Kapitulo 19
Ang Atong Pasalig ngadto sa Dios
“Ang usa ka malampuson nga kinabuhi … nagkinahanglan og pasalig—tibuok kalag, hugot nga paghupot, mahangturong gihambin nga pasalig ngadto sa mga baruganan nga atong nahibaloan nga mga tinuod diha sa mga sugo nga gihatag sa Dios.”
Gikan sa Kinabuhi ni Howard W. Hunter
Sa dihang si Howard W. Hunter gitawag nga mahimong miyembro sa Korum sa Napulog Duha, mipahayag siya, “Akong gidawat, sa walay pagduha-duha, ang call … giandam alang kanako, ug ako andam sa paghalad sa akong kinabuhi ug sa tanan nga ako aduna ngadto niini nga serbisyo.”1
Si Elder Hunter matinuoron nga misunod sa iyang pasalig. Human siya gi-orden nga Apostol, mibalik siya ngadto sa California sa paghuman sa mga obligasyon sa Simbahan ug sa negosyo ug sa pagsugod og pangandam sa pagbalhin sa Siyudad sa Salt Lake. Lisud kini alang ni Elder ug Sister Hunter sa pagbiya sa ilang pamilya ug mga higala sa California—ug alang ni Elder Hunter sa pagbiya sa iyang trabaho isip abogado. Sa iyang pagtapos sa iyang propesyon isip abogado, misulat siya:
“Karong adlawa akong gihuman ang kadaghanan sa akong trabaho sa opisina. Halos tanan nga hapit na mahuman nga mga trabaho nakompleto na. Nag-inusara ako sa opisina karong adlawa nga nakasabut nga ang akong trabaho isip abogado karon natapos na. Mihimo ako og mubo nga mga sulat sa pipila ka mga file ug gibiyaan ko kini sa lamesa. … Gibati ko nga daw may sakit sa akong pagbiya sa opisina. Nalingaw ako sa trabaho isip abogado ug nahimo kini nga akong kinabuhi sa milabayng katuigan, apan bisan pa niini ako nahimuot ug nalipay sa pagtubag sa importante kaayo nga call nga miabut kanako diha sa Simbahan.”2
Nahibalo si Elder Hunter gikan sa personal nga kasinatian nga ang “pagtugyan ngadto sa kabubut-on sa Amahan dili sa kanunay sayon.”3 Bisan pa niana, siya nahibalo sa importansya sa pagkahingpit og pasalig ngadto sa Dios. Kalabut niana nga pasalig, misulat siya: “Kadaghanan sa mga tawo wala makasabut ngano ang mga tawo sa atong tinuohan motubag ngadto sa mga call nga paserbisyuhon o sa pasalig nga atong himoon ang tanan nga atong mahimo. Hingpit akong nalingaw sa trabaho isip abogado, apan kining call nga miabut kanako mas importante kay sa pagpadayon sa propesyon o sa pagpangwarta.”4
Usa ka paagi nga kita makapakita sa atong “hingpit nga pasalig” ug “kompleto nga debosyon” mao ang pagserbisyo niadtong nanginahanglan.
Mga Pagtulun-an ni Howard W. Hunter
1
Ang atong Amahan sa Langit nagkinahanglan sa atong hingpit nga pasalig, dili lamang bahin niini.
Sa akong paghunahuna sa mga panalangin nga gihatag sa Dios kanako ug sa daghang nindot sa ebanghelyo ni Jesukristo, naamguhan nako nga sa atong tibuok kinabuhi gipangayoan kita og mga kontribusyon agi og balos, mga kontribusyon sa panahon o sa salapi o sa ubang mga kapanguhaan. Kining tanan gimahal ug kinahanglanon, apan kini wala maglangkob sa atong hingpit nga halad ngadto sa Dios. Sa katapusan, unsa ang gikinahanglan sa atong Amahan sa Langit kanato mas labaw pa kay sa kontribusyon; kini usa ka hingpit nga pasalig, usa ka kompleto nga debosyon, ang tanan nga kita mao ug ang tanan nga kita mamahimo.
Palihug sabta nga ako wala lamang magsulti kabahin sa pasalig ngadto sa Simbahan ug sa mga kalihokan niini, bisan kana kanunay nanginahanglan nga pagalig-unon. Dili, nagsulti ako og mas piho sa usa ka pasalig nga gipakita diha sa atong indibidwal nga batasan, sa atong personal nga integridad, sa atong pagkamaunungon ngadto sa panimalay ug pamilya ug komunidad, ingon man usab ngadto sa Simbahan. …
Pahinumduma ako sa lakbit sa usa lamang niadtong matahum nga mga ehemplo gikan sa kasulatan diin tulo ka dili pa kaayo batan-ong mga lalaki hugot nga misunod sa ilang mga baruganan ug mihupot sa ilang integridad bisan tuod kini ingon og klaro nga ang pagbuhat sa mao mohunos sa ilang mga kinabuhi.
Tingali mga 586 ka tuig sa wala pa si Kristo, si Nabucodonosor, ang hari sa Babelonia, misulong sa siyudad sa Jerusalem ug nabuntog kini. Nadani kaayo siya sa mga kalidad ug sa edukasyon sa mga anak sa Israel nga daghan ang gipadala niya ngadto sa sawang sa hari [didto sa Babelonia].
Ang kagubot miabut sa mga Israelite sa adlaw nga si Nabucodonosor mihimo og bulawan nga dios-dios ug misugo sa tanan diha sa probinsya sa Babelonia sa pagsimba niini, usa ka sugo nga ang tulo ka batan-on nga mga Israelite—Sadrach, Mesach, ug Abed-nego—sa hilom midumili. Napuno sa “kapungot ug kasuko” ug misugo sa pagdala kanila diha sa iyang atubanagan. (Dan. 3:13.) Mipahibalo siya nga kon sila dili mosimba sa atubangan sa bulawanong imahe sa gitakdang panahon, “igatambog kamo sa taliwala sa hudno nga nagadilaab sa kalayo.” Dayon may pipila ka kahimuot sa kaugalingon nangutana siya, “Ug kinsa ba kana nga dios nga makaluwas kaninyo gikan sa akong mga kamot?” [Dan. 3:15.]
Ang tulo ka batan-ong mga lalaki mitubag nga matinahuron apan sa walay pag-ukon-ukon:
“Kon mao kana,” miingon sila, “[nga imo kaming hadlukon og kamatayon,] ang among Dios nga among ginaalagaran makahimo sa pagluwas kanamo gikan sa hudno nga nagadilaab sa kalayo, ug siya magaluwas kanamo gikan sa imong kamot, O hari.
“Apan kon dili ugaling [kon sa bisan unsa nga rason mopili siya nga dili moluwas kanamo gikan sa kalayo], angay mo nga hisayran, O hari, nga kami dili gayud moalagad sa imong mga dios, ni mosimba kami sa larawan nga bulawan nga imong gipatindog.” [Dan. 3:17–18.]
Dayag nga si Nabucodonosor napuno sa mapintas nga kasuko ug misugo nga ang usa sa mga hudno initon sa pito ka pilo labaw sa naandan nga kainit. Unya siya misugo nga kining tulo ka maisug nga batan-ong mga lalaki ihulog nga hingpit nga magsul-ob og bisti ngadto taliwala sa kalayo. Sa tinuod, ang hari hilabihan ka mapugsanon ug ang kalayo hilabihan kainit nga ang mga sundalo kinsa misakwat ni Sadrach, Mesach, ug Abed-nego namatay gumikan sa kainit sa hudno sa ilang paghulog sa ilang mga dinakpan ngadto niini.
Dayon nahitabo ang usa niadtong dako nga mga milagro diin ang mga matinud-anon adunay katungod sumala sa kabubut-on sa Dios. Kining tulo ka batan-ong mga lalaki mibarug ug milakaw nga malinawon diha taliwala sa hudno ug wala masunog. Sa tinuod, sa dihang sa wala madugay sila gitawag sa mismong nahibulong nga hari sa pagpagawas gikan sa hudno, ang ilang bisti wala mabuling, ang ilang panit wala masunog, ni buhok sa ilang ulo nasunog bisan gamay. Gani, ni ang baho sa aso mipilit diha niining maisugon, mapasaligon nga batan-ong mga lalaki.
“Bulahan ang Dios ni Sadrach, ni Mesach, ug ni Abed-nego,” miingon ang hari, “kinsa … nagluwas sa iyang mga alagad nga mingsalig diha kaniya, … [kinsa] mingtugyan sa ilang mga lawas, aron sila dili makaalagad ug dili makasimba sa lain nga dios, gawas lamang sa ilang kaugalingon nga Dios.
“… Unya si Sadrach, Mesach, ug Abed-nego, gituboy sa hari sa lalawigan sa Babelonia.” (Dan. 3:28, 30.)
Ang abilidad sa pagkamatinud-anon ngadto sa mga baruganan sa usa ka tawo, ang pagpuyo nga adunay integridad ug hugot nga pagtuo sumala sa gituohan sa usa ka tawo—mao ang labing mahinungdanon, mao kana ang kalainan tali sa kontribusyon ug sa pasalig. Nga ang debosyon ngadto sa tinuod nga baruganan—sa atong indibidwal nga mga kinabuhi diha sa atong mga panimalay ug mga pamilya ug sa tanang mga dapit nga atong makaila ug maimpluwensya ang ubang mga tawo—kana nga debosyon mao ang labing gihangyo sa Dios kanato. …
Ang usa ka malampuson nga kinabuhi, ang maayo nga kinabuhi, ang matarung nga kinabuhing Kristiyano nagkinahanglan og labaw pa kay sa kontribusyon, bisan tuod og ang matag kontribusyon bililhon. Sa katapusan nagkinahanglan kini og pasalig—tibuok kalag, gihuptan og maayo, mahangturong gihambin nga pasalig ngadto sa mga baruganan nga atong nasayran nga tinuod diha sa mga sugo nga gihatag sa Dios. …
Kon kita magkinabuhi sumala sa atong mga baruganan, mapasaligon ngadto sa usa ka kinabuhi nga matinuoron ug may integridad, niana walay hari o bangga o nagdilaab nga hudno nga makapapeligro kanato. Alang sa kalampusan sa gingharian sa Dios dinhi sa yuta, unta kita mobarug ingon nga mga saksi alang kaniya “sa tanan nga mga panahon ug diha sa tanan nga mga butang, ug diha sa tanan nga mga dapit nga [kita] mahimo nga maanaa, bisan hangtud sa kamatayon.” (Mosiah 18:9.)5
2
Pagpasalig sa pagsunod sa Dios dili magsapayan sa unsay gusto sa uban nga buhaton.
Sa dihang si Josue gisugo sa pagguba sa siyudad sa Jerico nga nag-atubang [sa mga tribo sa Israel], ang lig-on nga mga kuta sa siyudad mibarug ingon og ambungan ug tiunay nga babag sa imposibleng kalampusan sa Israel—o sa labing minos maingon og mao. Wala masayud sa paagi, apan gipasaligan mahitungod sa katapusan, gituman ni Joshua ang mga sugo nga gihatag kaniya pinaagi sa sinugo sa Ginoo. Ang iyang pasalig mao ang hingpit nga pagkamasulundon. Ang iyang kabalaka mao ang pagbuhat sa eksakto ingon nga siya gisugo, nga ang saad sa Ginoo matuman. Ang mga sugo sa walay pagduhaduha ingon og katingad-an, apan ang iyang hugot nga pagtuo diha sa resulta miaghat kaniya sa pagpadayon. Ang resulta, sa dayag, lain na usab sa taas nga serye sa mga milagro ang nasinati sa mga Israelite ingon nga sila gigiyahan sulod sa daghang katuigan ni Moises, ni Josue, ug sa uban pang daghang mga propeta kinsa mapasaligon sa pagsunod sa mga sugo ug mga panudlo sa Ginoo.
Samtang si Josue ug ang iyang mga katawhan nagkaduol sa Jerico, ang mga panudlo sa Ginoo eksaktong gisunod, ug sumala sa asoy sa kasulatan, “ang kuta nagun-ob nga nahapla, sa pagkaagi nga ang mga tawo mingsulod sa siyudad, tagsa-tagsa ka tawo dayon ngadto sa iyang unahan, ug ilang gikuha ang siyudad.” (Jos. 6:20.)
Ang rekord nagpahayag nga human ang Israel mipahulay gikan sa mga pakiggubat sa ilang mga kaaway, si Josue, kinsa sa karon tigulang na kaayo, gipundok ang tanang Israel. Sa iyang panamilit nga pakigpulong gipahinumduman niya sila nga sila nahimong madaugon tungod kay ang Dios nakig-away alang kanila, apan kon sila karon mohunong sa pagserbisyo sa Ginoo ug sa pagsunod sa iyang balaod pagalaglagon sila. …
Kining bantugan nga militar ug espiritwal nga lider dayon miaghat og pasalig, ug mihimo og usa sa iyang kaugalingon mismo ug alang sa iyang pamilya: “Magpili kamo niining adlawa kong kinsa ang inyong alagaran; … apan alang kanako ug sa akong balay, kami magaalagad sa Ginoo.” (Jos. 24:15.)
Ania ang usa ka gamhanang pahayag nga puno sa pasalig sa usa ka tawo sa Dios; sa usa ka propeta nga nagsunod sa mga tinguha sa Ginoo; ni Josue ang tawo sa iyang Dios, kinsa sa daghang mga panahon kaniadto gipanalanginan sa iyang pagkamasulundon. Gisultihan niya ang mga Israelite nga walay pagsapayan kon unsa ang ilang nadesisyunan, buhaton niya unsay iyang nahibaloan nga husto. Siya nag-ingon nga ang iyang desisyon nga moserbisyo sa Ginoo wala mag-agad sa bisan unsay ilang nadesisyunan; nga ang ilang mga lihok dili moapekto sa iyang lihok; nga ang iyang pasalig nga sundon ang kabubut-on sa Ginoo dili mausab sa bisan unsang butanga nga buhaton nila o ni kinsa pa. Si Josue lig-ong nagpugong sa iyang mga lihok ug nakapunting diha sa mga sugo sa Ginoo. May pasalig siya ngadto sa pagkamasulundon.6
“Unsa kaha kalipay ang Ginoo sa dihang si Abraham … mihimo ingon nga siya gisugo, nga walay pangutana, ug walay pagduhaduha.”
3
Pagdesisyon karon sa pagpili sa dalan sa higpit nga pagkamasulundon.
Human masabtan ang balaod sa ebanghelyo ug ang kabubut-on sa Ginoo pinaagi sa pagbasa ug sa pagtuon sa mga kasulatan ug sa mga pulong sa mga propeta, dayon moabut ang labaw pa nga pagsabut sa rason ngano ang pagkamasulundon sa kasagaran gipasabut isip ang unang balaod sa langit ug ngano nga ang pagkamasulundon gikinahanglan aron maluwas. Kini modala kanato sa labing dako nga pagsulay. Andam ba kita nga mahimong hingpit nga masulundon sa balaod sa Dios? Adunay moabut nga panahon sa atong mga kinabuhi nga usa ka tukma nga desisyon kinahanglan gayud nga pagahimoon.7
Sa tinuod ang Ginoo nahigugma, labaw pa kay sa bisan unsa, sa usa ka walay kausaban nga determinasyon sa pagsunod sa iyang tambag. Sa tinuod ang mga kasinatian sa halangdon nga mga propeta diha sa Daang Tugon girekord aron sa pagtabang kanato sa pagsabut sa importansya sa pagpili sa dalan sa eksakto nga pagkamasulundon. Unsa kaha ka kalipay ang Ginoo sa dihang si Abraham, human makadawat sa sugo sa pagsakripisyo sa iyang bugtong anak, si Isaac, mituman ingon nga siya gisugo, nga walay pangutana ug walay pagduha-duha. Ang rekord nagpahayag nga ang Dios miingon ngadto kang Abraham:
“Kuhaon mo karon ang imong anak, ang imong anak nga bugtong, nga imong pinalangga nga mao si Isaac, ug umadto ka sa yuta sa Moria ug siya ihalad mo nga halad-nga-sinunog didto sa ibabaw sa usa sa mga bukid nga akong igaingon kanimo.” (Gen. 22:2.)
Ang sunod nga bersikulo yano nga nagpahayag:
“Ug si Abraham mibangon pagsayo sa buntag … ug nagdala … ni Isaac nga iyang anak … ug nagpaingon sa dapit nga giingon kaniya sa Dios.” (Gen. 22:3.)
Mga katuigan nanglabay, sa dihang gipangutana si Rebekah kon siya mouban ba sa sulugoon ni Abraham aron mahimong asawa ni Isaac, ug sa walay pagduhaduha nasayud nga ang misyon sa sulugoon adunay panalangin sa Ginoo, yano siyang miingon, “Oo mouban ako.” (Gen. 24:58.)
Usa ka henerasyon human niana, sa dihang si Jacob gisugo sa pagbalik ngadto sa yuta sa Canaan, nga nagpasabut nga biyaan ang tanan nga iyang gitrabahoan sulod sa daghang mga tuig, iyang gitawag si Raquel ug si Lea ngadto sa umahan diin didto ang mga panon sa karnero ug gipasabut unsay gisulti sa Ginoo. Ang tubag ni Raquel [ug ni Lea] yano ug prangka ug nagpasabut sa [ilang] pasalig: “Buhata ang tanan nga giingon sa Dios kanimo.”(Gen. 31: 16.)
Kita adunay, sa ingon, mga ehemplo gikan sa mga kasulatan kon unsaon nato sa paghunahuna ug pagtimbang-timbang ang mga sugo sa Ginoo. Kon kita mopili sa paglihok sama nila ni Josue, ug Abraham, Rebekah, ug Raquel [ug Lea], ang atong tubag mao, yano, nga moadto ug mobuhat sa mga butang nga gisugo sa Ginoo.
Adunay maayo nga rason sa paghimo sa atong desisyon karon sa pagserbisyo sa Ginoo. Niining Dominggo sa buntag [sa kinatibuk-ang komperensya], kon ang mga kalisud ug ang mga tintasyon sa kinabuhi ingon og nawala, ug kon kita adunay panahon ug may mas tinguha sa pagbaton og mahangturong panan-aw, makahimo kita og tataw nga pagtimbang-timbang kon unsay mohatag kanato og labing dako nga kalipay sa kinabuhi. Kinahanglan nga modesisyon kita karon, diha sa malinawon nga sitwasyon, unsaon nato sa paglihok kon ang mga kalisud ug ang mga tintasyon moabut.
Ako nag-ampo nga kita adunay kalig-on sa pagdesisyon karon sa pagbuhat unsay kinahanglan natong buhaton. Ako nag-ampo nga kita modesisyon karon sa pagserbisyo sa Ginoo.8
4
Ang tinuohan lamang dili igo; nagkinahanglan usab kita nga mobuhat sa kabubut-on sa Langitnong Amahan.
Sa pagpamulong ngadto sa pundok sa mga katawhan, ang Agalon miingon: “Dili ang tanang magaingon kanako, Ginoo, Ginoo, makasulod sa gingharian sa langit; kondili ang nagatuman sa kabubut-on sa akong Amahan nga anaa sa langit.” (Mat. 7:21.)
Samtang naminaw ako niini nga mga pulong, kini ingon ngari kanako nga ang Ginoo nag-ingon, “Tungod lamang kay ang usa ka tawo miila sa akong awtoridad o adunay pagtuo sa akong balaang kinaiya, o mipahayag lamang og hugot nga pagtuo sa akong mga pagtulun-an o sa maulaong sakripisyo nga akong gihimo, wala magpasabut nga siya makasulod ngadto sa gingharian sa langit o makakab-ut sa mas taas nga ang-ang sa kahimayaan.” Sa iyang giingon kini nagpasabut, “Ang tinuohan lamang dili igo.” Dayon makahuluganon niyang gidugang, “… kondili ang nagatuman sa kabubut-on sa akong Amahan,” nga nagpasabut, siya nga nagtrabaho ug nagpul-ong sa ubasan nga kini mahimong magdala og maayong bunga. …
Ang tanang kinaiyahan, nga mao ang gipanag-iya sa Dios, ingon og naghulagway niining sama nga baruganan. Ang buyog nga dili “mabungahon” sa kadugayan abugon gikan sa balay sa putyokan. Samtang nagtan-aw ako sa nagkapuliki nga mga hulmigas diha nagsubay ug nagliyok sa bundo sa hulmigas, ako nadani sa kamatuoran nga sila mga magbubuhat ug dili lamang mga tumutuo. Ang pagkuruk-kurok dili mohatag og pagkaon alang sa himongaan; apan kinahanglan gayud nga siya mokaykay. Ang lim-aw, berde sa lumot ug ang kahugaw tungod kay walay kalutsan, mao ang dapit nga mosanay ang mga sakit sa lamakan, apan ang tin-aw nga nagdagan nga tubig sa bukid nga mohasmag sa mga bato samtang kini nagdulhog ngadto sa ubos usa ka timailhan nga kini mainom nga tubig.
Ang mga pulong sa Agalon kalabut sa balay nga walay pundasyon nag-ingon ngari kanako nga ang tawo dili makabaton og taphaw ug makuyaw nga ideya nga siya may kasarang sa iyang kaugalingon ug makatukod sa iyang kaugalingon nga kinabuhi sa bisan unsa nga matang nga sayon ug dali. [tan-awa sa Mateo 7:26–27] Kutob nga ang panahon maayo, ang iyang kabuang dili klaro; apan usa ka adlaw niana moabut ang mga baha, ang lapukon nga mga tubig sa pipila ka kalit nga init nga pagbati, ang paghasmag sa sulog sa dili makita nga tintasyon. Kon ang iyang kinaiya walay lig-on nga sukaranan kondili kutob sa pulong lamang, ang iyang tibuok moral nga katukuran mahimong matumba.9
Si Santiago miingon, “Ang relihiyon nga putli ug dili bulingon sa atubangan sa Dios nga atong Amahan mao kini, Ang pagduaw sa mga ilo ug mga babayeng balo sa ilang mga pagkaguol, ug ang pag-amping sa kaugalingon nga dili mahugawan sa kalibutan” (Santiago1:27).
Sa lain nga pagkasulti, ang relihiyon labaw pa kay sa kahibalo kalabut sa Dios o ang pag-angkon og hugot nga pagtuo, ug kini labaw pa kay sa teyolohiya. Ang relihiyon mao ang pagbuhat sa pulong sa Dios. Kini mao ang pagkamagbalantay sa atong igsoon, uban sa laing mga butang. …
Makahimo kita nga magrelihiyoso sa pagsimba sa Igpapahulay nga adlaw, ug kita makahimo nga magmakugihon sa atong mga katungdanan sa ubang unom ka mga adlaw sa semana. … [Unsa] gayud kaha ka importante nga ang atong tanang mga hunahuna, ang mga pulong nga atong isulti, ang atong mga lihok, pamatasan, ang mga pagtagad sa mga silingan, pakigsabut og negosyo, ug ang tanan natong mga kalihokan nga mahiuyon sa atong relihiyusong mga tinuohan. Sa mga pulong ni Pablo, “Kon kamo magabuhat sa bisan unsa, buhata ninyo kining tanan aron sa paghimaya sa Dios” (1 Mga Taga-Corinto 10:31). Busa kita ba makasalikway sa relihiyon gikan sa atong mga kalihokan sa mga adlaw sa semana ug isalig kini sa Igpapahulay nga adlaw lamang? Sa tinuod dili, kon kita mosunod sa pahimangno ni Pablo.10
5
“Ang aktibo nga mga miyembro” naningkamot nga magbaton og hingpit nga pasalig.
Ang Ginoo mipadayag diha sa pasiuna sa Doktrina ug mga Pakigsaad nga kini “mao lamang ang tinuod ug buhi nga simbahan diha ibabaw sa tibuok yuta.” Dayon siya midugang, “nga Ako, ang Ginoo, nahimuot, namulong ngadto sa tanan sa simbahan ug dili sa tagsa-tagsa” (D&P 1:30). Kini kinahanglan nga makapukaw og pangutana sa atong mga hunahuna nga may mahangturon nga kahulugan: Nahibalo kita nga kini mao ang tinuod ug buhi nga simbahan isip organisasyon, apan ako usa ba ka tinuod ug buhi nga miyembro isip indibidwal?
… Kon ako mangutana, “Ako usa ba ka tinuod ug aktibo nga miyembro?” ang akong pangutana mao, ako ba kinasingkasing ug hingpit nga maunungon sa pagsunod sa mga pakigsaad nga akong gihimo uban sa Ginoo? Ako ba hingpit nga may pasalig sa pagsunod sa ebanghelyo ug tigtuman sa pulong ug dili tigpaminaw lamang? Nagtuman ba ako sa akong relihiyon? Magpabilin ba akong tinuod? Nagbarug ba akong lig-on batok sa mga tintasyon ni Satanas? …
Ang pagtubag nga mauyunon sa pangutana, “Ako usa ba ka aktibo nga miyembro?” momatuod sa atong pasalig. Kini nagpasabut nga kita karon ug sa kanunay mohigugma sa Dios ug sa atong mga silingan sama sa atong kaugalingon. Kini nagpasabut nga ang atong mga lihok mopakita kon kinsa kita ug unsay atong gituohan. Kini nagpasabut nga ipakita nato matag adlaw nga kita mga Kristiyano, naglakaw ingon nga si Kristo gusto nato nga maglakaw.
Ang aktibo nga mga miyembro mao kadtong kinsa naningkamot nga magbaton og hingpit nga pasalig. …
Ang aktibo nga mga miyembro nakaila sa ilang katungdanan nga magpadayon sa unahan. Gibunyagan sila isip unang lakang sa ilang aktibo nga panaw. Kini usa ka timailhan ngadto sa Dios, ngadto sa mga anghel, ug ngadto sa langit nga sila mosunod sa kabubut-on sa Dios. …
Ang aktibo nga mga miyembro maminaw og maayo sa Espiritu, nga naghatag og kinabuhi sa espirituhanong bahin sa tawo. Kanunay silang nangita sa paggiya niini. Nag-ampo sila alang sa kalig-on ug pagbuntog sa mga kalisud. Ang ilang mga kasingkasing wala mapahiluna diha sa mga butang niini nga kalibutan apan diha sa langitnong mga butang. Ang espirituhanong pagbag-o dili isakripisyo alang sa pisikal nga katagbawan.
Ang aktibo nga mga miyembro nagbutang ni Kristo og una sa ilang mga kinabuhi, nasayud gikan sa unsa nga tinubdan ang ilang kinabuhi ug pag-uswag nagagikan. Adunay kalagmitan alang sa usa ka tawo nga mobutang sa iyang kaugalingon nga maoy labing importanting tawo sa kalibutan ug magpaabut sa uban sa pag-uyon ngadto sa iyang mga gusto ug mga panginahanglan ug mga tinguha. Apan ang kinaiyahan dili mopasidungog nianang sayop nga pagtuo. Ang labing importanting tahas sa kinabuhi iya sa Dios. Kay sa mangayo kaniya sa paghatag sa atong gihangyo, kinahanglan kita nga maninguha sa pagdala sa atong mga kaugalingon ngadto sa pakig-uyon sa iyang kabubut-on, ug sa ingon magpadayon sa atong pag-uswag isip usa ka aktibo nga miyembro. …
Ang aktibo nga mga miyembro, sa higayon nga sila makabig, motuman sa sugo nga lig-unon ang ilang mga kaigsoonan [tan-awa sa Lucas 22:32]. Matinguhaon silang makigbahin sa ilang kalipay ngadto sa uban, ug dili gayud sila kawad-an niini nga tinguha. …
Ang aktibo nga mga miyembro nakaila sa panginahanglan nga buhaton ang ilang mga gituohan. Kini nga mga Santos matinguhaon nga moapil sa pagpahinabo sa daghang maayo ug halangdong mga buhat diha sa ilang kaugalingon nga gawasnong kabubut-on ug panag-uyon [tan-awa sa D&P 58:27]. …
Ang aktibo nga mga miyembro naghinigugmaay sa usag usa. Moduaw sila sa walay mga amahan ug sa mga babaye nga balo diha sa ilang mga kasakit. Sila nag-amping sa ilang mga kaugalingon nga dili mahugawan sa kalibutan [tan-awa sa Santiago 1:27]. …
Kita adunay lig-on nga pagtuo sa pahayag nga kini mao ang tinuod ug buhi nga simbahan sa tinuod ug buhi nga Dios. Ang pangutana nga ato pang tubagon mao: Ako ba maunungon ug may pasalig, usa ka tinuod ug aktibo nga miyembro?
Hinaut nga kita magbarug nga lig-on ug magpakatinuod ug mag-aktibo nga mga miyembro sa Simbahan ug modawat sa gisaad nga ganti nga uban niadtong gipamulong diha sa Doktrina ug mga Pakigsaad “kinsa miabut sa Bukid sa Zion, ug ngadto sa dakbayan sa buhi nga Dios, ang langitnong dapit, ang labing balaan sa tanan” (D&P 76:66).11
Mga Sugyot alang sa Pagtuon ug Pagtudlo
Mga Pangutana
-
Ribyuha ang pagtulun-an ni Presidente Hunter mahitungod sa kalainan sa “kontribusyon” ug sa “hingpit nga pasalig” (seksyon 1). Unsay kalainan nga mahimo sa atong mga kinabuhi kon kita hingpit nga may pasalig ngadto sa Dios? Unsa kahay mga gamit sa istorya ni Shadrac, Mesach, ug Abed-nego ngari kanato?
-
Ribyuha ang asoy ni Presidente Hunter kabahin ni Josue diha sa seksyon 2. Unsay inyong makat-unan niini nga asoy mahitungod sa hingpit nga pagpasalig ngadto sa Dios? Unsaon nato sa pagpalambo ang usa ka pasalig sa pagsunod sa Dios nga dili igsapayan ang unsay gibuhat sa uban? Unsaon nato pagtabang ang mga bata ug kabatan-onan sa pagpalambo niini nga pasalig?
-
Unsa ang inyong mga hunahuna samtang kamo nagribyu sa mga istorya sa kasulatan diha sa seksyon 3? Unsay uban nga mga ehemplo diha sa kasulatan kabahin sa pagkamasulundon nga nakaimpluwensya kaninyo? Ngano sa inyong hunahuna “ang Ginoo nahigugma … sa usa ka walay kausaban nga determinasyon sa pagsunod sa iyang tambag”?
-
Pamalandunga ang mga pagtulun-an ni Presidente Hunter sa seksyon 4. Ngano nga ang pagtuo lamang “dili igo”? Sa unsang paagi ang pagbuhat sa kabubut-on sa Langitnong Amahan makatabang kanato sa pag-andam alang sa mga panahon sa kalisud? Unsaon nato paggamit ang mga pagtulun-an ni Presidente Hunter mahitungod sa pagsunod sa atong relihiyon?
-
Ribyuha ang tanang paghulagway ni Presidente Hunter kabahin sa “aktibo nga miyembro” diha sa seksyon 5. Unsaon nato sa pagpalambo niini nga mga kalidad sa “aktibo nga mga miyembro”? Hunahunaa kon unsaon ninyo nga mahimong usa ka mas maayong “tinuod ug aktibo nga miyembro” sa Simbahan.
May Kalabutan nga mga Kasulatan
1 Samuel 15:22–23; Salmo 1:1–3; Santiago 2:14–26; 2 Nephi 32:9; Omni 1:26; Mosiah 2:41; Alma 37:35–37; 3 Nephi 18:15, 18–20; D&P 58:26–29; 97:8; Abraham 3:24–26
Tabang sa Pagtudlo
Basaha og dungan ang daghan nga mga kinutlo gikan sa kapitulo. Human og basa sa matag kinutlo, hangyoa ang mga miyembro sa klase sa pagpakigbahin og mga ehemplo gikan sa mga kasulatan ug gikan sa ilang kaugalingon nga mga kasinatian nga may kalabutan sa mga pagtulun-an diha sa kinutlo.