Kapitulo 19

Pagpangulo sa Priesthood sa Simbahan ni Jesukristo

“Ang Ginoo nagtan-aw niini nga buhat. Kiini Iya nga gingharian. Dili kita mga karnero nga walay tigbalantay. Dili kita kasundaluhan nga walay pangulo.”

Gikan sa Kinabuhi ni Gordon B. Hinckley

Gisulti ni Presidente Gordon B. Hinckley: “Ang una nakong responsibilidad sa Simbahan, ang una gayud nga katungdanan [office] nga akong gihuptan, mao ang pagka-counselor sa batang lalaki kinsa maoy presidente sa among korum sa mga deacon. Ang buotan namong bishop mitawag nako ug nakig-istorya mahitungod niini nga calling. Nalipay kaayo ko. Naguol ko ug nabalaka. Motuo man mo o sa dili, may kinaiya ko nga, may pagkamaulawon ug ganahang mag-inusara, ug sa akong hunahuna kining pagtawag nga second counselor sa korum sa mga deacon nakapabalaka kaayo nako, kon hisgutan ang akong edad ug kasinatian, ingon man sa kasamtangan nakong responsibilidad kon hisgutan ang akong edad ug kasinatian.”¹

Mao ra gihapon ang gibati ni Presidente Hinckley niadtong 1961, dihang gitawag siya nga moserbisyo sa Korum sa Napulog Duha ka mga Apostoles. Sa iyang una nga pakigpulong sa kinatibuk-ang komperensya isip Apostol, miingon siya:

“Sa akong hunahuna gibati nako ang gibug-aton niini nga responsibilidad nga mobarug nga usa ka saksi sa Ginoo nga si Jesukristo sa tibuok kalibutan nga nagdumili sa pagdawat kaniya. ‘Ako nahingangha, nahibulong sa gugma.’ Gibati nako ang kalumo sa pagsalig sa Propeta sa Ginoo ngari nako, ug pinaagi sa dayag nga paghigugma, niining akong mga kaigsoonan. … Nag-ampo ko og kalig-on; nag-ampo ko og panabang; ug nag-ampo ko alang sa pagtuo ug sa tinguha nga magmasulundon.”²

Niadtong Abril 1, 1995, si Presidente Hinckley namulong sa sesyon sa priesthood sa kinatibuk-ang komperensya human ang mga miyembro sa Simbahan mipaluyo kaniya sa unang higayon nga ilang propeta ug Presidente. Sa milabayng 14 ka tuig, nagserbisyo siya nga counselor sa tulo ka Presidente sa Simbahan. Balik-balik niyang gipamatuod ang balaan nila nga mga calling ug miawhag sa mga Santos sa Ulahing mga Adlaw nga sundon ang ilang tambag. Karon, naa na siya sa posisyon, ang iyang pagbati nga kanunayng magsalig sa Ginoo wala maibani gikan sa panahon nga siya usa pa ka deacon o bag-ong gitawag nga Apostol. Hinoon, mas nahibalo siya sa gikinahanglan niyang suporta nga kalig-on gikan sa Ginoo. Siya miingon:

“Ang giisa ninyong mga kamot atol sa balaang panagtigom karong buntaga usa ka ekspresyon sa inyong kaandam ug tinguha sa pagsuporta kanamo, inyong mga kaigsoonan ug inyong mga sulugoon, uban sa inyong pagsalig, pagtuo, ug pag-ampo. Nagpasalamat kaayo ko niana nga pagpahayag. Nagpasalamat ko, sa matag usa kaninyo. Akong ipaniguro kaninyo, sama sa inyo nang nahibaloan, nga sa proseso sa Ginoo, walay pagtinguha og usa ka posisyon. Sama sa giingon sa Ginoo sa Iyang mga disipulo, “Kamo wala magpili kanako, hinonoa ako mao ang nagpili kaninyo, ug nagtudlo kaninyo” (Juan 15:16). Kini nga katungdanan dili butang nga tinguhaon. Ang katungod sa pagpili mag-agad sa Ginoo. Siya ang agalon sa kinabuhi ug kamatayon. Iyaha ang gahum sa pagtawag. Iyaha ang gahum sa pagtangtang. Iyaha ang gahum nga ipabilin. Tanan kini anaa sa Iyang mga kamot.

“Wala ko kahibalo nganong ang tawo nga sama nako may labut sa talagsaon Niyang plano. Apan sa pagkaangkon niini nga kupo, karon akong sublion sa pagpahinungod ang bisan unsang kalig-on o panahon o talento o kinabuhi nga ania kanako para sa buluhaton sa Agalon sa pagserbisyo sa akong mga kaigsoonan ug sa mga sister. Usab, salamat … sa inyong mga gibuhat karon. Akong pag-ampo nga unta takus ako. Manghinaot ko nga unta mahinumduman ako sa inyong mga pag-ampo.”³

First Presidency — Ang Unang Kapangulohan, 1995. Presidente Gordon B. Hinckley *(sa tunga);* President Thomas S. Monson, Unang Magtatambag *(sa wala);* ug Presidente James E. Faust, Ikaduhang Magtatambag *(sa tuo).*

Mga Pagtulun-an ni Gordon B. Hinckley

Ang Ginoo motawag sa matag Presidente sa Simbahan human sa pag-testing, paglunsay, ug pagpahapsay kaniya.

Nakatrabaho ko kauban sa mga Presidente sa Simbahan gikan ni Presidente Heber J. Grant ug sa ubang misunod. … Nakaila ko sa mga counselor niining mga tawhana, ug nakaila ko sa konseho sa Napulog Duha atol sa mga katuigan sa pagdumala niini nga mga Presidente. Tanan kining mga lalakiha, mga tawo. Duna silay tawhanong mga kinaiya ug tingali tawhanong mga kahuyang. Apan labaw nianang tanan, adunay butang sa kinabuhi sa matag usa kanila nga usa ka pagpakita sa labaw nga gahum sa inspirasyon sa Dios. Kadtong nahimong mga Presidente sa Simbahan nahimong mga Propeta sa tinuod gayud nga paagi. Sa personal nakasaksi gayud ako sa espiritu sa pagpadayag diha kanila. Ang matag usa nahiadto sa Kapangulohan human sa daghang tuig nga kasinatian isip sakop sa Konseho sa Napulog Duha ug sa ubang kapasidad. Ang Ginoo milunsay ug mihapsay sa matag usa, mipasinati kaniya og mga pagkawala sa paglaum ug kapakyasan, mipasinati kaniya og balatian ug sa ubang sitwasyon og labihang kasubo. Tanan kini nahimong bahin sa talagsaong makalunsay nga proseso, ug ang epekto niana nga proseso nahimong matahum nga ebidensya sa ilang kinabuhi.

Minahal kong mga higala sa ebanghelyo, buhat kini sa Dios. Kini Iyang Simbahan, ug Simbahan sa iyang Hinigugma nga Anak kansang ngalan ang gidala niini. Ang Dios dili motugot nga usa ka impostor ang magbarug nga pangulo niini. Mongalan Siya sa iyang mga propeta, ug modasig siya ug motudlo kanila.⁴

Ang uban mopahayag og kabalaka nga ang Presidente sa Simbahan ingon og kanunay lang tigulang na, diin ang akong tubag, “Pagkadakong panalangin!” … Dili kinahanglan nga batan-on siya. Siya kanunay ug padayon nga dunay batan-ong mga tawo nga mobiyahe sa tibuok kalibutan sa buhat sa pagpangalagad. Siya ang presiding high priest, ang tipiganan sa tanang yawe sa balaang priesthood, ug mao ang tingog sa pagpadayag gikan sa Dios ngadto sa iyang mga katawhan. …

Sa akong hunahuna dunay butang nga ikapaniguro gayud sa pagkahibalo niana … kita dunay Presidente nga nadisiplina ug natudloan, nasulayan, ug natestingan, kansang kamatinud-anon sa buhat ug integridad sa mao nga kawsa nalig-on pinaagi sa pagserbisyo, kansang pagtuo nahingkod, ug kansang pagkaduol sa Dios naugmad sulod sa mga panahon sa daghang katuigan.⁵

Ako namulong … agig pasalamat sa propeta nga naggiya niining ulahing mga adlaw. Nangamuyo ko og pagkamaunungon ngadto kaniya kinsa gitawag ug gidihugan sa Ginoo. Nangamuyo ko og pagkamakanunayon sa pagsuporta kaniya ug pagtagad sa iyang mga pagtulun-an. Miingon ko … kon kita dunay usa ka propeta, kita aduna sa tanan. Kon kita walay usa ka propeta, kita wala sa tanan. Kita gayud adunay propeta. Kita adunay propeta sukad sa pagkatukod niini nga Simbahan. Dili gayud mahitabo nga mawad-an kita og propeta kon magpakabuhi kitang takus sa usa ka propeta.

Ang Ginoo nagtan-aw niini nga buhat. Kini Iya nga gingharian. Dili kita mga karnero nga walay tigbalantay. Dili kita kasundaluhan nga walay pangulo.⁶

Kon ang Presidente sa Simbahan mamatay, ang senior nga Apostol maoy mosunod nga Presidente.

Ang transisyon sa awtoridad [ngadto sa bag-ong Presidente sa Simbahan], diin ako nakaapil sa daghang higayon, matahum sa kayano niini. Pagpakita kini sa pamaagi giunsa sa paghimo sa Ginoo ang mga butang. Ubos sa Iyang pamaagi ang usa ka tawo pilion sa propeta nga mahimong sakop sa Konseho sa Napulog Duha ka mga Apostoles. Wala Niya kini pilia isip usa ka panarbaho. Gitawag siya, sama sa pagtawag sa mga Apostoles sa kapanahunan ni Jesus, diin ang Ginoo miingon, “Kamo wala magpili kanako, hinonoa ako mao ang nagpili kaninyo ug nagtudlo kaninyo.” (Juan 15:16.) Molabay ang katuigan. Natudloan siya ug nadisiplina sa mga buluhaton sa iyang katungdanan. Mobiyahe siya sa tibuok kalibutan sa pagtuman sa iyang apostolikanhong tawag. Taas kini nga proseso sa pagpangandam, diin iyang mailhan ang mga Santos sa Ulahing mga Adlaw bisan asa sila, ug sila makaila kaniya. Sulayan sa Ginoo ang iyang kasingkasing ug iyang panglawas. Sa natural nga dagan sa panghitabo, mahitabo ang pagkabakante niana nga konseho ug bag-o nga pagpili ang pagahimoon. Ubos niini nga proseso ang usa ka tawo mamahimong senior nga Apostol. Ang dili aktibong awtoridad nga naa niya, ug sa kaubanan niyang Kaigsoonan, nga gihatag sa matag usa atol sa ordinasyon, kining tanan mga yawe sa priesthood. Apan ang awtoridad sa paggamit niana nga mga yawe gamiton lamang sa Presidente sa Simbahan. Sa pagkamatay [sa propeta], kana nga awtoridad magamit sa senior nga Apostol, kinsa tawagon, i-set apart, ug iorden nga propeta ug Presidente pinaagi sa iyang mga kaubanan sa Konseho sa Napulog Duha.

Wala nay eleksyon. Wala nay pagpangumpanya. Ang maanaa mao lamang ang mahilom ug yano nga pagpalihok sa balaan nga plano nga naghatag og dinasig ug nasulayan nga pagpangulo.

Nahimo akong usa ka saksi, personal nga saksi, niining talagsaong proseso. Ihatag ko kaninyo ang akong pagpamatuod nga ang Ginoo mao ang [nagapili sa propeta].⁷

Dihang namatay si Presidente [Howard W.] Hunter, ang Unang Kapangulohan nawala. Si Brother Monson ug ako, kinsa nagserbisyo nga iyang mga counselor mibalik sa among pwesto sa Korum sa Napulog Duha, nga nahimong presiding authority sa Simbahan.

… Ang tanang buhi nga naordinahan nga mga Apostoles nagpundok uban sa diwa sa pagpuasa ug pag-ampo sa kwarto sa taas sa templo. Didto nanganta kami ug nag-ampo. Miambit kami sa sakrament sa panihapon sa Ginoo, nagbag-o nianang sagrado, simbolokanhon nga tugon sa among pakigsaad uban Kaniya nga atong balaang Manunubos.

Ang kapangulohan dayon gireorganisar, subay sa sumbanan nga maayong pagka-establisar gikan sa mga henerasyong milabay.

Wala nay pagpangampanya, walay panagsangka, walay ambisyon sa katungdanan. Usa kadto ka mahilum, malinawon, yano, ug sagrado. Gihimo kadto subay sa sumbanan nga ang Ginoo Mismo ang nagpahimutang.⁸

Ang Ginoo mihatag og mga baruganan sa pagdumala sa Iyang Simbahan kon ang Presidente dili na hingpit nga makahimo.

Si Presidente Hinckley mihimo sa mosunod nga pamahayag niadtong 1992, dihang nagserbisyo siya nga Unang Magtatambag sa Unang Kapangulohan: Ang pangulo sa Simbahan mao ang Ginoo nga si Jesukristo. Iya kini nga Simbahan. Apan ang yutan-ong pangulo mao ang atong propeta. Ang mga propeta mga tawo nga gitugahan og balaan nga calling. Bisan pa sa kabalaan niana nga calling, sila mga tawo gihapon. Ubos sila sa mga problema sa mortalidad.

Atong gimahal ug gitahud ug gipasidunggan ug gisunod ang propeta karon, si Presidente Ezra Taft Benzon. Usa siya ka talagsaon ug batid [gifted] nga pangulo, usa ka tawo kansang tingog milanog sa pagpamatuod niini nga buhat tadlas sa kalibutan. Gihuptan niya ang tanang yawe sa priesthood sa kalibutan karon. Apan miabut siya sa pangidaron diin dili na niya mahimo ang daghang butang nga kaniadto iyang nahimo. Wala kini makabalda sa iyang calling isip usa ka propeta. Apan ang iyang pisikal nga mga kalihokan nalimitahan.⁹

Si Presidente Hinckley mihimo sa mosunod nga pamahayag niadtong 1994, dihang nagserbisyo siya isip Unang Magtatambag sa Unang Kapangulohan: Ang mga tawo sa tibuok Simbahan mabalak-on kaayong mahibalo sa kahimtang sa Presidente. Si Presidente Benson karon nubenta y singko na. … Nag-antus na siya gumikan sa dako nga edad ug sakit og dili na makahimo sa pagtuman sa importante niyang mga katungdanan sa iyang sagrado nga buhat. Dili kini usa ka sitwasyon nga walay sumbanan. Ang ubang mga Presidente sa Simbahan nagluya usab o wala na makahimo sa hingpit sa buluhaton sa hinapos nga mga bulan o mga tuig sa ilang kinabuhi. Posible nga mahitabo gihapon kini sa umaabut.

Ang mga baruganan ug mga pamaagi nga giestablisar sa Ginoo alang sa pagdumala sa Iyang simbahan naghimo og probisyon sa bisan unsa niini nga kahimtang. Importante kini … nga walay pagduha-duha o mga problema kalabut sa pagdumala sa Simbahan ug sa paggamit sa propetikanhong mga gasa, lakip na ang katungod sa inspirasyon ug pagpadayag sa pagdumala sa mga kalihokan ug mga programa sa Simbahan, kon ang Presidente masakit man o dili na hingpit nga makabuhat sa katungdanan.

Ang Unang Kapangulohan ug ang Konseho sa Napulog Duha ka mga Apostoles, gitawag ug gi-orden nga maghupot sa mga yawe sa priesthood, dunay awtoridad ug responsibilidad sa pagdumala sa Simbahan, sa pagpahigayon sa mga ordinansa niini, sa pagpasabut sa doktrina niini, ug sa pag-establisar ug pagmintinar sa mga naandan niining gimbuhaton. Ang matag lalaki kinsa gi-orden nga Apostol ug gipaluyohan isip usa ka sakop sa Konseho sa Napulog Duha paluyohan isip usa ka propeta, manalagna, ug tigpadayag. Sama niadtong mga nag-una kaniya, si Presidente Benson mao ang senior nga Apostol dihang siya ang gitawag nga Presidente sa Simbahan. Ang iyang mga Counselor gikuha gikan sa Konseho sa Napulog Duha. Busa, ang anaa nga mga sakop sa Korum sa Unang Kapangulohan ug sa Konseho sa Napulog Duha nakadawat sa mga yawe, katungod, ug awtoridad kalabut sa balaang pagkaapostol.

Mokutlo ko gikan sa Doktrina ug mga Pakigsaad:

“Sa Melchizedek nga Pagkapari, tulo ka Tigdumala nga Halangdon nga mga Pari, nga gipili sa simbahan, gitudlo ug gi-orden niana nga buhatan, ug gituboy pinaagi sa pagsalig, hugot nga pagtuo, ug pag-ampo sa simbahan, nahimo nga usa ka korum sa Kapangulohan sa Simbahan” (D&P 107:22).

Kon ang Presidente sa Simbahan masakit o dili makahimo sa pagbuhat sa hingpit sa tanan nga mga katungdanan sa iyang buhatan, ang iyang duha ka Magtatambag maglangkob sa Korum sa Unang Kapangulohan. Mopadayon sila sa inadlaw-adlaw nga buluhaton sa Kapangulohan. Sa eksepsyunal nga mga kahimtang, kon usa ra ang maka-function, mahimo siyang molihok gamit ang awtoridad sa office sa Kapangulohan sigun sa gitakda diha sa Doktrina ug mga Pakigsaad, seksyon 102, bersikulo 10–11. …

… Ang mga Magtatambag sa Unang Kapangulohan magpadayon sa regular nga buluhaton niini nga katungdanan. Apan bisan unsa nga dinagkong mga pangutana bahin sa polisiya, pamaagi, programa, o doktrina sabutan ug ampuan og maayo sa Unang Kapangulohan ug sa Napulog Duha. Kini nga duha ka korum, ang Korum sa Unang Kapangulohan ug ang Korum sa Napulog Duha, magmiting, nga ang tanan hatagan og hingpit nga gawasnong pagpahayag sa iyang kaugalingon, mokonsiderar sa matag importanteng pangutana.

Ug karon kutloon nako pag-usab ang gikan sa pulong sa Ginoo: “Ug sa matag hukom nga mahimo sa bisan hain niini nga mga korum kinahanglan gayud pinaagi sa nagkauyon nga tingog sa mao; nga mao, nga ang matag sakop diha sa tagsa-tagsa ka korum kinahanglan gayud nga mouyon sa ilang mga paghukom, aron sa paghimo sa ilang hukom nga sama og gahum o kalig-on sa usag usa” (D&P 107:27). …

… Kinahanglang masabtan sa tanan nga si Jesukristo ang nangulo niini nga Simbahan nga nagdala sa Iyang sagrado nga pangalan. Siya nagbantay niini. Siya naggiya niini. Nagbarug sa tuong dapit sa Iyang Amahan, gidumala Niya kini nga buhat. Iya kini nga katungod, gahum ug pagbuot nga motawag og mga tawo sa Iyang pamaagi sa taas ug sagradong mga katungdanan ug sa pag-release kanila sumala sa Iyang kabubut-on sa pagtawag kanila nga mopauli na. Siya ang Agalon sa kinabuhi ug kamatayon. Dili ko mabalaka mahitungod sa mga kahimtang nga among nahimutangan. Gidawat nako kini nga mga kahimtang isip usa ka pagpahayag sa Iyang kabubut-on. Gidawat usab nako kini nga responsibilidad, milihok uban sa akong mga Kaigsoonan, nga himoon ang tanan namong mahimo nga mapadayon kining balaan nga buhat uban sa espiritu sa pagpahinungod, gugma, pagpailub, katungdanan, ug kamaunungon.¹⁰

Ang mga Apostoles mga espesyal nga saksi sa pangalan ni Kristo sa tibuok kalibutan.

Human [siya] ma-orden ngadto sa balaang pagkaapostol ug … ma-set apart nga sakop sa Konseho sa Napulog Duha, [ang mga Apostoles] gilauman nga mopahinungod sa ilang kaugalingon una sa tanan ngadto sa buluhaton sa pagpangalagad. Sila … mobutang og una sa ilang kinabuhi, labaw sa tanan pang mga butang, sa responsibilidad nga pagbarug nga mga saksi sa pangalan ni Kristo sa tibuok kalibutan. …

Sama kanatong tanan, sila mga tawo gihapon. Duna silay mga kalig-on ug ilang mga kahuyang. Apan sa pagpadayon, sa nahibiling panahon sa ilang kinabuhi, samtang magpabilin silang matinud-anon, ang una gayud nilang hunahunaon mao nga mapadayon ang buhat sa Dios dinhi sa kalibutan. Kinahanglan nga hunahunaon nila ang kaayuhan sa mga anak sa atong Amahan, mga miyembro man sa Simbahan o dili mga miyembro sa Simbahan. Kinahanglan nilang buhaton ang tanan nilang mahimo sa paghupay sa nagbangutan, paglig-on sa mga huyang, pagdasig niadtong mga nahisalaag, sa pakighigala niadtong walay mga higala, pag-alima sa mga timawa, pagpanalangin sa may sakit, sa pagsaksi, tungod sa pagtuo sa piho nga pagkahibalo bahin sa Anak sa Dios, ilang Higala ug Agalon, diin sila ang mga sulugoon. …

… Mosaksi ko sa ilang panag-igsoonay, sa ilang debosyon, ilang hugot nga pagtuo, ilang kakugi, ug sa katingalahan nilang pagserbisyo nga mapalambo ang gingharian sa Dios.¹¹

Quorum of Twelve Apostles — Ang Korum sa Napulog Duha ka mga Apostoles, 1965. *Naglingkod gikan sa wala ngadto sa tuo:* Ezra Taft Benson, Mark E. Petersen (sa arm sa lingkuranan), Joseph Fielding Smith (presidente sa korum), ug si LeGrand Richards. *Nagbarug sa wala ngadto sa tuo:* Gordon B. Hinckley, Delbert L. Stapley, Thomas S. Monson, Spencer W. Kimball, Harold B. Lee, Marion G. Romney, Richard L. Evans, ug Howard W. Hunter.

Ang Unang Kapangulohan ug ang Napulog Duha magtinguha og pagpadayag ug hingpit nga panag-uyon sa dili pa himoon ang mga pagdesisyon.

Walay desisyon nga maggikan sa deliberasyon sa Unang Kapangulohan ug sa Napulog Duha nga walay hingpit nga panag-uyon sa tanang butang. Sa pagsugod og konsiderar sa mga butang, mahimong adunay magkalahi nga opinyon. Malauman kini. Kining mga tawhana naggikan sa lahi-lahi nga mga background. Mga tawo sila nga may kaugalingong hunahuna. Apan sa dili pa mahimo ang katapusan nga desisyon, moabut ang kahiusahan sa hunahuna ug tingog.

Malauman kini kon ang gipadayag nga pulong sa Ginoo gisunod [tan-awa sa D&P 107:27, 30–31]. …

… [Dihang] nagserbisyo ko isip usa ka sakop sa Konseho sa Napulog Duha ug [dihang] nakaserbisyo ko sa Unang Kapangulohan, walay dakong pagdesisyon nga ang ingon niini wala buhata. … Agig resulta niini gayud nga proseso nga ang kalalakin-an mopadayag unsay ilang hunahuna mosangput ang paghashas ug pagtimbang-timbang sa mga ideya ug mga konsepto. Apan wala gayud ako makabantay og grabeng panagsumpaki o personal nga kapungot tali sa akong Kaigsoonan. Hinoon, akong naobserbahan ang usa ka matahum ug talagsaong butang—ang pagkahiusa, ubos sa nagdumala nga impluwensya sa Espiritu Santo ug ubos sa gahum sa pagpadayag, bahin sa managlahi nga hunahuna hangtud moabut ang pagkahiusa ug hingpit nga panag-uyon. …

Wala pa koy nahibaloang lain pa nga nagdumala nga pundok nga makasulti ko og ingon niini.¹²

Ang stake president gitawag pinaagi sa inspirasyon nga magserbisyo isip adviser sa mga bishop ug lider sa katawhan.

Ang presidente sa stake usa ka opisyal nga tawagon ubos sa pagpadayag nga maoy mobarug taliwala sa mga bishop sa ward ug sa mga General Authorities sa Simbahan. Usa kini sa pinakaimportanteng responsibilidad. Bansayon siya sa mga General Authorities, ug siya usab mobansay sa mga bishop. …

Ang stake president magsilbi nga adviser sa mga bishop. Ang matag bishop nahibalo nga kon mag-atubang sila og lisud nga mga problema dunay tawo nga ilang kaduolan aron iyang ikasulti ang iyang problema ug makadawat og tambag.

Mohatag siya og dugang nga kasiguroan sa pagtino niadtong takus nga mosulod sa balay sa Ginoo. … Ang presidente usab nahimo nga ikaduhang tawo nga mohashas sa pagtino sa katakus niadtong moadto sa pagrepresentar sa Simbahan ngadto sa mission field. Interbyuhon sab niya ang moadtoay og misyon, ug kon nakita niya ang iyang pagkatakus iyang pirmahan ang rekomendasyon. Gihatagan usab siya og awtoridad nga mo-set apart niadtong gitawag sa pagmisyon ug sa pag-release kon mahuman na ang ilang serbisyo.

Labaw sa tanan, siya ang pangulo nga opisyal sa disciplinary sa stake. … Gidala niya ang dako kaayong responsibilidad sa pagsiguro nga ang doktrina nga gitudlo sa stake giampingan nga putli ug walay buling. Katungdanan niya ang pagsuta nga walay doktrinang sayop ang gitudlo o sayop nga mga buhat ang nahitabo. Kon dunay mga naghupot sa Melchizedek Priesthood nga mibuhat og dili angay, o lahi pang mga tawo nga nakahimong ingon niana, ubos sa ubang kahimtang, siya kinahanglan nga motambag kanila, ug kon ang tawo padayong mohimo sa sayop nga buhat, niana ang presidente mapugos sa paghimo og aksyon. Iyang ipatawag ang nakasala nga paatubangon sa disciplinary council, diin ang action himoon nga siya hatagan ba og probationary period o i-disfellowship o i-excommunicate sa Simbahan.

Kini ang pinakalisud ug dili makahimuot nga tahas, apan ang presidente kinahanglan nga mohimo niini sa walay kahadlok o pagkasayop. Tanan kini pagahimoon pinasubay sa direksyon sa Espiritu sumala sa makita sa seksyon 102 sa Doktrina ug mga Pakigsaad.

Dayon human niana buhaton niya ang tanang mahimo nga makabalik sa hustong panahon ang tawo nga gidisiplina.

Tanan kini og daghan pa naglangkob sa iyang responsibilidad. Buot ipasabut, ang kaugalingon niyang kinabuhi kinahanglan gayud nga usa ka ehemplo sa iyang mga tawo. …

… Tungod kay aduna kami niana nga pagsalig sa [mga stake president], giawhag namo ang mga lokal nga miyembro nga dili sila mangita og tambag ug panalangin gikan sa mga General Authorities. Ang ilang stake president gitawag ubos sa sama nga inspirasyon diin ang mga General Authorities gitawag.¹³

Ang mga bishop mao ang tigbalantay sa mga panon.

Ang [Simbahan] mouswag ug modaghan, kay kini labing siguro. Ang ebanghelyo kinahanglan nga molukop sa tanang kanasuran, kaliwatan, pinulongan, ug katawhan. Wala gayud makita nga dunay umaabut nga paghunong o pagkapakyas sa pagtabang, pagpadayon, paglig-on, pagpalapad sa Zion sa tibuok kalibutan. Apan uban niining tanan kinahanglan gayud nga dunay bug-os nga relasyon sa pag-amuma gikan sa manggialamon ug mapinanggaong mga bishop o branch president ang matag miyembro. Sila ang mga tigbalantay sa panon kansang responsibiliad mao ang pagbantay sa mga tawo nga dili kaayo daghan aron walay makalimtan, walay dili mabantayan, o walay mataligam-an. Si Jesus ang tinuod nga tigbalantay kinsa mitabang sa mga nanag-antus, usa human sa usa, motugyan og tinagsang panalangin diha kanila.¹⁴

Ang mga bishop sa Simbahan … sa pagkatinuod mao ang mga tigbalantay sa Israel. Ang tanan [sa Simbahan] tulubagon sa usa ka bishop o branch president. Pagkadako sa palas-anon nga ilang gipas-an, ug modapit ko sa tanang miyembro sa Simbahan sa paghimo kutob sa ilang mahimo sa pag-alsa sa palas-anon nga gihagoan sa atong mga bishop ug mga branch president.

Kinahanglan gayud nga mag-ampo kita para nila. Gikinahanglan nila ang tabang samtang nagpas-an sila sa bug-at nga palas-anon. Mahimo nga mas dako ang atong pagsuporta ug minosan ang pagka-dependent ngadto kanila. Makatabang kita sa bisan unsang paagi ngadto kanila. Mapasalamatan nato sila sa tanan nga ilang gibuhat para kanato. Ato silang giluya sa mubong panahon pinaagi sa buluhaton nga atong gihatag kanila.

… Ang matag [bishop] usa ka tawo nga gitawag pinaagi sa espiritu sa panagna ug pagpadayag ug gi-set apart ug gi-orden pinaagi sa pagpandong sa mga kamot. Matag usa kanila naghupot og mga yawe sa presidency sa iyang ward. Ang matag usa nila high priest, ang tigdumala nga high priest sa iyang ward. Ang matag usa nila may gidala nga dakong responsibilidad sa pagkatinugyanan. Ang matag usa nila nagbarug isip amahan sa iyang mga katawhan.

Walay usa nila ang makadawat og kwarta sa iyang pagserbisyo. Walay bishop sa ward ang swelduhan sa Simbahan sa iyang trabaho isip bishop.

Ang mga rekisito sa usa ka bishop karon sama ra sa kapanahunan ni Pablo, kinsa misulat kang Timoteo [tan-awa sa 1 Timoteo 3:2–6]. …

Sa iyang sulat kang Timoteo, gidugang ni Pablo nga “ang bishop ingon nga piniyalan sa Dios, kinahanglang dili baladlungon; …

“Kinahanglan nga mangupot siya pag-ayo sa kasaligang pulong nga ingon sa gikatudlo kaniya, aron makahimo siya sa paghatag ug pagtulun-an sa matarung tuluohan, ug usab sa pagsaway kanila nga nagasupak niini” (Titus 1:7, 9).

Kana nga mga pulong tukma nga naghulagway sa usa ka bishop karon sa Ang Simbahan ni Jesukristo sa mga Santos sa Ulahing mga Adlaw.¹⁵

Awhagon nako ang mga katawhan sa Simbahan, bisan asa man kamo, kon nagsagubang kamo og mga problema, nga sulayan una kini og sulbad sa inyong kaugalingon. Hunahunaa kini, tun-i ang ubang paagi nga anaa kaninyo, iampo kini, ug duola ang Ginoo para sa direksyon. Kon dili ninyo kini masulbad sa inyong kaugalingon, nan pakig-istoryahi ang bishop o branch president. Tawo siya sa Dios, gitawag ubos sa awtoridad sa balaang priesthood isip tigbalantay sa mga panon.¹⁶

Mga Sugyot alang sa Pagtuon ug Pagtudlo

Mga Pangutana

Nganong nagkinahanglan kita og buhing mga propeta? Unsay nakadani kaninyo mahitungod sa “makalunsay nga proseso” sa pag-andam ug pagtawag og usa ka Presidente sa Simbahan? (Tan-awa sa seksyon 1.)
Unsa ang inyong mga impresyon samtang inyong giribyu ang mga paghulagway ni Presidente Hinckley sa pamaagi sa pagpili og bag-ong Presidente sa Simbahan? (Tan-awa sa seksyon 2.) Nganong importante nga mahibaloan nga ang Presidente pilion sumala sa “balaan nga plano nga naghatag og dinasig ug nasulayan nga pagpangulo”?
Unsa nga mga baruganan ug mga pamaagi ang giestablisar sa Ginoo sa pagdumala sa Iyang Simbahan kon ang Presidente dili na hingpit nga makahimo sa tanan niyang mga katungdanan? (Tan-awa sa seksyon 3.)
Sa unsang paagi ang ulahing adlaw nga mga Apostoles naghunahuna sa tanang anak sa Dios, “mga miyembro man sa Simbahan o dili mga miyembro sa Simbahan”? (Tan-awa sa seksyon 4.) Sa unsang paagi ang bag-ohay lang nga pakigpulong sa komperensya nagpakita niini nga kabalaka? Sa unsang paagi kamo nakabenipisyo gikan sa mga pagtulun-an sa buhing mga propeta ug mga apostoles?
Tun-i ang mga pagtulun-an ni Presidente Hinckley kon sa unsang paagi ang Unang Kapangulohan ug Korum sa Napulog Duha mohimo og mga desisyon (tan-awa sa seksyon 5). Unsay atong makat-unan gikan sa ilang pamaagi sa paghimo og mga desisyon? Unsaon man nato sa paggamit kini nga mga baruganan diha sa atong mga pamilya ug sa Simbahan?
Samtang giribyu ninyo ang seksyon 6 ug 7, unsay inyong nakat-unan mahitungod sa mga calling sa stake president ug sa bishop? Sa unsang paagi nga mas mapaluyohan nato ang atong mga lider sa Simbahan?

May Kalabutan nga mga Kasulatan

Mga Taga-Efeso 2:19–20; 4:11–14; D&P 1:38; 21:1–6; Abraham 3:22–23; Mga Artikulo sa Hugot nga Pagtuo 1:5–6

Tabang sa Pagtudlo

“Ihatag ang pagpamatuod kon ang Espiritu moaghat kanimo sa pagbuhat sa ingon, dili lamang sa katapusan sa matag leksyon. Hatagi og kahigayunan ang imong gitudloan nga mohatag sa ilang pagpamatuod” (Pagtudlo, Walay Labaw ka Mahinungdanon nga Tawag [1999], 45).