Pasiuna

Ang Unang Kapangulohan ug ang Korum sa Napulog Duha ka mga Apostoles mihan-ay sa sunod-sunod nga Mga Pagtulun-an sa mga Presidente sa Simbahan aron sa pagtabang ninyo nga mas maduol ngadto sa inyong Langitnong Amahan ug sa pagpalawom sa inyong pagsabut sa gipahiuli nga ebanghelyo ni Jesukristo . Samtang ang Simbahan magdugang og mga basahon dinhi niini nga han-ay, makahimo kamo og koleksyon sa mga basahon nga pakisayran sa ebanghelyo diha sa inyong panimalay. Kini nga mga basahon gihimo aron gamiton alang sa personal nga pagtuon ug isip mga pakisayran sa pagtudlo. Kini makatabang usab kaninyo sa pag-andam og mga leksyon sa family home evening, pag-andam og uban nga mga leksyon o mga pakigpulong, ug sa pagtubag sa mga pangutana mahitungod sa doktrina sa Simbahan.

Kini nga basahon naghisgot sa mga pagtulun-an ni Presidente Gordon B. Hinckley, kinsa nagserbisyo isip Presidente sa Ang Simbahan ni Jesukristo sa mga Santos sa Ulahing mga Adlaw gikan sa Marso 12, 1995 ngadto sa Enero 27, 2008.

Personal nga Pagtuon

Samtang kamo magtuon sa mga pagtulun-an ni Presidente Gordon B. Hinckley, tinguhaa sa mainampuong paagi ang inspirasyon sa Espiritu Santo. Ang mga pangutana diha sa katapusan sa kada kapitulo makatabang kaninyo sa pagpamalandong, pagsabut, ug paggamit sa mga pagtulun-an ni Presidente Hinckley. Ang mosunod nga mga ideya mahimong makatabang usab:

Pagsulat og mga ideya ug pagbati nga inyong madawat gikan sa Espiritu Santo samtang magtuon mo.
Linyahi ang mga tudling nga gusto ninyong mahinumduman. Ikonsiderar ang pagmemorya niini nga mga tudling o isulat kini diha sa inyong mga kasulatan tupad sa may kalabutang mga bersikulo.
Pagbasa og kapitulo o pagtulun-an sobra sa kausa aron inyong mas masabtan kini.
Pangutan-a ang inyong kaugalingon sama sa “Sa unsang paagi ang mga pagtulun-an ni Presidente Hinckley makapalambo sa akong pagsabut sa mga baruganan sa ebanghelyo?” o “Unsay gusto sa Ginoo nga akong makat-unan gikan niining mga pagtulun-an? Unsa ang gusto Niyang ipabuhat kanako?”
Pangutan-a ang inyong kaugalingon kon sa unsang paagi ang mga pagtulun-an niining basahon makatabang sa inyong personal nga mga hagit ug mga kabalaka.
Pagpakigbahin sa inyong nakat-unan sa mga sakop sa pamilya ug mga higala.

Pagtudlo gikan Niini nga Basahon

Ang mosunod nga mga sumbanan motabang kaninyo sa pagtudlo gikan niini nga basahon, sa panimalay man o sa simbahan.

Pangandam sa Pagtudlo

Tinguhaa ang giya sa Espiritu Santo samtang nangandam kamo sa pagtudlo. Tun-i ang kapitulo aron mahimong masaligon sa inyong pagsabut sa mga pagtulun-an ni Presidente Hinckley, ug pili-a sa mainampuong paagi ang mga pagtulun-an nga inyong gibati nga labing makatabang kaninyo.

Mahimo ninyong awhagon kadtong inyong tudluan nga sila mismo magtuon sa kapitulo ug maghatag og espesyal nga pagtagad sa seksyon nga “Mga Sugyot alang sa Pagtuon ug Pagtudlo” diha sa katapusan sa kapitulo.

Awhaga ang Diskusyon kabahin sa Mga Pagtulun-an ni Presidente Hinckley

Samtang magtudlo mo gikan niini nga basahon, dapita ang uban sa pagpakigbahin sa ilang mga hunahuna, sa pagpangutana, sa pagpamatuod, ug sa pagtudlo sa usag usa. Kon aktibo silang moapil, mas andam silang makat-on ug modawat og personal nga pagpadayag.

Tuguti nga magpadayon ang maayo nga mga panaghisgot kay sa maningkamot nga mahuman ang tanang mga pagtulun-an. Giyahi ang mga panaghisgot aron sa pagtabang sa mga partisipante sa pagbasa sa mga pagtulun-an ni Presidente Hinckley ug sa pagdiskubre og mga paagi nga magamit kadto nga mga pagtulun-an sa ilang mga kinabuhi.

Bililhon ang mga pangutana diha sa katapusan sa kada kapitulo nga kapanguhaan alang sa pag-awhag og panaghisgot. Mahimo usab kamo nga maghimo og inyong kaugalingon nga mga pangutana alang gayud niadtong inyong gitudloan. Ang pipila ka mga ideya sa panaghisgot anaa sa ubos:

Hangyoa ang mga partisipante sa pagpakigbahin sa unsay ilang nakat-unan gikan sa ilang personal nga pagtuon sa kapitulo.
Ihatag ang pinili nga mga pangutana diha sa katapusan sa kapitulo ngadto sa tagsa-tagsa o sa ginagmay nga mga grupo. Hangyoa ang mga partisipante sa pagpangita sa mga pagtulun-an diha sa kapitulo nga may kalabutan sa mga pangutana. Dayon dapita sila sa pagpakigbahin sa ilang mga hunahuna ug mga panan-aw.
Basaha og dungan ang pipila sa mga pagtulun-an ni Presidente Hinckley diha sa kapitulo. Hangyoa ang mga partisipante sa pagpakigbahin og mga ehemplo gikan sa mga kasulatan ug gikan sa ilang kaugalingon nga mga kasinatian nga may kalabutan niadtong mga pagtulun-an.
Hangyoa ang mga partisipante sa pagpili og usa ka seksyon ug ipabasa kini sa hilom. Dapita sila sa paggrupo og tinagurha o tinagutlo ka tawo kinsa mipili sa sama nga seksyon ug maghisgot unsay ilang nakat-unan.

Awhaga ang Paggamit ug Pagpakigbahin

Ang mga pagtulun-an ni Presidente Hinckley mahimong labing makahuluganon kon ang mga indibidwal mogamit niini sa ilang mga kinabuhi ug mopakigbahin niini ngadto sa uban. Mahimo ninyong gamiton ang usa o labaw pa sa mosunod nga mga ideya:

Pangutan-a ang mga partisipante kon sa unsang mga paagi ilang magamit ang mga pagtulun-an ni Presidente Hinckley sa ilang mga responsibilidad sa panimalay, diha sa Simbahan, ug diha sa uban nga mga dapit.
Dapita ang mga partisipante sa pagpakigbahin sa ilang mga kasinatian samtang sila misunod sa tambag ni Presidente Hinckley.
Awhaga ang mga partisipante sa pagpakigbahin sa pipila sa mga pagtulun-an ni Presidente Hinckley uban sa mga sakop sa pamilya ug mga higala.

Tapusa ang Panaghisgot

I-summarize og daklit ang leksyon o hangyoa ang usa o duha ka partisipante sa paghimo niini. Pagpamatuod sa mga pagtulun-an nga inyong nahisgutan, ug awhaga ang mga partisipante sa paggamit unsay ilang nakat-unan. Mahimo usab ninyong dapiton ang uban sa pagpakigbahin sa ilang mga pagpamatuod.

Impormasyon mahitungod sa Tinubdan nga mga Materyal

Ang mga pagtulun-an niini nga basahon direkta nga gikutlo gikan sa mga wali, mga sinulat, ug mga interbyu ni Presidente Gordon B. Hinckley. Ang mga kinutlo gikan sa gimantala nga mga tinubdan mibilin sa punctuation, spelling, capitalization, ug paragraphing sa orihinal nga mga tinubdan gawas kon ang editoryal o tipograpikal nga mga kausaban gikinahanglan aron sayon basahon. Tungod kay ang mga kinutlo nagpabilin sa pagkamatinud-anon ngadto sa gimantala nga mga tinubdan, makamatikod mo og ginagmay nga mga kausaban diha sa estilo sa teksto. Sama pananglit, ang mga pronoun nga nagpasabut sa Dios wala ikapital sa pipila ka mga kinutlo ug gikapital sa uban.

Si Presidente Hinckley kasagaran migamit og mga termino nga mga tawo, tawo, ug katawhan nga nagpasabut ngadto sa tanang mga tawo, lalaki ug babaye. Kanunay usab siya nga migamit sa mga pronoun nga siya, iya, ug kaniya nga nagpasabut sa lalaki ug babaye. Kini nga mga lagda sa sinultihan komon sa iyang panahon.