Gikan sa Natad sa Misyon
Unsay Gitudlo sa Langitnong Amahan Kanako mahitungod sa Pag-usab sa mga Kasingkasing
Sa usa ka yano nga kasinatian, ang Langitnong Amahan mitudlo kanako nga Siya nagpakabana alang sa mga misyonaryo ug niadtong ilang gitudloan—ug nga Siya makausab sa bisan unsa nga kasingkasing.
Miduko ko, ang akong mga mata napuno sa mga luha. Si Yannick (ang ngalan giusab) bag-ohay lang hugot nga mihukom: “Dili ako makapasaylo kanila. Dili nako malimtan kini nga kasakit. Ang akong kasingkasing tig-a ra kaayo.” Bisan og hingpit akong nakasabot sa iyang sinultihan nga French, dili ko makasabot sa iyang mga pagbati.
Napulo ka tuig kaniadto , si Yannick mipasakop sa Simbahan bisan pa sa oposisyon gikan sa iyang dako nga pamilya. Siya nakabaton og kaisog sa pag-adto og misyon ug nagpaabot sa usa ka kasinatian nga makapausab sa kinabuhi pinaagi sa pagpahinungod og duha ka tuig ngadto sa Ginoo. Wala siya makahibalo kon sa unsang paagi kini makapausab gayod sa kinabuhi. Pipila lang ka bulan human sa pagbiya alang sa iyang misyon, si Yannick nabalik na sa panimalay. Ang puntarya sa masakit kaayo, dili tinuod nga mga hungihong gikan sa masinupakon nga mga kompanyon, gituohan sa mga miyembro nga tinuod sa iyang pag-uli. Si Yannick mibati nga ingon og walay nakagusto niya sa simbahan. Mihukom siya nga dili na mobalik.
I-abante nato og 10 ka tuig, si Yannick nakahukom nga panahon na nga kalimtan ang iyang kasakit ug kasuko. Gipangita niya ang mga misyonaryo sa iyang dapit—akong kompanyon ug ako. Gibisitahan namo si Yannick sulod sa pipila ka semana, nga nagpaambit og espiritwal nga mga mensahe ug nagrebyo sa mga baroganan sa ebanghelyo samtang naglingkod kami ilawom sa landong sa iyang mga kahoy nga mangga. Si Yannick wala gayod mohunong sa pagtuon sa mga kasulatan o sa pagkat-on mahitungod sa ebanghelyo. Wala gayod mawala ang iyang pagpamatuod sa Simbahan, apan ang kaulaw nga iyang nasinati human sa iyang misyon mipugong kaniya sa pagtagamtam sa mga panalangin sa ebanghelyo. Gibati nako nga ako gipadala ngadto sa iyang dapit alang sa usa ka rason, tingali aron sa pagtabang kaniya nga matuman pag-usab kini nga mga panalangin.
Nagtuo ko nga nakahimo kami og pag-uswag, apan human makadungog sa unsay iyang gisulti mahitungod sa pagkadili makapasaylo, nakaamgo dayon ko nga layo pa ang among latason.
Miduko ko, nga naghunahuna kon unsay isulti. Milanog sa akong dalunggan ang mga pulong ni Yannick: “Ang akong kasingkasing tig-a ra kaayo.” Wala makatingog ang akong kompanyon sama sa akong gibati. Gitan-aw nako ang Biblia diha sa akong paa, hilom nga nagdumili niini tungod kay kini gisulat sa French. Human sa siyam ka bulan diha sa natad sa misyon, dili pa gihapon ko maayo kaayo nga mosabot sa mga kasulatan nga anaa sa French nga Biblia. Nag-ampo ako sa akong kasingkasing, nga nagpakiluoy nga masayod kon unsay akong isulti ngadto niining tawhana kinsa mibati nga ang iyang kasingkasing wala nay purohan nga maayo.
Ang tubag nga, “Ezequiel kapitulo 36,” misantop sa akong hunahuna.
Naghunahuna ko og maayo, nga naningkamot sa paghinumdom kon aduna ba akoy nasag-ulo nga bisan unsa nga mga kasulatan diha sa Ezequiel. Wala akoy nasag-ulo.
“Ezequiel kapitulo 36.” Ang tubag miabot pag-usab, nga milanog sa akong hunahuna.
Akong giablihan ang akong Biblia ug mipakli ngadto sa Ezequiel 36. Ang akong mga mata mianinaw sa pahina; wala akoy nakita nga bisan unsa. Nganong wala man kini sa Iningles? Unsa kaha ang gusto sa Langitnong Amahan nga ipapangita kanako? Mipadayon gihapon ko.
“Yannick, adunay usa ka kasulatan sa Biblia nga gusto nakong ipaambit kanimo. Anaa kini sa Ezequiel kapitulo 36 …”
Ako walay ideya kon unsa ang isulti sunod, apan samtang mitan-aw ko pag-usab sa pahina, nakita nako ang hustong bahin: “… bersikulo 26.”
Akong gibasa, “Hatagan ko kamog bag-ong kasingkasing ug bag-ong espiritu ug kuhaon ko ang inyong kasingkasing nga gahi sama sa bato ug ilisan ko kinig kasingkasing nga masinugtanon.”
Dili na lamang ako ang nagluha. Si Yannick mitan-aw kanako nga nagpakita og katingala sa iyang nawong.
“Yannick, kini nagpasabot nga ang imong kasingkasing mahimong mausab. Ang Langitnong Amahan makahatag kanimo og usa ka bag-o nga kasingkasing.”
Naglisod siya sa pagsulti sa iyang tubag. “Unsaon? Sultihi ko unsay kinahanglan nakong buhaton.”
Sa kalit lang, ang usa ka tawo kinsa andam na nga moundang karon andam na nga motuo nga siya mausab. Si Yannick nakadungog sa saad sa Ginoo diha niana nga kasulatan, nga nagsulti kaniya nga mahimo niyang kalimtan ang kaligutgot nga anaa sa iyang kasingkasing ug pasayloon kadtong kinsa nakasala kaniya.
Sa misunod nga mga bulan, ang kasingkasing ni Yannick nausab gayod, sa hinay-hinay. Naningkamot siya sa pagpasaylo niadtong kinsa nakapasakit kaniya ug nakahimo sa paghikalimot sa daghan kaayo nga kaligutgot ug kasuko. Misalig sa Langitnong Amahan, siya nakasabot pa og dugang mahitungod sa tahas sa Manluluwas sa pag-ayo ug pag-usab sa mga kasingkasing. Human sa sobra sa 10 ka tuig, si Yannick misugod sa pagsimba pag-usab, midawat og calling, ug miadto balik sa templo. Siya midawat og kinasingkasing nga imbitasyon nga mobalik ngadto sa lamesa sa Ginoo ug sa kataposan nakahimo sa pagtagamtam sa mga panalangin sa ebanghelyo.
Bisan tuod si Yannick ang nakat-on pinaagi sa personal nga kasinatian mahitungod sa pagkausab sa mga kasingkasing, nakakat-on ako og bililhon nga mga leksiyon alang sa akong kaugalingon. Akong nakat-onan nga ang Langitnong Amahan motuman sa Iyang saad nga ang Iyang mga misyonaryo mahimong “[ma]mulong [sa] mga hunahuna diin [Siya] mobutang sa [ilang] mga kasingkasing. … “Kay ihatag kini … sa takna gay[o]d, oo, sa diha gay[o]d nga higayon, unsa ang [ilang] isulti” (Doktrina ug mga Pakigsaad 100:5–6). Ang Langitnong Amahan nahigugma gayod sa Iyang mga misyonaryo, ingon man usab niadtong ilang gitudloan, nga Siya midasig sa usa ka misyonaryo sa mismong kasulatan nga gikinahanglan sa usa sa Iyang mga anak aron dili mosalikway sa mahangtorong mga panalangin.
Nakat-onan usab nako nga ang Langitnong Amahan gusto nga makigsulti kanato ug makahimo sa ingon pinaagi sa Espiritu Santo ug sa mga kasulatan.
Labing importante, ako nasayod nga bisan ang labing gahi nga mga kasingkasing mahimong mausab pinaagi sa Pag-ula ni Jesukristo—si Yannick usa ka buhi nga pagpamatuod niana.