Kapitulo 7

Nagpadayon nga Pagpadayag pinaagi sa Buhing mga Propeta

“Gigiyahan kita pinaagi sa usa ka buhing propeta sa Dios—usa ka tawo kinsa nagdawat og pagpadayag gikan sa Ginoo.”

Gikan sa Kinabuhi ni Howard W. Hunter

Human gipaluyohan isip Presidente sa Simbahan niadtong Oktubre 1994 nga kinatibuk-ang komperensya, mipadayag si Howard W. Hunter sa iyang mga pagbati mahitungod sa iyang sagrado nga mga responsibilidad:

“Minahal kong mga kaigsoonan, salamat sa inyong mapaluyuhon nga pagbuto. Mapainubsanon ug maaghup akong nakig-atubang kaninyo, naguol sa bag-ohay nga pagkamatay sa atong pinalanggang propeta, si Presidente Ezra Taft Benson. Malumo ang akong kasingkasing sa pagkamatay sa akong minahal nga higala, ilabi na sa paghunahuna sa bag-ong mga responsibilidad nga miabut ngari kanako.

“Daghang mga luha ang miagas kanako ug nangalyupo sa akong Amahan sa Langit diha sa kinasingkasing nga pag-ampo sa tinguha nga makahimo niining dako ug balaan nga calling. Nag-ampo ako nga mahimong takus sa pagpas-an sa buluhaton diin napulog tulo ka mga tawo niini nga dispensasyon nagpas-an. Tingali sila lamang, nga nagtan-aw gikan sa pikas tabil, ang hingpit nga makasabut sa gibug-aton sa responsibilidad ug sa tumang pagsalig diha sa Ginoo nga akong gibati sa pagdawat niining sagrado nga calling.”

Gipasabut ni Presidente Hunter nga nakaplagan niya ang kalig-on ug gibag-o pag-usab nga pasalig sa iyang konbiksyon nga ang Simbahan gipangulohan dili sa mga tawo apan ni Jesukristo Mismo, kinsa nag-andam ug nagdasig niadtong iyang gitawag sa pagdumala:

“Ang akong labing dako nga kalig-on niining milabay nga mga bulan mao ang akong makanunayon nga pagpamatuod nga kini mao ang buhat sa Dios ug dili sa tawo. Si Jesukristo ang pangulo niini nga simbahan. Siya nangulo niini sa pulong ug sa buhat. Napasidunggan ako nga dili matukib nga gitawag sulod sa usa ka panahon nga mahimong instrumento diha sa iyang mga kamot sa pagdumala sa tibuok niyang simbahan. Apan ang pagkawalay kahibalo nga si Kristo mao ang pangulo sa Simbahan, ni ako o ni bisan kinsa nga tawo ang makalahutay sa responsibilidad sa calling nga miabut.

“Sa pagdawat niini nga responsibilidad, akong giila ang milagrosong impluwensya sa Dios diha sa akong kinabuhi. Makadaghan niyang gipanalipdan ang akong kinabuhi ug gipahiuli ang akong kusog, makadaghan akong gikuha gikan sa ngilit sa kamatayon, ug gitugutan ako sa pagpadayon sa akong mortal nga pagpangalagad sulod sa laing panahon. Ako naghunahuna usahay kon ngano ang akong kinabuhi giluwas. Apan karon wala na ako nangutana ug nangayo lamang alang sa hugot nga pagtuo ug mga pag-ampo sa mga miyembro sa Simbahan aron magkatambayayong kita, ako naghago uban kaninyo, sa pagtuman sa mga katuyoan sa Dios niini nga panahon sa atong mga kinabuhi. …

“Kini treynta y singko na ka tuig sukad ako gipaluyohan isip usa ka miyembro sa Korum sa Napulog Duha. Kadtong mga tuiga puno sa pagpangandam. … Ang akong paglakaw karon mas hinay, apan ang akong hunahuna tin-aw, ug ang akong espiritu batan-on. …

“Sama sa akong mga Kaigsoonan nga nauna kanako, akong gidawat kini nga calling uban sa kasigurohan nga ang Dios mogiya sa iyang propeta. Mapainubsanon nakong gidawat ang calling sa pagserbisyo ug nagpahayag uban sa Salmista, ‘Ang Dios mao ang akong kusog ug ang akong taming; ang akong kasingkasing kaniya misalig, ug gitabangan ako’ (Salmo 28: 7).”¹

Isip miyembro sa Korum sa Napulog Duha ka mga Apostoles, si Presidente Howard W. Hunter mitambag sa mga Santos sa Ulahing mga Adlaw sa pagsunod sa Presidente sa Simbahan.

Mga Pagtulun-an ni Howard W. Hunter

Sa matag dispensasyon, ang Dios nagtawag og mga propeta isip Iyang mga tigpama-ba.

Samtang ang tawo magbasa sa Daang Tugon, diha makita ang mga sinulat sa halangdon nga mga tawo sa karaang mga panahon kinsa gipaila nga mga propeta. Ang mga basahon sa Bag-ong Tugon naglangkob, lakip sa ubang mga butang, sa mga sinulat, mga pagtulun-an, ug kasaysayan sa mga tawo sa ulahing dispensasyon, kinsa gitudlo isip mga propeta. Kita usab adunay mga rekord sa mga propeta sa kasadpang bahin sa kalibutan, kinsa mipalanog sa ilang mga tingog, misangyaw sa pulong sa Ginoo, misupak sa pagkadautan, ug nagtudlo sa mga baruganan sa ebanghelyo. Silang tanan mibilin sa ilang pagsaksi.

Ang usa ka propeta maoy usa ka tawo kinsa giandam ug gitawag sa Ginoo sa pagpauswag sa mga katuyoan sa Dios taliwala sa iyang mga anak. Siya maoy usa ka tawo kinsa nakadawat sa priesthood ug nagsulti uban ang awtoridad. Ang mga propeta mga magtutudlo ug mga tigpanalipod sa ebanghelyo. Sila nagsaksi sa kabalaan ni Ginoong Jesukristo. Ang mga propeta nanagna sa umaabut nga mga panghitabo, apan kini dili mao ang labing importante sa ilang mga responsibilidad, bisan tuod og kini mahimong pipila ka ebidensya sa propetikanhon nga gahum.

Matarung nga pagpangulo gikinahanglan sa matag dispensasyon, ug ang Dios mipili og mga propeta alang niini nga katuyoan kaniadtong wala pa sila matawo [tan-awa sa Jeremias 1:5; Abraham 3:23].²

Usa ka pagtuon sa mga pagpadayag sa Ginoo diha sa kasulatan mipanghimatuod sa kamatuoran nga ang nagpadayong pagpadayag mao ang naggiya sa mga propeta ug sa Simbahan sa bisan unsa nga panahon. Kon dili pa sa nagpadayong pagpadayag, si Noe dili unta andam alang sa dakong lunop nga mitabon sa yuta. Si Abraham dili unta magiyahan gikan sa Haran ngadto sa Hebron, ang Yuta sa Saad. Ang nagpadayong pagpadayag migiya sa mga anak sa Israel gikan sa pagkaulipon balik ngadto sa ilang gisaad nga yuta. Ang pagpadayag pinaagi sa mga propeta migiya sa mga paningkamot sa misyonaryo, migiya sa pagtukod og usab sa templo ni Solomon, ug misupak sa pagsulod sa mga binuhatang pagano taliwala sa mga Israelita.

Sa wala pa ang pagsaka ni Kristo sa langit, misaad siya sa nahibilin nga napulog usa ka mga apostoles, “Tan-awa, ako magauban kaninyo sa kanunay, hangtud sa katapusan sa kapanahunan.” (Mat. 28:20.) Human sa iyang pagsaka sa langit, gigiyahan niya ang Simbahan pinaagi sa pagpadayag hangtud sa kamatayon sa mga Apostoles ug sa nagsunod nga apostasiya sa Simbahan ni Jesukristo.³

Sa tibuok kasaysayan niini, lakip karon, ang Simbahan adunay propeta, manalagna, ug tigpadayag. Sa ulohan sa Simbahan mao si Jesukristo, kinsa naggiya sa iyang propeta. … Ang iyang mga magtatambag [ug] ang mga miyembro sa Konseho sa Napulog Duha … mga propeta, mga manalagna, ug mga tigpadayag usab. … Ang mga miyembro sa Simbahan dili kinahanglan nga mamati sa dili sigurado nga tingog sa trumpeta. Makatuo sila sa tingog sa ilang mga lider, nasayud nga sila gigiyahan sa Ginoo.⁴

Ang Dios naghatag og paggiya alang sa Iyang mga anak pinaagi sa usa ka buhing propeta karon.

Ang usa ka klaro nga timailhan sa katapusang mga adlaw nga mag-una sa mahitabong ikaduhang pag-anhi sa Ginoo nakita diha sa panan-awon sa samang Apostol kinsa mirekord sa basahon sa Pinadayag. Siya miingon:

“Nakita ko ang laing manulonda nga naglupad sa taliwala sa kalangitan, ug kini siya may gidalang walay katapusang Maayong Balita aron imantala ngadto sa mga nanagpuyo sa yuta, sa tanang kanasuran, ug kabanayan, ug pinulongan, ug katawhan.” (Pin. 14:6.) …

Mopamatuod kita ngadto sa tibuok kalibutan nga langitnong mga tigpangalagad nagpakita na sa atong panahon, nagdala og awtoridad gikan sa langit ug nagpahiuli sa mga kamatuoran nga nawala pinaagi sa sayop nga mga pagtulun-an ug mga kalihokan. Ang Dios namulong pag-usab ug nagpadayon sa paghatag og paggiya alang sa iyang mga anak pinaagi sa usa ka buhing propeta karon. Mopahayag kita nga siya, ingon nga gisaad, anaa kanunay uban sa iyang mga sulugoon ug naggiya sa mga kalihokan sa iyang Simbahan sa tibuok kalibutan. Sama sa nangaging mga panahon, ang pagpadayag naggiya sa misyonaryong mga paningkamot, pagtukod og mga templo, pagtawag og mga lider sa priesthood, ug nagpasidaan sa mga kadautan sa katilingban nga mahimong mobabag sa kaluwasan sa mga anak sa atong Amahan.

Sa usa ka pagpadayag ngadto sa manalagna sa modernong panahon, nga si Joseph Smith, ang Ginoo miingon:

“Kay Ako walay pagtamud sa mga tawo, ug nagtinguha nga ang tanan nga mga tawo masayud nga ang adlaw moabut sa labing madali; ang takna wala pa moabut, apan duol na, nga ang kalinaw pagakuhaon gikan sa yuta, ug ang yawa makabaton og gahum ibabaw sa iyang kaugalingon nga gingsakupan.

“Ug usab ang Ginoo makabaton og gahum ibabaw sa iyang mga santos, ug maghari diha sa ilang taliwala.” (D&P1:35–36.)

Naghari ang Manluluwas taliwala sa mga Santos karon pinaagi sa nagpadayong pagpadayag. Ako magpamatuod nga siya anaa uban sa iyang mga sulugoon niini nga panahon ug maanaa hangtud sa katapusan sa yuta.

Hinaut nga ang atong panan-awon dili kaayo higpit nga atong ihiklin ang pagpadayag ngadto sa mga karaan lamang. Ang Dios maloloy-on ug nahigugma sa iyang mga anak sa tanang panahon ug nagpadayag sa iyang kaugalingon niini nga panahon sa kasaysayan.⁵

Ang Ginoo nagpadayag sa iyang hunahuna ug kabubut-on ngadto sa iyang dinihugan nga mga propeta. Adunay walay katapusan nga pagdagayday sa pagpadayag nga nag-agas kanunay gikan sa tinubdan sa tubig sa langit ngadto sa mga dinihugan nga mga sulugoon sa Dios dinhi sa yuta. Sukad sa kamatayon ni Propeta Joseph Smith, ang tingog sa Ginoo ngadto sa iyang mga propeta nagpadayon sama sa kaniadto.⁶

Niini nga panahon sa espirituhanong kagutom, atong makaplagan ang espirituhanong kabuhong pinaagi sa pagpamati sa tingog sa propeta.

Ang kagutom usa sa yanong mga hampak sa panahon sa Daang Tugon, ug nasabtan sa mga tawo ang makalaglag nga mga sangputanan sa wala pagpamunga sa mga tanom ug kagutom sa mga tawo. Gipasabut kini og maayo ni Amos pinaagi sa iyang panagna sa usa ka espirituhanong kagutom. Miingon siya: “… dili kagutmanan sa tinapay, ni sa kauhaw sa tubig; hinonoa kagutmanan sa pagpatalinghug sa mga pulong sa Ginoo” [Amos 8:11]. …

Mga report karong panahona kalabut sa kaguliyang ug kagawad sa mga indibidwal ug mga relihiyusong institusyon, samtang sila nagsulay sa pagsulbar sa ilang mga relihiyusong mga pagduda ug mga panagbangi, nagpahinumdom kanato sa mga pulong ni Amos: “… sila manalagan ngadto-nganhi aron sa pagpangita sa pulong sa Ginoo, ug sila dili makakaplag niini” [Amos 8:12].

Sila naningkamot sa pagpangita sa solusyon nga wala magtukod diha sa bato sa pagpadayag, ingon nga gisulti sa Ginoo nga kinahanglan gayud nga pagabuhaton [tan-awa sa Mateo 16:17–18]. …

… Ang kaguliyang ug mga kagawad diin ang kalibutan nag-antus dili yano nga makaplagan diha sa matinud-anong mga miyembro sa Simbahan. … Adunay matuohang tingog ngadto niadtong kinsa adunay hugot nga pagtuo ug kabubut-on sa pagtuo. Sigurado kita nagpuyo sa panahon sa kagutom, ingon nga gihulagway ni Amos. … Bisan pa niana, unsay ingon og makita nga usa ka kagutom nga espirituhanon, adunay daghan kinsa nakakaplag og espirituhanong kabuhong.

Kini mao … ang akong mapainubsanong pagpamatuod nga ang ebanghelyo diha sa iyang kahingpitan gipahiuli niining ulahing mga adlaw ug nga adunay usa ka propeta sa yuta karon kinsa namulong sa hunahuna ug kabubut-on sa Ginoo ngadto niadtong kinsa mamati ug magbaton og hugot nga pagtuo sa pagsunod.⁷

Kon kita mosunod sa mga pagtulun-an sa buhing mga propeta, dili kita masayop.

Ngadto sa mga katawhan sa milabay nga mga dispensasyon ug mga panahon, ang labing importante nga propeta mao ang usa nga niana nga higayon buhi, nagtudlo, ug nagpadayag sa kabubut-on sa Ginoo sa ilang panahon. Sa matag milabay nga mga dispensasyon, ang mga propeta gitawag sa Ginoo isip iyang tigpama-ba ngadto sa katawhan niana nga partikular nga panahon ug alang sa piho nga mga problema niana nga panahon.

Ang buhing propeta karon mao kinsa ang atong lider, atong magtutudlo. Gikan kaniya kita modawat og giya dinhi sa modernong kalibutan. Gikan sa tanang suok sa yuta, kita kinsa mipaluyo kaniya isip usa ka propeta sa Ginoo nagpahayag sa atong pagdayeg alang niining tinubdan sa balaang paggiya. …

Samtang ang mga propeta gikan sa sinugdanan hangtud karong panahona mabalik pagtan-aw sa atong panumduman, kita makamatikod sa dagkong panalangin nga moabut kanato gikan sa impluwensya sa usa ka buhing propeta. Kinahanglan nga makat-unan nato sa kasaysayan nga gawas kon kita andam sa pagpamati sa mga pasidaan ug pagsunod sa mga pagtulun-an sa usa ka propeta sa Ginoo, kita ubos sa mga paghukom sa Dios.⁸

Ang Presidente sa Simbahan lamang ang adunay katungod sa pagdawat og mga pagpadayag alang sa tibuok Simbahan o sa paghatag og opisyal nga mga paghubad sa mga kasulatan o mga doktrina sa Simbahan:

“Walay usa nga itudlo sa pagdawat og mga sugo ug mga pagpadayag niini nga simbahan gawas [sa Presidente sa Simbahan], kay siya modawat kanila gani sama kang Moises” (D&P 28:2).⁹

Kon kita mosunod sa tambag, maymay, ug mga pagtulun-an sa mga lider sa Simbahan sa ilang mga panudlo kanato, kita dili masayop niana nga labing importante alang sa atong kaugalingong personal nga kaluwasan ug kahimayaan.¹⁰

Ako puno sa pasalamat alang sa mga pagpadayag nga nakatukod og katingalahang sistema diin gidumala ang iyang Simbahan. Ang matag lalaki kinsa gi-orden nga Apostol ug gi-set apart isip usa ka miyembro sa Korum sa Napulog Duha gipaluyohan isip usa ka propeta, manalagna, ug tigpadayag. Ang Unang Kapangulohan ug ang Korum sa Napulog Duha ka mga Apostoles, gitawag ug gi-orden nga maghupot sa mga yawe sa priesthood, adunay awtoridad ug responsibilidad sa pagdumala sa Simbahan, sa pagpahigayon sa mga ordinansa niini, sa pagtudlo sa doktrina niini, ug sa pagtukod ug sa pagpadayon sa mga naandan niining buluhaton.

Kon ang Presidente sa Simbahan magdaot o dili hingpit nga makahimo sa pagbuhat sa tanan nga mga katungdanan sa iyang buhatan, ang iyang duha ka Magtatambag, kinsa, uban kaniya, naglangkob sa Korum sa Unang Kapangulohan, mopadayon sa trabaho sa Kapangulohan. Bisan unsa nga dagkong mga pangutana, mga palisiya, mga programa, o mga doktrina mga mainampuon nga gihunahuna sa konseho pinaagi sa mga Magtatambag sa Unang Kapangulohan ug sa Korum sa Napulog Duha ka mga Apostoles. Walay mga desisyon nga magagikan sa Unang Kapangulohan ug sa Korum sa Napulog Duha nga walay hingpit nga panag-uyon sa tanang may kalabutan.

Nagsunod niining dinasig nga sumbanan, ang Simbahan mopadayon nga walay pagbalda. Ang pagdumala sa Simbahan ug ang paggamit sa propetikanhong mga gasa sa kanunay itugyan diha niadtong apostolikanhon nga mga awtoridad kinsa naghupot ug naggamit sa tanan nga mga yawe sa priesthood.¹¹

Conference Center — “Ang panahon sa Komperensya maoy usa ka panahon sa espirituhanong pagpalig-on nga ang kahibalo ug pagpamatuod madugangan ug mapalig-on.”

Sa kinatibuk-ang komperensya, atong madawat ang dinasig nga tambag gikan sa mga propeta, mga manalagna, ug mga tigpadayag.

Samtang ako nagpamalandong sa mga mensahe sa [kinatibuk-an] nga komperensya, gipangutana ko ang akong kaugalingon niini nga pangutana: Unsaon ko pagtabang ang uban sa pagdawat sa kaayo ug sa mga panalangin sa atong Langitnong Amahan? Ang tubag anaa sa pagsunod sa direksyon nga nadawat niadto nga atong gipaluyohan isip mga propeta, manalagna, ug mga tigpadayag, ug ang uban nga mga General Authority. Atong tun-an ang ilang mga pulong, gipamulong ubos sa pagdasig sa Espiritu, ug modangop niini kanunay. Ang Ginoo nagpadayag sa iyang kabubut-on ngadto sa mga Santos niini nga komperensya.¹²

Daghang dinasig nga tambag sa mga propeta, mga manalagna, mga tigpadayag, ug sa ubang mga General Authority sa Simbahan ang ihatag panahon sa kinatibuk-ang komperensya. Ang atong mga propeta sa modernong panahon nag-awhag kanato sa pagbasa sa mga edisyon sa komperensya diha sa atong mga magasin sa Simbahan nga usa ka importante ug regular nga bahin sa atong personal nga pagtuon. Sa ingon, ang kinatibuk-ang komperensya nahimo, sabton nga, usa ka pagdugang ngadto o usa ka sumpay sa Doktrina ug mga Pakigsaad.¹³

Ang panahon sa komperensya usa ka panahon sa espirituhanong pagpalig-on nga ang kahibalo ug pagpamatuod gidugangan ug gipalig-on nga buhi ang Dios ug nagpanalangin niadtong kinsa mga matinud-anon. Kini usa ka panahon nga ang pagsabut nga si Jesus mao ang Kristo, ang Anak sa buhing Dios, hugot nga gipatik diha sa kasingkasing niadtong kinsa adunay determinasyon sa pagserbisyo kaniya ug sa pagsunod sa iyang mga sugo. Ang komperensya mao ang panahon nga ang atong mga lider naghatag kanato og dinasig nga direksyon kon unsaon pagdumala ang atong mga kinabuhi—usa ka panahon nga ang mga tawo maawhag ug mga tinguha mahimong mas maayong mga amahan ug mga inahan, mas masulundon nga anak nga mga lalaki ug mga babaye, mas maayo nga mga higala ug mga silingan. …

Kita kinsa ania nagtigum karon [sa kinatibuk-ang komperensya] makaangkon og usa ka linain, talagsaon nga kahibalo sa ebanghelyo sa Manluluwas. Labing importante sa tanan, niadtong kinsa unang nakasinati kanato, mao ang atong pamahayag ngadto sa kalibutan nga kita gigiyahan sa usa ka buhing propeta sa Dios—kinsa nakigsulti, nadasig, ug nagdawat og mga pagpadayag gikan sa Ginoo.¹⁴

Mga Sugyot alang sa Pagtuon ug Pagtudlo

Mga Pangutana

Ribyuha ang mga pagtulun-an ni Presidente Hunter sa seksyon 1. Ngano ang Dios naghatag og mga propeta alang sa matag dispensasyon? Unsa ang pipila sa mga katungdanan sa mga propeta? Unsaon nato pagtabang sa mga kabataan nga makaangkon og pagpamatuod sa mga propeta?
Unsaon nga ang pagkaadunay buhing propeta nagpanalangin kanato karon? (Tan-awa sa seksyon 2.) Ngano nga importante nga adunay “walay katapusang dagayday sa pagpadayag” nga nagsubay gikan sa Dios ngadto sa Iyang buhi nga mga propeta?
Unsa ang pipila ka mga ebidensya nga kita nagpuyo sa usa ka panahon sa “espirituhanong kagutom”? (Tan-awa sa seksyon 3.) Unsa nga mga panalangin ang inyong nadawat pinaagi sa pagpamati sa tingog sa buhing propeta?
Nagtudlo si Presidente Hunter nga ang “Presidente sa Simbahan lamang ang adunay katungod sa pagdawat og mga pagpadayag alang sa tibuok Simbahan” (seksyon 4). Nganong makatabang nga mahibalo niini? Nganong makatabang nga mahibalo nga “kita dili masayop” samtang atong sundon ang propeta?
Hunahunaa ang importansya sa kinatibuk-ang komperensya sa inyong kinabuhi. (Tan-awa sa seksyon 5.) Unsa ang pipila ka mga pagtulun-an nga gikan sa kinatibuk-ang komperensya nga nakapanalangin kaninyo? Unsaon ninyo paghimo sa kinatibuk-ang komperensya nga usa ka mas gamhanang impluwensya sa inyong kinabuhi ug sa panimalay?

May Kalabutan nga mga Kasulatan

Amos 3:7; Mateo 10:41; Lucas 1:68–70; Hubad ni Joseph Smith, 2 Pedro 1:20–21; Mosiah 8:15–18; D&P 1:14–16, 37–38; 21:1, 4–6; 43:2–6; 107:91–92

Tabang sa Pagtudlo

Isip usa ka klase, paglista diha sa pisara og pipila ka mga pangutana nga ang mga tawo sa ubang mga tinuohan tingali aduna mahitungod sa hilisgutan sa kapitulo. Pagdapit og mga sakop sa klase sa pagribyu sa kapitulo, mangita og mga tubag niini nga mga pangutana, ug dayon sa pagpakigbahin unsay ilang nakita.