Kapitulo 2
Usa ka Bandila ngadto sa mga Nasud, usa ka Kahayag ngadto sa Kalibutan
“Kini usa ka panahon nga magmalig-on. Kini usa ka panahon nga mopadayon nga walay pagduha-duha, nasayud og maayo sa kahulugan, sa gilapdon, ug sa kaimportante sa atong misyon.”
Gikan sa Kinabuhi ni Gordon B. Hinckley
Sa wala madugay human sa pagpauli gikan sa iyang misyon sa England, si Gordon B. Hinckley mituman sa katapusan niyang assignment gikan sa iyang presidente sa misyon, si Joseph F. Merrill. Si Presidente Merrill usa usab ka sakop sa Korum sa Napulog Duha ka mga Apostoles, ug siya mihangyo ni Gordon sa paghimo og usa ka report ngadto sa Unang Kapangulohan: Presidente Heber J. Grant, J. Reuben Clark Jr. ug David O. McKay. Gikontak ni Gordon ang sekretarya sa Unang Kapangulohan ug nakigsabut og iskedyul.
Sa dihang misulod si Gordon sa council room sa Unang Kapangulohan, si Presidente Grant ug ang iyang mga magtatambag mainitong miabi-abi kaniya. Dayon si Presidente Grant miingon, “Brother Hinckley, hatagan ka namo og kinse minutos sa pagsulti kanamo sa unsay gusto ni Elder Merrill nga among madungog.” Paglabay sa usa ka oras ug kinse minutos, si Gordon mibiya sa lawak. Sa gihatag kaniya nga kinse minutos, iyang napresentar ang kabalaka sa iyang mission president—nga ang mga misyonaryo nagkinahanglan og mas maayo nga giimprinta nga mga materyal aron sa pagtabang kanila sa ilang buhat. Ang iyang mubo nga presentasyon miresulta og mga pangutana gikan sa Unang Kapangulohan ug usa ka oras nga diskusyon.
Kay natuman na kini nga buluhaton, si Gordon mibati nga “ang iyang misyon tinud-anay na gayud nga nahuman, ug panahon na sa pagpadayon ug pagplano alang sa umaabut.” Nakagradwar na siya gikan sa University of Utah nga adunay degree sa English, ug gusto niyang mopadayon og graduate degree sa journalism sa Columbia University sa Siyudad sa New York. Apan usa ka tawag sa telepono duha ka adlaw human sa iyang miting uban sa Unang Kapangulohan nakapausab sa iyang mga plano. Ang tawag gikan ni Presidente McKay, kinsa miingon: “Brother Hinckley, among gihisgutan sa miting sa Kapangulohan ug sa Napulog Duha kagahapon unsay atong gihisgutan atol sa among interbyu kanimo. Ug mi-organisar kami og usa ka committee nga gilangkuban sa unom ka sakop sa Napulog Duha, uban ni Elder Stephen L Richards isip chairman, aron matubag ang mga panginahanglan nga imong gilatid. Gusto namo nga dapiton ka nga moari ug motrabaho uban niana nga committee.”1
Si Gordon midawat sa imbitasyon ug gikuha isip executive secretary sa bag-ong naporma nga Church Radio, Publicity, and Mission Literature Committee. Wala na gayud siya makaadto sa Columbia University, ug wala na gayud siya makatrabaho isip usa ka journalist aron sa pagmantala sa mga balita sa kalibutan. Hinoon, iyang gisugdan ang tibuok kinabuhi nga paningkamot sa pagmantala sa maayong balita sa ebanghelyo. Kini nga mga responsibilidad gipalapdan pa sa wala madugay, sa dihang miserbisyo siya isip usa ka General Authority.
Mipalambo sa abilidad nga klarong makapahayag sa iyang kaugalingon bisan sa lisud nga mga sitwasyon, si Gordon B. Hinckley kadaghan nakadawat og assignment nga interbyuhon sa mga tigbalita. Isip Presidente sa Simbahan, padayon niyang gihangup ang ingon nga mga oportunidad, nga naghimo sa iyang bahin sa pagtabang nga madala ang Simbahan ni Jesukristo “gikan sa kangiub” (D&P 1:30). Siya mideklarar:
“Ako nagtuo ug mopamatuod nga misyon niini nga simbahan nga mobarug isip usa ka bandila ngadto sa mga nasud ug usa ka kahayag ngadto sa kalibutan. Gihatag ngari kanato ang usa ka dako, malukpanon nga mando diin dili kita makaatras ni makalikay. Atong gidawat kana nga mando ug determinado sa pagtuman niini, ug uban sa tabang sa Dios kita mobuhat niini.”2
“Maoy misyon niini nga simbahan nga mobarug isip usa ka bandila ngadto sa mga nasud ug usa ka kahayag ngadto sa kalibutan.”
Mga Pagtulun-an ni Gordon B. Hinckley
1
Sama sa bato sa panan-awon ni Daniel, ang Simbahan nagkaylap aron mopuno sa tibuok kalibutan.
Kini nga Simbahan nagsugod sa mapainubsanon nga pag-ampo sa batan-on nga si Joseph Smith didto sa kakahoyan sa umahan sa iyang amahan. Gikan niana nga talagsaong kasinatian, diin atong gitawag nga Unang Panan-awon, milambo kini nga buhat. … Mao kini ang katumanan sa panan-awon ni Daniel nga usa ka bato nga gipikas gikan sa bukid nga walay gigamit nga mga kamot mokaylap hangtud kini mopuno sa tibuok kalibutan (tan-awa sa Daniel 2:44–45).3
Sa dihang ang Simbahan gi-organisar niadtong 1830 dihay unom lamang ka mga miyembro [ug] pipila ka mga tumutuo, ang tanan nagpuyo sa wala kaayo mailhi nga dapit. … Ang mga stake sa Zion karon naglambo diha sa matag stake sa Estados Unidos, sa matag probinsya sa Canada, sa matag estado sa Mexico, sa matag nasud sa Central America ug sa tibuok South America.
Ang mga kongregasyon makita sa tibuok British Isles ug Uropa diin liboan ang nagpasakop sa Simbahan sa nangaging mga katuigan. Kini nga buhat miabut ngadto sa mga nasud sa Baltic ug didto sa Bulgaria ug Albania ug sa ubang mga dapit niana nga bahin sa kalibutan. Miabut kini tabok sa dakong dapit sa Russia. Miabut kini ngadto sa Mongolia ug lahus sa mga nasud sa Asia ngadto sa mga Isla sa Pasipiko, Australia, ug New Zealand, ug ngadto sa India ug Indonesia. Kini nag-uswag sa daghang mga nasud sa Africa. …
Ug kini sinugdanan pa lamang. Kini nga buhat magpadayon sa pagtubo ug pag-uswag ug molukop sa tibuok yuta.4
2
Ang unang mga lider sa Simbahan adunay propetikanhong panan-aw sa padulngan sa buhat sa Ginoo.
Niadtong Hulyo 24, 1847, ang unang grupo sa atong katawhan miabut ngadto sa walog sa [Salt Lake nga]. Ang nangulo nga grupo mas sayo nga miabut og mga usa o duha ka adlaw. Si Brigham Young miabut pagka-Sabado. Pagkasunod adlaw, ang mga serbisyo sa adlaw nga Igpapahulay gipahigayon sa buntag ug sa hapon. Walay bisan unsang lawak tigumanan nga kapundokan. Nagtuo ko nga diha sa makapaso nga kainit niana nga Dominggo sa Hulyo naglingkod sila sa ilang mga karwahe ug misandig sa mga ligid samtang namulong ang mga Kaigsoonan. Ulahing bahin na sa panahon, ug nag-atubang sila og dako ug dinalian nga buhat kon gusto nila nga makapatubo og binhi alang sa sunod nga panahon sa tingtanum. Apan si Presidente Young mihangyo kanila nga dili mosupak sa adlawng Igpapahulay niadtong adlawa o sa umaabut.
Pagkasunod buntag gibahin sila ngadto sa mga grupo aron sa pagsuhid sa ilang palibut. Si Brigham Young, Wilford Woodruff, ug ang pipila sa ilang mga kauban nanglakaw gikan sa ilang gikampuhan. … Mikatkat sila sa usa ka linginon nga tumoy sa bungtod, nga naglisud si Presidente Young tungod sa iyang bag-ohay lang nga sakit.
Sa dihang ang mga Kaigsoonan nanagbarug diha sa kinatumyan, milantaw sila sa walog sa habagatan sa ilang nahimutangan. Kini wala kaayoy mga tanum, gawas lamang sa mga balili ug mga sagbut nga nanurok kilid sa mga sapa nga nagdala og tubig gikan sa mga kabukiran padulong ngadto sa linaw. Walay bisan unsa nga matang nga natukod , apan si Brigham Young miingon sa miaging Sabado, “Mao kini ang lugar.”
Ang tumoy sa bungtod nga ilang gibarugan ginganlan og Ensign Peak agig pagpasabut niining talagsaong propetikanhong mga pulong ni Isaias: “Ug magapatindog siya [namulong kabahin sa Dios] og bandila ngadto sa nga nasud gikan sa halayo, ug pagataghuyan sila gikan sa kinatumyan sa yuta; ug ania karon, sila manganhi sa madali gayud.” (Isa. 5:26.)
“Ug siya magatindog og usa ka bandila alang sa mga nasud, ug magapatigum sa mga hininginlan gikan sa Israel, ug pagatigumon ang nangapatlaag gikan sa Juda gikan sa upat ka kasuokan sa yuta.” (Isa. 11:12.) …
Nagtuo ko [kadto nga mga Kaigsoonan] tingali niana usab nga okasyon namulong kabahin sa pagtukod sa templo … agi og katumanan sa mga pulong ni Isaias:
“Ug mahinabo sa ulahing mga adlaw nga ang bukid sa balay sa Ginoo pagatukoron sa ibabaw sa tumoy sa kabukiran, ug igatuboy ibabaw sa mga bungtod, ug ang tanang mga nasud magaganayan ngadto kaniya.
Ug ang daghang mga katawohan mangadto ug manag-ingon: Umari kamo ug manungas kita sa bukid sa Ginoo, ngadto sa balay sa Dios ni Jacob; ug kita pagatudloan niya sa iyang mga dalan, ug manlakat kita sa iyang mga alagianan; kay gikan sa Sion mogula ang kasugoan, ug ang pulong sa Ginoo gikan sa Jerusalem. (Isa. 2:2–3.)
Pagkabuang, tingali makaingon ang usa ka tawo, kon iya pang nadungog kining mga tawhana nianang buntaga sa Hulyo sa 1847. Dili sila makita nga sama sa mga batid nga mga tawo nga adunay dagko nga mga damgo. Dili sila makita nga sama sa mga tigmando nga nag-analisar sa mga mapa ug nagplano og usa ka kagamhanan. Sila mga hininginlan, giabug gikan sa ilang matahum nga siyudad diha sa [Suba sa] Mississippi ngadto niining disyerto nga rehiyon sa Kasadpan. Apan aduna silay panan-awon nga gikuha gikan sa mga kasulatan ug mga pulong sa pagpadayag.
Nahingangha ako sa panglantaw nianang gamay nga pundok. Kini mapanimpalaron ug maisugon. Hapit dili kini katuohan. Ania sila, hapit usa ka libo ka milya [1,600 ka kilometro] gikan sa labing duol nga mga pinuy-anan ngadto sa silangan ug hapit walo ka gatus ka milya [1,300 ka kilometro] gikan sa Baybayon sa Pasipiko. Anaa sila sa wala pa masulayi nga klima. Lahi ang yuta kay sa itom nga yuta [loam] sa Illinois ug Iowa, diin sila labing bag-o lang nga nagpuyo. Wala pa gayud sila makapananum dinhi. Wala pa gayud sila makasinati og panahon sa usa ka tingtugnaw. Wala pa gayud sila makatukod og bisan unsang matang sa estraktura. Kini nga mga propeta, nagsul-ob og karaan, gasgas sa biyahe nga mga sinina, nagbarug sa mga botas nga gisul-ob nila sa sobra sa usa ka libo ka milya gikan sa Nauvoo ngadto niini nga walog, namulong kabahin sa milenyal nga panan-awon. Sila namulong base sa usa ka propetikanhong panan-aw sa talagsaong padulngan niini nga kawsa. Sila nanaog gikan sa tumoy sa bungtod nianang adlawa ug mitrabaho aron sa katumanan sa ilang damgo.5
Duha ka adlaw human sa pag-abut sa Walog sa Salt Lake, si Brigham Young ug pipila sa mga kaigsoonan mikatkat sa usa ka linginon og porma nga bungtod, nga sa kaulahian ginganlan og Ensign Peak, ug gisusi ang ilang palibut.
3
Kinahanglang mahinumdom kita kanunay sa balaanong padulngan sa buhat sa Dios ug sa atong buluhaton niini.
Usahay sa atong panahon, samtang kita maglakaw sa atong pig-ot nga mga dalan ug motuman sa atong ginagmay nga mga responsibilidad, makalimot kita sa kinatibuk-ang panglantaw. Sa dihang gamay pa ko nga bata, ang dagkong mga kabayo sa umahan komon ra. Ang labing importante nga kasangkapan sa kabayo mao ang busal. Diha sa busal mao ang mga ali sa mata, usa sa matag kilid. Gibutang kini sa paagi nga ang kabayo makakita diretso lamang sa unahan ug dili sa bisan asa nga kilid. Gituyo kini aron ang kabayo dili mahadlok o malinga ug mapatutok ang iyang atensyon diha sa dalan sa iyang tiilan.
Ang pipila kanato naghimo sa atong buhat nga daw adunay mga ali ang atong mga mata. Makita lamang nato ang atong kaugalingong gamay nga pig-ot nga dalan. Wala nato makita ang mas lapad nga panglantaw. Tingali gamay lang ang atong responsibilidad diha sa Simbahan. Maayo nga tumanon kana nga responsibilidad uban sa kakugi. Ug maayo usab nga mahibalo sa unsang paagi kana nga responsibilidad nakatampo ngadto sa kinatibuk-ang programa sa nagtubo nga gingharian sa Dios.
Si Presidente Harold B. Lee kausa miingon …, nagkutlo sa usa ka wala mailhi nga tigsulat, “Pag-aninaw og lagpad nga mga umahan ug pag-ugmad og gagmay nga mga umahan.”
Ang akong interpretasyon niana nga pamahayag mao nga kita kinahanglang makaila sa gilapdon ug giladmon ug gitas-on—nindot ug talagsaon, dako ug malukpanon—sa programa sa Ginoo, ug dayon motrabaho nga makugihon sa pagtuman sa atong responsibilidad sa gi-assign kanato nga bahin niana nga programa.
Ang kada usa kanato adunay gamay nga umahan nga ugmaron. Samtang nagbuhat sa ingon, kita dili gayud mahikalimot sa mas dako nga panglantaw, ang dakong kombinasyon sa balaanong padulngan niini nga buhat. Kini gihatag kanato sa Dios nga atong Amahan sa Kahangturan, ug ang matag usa kanato adunay bahin nga buhaton sa paghimo sa talagsaong resulta niini. Ang atong indibidwal nga kontribusyon tingali gamay ra, apan kini importante. …
… Samtang nagbuhat kamo sa bahin diin kamo gitawag, ayaw gayud kalimti ang tibuok nga harianon ug talagsaong panglantaw sa katuyoan niini, ang dispensasyon sa kahingpitan sa panahon. Buhata sa maanindot nga paagi ang inyong gamayng bahin diha sa kinatibuk-ang resulta, diin ang sumbanan giandam na alang kanato sa Dios sa kalangitan. Ipataas ang bandila diin naglakaw kita ubos niini. Pagmakugihon, pagmatinuoron, pagmahiyason, pagmatinud-anon, aron walay sayop niana nga bandila.
Ang panan-awon niini nga gingharian dili usa ka mabaw nga damgo sa kagabhion nga mahanaw lang sa pagsubang sa adlaw. Kini sa tinud-anay mao ang plano ug buhat sa Dios nga atong Amahan sa Kahangturan. Kining tanan adunay kalabutan sa tanan Niyang mga anak.
Samtang nagkalot sa mga sagebrush niining kasadpang mga walog [sa Utah] aron sa pagbutang sa mga pundasyon alang sa usa ka komunidad, samtang naghimo sa tanang ordinaryo nga mga butang nga gikinahanglan nilang buhaton aron magpabiling buhi ug naglambo, ang atong mga katigulangan [nga pioneer] kanunay nga naghinumdom sa kaanindot sa halangdong kawsa nga ilang giapilan. Kini usa ka buhat nga angay natong buhaton uban sa samang panglantaw nga ilang gihuptan. Kini usa ka buhat nga magpadayon human kita mobiya niini nga kalibutan. Ang Dios motabang kanato sa pagbuhat sa atong labing maayo isip mga sulugoon, gitawag ubos sa Iyang balaang kabubut-on, sa pagpadayon sa unahan ug pagtukod sa gingharian uban sa dili hingpit nga mga kamot, nagkahiusa sa paghimo og usa ka hingpit nga sumbanan.6
4
Kita mahimong sama sa usa ka bandila ngadto sa mga nasud diin ang mga katawhan sa yuta makakuha og kalig-on.
Mga kaigsoonan, karon ang panahon nga mobarug kita nga mas taas, mopunting sa atong mga mata ug mopalapad sa atong mga hunahuna ngadto sa mas maayong pagsabut sa dakong milenyal nga misyon niini nga Ang Simbahan ni Jesukristo sa mga Santos sa Ulahing mga Adlaw. Kini usa ka panahon nga magmalig-on. Kini usa ka panahon sa pagpadayon nga walay pagduha-duha, nasayud og maayo sa kahulugan, sa gilapdon, ug sa kaimportante sa atong misyon. Kini usa ka panahon sa pagbuhat sa matarung dili igsapayan ang mga sangputanan nga mahimong mosunod. Kini usa ka panahon nga makita nga nagsunod sa mga sugo. Kini usa ka panahon sa pagtabang uban sa pagkamabination ug paghigugma niadtong anaa sa kasakit ug niadtong kinsa nahisalaag diha sa kangitngit ug kasakit. Kini usa ka panahon nga mahimong masinabtanon ug maayo, desente ug matinahuron sa usag usa sa tanan natong mga relasyon. Sa laing pagkasulti, mahimong sama kang Kristo.7
Gawas kon ang kalibutan mousab sa dagan sa iyang kasamtangang padulngan (ug daw dili kana mahitabo); ug kon, sa laing bahin, kita mopadayon sa pagsunod sa mga pagtulun-an sa mga propeta, mas magkaanam kita ka talagsaon ug lahi nga mga katawhan nga makita sa mga tawo sa kalibutan. Sama pananglit, samtang ang integridad sa pamilya malumpag ubos sa kalibutanong mga pagpamugos, ang atong posisyon sa kabalaan sa pamilya mahimong mas klaro ug gani labaw pa ka talagsaon, kon kita adunay hugot nga pagtuo sa pagmentinar niana nga posisyon.
Samtang ang nagkamatugtanon nga kinaiya kabahin sa pakighilawas padayon nga nagkaylap, ang doktrina sa Simbahan, nga makanunayong gitudlo sa sobra na sa usa ka siglo ug tunga, mas mag-anam ka talagsaon ug gani katingalahan sa kadaghanan.
Samtang ang pagkonsumo sa alkohol ug pag-abuso sa mga drugas nagkadaghan kada tuig diha sa mga kostumbre sa katilingban, ang atong posisyon, gihan-ay sa Ginoo sa sobra na sa usa ka siglo ug tunga ang milabay, mas mahimong talagsaon sa kalibutan. …
Samtang ang adlaw nga Igpapahulay nagkaanam pagkahimo nga adlaw sa negosyo ug kalingawan, kadtong nagsunod sa lagda sa balaod, nga gisulat pinaagi sa tudlo sa Ginoo didto sa Sinai ug gipalig-on pinaagi sa moderno nga pagpadayag, makita nga mas talagsaon.
Dili kanunay sayon ang magpuyo sa kalibutan ug dili mahimo nga kabahin niini. Dili kita hingpit nga makapuyo nga kita lang o alang sa atong kaugalingon, ni gustohon nato kini. Kinahanglan kitang makigsandurot sa uban. Sa pagbuhat niini, makahimo kita nga magmabination. Makahimo kita nga dili makasilo. Makalikay kita sa bisan unsa nga espiritu o kinaiya sa pagpakamatarung sa kaugalingon. Apan makapadayon kita sa atong mga sumbanan. …
Samtang motuman kita niini ug sa uban pang mga sumbanan nga gitudlo sa Simbahan, daghan sa kalibutan morespeto kanato ug makakaplag og kalig-on sa pagsunod niana nga sila usab nasayud nga matarung.
Ug, sa mga pulong ni Isaias, “Daghang mga katawohan mangadto ug manag-ingon: Umari kamo, ug manungas kita sa bukid sa Ginoo, ngadto sa balay sa Dios ni Jacob; ug kita pagatudloan niya sa iyang mga dalan, ug manlakat kita sa iyang mga alagianan: kay gikan sa Sion mogula ang kasugoan, ug ang pulong sa Ginoo gikan sa Jerusalem.” (Isa. 2:3.)
Kinahanglang dili kita mokompromiso [sa atong mga sumbanan]. Kinahanglang dili gayud kita mokompromiso. Ang kandila nga gidagkutan sa Ginoo niini nga dispensasyon mamahimong usa ka kahayag ngadto sa tibuok kalibutan, ug ang uban nga makakita sa atong maayong mga buhat magiyahan sa paghimaya sa atong Amahan sa Langit ug sundon diha sa ilang kaugalingong mga kinabuhi ang mga ehemplo nga ilang nakita diha sa atoa.
Magsugod diha kaninyo ug kanako, mahimong adunay usa ka tibuok nga mga katawhan kinsa, pinaagi sa atong mga kinabuhi diha sa atong mga panimalay, sa atong mga trabaho, bisan sa atong mga kalingawan, mamahimong sama sa siyudad ibabaw sa bungtod diin ang mga tawo mahimong motan-aw ug makat-on, ug usa ka bandila ngadto sa mga nasud diin ang mga katawhan sa yuta makakuha og kalig-on.8
Kon atong ipakita kini nga Simbahan isip usa ka bandila ngadto sa mga nasud ug usa ka kahayag ngadto sa kalibutan, kinahanglang atong madala sa atong mga kaugalingon ang mas dugang kahayag nga makita diha sa kinabuhi ni Jesukristo sa tagsa-tagsa ug sa atong kaugalingong personal nga mga kahimtang. Sa pagbarug alang sa matarung, kinahanglang dili gayud kita mahadlok sa mga sangputanan. Kinahanglang dili gayud kita mahadlok. Miingon si Pablo kang Timoteo:
“Kay kita wala sa Dios hatagig espiritu sa katalaw; kondili sa espiritu sa gahum, ug sa gugma, ug sa pagpugong sa kaugalingon.
“Busa ayaw ikaulaw ang pagpanghimatuod alang sa atong Ginoo” (2 Timoteo 1:7–8).9
Dili kamo yanong makabaliwala niini nga kawsa, nga mao ang kawsa ni Kristo. Dili kamo yanong makabarug diha sa daplin ug magtan-aw sa pakigsangka tali sa mga pwersa sa maayo ug dautan. …
… Ako moawhag kaninyo sa tanan nakong kapasidad nga motabang diha sa usa ka buluhaton nga lapas pa sa mga kinahanglanon sa atong mga inadlaw-adlaw nga pagpakabuhi; nga, mobarug nga lig-on, gani nga mahimong usa ka lider sa pagsulti mahitungod sa mga kawsa nga naghimo sa atong sibilisasyon nga molambo ug naghatag og kahupayan ug kalinaw sa atong mga kinabuhi. Mamahimo kamong usa ka lider. Kinahanglan gayud kamong mahimong lider, isip miyembro niini nga Simbahan, niadto nga mga kawsa nga gibarugan niini nga Simbahan. Ayaw tugoti ang kahadlok nga mobuntog sa inyong mga paningkamot.10
Wala kitay angay nga kahadlukan. Ang Dios ang naggiya. Siya ang mokontrolar alang sa kaayohan niini nga buhat. Iyang bubuan og mga panalangin kadtong mga nagmasulundon sa Iyang mga kasugoan. Kana mao ang Iyang saad. Walay usa kanato nga magduha-duha sa Iyang abilidad sa pagtuman niana nga saad.
… Ang atong Manluluwas, kinsa mao ang atong Manunubos, ang Halangdon nga Jehova, ang gamhanan nga Mesiyas, nagsaad: “Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (D&P 84:88).
“Busa,” miingon Siya, “ayaw kahadlok, gagmay nga panon; pagbuhat og maayo; tuguti nga ang yuta ug impyerno maghiusa sa pagbatok kaninyo, kay kon kamo gitukod diha sa akong lig-on nga sukaranan, sila dili makabuntog. …
“Paghunahuna ngari kanako sa matag hunahuna; ayaw pagduha-duha, ayaw kahadlok.
“Hunahunaa ang mga samad nga milapos sa akong kilid, ug usab ang mga marka sa mga lansang sa akong mga kamot ug tiil; pagmatinud-anon, paghupot sa akong mga sugo, ug kamo makapanunod sa gingharian sa langit” (D&P 6:34, 36–37).
Nagkahiusa, nagtambayayong, kita mopadayon isip mga sulugoon sa buhi nga Dios, naghimo sa buhat sa Iyang Hinigugmang Anak, atong Agalon, kinsa atong giserbisyohan ug kansang ngalan atong gitinguha sa paghimaya.11
Kinahanglan kitang magbarug nga lig-on. Kinahanglan gayud nga atong pugngan ang kalibutan. Kon ato kining buhaton, ang Makagagahum maoy atong kalig-on ug atong tigpanalipod, atong giya ug atong tigpadayag. Makabaton kita og kahupayan sa pagkasayud nga atong gibuhat ang unsay Iyang gusto nga ipabuhat kanato. Ang uban mahimong dili mouyon kanato, apan ako masaligon nga sila morespeto kanato. Dili kita pasagdan nga mag-inusara. Adunay daghan [kinsa] dili nato kauban sa simbahan apan susama og pagbati kanato. Sila mosuporta kanato. Sila mopaluyo kanato sa atong mga paningkamot.12
Maghimaya kita niining talagsaon nga panahon sa buhat sa Ginoo. Dili kita magmapagarbuhon o maghinambug. Kita magmapasalamaton sa mapainubsanong paagi. Ug kita, ang matag usa, modesisyon diha sa atong kaugalingon nga atong dugangan ang kahayag niining talagsaong buhat sa Labawng Makagagahum, nga kini modan-ag tadlas sa kalibutan isip usa ka banwag sa kalig-on ug kamaayo nga pagatan-awon sa tibuok kalibutan.13
“Kon atong ipakita kini nga Simbahan isip usa ka bandila ngadto sa mga nasud ug usa ka kahayag ngadto sa kalibutan, kinahanglang atong madala sa atong mga kaugalingon ang mas dugang kahayag nga makita diha sa kinabuhi ni Kristo.”
Mga Sugyot alang sa Pagtuon ug Pagtudlo
Mga Pangutana
-
Samtang nagbasa kamo sa seksyon 1, unsay inyong mga gibati samtang inyong gikonsiderar ang pagtubo sa Simbahan gikan sa 1830 hangtud karong adlawa?
-
Ribyuha ang istorya ni Presidente Hinckley kabahin sa unang mga pioneer nga nangabut sa Walog sa Salt Lake (tan-awa sa seksyon 2). Unsay atong makat-unan gikan niini nga istorya? Sa unsang paagi nga kita nakabenepisyo gikan sa mapanagnaon nga panglantaw sa unang mga lider sa Simbahan? Unsa kaha ang gipasabut nga mahimong “usa ka bandila ngadto sa mga nasud”? (Tan-awa sa Isaias 5:26; 11:12.)
-
Sa seksyon 3, si Presidente Hinckley miawhag kanato sa pagtan-aw sa “kinatibuk-ang panglantaw” ug “mas lapad nga panglantaw” sa buhat sa Dios. Nganong kinahanglan man nato nga makita kining kinatibuk-ang panglantaw? Nganong usahay makalimot man kita niini? Sa unsang mga paagi nga ang atong gagmay nga mga paningkamot nakatampo sa paglambo sa gingharian sa Dios?
-
Ribyuha ang mga paagi nga gisulti ni Presidente Hinckley nga ang mga Santos sa Ulahing mga Adlaw nag-anam ka mas “talagsaon ug lahi nga katawhan” (seksyon 4). Unsaon nato pagpalambo og mas dako nga panglantaw ug kaisug sa pagpadayon sa buhat sa Dios? Unsaon nato sa pagpuyo sa kalibutan nga dili mahimong kalibutanon? Sa unsang paagi atong “madala sa atong mga kaugalingon ang mas dugang kahayag nga makita diha sa kinabuhi ni Kristo”? Nganong importante man alang kanato nga mobarug alang sa matarung?
May Kalabutan nga mga Kasulatan
Mateo 5:14–16; 1 Nephi 14:14; D&P 1:1–6; 65:1–6; 88:81; 115:5–6
Tabang sa Pagtudlo
“Siguroha nga dili kamo magtuo nga kamo ang ‘tinuod nga magtutudlo.’ Seryuso kana nga sayop. … Pagbantay nga dili kamo mahimong sagabal. Ang importante nga tahas sa usa ka magtutudlo mao ang pag-andam sa pamaagi aron nga ang mga tawo makabaton og espirituhanong kasinatian uban sa Ginoo” (Gene R. Cook, gikutlo sa Pagtudlo, Walay Labaw Ka Mahinungdanon Nga Tawag 1999, 41).