo ni Presidente Hinckley diha sa seksyon 4. Unsa nga mga pulong niini nga pag-ampo ang adunay linain nga kahulugan alang kaninyo? Sa unsang paagi ang hugot nga pagtuo makatabang kanato sa pagbuntog sa kawalay kasigurohan ug sa kahadlok? Sa unsang paagi ang hugot nga pagtuo makatabang kanato nga molantaw nga saylo pa sa mga problema ngadto sa pagkakita og mga milagro?

May Kalabutan nga mga Kasulatan

Juan 14:12–14; Mga Taga-Roma 5:1–5; 2 Nephi 26:12–13; Moroni 7:33–38; D&P 27:16–18

Tabang sa Pagtudlo

“Kon kanunay ug makugihon kitang magtuon sa mga kasulatan, matinguhaon sa paggiya gikan sa Espiritu, mahimo kitang andam modawat sa paglamdag mahitungod sa unsaon pag-andam og mga leksyon. Mahimo usab kita nga andam sa pagdawat ug pagsunod sa mga pag-aghat gikan sa Espiritu samtang magtudlo kita” (Pagtudlo, Walay Labaw Ka Mahinungdanon nga Tawag [1999], 14).