Mga Young Adult

Unsaon Pagkaayo sa Bisan Unsa nga Panlimbasug—Lihok sa Paagi nga Molambo sa Hinay-hinay

Pinaagi sa mga kawani sa Liahona

Kon ikaw naninguha nga maayo gikan sa usa ka problema sa pornograpiya, mga isyu sa kahimsog sa pangisip, nangagi nga trauma, o bisan unsa pa, kini nga giya makatabang kanimo nga makakaplag og pagkaayo pinaagi ni Kristo.

Imahe

woman climbs stairs going from darkness to light

“Ug ako naayo diha-diha!”

“Ug ako wala na gayud tintala sa pornograpiya pag-usab!”

“Ug ang akong depresyon hingpit nga nawala. Dili na gani ako maguol pa!”

Kining naghingapin nga pagbati ingon og nanobra ra sa ka maayo nga mahimong tinuod, husto?

Kitang tanan nakabasa og mga istorya nga adunay “malipayon nga mga katapusan” nga ingon og sama niini. Mahitungod sa mga tawo nga nakigbisog og malisud nga mga hagit, alang lamang kanila nga, sa usa ka mahimayaon nga higayon, mobuntog sa ilang mga tintasyon o kahuyang o kasakit ug hingpit nga mamaayo.

Kon magbasa niini nga matang sa mga istorya, kita sa tino mobati og kadasig ug mapuno sa paglaum nga ang atong mga panglimbasug ug mga hagit usab mamaayo alang sa kaayohan, apan kasagaran ang ubang mga hunahuna makasulod sa atong mga ulo sa hanap nga paagi sama sa:

“Nganong ako sa gihapon nakigbisog niini nga nakabuhat na ako og daghang mga butang aron sa pagbuntog niini?”
“Akong gibuhat ang akong labing maayo sa pagdangop ngadto sa Manluluwas, apan sa gihapon dili ako makapasaylo sa tawo kinsa nakapasakit kanako.”
“Nagtuo ako nga niini nga higayon, ako dili gayud makahimo sa pagbuntog niini nga pakigbisog.”

Ang atong mga hunahuna mosulay sa pagkumbinser kanato sa laing paagi, apan ang kamatuoran, kitang tanan mamaayo. Mao kana ang saad nga gitanyag sa Manluluwas kanato. Ang pagkaayo tingali dili mahitabo sa usa ka higayon—sa pagkatinuod, kini dili mahitabo—apan uban sa atong sinsero nga mga paningkamot ug sa Iyang tabang, kini hingpit nga posible. Ug ania ang pipila ka mga sugyot mahitungod kon unsaon pagpaninguha sa makaayo nga gahum sa Ginoo, molihok sa paagi nga molambo sa hinay-hinay.

Ilha Nga ang Pagkaayo usa ka Panaw

Ang unang butang nga kinahanglan kita makaamgo kon nag-uswag padulong sa pagkaayo mao nga kini usa ka panaw sa pagtubo. Ania ang pipila ka mga kamatuoran mahitungod niini nga panaw nga hinumduman:

Samtang kita moduol sa Manluluwas sa tibuok niini nga panaw, Siya makagiya kanato ngadto sa mga kapanguhaan ug sa tabang nga atong gikinahanglan ug makahatag kanato og kalig-on ug giya sa atong mga paningkamot. “Kon ang Manluluwas masayud nga gusto gayud ninyong modangup Kaniya—kon Iyang mabati nga ang inyong labing dakong tinguha mao ang pagdawat sa Iyang gahum nganha sa inyong kinabuhi—magiyahan kamo sa Espiritu Santo aron masayud kon unsa gayud ang kinahanglan ninyong buhaton.”¹
Ang pagtubo dili mahuman sa usa ka adlaw, usa ka bulan, o gani mga tuig usahay. Ang panahon sa mga hitabo sa pagkaayo mahimong lahi alang sa tanan.
Kon kamo naninguha nga mamaayo gikan sa wala kinahanglana nga mga kinaiya, pagkaadik, mga isyu sa kahimsog sa pangisip o gani sa trauma, hinumdumi nga ang pagkaayo kasagaran naglakip sa pag-usab og lig-on na nga natukod nga mga kinaiya sa paagi sa atong paghunahuna ug pagtubag. Ug kini nagkinahanglan og panahon.
Kasagaran kita kinahanglang magkat-on sa pag-ila sa mga importanting mga problema sama sa dili maayo nga mga sumbanan sa hunahuna ug malisud nga pagbati sa dili pa kita makahimo sa pagbuntog sa atong mga problema.
Ang proseso sa pagkaayo puno sa magsunod-sunod nga maayo ug dautan nga mga kasinatian.

Kon ikaw mobati nga nawad-an og kadasig, hibaloi nga ikaw wala mag-inusara—gani si Nephi nanlimbasug usahay ug mitugyan ngadto sa iyang mga kahuyang (tan-awa sa 2 Nephi 4). Human mamatay ang iyang amahan, kini nga propeta nga adunay dili matarug nga hugot nga pagtuo misulat mahitungod sa unsa siya ka nasagmuyo nga siya nanlimbasug uban sa kaguol ug kasubo ug mga tintasyon. Apan si Nephi sa katapusan nagpamatuod nga siya mopadayon sa pagpaningkamot ug pagsalig diha sa Ginoo tungod kay siya nasayud nga Siya motabang kaniya sa pagbuntog sa iyang mga panlimbasug diha sa katapusan.

Hibaloi ang Gahum sa Pagsulay ug sa Pagbaton sa Matarung nga mga Tinguha

Kita sa kanunay wala magdahum nga ang dalan ngadto sa pagkaayo gikan sa malisud nga mga kasinatian mahimo nga puno sa mga babag, mga sayop, nawad-an og paglaum, walay pailub, ug naghingapin nga kasamok. Dili kini maingon nga usa ka proseso nga dili malisud nga buhaton ug sayon sa unang higayon sa atong pagsulay. Ug kana OK. Tungod kay kadto nga mga babag mao ang unsay motabang kanato sa pagsalig og maayo diha sa atong Manluluwas.

Ang Ginoo wala magpaabut kanato sa pagbuntog sa tanan karon dayon. Apan Siya naglaum kanato nga maningkamot ug sa pagbaton og tinguha nga mamaayo, tungod kay ang labing tinuod nga tinguha sa atong kasingkasing mao ang unsay naghimo sa tanang kalainan sa pagkab-ot sa atong mga tumong ug sa paghimo kinsa kita gusto nga mamahimo. Ang Ginoo naglihok uban sa tinguha sa atong mga kasingkasing. Ug sama sa gitudlo ni Presidente Russell M. Nelson, “Ang Ginoo ganahan og paningkamot, tungod kay ang paningkamot maghatag og ganti nga dili moabut kon wala kini.”²

Busa kon ikaw nanlimbasug pa gihapon uban sa pagtugyan ngadto sa tintasyon, kon ikaw sa gihapon nagsinati sa kangitngit sa mga hagit sa kahimsog sa pangisip, o kon ang hunahuna sa nangaging trauma sa gihapon makapugong kanimo sa pagkatulog sa gabii, padayon gihapon sa pagpaningkamot. Paningkamot og maayo, himoa nga makalahutay, ug hupot sa hugot nga pagtuo ug paglaum diha ni Jesukristo.

Samtang ikaw magpadayon sa pagpaningkamot, ang matarung nga mga tinguha sa imong kasingkasing mahimong matuman, ug imong masinati ang mga milagro sa pagpang-ayo (tan-awa sa Mosiah 2:41).

Pagkat-on og Kalooy sa Kaugalingon

Kini sagad nga makita ang atong mga kaugalingon nga nanlimbasug sa lain-laing mga bahin sa proseso sa pagkaayo. Apan ang pagkamabination ug pagkamapailubon sa atong mga kaugalingon sama ka importante sa paghimo sa buhat ngadto sa pagkaayo. Ang kasilag sa kaugalingon dili gayud makatabang ni bisan kinsa nga molampus. Walay pagsapayan unsa nga ang-ang sa pagkaayo ikaw anaa, pagmabination sa imong kaugalingon ug hinumdumi nga ang Manluluwas kanunay nagbaton og kalooy alang kanimo. Ania ang pipila ka mga pamaagi sa pagkat-on og kalooy sa kaugalingon:

Pahinumdumi ang imong kaugalingon sa panahon nga ang pag-ayo mahitabo ug ang gidak-on sa paningkamot nga gikinahanglan niini gikan kanimo.
Sabta nga daghang mga kabilinggan ang moresulta gikan sa wala matagad nga mga panginahanglan o mga paagi sa pagsagubang nga imong nakat-unan isip usa ka bata ug nga kini malisud nga usbon.
Ilha nga bisan kon ikaw adunay mga babag, sa gihapon ikaw nag-usab. Hinumdumi nga ang mga tinguha sa imong kasingkasing motabang kanimo sa paghimo og malungtarong kausaban.
Tutuki ang imong pag-uswag. Tan-awa kon unsa na kalayo ang imong naabut. (Kon ikaw wala pa makakita, pangita og paagi sa pagtimaan sa imong pag-uswag.)
Tagda ang imong kaugalingon sama sa imong pagtagad sa usa ka tawo nga imong gimahal kinsa naninguha nga mamaayo.
Hunahunaa kon unsay imong nakat-unan ug sa unsang paagi ang imong mga panlimbasug nagtabang kanimo nga motubo sa espirituhanong paagi. Ang Langitnong Amahan adunay paagi sa paghimo sa atong malisud nga mga hagit ngadto sa mga kasinatian alang sa atong kaayohan (tan-awa sa Doktrina ug mga Pakigsaad 122:7).
Ipakigbahin ang imong mga pakigbisog ngadto sa usa ka tawo kinsa motabang ug mohigugma kanimo diha sa imong panaw sa pagkaayo. Apan siguroha ang pagbaton og mga utlanan ug hangyoa sila sa pagtahud sa imong pagkapribado.

Gamita ang Unsay Anaa [Practical] ug Espirituhanong mga Himan

Ang Langitnong Amahan ug si Jesukristo anaa kanunay sa pagtabang ug paggiya kanato lahus sa atong proseso sa pagkaayo. Mihatag sila og dili maihap nga espirituhanon nga mga himan sama sa pag-ampo, pagpuasa, mga kasulatan, ug kanunay nga pagsimba ug pagtambong sa templo nga makahatag og gamhanang impluwensya diha sa atong dalan ngadto sa pagkaayo.

Ang Langitnong Amahan naghatag usab kanato og mga kapanguhaan gawas sa espirituhanong mga himan sa≈pagtabang kanato nga mamaayo, ug gusto Siya nga ato kining gamiton. Sama pananglit, si Elder Kyle S. McKay sa Seventy namulong sa usa ka babaye kinsa adunay adiksyon sa druga. Ug bisan kon nasinati niya ang “diha-diha nga kaayo sa Dios,” sa iyang labing malisud nga panahon siya nagkinahanglan pa gihapon og tabang gikan sa uban. Si Elder McKay mipasabut, “Ang pagkaayo ug ang hingpit nga pagkaluwas midangat og taas nga panahon—mga bulan sa pagtambal, pagbansay, ug pagtambag, nianang panahona gisuportahan siya ug usahay agakon sa Iyang kaayo.”³

Ang atong pagkaayo nagkinahanglan og paningkamot ug mga himan. Ang mga doktor, tambal, mga propesyonal sa kahimsog sa pangisip, ug mga grupo nga tigtabang sa mga talagsaong kapanguhaan sa pagtabang kanato nga mamaayo. Si Elder Jeffrey R. Holland sa Korum sa Napulog Duha ka mga Apostoles mitambag: “Pagpatambag sa mga eksperto nga sertipikado sa pagbansay, propesyonal nga mga kahanas, ug maayong mga hiyas. … Ang atong Amahan sa Langit naglaum nga kita mogamit sa tanang talagsaong mga gasa nga Iyang gihatag niining mahimayaong dispensasyon.”⁴

Hinumdumi ang Makaayo nga Gahum ni Jesukristo

Sa tanan-tanan, bisan hain kita sa atong dalan padulong sa pagkaayo, hibaloi nga kita mahimong mamaayo sa hingpit tungod sa atong Manluluwas, si Jesukristo, ug sa Iyang Pag-ula.

Usahay maghisgot kita mahitungod sa Pag-ula ni Jesukristo nga sa tinuoray wala makahibalo kon unsaon paggamit sa Iyang makaayo nga haplas, apan ang proseso sa pagbuhat sa mao sa tinuoray yano kaayo—ug kinaugalingon (tan-awa sa 1 Nephi 15:14). Samtang atong tumanon ang espirituhanong mga himan nga kita gihatagan—sama sa pag-ampo, pagpuasa, ug pagsimba ug pagtambong sa templo kanunay—makakonektar kita sa Manluluwas sa indibidwal nga paagi. Ang pagpangita alang sa Iyang impluwensya diha sa atong mga kinabuhi matag adlaw makatabang usab kanato nga makakita nga Siya uban kanato.

Hinumdumi nga ang pagkaayo moabut og anam-anam samtang kita nagpadulong ngadto sa Manluluwas, bisan og importante usab ang pagkaamgo nga ang pipila sa atong labing lawom nga mga kasakit ug mga panlimbasug mahimong dili hingpit nga mamaayo niini nga kinabuhi. Apan ang Iyang grasya makadala ug makatabang kanato, makausab sa atong panglantaw, o makahatag kanato og kalig-on sa pagpadayon ug pagpangita sa tinuod nga kalipay sa bisan unsa nga paagi.

Hangtud dili pa kana mahitabo, atong huptan ang saad ni Elder Ulisses Soares sa Korum sa Napulog Duha ka mga Apostoles diha sa atong mga kasingkasing: “Ako mopamatuod nga samtang kita mopadayon nga maningkamot sa pagbuntog sa atong mga hagit, ang Dios mopanalangin nato sa mga gasa sa hugot nga pagtuo nga mamaayo ug sa pagbuhat og mga milagro. Iyang gihimo alang kanato kon unsay dili nato mahimo sa atong mga kaugalingon.”⁵

Usa ka adlaw, “matag butang ipahiuli” (Alma 11:44), ug kita makahimo sa pagpahayag, “Ako naayo na, sa hingpit.”

Ug unsa ka mahimayaon kana nga adlaw.