Librarya
Ang Mortal nga Pagpangalagad ni Jesukristo

“Ang Mortal nga Pagpangalagad ni Jesukristo,” Mga Hilisgotan ug Mga Pangutana (2023)

Imahe
Gitudloan ni Kristo ang katawhan

Giya sa Pagtuon sa Ebanghelyo

Ang Mortal nga Pagpangalagad ni Jesukristo

“Ug siya pagatawgon og Jesukristo, ang Anak sa Dios” (Mosiah 3:8)

Ang labing bantogan sa espiritu nga mga anak sa Langitnong Amahan mao ang Iyang Unang Natawo nga Anak, si Jesukristo. Sa wala pa Siya matawo dinhi sa yuta, nailhan si Jesus sa daghang titulo, sama sa Bantogan nga Jehova ug ang Labing Makagagahom nga Ginoo. Gipadala sa Dios nga Amahan ang Iyang Anak aron mopuyo dinhi sa yuta ug itanyag ang Iyang kaugalingon ingon og walay kinutoban nga maulaong sakripisyo aron mahimong posible ang katubsanan para sa tanang anak sa Dios. Panahon sa Iyang mortal nga kinabuhi, gitudlo ni Jesukristo ang Iyang ebanghelyo, mihimo og gamhanang mga milagro, ug mitukod sa Iyang Simbahan. Gikan sa mga asoy sa kasulatan sa Iyang kinabuhi, atong makat-onan nga Siya hingpit nga masulundon sa Iyang Amahan. Giayo ni Jesukristo ang masakiton ug ang gisakit, gitanyagan og paglaom kadtong nag-antos, gitudlo ang kaimportante sa paghinulsol, ug gihimong posible ang kapasayloan. Ang Iyang kinabuhi dinhi sa yuta maoy perpektong ehemplo nga angayang sundon sa tanang anak sa Langitnong Amahan.

Unsa ang Pagpangalagad ni Jesukristo Dinhi sa Yuta?

Gipadala sa Amahan ang Iyang Pinalanggang Anak, si Jesukristo, dinhi sa yuta aron mahimong Manluluwas ug Manunubos sa kalibotan. Pinaagi sa iyang mortal nga mga kasinatian ug sa Iyang maulaong sakripisyo, nahibaloan ug nasabtan Niya pag-ayo kon unsay nasinati sa matag usa kanato dinhi sa yuta. Gipakita ni Jesukristo ang hingpit nga ehemplo nga angay natong sundon.

Katibuk-ang pagpasabot sa hilisgotan: Jesukristo

May kalabotan nga mga giya sa pagtuon sa ebanghelyo: Pag-ula ni Jesukristo, Pagkatawo ni Jesukristo, Jesukristo, Pagkabanhaw

Seksiyon 1

Kanunayng Gihimo ni Jesukristo ang Kabubut-on sa Iyang Amahan

Imahe
Si Jesus nagtudlo didto sa templo

Bug-os nga narekord sa kasulatan ang milagrosong mga hitabo sa pagkatawo ni Jesukristo (pananglitan, tan-awa sa Lucas 2:1–19). Kon bahin sa iyang pagkabata, gipaambit lamang sa kasulatan nga “mitubo ang bata ug nahimong kusgan, napuno siya sa kaalam ug ang panalangin sa Dios diha kaniya” ug nga “mitubo si Jesus sa lawas ug sa kinaadman ug gikahimut-an siya sa Dios ug sa mga tawo” (Lucas 2:40, 52).

Dihang 12 anyos si Jesus, mibiyahe Siya sa Jerusalem uban ang Iyang pamilya aron saulogon ang Pista sa Pagpalabay. Sa ilang pagpauli sa Nasaret, naamgohan ni Maria ug Jose nga wala si Jesus sa mga kauban nila nga nagbiyahe. Nakita ra nila Siya didto sa templo sa Jerusalem, nga nagtudlo sa mga tawo ug nagtubag sa ilang mga pangutana (tan-awa sa Hubad ni Joseph Smith, Lucas 2:46 [sa Lucas 2:46, footnote c]). Sa dihang gipahayag ni Maria ang iyang kabalaka nga nawala Siya, si Jesus miingon, “Nganong nangita pa man kamo kanako? Wala ba kamo masayod nga kinahanglang anhi gayod ako sa balay sa akong Amahan?” (Lucas 2:49). Bisag bata pa, nakatutok si Jesus sa pagbuhat sa buluhaton sa Iyang Amahan.

Sa tibuok Niyang pagkinabuhi dinhi sa yuta, gihigugma ug gialagaran ni Jesus ang Dios nga Amahan. Siya miingon, “Kay nanaog ako gikan sa langit dili aron pagbuhat sa akong kaugalingong kabubut-on kon dili aron pagbuhat sa kabubut-on sa nagpadala kanako” (Juan 6:38). Gusto ni Jesukristo nga ingon niana sab ang atong buhaton. Misaad siya nga “kadto lamang nagtuman sa kabubut-on sa akong Amahan nga atua sa langit” mao ang makasulod sa gingharian sa Dios (Mateo 7:21).

Mga butang nga angayang hunahunaon

  • Basaha ang Juan 8:25–30, diin gipatin-aw ni Jesukristo nga, “nagbuhat man ako kanunay sa makapahimuot [sa Amahan]” (bersikulo 29). Unsay imong mahimo aron mas masabtan ug masunod ang kabubut-on sa Amahan sa imong kinabuhi?

Kalihokan alang sa pagkat-on uban sa laing mga tawo

  • Dapita ang imong mga kauban sa grupo nga basahon ug pamalandongan ang mga pangutana ni Presidente Russell M. Nelson sa mosunod nga pahayag:

    “Andam ba kamo nga ipatigbabaw ang Dios labaw sa tanan diha sa inyong kinabuhi? Andam ba kamo nga tugotan ang Dios nga maoy mahimong labing importante nga impluwensiya sa imong kinabuhi? Tugotan ba ninyo ang Iyang mga pulong, Iyang mga sugo, ug Iyang mga pakigsaad nga moimpluwensiya sa imong buhaton sa matag adlaw? Tugotan ba ninyo ang Iyang tingog nga maoy prayoridad kay sa bisan unsa pang uban? Andam ba kamo nga himoon ang bisan unsa nga Iyang ipabuhat kaninyo nga mas importante kay sa bisan unsang ambisyon? Andam ba kamo ipatuhop ang inyong kabubut-on ngadto sa Iyang kabubut-on?”

    Sa unsang paagi nga ang imong mga tubag niini nga mga pangutana makagiya nimo nga mosunod sa ehemplo sa Manluluwas nga kanunayng himoon ang kabubut-on sa Amahan?

Pagkat-on pa og dugang

Seksiyon 2

Ang Perpektong Kinabuhi ni Jesukristo Maoy Ehemplo para sa Tanan

Imahe
Si Juan Bautista nga nagbunyag ni Jesukristo

Sa hapit nang magsugod ang Iyang publikong pagpangalagad, miadto si Jesus kang Juan Bautista ug gibunyagan didto sa Suba sa Jordan. Bisan pa og wala gyod Siya makasala, gipatin-aw ni Jesus nga kinahanglan siyang mabunyagan “aron sa pagtuman sa tibuok pagkamatarong.” Dihang mihaw-as na si Jesus sa tubig, nadungog ang tingog sa Dios nga Amahan nga nag-ingon, “Kini mao ang pinangga kong Anak nga nakalipay kanako pag-ayo.” Ang Espiritu Santo mikunsad kang Jesus, sama sa gipakita sa simbolo sa salampati. (Tan-awa sa Mateo 3:13–17.)

Si Jesukristo nagpakita og hingpit nga kinabuhi. Human sa Iyang bunyag, nagpuasa Siya sulod sa 40 ka adlaw ug 40 ka gabii aron makig-uban sa Dios (tan-awa sa Hubad ni Joseph Smith, Mateo 4:2 [sa Mateo 4:2, footnote c]). Pagkahuman niana, miabot si Satanas aron tentalon Siya. Pero lig-ong mibarog si Jesukristo batok sa mga tentasyon. Ang walay sala nga kinabuhi ni Jesukristo nag-andam Kaniya sa paghimo sa Iyang kaugalingon nga usa ka sakripisyo para sa tanang sala sa mga anak sa Dios. Isip ang bugtong hingpit nga binuhat sa tanang anak sa Dios, si Jesukristo mao ang labing maayo nga ehemplo sa matag usa kanato samtang naningkamot ta sa pagsunod sa Dios (tan-awa sa 1 Pedro 2:21–22).

Mga butang nga angayang hunahunaon

  • Basaha ang Mateo 4:1–11, apil ang mga footnote sa Hubad ni Joseph Smith, nga naghulagway kon unsay nahitabo dihang gitestingan ni Satanas og tental si Jesus. Unsay atong makat-onan gikan sa ehemplo ni Kristo sa pag-atubang og mga tentasyon? Sa unsang mga paagi ang pagpuasa, pag-ampo, ug kahibalo sa mga kasulatan moandam nimo sa pagbuntog sa tentasyon?

  • Ang nabanhaw nga si Jesukristo mitudlo sa napulog duha ka disipulo nga Nephita bahin sa ilang tahas isip mga maghuhukom sa katawhan. Basaha ang 3 Nephi 27:27 aron makita ang sugo nga gihatag ni Jesukristo sa Iyang mga disipulo. Nganong importante para sa mga sumusunod ni Jesukristo nga mahisama Kaniya?

Kalihokan alang sa pagkat-on uban sa laing mga tawo

  • Hangyoa ang mga sakop sa grupo nga hunahunaon kon nganong gikinahanglan ni Jesukristo nga makasinati og tentasyon. Dapita sila nga pangitaon ang mga tubag sa Mga Hebreohanon 2:17–18; 4:15–16. Nganong importanteng masabtan nato nga nakasinati usab si Jesukristo og mga tentasyon sama nato karon?

Pagkat-on pa og dugang

Seksiyon 3

Gitudloan Ta ni Jesus nga Higugmaon ug Alagaran ang Usag Usa

Imahe
Giayo ni Jesus ang tawong bakol

Nagtudlo si Jesukristo nga naay duha ka dagkong sugo. Ang una niini nga mga sugo mao ang paghigugma sa Dios sa bug-os natong kasingkasing, kalag, ug hunahuna. Ang ikaduha mao ang paghigugma sa uban sama sa paghigugma nato sa atong kaugalingon. (Tan-awa sa Mateo 22:36–39.) Kanunayng gitudlo ni Jesus kini nga mga kamatuoran sa mga sermon ug mga sambingay (pananglitan, tan-awa sa Mateo 25:31–46; Lucas 10:25–37).

Kanunayng nagpakita og maayong ehemplo si Jesukristo kon unsaon pagtuman sa Dios ug paghigugma sa uban. Personal Niyang gipakita ang Iyang gugma ug kaluoy sa uban samtang nangalagad Siya uban ang dakong gahom taliwala sa mga anak sa Dios, nga nag-ayo sa masakiton ug naghimo og daghang dagkong milagro (tan-awa sa Mateo 11:4–5; Mosiah 3:5–6).

Usa ka importanteng bahin sa mortal nga pagpangalagad ni Kristo mao ang pagtukod sa Iyang Simbahan. Sa paghimo niini, mitawag Siya og napulog duha ka disipulo, gihatagan sila og awtoridad sa pagsangyaw sa ebanghelyo, ug gihatagan sila og gahom sa pag-ayo sa masakiton (tan-awa sa Mateo 10:1–8). Gipadayon niini nga mga disipulo ang buluhaton sa Ginoo human sa Iyang kamatayon ug Pagkabanhaw dihang nagtudlo sila bahin sa paghinulsol ug nagdapit sa uban nga magpabunyag ug dawaton ang gasa sa Espiritu Santo (tan-awa sa Mga Buhat 2:22–24, 37–47). Gamit ang gahom sa pagkapari sa pagpang-ayo, gialagaran nila ang uban ug mihimo og mga kahigayonan sa pagsangyaw sa ebanghelyo ni Jesukristo (tan-awa sa Mga Buhat 3:1–11).

Mga butang nga angayang hunahunaon

  • Ang ikaduhang dakong sugo mao ang paghigugma sa uban. Si Presidente Russell M. Nelson mitudlo: “Isip mga disipulo ni Jesukristo, kita ang mga ehemplo kon unsaon sa pagtagad sa uban—ilabi na kon kita adunay managlahi nga opinyon. Usa sa labing sayon nga paagi sa pag-ila sa tinuod nga sumusunod ni Jesukristo mao ang maluluy-on nga pagtagad niana nga tawo ngadto sa ubang tawo.” Sa unsang paagi makatabang nimo ang paghinumdom sa ehemplo ni Jesukristo dihang lisod higugmaon ang uban?

Kalihokan alang sa pagkat-on uban sa laing mga tawo

  • Basaha og dungan ang mosunod nga pahayag ni Elder Neil L. Andersen:

    “Ayaw gayud pagkaluya—bisag unsa kalawom sa mga samad sa inyong kalag, bisan unsay hinungdan, bisan diin o kanus-a nahitabo, ug unsa kadali o kadugay kining maayo, dili tuyo nga kamo mamatay sa espirituwal nga paagi. Gituyo nga kamo makalahutay sa espiritwal nga paagi ug magpuyo ug molambo sa inyong pagtuo ug pagsalig sa Dios.

    “Wala himoa sa Dios ang atong mga espiritu aron kita dili magkinahanglan Kaniya. Ang atong Ginoo ug Manluluwas, si Jesukristo, pinaagi sa dili masukod nga gasa sa Pag-ula, wala lamang moluwas kanato gikan sa kamatayon ug mitanyag kanato, pinaagi sa paghinulsol, sa kapasayloan sa atong mga sala, apan Siya mibarog usab nga andam sa pagluwas kanato gikan sa mga kasubo ug mga kasakit sa nasamdan natong mga kalag.”

    Hisgoti ang gahom nga anaa kanato tungod sa kapasidad sa Manluluwas sa pagpang-ayo. Dapita ang mga sakop sa grupo nga ikonsiderar ang pagpakigbahin og mga kasinatian, kon nahiangay, dihang nabati nila ang gahom sa pagpang-ayo ni Jesukristo sa ilang kinabuhi.

Pagkat-on pa og dugang

Seksiyon 4

Gihatag ni Jesukristo ang Iyang Kinabuhi aron Pagtubos sa mga Anak sa Dios

Imahe
Si Jesus nga nagluhod

Gitagna ni propeta Abinadi sa Basahon ni Mormon nga si Jesukristo manaog gikan sa langit ug pagatamayon, kastigohaon, isalikway, ilansang, ug patyon—kining tanan aron Iyang matubos ang Iyang katawhan (tan-awa sa Mosiah 15:1–7). Ang labing dako nga panginahanglan sa kalibotan karon mao ang pagkahibalo ug pagkasabot sa mortal nga misyon sa atong Ginoong Jesukristo , kon sa unsang paagi Siya nag-antos ug gibayaran ang bili sa atong mga sala aron kita maluwas.

Pipila sa labing importante nga mga panghitabo sa kasaysayan sa yuta nahitabo panahon sa kataposang mga oras sa kinabuhi sa Ginoo. Samtang nagsingabot ang Judeo nga Pagpalabay, gidala ni Jesus ang Iyang mga disipulo sa Getsemani, usa ka tanaman sa mga kahoy nga olibo o duol sa Bukid sa mga Olibo nga anaa lang sa gawas sa paril sa Jerusalem. Dinhi miampo si Jesukristo ug gisugdan pag-abaga sa Iyang kaugalingon ang tanang gikinahanglan aron matubos ta. Nanagna si Hari Benjamin nga si Jesukristo mobati og “sakit sa lawas, kagutom, kauhaw, ug kakapoy” ug “kasubo tungod sa pagkadaotan ug pagkasalawayon sa iyang mga katawhan” (Mosiah 3:7). Dili nato bug-os masabtan ang kagrabehon ug kalapdon sa Iyang pag-antos sa Getsemani, pero ang grabeng kasakit maoy hinungdan kon nganong ang singot ni Jesus “sama sa dagkong tulo sa dugo nga nangahulog sa yuta” (Lucas 22:44; tan-awa usab sa Doktrina ug mga Pakigsaad 19:18).

Dayon, si Jesus gibudhian sa usa sa Iyang mga disipulo, gidakop, pagatamayon, ug sayop nga giakosahan sa mga lider sa relihiyon sa mga Judeo. Siya gidala, gisukit-sukit, ug gilatos sa mga Romano. (Tan-aw sa Mateo 26:47–68; 27:1–31.) Gidala sa mga sundalo si Jesukristo ug Siya gilansang sa krus, nagpasabot nga gilansang ang iyang mga kamot ug mga tiil sa krus (tan-awa sa Lucas 23:33–38). Samtang Siya gibayaw ug gibitay sa krus, ang kasakit ug pag-antos alang sa atong mga sala nagpadayon. Ang Pag-ula ni Jesukristo naglakip sa bayad nga Iyang gihimo sa Getsemani ug sa krus aron sa pagbuntog sa mga epekto sa sala niadtong naghinulsol na sa ilang mga sala (tan-awa sa Alma 5:48; 3 Nephi 9:22; Doktrina ug mga Pakigsaad 19:17).

Human sa Iyang kamatayon, gibutang sa lubnganan ang Iyang lawas (tan-awa sa Juan 19:38–42). Sa ikatulong adlaw human sa Iyang Paglansang sa Krus, gikuha og balik ni Kristo ang Iyang lawas ug nahimong labing una nga tawo nga nabanhaw (tan-awa sa Mateo 28:1–8). Daghang tawo ang nakasaksi sa pagkabanhaw sa Ginoo ug nagpamatuod sa mahimayaong balita. Kay nabanhaw man si Jesukristo, ang tanang espiritu sa mga anak sa Dios mahiusa pag-usab ang ilang mga lawas ug makadawat sa panalangin sa pagka-imortal (tan-awa sa 1 Corinto 15:21–22; Alma 11:44–45). Naantos ni Jesukristo ang tanan dihang dinhi pa Siya sa yuta tungod sa Iyang gugma sa tanang anak sa Langitnong Amahan (tan-awa sa 1 Nephi 19:9; Doktrina ug mga Pakigsaad 34:3).

Mga butang nga angayang hunahunaon

  • Sa wala pa moadto sa Getsemani, gipaila ni Jesukristo ang ordinansa sa sakramento ngadto sa Iyang mga disipulo. Basaha ang Mateo 26:26–30. Unsay imong mahimo aron mas mapamalandong ang kinabuhi ug Pag-ula ni Jesukristo dihang moambit ka sa sakramento? Sa unsang paagi ang imong kasinatian sa pag-ambit sa sakramento makapadako sa imong gugma para kang Jesukristo?

Kalihokan alang sa pagkat-on uban sa laing mga tawo

  • Basaha og dungan ang mosunod nga pahayag ni Presidente Russell M. Nelson:

    “Mikunsad aron moanhi sa yuta isip ang Bugtong Anak sa Amahan sa unod, Siya bangis nga giinsulto, gibugal-bugalan, gilud-an, ug gihampak. Sa Tanaman sa Getsemani, ang atong Manluluwas midala sa Iyang Kaugalingon sa matag kasakit, matag sala, ug sa tanan nga hilabihan nga kagul-anan ug pag-antus nga sukad ninyo nasinati ug nako ug sa tanan nga sukad natawo o matawo pa. Ubos sa masakit kaayo nga alantuson, miagas ang Iyang dugo sa matag lungag sa panit. Kining tanang mga pag-antus migrabe pa sa dihang bangis Siya nga gilansang sa krus didto sa Kalbaryo.

    “Pinaagi niining masakit kaayo nga mga kasinatian ug sa Iyang misunod nga Pagkabanhaw—ang Iyang walay kinutuban nga Pag-ula—Iyang gihatag ang pagka-imortal ngadto sa tanan, ug mitubos sa matag usa kanato gikan sa mga epekto sa sala, sa kondisyon sa atong paghinulsol.”

    Hisgoti uban sa grupo kon nganong importante nga makakat-on bahin sa pag-antos ni Jesukristo sa Getsemani ug sa krus, Iyang kamatayon, ug Iyang Pagkabanhaw. Sa unsang paagi ang mas bug-os nga pagkasabot sa kasinatian ni Jesukristo mas makapasuod nimo Kaniya?

Pagkat-on pa og dugang

Iprinta