Ayaw Sipyata Kining Debosyonal
Unsaon sa Pagdapit og mga Milagro nganha sa Inyong Kinabuhi
Gikan sa pakigpulong nga gihatag ngadto sa mga estudyante sa Ensign College sa Siyudad sa Salt Lake, Utah, USA, niadtong Marso 24, 2020. Basaha ang kompletong teksto sa ensign.edu.
Desisyoni karon nga makakita, makahimo ug moluhod alang sa milagro, ug ang dako ug talagsaon nga mga panalangin—madako ug magamay—sigurado nga magpaabot kaninyo.
Karon gusto kong maghisgot mahitungod sa usa ka talagsaon nga bahin sa pagpangalagad sa Manluluwas:
Mga Milagro.
Apan imbis mosaysay og balik sa Iyang daghan kaayong milagro sa karaan ug sa bag-ong dapit sa kalibotan, gusto kong mosulti og usa ka milagro nga personal nakong nasaksihan daghang tuig nang milabay, sa paglaom nga kamo mahigmata sa mga milagro nga nagpalibot kaninyo sa matag adlaw.
Ang mga milagro sa kanunay maoy aktibo nga tipik ug kabahin sa maloloy-on ug mahigugmaong Dios ug sa Iyang Anak, si Jesukristo. Sa laing pagkasulti, laomi nga makita ang mga milagro sa inyong kinabuhi.
Unsa man gayod ang makapahimo sa panghitabo sa kinabuhi nga usa ka milagro kay sa kalibotanon? Ang kalibotan mohulagway sa usa ka milagro isip usa ka “talagsaon nga hitabo sa pisikal nga kalibotan nga lapas sa tanang nailhan sa tawo o natural nga mga gahom ug maoy giila nga usa ka kahibulongan nga katuyoan,” “usa ka epekto o mga panghitabo nga nagpakita o gikonsiderar isip usa ka buhat sa Dios,” “usa ka kahibulongan [o] katingalahan.”1
Usa sa mga linya sa akong patriyarkal nga panalangin mabasa, “Ug imong makita ang impluwensiya sa Ginoo diha sa imong kinabuhi … ug ikaw makasaksi og mga milagro.” Sa tinuod lang, kana taphaw ra kaayo nga pahayag. Human sa kapin 60 ka tuig nga pagpakabuhi—ug hapit na nga mamatay—apan usab natingala sa kaayo sa Dios nga nagpadayon sa tanang higayon, ako mopamatuod kaninyo nga akong nakita ang milagroso ug maloloy on nga impluwensiya sa Ginoo sa akong kinabuhi sa matag adlaw.
Ako sa pagkatinuod nakasaksi og mga milagro.
Ug—aniay pasidaan sa importanting detalye—ako mopamatuod uban sa kasiguroan nga ang matag usa kaninyo, bisan unsa pay inyong sitwasyon o kahimtang, nakasinati usab og mga milagro sa inadlaw adlaw nga paagi, bisan og tingali wala kamo makabantay sa kadaghanan niini.
Ang atong problema isip mga Santos dili ang kakulang sa mga panalangin. Ang atong problema mao nga kita isip katawhan sa pakigsaad sa Ginoo adunay tamboanan sa langit nga abli kaayo uban sa mga panalangin nga gibubo sa pagkatinuod. Kita buhong kaayong gipanalanginan nga ang dili maihap nga mga milagro nga nagpalibot kanato usahay nahimong ordinaryo na lang o dili na gani mabatyagan sa atong mga kinabuhi. Subo lang, kining pag-angkon og naghinobrang kabuhong wala makaagni sa atong hingpit nga pagtagad, ni sa pagpasalamat, nga gikinahanglan gayod niini. Sama ra nga adunay hangin sa atong luyo, kita usahay dili lang makamatikod sa pagkahalangdon ug pagkagamhanan sa mga milagro nga nagpalibot kanato.
Karon, gusto ko nga mosaysay sa usa niadtong gagmay nga mga milagro nga nakaagni sa akong tibuok ug walay pagkabahin nga pagtagad, usa ka milagro nga dili gayod nako makalimtan.
Ang Nawala nga Singsing
Dili pa lang dugay human sa pagpamauli gikan sa ilang honeymoon sa sayong` bahin sa Hunyo pipila na ka tuig ang milabay, ang akong anak nga babaye si Emi ug ang akong umagad si Chase adunay usa ka semana nga mopuyo uban kanamo sa dili pa mobalik ngadto sa ilang bag-ong panimalay didto sa California, USA. Nianang semanaha, nagplano sila nga ablihan ang tanang regalo sa ilang kasal, mosulat og mga pasalamat, ug dayon isulod sa sakyanan.
Dili na mistil isulti, apiki kaayo kadto nga semana.
Apan pagkasunod buntag human sa pag-abli sa mga regalo, nakabantay si Emi nga wala na sa iyang kamot ang iyang singsing sa kasal, wala sab kini sa butanganan sa singsing nga iya gyod dumdumon sa pagbutang niini sa matag gabii. Naningkamot nga dili matarantar, nasayod siya nga iyaha gayod kadtong nabutang sa usa ka dapit sa balay ug misugod sa pagpangita niini. Kon hain man kini, sigurado siya nga makit-an ra kini. Apan human sa kaswal nga pagpangita walay nahitabo, iyang gisultihan si Chase ug dayon akong asawa ug ako. Dayon nag-iyahay kami og pangitaay, gipangtan-aw og balik-balik ang natan-aw na og kadaghan, nasayod nga usa namo makakita sa singsing. Lamang, wala namo makit-i.
Lapas pa sa kantidad nga iilis sa singsing mao ang sentimental nga bili nianang bililhon ug simbolikanhon kaayo nga bugkos. Ang singsing nagrepresentar sa gugma, sakripisyo, kakugi, ug pasalig sa usag usa, ug mao ang usa ka timaan sa usa ka mahangtorong relasyon.
Si Chase usa ka estudyante sa unibersidad kinsa naningkamot pag-ayo ug nagtigom sa tanang kwarta aron siya makapalit ni Emi nianang singsing. Ug sulod sa walo ka bulan sa ilang pagkasinaaran [engagement], gibahandi ni Emi ang timaan nga kinaiyahan niana nga singsing ug ang mahangtoron nga kinaiyahan sa ilang pagkabugkos nga gisimbolo sa singsing.
Pagkasunod buntag, adunay dugang pangutana, dugang hilom nga mga pag-ampo, ug dugang pang pagpunting samtang kaming tanan miapil na sa gitawag nako og “ikaduhang ang-ang” sa dinaliang pagpangita. Niining higayona giganid namo ang tanang mga kwarto diha sa balay diin si Emi lagmit naadto apan posibling nakalimot. Nagkamang-kamang, gipangita namo ilawom sa mga sofa. Ug ilawom sa tanang mga unlan sa mao gihapon nga mga sofa. Apan sa makausa pa, kami wala gihapoy nakit-an.
Sa dihang ang adlaw sa ilang pagbiya miabot, ang akong kasingkasing nagguol nga nagtan-aw sa wala nga kamot sa akong anak nga babaye nga walay singsing ug ang masabot nga tinan-awan sa pagkadili kompleto diha sa iyang panagway. Ug bisan pa man, sa ilang kaguol, nahingangha ko nga makita sila nga mibiya nga adunay dakong paglaom nga ang singsing makit-an ra. Akong giila ang ilang paglaom. Hinoon, ang akong pagkareyalistiko nakahatag nako og walay laing konklusyon, nga human sa lima ka adlaw nga pagpangita nga walay resulta, kining singsing wala na.
Supak sa tanang rason ug panabot, si Emi ug si Chase nagpabilin nga malaumon ug sa bisan unsang paagi puno sa hugot nga pagtuo nga ang singsing makit-an ra. Sila mipakita niadtong kritikal nga kadasig nga mahitabo ang usa ka milagro samtang sila milig-on sa ilang hugot nga pagtuo ug walay pagduhaduha nga paglaom—bisan unsa pa ka dugay molungtad kini nga problema. Imbis mogahin og panahon sa pag-shopping alang sa laing singsing, sila migahin og panahon sa pag-ampo ug diha sa templo.
Bisan kon ang ilang hugot nga pagtuo wala magantihi sa paagi nga gusto nila, wala sila nagduhaduha. Misalig sila Dios sa tibuok nilang kasingkasing ug wala mosalig ngadto sa ilang kaugalingong salabotan (tan-awa sa Mga Panultihon 3:5–6). Nagdumili sila sa pagdawat sa unsay gisulat ni J. R. R. Tolkien sa iyang klasika The Fellowhip of the Ring dihang siya misulat:
“Siya nga nagsulti og panamilit kon ang dalan nangitngitan walay pagtuo.”2
Dul-an na sa tibuok bulan ang milabay nga walay swerte. Ug ang dalan dili lamang ingon nga mangitngit apan misangko pa sa walay kapaingnan. Ang tanan—gawas ni Emi ug Chase—kaundangon na kaayo.
Dayon, usa ka gabii human sa trabaho, usa ka bulan human ang singsing nawala, nakadawat ko og text gikan ni Meagan, ang babaye nga tigtupi sa akong buhok. Gibasa nako ang usa ka kapahayag [sentence] nga ang akong kasingkasing daw molukso. Ang text mabasa:
“Nakit-an ba ninyo ang singsing ni Emi?”
Pipila ka semana ang milabay, nakahisgot ko ni Meagan nga naguol kami pag-ayo kabahin sa pagkawala sa singsing ni Emi. Apan dili nako mahunahuna nganong nagtext siya gawas kon dunay siyay nahibaloan kabahin niini. Sa nagkurog nga mga kamot mibalos ko sa pagtext og mubo nga tubag:
“Wala,” mitubag ko.
“Makapadala ka nako og litrato sa iyang singsing?”
Usa ka litrato? Nganong gusto man si Meagan og litrato? Dili na kini igsapayan. Mibati ko nga dunay mahitabo, ug mao nga mipadala ko og litrato, ug dayon mihulat sa tubag. Upat lang kadto ka mga pulong:
“Ania nako iyang singsing.”
Diha diha dayon mitawag ko ni Meagan, kinsa mihangyo nako sa pag-adto aron kuhaon ang singsing. “Sigurado ka?” Miingon ko. “Akong pasabot, nakasiguro ba gayod ka?” Mikatawa siya ug miingon, “Dali ug tan-awa mismo sa imong kaugalingon. Usa kini ka milagro nga dili nimo katuohan.”
Padulong ko nga makasaksi og usa ka milagro, usa ka milagro nga angayan si Emi ug Chase, sumala ni Brigham Young. Miingon si Brigham Young:
“Ang mga milagro, o kining dili ordinaryo nga mga pagpakita sa gah[o]m sa Dios, dili alang sa dili tumutuo; kini mohupay sa mga Santos, ug molig-on ug mopamatuod sa hugot nga pagtuo niadtong kinsa nahigugma, nagtah[o]d ug nagserbisyo sa Dios”3
Sa dili ko pa kamo sultihan sa nahabilin niining milagrosong istorya, gusto ko nga mangutana kaninyo: naghimo ba kamo og usa ka personal nga lista sa milagro? Giihap ba ninyo ang daghan ninyong panalangin ug mihingalan niini sa tinagsa-tagsa? Giihap ba ninyo ang inyong daghang panalangin aron makita unsa ang gibuhat sa Dios?4
Kon wala, tugoti ko nga mosugyot og tulo ka paagi nga makatabang kaninyo sa pag-ila sa daghang milagro nga mahitabo sa inyong kinabuhi.
1. Motan-aw sa Milagro
Una sa tanan, kamo kinahanglan “motan-aw sa milagro.” Ang akong gamay nga milagro sayon ra nga tan-awon. Apan nakita ba ninyo ang mga milagro nga nanghitabo sa inyong palibot sa matag adlaw? Ang pagkatinuod nga ang inyong kasingkasing, diin, kon kamo nagpangidaron og 20 anyos, nakabomba na og dugo sa tibuok ninyong lawas sa kapin sa 840 milyones na ka higayon. O ang inyong gipanag-iya nga cell phone sa inyong bulsa, nga adunay kapin sa 100,000 ka pilo nga gahom sa pagproseso sa computer nga nakapatugpa sa tawo sa buwan 50 ka tuig na ang milabay. Ug ang labing gimahal nga milagro sa tanan, nga kamo nalakip sa 0.2 ka porsyento sa populasyon sa kalibotan kinsa nakabaton sa gipahiuli nga ebanghelyo ug sa tanang may kalabotan ug mahimayaong mga panalangin.
2. Mamahimong ang Milagro
Tugoti nga magmaisugon ko ug mosugyot nga, imbis maghulat alang sa milagro, mahimo kamong mohukom nga mahimong usa ka tigbuhat sa milagro sa inyong kaugalingon? Ang Dios gusto nga motubag sa inyong pag-ampo, apan tingali sa pag-ampo usab sa ubang tawo pinaagi kaninyo. Sama sa gitudlo ni Presidente Thomas S. Monson (1927–2018): “Palih[o]g ayaw pangamuyo—mohangyo ako kaninyo—og mga buluhaton nga makaya sa inyong gah[o]m. Pangamuyo og mga gah[o]m nga makasugakod sa inyong mga buluhaton. Niana ang paghimo sa inyong mga buhat dili usa ka milagro, apan kamo ang mahimong milagro.”5 Sunda ang mga pag-aghat sa Espiritu Santo ug tugoti ang Dios nga motubag sa pag-ampo sa uban pinaagi kaninyo. Sa pagkatinuod, kon kamo “anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).
3. Moluhod alang sa Milagro
Kini nagpasabot, sa lawasnon nga paagi, kita kinahanglang moluhod— sa espiritwal nga mga pagkasulti—mapainubsanong mopetisyon sa Dios alang sa balaan nga interbensyon nga atong gitinguha. Hinumdumi nga ang atong Dios usa ka Dios sa mga milagro, nga ang mga binuhatan sa atong Manluluwas nga si Jesukristo mahimong tawagon nga mga “milagro sa pagpangalagad.”
Hinumdumi nga Siya ang milalang sa yuta ug sa tanan nga mga butang diha niini. Nga Siya mihimo sa tubig ngadto sa bino, mga madudahon ngadto sa pagkamatuohon. Nga Siya milakaw sa tubig, miayo sa masakiton ug mipabangon sa patay. Ug nga ang Iyang tambag ngari kanato karon mao ang paghangyo Kaniya alang niadtong mga milagro diha sa pag-ampo, apan magmapailubon sa paghulat diha sa Iyang mga katuyoan ug tukmang panahon.
Sama sa maanindot kaayong nga gipahinumdom ni Jesus kanato diha sa Doktrina ug mga Pakigsaad, “Busa, ibalaan ang inyong mga kaugalingon aron ang inyong mga hunahuna mahimo nga ipahinungod ngadto sa Dios, ug ang mga adlaw moabot nga kamo makakita kaniya; kay siya mopakita sa iyang nawong nganha kaninyo, ug kini diha sa iyang kaugalingon nga higayon, ug sa iyang kaugalingon nga paagi, ug sumala sa iyang kaugalingon nga kabubut-on. (Doktrina ug mga Pakigsaad 88:68).
Ang Dios Anaa sa mga Detalye
Mao nga sa unsang paagi nahitabo ang milagro ni Emi? Nan, kini mao ang sumpay sa “tan-awa, mamahimong, ug moluhod alang sa milagro” nga istorya.
Usa ka babaye nga ginganlan og Jilda nagdrayb pauli sa balay uban sa tulo ka anak ug sa iyang bana human sa pagbisita sa iyang mga ginikanan. Sa daghang mga butang nga gikalingawan sa iyang mga anak atol nianang pagbisita, ang mga mamon nga hinimo sa saging nga gihimo ni Lola mao ang labing gikahinaman. Human sa kanunayng pagsamok-samok sa iyang mga anak diha sa sakyanan, si Jilda misaad nga himoan niya sila og mga mamon sa higayon nga moabot sila sa balay. “Apan unsaon man nako sa paghimo niana?” naghunahuna siya sa iyang kaugalingon. “Wala man gani koy hulmahan sa mamon.” Ug tungod nianang hunahuna, nagduka siya hangtod nakatulog uban sa iyang bana nga nagdrayb padulong sa balay.
Apan sa pipila ka rason, nakamata siya sa wala pa moagi sa pamilyar nga gawasanan sa freeway. Diha dayon misantop sa iyang hunahuna nga ang iyang paborito nga tindahan sa galamiton sa panimalay anaa ra duol sa gawasanan. Sigurado nga sila adunay hulmahan sa mamon. Dali niyang gihangyo ang iyang bana sa paggawas sa freeway ug moadto nianang piho nga tindahan. Sa pagsulod, midiretso siya ngadto sa seksiyon sa pagluto, diin iyaha dayong gibana-bana ang mga hulmahan sa mamon.
Mikab-ot siya sa usa ka hulmahan sa mamon sa ibabaw sa tukador, nakadungog siya og hinay nga mitagingting. Nagtan-aw sa hulmahan, iyang nakita nga dunay usa nga wala matarong pagkatumpi. Gikuha dayon niya kini ug nakaamgo kon ngano: nahimutang sa sulod ang naggilak-gilak nga singsing nga diamante. Dili gusto nga maadto pa kini sa sayop nga mga tawo, mihukom siya sa pagsulod niini sa iyang bulsa ug misugod sa pagpangita sa tag-iya sa iyang pag-abot sa balay.
Gidala ni Jilda ang singsing sa parlor diin siya nagtrabaho. Sa tibuok adlaw, nag-istorya siya kabahin sa pagkakita sa singsing ngadto sa ubang mga stylist ug mga kustomer samtang nangita siya sa ilang mga ideya kon unsaon kini nga mabalik sa hustong tag-iya. Mentras tanto, human sa taas nga adlaw sa pangpangulot, pagpangtina, ug pangpangorti sa buhok, si Meagan andam na kaayong mopauli sa balay. Apan siya nakabantay nga pipila sa mga stylist nag-alirong ni Jilda diha sa pikas bahin sa parlor.
Mibati nga naaghat, miduol si Meagan ngadto sa pundok aron sa pagtan-aw kon bahin sa unsa ang mga kasikas. Samtang gigunitan ni Jilda ang singsing, nahingangha si Meagan. Dayon, ug walay pagduha-duha, siya mituaw, “Mura og nakahibalo ko kang kinsa kana nga singsing.” Mao na kadto nga siya mitext nako, ug, nan, karon kamo nasayod na sa tibuok milagro sa istorya sa singsing.
Ang komplikadong kutay kabahin niining istorya sobra na kaayo para masabot. Apan sama sa gibalik balik og pahinumdom ni Jeremias kanato, “Tan-awa, ako ang Ginoo, ang Dios sa tanan nga unod: aduna bay bisan unsang butang nga lis[o]d kaayo alang kanako?” (Jeremias 32:27).
Sa kaulahian ang akong anak nga babaye nga si Emi misulat sa kasinatian:
“Salamat sa Dios sa pagmatuod sa labaw sa tanan nga Siya sa tinud-anay nalambigit sa mga detalye sa atong kinabuhi ug makahimo sa hapit imposible nga mga butang nga mahitabo! Pagkanindot nga pahinumdom sa pagkatinuod nga ang atong mga pag-ampo dunggon, bisan unsa ka gamay sa atong problema. Kon kini importante kanato, importante kini ngadto Kaniya!”
Ang Ginoo Nasayod sa mga Milagro nga Atong Gitinguha
Karon, samtang kini nga milagro talagsaon, unsa man diay kadtong mga milagro nga wala mahitabo? Ug ngano nga ang usa ka uyamot nga singsing importante? Adunay tibuok kalibotan, dinagkong panghitabo sama sa COVID-19 o ginagmayng panghitabo sama tingali sa unsay inyong gipangamuyo og maayo karon sa inyong kinabuhi. Ug ang tubag, wala ko kahibalo.
Apan nasayod ko nga Siya nasayod. Ug ako mosalig Kaniya. Nasayod usab ako nga kon Siya nasayod kon kanus-a matagak ang mga langgam, nan Siya nasayod usab kon kanus-a matagak ang bisan usa ka tinulo sa imong luha. Ako usab adunay dili malitok nga hugot na pagtuo nga Siya “gamhanan sa pagluwas” (2 Nephi 31: 19), ug, sama sa gitudlo ni Pablo, “Tanan nga mga butang nagabuhat og maayo uban kanila nga nahigugma sa Dios, ngadto kanila kinsa mga tinawag sumala sa iyang katuyoan” (Mga Taga-Roma 8:28).
Ania ang unsay akong masulti kaninyo: samtang naghulat alang sa inyong mga milagro, ayaw palabya ang inadlaw adlaw nga kahibulongan nga naglibot kaninyo, sama sa mga milagro nga makita ang usa ka tawo nga hingpit nga mihangop sa ebanghelyo ug usa ka kausaban sa kasingkasing—usa ka tawo kinsa mipili sa pagsalikway sa sala ug miusab sa ilang mga kinabuhi, ug sa ingon, sa ilang mahangtorong mga butang. O sa sinemana lang nga milagro sa sakramento, sa gahom sa mga ordinansa sa templo sa pagsilyo ug pag-ayo, ug sa tanang mga panalangin sa gipahiuli nga ebanghelyo. Ug palihog ayaw kalimti ang “hingpit nga mga milagro,” ang Pag-ula ug Pagkabanhaw ni Jesukristo.
Elder Ronald A. Rasband sa Korum sa Napulog Duha ka Apostoles:
“Unsa gayod ang inyong gikinahanglang pangitaon diha sa inyong kaugalingong kinabuhi? Unsa ang mga milagro sa Dios nga makapahinumdom kaninyo nga Siya anaa sa duol, nag-ingon, ‘Ako ania dinhi’? Hunahunaa kadtong mga higayon, ang pipila sa inadlaw adlaw, kon kanus-a ang Ginoo milihok diha sa inyong kinabuhi—ug dayon milihok pag-usab. Mahala kini isip mga higayon nga ang Ginoo nagpakita og kamasaligon diha kaninyo ug sa inyong mga pagpili. Apan tugoti Siya sa paghimo og dugang pa diha kaninyo kay sa unsay inyong mahimo sa inyong kaugalingon nga kamo lang. Mahala ang Iyang pakiglambigit.”6
Ug dili lamang bahandion kini, tinguhaa kini sa walay hunong. Hinumdomi nga ang Dios makahimo sa tanang butang, ug sa tanang butang sa taliwala niini. Siya mao ang Ginoo sa tanan nga mga butang.
Mga kaigsoonan, desisyoni karon aron motan-aw, magpakahimo, ug moluhod alang sa milagro, ug ang dako ug talagsaong mga panalangin—madako ug magamay—sigurado nga magpaabot kaninyo. Sama ni Emi ug Chase, inyong mapakita ang hugot nga pagtuo kusganon nasayod nga kamo napanalanginan matuman man o dili ang higayon sa inyong milagro. Salig sa tukmang panahon sa Ginoo. Paglakaw nga mapasalamaton nga mahalon unsa ang gihimo sa Ginoo diha sa inyong kinabuhi, ug hinumdumi ang mga pulong ni Job: “ako mangita sa Dios, ug ngadto sa Dios akong itugyan ang akong tuyo: Nga nagbuhat sa dagkong butang nga katingalahan nga dili maihap”(Job 5:8–9).