Kapitulo 20

Pakigdait uban Niadtong Kinsa Dili Parehas Nato og Tinuohan

“Tabangan nato ang kalalakin-an ug kababayen-an nga dunay maayong tinguha, bisan unsa pa ang ilang relihiyusong gituohan ug bisan asa pa sila nagpuyo.”

Gikan sa Kinabuhi ni Gordon B. Hinckley

Namulong atol sa usa ka komperensya sa relihiyusong mga lider niadtong Nobyembre 1994, si Presidente Gordon B. Hinckley miingon:

“Lain-lain kita og mga gituohan nga doktrina. Samtang miila sa atong teyolohiyanhong mga kalainan, siguro komon kanato ang pagkasayud sa mga kadautan ug mga problema sa kalibutan ug sa katilingban nga atong gipuy-an, ug mahitungod sa atong dakong responsibilidad ug oportunidad nga maghiusang mobarug alang niadtong mga kinaiya diha sa publiko ug sa pribado nga kinabuhi nga nagpakita sa hiyas ug moralidad, pagrespeto sa tanang kalalakin-an ug kababayen-an isip mga anak sa Dios, sa panginahanglan sa pagkaikog ug pagtahud sa atong mga relasyon, ug sa pagpreserbar sa pamilya isip ang balaanong gi-orden nga sukaranang unit sa katilingban.

“… Kitang tanan dunay tinguha sa atong kasingkasing nga motabang sa kabus, modasig sa nagmagul-anon, mohatag og kahupayan, paglaum, ug tabang sa tanan nga anaa sa kalisud ug kasakit tungod sa bisan unsang hinungdan.

“Atong giila ang panginahanglan nga buntugon ang mga problema sa katilingban ug ilisan og pagkapositibo ug pagtuo ang pagkanegatibo sa atong panahon. Kinahanglan gayud natong ilhon nga wala kinahanglana ang panimalus o pagpanaway batok sa usag usa. Kinahanglan gayud natong gamiton ang atong impluwensya aron pahilumon ang masuk-anon ug mapanimaslon nga panaglalis.

“… Ang atong kalig-on magagikan sa atong kagawasan sa pagpili. Dunay kalig-on bisan sa atong panaglahi. Apan dunay mas dako nga kalig-on sa hinatag sa Dios nga sugo sa matag usa kanato sa paglihok alang sa pagbayaw ug pagpanalangin sa tanan Niya nga mga anak, sa walay pagsapayan sa ilang kultura o kagikanan o ubang mga kalainan. …

“Hinaut nga panalanginan kita sa Ginoo aron maghiusang magtrabaho sa pagtangtang gikan sa atong kasingkasing ug isalikway gikan sa atong katilingban ang tanang elemento sa kayugot, kamapihigon [bigotry], racism, ug ubang makapabungkag nga mga pulong ug mga lihok. Ang makapasakit nga mga pulong, insulto, madumtanong mga termino sa pag-abuso, malisyusong mga libak, ug ngil-ad ug dautang mga tabi-tabi kinahanglang walay lugar taliwala kanato.

“Hinaut nga ang Dios mopanalangin kanatong tanan og kalinaw nga nagagikan Kaniya. Hinaut nga Siya mopanalangin kanato og mapasalamatong kasingkasing ug kabubut-on nga magpakabuhi uban sa pagrespeto alang sa usag usa, mohiusa sa atong mga paningkamot nga makapanalangin sa mga komunidad nga swerte natong gipuy-an.”¹

Usa ka tuig human makahatag niini nga mensahe, si Presidente Hinckley namulong sa usa ka grupo sa sekyular nga mga lider. Gamay ra kadto nga grupo—mga 30 ka tawo—apan usa kadto ka grupo nga dako kaayo og impluwensya: mga presidente, mga editor-in-chief, mga producer, ug mga reporter nga nagrepresentar sa dagkong mga tinubdan sa balita sa Estados Unidos. Sa usa ka “maayo ug usahay lingaw nga pag-istoryahanay,” mihatag siya og “usa ka overview sa internasyonal nga kahimtang sa Simbahan, mikomentaryo mahitungod sa misyonaryo, humanitarian, ug pang-edukasyon nga mga paninguha niini, ug dayon mitanyag nga motubag sa mga pangutana. … Matinuoron siyang mitubag sa matag pangutana ug walay pagpanagana o bisan gamayng timailhan sa kabakikaw.” Ang mga nanambong mipahayag og kasurprisa sa iyang kadayag, diin siya mitubag nga ang bugtong butang nga dili niya hisgutan mao ang mga detalye sa sagradong mga ordinansa sa templo. “Ang pultahan sa ubang butang bukas,” miingon siya.

Sa usa ka higayon sa sesyon sa pangutana ug tubag, si Mike Wallace, usa ka senior reporter sa pasundayag sa telebisyon nga 60 Minutes, miingon nga ganahan siya nga mobuhat og special report bahin ni Presidente Hinckley. Si Presidente Hinckley mihunong ug dayon mitubag, “Salamat. Sulayan lang nako.”²

Si Presidente Hinckley miangkon sa wala madugay nagpanagana siya nga mainterbyu ni Mike Wallace, nga dunay reputasyon nga usa ka isug nga reporter. Iyang gipasabut nganong miuyon siya nga mainterbyu bisan pa niining pagpanagana:

“Gibati nako nga nagdalit kini og kahigayunan nga makapresentar og pipila ka maayong aspeto sa atong kultura ug mensahe ngadto sa minilyon ka mga tawo. Nakahukom ko nga mas maayong buhaton ang imong pinakamaayo bisan pa sa lisud nga kahimtang kay sa molikay ug walay buhaton.”³

Ang interbyu nga naglakip sa daghang pangutana bahin sa lain-laing mga hilisgutan naglakip sa mosunod:

Mr. Wallace: “Unsa may imong tan-aw sa mga dili Mormon?”

Presidente Hinckley: “Uban sa gugma ug pagtahud. Daghan ko og dili miyembro nga mga higala. Gitahud nako sila. Duna koy dako kaayo nga pagdayeg alang kanila.”

Mr. Wallace: “Bisan sa kamatuoran nga wala pa sila makakita sa kahayag?”

Presidente Hinckley: “Oo. Ngadto ni bisan kinsa nga dili miyembro niini nga Simbahan, moingon ko nga among giila ang tanang hiyas ug maayo nga anaa kaninyo. Dad-a kini ug tan-awon nato kon duna ba mi madugang niini.”⁴

Sa dihang nahuman na ang interbyu, si Presidente Hinckley ug Mike Wallace nahimo nang managhigala. Miingon si Mr. Wallace bahin ni Presidente Hinckley nga usa siya ka “mahigalaon ug mahunahunaon ug desente ug positibo nga lider” kinsa “hingpit nga takus sa hapit kinatibuk-ang pagdayeg nga iyang madawat.”⁵

missionaries serving — Giawhag kita ni Presidente Hinckley nga moapil niadtong dili miyembro sa atong tinuohan “sa maayong mga kawsa sa komunidad.”

Mga Pagtulun-an ni Gordon B. Hinckley

Kon atong mahinumduman nga ang tanang tawo mga anak sa Dios, mas maningkamot kita sa pagdasig ug sa pagtabang niadtong mga kauban nato.

Dili gayud nato kalimtan nga nagpuyo kita sa kalibutan nga hilabihan ang kadaiyahan [diversity]. Ang katawhan sa kalibutan mga anak tanan sa atong Amahan ug anaa sa daghan ug nagkadaiyang mga tinuohan. Kinahanglan gayud natong iawhag ang pagkamainantuson [tolerance] ug pagdayeg ug pagtahud sa usag usa.⁶

Wala kinahanglana bisan asang dapita ang panagbingkil tali sa nagkadaiyang mga grupo sa bisan unsa nga matang. Himoa nga itudlo diha sa mga panimalay sa katawhan nga kitang tanan mga anak sa Dios, ang atong Amahan sa Kahangturan, ug ingon ka sigurado nga dunay pagka-amahan, duna ug kinahanglan gayud nga dunay panag-inigsoonay.⁷

Kon kanunay natong hinumduman ang atong balaanong kabilin, bahin sa pagka-amahan sa Dios ug ang panag-inigsoonay sa tawo isip mga reyalidad, mas mahimo kitang mainantuson [tolerant], mas mabination, mas mapaningkamuton sa pagdasig ug sa pagtabang niadtong kauban nato. Malagmit dili kaayo kita mobuhat sa mga butang nga dili angayan. Kita mga anak sa Dios ug gihigugma nato Siya. Mas angayan kitang mobuhat nianang paagiha.⁸

Kinahanglan kitang magpakabuhi nga dunay pagtahud, pagdayeg, ug pakighigalaay ngadto sa mga tawo nga dili miyembro sa atong tinuohan.

“Kami nag-angkon sa kahigayunan sa pagsimba sa Dios nga Makagagahum sumala sa pagmando sa among kaugalingon nga tanlag, ug nagtugot sa tanan nga mga tawo sa sama nga kahigayunan, sa pagpasimba kanila sa bisan unsa nga paagi, asa, o unsa ang ilang buot simbahon” (Mga Artikulo sa Hugot nga Pagtuo 1:11).

Pagkaimportante gayud niana—nga samtang nagtuo kita sa pagsimba sa Dios sumala sa atong doktrina, dili kita arogante o nagpakatarung sa kaugalingon o mapagarbuhon apan mipadangat kita ngadto sa uban sa pribilehiyo sa pagsimba sumala sa ilang mga tinguha. Daghan sa kagubot sa kalibutan nagagikan sa panagbingkil tali sa mga relihiyon. Malipayon ko nga makasulti nga makahimo ko nga maglingkod uban sa akong mga higala nga Katoliko ug makig-istorya kanila, nga makahimo ko nga maglingkod uban sa akong mga higala nga Protestante ug makig-istorya kanila. Mobarug ko aron modepensa kanila, sama sa gibuhat niini nga Simbahan ug padayon nga buhaton, sa pagdepensa kanila niining kalibutana.⁹

Naghangyo ako sa atong mga katawhan sa tanang dapit sa pagpuyo uban sa pagtahud ug pagdayeg ngadto sa dili parehas nato og tinuohan. Adunay labihan ka dako nga panginahanglan alang sa maayong kinaiya ug komon nga pagtahud ngadto sa managlahi og pagtuo ug mga pilosopiya. Kinahanglan nga wala kitay pinalabi sa bisan unsa nga doktrina sa kaliwatan nga nagdominar. Nagpuyo kita sa nagkasagul-sagol nga katawhan sa kalibutan. Kita makahimo ug kinahanglang magmatinahuron niadtong adunay mga pagtulun-an nga tingali dili nato kauyunan. Kinahanglan nga andam kita sa pagpanalipod sa katungod sa uban kinsa tingali mahimong biktima sa pangdaug-daug.

Akong hatagan og gibug-aton kining makahuluganong mga pulong ni Joseph Smith nga gipamulong niadtong 1843:

“Kon kini gikapakita nga ako andam nga mamatay alang sa usa ka ‘Mormon,’ ako prangka nga mopahayag sa atubangan sa Langit nga ako ingon ka andam nga mamatay aron pagdepensa sa mga katungod sa Presbyterian, sa Baptist, o sa maayong tawo bisan unsa nga denominasyon; tungod sa samang baruganan nga motamak sa mga katungod sa mga Santos sa Ulahing mga Adlaw nga motamak sa mga katungod sa mga Romano Katoliko, o bisan unsa nga relihiyosong grupo” (History of the Church, 5:498).¹⁰

Kinahanglang dili gayud kita makig-uban sa usa lamang ka grupo. Kinahanglang dili gayud kita magbaton og kinaiya nga mas labaw pa kay sa uban. Kinahanglang dili gayud kita magpakaaron-ingnon nga matarung. Kinahanglan gayud kita nga magmabination ug maabi-abihon ug mahigalaon. Mahimo natong mapabilin ang atong pagtuo. Mahimo natong mabuhat ang atong gituohan. Mahimo kitang magmaya sa atong pamaagi sa pagsimba nga dili makapasilo sa uban. Gamiton ko kining higayuna sa pagpangamuyo alang sa diwa sa pagkamainantuson [tolerance] ug pagkamakisilinganon [neighborliness], sa pakighigalaay ug gugma ngadto sa lain og mga tinuohan.¹¹

Kinahanglan gayud kita nga dili makiglalis samtang maghisgot kita sa mga kalainan sa doktrina. Walay luna alang sa kaligutgot [acrimony]. Apan dili gayud nato mahimong itugyan o ikompromiso kana nga kahibalo nga miabut ngari kanato pinaagi sa pinadayag ug sa direkta nga pagtugyan sa mga yawe ug awtoridad ubos sa mga kamot niadtong naghupot niini sa karaang panahon. Dili gayud nato kalimtan nga kini ang pagpahiuli nga gipasiugdahan sa Manluluwas sa kalibutan. …

Mahimo kitang motahud sa ubang mga relihiyon, ug kinahanglan gayud nato kining buhaton. Kinahanglan gayud nga ilhon nato ang dakong kaayohan nga ilang nahimo. Kinahanglan gayud natong tudloan ang atong mga anak nga magmainantuson ug magmahigalaon ngadto niadtong dili parehas nato og tinuohan.¹²

Wala kita magtinguha nga modaut sa laing mga simbahan. Wala kita magtinguha nga mopasakit sa laing mga simbahan. Dili kita makiglalis sa laing mga simbahan. Dili kita makigdebate sa laing mga simbahan. Moingon kita ngadto sa lain og mga tinuohan o walay tinuohan, “Dad-a ninyo ang maong kamatuoran nga naa ninyo ug atong tan-awon kon duna ba kami ikadugang niana.”¹³

Bisan dili mokompromiso sa atong doktrina, makahimo kita sa pakigtrabaho sa uban sa maayong mga kawsa.

Makahimo kita ug makatrabaho uban niadtong lain og mga relihiyon sa nagkadaiyang mga buluhaton diha sa walay katapusang pakigbatok sa mga kadautan sa katilingban nga naghulga sa gihambin nga mga hiyas nga importante kaayo kanatong tanan. Kining mga tawhana dili parehas nato og tinuohan, apan sila atong mga higala, mga silingan, ug mga kauban sa trabaho sa nagkadaiyang mga kawsa. Malipay kita nga mapakigbahin ang atong kalig-on ngadto sa ilang mga paningkamot.

Apan niining tanan walay doktrinal nga gikompromiso. Kinahanglang wala ug wala gayud sa atong bahin. Apan dunay matang sa pakigdait samtang nagtinabangay kita.¹⁴

Dili nato kalimtan nga nagtuo kita sa pagkamanggiluloy-on [benevolent] ug sa pagbuhat og maayo sa tanang katawhan. Nakumbinsir ko nga makatudlo kita sa atong mga anak sa epektibong paagi nga dili kita kinahanglang mahadlok nga mawala ang ilang pagtuo samtang nagmahigalaon ug nagmanggihunahunaon niadtong wala motuo sa doktrina niining Simbahana. … Moapil kita sa maayong mga kawsa sa komunidad. Mahimong dunay mga sitwasyon diin, uban sa seryusong moral nga mga isyu nga nalambigit, dili kita mahimong monunot bahin sa mga butang nga dunay kalabutan sa baruganan. Apan sa maong mga kahimtang kita mahimong mosupak nga dili masinupakon. Mahimo natong ilhon ang kasinsero niadtong kansang mga posisyon dili nato madawat. Mahimo kitang maghisgot og mga baruganan imbis nga mga personalidad.

Niadtong mga kawsa nga nakapalambo sa palibut sa komunidad, ug nga gidesinyo alang sa pagpanalangin sa tanang lumulupyo niini, molihok kita ug magmatinabangon. …

… Tudloi kadtong kinsa kamo responsable bahin sa kaimportante sa maayong mga kinaiya sa sibiko. Awhaga sila nga moapil, maghinumdom diha sa mga deliberasyon sa publiko nga ang hilum nga lohikal nga pangatarungan mas makapadani kay sa saba, nagsiyagit nga tingog sa pagprotesta. Sa pagdawat sa maong mga responsibilidad ang atong katawhan makapanalangin sa ilang mga komunidad, sa ilang mga pamilya, ug sa Simbahan.¹⁵

women hugging — “Ang atong kamabination tingali mao ang labing makapadani nga argumento alang nianang atong gituohan.”

Kinahanglan nga dili kita motugyan ngadto sa mga pwersa sa dautan. Makahimo kita ug kinahanglan gayud nga mopabilin sa mga sumbanan sa unsay gibarugan niini nga Simbahan sukad sa pagka-organisar niini. Dunay mas maayo pa nga paagi kay sa paagi sa kalibutan. Kon kini nagpasabut nga mobarug nga mag-inusara, kinahanglan gayud nato kining buhaton.

Apan dili kita mag-inusara. Masaligon ko nga dunay minilyon ka mga tawo sa tibuok kalibutan nga nagbangutan sa kadautan nga ilang nakita sa ilang palibut. Ganahan sila sa mahiyason, sa maayo, ug sa makapadasig. Mopahayag usab sila sa ilang mga tingog ug mohatag sa ilang kalig-on ngadto sa pagpreserbar niadtong mga hiyas nga takus nga ipabilin ug ugmaron.¹⁶

Mag-ampo kita alang sa mga pwersa sa kaayohan. Tabangan nato ang kalalakin-an ug kababayen-an nga dunay maayong tinguha, bisan unsa pa ang ilang relihiyusong gituohan ug bisan asa pa sila nagpuyo. Lig-on kitang mobarug batok sa dautan, dinhi ug sa laing dapit. … Mahimo kita nga impluwensya alang sa kaayohan niining kalibutana, matag usa kanato.¹⁷

Kon tagdon nato ang uban pinaagi sa gugma, pagtahud, ug kamabination, atong gipakita nga tinuod kita nga mga disipulo ni Jesukristo.

Sa atong pagbuhat aron matuman ang atong talagsaon nga misyon, nagtrabaho kita ubos sa mando nga gihatag sa nabanhaw nga Ginoo ngari kanato, kinsa namulong niining kaulahian ug katapusan nga dispensasyon. Kini ang Iyang talagsaon ug kahibulongan nga kawsa. Nagpamatuod kita ug nagsaksi bahin Kaniya. Apan dili kinahanglan nga ato kining buhaton uban sa kaarogante o pagpakaaron-ingnon nga matarung.

Sama sa gipahayag ni Pedro, kita “usa ka kaliwatan nga pinili, ang kahugpungan sa mga harianong sacerdote, ang nasud nga balaan, ang katawhan nga iyang kaugalingon sa Dios.” Ngano man? Aron nga kita “magamantala sa kahibulongang mga buhat niya nga nagtawag [kanato] gikan sa kangitngit ngadto sa iyang katingalahang kahayag” (1 Ped. 2:9). …

… Magmahimo kitang tinuod nga mga disipulo ni Kristo, magtuman sa Bulawanong Lagda, magbuhat ngadto sa uban kon unsay gusto nato nga buhaton nila ngari kanato. Atong lig-unon ang atong kaugalingong pagtuo ug nianang sa atong mga anak samtang magmatinabangon niadtong dili parehas nato og tinuohan. Ang gugma ug pagtahud mobuntog sa matag elemento sa kaligutgot [animosity]. Ang atong kamabination tingali mao ang labing makapadani nga argumento alang nianang atong gituohan.¹⁸

Gusto kong mosugyot nga palambuon nato ang usa ka matinabangon nga kinaiya aron motabang niadtong dili nato kauban sa Simbahan, sa pagdasig kanila, sa paggiya kanila sa matinabangon ug sa mabinationg paagi paingon sa mga panag-uban nga makapakita kanila sa talagsaong mga programa sa Simbahan.

Makahunahuna ko sa balak ni Edwin Markham:

Mihimo siya og lingin nga kanako mipagula—
Irihis, rebelde, butang nga angayang ibaliwala.
Apan ang Gugma ug Ako dunay pagbati nga modaug:
Mihimo kami og lingin nga kaniya mipasulod!19

Wala gayud kinahanglana nga manghambog kita mahitungod niini o magmapahitas-on sa bisan unsang paagi. Ang ingon niini nga mga kinaiya sukwahi sa Espiritu ni Kristo kinsa atong gipaningkamutang masunod. Kana nga Espiritu makita diha sa mga kasingkasing ug sa kalag, diha sa mahilum ug dili hinambog nga paagi sa atong mga kinabuhi.

Kitang tanan nakakita niadtong mga tawo nga kanunay natong gustong sundugon kay sila nakaugmad og paagi nga, bisan pa og dili lang maghisgot niini, kini mipakita sa katahum sa ebanghelyo nga ilang nagamit sa ilang kinaiya.

Mahimo kita nga mosulti og mas hinay. Mahimo kitang mosukli og kamaayo ngadto sa mohimog dautan kanato. Mahimo kitang mopahiyom sa higayon nga mas dali ang masuko. Makabansay kita og pagpugong ug pagdisplina sa kaugalingon ug dili motagad sa mga insulto ug pagbugal-bugal nga ipahamtang batok kanato.²⁰

Nakasabut ba gayud kita, nakasabut ba kita sa pagkaimportante nianang ania kanato? Mao kini ang katingbanan sa mga henerasyon sa tawo, ang panapos nga kapitulo sa tibuok talan-awon sa tawhanong kasinatian.

Pero kini dili maghimo nato nga hawod. Hinoon, makapahimo kini nato nga mapainubsanon. Naghatag kini kanato sa dili mapasaylo nga responsibilidad sa pagduol sa uban sa pagpakabana alang sa uban pinaagi sa Espiritu sa Ginoo, kinsa mitudlo, “Higugmaa ang imong silingan sama sa imong kaugalingon” (Mateo 19:19). Kinahanglan nga isalikway nato ang pagpakaaron ingnon nga matarung ug mobarug ibabaw sa walay hinungdan nga pagpasulabi sa kaugalingong interes. …

Kita niini nga henerasyon mao ang resulta sa tanan nga nag-una kaniadto. Dili igo nga magpaila nga miyembro lang sa Simbahan. Usa ka ligdong nga obligasyon ania kanato. Atubangon nato kini ug maningkamot alang niini.

Kinahanglan magpuyo kita ingon nga tinuod nga mga sumusunod ni Kristo, adunay gugmang putli ngadto sa tanan, mobalos og kaayo ngadto sa dautan, magtudlo pinaagi sa ehemplo sa mga pamaagi sa Ginoo, ug magtuman sa dakong pagserbisyo nga Iyang gilatid alang kanato.²¹

Gikan sa pagpahinungod nga pag-ampo alang sa Conference Center sa Siyudad sa Salt Lake, Utah: Hinaut nga kami nga anaa sa Imong Simbahan mahimong maabi-abihon ug matinabangon. Hinaut nga mapabilin namo ang mga sumbanan ug mga pamaagi diin kami nailhan ug ihatag sa uban ang kahigayunan sa pagpasimba ni kinsa, “asa, o unsa ang ilang buot simbahon” [Mga Artikulo sa Hugot nga Pagtuo 1:11]. Panalangini kami nga makatabang sa uban isip maayong mga silingan ug mahimong matinabangon sa uban. Hinaut nga modasig kita sa mga kamot ug molig-on sa huyang nga mga tuhod ni bisan kinsa nga anaa sa kalisud [tan-awa sa D&P 81:5]. Hinaut nga magpuyo kitang tanan sa kalinaw uban sa pagdayeg ug pagtahud sa usag usa.²²

Mga Sugyot alang sa Pagtuon ug Pagtudlo

Mga Pangutana

Sa atong mga relasyon sa uban, nganong makatabang man nga hinumduman nga kitang tanan mga anak sa Dios? (Tan-awa sa seksyon 1.) Unsaon nato sa pag-ugmad og mas dako nga pagdayeg ug pagtahud alang sa uban? Sa unsang paagi nga ang mga hamtong makatudlo sa mga bata sa paghigugma ug pagtahud sa uban?
Ribyuha ang tambag ni Presidente Hinckley mahitungod sa atong mga relasyon sa mga tawo nga dili parehas nato og tinuohan (tan-awa sa seksyon 2). Unsaon nato sa pag-ila kon nagpakita kita og kaarogante o pagpakaaron-ingnon nga matarung diha niini nga mga relasyon? Unsaon man nato sa pagpakita og dugang pakighigala ug gugma niadtong lahi og mga gituohan?
Nganong importante man nga ang mga miyembro sa Simbahan makigtinabangay sa ubang mga tawo diha sa maayo nga mga kawsa? (Tan-awa sa seksyon 3.) Unsa ang pipila ka mga ehemplo sa maong mga paningkamot? Unsaon man nato nga mahimong mas dakong impluwensya alang sa atong komunidad?
Unsa ang atong makat-unan bahin sa pagkadisipulo gikan sa mga pagtulun-an ni Presidente Hinckley diha sa seksyon 4? Sa unsang paagi nga inyong nakita nga ang gugma ug pagtahud nakabuntog sa mga pagbati sa kaligutgot? Nganong ang atong kinaiya ngadto sa uban mao “ang labing makapadani nga argumento alang nianang atong gituohan”? Hunahunaa ang pihong mga paagi nga makatabang ka sa uban.

May Kalabutan nga mga Kasulatan

Mateo 7:12; Lucas 9:49–50; Juan 13:34–35; 1 Juan 4:7–8; D&P 1:30; 123:12–14; Mga Artikulo sa Hugot nga Pagtuo 1:13

Tabang sa Pagtuon

“Samtang imong mabati ang kalipay nga nagagikan sa pagsabut sa ebanghelyo, gusto ka nga mogamit sa unsay imong nakat-unan. Paningkamot sa pagpuyo nga nahisubay sa imong nasabtan. Ang pagbuhat sa ingon molig-on sa imong pagtuo, kahibalo, ug pagpamatuod” (Isangyaw ang Akong Ebanghelyo [2004], 21).