Pasiuna

Ang Unang Kapangulohan ug ang Korum sa Napulog Duha ka mga Apostoles mihan-ay sa sunod-sunod nga Mga Pagtulun-an sa mga Presidente sa Simbahan aron sa pagtabang ninyo nga mas mapaduol ngadto sa inyong Langitnong Amahan ug sa pagpalawom sa inyong pagsabut sa gipahiuli nga ebanghelyo ni Jesukristo . Samtang ang Simbahan magdugang og mga basahon dinhi niini nga han-ay, makahimo kamo og koleksyon sa mga basahon nga pakisayran sa ebanghelyo diha sa inyong panimalay. Kini nga mga basahon gihimo aron gamiton alang sa personal nga pagtuon ug alang sa Dominggo nga pagtudlo. Kini makatabang usab kaninyo sa pag-andam og mga leksyon sa family home evening, pag-andam og uban nga mga leksyon o mga pakigpulong, ug sa pagtubag sa mga pangutana mahitungod sa doktrina sa Simbahan.

Kini nga libro naghisgot sa mga pagtulun-an ni Presidente Howard W. Hunter, kinsa nagserbisyo isip Presidente sa Ang Simbahan ni Jesukristo sa mga Santos sa Ulahing mga Adlaw gikan sa Hunyo 5,01994 ngadto sa Marso 3, 1995.

Personal nga Pagtuon

Samtang kamo magtuon sa mga pagtulun-an ni Presidente Howard W. Hunter, tinguhaa sa mainampoong paagi ang inspirasyon sa Espiritu Santo. Ang mga pangutana diha sa katapusan sa kada kapitulo makatabang kaninyo sa pagpamalandong, pagsabut, ug paggamit sa mga pagtulun-an ni Presidente Hunter. Ang mosunod nga mga ideya mahimong makatabang usab:

Pagsulat og mga ideya ug pagbati nga inyong madawat gikan sa Espiritu Santo samtang magtuon mo.
Linyahi ang mga tudling nga gusto ninyong mahinumduman. Ikonsiderar ang pagmemorya niini nga mga tudling o isulat kini diha sa inyong mga kasulatan tupad sa may kalabutang mga bersikulo.
Pagbasa og kapitulo o pagtulun-an sobra sa kausa aron inyong mas masabtan kini.
Pangutan-a ang inyong kaugalingon sama sa, Sa unsang paagi ang mga pagtulun-an ni Presidente Hunter makapalambo sa akong pagsabut sa mga baruganan sa ebanghelyo? Unsay gusto sa Ginoo nga akong makat-unan gikan niini nga mga pagtulun-an?
Pangutan-a ang inyong kaugalingon kon sa unsang paagi ang mga pagtulun-an niining basahon makatabang sa inyong personal nga mga hagit o problema.
Pagpakigbahin sa inyong nakat-unan sa mga sakop sa pamilya ug mga higala.

Pagtudlo gikan Niini nga Basahon

Ang mosunod nga mga sumbanan motabang kaninyo sa pagtudlo gikan niini nga basahon, sa panimalay o sa simbahan.

Pangandam sa Pagtudlo

Tinguhaa ang giya sa Espiritu Santo samtang nangandam kamo sa pagtudlo. Tun-i sa mainampoong paagi ang kapitulo aron mahimong masaligon diha sa inyong pagsabut sa mga pagtulun-an ni Presidente Hunter. Makatudlo kamo nga mas may gahum kon ang iyang mga pulong nakaimpluwensya kaninyo mismo (tan-awa sa D&P 11:21).

Kadaghanan sa mga kapitulo naglangkob og mas daghan nga materyal kay sa inyong mahisgutan sa usa ka oras sa klase. Pilia sa mainampoong paagi ang mga pagtulun-an nga sa inyong hunahuna labing makatabang.

Awhaga kadtong inyong gitudloan sa pagtuon og una sa kapitulo aron sila mas maandam sa pag-apil diha sa mga diskusyon ug paglig-on sa usag usa.

Sa inyong pagpangandam sa pagpaapil niadtong inyong tudloan, hatagi og espesyal nga pagtagad ang seksyon nga “Mga Sugyot alang sa Pagtuon ug Pagtudlo” diha sa katapusan sa kada kapitulo. Diha niana nga seksyon inyong makita ang mga pangutana, mga kasulatan, ug tabang sa pagtuon o tabang sa pagtudlo. Ang mga pangutana ug ang mga kasulatan takdo sa mga materyal diha sa kapitulo. Ang mga tabang sa pagtuon ug sa pagtudlo magamit nga mas mapalapad ang pagkat-on ug pagtudlo sa ebanghelyo.

Pagpaila sa Kapitulo

Samtang kamo nagpaila sa kapitulo, paningkamot sa pagmugna og usa ka kahimtang diin ang Espiritu makatandog sa mga kasingkasing ug mga hunahuna sa mga gitudloan. Mahimo ninyong gamiton ang usa o labaw pa sa mosunod nga mga ideya:

Basaha ug ribyuha ang seksyon nga giulohan og “Gikan sa Kinabuhi ni Howard W. Hunter” sa sinugdanan sa kapitulo, ug dayon paghisgot niini.
Hisguti ang usa ka kinutlo, litrato o kasulatan gikan sa kapitulo.
Kantaha og dungan ang usa ka himno.
Ipakigbahin og daklit ang usa ka personal nga kasinatian mahitungod sa hilisgutan.

Awhaga ang Diskusyon kabahin sa Mga Pagtulun-an ni Presidente Hunter

Samtang kamo nagtudlo gikan niini nga basahon, dapita ang uban sa pagpakigbahin sa ilang mga hunahuna, sa pagpangutana, sa pagpamatuod, ug sa pagtudlo sa usag usa. Kon aktibo silang moapil, mas andam silang mokat-on ug modawat og personal nga pagpadayag.

Tuguti nga magpadayon ang maayo nga mga diskusyon kay sa maningkamot nga mahuman ang tanang mga pagtulun-an. Giyahi ang mga diskusyon aron kini mapunting diha sa mga pagtulun-an ni Presidente Hunter.

Ang mga pangutana diha sa katapusan sa kada kapitulo mga bililhon nga kapanguhaan alang sa pag-awhag og panaghisgot. Makahimo usab kamo og inyong kaugalingon nga mga pangutana alang gayud niadtong inyong gitudloan. Ang pipila ka mga ideya sa panaghisgot anaa sa ubos:

Hangyoa ang mga partisipante sa pagpakigbahin sa unsay ilang nakat-unan gikan sa ilang personal nga pagtuon sa kapitulo. Kini tingali makatabang sa pagkontak og una sa pipila kanila ug hangyoon sila sa pag-anha sa klase nga andam mopakigbahin sa unsay ilang nakat-unan.
Ihatag ang pinili nga mga pangutana diha sa katapusan sa kapitulo ngadto sa tagsa-tagsa o sa ginagmay nga mga grupo. Hangyoa ang mga partisipante sa pagpangita sa mga pagtulun-an diha sa kapitulo nga may kalabutan sa mga pangutana. Dayon dapita sila sa pagpakigbahin sa ilang mga hunahuna ug mga panan-aw.
Basaha og dungan ang pipila ka mga pagtulun-an ni Presidente Hunter diha sa kapitulo. Hangyoa ang mga partisipante sa pagpakigbahin og mga ehemplo gikan sa mga kasulatan ug gikan sa ilang kaugalingon nga mga kasinatian nga may kalabutan niadtong mga pagtulun-an.
Hangyoa ang mga partisipante sa pagpili og usa ka seksyon ug ipabasa kini sa hilom. Dapita sila sa paggrupo og tinagurha o tinagutlo ka tawo kinsa mipili sa sama nga seksyon ug maghisgot unsay ilang nakat-unan.

Awhaga ang Paggamit ug Pagpakigbahin

Ang mga pagtulun-an ni Presidente Hunter mas makahuluganon kon ang mga indibidwal mogamit niini sa ilang mga kinabuhi ug mopakigbahin niini ngadto sa uban. Mahimo ninyong gamiton ang usa o labaw pa sa mosunod nga mga ideya:

Pangutan-a ang mga partisipante kon sa unsang mga paagi ilang magamit ang mga pagtulun-an ni Presidente Hunter sa ilang mga responsibilidad sa panimalay, diha sa Simbahan, ug diha sa uban nga mga dapit. Sama pananglit, mahimong inyong dapiton sila sa pagpamalandong ug paghisgot kon unsaon nila paggamit ang iyang mga pagtulun-an isip bana, asawa, ginikanan, anak nga mga lalaki, anak nga mga babaye, mga home teacher, o mga visiting teacher.
Dapita ang mga partisipante sa pagpakigbahin sa ilang mga kasinatian sa paggamit sa unsay ilang nakat-unan.
Awhaga ang mga partisipante sa pagpakigbahin sa pipila ka mga pagtulun-an ni Presidente Hunter uban sa mga sakop sa pamilya ug mga higala.

Tapusa ang Diskusyon

I-summarize og daklit ang leksyon o hangyoa ang usa o duha ka partisipante sa paghimo niini. Pagpamatuod sa mga pagtulun-an nga inyong gihisgutan. Mahimo usab nga inyong dapiton ang uban sa pagpakigbahin sa ilang mga pagpamatuod.

Impormasyon mahitungod sa Tinubdan nga mga Materyal

Ang mga pagtulun-an niini nga basahon direkta nga gikutlo gikan sa mga wali ug mga artikulo ni Presidente Howard W. Hunter. Ang mga kinutlo gikan sa gimantala nga mga tinubdan mibilin sa punctuation, spelling, capitalization, ug paragraphing sa orihinal nga mga tinubdan gawas kon ang editoryal o tipograpikal nga mga kausaban gikinahanglan aron sayon basahon. Tungod kay ang mga kinutlo nagpabilin sa pagkamatinud-anon ngadto sa gimantala nga mga tinubdan, mahimo kamong makamatikod og ginagmay nga kausaban diha estilo sa teksto. Sama pananglit, ang mga pronoun nga nagpasabut sa Dios wala ikapital sa pipila ka mga kinutlo ug gikapital sa uban.

Si Presidente Hunter kasagaran mogamit og mga termino mga tawo, tawo, ug katawhan nga nagpasabut ngadto sa tanang mga tawo, lalaki ug babaye. Kanunay siya nga mogamit sa mga pronoun nga siya, iya, ug kaniya nga nagpasabut sa lalaki ug babaye. Kining mga lagda sa pinulongan ordinaryo sa iyang panahon, ug siya tipikal nga nagpasabut sa mga babaye ug mga lalaki kon siya mogamit niini.