Librarya
Mga Milagro

“Mga Milagro,” Mga Hilisgotan ug mga Pangutana (2023)

Giayo ni Jesukristo ang tawo

Giya sa Pagtuon sa Ebanghelyo

Mga Milagro

Mga pagpakita sa gahom ug gugma sa Dios

Unsa ang pipila ka rason kon nganong nagtuo ka nga tinuod ang Dios ug nga Siya nakaila nimo? Makahunahuna ba ka og mga higayon dihang nahibaloan nimo nga nagpakita Siya sa Iyang gugma alang kanimo? Si Presidente Russell M. Nelson mitudlo, “Mag-ampo aron makaangkon og mga mata nga makakita sa kamot sa Dios sa inyong kinabuhi ug sa kalibotan libot kaninyo.” Ang mga milagro nagrepresentar sa mga higayon diin ang Dios naglihok uban sa Iyang gahom alang sa Iyang mga anak.

Sa mga kasulatan, makat-onan nato ang dagkong mga milagro nga gipahigayon sa Halangdong Jehova alang sa Iyang katawhan sa Daang Tugon. Makat-onan usab nato ang mga milagro nga gipahigayon ni Jesukristo atol sa Iyang mortal nga kinabuhi diha sa Bag-ong Tugon ug isip nabanhaw nga Ginoo sa Basahon ni Mormon. Pero ang labing dako sa tanang milagro mao ang Iyang Pag-ula, dihang Iyang gitubos ang kalibotan gikan sa sala ug nabanhaw gikan sa mga patay. Karon makita nato ang Iyang mga buhat ug mga milagro, dagko man o gagmay, diha sa atong mga kinabuhi ug makat-onan nga “ang Ginoo maayo sa tanan ug maluluy-on sa tanan niyang binuhat” (Salmo 145:9).

Unsa Ang Milagro?

Ang milagro usa ka pagpakita sa balaan nga gahom. Ang mga milagro maoy importanteng bahin sa buluhaton ni Jesukristo, sukad sa unang kapanahonan ug karon.

Katibuk-ang pagpasabot sa hilisgotan: Mga Milagro

May kalabotan nga mga giya sa pagtuon sa ebanghelyo: Mortal nga Pagpangalagad ni Jesukristo, Pag-ampo, Hugot nga Pagtuo kang Jesukristo, Mga Panalangin sa Pagkapari

Seksiyon 1

Si Jesukristo Mao ang Dios sa mga Milagro

Gipakalma ni Jesukristo ang unos

Ang mga milagro kanunay nga kabahin sa buhat sa Dios taliwala sa Iyang mga anak. Ang Daan ug Bag-ong mga Tugon naglakip og mga asoy sa pagpakita ni Jesukristo sa balaanong gahom alang sa mga anak sa Langitnong Amahan. Giila karon sa mga sumusunod ni Jesukristo nga ang kamot sa Dios nagpadayon sa pagpakita sa milagrosong mga paagi diha sa Iyang Simbahan ug sa kinabuhi sa mga indibidwal ug mga pamilya. Ang Dios mipahayag, “Kay tan-awa, Ako mao ang Dios; ug Ako mao ang usa ka Dios sa mga milagro; ug Ako mopakita ngadto sa kalibotan nga Ako sama sa kagahapon, sa karon, ug sa kahangtoran; ug Ako dili mobuhat taliwala sa mga katawhan gawas kini sumala sa ilang hugot nga pagtuo” (2 Nephi 27:23).

Mga butang nga angayang hunahunaon

  • Dihang ang duha sa mga disipulo ni Juan Bautista nangutana kang Jesus, “Ikaw ba kadtong moanhi, o magpaabot pa ba kamig lain?” Si Jesus naghatag og mga pananglitan aron ipakita kon kinsa Siya (tan-awa sa Mateo 11:3–6). Nganong kini nga mga pananglitan nagpamatuod kon kinsa Siya? Ikonsiderar usab kon unsay giingon ni Jesus sa Juan 5:36. Unsa ang katuyoan sa “mga buhat” nga gihimo ni Jesus?

  • Si Elder Ronald A. Rasband mitudlo, “Ang Ginoo mohimo og mga milagro aron pahinumdoman kita sa Iyang gahom, sa Iyang gugma alang kanato, sa Iyang impluwensya sa atong mortal nga kasinatian, ug sa Iyang kagustohan nga motudlo kabahin niana nga maoy labing bililhon.” Unsa ang pipila sa paborito nimong mga milagro nga imong nabasa sa mga kasulatan? Unsay gitudlo niini nga mga milagro kanimo bahin sa Dios?

Kalihokan alang sa pagkat-on uban sa laing mga tawo

  • Dapita ang mga sakop sa grupo nga mopili sa matag usa sa mosunod nga asoy sa mga milagro sa Manluluwas gikan sa Bag-ong Tugon. Ilha ang “kinsa, unsa, asa, kanus-a, ug ngano” sa milagro nga gihulagway sa napili nga tudling. Hisgoti ang pagkaparehas ug kalainan niini nga mga panghitabo. Sa unsang paagi kini nga mga asoy magamit aron mapalig-on ang hugot nga pagtuo sa mga tawo nga imong nailhan?

    • Ang pag-ayo sa duha ka tawo nga buta (tan-awa sa Mateo 9:27–31)

    • Ang pagbanhaw sa anak nga lalaki sa biyuda (tan-awa sa Lucas 7:11–16)

    • Ang pag-ayo sa tawo nga gipakatawo nga buta (tan-awa sa Juan 9)

    • Ang Pagpabuhi og Balik ni Lazaro (tan-awa sa Juan 11:1–45)

Pagkat-on pa og dugang

Seksiyon 2

Moabot ang mga Milagro pinaagi sa Hugot nga Pagtuo kang Jesukristo

Giayo ni Jesukristo ang babaye

Sa Bag-ong Tugon, si Jesukristo misaad sa Iyang mga disipulo nga ang milagrosong “mga timaan nga mabatonan sa mga motuo” (Marcos 16:17–18). Sa ulahing mga adlaw, Siya miingon, “Busa, sumala sa akong mga gikapamulong ngadto sa akong mga apostoles Ako moingon nganha kaninyo pag-usab, nga matag kalag kinsa mituo sa inyong mga pulong, ug nabunyagan pinaagi sa tubig alang sa kapasayloan sa mga sala, makadawat sa Espiritu Santo. Ug … ang mga timailhan mosunod kanila nga motuo” (Doktrina ug mga Pakigsaad 84:64–65). Alang niadtong motuo sa Dios ug kang Jesukristo, ang mga milagro posible kaayo, pero kinahanglan una sila nga magbaton og hugot nga pagtuo (tan-awa sa Ether 12:12–18).

Pero dili ta angayng mangita og mga milagro isip usa ka paagi sa pagpalig-on o pagpanghimatuod sa atong hugot nga pagtuo. Ang Ginoo miingon kang Joseph Smith: “Ang hugot nga pagtuo moabot dili pinaagi sa mga timailhan, apan ang mga timailhan mosunod niadto nga motuo. Oo, ang mga timailhan moabot pinaagi sa hugot nga pagtuo, dili pinaagi sa kabubut-on sa mga tawo, ni sa ilang pagbuot, apan pinaagi sa kabubut-on sa Dios” (Doktrina ug mga Pakigsaad 63:9–10). Si propeta Moroni misulat, “Kamo dili makadawat og saksi hangtod human sa pagsulay sa inyong hugot nga pagtuo” (Ether 12:6). Ang pagpamatuod nga nagsugod sa pagsaksi og milagro dili molungtad kon dili kini maatiman pinaagi sa padayon nga hugot nga pagtuo ug pagkamasulundon.

Ang ubang milagro mahitabo sa hilom, sama kon ang usa ka two makaangkon og pagpamatuod sa kamatuoran sa Dios, makasinati og dakong kausaban sa kasingkasing, makadawat og kapasayloan gikan sa Ginoo, o mapanalanginan og kalinaw ug kalig-on panahon sa kalisdanan (tan-awa sa` Alma 37:6–7).

Mga butang nga angayang hunahunaon

  • Ikonsiderar ang giingon sa anghel kang Maria: “Kay sa Dios walay imposible” (Lucas 1:37). Nakaatubang na ba ka og usa ka butang nga morag imposible nga matuman o masulbad? Sa unsang paagi ang pagtuon sa mga asoy sa kasulatan sa mga milagro nga gipahigayon pinaagi sa gahom sa Dios mag-andam nimo sa pagduol ngadto Kaniya ug pagsalig sa Iyang gugma, kaluoy, ug kabubut-on?

Kalihokan alang sa pagkat-on uban sa laing mga tawo

  • Si Presidente Howard W. Hunter namulong sa daghang makapahingangha nga mga milagro nga gihimo ni Jesukristo. Dayon siya mipakigbahin:

    “Makapahingangha nga masaksihan ang usa nga bungol nga nakadungog pag-usab. Apan segurado nga kanang dako nga panalangin dili mas makapahingangha kay sa katingalahang kombinasyon sa mga bukog ug panit ug mga ugat nga makapahimo nga atong madungog ang matahom nga kalibotan sa huni. Dili ba angay tang mobarog nga mahingangha sa panalangin nga makadungog ug mohatag og himaya sa Dios alang niana nga milagro, sama sa atong himoon dihang gipahiuli ang pandungog human kini mawala?

    “Dili ba sama ra kini dihang nahibalik ang panan-aw sa usa ka tawo o paglitok sa atong sinultihan o gani kanang labing dako sa tanang milagro—ang pagpahiuli sa kinabuhi? Ang orihinal nga mga nilalang sa Amahan naglangkob sa usa kakalibotan nga puno gayod sa katingalahan. Dili ba ang labing dako nga mga milagro mao man ang kamatuoran nga kita adunay kinabuhi ug mga bukton ug mga bitiis ug panan-aw ug sinultihan?”

    Sa unsang paagi kini nga panglantaw sa daghang milagro sa atong mga kinabuhi nakadugang sa atong pasalamat alang sa Dios sa mga milagro?

Pagkat-on pa og dugang

Seksiyon 3

Tinguhaa ug Dahoma ang mga Milagro sa Imong Kinabuhi

lalaking naglakaw sa baybayon

Aduna kanunay mga milagro basta adunay mga tawo nga dunay hugot nga pagtuo (tan-awa sa Moroni 7:27–29). Si Presidente Russell M. Nelson mitudlo nga kinahanglan natong “tinguhaon ug dahomon ang mga milagro.” “Ang Ginoo mopanalangin kaninyo og mga milagro nga inyong gikinahanglan kon kamo motuo Kaniya, ‘sa walay pagduhaduha’ [Mormon 9:21]. Buhata ang espirituhanong buhat sa pagtinguha og mga milagro. Sa mainampoong paagi pangayo sa Dios nga tabangan ka nga magamit nimo kana nga matang sa hugot nga pagtuo.”

Ang mga milagro anaa sa atong palibot kada adlaw. Si Elder Ronald A. Rasband mipasabot: “Daghan kaninyo ang nakasaksi og mga milagro, sobra pa sa inyong mahunahunaan. Kini tingali mora og gamay ra kon itandi sa pagbanhaw ni Jesus sa mga minatay. Apan ang gidak-on niini dili mao ang nakapahimo niini nga milagro, ang nakapahimo niini nga milagroso tungod kay naggikan kini sa Dios.”

Mga butang nga angayang hunahunaon

  • Ikonsiderar ang tambag ni Presidente Nelson. Unsay ipasabot sa “pagtinguha” og mga milagro sa imong kinabuhi? Unsa ang “espirituhanon nga buhat” nga kinahanglan nimong himoon aron “tinguhaon ang mga milagro”? Sa unsang paagi ka mapanalanginan pinaagi sa pagpangita og mga paagi nga naglihok ang Dios sa imong kinabuhi?

  • Basaha ang Mormon 9:7–21. Kon ang Dios dili mausab ug nagahatag og mga panan-awon, mga panalangin, ug mga pagpadayag sa Iyang mga anak kaniadto, unsay ipasabot niini nganha kanimo? Kinsay imong nailhan nga makabenepisyo kon iyang mas masabtan nga ang “Dios wala mohunong sa pagka-Dios sa mga milagro”? (Mormon 9:15)

Kalihokan alang sa pagkat-on uban sa laing mga tawo

  • Dapita ang mga sakop sa imong grupo nga ipakigbahin ang higayon dihang nasaksihan nila ang kamot sa Dios nga naghimo og panalangin o milagro sa ilang kinabuhi, kon angayan. Hisgoti ang lainlaing paagi nga nahitabo kini nga mga milagro ug ang lainglaing katuyoan niini.

Pagkat-on pa og dugang