Kapitulo 12

Kapitulo 12: Balik ug Pagbusog diha sa Talad Kan-anan sa Ginoo

“Tabangi ang dili kaayo aktibo ug ang kuna ang kalipay nga moabut kaninyo ug niadtong inyong gitabangan.”

Gikan sa Kinabuhi ni Howard W. Hunter

Sa adlaw human si Howard W. Hunter nahimong Presidente sa Simbahan, gipadangat niya kining mahigugmaong pagdapit ngadto sa mga miyembro sa Simbahan nga dili aktibong miapil:

“Ngadto sa nakalapas o nasilo, kami moingon, balik. Ngadto sa nasakitan ug nanlimbasug ug nahadlok, kami moingon, tuguti kaming mobarug uban kaninyo ug mopahid sa inyong mga luha. Ngadto sa naglibug ug nagkalisud tungod sa sayop gikan sa daghang tinubdan, kami moingon, duol sa Dios sa tanang kamatuoran ug sa Simbahan nga adunay nagpadayong pagpadayag. Balik. Barug uban kanamo. Padayon. Pagmatinuohon. Maayo ra ang tanan. Pagbusog diha sa Talad kan-anan nga giandam sa inyong atubangan sa Ang Simbahan ni Jesukristo sa mga Santos sa Ulahing mga Adlaw ug paningkamot sa pagsunod sa Maayong Magbalantay nga miandam niini. Pagbaton og paglaum, gamita ang hugot nga pagtuo, dawata—ug hatag—og gugmang putli, ang tiunay nga gugma ni Kristo.”¹

Sa iyang unang pakigpulong sa kinatibuk-ang komperensya isip Presidente sa Simbahan pipila ka bulan human niana, si Presidente Hunter miingon nga iyang gibati nga magpadayon niini nga emphasis. “Balik,” iyang gisubli. “Dawata sa literal nga paagi ang pagdapit [sa Manluluwas] nga ‘duol, sunod kanako.’ … Siya mao ang sigurado nga dalan; siya ang kahayag sa kalibutan.”²

Sa tibuok niyang kinabuhi, si Presidente Hunter mitabang sa daghang mga miyembro sa Simbahan nga mobalik sa pagkaaktibo. Nagsaysay sa ingon nga kasinatian gikan sa sayong bahin sa pagkahamtong, siya miingon:

“Ang bishop sa akong ward mi-assign nako isip magtutudlo sa usa ka brother nga nanghambog nga siya ang kinatigulangan nga deacon sa simbahan. Ang home teaching mao ang ward teaching naidtong panahona. Ang iyang problema mao nga ganahan siyang magdula og golf ma-Dominggo. Makapasagmuyo nga makigkita niya ug sa iyang asawa matag bulan ug walay makita nga klaro nga pag-uswag. Apan sa katapusan, ang tukmang pulong nasulti ngadto kaniya ug nakaapekto kaniya nga miresulta sa iyang reaksyon. Ang pulong mao ang pakigsaad. Gipangutana namo siya, ‘Unsa may kahulugan sa pakigsaad sa bunyag nganha kanimo?’ Ang iyang ekspresyon nausab, ug sa unang higayon nakakita kami og seryuso nga bahin kaniya. Sa katapusan miapil siya sa among mga klase, mihunong sa golf, ug midala sa iyang asawa sa templo.”³

Si Kristo uban sa karnero — “Ang matag usa kanato kinahanglang mobasa ug mobasa pag-usab sa sambingay sa nawala nga karnero. … Naglaum ko nga ang mensahe niana nga sambingay matisok sa atong tagsa-tagsa ka mga kasingkasing.”

Mga Pagtulun-an ni Howard W. Hunter

Ang sambingay sa nawala nga karnero nagtudlo kanato sa pagpangita niadtong nangawala.

Ang Unang Kapangulohan [mipadangat] sa mga miyembro sa Simbahan sa mahinungdanong pagdapit … :

“Niadtong mihunong sa pagkaaktibo ug niadtong nanaway na, kami moingon, ‘Balik. Balik ug pagbusog diha sa talad kan-anan sa Ginoo, ug tilawi pag-usab ang tam-is ug makatagbaw nga mga bunga sa pakigdait uban sa mga Santos.’

“Masaligon kami nga daghan ang nangandoy nga mobalik, apan mibati nga dili komportable sa pagbuhat sa ingon. Mopasalig kami kaninyo nga makakaplag kamo og bukas nga mga bukton nga modawat kaninyo ug andam nga mga kamot nga motabang kaninyo.” (Ensign, Marso 1986, p. 88.)

Siguro kitang tanan nakadayeg niining talagsaong pagdapit sa unsay gipamahayag ni propeta Alma diha sa Basahon ni Mormon kalabut sa pagdapit nga gipadangat sa Ginoo. Siya miingon:

“Tan-awa, siya nagpadala og usa ka pagdapit ngadto sa tanan nga mga tawo, kay ang mga bukton sa kalooy gitunol ngadto kanila, ug siya miingon: Paghinulsol, ug Ako modawat kaninyo.

“Oo, siya miingon: Duol ngari kanako ug kamo moambit sa bunga sa kahoy sa kinabuhi; oo, kamo mokaon ug moinom sa pan ug tubig sa kinabuhi sa walay kalisud;

“Oo, duol ngari kanako ug pagdala sa mga buhat sa pagkamatarung.” (Alma 5:33–35.)

Matag usa kanato kinahanglang mobasa ug mobasa pag-usab sa sambingay sa nawala nga karnero nga makita diha sa ika-kinse nga kapitulo sa Lucas, magsugod sa ikaupat nga bersikulo:

“Kinsa bang tawhana kaninyo, nga may usa ka gatus ka mga karnero, nga kon kawad-an siyag usa kabuok niini, dili mobiya sa kasiyaman ug siyam diha sa kaawaawan [kamingawan] ug moadto sa pagpangita niadtong usa nga nawala, hangtud nga hikaplagan niya kini?

“Ug sa iya na kining makaplagan, kini pas-anon niya nga malipayon diha sa iyang mga abaga.

“Ug sa mahiuli na siya, iyang tigumon ang iyang mga higala ug mga silingan, ug ingnon sila, Pangalipay kamo uban kanako; kay hingkaplagan ko ang akong karnero nga nawala” [Lucas 15:4–6]. …

Si Propeta Joseph Smith mihimo og mahinungdanong kausaban diha sa Hubad ni Joseph Smith. Kini mabasa: “Kinsa bang tawhana kaninyo, nga may usa ka gatus ka mga karnero, nga kon kawad-an siyag usa kabuok niini, dili mobiya sa kasiyaman ug siyam ug moadto sa kaawaawan [kamingawan] sa pagpangita niadtong usa nga nawala, hangtud nga hikaplagan niya kini?” (HJS, Lucas 15:4; mga italic gidugang.)

Kana nga hubad nagsugyot nga ang magbalantay mobiya sa iyang nasiguro na nga panon ug moadto sa kamingawan—nga mao ang, moadto sa kalibutan sa pagpangita hangtud makaplagan niya ang nawala. Nawala gikan sa unsa man? Nawala gikan sa panon diin adunay proteksyon ug seguridad. Naglaum ko nga ang mensahe niana nga sambingay mapatik sa atong tagsa-tagsa ka mga kasingkasing.⁴

Ang Ginoo naglaum kanato nga mahimong mga magbalantay ubos sa Iyang pagmando ug makapabalik niadtong nanlimbasug o nawala.

Unsa may kinahanglan natong buhaton aron tabangan kadtong nahisalaag diha sa kamingawan?

Tungod sa unsay gisulti sa Agalon kalabut sa pagbiya sa kasiyaman ug siyam og pag-adto sa kamingawan sa pagpangita sa usa kabuok nga nawala, ug tungod sa pagdapit sa Unang Kapangulohan niadtong mihunong na sa pagkaaktibo o nanaway na sa “pagbalik,” kami modapit kaninyo nga moapil sa pagluwas og mga kalag. Tabangi ang dili kaayo aktibo ug angkuna ang kalipay nga moabut kaninyo ug niadtong inyong gitabangan kon kamo ug sila moapil sa pagpadangat sa pagdapit nga mobalik ug magbusog diha sa talad kan-anan sa Ginoo.

Ang Ginoo, ang atong Maayong Magbalantay, naglaum kanato nga mahimong mga magbalantay ubos sa iyang pagmando ug makapabalik niadtong nanlimbasug o nawala. Dili kami makasulti kaninyo unsaon sa pagbuhat niini, apan sa inyong pag-apil ug pagtinguha og inspirasyon, ang kalampusan moresulta gikan sa mga paningkamot diha sa inyong mga area, … mga stake, ug mga ward. Ang ubang mga stake mitubag sa miaging mga paghangyo ug nakabaton og talagsaong kalampusan.

Ang mga pulong sa pamilyar nga himno naglangkob sa pangamuyo sa Manluluwas ngari kanato:

Malumo Niyang gitawag,
Nanghangyo ning adlawa;
“Hain ang nahisalaag,
Sa gipuy-an nibulag?”

Ug kana nga himno, nga kasagarang gikanta, nagpakita kon unsa ang angay natong itubag:

“Tigbantay kami himoa;
Hatagi mi sa gugma.
Ipadala mis disyerto,
Mangitas karnero mo.”

(Hymns, 1985, nu. 221.)

Kon buhaton nato kini, ang mahangturong mga panalangin moabut kanato.⁵

Ang pagpangita sa nawala, sa walay tumong, ug sa nahisalaag usa ka buhat nga himoon alang sa Ginoo. … Ang mainampuong pangamuyo ni Alma usa ka maayong pahinumdom sa kasagrado sa atong buluhaton:

“O Ginoo, ikaw mohatag ba ngari kanamo nga kami mahimo nga makaangkon og kalampusan sa pagdala pagbalik [og mga kalag] nganha kanimo diha kang Kristo.

“Tan-awa, O Ginoo, ang ilang mga kalag mga bililhon.” (Alma 31:34–35.)⁶

mga misyonaryo nga nagtudlo og pamilya — “O Ginoo, ikaw mohatag ba ngari kanamo nga kami mahimo nga makaangkon og kalampusan sa pagdala pagbalik [og mga kalag] nganha kanimo diha kang Kristo. “Tan-awa, O Ginoo, ang ilang mga kalag mga bililhon” (Alma 31:34–35).

Ang atong dakong tumong mao ang pagtabang sa mga tawo nga makabalik sa presensya sa Dios.

Sulod sa katuigan ang Simbahan nakahimo og mahinungdanon kaayo nga mga paningkamot sa pagpabalik niadtong dili kaayo aktibo. … Ug ang tanan alang sa unsa man nga katuyoan? Kini ang pagluwas sa mga kalag sa atong mga kaigsoonan ug masiguro nga makabaton sila sa mga ordinansa sa kahimayaan.

Samtang nagserbisyo ko isip presidente sa stake sa Los Angeles area, ang akong mga magtatambag ug ako mihangyo sa among mga bishop nga mainampingong mopili og upat o lima ka mga managtiayon nga gustong mopalambo sa ilang pag-uswag diha sa Simbahan. Ang uban dili kaayo aktibo, ang uban bag-o nga mga kinabig—apan madasigon sila nga mouswag sa espirituhanong paagi. Gipundok namo sila sa usa ka klase sa stake ug mitudlo kanila sa ebanghelyo. Imbis nga mohatag og gibug-aton sa templo, among gipasabut og maayo ang mas maayo nga relasyon ngadto sa atong Langitnong Amahan ug sa iyang Anak, nga si Jesukristo. Ang among mainampingon nga proseso sa pagpili misiguro og kalampusan, ug ang kadaghanan niining mga managtiayon nahimong aktibo ug miadto sa templo.

Mopakigbahin ko og [laing] ehemplo. … Adunay brother sa usa sa mga ward nga wala magtambongan og bisan unsa nga mga miting. Ang iyang asawa dili miyembro. Medyo malditahon siya, mao nga dili kami makapadala og mga home teacher sa ilang panimalay. Ang bishop miduol niini nga brother pinaagi sa pagsulti kaniya nga siya adunay relasyon ngadto sa Manluluwas nga kinahanglan niyang palamboon. Ang brother mipasabut sa bishop sa problema bahin sa iyang asawa nga dili miyembro, mao nga ang bishop nakig-istorya sa iyang asawa, mipasabut og maayo sa samang paagi—usa ka relasyon ngadto sa Ginoo nga kinahanglang palamboon. Dili gihapon siya madawaton apan nalipay nga makahibalo nga ang mga Santos sa Ulahing mga Adlaw nagtuo kang Kristo, ug isip resulta wala na kaayo magminaldita.

Ang kalampusan wala dayon moabut, apan kadtong mibisita sa panimalay padayon sa pagpasabut og maayo bahin sa relasyon sa managtiayon ngadto sa Ginoo. Sa wala madugay nahimo siyang mahigalaon, ug sa katapusan miuyon nga motambong uban sa iyang bana sa klase sa stake nga gitudlo sa mga sakop sa high council. Among gipasabut og maayo ang pakigsaad nga himoon sa usa ka tawo atol sa bunyag ug sa uban pang mga pakigsaad. Sa katapusan ang asawa nahimong miyembro sa Simbahan ug ang bana nahimong mapuslanong lider sa priesthood. …

Nakadayeg ko sa pamahayag diha sa ulohang pahina sa Basahon ni Mormon nga naghulagway sa usa sa mga katuyoan nianang sagradong basahon: “Nga sila [ang balay ni Israel sa ulahing mga adlaw] unta mahibalo sa mga pakigsaad sa Ginoo.” (Mga italic gidugang.) Mao kana ang among gibati nga hatagan og gibug-aton isip kapangulohan sa stake nga himoon ngadto sa dili kaayo aktibo. Misulay kami sa pagpangamuyo kanila base sa kaimportante sa mga pakigsaad nga ilang gihimo ngadto sa Ginoo; dayon gitudloan namo sila sa kaimportante sa pakigsaad sa bunyag ug dugang mga pakigsaad nga ilang mahimo nga makapahiusa kanila isip mahangturong pamilya.⁷

Ang tibuok nga katuyoan sa Simbahan nga hapsay nga naglihok sa lokal nga lebel mao ang pagpasarang sa mga indibidwal nga makabalik sa presensya sa Dios. Mahimo lamang kana pinaagi sa ilang pagdawat sa mga ordinansa ug paghimo og mga pakigsaad diha sa templo.⁸

Ang atong mga paningkamot nagtutok sa paghimo sa makaluwas nga mga pakigsaad ug mga ordinansa sa ebanghelyo nga magamit sa tanang katawhan: ngadto sa dili miyembro pinaagi sa atong misyonaryo nga buhat; ngadto sa dili kaayo aktibo pinaagi sa mga paningkamot sa pag-fellowship ug pagpaaktibo; ngadto sa aktibo nga mga miyembro pinaagi sa pag-apil ug pagserbisyo diha sa Simbahan, ug ngadto sa nangamatay na pinaagi sa buhat sa katubsanan alang sa mga patay.⁹

Naningkamot kita nga matuman ang usa ka tumong alang sa matag indibidwal nga miyembro sa Simbahan. Kana aron ang tanan makadawat sa mga ordinansa sa ebanghelyo ug makahimo og mga pakigsaad ngadto sa atong Langitnong Amahan aron makabalik sila sa iyang presensya. Mao kana ang atong dakong tumong. Ang mga ordinansa ug mga pakigsaad mao ang mga paagi sa pagkab-ot nianang balaanong kahimtang nga makapabalik kanato pag-usab ngadto sa iyang presensya. …

Hinumdumi ang katuyoan: ang pagdapit sa tanan sa pagduol ngadto ni Kristo. …

Ako mopamatuod, akong mga kaigsoonan, sa iyang kabalaan ug gahum sa pagluwas niadtong moduol kaniya nga adunay masulub-on nga mga kasingkasing ug mahinulsulon nga mga espiritu. Pinaagi sa mga ordinansa ug sa iyang Balaang Espiritu, ang matag indibidwal malimpyo.¹⁰

Mga Sugyot alang sa Pagtuon ug Pagtudlo

Mga Pangutana

Si Presidente Hunter miawhag sa matag miyembro sa Simbahan nga mobasa ug mobasa pag-usab sa sambingay sa nawala nga karnero (tan-awa sa seksyon 1; Lucas 15:4–7). Unsa nga mga mensahe ang inyong nadawat gikan sa sambingay ug sa uban pang mga pagtulun-an sa unang seksyon? Hunahunaa kon sa unsang paagi nga kadtong mga pagtulun-an makagiya kaninyo samtang nagserbisyo kamo diha sa Simbahan.
Unsa ang atong responsibilidad isip mga magbalantay ubos sa pagmando sa Ginoo? (Tan-awa sa seksyon 2.) Sa unsang paagi nga makatabang kita sa mga tawo nga mobalik sa pagkaaktibo sa Simbahan? Sa unsang paagi nga kamo (o ang tawo nga inyong nakaila) napanalanginan pinaagi sa usa ka tawo nga mitabang kaninyo sa dihang kamo “nanlimbasug o nawala”?
Unsay atong makat-unan gikan sa mga kasinatian nga gisaysay ni Presidente Hunter diha sa seksyon 3? Sa unsang paagi nga ang paghatag og gibug-aton sa mga pakigsaad makatabang sa mga miyembro sa Simbahan nga mobalik sa pagkaaktibo?

May Kalabutan nga mga Kasulatan

Ezequiel 34:1–16; Lucas 15:11–32; Juan 10:1–16, 26–28; 13:35; 1 Juan 1:7; Mosiah 18:8–10; Helaman 6:3; 3 Nephi 18:32; Moroni 6:4–6; D&P 38:24

Tabang sa Pagtuon

Ang baruganan usa ka kamatuoran nga naggiya sa mga desisyon ug mga aksyon. “Samtang magbasa ka, pangutan-a ang imong kaugalingon, ‘Unsa nga baruganan sa ebanghelyo ang gitudlo dinhi niini nga tudling? Unsaon man nako sa paggamit niini diha sa akong kinabuhi? (Pagtudlo, Walay Labaw ka Mahinungdanon nga Tawag [1999], 17).