Kapitulo 1
Jesukristo—Atong Bugtong Dalan sa Paglaum ug Kalipay
“Kon ang atong kinabuhi ug pagtuo nakasentro kang Jesukristo ug sa iyang gipahiuli nga ebanghelyo, walay butang nga magpabiling sayop kanunay.”
Gikan sa Kinabuhi ni Howard W. Hunter
Usa ka klaro kaayo nga tema diha sa pagtulun-an ni Presidente Howard W. Hunter mao nga ang tinuod nga kalinaw, pagkaayo, ug kalipay moabut lamang kon ang usa ka tawo maningkamot nga makaila ug mosunod ni Jesukristo. Gitudlo ni Presidente Hunter nga ang “dalan ni Kristo dili lang maoy husto nga paagi, apan mao lamang ang bugtong dalan sa paglaum ug kalipay.”1
Si Presidente Hunter sa samang paagi walay lipud-lipud nga mipamatuod sa balaanong misyon sa Manluluwas. “Isip usa ka inordenahan nga Apostol ug espesyal nga saksi ni Kristo, mohatag ko sa balaan nakong pagsaksi nga si Jesukristo sa pagkatinuod Anak sa Dios,” siya mipahayag. “Siya ang Mesiyas nga mapanagnaong gipaabut sa mga propeta sa Daang Tugon. Siya ang Paglaum sa Israel, kansang pag-anhi giampo na sa mga anak ni Abraham, Isaac, ug Jacob sulod sa dugay nang mga siglo sa gitudlong pamaagi sa pagsimba. …
“Pinaagi kini sa gahum sa Espiritu Santo nga ako mihatag sa akong pagsaksi. Nahibalo ko sa katinuod ni Kristo sama nga ako nakakita pinaagi sa akong mga mata ug nakadungog pinaagi sa akong mga dalunggan. Nasayud sab ako nga ang Espiritu Santo mopamatuod sa katinuod sa akong pagsaksi ngadto sa mga kasingkasing sa tanang maminaw uban sa hugot nga pagtuo.”2
Tungod sa tinguha nga makaadto sa mga dapit nga gipangalagaran ni Jesus, si Presidente Hunter mibiyahe sa Balaang Yuta kapin sa duha ka dosena ka higayon. Si Elder James E. Faust sa Korum sa Napulog Duha ka mga Apostoles miingon nga ang “Jerusalem nakadani kaayo kaniya. … Ang iyang tinguha nga pag-adto sa dapit nga gitaak ug gipangtudloan ni Jesus ingon og walay katagbawan. Ganahan kaayo siya sa mga talan-awon ug sa mga huni. Ganahan siya kaayo sa Galilea. Apan usa ka dapit ang ganahan gayud niya sa tanan. Siya sa kanunay moingon, ‘Mangadto kita sa Tanaman nga Lubnganan kausa pa, sama sa gihimo nato kaniadto.’ Didto molingkod siya ug mamalandong sama nga ang iyang gibati molahos sa tabil nga anaa taliwala kanila sa Manluluwas.”3
“Unsa ka sagad kitang maghunahuna sa Manluluwas? Unsa ka lawom ug unsa ka mapasalamaton ug unsa ka madayegon kitang mamalandong sa iyang kinabuhi? Unsa man kamahinungdanon sa atong kinabuhi ang atong pagkaila kaniya?”
Mga Pagtulun-an ni Howard W. Hunter
1
Kinahanglang makaila kita ni Kristo nga mas labaw pa kay sa atong pagkaila Kaniya ug mohinumdom Kaniya nga mas kanunay kay sa atong paghinumdom Kaniya.
Ang mga miyembro sa Ang Simbahan ni Jesukristo sa mga Santos sa Ulahing mga Adlaw sa matinahurong paagi mokanta sa:
Jesus, ang paghunahuna
Ko nimo katam-is;
Mas tam-is kon makita ka
Ug mag-uban kita. …
… Unsa ka sagad kitang maghunahuna sa Manluluwas? Unsa ka lawom ug unsa ka mapasalamaton ug unsa ka madayegon kitang mamalandong sa iyang kinabuhi? Unsa man kamahinungdanon sa atong kinabuhi ang atong pagkaila kaniya?
Sama pananglit, kapila sa usa ka normal nga adlaw, semana nga tingtrabaho, o sa daling mapupos nga bulan kita migahin sa “paghunahuna kang Jesus”? Tingali ang uban kanato, wala kaayo.
Sigurado nga ang kinabuhi mas malinawon, sigurado nga ang kaminyoon ug mga pamilya mas malig-on, sigurado nga ang kasilinganan ug kanasuran mas luwas ug mas mabination ug mas mapuslanon kon ang daghan sa ebanghelyo ni Jesukristo “uban sa katam-is” mopuno sa atong mga dughan.
Hangtud nga atong mas mahatagan sa pagtagad ang gibati sa atong kasingkasing, naghununa ko kon aduna ba kitay paglaum nga maangkon nga mas dakong kalipay, mas tam-is nga ganti: sa umaabut ang mahigugmaon niyang “ nawong makita / Ug makapuyo sa [iyang] atubangan.”
Sa matag adlaw sa atong kinabuhi ug sa matag panahon sa tuig … , si Jesus mangutana sa matag usa kanato, sama sa iyang gibuhat human sa madaugong pagsulod ngadto sa Jerusalem daghang tuig nang milabay, “Unsa may inyong paghunahuna mahitungod kang Kristo? kang kinsa man siyang anak?” (Mat. 22:42.)
Kita namahayag nga siya ang Anak sa Dios, ug ang reyalidad niana nga kamatuoran kinahanglang motandog sa atong kalag sa kanunay.4
Kiinahanglang mas makaila kita kang Kristo nga mas labaw pa kay sa atong pagkaila kaniya: kinahanglang mohinumdom kita kaniya nga mas labaw pa kay sa atong paghinumdom kaniya; kinahanglang moserbisyo kita kaniya nga mas kanunay kay sa atong pagserbisyo kaniya. Dayon moinom kita sa tubig nga nagdagayday padulong sa kinabuhing dayon ug mokaon sa pan sa kinabuhi.5
“Unta mas mapahinunguron kita ug disiplinadong mga sumusunod ni Kristo. Unta siya atong panggaon diha sa atong mga hunahuna ug litukon ang iyang ngalan uban sa pagmahal.”
2
Si Jesus ang atong bugtong nga tinubdan sa paglaum ug mahangturong kalipay.
Paglaum sa matag kasingkasing nga mahinulsulon,
Kalipay sa tanan nga maaghup,
Sa tanan nga nalaglag, pagkamabination mo!
Pagkaanindot alang niadtong nagtinguha!
Pagkaanindot nga bersikulo sa musika, ug kaanindot nga mensahe sa paglaum nga nakaangkla sa ebanghelyo ni Kristo! Aduna ba kanato, bisan asa, nga wala magkinahanglan og paglaum ug mangita og mas dakong kalipay? Malukpanon kini nga panginahanglan ug pangandoy sa tawhanong kalag, ug mga saad kini ni Kristo ngadto sa iyang mga sumusunod. Ang paglaum gipadangat ngadto sa “matag mahinulsulon nga kasingkasing” ug ang kalipay moabut ngadto sa “tanang maaghup.”
Ang paghinulsol dako nga buluhaton—pagwagtang kini sa atong garbo ug kawalay pagbati, apan labaw sa tanan magwagtang kini sa atong mga sala. Kay, sama sa nahibaloan sa amahan ni Haring Lamoni bayente ka siglong milabay, kini ang kantidad sa tinuod nga paglaum. “O Dios,” miingon siya, “mahimo ba nga ikaw magpaila ngari kanako, ug ako mobiya sa tanan kong mga sala aron makaila kanimo… aron ako mahimo nga mabangon gikan sa mga patay, ug maluwas sa katapusan nga adlaw.” (Alma 22:18.) Kon kita, usab, andam nga mobiya sa tanan natong mga sala aron makaila kaniya ug mosunod kaniya, kita, usab, mapuno sa kalipay sa kinabuhing dayon.
Ug unsa man kaha ang mga maaghup? Sa kalibutan diin ang tuyo mao ang pagdaug pinaagi sa pagpanghadlok ug pagtinguha nga maoy mohawud, dili ka makakita og dakong duso sa katawhan nga naglinya sa pagpalit og basahon nga nag-awhag og kaaghup. Apan ang mga maaghup makapanunod sa yuta, usa ka dalaygon nga buhat—ug gihimo sa walay pagpanghadlok! Sa madugay o madali, ug kita mag-ampo nga unta mahitabo kini dayon kay sa madugay pa, ang tanan moila nga ang pamaagi ni Kristo dili lang maoy husto nga paagi, apan sa katapusan mao lamang ang bugtong dalan sa paglaum og kalipay. Matag tuhod moyukbo ug matag dila mokumpisal nga ang kaaghup mas maayo kay sa kabangis, nga ang kamabination mas maayo kay sa pamugos, nga ang malumo nga pulong makahupay sa kapungot. Sa katapusan, ug sa madali kon mahimo, kinahanglang kita mahisama kaniya. …
Jesus, bugtong kalipay ka,
Ganti namong tanan;
Jesus, ikaw ang himaya,
Ngadtos kahangturan.
Kana ang akong pag-ampo ug panghinaot alang sa tibuok kalibutan. … Mopamatuod ko nga si Jesus mao lamang ang bugtong tinubdan sa malungtarong kalipay, nga ang atong kalinaw nga malungtaron anaa lamang kaniya. Akong panghinaot nga siya himoon nato nga “atong himaya karon,” ang himaya nga gitinguha natong matag usa ug bugtong ganti nga mahuptan nga bililhon sa matag tawo ug kanasuran. Siya ang atong ganti karon ug sa kahangturan. Ang ubang ganti sa katapusan walay bili. Ang ubang kabantugan mahanaw ra paglabay sa panahon ug matunaw uban sa mga elemento. Sa katapusan, … wala kitay laing makita nga tinuod nga kalipay gawas kang Kristo.
… Unta mahimo kitang mas mapahinunguron ug disiplinadong mga sumusunod ni Kristo. Unta siya atong hangupon diha sa atong mga hunahuna ug litukon ang iyang ngalan uban sa gugma. Unta moluhod kita sa iyang atubangan uban ang kaaghup ug kamanggiloy-on. Unta manalangin ug moserbisyo kita sa uban nga sila mohimo sa samang butang.6
3
Ang kinadak-ang panginahanglan sa tibuok kalibutan mao ang aktibo ug sinserong pagtuo diha sa Manluluwas ug sa Iyang mga pagtulun-an.
Dunay mga tawo nga moingon nga ang pagtuo sa Biblia kinaraan. Kinaraan ba diay ang pagtuo sa Dios, kang Jesukristo, ang Anak sa Buhi nga Dios? Kinaraan ba diay ang pagtuo sa iyang maulaong sakripisyo ug sa pagkabanhaw? Kon mao, mopahayag ko sa akong kaugalingon nga ako kinaraan ug ang Simbahan kinaraan. Sa labihan ka yano nga paagi ang Agalon mitudlo sa mga baruganan sa kinabuhing dayon ug sa mga leksyon nga nagdala og kalipay niadtong adunay hugot nga pagtuo nga motuo. Daw dili resonable ang paghunahuna nga kinahanglang himoong moderno ang mga pagtulun-an sa Agalon. Ang Iyang mensahe naglangkob sa mga baruganan nga mahangturon.7
Niini nga panahon, ug sa kapanahunang milabay ug sa matag kapanahunang moabut, ang kinadak-ang panginahanglan sa kalibutan mao ang aktibo ug sinserong pagtuo sa nag-unang mga pagtulun-an ni Jesus nga Nasaretnon, ang buhi nga Anak sa buhi nga Dios. Tungod kay daghan ang misalikway niadto nga mga pagtulun-an, kabahin kana sa rason nganong ang sinserong mga tumutuo sa ebanghelyo ni Jesukristo kinahanglang mosangyaw sa kamatuoran niini ug mopakita og ehemplo sa gahum ug kalinaw sa usa ka matarung, maaghup nga kinabuhi. …
Unsay angay natong buhaton kon masilo kita, masaypan sa pagsabut, dili mahatagan og patas nga pagtratar, himoong sad-an? Unsay angay natong buhaton kon mapasakitan kita sa atong gimahal, o nalabyan sa promosyon, o naakusahan nga sad-an, o dili makiangayon nga pagpangataki sa atong mga motibo?
Makig-away ba ta? Mas maningkamot ba kita nga modaug? Sundon ba nato ang baruganan nga mata sa mata ug ngipon sa ngipon, o … kita ba unya makaamgo nga kini nga baruganan maghimo kanato nga mga buta ug mga pangag? …
Sa kahalangdon sa iyang kinabuhi ug sa ehemplo sa iyang mga pagtulun-an, si Kristo daghan og gitambag kanato nga gisukipan kanunay og siguradong mga saad. Nanudlo siya uban sa kahalangdon ug awtoridad nga mipuno og paglaum sa edukado ug sa walay kabangkaagan, sa adunahan ug sa mga kabus, sa mga baskog ug mga masakiton.8
Paningkamuti ang pag-angkon og usa ka personal nga pagpamatuod kang Jesukristo ug sa pag-ula. Ang pagtuon sa kinabuhi ni Kristo ug ang usa ka pagpamatuod sa iyang katinuod usa ka butang nga kinahanglang tinguhaon natong matag usa. Kon masabtan nato ang iyang misyon, ug ang pag-ula nga iyang nahimo, mas dako ang atong tinguha sa pagkahimong sama kaniya.9
Ang Manluluwas mopahunong sa mga unos sa atong kinabuhi.
4
Kon atong gamiton ang atong pagtuo sa Manluluwas, Iyang pahunungon ang dagkong balud sa atong kinabuhi.
Tanan kita nakakita og kalit nga mga unos sa atong kinabuhi. Ang pipila niini … bangis ug makahadlok ug makadaot. Isip mga indibidwal, mga pamilya, komunidad, mga nasud, gani isip usa ka simbahan, kita dunay kalit nga unos diin kita makapangutana, “Magtutudlo, wala ka ba lang magkabana nga mangalumos kita?” [Marcos 4:38.] Ug sa usa ka paagi o sa lain kanunay kitang makadungog dihang linaw na human sa unos, “Nganong nalisang man kamo? Wala ba kamoy pagsalig?” [Marcos 4:40.]
Walay usa nato ang gustong moingon nga kita walay pagtuo, apan nagtuo ko nga ang malumo nga pahinumdom sa Ginoo dinhi haum gayud kaayo. Kining halangdon nga si Jehovah, kinsa atong giingon nga atong gisaligan ug kansang pangalan atong gidala, mao siya kinsa nag-ingon, “Mahimo ang usa ka hawan sa taliwala sa mga tubig, ug pagabahinon niini ang mga tubig gikan sa mga tubig.” (Gen. 1:6.) Ug siya gihapon ang nag-ingon nga, “Matingub ang mga tubig nga anaa sa ilalum sa mga langit ngadto sa usa ka dapit ug tumungha ang yuta nga mamala.” (Gen. 1:9.) Dugang pa, siya ang mibahin sa Pulang Dagat, naghimo sa mga Israelitas nga mosulod latas sa uga nga yuta. (Tan-awa sa Ex. 14:21–22.) Klaro gayud nga dili ikatingala nga mahimo ra niyang mandoan ang ubang elemento sa Dagat sa Galilea. Ug ang atong pagtuo kinahanglang mopahinumdom kanato nga mahimo ra niyang pahunungon ang dagkong balud sa atong kinabuhi. …
Tanan kita adunay mga kalisdanan sa atong kinabuhi. Nagtuo ko nga may katarungan ang atong pagkasiguro niana. Ang uban niini posibling bangis ug makadaot ug makalaglag. Ang uban niini tingali mopahuyang sa atong pagtuo sa usa ka mahigugmaon nga Dios kinsa dunay gahum sa pagpangalagad og kahupayan alang kanato.
Niana nga mga kabalaka nagtuo ko nga ang Amahan natong tanan moingon nga, “Nganong nalisang man kamo? Wala ba kamoy pagsalig?” Ug dayag lang nga gikinahanglan gayud ang pagtuo sa tibuok nga panaw, sa tibuok nga kasinatian, sa kinatibuk-an sa atong kinabuhi, dili lamang sa tinagsip ug mga piraso ug sa maunos nga mga panahon. …
Miingon si Jesus, “Dinhi sa kalibutan aduna kamoy kagul-anan apan sumalig kamo, gidaug ko na ang kalibutan.” (Juan 16:33.)10
5
Kon atong isentro ang atong kinabuhi ngadto sa Manluluwas, wala kitay angay kahadlokan, ug ang atong mga kabalaka mapulihan og kalipay.
Nahibalo kaayo ko bahin sa inyong ka-busy ug pig-it nga kinabuhi nga usahay madismaya kamo. Gani usahay mabalaka kamo. Nasayud ko nianang tanan. …
Ang akong mensahe alang ninyo karon mao ang “Ayaw na kamo pagkahadlok, gamayng panon.” Pag-awhag kini kaninyo sa pagmaya sa talagsaong mga panalangin sa kinabuhi. Pagdapit kini kaninyo sa pagbati sa dakong kahinam sa pagpakabuhi sa ebanghelyo ug pagpakabuhi diha sa gugma sa atong Langitnong Amahan. Nindot ang kinabuhi, bisan sa mga lisud nga panahon, ug anaa ang kalipay, kamaya, ug kalinaw sa agianan, ug ang walay katapusan nga pagsinati niini sa katapusan sa atong kinabuhi.
Tinuod, dunay daghang butang nga kabalak-an—ang uban niini mga mahinungdanon kaayo—mao nga atong gihisgutan ang ebanghelyo kabahin sa hugot nga pagtuo, ug paglaum, ug gugmang putli. Isip mga Santos sa Ulahing mga Adlaw, atoa ang “buhong nga kinabuhi,” ug naningkamot kita nga mahatagan og gibug-aton ang atong mga panalangin ug oportunidad samtang minusan ang atong mga kasagmuyo ug mga kabalaka. “Pangita nga makugihon, pag-ampo sa kanunay, ug pagmatuohon, ug ang tanan nga mga butang maghiusa sa paglihok alang sa inyong kaayohan” (D&P 90:24). Gusto kong pahinumduman kamo niana nga saad. …
Palihug hinumdumi kini. Kon ang atong kinabuhi ug pagtuo nakasentro kang Jesukristo ug sa iyang gipahiuli nga ebanghelyo, walay butang nga magpabiling sayop kanunay.” Sa laing bahin, kon ang atong kinabuhi wala magsentro sa Manluluwas ug sa iyang mga pagtulun-an, walay laing kalampusan nga magpabiling husto kanunay. …
Tanan kita usahay magproblema sa panglawas—ang uban sa kanunay. Ang mga balatian ug sakit kabahin sa palas-anon sa mortalidad. Batuni ang pagtuo ug pagma-positibo. Ang gahum sa priesthood tinuod, ug daghan kaayo ang maayo sa kinabuhi, bisan og naglisud kita sa pisikal. Atong kalipay ang kahibalo nga walay mga sakit human sa Pagkabanhaw.
Ang uban natong problema moabut pinaagi sa mga tintasyon. Ang uban tingali lisud nga mga desisyon kabahin sa edukasyon o panarbaho o kwarta o kaminyoon. Bisan unsa ang inyong palas-anon, makaplagan ninyo diha kang Kristo ang kalig-on nga inyong gikinahanglan. Si Jesukristo mao ang Alpha ug Omega, sa tinuoray ang sinugdanan ug ang katapusan. Kauban siya nato sukad sa sinugdanan hangtud sa katapusan, ug sa ingon mas labaw pa siya kay sa usa ka tigpaniid sa atong kinabuhi. …
Kon ang atong gipas-an mao ang sala mismo, ang mensahe mao ra gihapon. Nasayud si Kristo sa tibuok gibug-aton sa atong mga sala, kay miuna siya sa pagpas-an niini. Kon ang atong gipas-an dili sala o tintasyon, apan balatian o kakabus o gisalikway, mao ra gihapon kini. Siya nasayud. …
Giantus Niya ang labaw pa kay sa atong mga sala. Siya ang gitawag ni Isaias nga “tawo sa kasub-anan” (Isaias 53:3; Mosiah 14:3) hingpit nga nasayud sa matag problema nga atong gilatas kay siya mipili man nga mopas-an sa tukmang gibug-aton sa tanan natong suliran ug mga kasakit. …
Mga kaigsoonan, kamo adunay mga kabalaka ug mga hagit sa tanang matang, apan dawata ang kinabuhi nga malipayon ug puno sa pagtuo. Tun-i ang mga kasulatan sa kanunay. Mag-ampo nga tinuoray. Sunda ang tingog sa Espiritu ug sa mga propeta. Buhata ang tanan ninyong mahimo sa pagtabang sa uban. Makaplagan ninyo ang talagsaong kalipay sa paghimo niini. Ugma damlag sa mahimayaong adlaw ang tanan ninyong kabalaka mahimo nga mga kalipay.
Sa gisulat ni Joseph Smith gikan sa iyang selda sa Liberty Jail ngadto sa nag-antus nga mga Santos:
Kita magmalipayon sa pagbuhat sa tanan nga mga butang nga ubos sa atong gahum; ug unya kita magmalinawon, uban ang labing dako nga kasiguroan, nga makasaksi sa kaluwasan sa Dios, ug sa iyang mga bukton nga ipadayag [D&P 123:17; emphasis gidugang].
[Sa mga pulong sa Ginoo ngadto ni Propeta Joseph Smith:]
Busa ayaw kahadlok, gagmay nga panon; pagbuhat og maayo; tuguti nga ang yuta ug impyerno maghiusa sa pagbatok kaninyo, kay kon kamo gitukod diha sa akong lig-on nga sukaranan sila dili makabuntog. …
Paghunahuna ngari kanako sa matag hunahuna; ayaw pagduha-duha, ayaw kahadlok
Hunahunaa ang mga samad nga milapos sa akong kilid, ug usab ang mga marka sa mga lansang sa akong mga kamot ug tiil; pagmatinud-anon, paghupot sa akong mga sugo, ug kamo makapanunod sa gingharian sa langit [D&P 6:34–37].11
Mga Sugyot alang sa Pagtuon ug Pagtudlo
Mga Pangutana
-
Hunahunaa kon unsaon nimo sa pagtubag ang pangutana ni Presidente Hunter sa seksyon 1. Unsaon man nato sa paghimo kang Jesukristo nga mas mahinungdanon sa atong kinabuhi? Unsaon nato sa paghimo Kaniya nga maoy mas mahinungdanon sa atong panimalay? Unsaon man nato sa pagkaila kang Kristo nga mas labaw kay sa atong pagkaila Kaniya?
-
Unsa man ang “angay natong buhaton” aron makadawat sa paglaum, kalipay, ug kalinaw nga gitanyag ni Kristo? (Tan-awa sa seksyon 2.) Kanus-a ka man mibati sa paglaum, kalinaw, ug kalipay nga moabut pinaagi sa Manluluwas?
-
Sa imong hunahuna ngano nga “ang dakong panginahanglan sa tibuok kalibutan mao ang usa ka aktibo ug sinserong pagtuo diha sa nag-una nga mga pagtulun-an ni Jesus nga Nazaretnon”? (Tan-awa sa seksyon 3.) Unsaon man nimo sa pagpakita sa imong pagtuo sa mga pagtulun-an ni Kristo kon ikaw mibati og “kasilo, nasaypan sa pagsabut, dili patas nga pagtratar, o gihimong sad-an”?
-
Unsa ang atong makat-unan gikan sa mga pagtulun-an ni Presidente Hunter mahitungod sa kahadlok ug sa hugot nga pagtuo? (Tan-awa sa seksyon 4.) Sa unsang paagi ang pagtuo makatabang nato sa pagbuntog sa kahadlok? Pamalandungi ang mga higayon dihang gipahunong sa Manluluwas ang mga unos sa imong kinabuhi dihang gigamit nimo ang pagtuo diha Kaniya.
-
Sa unsang paagi ang mga pulong ni Presidente Hunter sa seksyon 5 makatabang nato nga “dawaton ang kinabuhi uban sa kalipay,” bisan og masinati nato ang mga kasub-anan, kasagmuyo, ug mga balatian? Unsaon man nato sa paghimo og usa ka mahangturon nga panglantaw? Sa unsang paagi ang Manluluwas mitabang kanimo sa pag-angkon og mas buhong nga kinabuhi?
May Kalabutan nga mga Kasulatan
Mateo 11:28–30; Juan 14:6; 2 Nephi 31:19–21; Alma 5:14–16; 7:10–14; 23:6; Helaman 3:35; 5:9–12; D&P 50:40–46; 93:1
Tabang sa Pagtuon
“Samtang ikaw magtuon, bantayi og maayo ang mga ideya nga mosulod sa imong hunahuna ug ang mga pagbati nga mosulod sa imong kasingkasing” (Isangyaw ang Akong Ebanghelyo [2004], 21). Hunahunaa ang pagrekord sa mga impresyon nga imong nadawat, bisan og ingon og wala kini kalambigitan sa mga pulong nga imong gibasa. Tingali og mao kana ang mga butang nga gustong ipadayag sa Ginoo diha kanimo.