Kapitulo 8
Kita Nagtan-aw ngadto ni Kristo
“Kita nagtuo ni Kristo. Kita nagtudlo kabahin ni Kristo. Kita nagtan-aw ngadto ni Kristo. Siya ang atong Manunubos, atong Ginoo, ug atong Manluluwas.”
Gikan sa Kinabuhi ni Gordon B. Hinckley
Niadtong Abril 1975 nga kinatibuk-ang komperensya, si Elder Gordon B. Hinckley, kaniadto sakop sa Korum sa Napulog Duha ka mga Apostoles, mipakigbahin sa mosunod nga kasinatian:
“Bag-o lang kami nga mipahigayon og open house sa [Mesa] Arizona Temple. Human sa hingpit nga pagbag-o sa building, dul-an sa duha ka gatus ug kalim-an ka libo ka mga tawo ang nakakita sa matahum nga sulod niini. Sa unang adlaw sa pag-abli, ang mga lider sa ubang mga relihiyon gidapit isip espesyal nga mga bisita, ug gatusan ang miresponde. Akong pribilehiyo nga mamulong ngadto kanila ug motubag sa ilang mga pangutana sa pagtapos sa ilang pag-tour. Ako silang giingnan nga malipay kaming motubag sa bisan unsa nila nga mga pangutana. Daghan ang mga pangutana. Usa niini mao ang gikan sa usa ka Protestante nga ministro.
“Miingon siya: ‘Nalibut na nako kining tibuok building, kining templo nga adunay pangalan ni Jesukristo sa gawas niini, apan wala koy nakita nga bisan unsa nga pagpakita sa krus, ang simbolo sa Kristiyanismo. Akong namatikdan ang inyong mga building sa laing mga dapit ug kini usab walay krus. Nganong ingon man niini nga nagtuo man kaha mo ni Jesukristo?’
“Mitubag ko: ‘Dili ko gusto nga makasilo ni bisan kinsa sa akong mga kaigsoonang Kristiyanos kinsa naggamit sa krus diha sa mga tumoy sa ilang mga katedral ug sa mga altar sa ilang mga kapilya, kinsa nagbutang niini sa ilang mga sapot, ug nag-imprinta niini sa ilang mga basahon ug ubang literatura. Apan alang kanamo, ang krus maoy simbolo sa himatyon nga Kristo, samtang ang among mensahe mao ang pagpahayag sa buhi nga Kristo.’
“Nangutana dayon siya: ‘Kon dili mo mogamit sa krus, unsa man ang simbolo sa inyong relihiyon?’
“Mitubag ko nga ang mga kinabuhi sa among katawhan kinahanglan gayud nga mahimong bugtong makahuluganon nga pagpahayag sa among hugot nga pagtuo ug, sa pagkatinuod, tungod niana, maoy simbolo sa among pagsimba. …
“… Walay timailhan [sign], walay buhat sa arte, walay pisikal nga representasyon ang igo nga ikapadayag sa himaya ug sa pagkakatingalahan sa Buhi nga Kristo. Giingnan kita Niya unsa kana nga simbolo sa dihang miingon Siya, ‘Kon nahigugma kamo kanako, inyong pagatumanon ang akong mga sugo.’ (Juan 14:15.)
“Isip iyang mga sumusunod, dili nato mabuhat ang usa ka dautan o makapaulaw o walay pagtahud nga dili mamansahan ang Iyang panagway. Ni ang pagbuhat nato og usa ka maayo ug matinahuron ug buhong nga mga buhat nga dili mabarnisan aron mas mosanag ang iyang simbolo kansang ngalan atong gidala mismo sa atong kaugalingon.
“Ug mao nga ang atong mga kinabuhi kinahanglan gayud nga mahimong makahuluganon nga pagpadayag, ang simbolo sa atong pagpahayag kabahin sa atong pagpamatuod sa Buhi nga Kristo, ang Mahangturong Anak sa Buhi nga Dios.
“Ingon niana ka yano, akong mga kaigsoonan, ug ingon niana ka lawom ug kinahanglang dili gayud kita makalimot niana.”1
“Bug-os nga sukaranan sa atong hugot nga pagtuo mao ang atong pagpamatuod kang Jesukristo isip Anak sa Dios. … Siya mao ang ulohang bato sa pamag-ang sa simbahan nga nagdala sa Iyang ngalan.”
Mga Pagtulun-an ni Gordon B. Hinckley
1
Si Jesukristo mao ang buhi nga Anak sa buhi nga Dios.
Bug-os nga sukaranan sa atong hugot nga pagtuo mao ang atong pagpamatuod kang Jesukristo isip Anak sa Dios. … Siya mao ang ulohang bato sa pamag-ang sa simbahan nga nagdala sa Iyang ngalan.2
Kita nagtuo ni Kristo. Kita nagtudlo kabahin ni Kristo. Kita nagtan-aw ngadto ni Kristo. Siya ang atong Manunubos, atong Ginoo, ug atong Manluluwas.3
Yutan-ong pangalagad
Siya nga mao ang Anak sa Dios, ang Bugtong Anak, mibiya sa celestial nga palasyo sa Iyang Amahan aron mosinati sa pagka-mortal. Sa Iyang pagkatawo, ang mga anghel nanganta ug ang Maalamon nga mga Tawo miabut sa paghatag og mga gasa. Nagdako siya sama sa ubang mga batang lalaki sa Nazaret sa Galilea. Didto Siya “mitubo sa kaalam ug sa gidak-on ug sa kahimuot kaniya sa Dios ug sa tawo” (Lucas 2:52).
Uban ni Maria ug Jose, Siya mibisita sa Jerusalem sa dihang Siya 12 anyos. Sa ilang biyahe sa pagpauli, wala sila makakita Kaniya. Sila mibalik sa Jerusalem ug nakakita Kaniya diha sa templo nga nakigsulti sa makinaadmanon nga mga doktor. Sa dihang gikasab-an Siya ni Maria tungod kay wala mokuyog kanila, Siya mitubag, “Wala ba diay kamo mahibalo nga kinahanglan anhi gayud ako sa balay sa akong Amahan?” (Lucas 2:49). Ang Iyang mga pulong maoy usa ka tilimad-on sa Iyang umaabut nga pangalagad.
Kana nga pagpangalagad nagsugod sa Iyang bunyag didto sa suba sa Jordan pinaagi sa Iyang ig-agaw nga si Juan. Sa dihang mibangon Siya gikan sa tubig, ang Espiritu Santo mikunsad diha Kaniya sa porma sa usa ka salampati, ug nadungog ang tingog sa Iyang Amahan, nag-ingon, “Kini mao ang akong Anak nga pinalangga, kaniya may kalipay ako” (Mat. 3:17). Kana nga pamahayag nahimo nga panghimatuod sa Iyang kabalaan.
Nagpuasa Siya sulod sa 40 ka adlaw ug gitintal sa yawa, kinsa nagtinguha sa pagkuha Kaniya gikan sa Iyang misyon nga balaanong gisugo. Ngadto sa pagdapit sa kaaway, Siya mitubag, “Ayaw pagtintala ang Ginoo nga imong Dios” (Mat. 4:7), nagpadayag pag-usab sa Iyang balaanon nga pagkaanak.
Iyang gilakaw ang abugon nga mga dalan sa Palestina. Wala Siyay panimalay nga Iyang matawag nga Iyang kaugalingon, walay dapit nga kapahulayan sa Iyang ulo. Ang Iyang mensahe mao ang ebanghelyo sa kalinaw. Ang Iyang mga pagtulun-an mao ang kabahin sa pagkamanggihatagon ug gugma. “Ug kon may makigburoka kanimo ug moilog sa imong kamisola, ihatag pa usab kaniya ang imong kupo” (Mat. 5:40).
Nagtudlo Siya gamit ang mga sambingay. Mipahigayon siya og mga milagro nga wala pay sama nga napahigayon kaniadto o sukad. Iyang giayo kadtong dugay na nga nasakit. Gihimo Niya ang buta nga makakita, ang bungol nga makadungog, ug ang bakol nga makalakaw. Iyang gipabangon ang mga patay, ug nabuhi sila pag-usab aron mamulong og mga pagdayeg Kaniya. Sigurado nga walay tawo nga nakahimo og sama niini sukad.
Ang pipila misunod Kaniya, apan ang kadaghanan naglagot Kaniya. Siya namulong kabahin sa mga escriba ug mga Pariseo isip mga hipokrito, sama sa pinaputi nga mga pantiyon. Sila nagplano batok Kaniya. Iyang gipapahawa ang mga tigpangilis og kwarta gikan sa balay sa Ginoo. Walay dudang miapil sila niadtong nagplano sa paglaglag Kaniya. Apan wala Siya mahadlok. Siya “[n]agpangadto-adto sa paghimog mga kaayohan” (Mga Buhat 10:38).
Dili ba igo kining tanan aron mohinumdom kita Kaniya sa kahangturan? Dili ba kini igo aron ibutang ang Iyang ngalan taliwala, ug gani sa ibabaw, niadtong talagsaong mga tawo nga nabuhi dinhi sa yuta ug gihinumduman tungod sa ilang gisulti o gibuhat? Sigurado nga mahimutang Siya taliwala sa halangdong mga propeta sa tanang panahon.
Apan kining tanan dili paigo alang sa Anak sa Labawng Makagagahum. Kadto usa lamang ka timaan sa dagkong mga butang nga moabut. Nangabut kini sa katingalahan ug makalilisang nga paagi.4
Pagdakop, paglansang sa krus, ug kamatayon
Siya gibudhian, gidakop, gisilutan sa kamatayon, nga mamatay sa makalilisang nga pag-antus pinaagi sa paglansang sa krus. Ang Iyang buhi nga lawas gilansang ngadto sa krus nga kahoy. Sa dili mahulagway nga kasakit, ang Iyang kinabuhi hinay-hinay nga napupos. Samtang nagginhawa pa Siya, Siya mituaw, “Amahan, pasayloa sila; kay wala sila makasabut sa ilang ginabuhat” (Lucas 23:34).
Ang yuta nauyog sa pagbiya sa Iyang espiritu. Ang kapitan kinsa nakakita niining tanan mahinuklugon nga mipahayag, “Sa pagkatinuod kini siya anak sa Dios” (Mat. 27:54).
Kadtong nagmahal Kaniya mikuha sa Iyang lawas gikan sa krus. Giilisan nila kini ug gibutang kini sa usa ka bag-o nga lubnganan. …
Ang Iyang mga higala siguradong mihilak. Ang mga Apostoles nga Iyang gimahal ug kinsa Iyang gitawag isip mga saksi sa Iyang kabalaan mihilak. Ang mga babaye nga nagmahal Kaniya mihilak. Walay usa nga nakasabut sa Iyang gisulti kabahin sa pagbangon sa ikatulong adlaw. Unsaon nila pagkasabut? Wala pa gayud kini mahitabo kaniadto. Wala pay sama niini nga nahitabo sukad. Dili kadto katuohan, bisan gani alang kanila.
Siguradong grabe ang ilang pagbati sa kasagmuyo ug kawalay paglaum ug kasakit samtang naghunahuna sila sa ilang Ginoo nga gikuha sa kamatayon gikan kanila.5
Pagkabanhaw
Apan dili kadto ang katapusan. Sa buntag sa ikatulong adlaw, si Maria Magdalena ug ang laing Maria mibalik ngadto sa lubnganan. Sa ilang hingpit nga katingala, ang bato naligid palayo ug ang lubnganan abli. Milili sila sa sulod. Duha ka mga binuhat nga nagputi naglingkod sa isig tumoy sa gilubngan. Usa ka anghel mipakita kanila ug miingon: “Ngano nga ang buhi anha man ninyo pangitaa diha sa mga patay?
“Wala Siya dinhi, kondili nabanhaw: hinumdumi ang iyang gisulti kaninyo sa didto pa siya sa Galilea,
“Nga, ang Anak sa tawo kinahanglan igatugyan ngadto sa mga kamot sa mga tawong makasasala, ug igalansang sa krus, ug sa ikatulo ka adlaw mabanhaw siya” (Lucas 24:5–7).
Kining yano nga mga pulong—“Wala Siya dinhi, kondili nabanhaw”—nahimong labing tulukibon sa tanan nga literatura. Kina mao ang pagpahayag kabahin sa usa ka lubnganan nga walay sulod. Kini mao ang katumanan sa tanan nga Iyang gipamulong kabahin sa pagbangon pag-usab. Kini mao ang madaugon nga tubag sa pangutana nga nag-atubang sa matag lalaki, babaye, ug bata nga natawo sa yuta sukad.
“Ang iyang mensahe mao ang ebanghelyo sa kalinaw. Ang Iyang mga pagtulun-an mao ang kabahin sa pagkamanggihatagon ug gugma.”
Ang nabanhaw nga Ginoo namulong ngadto kang Maria, ug siya mitubag. Dili siya usa ka multo. Dili kini imahinasyon. Tinuod Siya, sama ka tinuod sa dihang ania pa Siya sa mortal nga kinabuhi. Wala Siya motugot kaniya nga hikapon Siya. Wala pa Siya makasaka ngadto sa Iyang Amahan sa Langit. Mahitabo kana sa dili madugay. Pagkanindot kaha niadto nga panagkita pag-usab, nga gakson sa Amahan, kinsa nahigugma Kaniya ug kinsa siguradong mihilak usab alang Kaniya sa Iyang mga oras sa pag-antus.
Mopakita Siya sa duha ka mga lalaki diha sa dalan sa Emaus. Siya makigsulti kanila ug mokaon uban kanila. Siya makigkita sa Iyang mga Apostoles sa pribadong dapit ug motudlo kanila. Si Tomas wala makatambong sa unang okasyon. Sa ikaduha nga okasyon, ang Ginoo midapit kaniya nga hikapon ang Iyang mga kamot ug ang Iyang kilid. Sa hingpit nga katingala siya mituaw, “Ginoo ko ug Dios ko” (Juan 20:28). Nakigsulti siya sa 500 sa [laing] higayon. …
Ug adunay lain nga saksi. Kini nga kauban sa biblia, ang Basahon ni Mormon, nagpamatuod nga Siya mipakita dili lamang niadtong anaa sa Daang Kalibutan apan usab ngadto sa Bag-o. Kay dili ba namahayag man Siya sa usa ka higayon nga, “Ako adunay ubang mga karnero nga dili sakop niining torila; kinahanglang pagamandoan ko usab sila, ug sila magapatalinghug sa akong tingog; ug usa ra unya ang panon, ug usa ang magbalantay”? (Juan 10:16).
Niadtong anaa niini nga bahin sa kalibutan Siya nagpakita human sa Iyang Pagkabanhaw. Sa Iyang pagkunsad agi sa mga panganod sa langit, ang tingog sa Dios nga Mahangturong Amahan nadungog pag-usab nga ligdong nga namahayag: “Tan-awa ang akong Hinigugmang Anak, kinsa Ako nahimuot kaayo, kang kinsa Ako mihimaya sa akong ngalan—paminaw kamo kaniya” (3 Ne. 11:7). …
Ug kon kining tanan dili pa igo, anaa ang pagpamatuod, sigurado ug piho ug klaro kaayo, sa bantugan nga propeta niining dispensasyon, si Joseph Smith. Isip usa ka batang lalaki miadto siya sa kakahoyan sa pag-ampo nga nangita og kahayag ug panabut. Ug didto mipakita kaniya ang duha ka Personahe, kansang kahayag ug himaya dili mahulagway, nagtindog ibabaw kaniya diha sa kawanangan. Usa kanila namulong kaniya, nagtawag kaniya “sa [iyang] ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” [Joseph Smith—Kasaysayan 1:17].
Kining mao gihapon nga Joseph mipahayag sa usa ka laing higayon: “Ug kami nakakita sa himaya sa Anak, sa tuo nga kamot sa Amahan, ug nakadawat sa iyang kahingpitan; …
“Ug karon, human sa daghan nga mga pagpamatuod nga gihatag mahitungod kaniya, kini mao ang pagpamatuod, ang katapusan sa tanan, nga kami naghatag mahitungod kaniya: Nga siya buhi!” (D&P 76:20, 22).6
Sa tanan kinsa adunay mga pagduha-duha, akong balikon ang mga pulong nga gihatag kang Tomas samtang iyang gihikap ang samaran nga mga kamot sa Ginoo: “Ayaw na nianang pagkadili matinuohon, hinonoa magmatinuohon ka” [Juan 20:27]. Tuo kang Jesukristo, ang Anak sa Dios, ang labing talagsaon nga tawo sa panahon karon ug sa kahangturan. Tuohi nga ang iyang dili matupngan nga kinabuhi nagsugod na kaniadto pa sa wala pa mabuhat ang kalibutan. Tuohi nga siya ang Tiglalang sa yuta nga atong gipuy-an. Tuohi nga siya mao si Jehova sa Daang Tugon, nga siya mao ang Mesiyas sa Bag-ong Tugon, nga siya namatay ug nabanhaw, nga siya mibisita sa kasadpan nga mga kontinente ug mitudlo sa mga tawo didto, nga iyang gipasiugdahan kining katapusang dispensasyon sa ebanghelyo, ug nga siya buhi, ang buhing Anak sa buhi nga Dios, ang atong Manluluwas ug atong Manunubos.7
2
Matag usa kanato mahimong masayud nga si Jesukristo mao ang Anak sa Dios ug ang Manunubos sa kalibutan, nabanhaw gikan sa lubnganan.
Adunay usa ka … gubat nga gipakigbatukan alang sa hugot nga pagtuo sa mga katawhan, apan ang magkaatbang nga mga habig dili kanunay … klaro, kay bisan taliwala sa mga pwersa sa Kristiyanismo anaa kadtong kinsa moguba sa kabalaan ni Kristo kang kansang ngalan sila namulong. Mahimo ra unta sila nga baliwalaon kon ang ilang mga tingog dili ingon ka madanihon, kon ang ilang impluwensya dili ingon ka malukpanon, kon ang ilang rason dili ingon ka maliputon.
… Mga pundok sa katawhan managtapok sa usa ka libo ka mga bungtod sa paghangup sa kaadlawon sa pasko sa Pagkabanhaw ug sa pagpahinumdom sa ilang mga kaugalingon sa istorya ni Kristo, kansang pagkabanhaw ilang gisaulog. Sa pinulongan nga matahum ug malaumon, ang mga magwawali sa ubang tinuohan mosaysay pag-usab sa istorya sa walay sulod nga lubnganan. Ngadto kanila—ug kaninyo—ako mangutana: “Nagtuo ba gayud kamo niini?”
“Nagtuo ba gayud kamo nga si Jesus mao ang Anak sa Dios, ang literal nga anak sa Amahan?”
Nagtuo ba kamo nga ang tingog sa Dios, ang Amahan sa Kahangturan, nadungog ibabaw sa katubigan sa Jordan nga nagpahayag, “Kini mao ang akong Anak nga pinalangga, kaniya may kalipay ako”? (Mat. 3:17.)
Nagtuo ba kamo nga kining sama nga Jesus mao ang tighimo sa mga milagro, ang tig-ayo sa mga masakiton, ang tigpahiuli sa mga may balatian, ang tighatag sa kinabuhi ngadto sa mga patay?
Nagtuo ba kamo nga human sa iyang kamatayon diha sa bungtod sa Kalbaryo ug sa iyang paglubong sa lubnganan ni Jose, siya nabuhi sa ikatulo nga adlaw?
Nagtuo ba gayud kamo nga siya buhi pa—tinuod, baskog, ug personal—ug nga siya moanhi pag-usab sama sa gisaad sa mga anghel sa iyang pagsaka sa langit?
Nagtuo ba gayud kamo niining mga butanga? Kon nagtuo kamo, nan nalakip kamo sa nagkagamay nga pundok sa mga tawo nga nagtuo sa katinuod sa gisulti sa biblia kinsa anam-anam nga gikataw-an sa mga makinaadmanon, kinsa anam-anam nga gibiay-biay sa piho nga mga edukador, ug kinsa anam-anam nga gikonsiderar nga “wala na sa uso” sa nagkadaghan nga mga ministro sa relihiyon ug impluwensyado nga mga batid sa teyolohiya.
…Sa mga opinyon niining maalamon nga mga tawo, kini mga himo-himo lamang—ang pagkatawo ni Jesus isip Anak sa Dios nga gikanta sa mga anghel sa kapatagan sa Judea, ang tighimo sa mga milagro nga miayo sa masakiton ug mibuhi sa mga patay, si Kristo nga nabanhaw gikan sa lubnganan, ang pagkayab sa langit ug ang gisaad nga pagbalik.
Kining moderno nga mga batid sa teyolohiya mitangtang sa iyang kabalaan ug dayon matingala nganong ang mga tawo wala na mosimba kaniya.
Ang nabanhaw nga Manluluwas milakaw uban sa duha ka mga tawo diha sa dalan sa Emaus.
Kining antigo nga mga eskolar mikuha gikan ni Jesus sa kupo sa pagkadios ug tawo lang ang gibilin. Gipaningkamutan nila nga mapahaum siya ngadto sa ilang kaugalingong pig-ot nga panghunahuna. Ilang gikawat kaniya ang iyang balaanon nga pagkaanak ug gikuha gikan sa kalibutan ang tinuod nga Hari niini. …
… Ako mohatag sa among balaang pagsaksi nga ang Dios dili patay, gawas sa paagi nga gitan-aw siya uban sa usa ka walay kinabuhi nga paghubad. …
… Adunay gikinahanglan nga labaw pa kay sa usa ka resonable nga pagtuo. Adunay gikinahanglan nga panabut sa iyang talagsaon ug walay kapareha nga posisyon isip ang balaang Manunubos ug kadasig alang kaniya ug sa iyang mensahe isip Anak sa Dios.
Kana nga panabut ug kana nga kadasig anaa alang sa tanan nga mobayad sa bili. Dili ingon nga dili kini haum sa mas taas nga edukasyon, apan dili kini moabut lamang sa pagbasa og pilosopiya. Dili, kini moabut sa usa ka mas sayon nga proseso. Ang mga butang sa Dios masabtan pinaagi sa Espiritu sa Dios. (1 Mga Taga-Cor. 2:11.) Kana ang gideklarar sa gipadayag nga mga sinulat.
Ang pagkaangkon sa panabut ug kadasig alang sa Ginoo mahitabo pinaagi sa pagsunod sa yanong mga lagda. … Gusto kong mosugyot og tulo, yano sa ilang konsepto, hapit na manubra sa ilang pagbalik-balik, apan importante sa ilang paggamit ug mabungahon sa ilang resulta. …
Ang una mao ang pagbasa—pagbasa sa pulong sa Ginoo. … Basaha, sama pananglit, ang Ebanghelyo ni Juan gikan sa sinugdanan hangtud sa katapusan. Tugoti ang Ginoo nga maoy mamulong alang sa iyang kaugalingon nganha kaninyo, ug ang iyang mga pulong moabut uban sa usa ka hilum nga kombiksyon nga makahimo sa mga pulong sa iyang mga kritiko nga walay pulus. Basaha usab ang tugon sa Bag-ong Kalibutan, ang Basahon ni Mormon, gipagula isip usa ka saksi “nga si Jesus mao ang Kristo, ang Dios sa Kahangturan, nagpaila sa iyang kaugalingon ngadto sa tanan nga mga nasud.” (Ulohan nga pahina sa Basahon ni Mormon.)
Ang sunod mao ang pagserbisyo—pagserbisyo diha sa buhat sa Ginoo. … Ang buhat ni Kristo wala magkinahanglan sa inyong mga pagduha-duha; kini nagkinahanglan sa inyong kalig-on ug panahon ug mga talento; ug samtang inyo kining gamiton diha sa pagserbisyo, ang inyong hugot nga pagtuo motubo ug ang inyong pagduha-duha mahanaw. …
Ang ikatulo mao ang pag-ampo. Pakigsulti sa inyong Amahan sa Kahangturan diha sa ngalan sa iyang Hinigugmang Anak. “Tan-awa,” miingon siya, “nagatindog ako sa pultahan, ug nagatuktok: kon may magapatalinghug sa akong tingog, ug moabli sa pultahan, kaniya mosulod Ako, ug makigsalo ako sa pagkaon uban kaniya, ug siya uban kanako.” (Pin. 3:20.)
Kini mao ang iyang pagdapit, ug ang saad sigurado. Dili tingali mo makadungog og mga tingog gikan sa langit, apan adunay moabut nga kasiguroan gikan sa langit, malinawon ug sigurado. …
… Nagdan-ag tadlas sa tanang kalibug sa pilosopiya, sa gitawag nga mas taas nga pagpanaway, ug negatibo nga teyolohiya moabut ang pagsaksi sa Espiritu Santo nga si Jesus mao gayud ang Anak sa Dios, natawo diha sa unod, ang Manunubos sa kalibutan nabanhaw gikan sa lubnganan, ang Ginoo nga moanhi aron sa paghari isip Hari sa mga hari. Kini mao ang inyong oportunidad nga masayud. Kini mao ang inyong obligasyon sa pagsuta.8
3
Kita kinahanglang mangutana kanunay sa atong kaugalingon, “Unsay atong buhaton ni Jesus nga gitawag og Kristo?”
Mangutana ko pag-usab sa pangutana nga gihalad ni Pilato duha ka libo ka tuig na ang milabay, “Nan unsaon ko man kini si Jesus, ang ginatawag nga Kristo?” (Mat. 27:22.) Sa pagkatinuod, kita kinahanglang kanunay nga mangutana sa atong kaugalingon, Unsay atong buhaton ni Jesus nga gitawag og Kristo? Unsay atong buhaton sa iyang mga pagtulun-an, ug unsaon nato sa paghimo niini nga dili mabulag nga parte sa atong kinabuhi? …
… “Tan-awa mao kana ang Kordero sa Dios, nga magakuha sa sala sa kalibutan.” (Juan 1:29.) Pagkakabus sa atong mga kinabuhi kon wala ang impluwensya sa iyang mga pagtulun-an ug dili hitupngan nga ehemplo. Ang mga leksyon sa pagbali sa pikas aping, pag-uban sa ikaduha nga milya, pagbalik sa nawala, ug daghan pang walay kapareha nga mga pagtulun-an mipadayon sa kapanahunan nga maoy hinungdan nga mopatigbabaw ang kamabination ug kalooy gikan sa ka salbahis sa tawo ngadto sa tawo.
Ang kabangis maghari kon wala si Kristo. Ang kamabination ug pagpugong sa kaugalingon maoy mangulo kon giila si Kristo ug ang iyang mga pagtulun-an gisunod.
Nan unsay atong buhaton ni Jesus nga gitawag og Kristo? “Gipakita na niya kanimo, O tawo, kong unsa ang maayo; ug unsa ba ang gikinahanglan sa Ginoo kanimo, kondili ang pagbuhat sa minatarung, ug ang paghigugma sa kalolot, ug ang paglakaw nga mapainubsanon uban sa imong Dios?” Miqueas 6:8.)
“Busa, Ako moingon nganha kaninyo, nga kamo kinahanglan gayud nga mopasaylo sa usag usa; kay siya nga dili mopasaylo sa iyang igsoon ang iyang mga kalapasan magpabilin nga gipanghimaraut sa atubangan sa Ginoo; kay magpabilin diha kaniya ang dakong sala.” (D&P 64:9.) …
Nan unsay atong buhaton ni Jesus nga gitawag og Kristo? “Kay gigutom ako ug inyo ako nga gipakaon: giuhaw ako ug inyo ako nga gipainom: nadumoloong ako ug ginahangup ninyo ang pagpasaka kanako: hubo ako ug inyo ako nga gibistihan: nagmasakiton ako, ug inyo ako nga giduaw: nabilanggo ako ug miadto kamo kanako.” (Mat. 25:35–36) …
Unsay atong buhaton ni Jesus nga gitawag og Kristo?
Magkat-on kabahin niya. Siksika ang mga kasulatan kay mao kini ang nagapanghimatuod kaniya. Pamalandungi ang milagro sa iyang kinabuhi ug misyon. Paningkamuti nga mas magmakugihon sa pagsunod sa iyang ehemplo ug pagsunod sa iyang mga pagtulun-an.9
4
Kita nagtan-aw ngadto ni Jesukristo isip ang lig-ong sukaranan sa atong kaluwasan, atong kalig-on, atong kahupayan, ug ang sentro sa atong hugot nga pagtuo.
Wala kita masayud unsay nagpaabut kanato sa unahan. Wala kita masayud unsay mahitabo sa umaabut nga mga adlaw. Nagpuyo kita sa kalibutan nga walay kasiguroan. Alang sa uban, adunay dagkong mga kalampusan. Alang sa uban, kahigawad. Alang sa uban, tumang pagmaya ug kalipay, maayong panglawas, ug bulahang pagpuyo. Alang sa uban, tingali sakit ug hilabihan nga kasubo. Wala kita makahibalo. Apan usa ka butang nga atong nahibaloan. Sama sa polar nga bitoon sa kalangitan, bisan unsa pa ang mahitabo sa umaabut, anaa nagbarug ang Manunubos sa kalibutan, ang Anak sa Dios, usa ka lig-on nga walay kausabang pundasyon sa atong imortal nga mga kinabuhi. Siya ang bato sa atong kaluwasan, atong kalig-on, atong kahupayan, ang pokus sa atong hugot nga pagtuo.
Sa maayo ug dautan nga panahon kita nagtan-aw Kaniya, ug Siya anaa sa pagsiguro ug pagpahiyom kanato.10
Buhi akong Manunubos,
Malampusong Anak sa Dios,
Mibuntog sa kamatayon,
Akong Hari ug akong Dios.
Buhi ang gituohan ko,
Ang paglaum sa katawhan,
Giya sa matarung dalan,
Sa kamatayon mipukan.
Mga Sugyot alang sa Pagtuon ug Pagtudlo
Mga Pangutana
-
Ribyuha ang mga pulong sa pagpamatuod ni Presidente Hinckley diha sa seksyon 1, ug paggahin og panahon sa pagpamalandong sa inyong kaugalingong pagpamatuod ni Jesukristo. Nganong mapasalamaton man mo sa pagpangalagad ug Pag-ula sa Manluluwas? Hain sa mga istorya ug mga pagtulun-an sa kinabuhi sa Manluluwas ang adunay espesyal nga kahulugan diha kaninyo?
-
Pangutan-a ang inyong kaugalingon sa kada pangutana diha sa seksyon 2. Sa unsang paagi nga ang inyong mga tubag makaimpluwensya sa inyong inadlaw-adlaw nga pagpuyo? Diha sa sama nga seksyon, ribyuha ang tulo ka “yanong mga lagda” ni Presidente Hinckley aron makaangkon og panabut kabahin sa “mga butang sa Dios.” Sa unsang paagi kini nga mga baruganan nakatabang kaninyo nga madugangan ang inyong espirituhanong panabut?
-
Si Presidente Hinckley balik-balik nga nangutana, “Unsa ang atong buhaton ni Jesus nga gitawag og Kristo?” (seksyon 3). Unsa man ang atong makat-unan gikan sa iyang mga tubag? Ikonsiderar kon unsaon ninyo pagtubag kini nga pangutana. Sa unsang paagi nga malahi ang inyong kinabuhi kon wala pa mo masayud sa mga pagtulun-an ug ehemplo sa Manluluwas?
-
Si Presidente Hinckley mipasabut og maayo nga si Jesukristo mao ang atong lig-ong pundasyon sa kalibutan nga walay kasiguroan (tan-awa sa seksyon 4). Kanus-a kamo mibati sa kalig-on ug kahupayan sa Manluluwas sa usa ka panahon sa panginahanglan? Pamalandungi ang matag linya sa himno ni Presidente Hinckley sa seksyon 4. Sa unsang mga paagi nga si Kristo mao ang “paglaum sa katawhan”? Sa unsang paagi nga Siya ang atong “giya sa matarung nga dalan”?
May Kalabutan nga mga Kasulatan
Lucas 24:36–39; Juan 1:1–14; Mga Buhat 4:10–12; 2 Nephi 2:8; 25:26; Alma 5:48; D&P 110:3–4
Tabang sa Pagtuon
“Pagplano og mga kalihokan sa pagtuon nga kanang makapahugot sa imong pagtuo sa Manluluwas” (Isangyaw ang Akong Ebanghelyo [2004], 25). Sama pananglit, samtang magtuon ka, mahimo ka nga mangutana sa imong kaugalingon sa mga pangutana sama sa mosunod: Sa unsang paagi kini nga mga pagtulun-an makatabang kanako nga madugangan ang akong panabut sa Pag-ula ni Jesukristo? Sa unsang paagi kini nga mga pagtulun-an makatabang nako nga mas mahisama sa Manluluwas?