Kapitulo 12

Pagkamasulundon: Sunda Lamang ang Ebanghelyo

“Ang paagi sa ebanghelyo usa ka masayon nga paagi. … Ipaubos ang inyong mga kaugalingon ug lakaw diha sa pagkamasulundon.”

Gikan sa Kinabuhi ni Gordon B. Hinckley

Sa dihang si Gordon B. Hinckley naa sa edad nga 14 ka tuig, aduna siyay kasinatian didto sa Salt Lake Tabernacle nga nahimong hinungdan nga mohimo siya og usa ka importante nga resolusyon. Sa kaulahian siya mihinumdom:

“Akong [nadungog] si Presidente Heber J. Grant nga nagsulti sa iyang kasinatian sa pagbasa sa Basahon ni Mormon sa dihang bata pa siya. Misulti siya mahitungod ni Nephi ug sa iyang dakong impluwensiya sa iyang kinabuhi. Ug dayon, uban ang dako kaayong tingog ug lig-on nga pagtuo nga dili gayud nako makalimtan, mikutlo siya niadtong inila nga mga pulong ni Nephi: ‘Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila’ (1 Ne. 3:7).

“Nianang panahona adunay miabut sa akong linghod nga kasingkasing usa ka resolusyon sa pagpaningkamot sa pagbuhat sa unsay gisugo sa Ginoo.”¹

Si Gordon B. Hinckley kanunay nga nagtinguha nga motuman niana nga resolusyon. Milabay ang katuigan, sa dihang siya Presidente sa Simbahan, ang iyang mga pagtulun-an mipatalinghug og balik sa mensahe nga iyang nadungog isip usa ka batan-on nga lalaki. Nakigpulong ngadto sa usa ka grupo sa mga Santos sa Ulahing mga Adlaw diha sa usa ka regional conference, siya miingon:

“Na-interbyu nako sa daghang mga tigbalita. Ang usa ka butang nga ilang isulti mao nga, ‘Karon unsa ang mahimong imong tema sa panahon sa imong kapangulohan?’ Ako masayong mosulti, ‘Sama nga tema diin akong nadungog nga gibalik-balik niini nga Simbahan sa mga presidente sa Simbahan ug sa mga apostoles taman sa akong mahinumduman: Pagpakabuhi sa ebanghelyo, ug ang matag usa nga magbuhat sa ingon makadawat diha sa iyang kasingsing og usa ka lig-on nga pagtuo sa kamatuoran nianang iyang gipakabuhi.’”²

Sa iyang unang kinatubuk-ang komperensya isip Presidente sa Simbahan, si Presidente Hinckley mi-awhag sa tanan nga mas maningkamot pa sa pagpakabuhi sa ebanghelyo:

“Karon, akong mga kaigsoonan, miabot na ang panahon nga kita mobarug nga mas masaligon, moisa sa atong mga mata ug motuy-od sa atong mga hunahuna ngadto sa usa ka mas dako nga pagtukib ug pagsabut sa dako ug linibo nga misyon niining Ang Simbahan ni Jesukristo sa mga Santos sa Ulahing mga Adlaw. Kini usa ka panahon sa pagpakalig-on. Kini usa ka panahon sa pagpadayon sa unahan nga walay pagduhaduha, nahibalo kaayo sa pasabut, sa gilapdon, ug sa importansya sa atong misyon. Kini usa ka panahon sa pagbuhat sa unsay sakto nga walay sapayan kon unsay mga sangputanan nga tingali mosunod. Kini usa ka panahon nga makit-an nga naghupot sa mga kasugoan. Kini usa ka panahon sa pagkab-ot uban ang pagkamabination ug gugma ngadto niadtong anaa sa kalisud ug ngadto niadtong kinsa nahisalaag sa kangitngit ug kasakit. Kini usa ka panahon sa pagka-mahunahunaon ug maayo, matinahuron ug mapahimut-anon ngadto sa usag-usa diha sa tanan natong mga relasyon. Sa laktod nga pagkasulti, mahimong mas Kristohanon.”³

Si Presidente Hinckley mipadayon sa paghatag og gibug-aton niini nga mensahe. Milabay ang napulo ka tuig iyang gibalik og sulti ang kini nga mga pulong diha sa kinatibuk-ang komperensya ug gipasundan pinaagi sa pagsulti, “Kinahanglan kamo maoy mohukom kon unsa na kadak-a ang atong nahimo sa pagpahinabo sa katumanan nianang mao nga imbitasyon nga gihatag 10 ka tuig na ang milabay.”⁴

Si Nephi nangayam — Ang ehemplo ni Nephi sa pagkamasulundon midasig sa batan-ong Gordon B. Hinckley.

Mga Pagtulun-an ni Gordon B. Hinckley

Kita mga katawhan sa pakigsaad, ug dagko ang mga obligasyon uban niana nga pakigsaad.

Kita mga katawhan sa pakigsaad, ug kana usa ka seryuso kaayo nga butang. Sa dihang kini nga buhat napahiuli ug ang Ginoo mihan-ay sa mga katuyoan alang niana nga pagpahiuli, miingon Siya nga usa ka rason sa pagpahiuli mao nga ang Iyang walay katapusan nga pakigsaad tingali matukod pag-usab. Kana nga pakigsaad … nahimo tali ni Abraham ug ni Jehova sa dihang ang gamhanan nga Jehova mihimo og usa ka dako ug maligdong nga saad ngadto ni Abraham. Miingon Siya nga ang iyang binhi mahimong sama sa balas diha sa baybayon sa dagat, nga ang tanang nasud mapanalanginan pinaagi niya. Mihimo Siya niini nga pakigsaad uban niya, nga Siya ang mahimo nilang Dios ug sila mahimo nga Iyang mga katawhan. … Niadtong higayuna dunay napalig-on nga relasyon nga may mahangturon nga sangputanan diha sa mahangturon nga mga kinabuhi sa tanan nga mosulod niini. Kahibulongan ang mga implikasyon niini nga pakigsaad: kon kita molihok sama sa angay nga lihok sa mga anak sa Dios, Siya ang mahimo nato nga Dios nga mopanalangin kanato, mohigugma kanato, mogiya kanato, motabang kanato.

Karon, dinhi niini nga dispensasyon, kana nga mahangturon nga pakigsaad napamatuud pag-usab. Sama lamang kini nga kita mihimo niana nga pakigsaad sa dihang nabunyagan ta. Nahimo kitang kabahin sa Iyang diosnon nga pamilya, sama sa ingon. Ang tanan nga mga anak sa Dios sakup sa Iyang pamilya, apan sa piho ug sa talagsaon nga paagi adunay usa ka linain nga relasyon tali sa Dios ug sa mga anak sa Iyang pakigsaad. Ug sa dihang misulod kita sa Simbahan, … nahimo kitang kabahin sa usa ka katawhan sa pakigsaad, ug matag higayon nga moambit kita sa sakramento, dili lang kini gibuhat nato aron sa paghinumdom sa sakripisyo sa Anak sa Dios, kinsa mihatag sa Iyang kinabuhi alang sa matag usa kanato, apan nadugang ang elemento nga atong giangkon sa atong mga kaugalingon ang pangalan ni Jesukristo ug nagsaad sa atong kaugalingon nga mohupot sa Iyang mga sugo ug Siya nagsaad uban kanato nga Siya mopanalangin kanato uban sa Iyang Balaang Espiritu.

Kita mga katawhan sa pakigsaad, ug dagko ang mga obligasyon uban niana nga pakigsaad. Dili mahimo nga kita ordinaryo lamang nga mga tawo. Kinahanglan kitang mas maayo kay sa kadaghanan sa mga tawo. Kinahanglan kitang mas magmatinud-anon. Kinahanglan kitang mas maayo, mas mabination, mas manggihatagon, mas matinahuron, mas mahunahunaon, mas makinab-uton sa uban.⁵

Kita usa ka katawhan kinsa midala sa atong kaugalingon sa usa ka maligdong nga pakigsaad ug sa pangalan ni Ginoong Jesukristo. Atong himuon nga mas maninguha sa paghupot sa mga kasugoan, sa pagpakabuhi sama sa gihangyo sa Ginoo nga kita magpakabuhi.⁶

miting sa sakrament — “Matag higayun nga kita moambit sa sakrament, … atong gidala sa atong kaugalingon ang pangalan ni Jesukristo ug nagsaad sa atong kaugalingon nga maghupot sa Iyang mga kasugoan.”

Ang Ginoo nagdahum nga kita mosunod sa ebanghelyo sa matag bahin.

Kita nagpuyo sa panahon sa pauyon-uyon ug pagdawat. Sa mga sitwasyon diin matag adlaw kitang miharong, nahibalo kita unsay husto, apan tungod sa pamugos sa atong mga higala ug sa malimbungon nga mga tingog niadtong kinsa buot modani kanato, kita motugyan. Kita nag-uyon-uyon. Kita nagdawat. Kita nagtugyan, ug kita naulaw sa atong mga kaugalingon. … Kinahanglan kitang mag-ugmad sa kalig-on sa pagsunod sa atong mga lig-on nga pagtuo.⁷

Ang paagi sa ebanghelyo usa ka masayon nga paagi. Ang pipila sa mga kinahanglanon tingali makita ninyo nga masukaranon ug wala kinahanglana. Ayaw sila isalikway. Ipaubos ang inyong mga kaugalingon ug lakaw diha sa pagkamasulundon. Mosaad ko nga ang mga resulta nga mosunod mahimong talagsaon nga tan-awon ug makapatagbaw nga masinati.⁸

Ang akong dakong hangyo mao nga kitang tanan mas maningkamot sa pagpakita sa pagka-diosnon nga anaa kanato. Makabuhat kita og mas maayo pa kay sa atong gibuhat karon. Mamahimo kita nga mas maayo pa kay sa kita karon. Kon kanunay natong hinumduman kanang larawan sa diosnon nga kabilin, sa Pagkaamahan sa Dios ug sa pagkaigsoon sa tawo isip mga katinuoran, mahimo kitang mas mainantuson, mas mabination, mas makab-uton aron sa pagbayaw ug pagtabang ug pagpaluyo niadtong taliwala kanato. Mominos ang atong pagnunut niadtong mga butang diin klarong dili angay [sa] ato.⁹

Ang relihiyon diin kamo kabahin kinahanglang magamit sa atong mga kinabuhi sa pito ka adlaw matag semana, kini dili Dominggo lamang. … Kini sa tanang panahon—baynte kwatro ka oras matag adlaw, pito ka adlaw matag semana, 365 ka mga adlaw matag tuig.¹⁰

Ang Ginoo nagdahum nga atong han-ayon ang atong mga kinabuhi, nga atong sundon ang ebanghelyo sa matag bahin.¹¹

Ang Dios mobubu og mga panalangin niadtong kinsa naglakaw diha sa pagkamasulundon sa Iyang mga kasugoan.

Ang Ginoo misugo kang Elias sa pag-adto ug sa pagtago sa iyang kaugalingon duol sa sapa sa Cherith, nga didto kinahanglan siyang moinom sa sapa, ug nga siya pakan-on sa mga langgam nga uwak. Ang kasulatan nag-rekord og usa ka yano ug talagsaon nga pahayag mahitungod ni Elias: “Busa siya miadto ug naghimo sumala sa pulong sa Ginoo” (1 Mga Hari 17:5).

Si Elias wala nakiglantugi [uban sa Ginoo mahitungod sa pag-adto]. Wala siya mihatag og mga pasumangil [mahitungod nganong dili siya makaadto]. Wala siya mamakak [sa pagsulay og likay sa pagbuhat sa unsay gisugo sa Ginoo]. Sa yano si Elias “miadto ug naghimo sumala sa pulong sa Ginoo.” Ug siya naluwas gikan sa makahahadlok nga mga kalamidad nga midangat niadtong kinsa mitamay ug misupak ug nagduhaduha.¹²

Ang tibuok asoy sa Basahon ni Mormon mao ang usa ka asoy nga naghisgot sa mga katawhan kinsa, sa dihang sila mga matarung, sa dihang misimba sila ni Jesukristo, miuswag diha sa yuta ug gipanalanginan sa Ginoo sa buhong nga paagi; ug sa dihang nakasala sila ug nangasaag ug nakalimot sa ilang Dios, nahulog sila ngadto sa kasakit ug sa gubat ug sa kasamok. Ang inyong kahilwasan, inyong kalinaw, inyong kauswagan naggikan sa pagkamasulundon sa mga kasugoan sa Labawng Makagagahum.¹³

“Paghupot sa akong mga sugo sa kanunay, ug ang korona sa pagkamatarung ikaw makadawat. [D&P 25:15.] Mao kana ang saad sa Ginoo ngadto kang Emma Hale Smith. Mao kana ang saad sa Ginoo ngadto sa matag usa kaninyo. Ang kalipay naggikan sa paghupot sa kasugoan. Alang sa usa ka Santos sa Ulahing mga Adlaw … kasakit lamang ang sangputanan sa pagsupak niadto nga mga kasugoan. Ug sa matag usa nga nagsunod kanila, adunay saad sa korona … sa pagkamatarung ug mahangturon nga kamatuoran.¹⁴

Ang tinuod nga kagawasan naggikan sa pagkamasulundon ngadto sa mga tambag sa Dios. Giingon sa karaan nga panultihon nga “ang sugo maoy usa ka lamparahan; ug ang balaod maoy suga.” (Prob. 6:23.)

Ang ebanghelyo dili usa ka pilosopiya sa pagpugong, sama sa unsay gituohan sa kadaghanan. Usa kini ka plano sa kagawasan nga naghatag og disiplina sa kaibog ug direksyon sa kinaiya. Tam-is ang mga bunga niini ug manggihatagon ang mga ganti niini. …

“Busa kinahanglan managbarug kamo nga malig-on, ug ayaw na kamo pagpasangon pag-usab sa yugo sa pagkaulipon.” (Mga Taga-Gal 5:1.)

“Diin gani ang Espiritu sa Ginoo, anaa usab diha ang kagawasan.” (2 Mga Taga-Cor. 3:17.)¹⁵

Ang atong kahilwasan naggikan sa paghinulsol. Ang atong kalig-on naggikan sa pagkamasulundon ngadto sa mga kasugoan sa Dios. … Himoon nato nga mobarug nga malig-on batok sa kadautan, sa panimalay ug sa gawas. Himoon natong magpakabuhi nga takus sa mga panalangin sa langit, tarungon ang atong mga kinabuhi kon gikinahanglan ug motan-aw Kaniya, ang Amahan natong tanan.¹⁶

Wala kitay angay kahadlokan. Ang Dios ang nagtimon. Siya ang magdumala alang sa kaayo niini nga buhat. Mobubu Siya og mga panalangin niadtong kinsa naglakaw diha sa pagkamasulundon sa Iyang mga Sugo. Ang ingon mao ang Iyang saad. Walay usa kanato nga makaduda sa Iyang abilidad sa pagtuman niana nga saad.¹⁷

Ang Simbahan motudlo sa dalan ug modapit sa matag miyembro sa pagsunod sa ebanghelyo.

Adunay moingon, “Ang Simbahan dili angay nga modiktar kanako unsay akong pagtuo niini, niana, o sa uban, o unsaon nako pagdala ang akong kinabuhi.”

Dili, ako motubag, ang Simbahan dili modiktar ni bisan kinsang tawo kon unsay iyang hunahunaon o unsay iyang buhaton. Ang Simbahan motudlo sa dalan ug modapit sa matag miyembro sa pagsunod sa ebanghelyo ug makatagamtam sa mga panalangin nga moabut sa maong pagpuyo. Ang Simbahan dili modiktar ni bisan kinsang tawo, pero kini motambag, kini moawhag, kini modasig, ug magpaabot og kamaunungon gikan niadtong moingon nga miyembro siya sa simbahan.

Sa dihang estudyante pa ako sa unibersidad, ako miingon sa akong amahan sa usa ka higayon nga akong gibati nga ang mga General Authority misobra sa ilang mga katungod kon sila moduso og usa ka butang. Maalamon kaayo siya ug maayong tawo. Siya miingon, “Ang Presidente sa Simbahan misugo kanato ug ako mopaluyo kaniya isip propeta, manalagna, ug tigpadayag ug buot nga mosunod sa iyang tambag.”

Nag-alagad ako … sa kinatibuk-ang mga konseho sa Simbahan sulod sa [daghan] nga katuigan. … Gusto akong mohatag sa akong pagpamatuod nga bisan og ako nakaapil sa liboan ka mga miting diin ang mga lagda ug mga programa sa Simbahan gihisgutan, wala gayud ako makaapil bisan kausa nga wala tinguhaa ang giya sa Ginoo ni adunay bisan unsang butang nga makadaot o mapugsanon.¹⁸

Ako mosulti alang sa matag usa ug sa tanan nga kami walay personal nga agenda. Kami adunay agenda sa Ginoo. Adunay mosaway kon kami moisyu og usa ka pamahayag sa tambag o pasidaan. Palihug hibaloi nga ang among mga pangamuyo wala maaghat sa bisan unsang hinakog nga tinguha. Palihug hibaloi nga ang among mga pasidaan dili ingon nga walay unod ug hinungdan. Palihug hibaloi nga ang mga desisyon sa pagpamulong sa nagkalainlaing mga butang wala makab-ot nga walay pagtimbangtimbang, paghisgot, ug pag-ampo. Palihug hibaloi nga ang among bugtong nga ambisyon mao ang pagtabang sa matag usa kaninyo sa inyong mga problema, sa inyong mga pakigbisog, sa inyong mga pamilya, sa inyong mga kinabuhi. … Walay tinguha sa pagtudlo sa bisan unsa gawas sa unsay buot sa Ginoo nga itudlo. …

Ang amo mao ang responsibilidad nga gilatid ni Ezequiel: “Anak sa tawo, gihimo ko ikaw nga magbalantay alang sa balay sa Israel: busa pamati sa pulong sa akong baba, ug hatagi sila og pagpasidaan gikan kanako.” (Ezeq. 3:17.)

Kami walay hinakog nga tinguha sa bisan hain niini, gawas sa pangandoy nga ang atong mga kaigsoonan magmalipayon, nga ang kalinaw ug gugma makita sa ilang mga panimalay, nga sila mapanalanginan pinaagi sa gahum sa Makagagahum sa ilang nagkalain-laing pagpaningkamot diha sa pagkamatarung.¹⁹

Ang Dios kanunay nga nagpahibalo, diha sa iyang pamaagi, sa iyang kabubut-on mahitungod sa iyang mga katawhan. Mosaksi ako kaninyo nga ang mga lider niini nga simbahan dili gayud mohangyo kanato sa pagbuhat sa bisan unsang butang nga dili nato mahimo uban ang tabang sa Ginoo. Mahimo kitang mobati nga may kulang. Kanang gihangyo kanato sa pagbuhat mahimong dili nato ganahan o dili haum sa atong mga ideya. Apan kon kita maningkamot uban ang hugot nga pagtuo ug pag-ampo ug resolusyon, mahimong makatuman kita niini.

Magpamatuod ako kaninyo nga ang kalipay sa mga Santos sa Ulahing mga Adlaw, ang kalinaw sa mga Santos sa Ulahing mga Adlaw, ang kauswagan sa mga Santos sa Ulahing mga Adlaw, ang kausbawan sa mga Santos sa Ulahing mga Adlaw, ug ang mahangturon nga kaluwasan ug kahimayaan niini nga katawhan naggikan sa paglakaw diha sa pagkamasulundon sa mga tambag sa pagkapari sa Dios.²⁰

Ang gagmay nga mga desisyon mahimong mopadulong ngadto sa makahahadlok nga mga sangputanan.

Makahulagway ko og usa ka baruganan … diin, kon sundon, makapadako og maayo sa kalagmitan nga ang atong mga desisyon mahimong sakto, ug agig resulta ang atong kauswagan ug kalipay sa kinabuhi mapalambo og maayo. Kining mahinungdanon nga baruganan mao ang paghupot sa hugot nga pagtuo. …

Dili ko makasulti kaninyo sa detalye unsaon pag-desisyon sa matag butang. Apan makasaad ko nga kon inyong himuon ang inyong mga desisyon sumala sa mga sumbanan sa ebanghelyo ug sa mga pagtulun-an sa Simbahan, ug kon kamo maghupot sa hugot nga pagtuo, ang inyong mga kinabuhi mamunga og hilabihan nga kaayohan ug makadawat kamo og tumang kalipay ug katumanan.²¹

Daghang katuigan ang milabay nagtrabaho ko sa usa ka rilis. … Mao kadto ang panahon nga halos tanan tawo misakay sa mga de-pasahero nga mga tren. Usa ka buntag niana nakadawat ko og usa ka tawag gikan sa akong kauban sa trabaho didto sa Newark, New Jersey. Miingon siya, “Ang tren nga mao-ni-mao-na miabut na, apan kini walay sakyanan sa bagahe. Sa usa ka dapit, 300 ka mga pasahero nawad-an sa bagahe, ug sila naglagot.”

Sa diha-diha dayon miadto ko sa trabahuan aron susihon diin kini nangawala. Nahibaloan nako nga husto ang pagkakarga niini ug husto ang pagbiyahe sa Oakland, California. Nahatud kini sa among rilis didto sa Salt Lake City [ug sa katapusan miabut sa] St. Louis. Didto unta kini gidala sa lain nga rilis nga padulong sa Newark, New Jersey. Apan usa ka dili mahunahunaon nga switchman didto sa St. Louis nga istasyon mipasibog sa usa ka gamay nga piraso sa puthaw nga tulo ka pulgada [7.5 ka sentimetro] lamang, usa ka switch point, ug dayon mibira sa ligwat aron sa pagpabulag sa sakyanan. Among nadiskubrehan nga usa ka sakyanan sa bagahe nga dapat nahatud sa Newark, New Jersey, sa pagkatinuod nahatud sa New Orleans, Louisiana—1,500 ka milya [2,400 ka kilometro] gikan sa iyang padulnganan. Ang tulo ka pulgada lamang nga pagsibog sa switch didto sa istasyon sa St. Louis tungod sa usa ka dili mabinantayon nga empleyado ang misugod niini sa sayop nga dalan, ug ang distansya gikan sa iyang tinuod nga padulnganan midako og maayo. Sama usab niana ang atong mga kinabuhi. Imbis nga magsunod sa usa ka dili matipason nga dalan, nabira kita pinaagi sa sayop nga ideya ngadto sa lain nga direksyon. Ang pagsibog nato palayo gikan sa atong unang padulnganan mahimong gamay ra kaayo, apan, kon mapadayon, kana nga gamay kaayo nga pagsibog mahimong dako kaayo nga kang-a ug makita nato ang atong kaugalingon nga layo na gikan sa dapit nga atong gitumong nga adtuon. … Ang gagmay nga mga butang nga nag-impluwensiya sa atong mga kinabuhi maoy makahimo og dako nga kalahian diha sa atong mga kinabuhi.²²

Usa ka adlaw niana miduol ko sa usa ka dako nga ganghaan sa umahan. Giisa nako ang trangka ug gi-ablihan ang ganghaan. Ang pagsibog diha sa mga bisagra diyutay ra kaayo nga dili kaayo mamatikdan. Apan ang pikas tumoy sa ganghaan milabyog ngadto sa lima ka metro nga radyos. Nagtan-aw lamang sa pagsibog sa mga bisagra, ang usa ka tawo dili magdahum sa napadako nga aksyon nga miresulta tungod nianang diyutay nga pagsibog.

Sama niini ang mga desisyon sa atong mga kinabuhi. Ang diyutay nga hunahuna, diyutay nga pulong, diyutay nga buhat makadala ngadto sa makahahadlok nga mga sangputanan.²³

abli nga metal nga ganghaan — Si Presidente Hinckley mitandi sa atong mga desisyon ngadto sa mga bisagra sa usa ka ganghaan sa umahan.

Pinaagi sa pagsunod sa ebanghelyo, nagpalig-on kita sa Simbahan ug nagtabang sa pagpalambo sa buhat sa Dios sa tibuok kalibutan.

Mas mapalig-on ninyo [ang Simbahan] pinaagi sa inyong pagpakabuhi. Himoa ang ebanghelyo nga inyong espada ug inyong taming. …

… Pagkanindut sa umaabot samtang ang Labawng Makagagahum magpadayon sa Iyang mahimayaon nga buhat, naghatag og maayong impluwensiya sa tanan kinsa modawat ug mosunod sa Iyang ebanghelyo.²⁴

Makita nako ang usa ka talagsaon nga umaabot diha sa usa ka walay siguro nga kalibutan. Kon mokupot kita sa atong mga mithi, kon mopalig-on kita sa mga mithi nga atong nakat-unan gikan sa atong mga ginikanan ug mga katigulangan, kon molakaw kita diha sa pagkamasulundon sa atubangan sa Ginoo, kon mosunod lamang kita sa ebanghelyo, mapanalanginan kita sa usa ka maanindot ug katingalahan nga paagi. Makita kita isip usa ka talagsaon nga mga katawhan kinsa nakakaplag na sa yawe sa usa ka talagsaon nga kalipay.²⁵

Himoa nga ang matag lalaki ug babaye ug bata maninguha nga himoon ang buhat sa Ginoo nga mas maayo ug mas lig-on ug mas dako kay sa unsa kini sukad kaniadto. Ang kalidad sa atong mga kinabuhi maoy makahimo og kalainan. Ang atong pagpaningkamot nga mosunod sa ebanghelyo ni Jesukristo maoy makahimo og kalainan. Kini usa ka tinagsatagsa nga butang. Kon kitang tanan mag-ampo, ang Simbahan mas malig-on og maayo. Ug sama lamang niini ang matag baruganan sa ebanghelyo. Himoon nato nga apil kita niining dungganan nga nag-abante nga kawsa nga nag-anam og kadako sa tibuok kalibutan. Dili mahimo nga magpundo lamang kita, kinahanglan kitang magpadayon sa unahan. Kinahanglan kitang magbuhat sa ingon. Ang personal nga kadasig nga anaa sa matag usa sa atong mga kasingkasing mao ang tinuod nga kalig-on sa Simbahan. Kon wala niini, gamay ra kaayo ang anaa kanato; kon aduna niini, anaa kanato ang tanang butang.²⁶

Gidapit nako ang matag usa kaninyo, bisan asa man kamo sa inyong katungdanan nga mga miyembro niini nga simbahan, nga mobarug sa inyong mga tiil ug uban ang usa ka awit sa inyong kasingkasing nga mopadayon sa unahan, nagpakabuhi sa ebanghelyo, naghigugma sa Ginoo, ug naglig-on sa gingharian. Mopadayon kita sa pagsunod sa ebanghelyo nga nag-uban, ang Labawng Makagagahum mao ang atong kalig-on.²⁷

Mga Sugyot alang sa Pagtuon ug Pagtudlo

Mga Pangutana

Ngano man nga kita, isip mga katawhan sa pakigsaad sa Ginoo, “dili mahimo nga ordinaryo lamang nga mga tawo”? (Tan-awa sa seksyon 1.) Unsa ang pipila ka mga paagi nga ang mga pakigsaad nga inyong gihimo uban sa Dios nag-impluwensiya sa inyong adlaw-adlaw nga panginabuhi?
Nagtudlo si Presidente Hinckley nga “kinahanglan kitang mag-ugmad sa kalig-on sa pagsunod sa atong mga lig-on nga pagtuo” (seksyon 2). Sa unsang paagi nga kita usahay mopauyon-uyon sa atong mga lig-on nga pagtuo? Sa unsang paagi nato mapalig-on ang atong mga kaugalingon sa pagbuntog sa tintasyon?
Sa unsa nato magamit ang pagsulti ni Presidente Hinckley sa istorya ni Elias? (Tan-awa sa seksyon 3.) Sa unsang paagi kamo motubag sa usa ka tawo nga nibati nga ang mga kasugoan istrikto ra kaayo? Sa unsang paagi ninyo nakita nga ang pagsunod sa mga kasugoan nagdala og kagawasan, kahilwasan, ug kalinaw?
Ribyuha ang pagpasabut ni Presidente Hinckley sa unsang paagi nga ang mga lider sa Simbahan naghatag og tambag ug mga pahimangno? (tan-awa sa seksyon 4). Sa unsang paagi nga kamo napanalanginan pinaagi sa pagsunod sa tambag sa mga lider sa Simbahan?
Unsay atong makat-unan gikan sa istorya ni Presidente Hinckley mahitungod sa nawala nga sakyanan sa bagahe? (Tan-awa sa seksyon 5.) Ngano man nga ang gagmay nga mga desisyon o mga aksyon makahimo og dako kaayo nga kalahian sa atong mga kinabuhi? Unsay usa ka gamay nga desisyon nga nakahimo og dako nga kalahian sa inyong kinabuhi? Sa unsang paagi nga kita mas makaila sa gagmay nga mga pagtipas nga makadala kanato palayo gikan sa dalan sa Dios?
Sa unsang paagi nga ang pagsunod sa ebanghelyo makatabang kanato nga makasagubang sa mga kawalay kasigurohan diha sa kalibutan? (Tan-awa sa seksyon 6.) Sa unsang paagi nga ang pagsunod sa ebanghelyo makapasayon sa atong mga kinabuhi? Hunahunaa sa unsang paagi nga kamo mas aktibong makapalig-on sa Simbahan ug makatabang sa pagpalambo sa buhat sa Dios sa tibuok kalibutan.

May Kalabutan nga mga Kasulatan

Deuteronomio 4:39–40; Mga Hebreohanon 5:8–9; D&P 64:33–34; 93:26–28; 98:22; Abraham 3:24–26; Mga Artikulo sa Hugot nga Pagtuo 1:3

Tabang sa Pagtuon

“Ang pagbasa, pagtuon, ug pagpamalandong dili managsama. Mobasa ta sa mga pulong ug dayon makakuha ta og mga ideya. Magtuon kita ug dayon atong madiskubrihan ang mga sumbanan ug koneksyon sa kasulatan. Apan kon mamalandong kita, nagdapit kita sa pagpadayag pinaagi sa Espiritu. Ang pagpamalandong, alang kanako, mao ang paghunahuna ug pag-ampo nga akong buhaton human sa mainampingon nga pagbasa ug pagtuon sa mga kasulatan” (Henry B. Eyring, “Pagserbisyo uban sa Espiritu,” Ensign o Liahona, Nob. 2010, 60).