“Mga Kasulatan,” Mga Hilisgotan ug mga Pangutana (2023)
Giya sa Pagtuon sa Ebanghelyo
Mga Kasulatan
Usa ka rekord sa pagpakiglabot sa Dios sa Iyang mga anak
Nasinati na ba nimo nga nakakita og tudling sa kasulatan nga daw direktang nakigsulti nimo? Ang mga kasulatan adunay espirituhanong gahom (tan-awa sa Lucas 24:32; 2 Nephi 32:3). Nagpamatuod kini nga si Jesukristo mao ang atong Manluluwas ug Manunubos ug mogiya nato ngadto Kaniya isip tinubdan sa atong kaluwasan. Gihatag kanato sa atong Langitnong Amahan ang kasulatan aron tudloan kita bahin sa Iyang plano para sa atong kalipay, aron tabangan kita nga makabaton og pagpamatuod sa Iyang Anak nga si Jesukristo, sa paggiya kanato, sa paghatag kanato og paglaom, ug daghan pa. Sa tibuok kasaysayan, girekord sa karaan ug modernong mga propeta ang balaang mga mensahe nga ilang nadawat ug ang mga asoy bahin sa pagpakiglabot sa Dios ngadto sa Iyang mga anak. Bulahan kita nga makabaton og akses sa pulong sa Dios sa atong panahon.
Unsa Ang mga Kasulatan?
Ang mga kasulatan mao ang sagradong mga basahon nga naglangkob og pulong sa Dios, pagtulun-an sa mga propeta, ug dinasig nga mga asoy sa mga pagpakiglabot sa Dios sa Iyang mga anak (tan-awa ang 2 Pedro 1:20–21). Ang opisyal nga mga kasulatan sa Ang Simbahan ni Jesukristo sa mga Santos sa Ulahing mga Adlaw, nga gitawag isip “sumbanan nga mga kasulatan,” lakip ang Biblia, ang Basahon ni Mormon, ang Doktrina ug mga Pakigsaad, ug ang Perlas nga Labing Bililhon.
Katibuk-ang pagpasabot sa hilisgotan: Mga Kasulatan
May kalabotan nga mga giya sa pagtuon sa ebanghelyo: Biblia, Basahon ni Mormon, Mga Propeta, Pagtulun-an ug Pagkat-on sa Ebanghelyo ni Jesukristo
Seksiyon 1
Ang mga Kasulatan Makapaduol Kanimo sa Imong Langitnong Amahan ug ni Jesukristo
Si Elder D. Todd Christofferson mipahayag, “Ang sentrong katuyoan sa tibuok kasulatan mao ang pagpuno sa atong mga kalag og hugot nga pagtuo sa Dios nga Amahan ug sa Iyang Anak, si Jesukristo.” Ang mensahe ug espirituhanong gahom sa mga kasulatan modala kanato ngadto sa kaluwasan. Si Presidente Ezra Taft Benson mitudlo, “Ang pulong sa Dios, sama sa makita sa mga kasulatan, … adunay gahom sa pagpalig-on sa mga Santos ug pag-andam kanila sa Espiritu aron sila makabatok sa daotan, hugot nga mogunit sa maayo, ug mangita og hingpit nga kalipay niini nga kinabuhi.” Ang imong desisyon sa pagbasa ug pagtuon sa mga kasulatan maoy importanteng lakang sa pagkahimong sama sa Langitnong Amahan ug ni Jesukristo.
Mga butang nga angayang hunahunaon
-
Si Elder Robert D. Hales mitudlo: “Kon kita gustong makigsulti sa Dios, mag-ampo kita. Ug kon kita gusto nga Siya makigsulti kanato, manukiduki ta sa mga kasulatan.” Kanus-a nimo nabati nga ang mga kasulatan naghatag kanimo og mga tubag? Unsay imong ikapakigbahin sa uban aron matabangan sila nga makaila nga makatabang kanila ang mga kasulatan aron makadawat og mga tubag gikan sa Dios?
-
Girekord ni propeta Nephi kon unsay iyang gilaoman nga masinati sa mga mobasa sa iyang dinasig nga mga sinulat. Basaha ang 1 Nephi 6:1–6. Sa unsang paagi nga ang pagsabot sa katuyoan ni Nephi sa pagsulat sa iyang asoy makaimpluwensya sa paagi sa imong pagtuon sa Basahon ni Mormon?
Kalihokan alang sa pagkat-on uban sa laing mga tawo
-
Dungang tan-awa ang bidyo nga “President Nelson—The Scriptures Teach Us about Jesus Christ (for Youth)” (0:59), nga mangita sa mga kamatuoran nga gisaad ni Presidente Russell M. Nelson nga atong makat-onan gikan sa mga kasulatan. Unsay iyang gisulti bahin sa kaimportante sa kada adlaw nga pagpuno sa atong kaugalingon sa mga kasulatan?
Pagkat-on pa og dugang
-
2 Nephi 4:15–16; Doktrina ug mga Pakigsaad 18:34–36; 20:8–15
-
Russell M. Nelson, “Living by Scriptural Guidance,” Ensign, Nob. 2000, 16–18
-
“The Power of the Word,” Teachings of Presidents of the Church: Ezra Taft Benson (2014), 115–24
-
“Scriptures Are God’s Recipes for Happy Living, Said President Nelson” (video), ChurchofJesusChrist.org
Seksiyon 2
Ang mga Kasulatan Mao ang Sagradong Koleksiyon sa mga Pulong sa Dios ngadto sa Iyang mga Anak
Ang mga miyembro sa Ang Simbahan ni Jesukristo sa mga Santos sa Ulahing mga Adlaw “nagtuo sa tanan nga gipadayag sa Dios, sa tanan nga gipadayag niya karon, ug … nga siya mopadayag pa og daghan nga dagko ug mahinungdanon nga mga butang kalabot sa Gingharian sa Dios” (Mga Artikulo sa Hugot nga Pagtuo 1:9). Daghan sa mag pagpadayag sa Dios ngadto sa Iyang mga anak narekord sa mga kasulatan, nga naglakip sa Biblia, Basahon ni Mormon, Doktrina ug mga Pakigsaad, ug Perlas nga Labing Bililhon. Kini nga mga basahon gitawag og “sumbanan nga mga kasulatan” ug giisip nga opisyal, o gibalaan, nga mga kasulatan sa Simbahan.
-
Ang Biblia usa ka rekord sa mga pagpakiglabot sa Dios sa Iyang katawhan, gikan sa panahon ni Adan hangtod sa panahon nga buhi pa ang mga Apostol ni Jesukristo. Aduna kini duha ka bahin: ang Daang Tugon ug ang Bag-ong Tugon. Ang Daang Tugon nagtudlo nga moabot ang gisaad nga Mesiyas isip atong Manluluwas ug Manunubos. Ang Bag-ong Tugon nagrekord sa kinabuhi ni Jesukristo ug sa Iyang maulaong sakripisyo ug Pagkabanhaw. Naglakip usab kini sa mga pagtulun-an sa Iyang mga Apostol ngadto sa mga miyembro sa Simbahan nga gitukod ni Jesuskristo niadtong panahona.
-
Ang Basahon ni Mormon usa ka sagrado nga rekord sa mga tawo nga nagpuyo sa Kasadpang Bahin sa Kalibotan tali sa mga 2000 BC ug AD 400. Kini adunay ubos nga ulohan nga “Lain nga Tugon ni Jesukristo.” Gisulat kini alang sa katuyoan sa “pagpamatuod … sa Judeo ug sa Hentil nga si Jesus mao ang Kristo, ang Dios sa Kahangtoran” (ulohan sa pahina sa Basahon ni Mormon).
-
Ang Doktrina ug mga Pakigsaad naglangkob og daghang moderno nga mga pagpadayag nga nadawat isip kabahin sa Pagpahiuli sa ebanghelyo ni Jesukristo. Kadaghanan niini nga mga pagpadayag nadawat ni Propeta Joseph Smith atol sa ikanapulo og siyam nga siglo.
-
Ang Perlas nga Labing Bililhon naglangkob og mga sinulat gikan sa basahon ni Moises ug sa basahon ni Abraham. Naglakip usab kini sa bahin sa hubad ni Joseph Smith sa Biblia, mga pinili gikan sa iyang kasaysayan sa Simbahan, ug Mga Artikulo sa Hugot nga Pagtuo.
Agig dugang sa sumbanan nga mga kasulatan, ang mga Santos sa Ulahing mga Adlaw mikonsiderar sa dinasig nga mga pulong ug mga pagtulun-an sa mga propeta sa modernong panahon nga kasulatan. “Bisan unsa ang ilang ipamulong kon nadasig diha pinaagi sa Espiritu Santo mahimo nga kasulatan” (Doktrina ug mga Pakigsaad 68:4).
Mga butang nga angayang hunahunaon
-
Basaha ang Alma 37:8–10, nga mangita sa mga paagi nga ang mga kasulatan nakahimo og kalainan sa mga tawo sa panahon ni Alma. Kanus-a ka nakakita og susama nga mga panalangin sa imong kinabuhi o sa kinabuhi niadtong nagpalibot nimo? Hain sa mga panalangin ang nalista niini nga tudling ang imong gilaoman para sa imong kinabuhi karon?
-
Ang mga propeta sa Basahon ni Mormon nga sila si Lehi ug Nephi nakakita og panan-awon nga mirepresentar sa pulong sa Dios isip gunitanan nga puthaw (tan-awa sa 1 Nephi 8; 11). Mahimo nimong rebyohon kini nga mga kapitulo ug ikonsiderar kon nganong ang gunitanan nga puthaw angay nga simbolo sa pulong sa Dios. Kanus-a ang mga kasulatan nahimong gunitanan nga puthaw para nimo?
Kalihokan alang sa pagkat-on uban sa laing mga tawo
-
Ikonsiderar ang pagtan-aw sa pipila ka bahin o tibuok video nga “Scriptures Legacy” (22:29). Dapita ang grupo nga ipakigbahin kon hain sa mga istorya ang nakapadasig nila og maayo bahin sa mga tawo nga mitabang aron mahimong magamit nato ang kasulatan karon. Sa unsang paagi kini nga mga asoy makaimpluwensiya sa atong mga pagbati bahin sa pagtuon sa kasulatan?
Pagkat-on pa og dugang
-
1 Nephi 19:23; 3 Nephi 23:1–6, 14; Mga Artikulo sa Hugot nga Pagtuo 1:8–9
-
Giya sa mga Kasulatan, “Biblia,” “Basahon ni Mormon,” “Doktrina ug mga Pakigsaad,” “Perlas nga Labing Bililhon,” Librarya sa Ebanghelyo
-
Russell M. Nelson, “Mga Saksi sa Kasulatan,” Liahona, Nob. 2007, 43–45
-
D. Todd Christofferson, “Ang Panalangin sa Kasulatan,” Liahona, Mayo 2010, 32–35
-
“Ang mga Kasulatan, ‘Dakong Tigumanan sa Espirituhanong Tubig’,” Mga Pagtulon-an sa mga Presidente sa Simbahan: Harold B. Lee (2011), 71–82
Seksiyon 3
Ang Pagtuon sa mga Kasulatan Makadala og Kahayag ug Kamatuoran sa Imong Kinabuhi
Gipahinumdoman kita sa tanang propeta sa ulahing mga adlaw sa bili sa pagtuon sa mga kasulatan. Ang mga kasulatan nahimong dako nga panalangin sa tanang mogahin og panahon sa pagbasa ug pagkat-on gikan niini. Samtang atong tun-an ang mga pulong sa mga propeta, makat-onan nato ang kamatuoran ug makadawat og giya gikan sa Espiritu Santo. Gipahimangnoan sa Ginoo ang unang mga Santos: “Ang inyong mga hunahuna sa mga panahon nga nangagi nangitngit tungod sa walay pagtuo, ug tungod kay kamo mibaliwala sa mga butang nga kamo nakadawat. … Paghinulsol ug hinumdomi ang bag-o nga pakigsaad, gani ang Basahon ni Mormon ug ang kaniadto nga mga sugo diin Ako mihatag [kaninyo],” (Doktrina ug mga Pakigsaad 84:54, 57). Ang mga kasulatan adunay gahom sa pagwagtang sa kangitngit pinaagi sa espirituhanong kahayag nga naggikan sa Espiritu Santo dihang ato kining basahon ug tun-an.
Mga butang nga angayang hunahunaon
-
Sa Basahon ni Mormon, ang pamilya ni Lehi gigiyahan sa ilang panaw padulong sa kamingawan sa usa ka bola o compass nga gitawag og Liahona. Dihang nagpakita sila og hugot nga pagtuo ug kakugi, gipakita sa Liahona ang dalan nga angay nilang subayon. Basaha ang Alma 37:38–47, nga mangita og mga paagi nga mahimong Liahona nimo karon ang kasulatan, sama sa nahitabo sa pamilya ni Lehi. Unsay atong mahimo aron madawat ang tanang espirituwal nga kaayohan sa mga kasulatan, o sa mga pulong ni Kristo?
-
Ang pagsag-ulo og usa ka tudling sa kasulatan makahatag og espirituhanong tabang ug gahom sa mga panahon nga manginahanglan. Rebyoha ang pakigpulong ni Elder Richard G. Scott nga “Ang Gahom sa Kasulatan.” Unsay imong nakat-onan niini nga pakigpulong nga mogiya nimo sa pagpahaom sa imong paagi sa pagtuon sa mga kasulatan?
Kalihokan alang sa pagkat-on uban sa laing mga tawo
-
Adunay daghang gisaad nga mga panalangin nga may kalabotan sa pagtuon sa kasulatan. Pangitaa ang lainlaing gisaad nga mga panalangin sa mosunod nga mga tudling, ug hisgoti kon sa unsang paagi nakita nimo nga natuman ang maong mga panalangin:
Pagkat-on pa og dugang
-
“Ang Gahom sa Pulong,” Mga Pagtulon-an sa mga Presidente sa Simbahan: Ezra Taft Benson (2014), 137–150
-
“Liken All Scriptures” (bidyo), Gospel Library
-
“Ang mga Kasulatan—Ang Pinakamapuslanon sa Tanan nga Pagtuon,” Mga Pagtulon-an sa mga Presidente sa Simbahan: Howard W. Hunter (2015), 161–74
-
“Pagkaplag sa mga Kasulatan alang sa atong mga Kaugalingon,” Mga Pagtulun-an sa mga Presidente sa Simbahan: Spencer W. Kimball (2011), 74–86
Uban pang mga Kapanguhaan bahin sa mga Kasulatan
-
Mga Kapanguhaan alang sa Pagtudlo sa mga Bata