Kapitulo 21

Ang Milagro sa Ulahing mga Adlaw sa Misyonaryo nga Buhat

“Nagdapit ako kaninyo nga mahimong dakong panon sa katawhan nga may kadasig alang niini nga buhat ug naghingapin nga tinguha sa pagtabang sa mga misyonaryo sa hilabihan kadako nga responsibilidad nga ilang dad-on ang ebanghelyo ngadto sa matag nasud, kaliwatan, pinulongan ug katawhan.”

Gikan sa Kinabuhi ni Gordon B. Hinckley

Isip batan-ong lalaki, si Gordon B. Hinckley usa ka matinud-anong tighupot sa priesthood, apan wala siya magdahum nga tawagon sa pagserbisyo og full-time nga misyon. “Panahon kadto sa labing grabe nga ekonomikanhong kalisud sa kasaysayan sa kalibutan,” mipasabut siya wala madugay. “Ang walay trabaho sa [Siyudad sa Salt Lake] anaa sa mga 35 porsyento, ug kadaghanan sa walay trabaho mga bana ug mga amahan, tungod kay pipila lang ka mga babaye ang nagtrabaho sa pwersa sa mga mamumuo. Diyutay ra kaayo nga mga misyonaryo ang miadto sa misyon nianang panahona. … Nakadawat na ko sa akong bachelor’s degree ug nagplano og paagi nga makatambong sa graduate school. Dayon miabut ang bishop nga nagdala og alang kanako daw makapakurat nga sugyot. Naghisgot siya og kabahin sa misyon.”¹

Gidawat ni Gordon ang “makapakurat nga sugyot,” ug niadtong 1933 gitawag siya sa pagserbisyo sa England—usa sa 525 lamang ka mga misyonaryo nga gitawag nianang tuiga.² Daghan siya og gisagubang nga mga pagsulay panahon sa iyang misyon, apan ang iyang pagserbisyo naghatag og lig-ong pundasyon sa iyang hugot nga pagtuo:

“Ang trabaho sa misyon dili sayon. Lisud kadto ug makapawala sa kadasig. Apan pagkanindot niadto nga kasinatian. Naghunahuna karon kabahin sa nangagi, nakaamgo ko nga tingali usa ako ka hakog nga batan-on sa dihang miabut ko sa Britain. Nahimo kining nindot nga panalangin nga ihiklin ang akong kaugalingong hinakog nga mga interes alang sa mas mahinungdanong mga interes sa buhat sa Ginoo. …

“Hilabihan ako ka mapasalamaton sa kasinatian niana nga misyon. Natandog nako ang mga kinabuhi sa pipila kinsa, paglabay sa mga katuigan, mipahayag og pasalamat. Importante gayud kadto. Apan wala kaayo ko nabalaka sa gidaghanon sa akong mga nabunyagan o sa nabunyagan sa ubang mga misyonaryo. Ang akong katagbawan naggikan sa kasiguroan nga akong gibuhat ang unsay gusto sa Ginoo nga akong buhaton ug nga ako usa ka instrumento sa Iyang mga kamot alang sa katumanan sa Iyang mga katuyoan. Atol niana nga kasinatian, natisok sa akong kinahiladman ang usa ka lig-ong pagtuo ug kahibalo nga kini mao gayud ang tinuod ug buhi nga buhat sa Dios, nga gipahiuli pinaagi sa usa ka propeta alang sa pagpanalangin sa tanan nga modawat niini ug mosunod sa mga baruganan niini.”³

Ang misyon ni Presidente Hinckley mipahigayon sa usa ka kinabuhi nga gipahinungod ngadto sa buhat sa Ginoo. Sa panahon sa iyang pagserbisyo isip Presidente sa Simbahan, mibiyahe siya og sobra sa usa ka milyon ka milya (1.6 ka milyon ka kilometro) ngadto sa kapin sa 70 ka mga nasud aron sa pagpamatuod kabahin ni Jesukristo ug sa Iyang gipahiuli nga ebanghelyo.⁴

Si Presidente Hinckley kanunay nga nanawagan sa mga miyembro sa Simbahan nga moapil kaniya sa pagpakigbahin sa ebanghelyo. Sobra sa 400,000 ka full-time nga mga misyonaryo ang mitubag niana nga panawagan atol sa iyang panahon isip Presidente. Gitabangan sa ilang pagserbisyo ug sa buhat sa mga miyembro nga misyonaryo, sobra sa 3,500,000 ka mga kinabig ang nabunyagan nianang panahona.⁵

Kanunayng malaumon, si Presidente Hinckley mipakigbahin og usa ka halapad nga panglantaw kon sa unsang paagi ang buhat sa Ginoo mopadayon sa paglambo:

“Kon kita mopadayon, nga dili gayud malimot sa atong tumong, dili mosulti og bati ni bisan kinsa, mosunod sa mahinungdanong mga baruganan nga atong nasayran nga tinuod, kini nga buhat mopadayon diha sa kahalangdon ug gahum sa pagpuno sa yuta. Ang mga pultahan nga sirado karon sa pagsangyaw sa ebanghelyo maabli.”⁶

“Dako ang among paglaum sa umaabut ug ang pagtuo hugot. Kita nasayud nga gamay pa kaayo kita og nakita sa unsay mahitabo sa umaabot nga mga katuigan. … Ang atong palas-anon sa pagpadayon bug-at kaayo. Apan ang atong kahigayunan mahimayaon.”⁷

mga misyonaryo nga nagtudlo og pamilya — “Mopaila kita ngadto sa kalibutan pinaagi sa atong misyonaryo nga pagserbisyo, magtudlo sa tanan nga maminaw mahitungod sa pagpahiuli sa ebanghelyo.”

Mga Pagtulun-an ni Gordon B. Hinckley

Kinahanglan nga mopaila kita ngadto sa kalibutan pinaagi sa misyonaryo nga pagserbisyo, magtudlo sa tanan nga maminaw.

Aduna kitay balaang sugo sa pagdala sa ebanghelyo ngadto sa tanang kanasuran, kaliwatan, pinulongan, ug katawhan. Aduna kitay katungdanan sa pagtudlo ug pagbunyag sa pangalan ni Ginoong Jesukristo. Miingon ang nabanhaw nga Manluluwas, “Panglakaw kamo sa tibuok kalibutan, ug iwali ninyo ang maayong balita ngadto sa tibuok nga kabuhatan” [Marcos 16:15]. Apil kita sa usa ka mahinungdanon ug makapahinam nga krusada alang sa kamatuoran ug kamaayo.⁸

Sa wala pa maorganisar ang Simbahan, dihay misyonaryo nga buhat. Nagpadayon kini sukad niadto, bisan pa sa kalisdanan sa daghang panahon nga naagian sa atong katawhan. Kinahanglang kita, ang matag usa, modeterminar sa sulod sa atong mga kaugalingon nga mobangon ngadto sa usa ka bag-ong oportunidad, usa ka pagbati og responsibilidad, usa ka pag-abaga sa obligasyon nga motabang sa atong Amahan sa Langit sa Iyang mahimayaong buhat sa pagpahinabo sa pagka-imortal ug kinabuhing dayon sa Iyang mga anak sa tibuok yuta.⁹

Kinahanglang kita isip mga Santos sa Ulahing mga Adlaw mopaila ngadto sa uban nga dili sama nato og tinuohan. Kinahanglang dili gayud kita molihok diha sa espiritu sa pagkaarogante o sa kinaiya nga mas maayo kay sa ubang tawo. Hinoon, hinaut mopakita kita og gugma ug pagtahud ug pagkamatinabangon ngadto kanila. Nasaypan kaayo kita nila sa pagsabut, ug nabalaka ko nga kadaghanan niini tungod sa atong kaugalingong binuhatan. Mahimo kitang mas masinabtanon, mas masilinganon, mas mahigalaon, mas mahimong usa ka ehemplo kay sa atong nahimo sa nangagi. Atong tudloan ang atong mga anak sa pagtagad sa ubang mga tawo uban sa pakighigala, pagtahud, gugma, ug pagdayeg. Mohatag kini og mas maayong resulta kay sa usa ka kinaiya sa pagkamagarbuhon. …

Mopaila kita ngadto sa kalibutan pinaagi sa atong misyonaryo nga pagserbisyo, magtudlo sa tanan kinsa maminaw mahitungod sa pagpahiuli sa ebanghelyo, mamulong nga walay kahadlok apan usab dili magpakaaron-ingnon nga tarung, sa Unang Panan-awon, magpamatuod sa Basahon ni Mormon ug sa pagpahiuli sa priesthood. Akong mga kaigsoonan, mangluhod kita ug mag-ampo alang sa oportunidad sa pagdala sa uban ngadto sa hingpit nga kalipay sa ebanghelyo.¹⁰

Usa ka talagsaon ug maanindot nga butang nga liboan ang natandog sa milagro sa Espiritu Santo, nga sila mituo ug midawat ug nahimong mga miyembro. Sila nabunyagan. Ang ilang mga kinabuhi naimpluwensyahan nga mahimong mas maayo hangtud sa kahangturan. Ang mga milagro mahitabo. Usa ka liso sa hugot nga pagtuo natisok sa ilang mga kasingkasing. Nagkadako kini samtang sila nagkat-on. Ug sila modawat sa baruganan ngadto sa laing baruganan, hangtud nga maanaa nila ang matag usa sa talagsaong mga panalangin nga moabut ngadto niadtong naglakaw uban sa hugot nga pagtuo dinhi niini nga, Ang Simbahan ni Jesukristo sa mga Santos sa Ulahing mga Adlaw.¹¹

Kinahanglang motabang kita sa full-time nga mga misyonaryo sa pagdala sa uban ngadto sa kasayuran sa kamatuoran.

Nakahimamat ko og usa ka babaye sa South America kinsa bag-ohay lang nga nagpamiyembro sa Simbahan. Nadasig og maayo nianang dakong gugma alang nianang bag-o lang niyang nakaplagan, madasigon siyang nanugid ngadto sa uban. Sulod lamang sa pito ka bulan sukad sa iyang bunyag, siya mi-refer og tulo ka gatus ka mga kaila ngadto sa mga misyonaryo aron ilang mapasabut ang ebanghelyo ngadto kanila. Sa usa ka higayon, saysenta ka mga tawo ang nagpamiyembro sa Simbahan. Mas daghan pa siguro ang nagpamiyembro. Sa São Paulo, Brazil, akong nahimamat ang batan-ong misyonaryo kinsa unang mitudlo kaniya sa ebanghelyo. Siya usab usa ka kinabig, nagmisyon aron sa pagrepresentar sa Simbahan uban sa dako-dako nga pinansyal nga sakripisyo. Ang babaye nga akong gihisgutan usa sa kwarentay tres nga iyang gitabangan nga mamiyembro sa Simbahan hangtud nianang puntoha. Kining batan-ong lalaki sa Brazil mipalapad sa iyang kaugalingon og sobra sa usa ka gatus ka pilo—kwarentay tres ka mga kinabig sa iyang kaugalingon ug saysenta pinaagi sa usa sa iyang mga nakabig, og daghan pang moabut gikan sa uban niyang mga kinabig.¹²

Daghan kaayo nato ang nagtuo nga ang misyonaryo nga buhat mao lang ang pag-tracting. Ang tanan kinsa sinati niini nga buhat nasayud nga adunay mas maayong paagi. Kana nga paagi mao ang pinaagi sa mga miyembro sa Simbahan. Matag higayon nga adunay miyembro nga mopaila og usa ka investigator, anaa na dayon sila aron sa pagsuporta nianang tawhana. Ang miyembro mopamatuod sa kamatuoran sa buhat. Matinguhaon siya sa kalipay sa iyang higala nga investigator. Maghinam-hinam siya samtang ang iyang higala mouswag diha sa pagkat-on sa ebanghelyo.

Ang full-time nga mga misyonaryo mahimong maoy aktwal nga nagtudlo, apan ang miyembro, kon posible, mosuporta niana nga pagtudlo pinaagi sa pagtanyag sa iyang panimalay aron mapadayon kining misyonaryo nga pagserbisyo. Mohatag siya og sinserong pagpamatuod sa kabalaan sa buhat. Anaa siya aron sa pagtubag sa mga pangutana kon wala ang mga misyonaryo. Mahimo siyang higala ngadto sa kinabig nga naghimo og dako ug kasagaran lisud nga kausaban.

Ang ebanghelyo dili angay nga ikaulaw. Kini angay nga ipasigarbo. “Busa ayaw ikaulaw ang pagpanghimatuod alang sa atong Ginoo,” misulat si Pablo ngadto ni Timoteo (2 Tim. 1:8). Ang mga oportunidad alang sa pagpakigbahin sa ebanghelyo anaa bisan asa. …

women talking — “Ang mga oportunidad alang sa pagpakigbahin sa ebanghelyo anaa bisan asa.”

Ang proseso sa pagdala og bag-ong mga tawo ngadto sa Simbahan dili lamang responsibilidad sa mga misyonaryo. Sila labing magmalampuson kon ang mga miyembro maoy tinubdan diin diha makaplagan ang bag-ong mga investigator. …

Ipaugmad diha sa kasingkasing sa matag miyembro ang pagkaamgo sa iyang kaugalingong potensyal sa pagdala sa uban ngadto sa kahibalo sa kamatuoran. Ipabuhat kini niya. Paampoa siya uban sa dakong tinguha mahitungod niini. …

… Mga kaigsoonan, mahimo natong tugotan ang mga misyonaryo nga mao lamang ang mobuhat niini, o makatabang kita kanila. Kon buhaton nila kini nga sila ra, manuktok sila sa mga pultahan kada adlaw ug dyutay ra ang maani. O isip mga miyembro makatabang kita nila sa pagpangita ug pagtudlo sa mga investigator. …

Ipalambo diha sa matag stake ang kahibalo sa oportunidad sa pagpangita niadtong maminaw sa mensahe sa ebanghelyo. Niini nga proseso dili kita angay nga makapasilo. Dili kita angay nga mag-arogante. Ang labing epektibo nga pamphlet nga atong madala mao ang kamaayo sa atong mga kinabuhi ug ehemplo. Ug samtang kita moapil niini nga pagserbisyo, molambo ang atong kinabuhi, kay magmabinantayon kita sa pagtan-aw nga dili kita mobuhat o mosulti og bisan unsa nga mahimong makapugong sa pag-uswag niadtong atong gipaningkamutan nga madala ngadto sa kamatuoran. …

Kinahanglang adunay dugang nga kadasig sa tanang ang-ang sa Simbahan. Himoa kini nga hilisgutan [kabahin sa misyonaryo nga buhat] nga mahisgutan sa sakrament miting matag karon ug unya. Himoa kini nga mahisgutan diha sa priesthood ug Relief Society sa ilang sinemana nga mga miting. Himoa nga ang Young Men ug Young Women maghisgot ug magplano og mga paagi sa pagtabang niining labing importanteng buluhaton. Himoa nga bisan ang mga bata sa Primary maghunahuna og mga paagi sa pagtabang. Daghang mga ginikanan ang nahimong mga miyembro sa Simbahan tungod sa usa ka bata nga gidapit ngadto sa Primary. …

Mga kaigsoonan, kamong tanan nga anaa sa mga ward ug mga stake ug sa mga district ug mga branch, nagdapit ako kaninyo nga mahimong dakong panon sa katawhan nga may kadasig alang niini nga buhat ug naghingapin nga tinguha sa pagtabang sa mga misyonaryo sa hilabihan kadako nga responsibilidad nga ilang dad-on ang ebanghelyo ngadto sa matag nasud, kaliwatan, pinulongan ug katawhan.” “Ang umahan puti ug andam na sa pag-ani” (D&P 4:4). Ang Ginoo pabalik-balik nga mideklarar niini. Dili ba kita mosalig sa Iyang gisulti?¹³

Sa ngalan sa mga misyonaryo … ako buot mohangyo sa mga Santos sa paghimo sa tanan ninyong mahimo sa paghatag og mga referral [sa mga tawo] nga mahimo nilang katudloan. Magmalipayon kamo kon kamo mobuhat sa ingon. Ang tanan nga inyong makita nga moanha sa Simbahan tungod sa inyong paningkamot makahatag og kalipay sa inyong mga kinabuhi. Ako mohimo niana isip usa ka saad nganha sa matag usa kaninyo.¹⁴

Ang full-time nga misyonaryo nga buhat makahatag og mahangturong kalipay niadtong moserbisyo.

Kinahanglang atong patas-an ang sumbanan sa katakus ug kwalipikasyon niadtong moadto sa kalibutan isip mga sinugo ni Ginoong Jesukristo.¹⁵

Ang kalibutan karon nagkinahanglan sa gahum sa lunsay nga pagpamatuod. Nagkinahanglan kini sa ebanghelyo ni Jesukristo, ug aron ang kalibutan makadungog niana nga ebanghelyo, kinahanglan gayud nga adunay mga sinugo sa pagtudlo niini.

Mohangyo kami nga ang mga ginikanan sayo nga mosugod sa pagbansay sa ilang mga anak [alang sa misyonaryo nga pagserbisyo]. Kon adunay pag-ampo sa pamilya, kon adunay mga family home evening, kon adunay pagbasa sa kasulatan, kon ang amahan ug inahan aktibo sa Simbahan ug madasigong mamulong kabahin sa Simbahan ug sa ebanghelyo, ang mga anak sa ingon nga mga panimalay mahimong mapuno sa natural nga paagi sa tinguha sa pagtudlo sa ebanghelyo ngadto sa uban. Kasagaran adunay tradisyon sa misyonaryo nga buhat sa ingon nga mga panimalay. Ang mga savings account giandam na samtang gagmay pa ang mga anak. Ang mga batang lalaki magdako nga adunay natural nga kahinam nga tawagon sila sa pagserbisyo isip misyonaryo alang sa Simbahan. Ang misyon mahimong importante nga bahin sa plano sa kinabuhi sa batang lalaki sama sa edukasyon.¹⁶

Ang misyonaryo nga buhat sa tinud-anay usa ka responsibilidad sa priesthood. Tungod niini, ang atong batan-ong mga lalaki kinahanglan gayud nga modala sa dakong palas-anon. Kini mao ang ilang responsibilidad ug ilang obligasyon.¹⁷

Batan-ong [mga lalaki], nanghinaut ko nga kamong tanan nangandam alang sa misyonaryo nga pagserbisyo. Dili ako makasaad kaninyo og kalingawan. Dili ako makasaad kaninyo og kasayon ug kakomportable. Dili ako makasaad kaninyo og kagawasan gikan sa pagkawalay kadasig, gikan sa kahadlok, gikan sa hingpit nga kaguol usahay. Apan makasaad ako kaninyo nga kamo molambo sa paagi nga wala pa gayud kamo molambo sa susamang gidugayon sa panahon sa tibuok ninyong mga kinabuhi. Makasaad ako kaninyo og kalipay nga talagsaon ug maanindot ug malungtaron. Makasaad ako kaninyo nga inyong timbang-timbangon ang inyong mga kinabuhi, nga kamo mohan-ay og bag-ong mga prayoridad, nga kamo magpuyo nga mas duol ngadto sa Ginoo, nga ang pag-ampo mahimong usa ka tinuod ug talagsaon nga kasinatian, nga kamo maglakaw uban sa hugot nga pagtuo diha sa resulta sa maayo nga mga butang nga inyong ginabuhat.¹⁸

Nagkinahanglan kita og pipila ka batan-ong mga babaye [nga moserbisyo og mga misyon]. Naghimo sila og talagsaon nga mga buhat. Makasulod sila og mga panimalay diin ang mga elder dili makahimo. …

[Hinoon], … ang batan-ong mga babaye kinahanglang dili mobati nga aduna silay katungdanan sama sa batan-ong mga lalaki. Ang pipila kanila gusto gayud nga moadto. Kon mao, kinahanglang makigtambag sila sa ilang bishop ingon man usab sa ilang mga ginikanan. … Ngadto sa mga sister ako moingon nga tahuron gihapon kamo pag-ayo, ikonsiderar gihapon nga nagbuhat sa inyong katungdanan, ang inyong mga paningkamot madawat gihapon sa Ginoo ug sa Simbahan kon magmisyon man kamo o dili.¹⁹

Uban sa panginahanglan alang sa batan-ong mga elder ug mga sister, adunay nagtubo nga panginahanglan alang sa mga magtiayon diha sa mission field. Ang edaran nga mga magtiayon nagbuhat og talagsaon nga buhat diha sa mga misyon. Mas daghan pa ang gikinahanglan. Labi na natong gikinahanglan kadtong adunay mga abilidad sa langyaw nga pinulongan. Makaserbisyo sila sa daghang mga responsibilidad ubos sa direksyon sa sensitibo ug masinabtanon nga mga presidente sa misyon.

Uban sa nagkadaghang mga tawo nga nang-retire nga maayo ug lagsik gihapon og panglawas, adunay daghan nga makahulip sa dakong panginahanglan diha sa buhat sa Ginoo.²⁰

Aduna kitay miretiro nga mga lalaki ug babaye nga nagserbisyo diha sa makahuluganong misyonaryo nga kapasidad alang niini nga Simbahan sa tibuok kalibutan. Nagtubo ang gidaghanon. Moadto sila kon asa sila gitawag. Magserbisyo sila kon diin gikinahanglan. Ang mga panaghigalaay naestablisar; ang mga kahanas gipakigbahin; ang mga oportunidad naabli alang niadtong dili gayud malimot sa mga lalaki ug mga babaye kinsa miabut taliwala kanila diha sa diwa sa hingpit nga pagkamakiangayon aron sa pagtudlo ug sa pagbuhat og maayo. Wala silay dawaton nga kwarta. Moadto sila sa ilang kaugalingong gasto. Ang sukod sa ilang pagkamatinud-anon walay kinutuban. Ang mga bunga sa ilang mga paningkamot dili makwenta.²¹

sister missionaries in crowd — “Ang kalibutan karon … nagkinahanglan sa ebanghelyo ni Jesukristo, ug aron ang kalibutan makadungog niana nga ebanghelyo, kinahanglan gayud nga adunay mga sinugo sa pagtudlo niini.”

Samtang atong ipaila ang uban sa ebanghelyo, ang Espiritu sa Ginoo nagtabang nga mabuntog ang kalainan tali kanato.

Tungod kay kitang tanan gikan sa sama nga mga ginikanan [isip mga anak sa Dios], kita mosanong sa sama nga kamatuoran. Tungod lang kay ang panit sa usa ka tawo tingali medyo lahi og kolor, nga ang mga mata tingali medyo lahi og porma, nga ang usa ka tawo tingali nagsul-ob og lahi nga matang sa sinina wala magpasabut nga siya lahi na nga matang sa indibidwal. Ang mga lalaki ug babaye sa tibuok kalibutan mosanong sa sama nga mga padasig sa sama nga paagi. Sila mangita og kainit kon sila tugnawon; sila nasayud sa samang matang sa mga sakit; sila nakasinati og kagul-anan, ug sila nasayud sa hingpit nga kalipay. …

Kon ang mga kalainan—sa atong mga silingan o sa ubang kultura—daw nahimong mga babag samtang nagtinguha kita sa pagpakigbahin sa ebanghelyo, ang yano nga pagkamatinahuron kasagaran motangtang niini nga mga babag. Samtang nagtuman kita sa sugo sa Ginoo sa pagpaila sa uban ngadto sa ebanghelyo, ako mopamatuod nga ang Espiritu sa Ginoo motabang sa pagbuntog sa mga kalainan tali kaniya nga nagtudlo ug kaniya nga gitudloan. Ang Ginoo miklaro niini nga proseso sa dihang siya miingon, “Busa, siya nga nagsangyaw [pinaagi sa Espiritu] ug siya nga nakadawat [pinaagi sa Espiritu], nakasabut sa usag usa, ug ang duha makadawat og kaayohan ug maglipay nga maghiusa.” (D&P 50:22.)

Nalipay ko nga ang labing epektibo nga paagi nga aduna ang matag usa kanato sa atong mga calling sa pagpakigbahin sa ebanghelyo mao ang Espiritu sa Ginoo. Kitang tanan nakakita na niini sa uban. Samtang kita nagbuhat sa buluhaton sa Ginoo, nabati usab nato kini diha sa atong kaugalingon. Sa ingon niini nga mga okasyon, ang mabaw nga mga kalainan tali kanato ug niadtong atong gitudloan daw mangahulog sama sa mga himbis gikan sa atong mga mata. (Tan-awa sa 2 Nephi 30:6.) Ang usa ka kainit sa pagkaparyente ug panabut motumaw nga nindot kaayo nga tan-awon. Kita sa tinud-anay makasabut sa usag usa, ug kita sa tinud-anay malig-on ug dungan nga maglipay.²²

Samtang kita magpadayon uban sa hugot nga pagtuo, ang Ginoo mopanalangin sa atong mga paningkamot sa pagpaila sa uban ngadto sa ebanghelyo.

Sa pagkatinuod kita nahiapil sa usa ka kahibulongan nga buhat ug usa ka katingalahan. … Ang Dios sa langit mipahinabo niining ulahing adlaw nga milagro, ug ang atong nakit-an usa lamang ka pasiuna sa mas mahinungdanon pa nga mga butang nga moabut. Ang buhat matuman pinaagi sa mapaubsanon nga mga lalaki ug babaye, mga batan-on ug tigulang.²³

Ang buhat magmalampuson tungod kay ang Ginoo mismo ang misaad:

“Ug kinsa kadto nga modawat kaninyo, didto atua usab Ako, kay Ako molakaw diha sa inyong atubangan. Ako anaa sa inyong tuo nga kamot ug sa inyong wala, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo.” (D&P 84:88.)

Uban sa atong responsibilidad nga balaanong gihatag, uban sa mga panalangin nga balaanong gisaad, mopadayon kita uban sa hugot nga pagtuo. Kon buhaton nato kini, ang Ginoo mopanalangin sa atong mga paningkamot. Buhaton nato ang atong bahin sa pagpakigbahin sa ebanghelyo ngadto niadtong naglibut kanato, una pinaagi sa ehemplo ug dayon pinaagi sa dinasig nga lagda.

Ang bato nga gipikas gikan sa bukid nga walay gigamit nga mga kamot mopadayon sa pagkaylap hangtud kini mopuno sa tibuok yuta. (Tan-awa sa Dan. 2.) Ako mohatag kaninyo sa akong pagsaksi kabahin niini nga kamatuoran ug sa kamatuoran nga ang matag usa kanato makatabang sa mga paagi nga angay sa atong mga kahimtang kon magtinguha kita sa giya ug inspirasyon sa atong Amahan sa Langit. Buhat sa Dios kining atong ginabuhat, ug uban sa iyang panalangin dili kita mapakyas.²⁴

Mga Sugyot alang sa Pagtuon ug Pagtudlo

Mga Pangutana

Nganong usahay mahadlok man kita nga mopakigbahin sa ebanghelyo? Unsa ang pipila ka mga paagi nga atong mabuntog kana nga kahadlok ug mopaambit ngadto sa uban? (Tan-awa sa seksyon 1.) Unsay pipila ka mga milagro sa misyonaryo nga buhat ang inyong nasaksihan?
Nganong ang mga misyonaryo “labing magmalampuson kon ang mga miyembro maoy tinubdan diin diha makaplagan ang bag-ong mga investigator”? (Tan-awa sa seksyon 2.) Unsa ang pipila ka laing mga paagi nga ang mga miyembro makatabang sa full-time nga mga misyonaryo?
Nganong ang full-time nga mga misyon makaimpluwensya man og maayo sa mga kinabuhi niadtong moserbisyo? Sa unsang paagi nga ang mga ginikanan makatabang sa ilang mga anak nga mangandam sa pagserbisyo og full-time nga mga misyon? (Tan-awa sa seksyon 3.) Sa unsang paagi nga ang mga pamilya makatabang sa edaran nga mga magtiayon nga mangandam sa pagserbisyo?
Rebyuha ang seksyon 4. Unsa ang pipila sa komon nga mga kinaiya sa tanang tawo? Unsaon nato sa pagbuntog ang mga panaglahi nga daw nahimong mga babag sa pagpakigbahin sa ebanghelyo? Sa unsang paagi nimo nakita ang Espiritu sa Ginoo nga mitabang sa mga tawo sa pagbuntog sa mga panaglahi?
Si Presidente Hinckley mipasabut og maayo nga ang Ginoo mopanalangin sa atong mga paningkamot sa pagpakigbahin sa ebanghelyo kon kita “mopadayon uban sa hugot nga pagtuo” (seksyon 5). Sa unsang paagi ninyo mapalambo ang inyong tinguha ug hugot nga pagtuo sa pagpakigbahin sa ebanghelyo?

May Kalabutan nga mga Kasulatan

Isaias 52:7; Mateo 28:19–20; Alma 26:1–5; D&P 1:20–23; 4; 18:15–16; 38:40–41

Tabang sa Pagtudlo

“Ayaw kahadlok sa kahilom. Ang mga tawo sa kasagaran nagkinahanglan og panahon sa paghunahuna ug sa pagtubag sa mga pangutana o sa pagpadayag unsay ilang gibati. Mahimong mohunong ka human ka makapangutana, human mapaambit ang espirituhanong kasinatian, o kon ang usa ka tawo naglisud sa pagpasabut sa iyang kaugalingon” (Pagtudlo, Walay Labaw ka Mahinungdanon nga Tawag [1999], 67).