Pagtabang sa Uban nga Makadawat sa Pagpang-ayo sa Ginoo
Ang tagsulat nagpuyo sa Utah, USA.
Atong gigamit ang kahanas sa pagpang-ayo kon motabang kita sa pagdala sa makaayo nga mga panalangin sa Ginoo ngadto niadtong nag-antus sa pisikal, mental ug espirituhanon nga mga balatian.
The Release, ni Jenedy Paige, dili mahimong pakopyahan
Usa ka Dominggo akong gibasa ang kasulatan nga, “Sa pagkatinuod, sa pagkatinuod, Ako moingon nganha kaninyo, kini mao ang akong ebanghelyo; ug kamo nasayud sa mga butang nga kamo kinahanglan gayud nga mobuhat diha sa akong simbahan; kay ang mga buhat nga kamo nakakita nga Ako mihimo kana kamo mobuhat usab” (3 Nephi 27:21).
Naghunahuna ko, “Unsa man ang mga buhat ni Kristo dinhi sa yuta?” Labi nakong nahunahunaan ang duha ka butang: pagserbisyo ug pagpang-ayo. Mahimo nako ang pagserbisyo, apan ang pagpang-ayo? Siguradong dili ako makahimo sa pagpang-ayo sa uban—o makahimo kaha ko?
Bag-o lang ko nga nagpaayo gikan sa usa ka operasyon nga gisundan og grabeng allergic nga reaksyon. Nakahunahuna dayon ko niadtong mitabang kanako sa akong proseso sa pagpaayo, ug daghan gayud sila. Kon makatabang sila nako nga mamaayo, dili ba ko makahimo niini sa uban?
Ang matag usa kanato makakat-on sa kahanas sa pagpang-ayo.1 Gilibutan kita niadtong nanag-antus sa pisikal, mental ug espirituhanon nga mga balatian kinsa mahimong mapanalanginan sa atong tabang.
Pagbisita sa Masakiton
Ang Mosiah 4:26 namahayag, “Ako manghinaut nga kamo kinahanglan mohatag sa inyong kabtangan ngadto sa mga kabus, matag tawo sumala sa unsa ang anaa kaniya, ingon sa pagpakaon sa gigutom, pagsinina sa hubo, pagduaw sa mga masakiton ug pag-alagad sa ilang kahupayan, sa espirituhanon ug lawasnon, sumala sa ilang mga panginahanglan.”
Ang masakit—sa pisikal, mental, o espiritwal man—mahimong makapainusara kaayo. Ang mga tawo mogahin og daghang mingaw nga mga oras diha sa mga kwarto sa panimalay o ospital nga naningkamot nga maulian, ug dali ra kaayo maluya ang ilang mga espiritu. Samtang mosamot ang kangitngit, ang pagbisita sa mapinanggaon nga higala o sakop sa pamilya makahatag og kahayag sa ilang kinabuhi.
Unsaon nato pagbisita ang masakiton mahimong importante usab. Pipila ka mga babaye mitubag sa akong pangutana kon giunsa sila pagtabang sa uban agi sa proseso sa pagkaayo. Si Judi sa Arizona, USA, mikomentaryo, “Ang pagpaminaw … [usa] ka dako kaayong tabang sa lisud nga mga panahon. Ang pagpaminaw ug dili pagpanghukom.” Ang pagpaminaw nga mapailubon, sinsero, ug mahigugmaon maoy bililhong suporta niadtong naningkamot nga maayo.
Si Linda sa California, USA, mipaambit kon sa unsang paagi ang pagbisita sa usa ka higala nakatabang kaniya: “Nahinumduman nako kadtong espesyal nga mga tawo sa akong kinabuhi—ilabi na niadtong tinud-anay nga naminaw ug mipadayag sa talagsaong tambag sa Espiritu. Human mabiyuda sa edad nga 30 anyos nga adunay lima ka gagmayng mga bata, mas lawom nakong gibati ang gugma sa akong Langitnong Amahan ug sa Manluluwas tungod sa akong buotang amiga nga si Karen. Kanunay siyang nahibalo sa akong mga panginahanglan ug andam maminaw sa akong isulti. Wala gayud ako mobati nga nag-inusara tungod kay kanunay siyang nagpahinumdom nako sa matahum nakong relasyon isip anak sa Dios.”
Ang tigpangalagad nga mga brother ug sister labing makapahigayon niining kahanas sa pagpang-ayo. Importante nga mahibalo sa mga panginahanglan niadtong nanag-antus. Usahay ang mubo nga pagbisita ang gikinahanglan tungod kay gikapoy sila pag-ayo. Usahay nag-inusara sila ug gilaay ug ang taas nga pagbisita makatubag sa ilang mga panginahanglan. Importante usab nga mahibalo sa ilang mga personalidad. Ang uban gusto og pagkapribado ug hilum samtang ang uban gusto og daghang interaksyon ug suporta. Kinahanglang atong ideterminar ang ilang mga panginahanglan ug dayon molihok base niini.
Pagtambayayong sa Usag Usa nga mga Alantuson
Gihulagway ni Alma sa maayo kaayong paagi ang atong pasalig nga mosunod sa ehemplo sa Manluluwas dihang gipangutana niya ang mga tumutuo diha sa Basahon ni Mormon kon andam ba sila sa “pag-ipon ngadto sa panon sa Dios, ug pagatawgon nga iyang mga katawhan, ug [mahimong] andam sa pagtambayayong sa usag usa nga mga alantuson, nga sila mahimo nga magaan” (Mosiah 18:8).
Matag usa kanato nagdala og daghang matang sa mga alantuson. Lisud kaayo kining atubangon kon kita nasakit o nanlibasug sa problema sa pangisip o espirituhanong kalisdanan. Usa sa mga kahanas sa pagpang-ayo mao ang pagtabang sa pagdala sa mga palas-anon sa uban kon nag-antus sila.
Si Shannon sa Utah, USA, mipaambit kon sa unsang paagi ang iyang mga silingan mitabang kaniya: “Sa adlaw nga among gilubong ang among batan-ong anak, among nasayran sa among pag-uli gikan sa sementeryo nga ang among mga silingan nagtambayayong niadto nga mga oras samtang didto kami sa iyang lubong aron hingpit nga usbon ang kinaiyanhong talan-awon [landscape] sa among nataran. Mitanom sila og matahum nga gagmayng mga tanom, mga kahoy, ug mga bulak, ug gani bag-ong mga balili. Sa panahon sa among hilabihan nga kaguol, ang ilang mahunahunaon nga pagpakita sa gugma ug suporta misugod sa proseso sa pagkaayo alang kanamo. Napahinumduman kami nga ang gugma ug kinabuhi mahangturon sa matag tuig nga ang among nindot nga nataran mabuhi pag-usab. Tinud-anay gayud [kadto] nga sagrado ug simbolikanhong kasinatian nga dili namo hikalimtan.”
Sa dihang nahiling ko nga adunay kanser sa tutoy, nagserbisyo ako niadto isip presidente sa Relief Society ug nagpapili pag-usab sa konseho sa among siyudad. Ang akong bana nawad-an og trabaho, ug nakasinati kami og daghan pang grabe nga mga pagsulay niini nga panahon. Ang akong mga magtatambag tinud-anay nga misunod sa “pagtambayayong sa usag usa nga mga alantuson” ug mitabang nga mapagaan ang palas-anon nga akong gidala. Gikuha sa akong bishop ang pipila sa akong mga responsibilidad. Ang akong bana mibuhat sa daghang mga buluhaton sa pagpangluto ug pag-atiman sa balay. Makapainubsanon gayud nga makita nga ang akong mga palas-anon wala gikuha apan hinoon gitambayayongan sa daghan kaayong mga tawo kinsa migamit sa kahanas sa pagpang-ayo.
Paghupay
Mitudlo usab si Alma nga ang mga sumusunod ni Kristo “andam sa pagbangutan uban niadto nga nagbangutan; oo, ug sa paghupay niadto nga nagkinahanglan sa kahupayan” (Mosiah 18:9).
Ang paghatag og kahupayan naglakip sa kalooy, kamabination, kamanggihunahunaon, pag-amuma, pagmahal, ug gugmang putli. Kini mao ang paggakos niadtong masakiton o naglisud sa mahigugmaong mga bukton aron sa pagtabang kanila sa pagsagubang sa ilang pag-antus.
Si Luann (ang ngalan giusab) miatubang og espiritwal ug moral nga panlimbasug ug namalandong sa iyang kasinatian sa uban nga mihupay kaniya: “Wala nila tan-awa ang akong pagkatawo nianang panahuna ug nakita ang akong nindot nga potensyal, ang potensyal nga mahimong tawo nga mas mahinungdanon, mas maalamon, mas mabination. Akong nahinumduman kon unsa ako kaniadto ug usahay mobati nga dili komportable uban sa gamayng kaulaw tungod sa akong kaignorante—gamay nga kaulaw tungod sa akong mga kalapasan ug makasasala nga mga paagi. Apan ang kasakit sa kasagmuyo ug kaulaw kanunay gisundan sa makaayo nga tambal nga mao ang grasya, kalooy, kapasayloan, ug gugma. Kon makakita ko nga adunay mga tawo nga naglibut kanako, mipanalangin kanako nidtong mga butanga, ang kasakit mawala. Ug akong makita nga gitabangan ko nila nga mamaayo. Tingali mas tukma nga moingon nga nagmugna sila og luwas nga palibut alang kanako—usa ka uloran [cocoon] sa grasya, tingali—diin, sulod niini, ang Manluluwas, ang Gamhanang Tig-ayo, mahimong motrabaho nako. Mousab nako. Mousab sa akong kasingkasing.”
Detalye gikan sa Balm of Gilead, ni Annie Henrie Nader
Usa ka importante nga bahin sa paghupay sa masakiton mao ang pagpadangup kanila ngadto sa Gamhanang Tig-ayo. Si Sabrina gikan sa Utah miingon, “Wala nay mas maayong pag-ayo kay sa ni bisan kinsa nga motabang kaninyo sa pagpangita o pagbalik ngadto sa Dios. Tingali usa lang ka pahinumdom sa unsay inyo nang nahibaloan—nga naningkamot ka nga mas lig-on pa kay sa gikinahanglan, nagbuhat sa tanan nga ikaw ra, ug wala gayud mosalig sa Dios.”
Ang paghupay sa masakiton ug pagtabang kanila nga mahimong positibo nagkinahanglan og pagkasensitibo ngadto sa Espiritu. Usa ka higayon sa akong kinabuhi, dili maayo ang akong kinatulgan sulod sa daghang mga bulan, kasagaran mohimo lang og duha ngadto sa tulo ka oras kada gabii sa putol-putol nga pagkatulog. Hilabihan ang akong pag-antus tungod sa kabalaka ug kakapoy; nakaadto na ko og daghang mga doktor nga walay kapuslanan. Sa katapusan, usa ka higala nga mitudlo kanako ngadto sa usa ka doktor nga Santos sa Ulahing mga Adlaw kinsa diha-diha dayon mihatag kanako og tukma nga paghiling sa sakit. Apan ang sunod niyang gisulti nakapasurprisa: “Merrilee, ang labing importanting butang nga kinahanglan nimong buhaton mao ang tugutan ang Dios nga motabang sa imong kabalaka.” Giawhag dayon ko niya sa pagpamalandong sa matag adlaw sulod sa mubong panahon mahitungod sa “Ang Buhi nga Kristo: Ang Pagpamatuod sa mga Apostoles.”
Nakasulay nako niini nga pagpamalandong sulod sa pipila ka higayon nga wala magmalampuson, apan desperado ko nga maayo. Pagkasunod adlaw, hilum akong namalandong sa gamhanang mga pulong “[Kami] mohalad sa [among] pagpamatuod sa pagkatinuod sa Iyang dili katupngan nga kinabuhi ug sa walay katapusan nga gahum sa Iyang labing dako nga sakripisyo sa pag-ula.”2 Adunay talagsaong pagbati nga miabut kanako samtang misugod ko sa pagpamalandong sa pagpamatuod sa atong gamhanan nga Tig-ayo ug nasayud nga nakakaplag ko og kahupayan ug kalinaw sa akong kalag.
Paghatag og Pagtagad
Samtang magtuon kita sa mga kasulatan aron sa pagsunod ni Jesus sa Iyang mga buhat sa pagpang-ayo, atong mabasa nga si Jesus pabalik-balik nga mibuhat og usa ka butang: Mihatag siya og pagtagad niadtong naglibut Kaniya.
Si Kristo nakamatikod sa mga tawo. Nakigsulti siya sa babayeng Samarianhon bisan sa kultural nga mga pagdili. Migahin siya og panahon sa pagpanalangin sa mga bata. Mikaon Siya uban sa mga maniningil sa buhis ug mga makasasala ug nangalagad ngadto sa mga sanlahon ug mga sinalikway. Mihatag Siya sa Iyang pagtagad ngadto sa matag usa.
Isip mga sumusunod ni Kristo nga nagtinguha nga makat-on sa Iyang kahanas sa pagpang-ayo, makasugod kita sa pagtan-aw sa mga tawo sama sa pagtan-aw ni Kristo kanila. Makagahin kita og panahon sa pagtimbaya, pagpahiyom, sa pagpangutana mahitungod sa ilang adlaw. Tingali dili gayud nato masayran nga nahimong makaayo nga tambal ang atong mga paningkamot ngadto niadtong naglibut kanato kinsa nag-inusara, naguol, nasakit, nagluya, o nag-antus. Bisan ang yano nga buhat sa gugma mahimong dunay kusganong impluwensya.
Samtang atong buhaton ang mga buhat ni Kristo ug moapil sa pagpang-ayo sa uban, ang dagkong mga panalangin moabut. Sama sa gipamahayag ni Kristo, “Maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako” (Mateo 25:40). Ngadto Kaniya kinsa miayo sa matag usa kanato, ngadto Kaniya kinsa migakos kanato sa Iyang mahigugmaong mga bukton sobra kadaghan kay sa atong nahibaloan, ngadto Kaniya kinsa mihatag kanato sa makaayo nga tambal sa Iyang Pag-ula, atong matanyag ang atong gagmay nga mga paningkamot nga motabang sa pag-ayo sa atong mga kaigsoonan. Kini sa pagkatinuod mao ang kahanas sa pagpang-ayo.