Kapitulo 7

Ang mga Kasulatan, “Dakong Tigumanan sa Espirituhanong Tubig”

Sa unsa nga paagi nga ang makugihong pagtuon sa mga kasulatan nagdugang sa atong pagka-espirituhanon ug naggiya kanato ngadto sa kinabuhing dayon?

Pasiuna

Si Presidente Harold B. Lee ug ang iyang asawa, si Freda Joan Lee, mibiyahe ngadto sa Uropa ug sa Balaang Yuta niadtong 1972, nagtudlo sa mga misyonaryo ug mga miyembro sa mga doktrina sa ebanghelyo. Si Gordon B. Hinckley ug ang iyang asawa, si Marjorie Pay Hinckley, kuyog kanila. Si Sister Hinckley naghinumdom: “Makaikag kadto nga tan-awon giunsa ni Presidente Lee paglihok niadto nga sitwasyon. Kon kami makigkita sa mga misyonaryo, kini kasagaran sa buntag diha sa simbahan uban sa full-time ug part-time nga lokal nga mga misyonaryo. Samtang siya magbarug aron mamulong kanila, siya panagsa ra nga mosugod uban sa pulong sa pagbati apan moabli sa mga kasulatan ug mosugod og usa ka pakigpulong. Siya mopakli ngadto sa mga kasulatan uban ang ingon nga kasayon nga usahay malisud sa paghibalo kanus-a ang mga pulong iya ug kanus-a nagkutlo siya. Human sa usa ka sama nga miting nangutana ako kaniya giunsa niya paghimo ang pagmemorya sa mga kasulatan. … Siya mihunahuna sa makadiyot ug dayon miingon, ‘Ako wala magtuo nga ako sukad nakamatikod nga nagmemorya og usa ka kasulatan. Nagtuo ako nga ako nagtuon lamang niini pag-ayo nga kini nahimong kabahin kanako ug sa akong sinultihan.’”¹

Mga Pagtulun-an ni Harold B. Lee.

Nganong kinahanglan kitang magtuon sa mga kasulatan?

Ingon nga ang tubig kaniadto ug karon importante sa pisikal nga kinabuhi…, mao usab ang ebanghelyo ni Ginoong Jesukristo importante ngadto sa espirituhanong kinabuhi sa mga anak sa Dios. Kana nga pag-agid-agid gisugyot pinaagi sa mga pulong sa Manluluwas ngadto sa babaye diha sa atabay sa Samaria, sa dihang Siya miingon: “… apan bisan kinsa nga magainom sa tubig nga akong igahatag kaniya dili na gayud pagauhawon; kay ang tubig nga akong igahatag kaniya mahimong diha sa sulod niya usa ka tubod sa tubig nga magatubo ngadto sa pagkakinabuhing dayon.” (Juan 4:14.)

Dagkong mga sudlanan sa espirituhanong tubig, nga gitawag og mga kasulatan, gihatag karong adlawa ug gipanalipdan nga ang tanan unta makaambit ug sa espirituhanong paagi mapakaon, ug sila dili uhawon. Nga kini nga mga kasulatan gihunahuna nga hilabihan kadako og importansya, gipakita pinaagi sa mga pulong sa Manluluwas, “Kamo nagasusi sa mga kasulatan; kay nagahunahuna man kamo nga pinaagi niini makakaplag kamo sa kinabuhing dayon: gani kini mao ang nagapanghimatuod mahitungod kanako” (Juan 5:39); ug ang mga kasinatian sa mga Nephites nga gipabalik aron sa pagkuha sa mga palid nga tumbaga nga naglangkob sa mga kasulatan hilabihan ka importante ngadto sa kaayohan sa mga katawhan. Ang paggamit niadtong mga kasulatan gisugyot diha sa pahayag ni Nephi sa dihang siya miingon, “… kay ako mipahisama sa tanan nga mga kasulatan ngari kanato, nga kini unta mahimo alang sa atong kaayohan ug sa atong pagkat-on. Nephi 19:23 … Ngadto niini nga mga henerasyon ang mga mensahe gikan sa atong Amahan gibantayan ug mabinantayong gipanalipdan, ug timan-i usab nga niining adlawa kini nga mga kasulatan mao ang labing lunsay diha sa tinubdan niini, ingon man nga ang mga tubig labing lunsay diha sa tinubdan sa bukid; ang labing lunsay nga pulong sa Dios, ug ang labing gamay nga malagmit mahugawan, kana mao diin nagagikan sa mga ngabil sa mga propeta kinsa gipahimutang aron sa paggiya sa Israel sa atong kaugalingon nga adlaw ug panahon.”²

Ang atong Amahan adunay gihatag kanato sa matag dispensasyon, nga Iyang mga anak, ang balaang mga kasulatan pinaagi sa Iyang inspirasyon sa paghimo kanato nga maalamon sa pagbuntog sa tintasyon pinaagi sa hugot nga pagtuo diha Kaniya. Kini nga mga kasulatan may “kapuslanan alang sa pagpanudlo, alang sa pagpamadlong, alang sa pagpanul-id, ug alang sa pagmatoto sa pagkamatarung: Aron ang tawo sa Dios mamahingpit, masinangkapan alang sa tanang maayong buluhaton.” (2 Timoteo 3:16–17.) Hilabihan ka-importante diha sa plano sa kaluwasan mao ang mga kasulatan nga ang mga panghitabo gitala diin ang Dios nagmando sa paghunos og kinabuhi aron sa pag-angkon sa bililhong mga sinulat nga diin kon wala ang Iyang mga anak mapandol ug mabutaan pinaagi sa kangitngit sa kalibutan [tan-awa sa 1 Nephi 4:13].³

Kita nahilig karong mga panahona nga mas labaw nga mabalaka mahitungod sa pagbasa sa mga komentaryo kalabut sa mga kasulatan. Apan walay lain nga ingon ka importante sama sa paggunit niadto nga mga kasulatan diha sa atong mga kamot ug sa pagbasa niini. … [A]niay usa ka butang nga labaw ka makapaukyab, labaw ka espirituhanon, usa ka butang nga labaw ka lawom ka makahuluganon kon ako magbasa gikan sa mga kasulatan sa akong kaugalingon. … Walay lain nga hilabihan ka importante, hilabihan ka gikinahanglan karon, kay sa pagsilsil diha sa inyong mga anak og usa ka gugma alang sa mga kasulatan diha sa ilang mga kaugalingon.⁴

Ang Magtutudlo mitambag kanato sa pagsiksik sa mga kasulatan, kay diha niini kita makakaplag sa dalan ngadto sa kinabuhing dayon, kay kini nagpamatuod sa dalan nga ang mga tawo kinahanglan nga maglakaw aron makaangkon sa kinabuhing dayon uban Kaniya ug uban “sa Amahan nga nagpadala [Kaniya]” (Juan 5:30).⁵

Sa unsa nga paagi nga ang pagtuon sa Basahon ni Mormon nagtabang kanato sa pag-ugmad ug sa pagpalambo sa atong pagka-espirituhanon?

Kini kanunay ingon ngari kanako nga ang mga pulong ni Propeta Joseph Smith sa pagtambag ngadto sa mga kaigsoonan, nagpahimangno sa bili sa Basahon ni Mormon, adunay labaw ka dako nga kahulugan kay sa gibutang sa kadaghanan kanato diha niini. Ang iyang pahayag mao: “Ako misulti sa mga kaigsoonan nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi pa nga maduol sa Dios pinaagi sa pagsunod sa iyang mga lagda, kay sa bisan hain nga basahon” (History of the Church, 4:461).

Ngari kanako kini nagpasabut nga dili lamang dinhi niini nga gidaghanon sa mga kasulatan nga kita nakahulagway sa tukma nga mga kamatuoran sa ebanghelyo, apan usab nga pinaagi niining ikaduha nga saksi kita mahimong makahibalo sa labaw katinuod sa kahulugan sa mga pagtulun-an sa karaang mga propeta ug, sa pagkatinuod, sa Magtutudlo ug sa Iyang mga disipulo sumala sa ilang pagpuyo ug pagtudlo taliwala sa mga katawhan.⁶

Kon ang usa ka tawo buot nga maduol ngadto sa Dios, siya makahimo niini pinaagi sa pagbasa sa Basahon ni Mormon.⁷

Kamo … walay mahimo nga mas maayo sa pagdasig sa inyong espirituhanong mga gana ug sa pagpalambo sa inyong espirituhanong diwa kay sa pagbasa ug sa pagbasa pag usab matag tuig sa bililhong mga butang ingon nga gitudlo diha sa Basahon ni Mormon. Kini gihatag ngari kanato, ang kahingpitan sa ebanghelyo pinaagi ni anghel Moroni aron itugyan ngadto sa tawo. Kita aduna, sama pananglit, usa ka istorya nga gisaysay ngari kanato ni Presidente German E. Ellsworth, kinsa mihatag sa iyang pagpamatuod diha sa templo atubangan sa ubang mga presidente sa misyon. Miingon siya nga sa mga tuig nga milabay samtang siya nagdumala sa Northern States Mission siya dihay usa ka damgo o usa ka panan-awon diin siya kanunay nga miduaw sa Bungtod sa Cumorah ug napuno sa mga hunahuna sa mga hitabo nga nahitabo libut niana nga sagradong dapit. Dihay miabut kaniya nga dili masayop nga hagit: “Isangyaw ngadto sa kalibutan ang Basahon ni Mormon. Kini mogiya sa kalibutan ngadto ni Kristo.”⁸

Kon kamo buot molig-on sa mga estudyante batok sa … supak nga mga pagtulun-an, sa gitawag og tag-as og kahibalo nga mohagit sa ilang pagtuo sa Biblia, hatagi sila og sukaranang pagsabut kabahin sa mga pagtulun-an sa Basahon ni Mormon. Balik balika sa pagtuon.

Unsa na kadugayon sukad inyong nabasa ang Basahon ni Mormon? Ako nakurat sa dili pa kaayo dugay sa mga pakighinabi sa duha ka mga lalaki kinsa sa mga tuig nga milabay diha sa atong seminary ug kinsa ang duha naadto og lain nga mga posisyon sa pagtudlo, kinsa nakakuha og mga degree sa pagradwar. Sila nahibulag palayo sa mga kamatuoran sa ebanghelyo ug sa karon naghagit ug nakig-away ug naninguha sa pagguba ug pagsaway sa mga pagtulun-an sa Simbahan.

Nakigsulti ako kanilang duha, ug sa diha nga ako nangutana kalabut sa pagbasa sa Basahon ni Mormon, ang usa kanila miingon ngari kanako: “Kini napulog upat na ka tuig sukad ako nakabasa og bisan unsa diha sa Basahon ni Mormon.”

Ang lain miingon, “Ako dili makahinumdom kanus-a ako katapusang mibasa sa bisan unsa gikan sa Basahon ni Mormon.” Busa kini mao usab ni bisan kinsa kanato, kon kita dili mopadayon sa pagpuno sa atong mga kaugalingon uban sa mga pagtulun-an niining labing bililhon nga basahon nga ang Ginoo naghatag kanato alang sa usa ka katuyoan—nga mao, ang pag-usab sa tanan niining mga sayop ug mga panagbangi sa atong panahon ingon lamang sa Iyang gisaad nga Siya mobuhat sa ubang mga adlaw.⁹

Nakigsulti ako sa usa ka lalaki kinsa bantugan sa among unibersidad sa estado. … Samtang miyembro sa Simbahan, siya mabudhion nga naghulhog ug nagpadako sa mga pagduda nga gituyo aron sa pagguba sa pagtuo niini nga mga batan-on. Miingon siya, “Ako wala magbuhat niini sa katapusang tulo ka mga bulan sa tuig, hinoon, Brother Lee.”

Sa dihang ako nangutana, “Unsay nakapausab kanimo?” mihimo siya sa makapaikag nga pagkumpisal:

“Sulod sa baynte ka tuig ako wala gayud motan-aw sa Basahon ni Mormon, apan ako gihatagan og usa ka buluhaton diha sa Simbahan sa paghimo og usa ka butang. Kana nga buluhaton nagdala kanako ngadto sa pagbasa sa Basahon ni Mormon ug sa ebanghelyo, ug ako mipasakop sa Simbahan pagbalik sa katapusang pipila ka mga bulan. Karon kon ang akong mga estudyante moduol ngari kanako, nasamok tungod sa mga pagtulun-an sa pilosopiya, ako mosulti ngadto kanila sa tago, ‘Ning tungora, ayaw kasamok. Kamo ug ako nakahibalo nga ang ebanghelyo tinuod ug ang Simbahan husto.’”¹⁰

Sa unsa nga mga paagi nga ang mga kasulatan naghatag og usa ka sumbanan sa kamatuoran?

Ang bag-ohay nga mga katuigan nagpaila og mga teoriya ug mga pilosopiya nga nagsukna sa tanang karaan nga mga sumbanan sa relihiyon, moralidad, ug mga pakigdait diha sa pamilya. Ang modernong mga tawo nga nagbiaybiay sa gitahud nga mga pagtuo … aron sa pagguba sa pagtuo sa karaan ug sa gisaligan nga gamhanang mga pagtulun-an sa mga kasulatan ug sa [pag-ilis niini sa] dili dinasig, hinimo sa tawo nga mga doktrina sa pamatasan nga mausab uban sa panahon ug sa dapit.¹¹

Moingon ako nga kita kinahanglan nga motudlo sa atong mga katawhan sa pagpangita sa ilang mga tubag diha sa mga kasulatan. Kon matag usa lamang kanato magmaalamon igo sa pagsulti nga kita dili makasarang sa pagtubag sa bisan unsa nga mga pangutana gawas kon kita makakaplag og pangdoktrina nga tubag diha sa mga kasulatan! Ug kon kita makabati og usa ka tawo nga nagtudlo og usa ka butang nga supak sa unsay anaa sa mga kasulatan, ang matag usa kanato mahimong makahibalo kon kini nga mga butang nga gisulti mga bakak—kini ingon niana ka yano. Apan ang nakadaot nga butang mao nga daghan kaayo kanato wala magbasa sa mga kasulatan. Wala kita makahibalo unsa ang anaa niini, ug busa kita mangagpas mahitungod sa mga butang nga ato untang makaplagan diha sa mga kasulatan mismo. Naghunahuna ako nga diha niana mao ang usa sa atong labing dako nga kuyaw sa pagka karon.

Sa diha nga ako nakighimamat sa atong mga misyonaryo ug sila nangutana mahitungod sa mga butang kalabut ngadto sa templo, ako miingon ngadto kanila, samtang nagtapos sa paghisgot, “Ako dili mangahas sa pagtubag sa bisan hain sa inyong mga pangutana gawas kon ako makakaplag og tubag diha sa sumbanan nga mga kasulatan o diha sa tinuod nga mga pamahayag sa mga Presidente sa Simbahan.”

Ang Ginoo naghatag kanato diha sa sumbanan nga mga kasulatan sa paagi diin kita kinahanglan mosukod sa tinuod ug sa dili tinuod. Mahimo ba nga kitang tanan mamati sa iyang pulong: “Kamo modala sa mga butang nga inyong nadawat, nga gikahatag nganha kaninyo diha sa akong mga kasulatan alang sa usa ka balaod, nga mahimo nga akong balaod sa pagdumala sa akong simbahan” (D&P 42:59).¹²

Sa kanunay anaa ang mga tintasyon nga molapas sa unsay gipadayag sa Ginoo ug mangahas sa paggamit sa imahinasyon sa ubang mga higayon o sa pagpangagpas ngadto niini nga mga pagtulun-an. Ako nanghinaut nga kamo mahinumdom niana. Ayaw pagsulay sa paglapas sa unsay gipadayag sa Ginoo. Kon kamo wala makahibalo, sulti nga kamo wala makahibalo; apan ayaw pagsulti nga kamo wala makahibalo nga kamo angay unta nga makahibalo tungod kay kamo mga estudyante sa mga kasulatan. Mga pagsusi mahitungod sa mga pagtulun-an sa ebanghelyo ni Jesukristo kinahanglan nga tubagon, kon mahimo, gikan sa mga kasulatan.¹³

Kita aduna unsay wala sa uban nga simbahan: upat ka mahinungdanong mga basahon, ang kamatuoran diin, kon kita mobasa niining tanan, hilabihan ka tataw nga kita dili magkinahanglan nga anaa sa kasaypanan. Sama pananglit, kon kita buot makahibalo kalabut sa kahulugan sa sambingay sa mga sagbut ingon nga ang Ginoo nagpasabut niini, ang tanan nga atong pagabuhaton mao ang pagbasa sa pagpadayag nga nailhan isip ika-86 nga seksyon sa Doktrina ug mga Pakigsaad ug kita makaangkon sa pagpasabut sa Ginoo. Kon kita buot makahibalo og usa ka butang ingon nga gilangkob diha sa mga pagtulun-an sa mga Kabulahanan o sa Pagampo sa Ginoo, atong mabasa ang labaw nga husto nga bersyon diha sa Ikatulong Nephi. Daghang mga konsepto nga sa laing paagi mahimo nga lisud nga gihimong tataw ug tinuod diha sa atong mga hunahuna.¹⁴

Ngano nga kinahanglan kitang mogamit sa mga kasulatan kon kita magtudlo sa ebanghelyo?

Kini ang buhat niadtong kinsa magtudlo sa Iyang mga anak sa pagtudlo sa mga baruganan sa ebanghelyo. Wala kita i-set apart sa pagtudlo og mga hunahuna o mga tagna sa kamatuoran. Wala kita i-set apart sa pagtudlo og mga pilosopiya o mga siyensya sa kalibutan. Kita gi-set apart sa pagtudlo sa mga baruganan sa ebanghelyo ingon nga makita diha sa upat ka mga kasulatan— ang Biblia, ang Basahon ni Mormon, ang Doktrina ug mga Pakigsaad, ug ang Perlas nga Labing Bililhon.

Samtang kita maghunahuna niana isip atong limitasyon, kini atong pribilihiyo nga makahibalo niadto nga mga kamatuoran ug sa pag-angkon sa labing hingpit nga lagda sa mga kasulatan nga inila sa kalibutan. Ang mga miyembro lamang sa Simbahan ang aduna niining dako nga pribilehiyo.¹⁵

Kita nagtuo nga ang atong mga miyembro mga gutom sa ebanghelyo, wala masaguli, uban niini ang tugob nga mga kamatuoran… [D]ili nato himoon ang kasaypanan nga mopalaay sa [atong mga miyembro] … diha sa atong mga panimalay o diha sa mga klase sa Simbahan pinaagi sa paghatag kanila og sinagulan nga mga pagdimdim sa ebanghelyo sa panahon nga sila moinom sa kauhaw gikan sa atabay sa buhing mga tubig!… Aduna niadto kinsa ingon og nakalimot nga ang labing gamhanan nga mga hinagiban nga gihatag sa Dios kanato batok sa tanan nga mga dautan mao, pinaagi sa iyang kaugalingon nga mga pamahayag, ang yano, simple nga mga doktrina sa kaluwasan ingon nga makaplagan diha sa mga kasulatan. Kita makuratan kon kita makadungog nga pipila sa atong mga kaigsoonan diha sa gitawag nga kalibutanon nga mga komunidad … mipili sa pagbaliwala sa gilatid nga mga paagi sa pagtuon sa pagpalabi sa nagkalain-laing mga paghubit kabahin sa mga hilisgutan diin walay bisan gamay nga pagkasusama sa sukaranang mga kamatuoran sa ebanghelyo.¹⁶

Ang tanan nga atong gitudlo niini nga simbahan kinahanglan nga ipasikad diha sa mga kasulatan. … Kinahanglan kita nga mopili sa atong mga basahon gikan sa mga kasulatan, ug bisan diin kamo adunay paghulagway sa mga kasulatan o usa ka pagpadayag diha sa Basahon ni Mormon, gamita kini, ug ayaw pagkuha gikan sa lain nga mga kapanguhaan diin kamo makakaplag niini dinhi niini nga mga basahon. Ato kining gitawag og ang sumbanang mga basahon sa Simbahan tungod kay sila mga sumbanan. Kon kamo buot mosukod sa kamatuoran, sukda kini pinaagi sa sumbanan nga mga basahon sa Simbahan. … Kon kini wala sa sumbanang mga basahon, kamo mahimong mohunahuna nga kini banabana. Kini sa tawo nga kaugalingong opinyon, sa pagsulti niini sa lain nga paagi; ug kon kini mosupak sa unsa ang anaa sa mga kasulatan, kamo masayud pinaagi sa sama nga timaan nga kini dili tinuod. Kini mao ang sumbanan diin kamo mosukod sa tanang kamatuoran. Apan kon kamo wala masayud sa mga sumbanan, kamo walay igo nga sukdanan sa kamatuoran.

Naghunahuna ako og balik … kabahin sa giunsa ako pagtudlo sa mga kasulatan dihang ako usa pa ka bata nga Primary. … Himumdumi, ang hugot nga pagtuo moabut pinaagi sa pagpaminaw sa pulong sa Dios, sumala sa gisulti ni Pablo [tan-awa sa Mga Taga-Roma 10:17]. … Diha sa akong klase sa Primary, ako adunay maayo kaayo nga magtutudlo—dili siya maayo tungod kay siya nakaeskwela ug nakadawat og mga degree tungod sa pagkahingpit sa siyensya sa pagpanudlo, sa kinaadman sa paagi sa pagtudlo, apan siya adunay paagi sa pagtuo … nga alang kaniya aron matukod ang among hugot nga pagtuo siya kinahanglan nga motudlo kanamo sa mga kasulatan.¹⁸

Kita nagtubo ba diha sa pagpamatuod ug pagkaespirituhanon pinaagi sa makugihon nga pagtuon sa mga kasulatan?

Kamo ba … mapadayunong nagtubo sa inyong pagpamatuod pinaagi sa makugihon nga pagtuon sa mga kasulatan? Kamo ba adunay adlaw-adlaw nga kinaiya sa pagbasa sa mga kasulatan? Kon kita dili magbasa sa mga kasulatan adlaw-adlaw, ang atong mga pagpamatuod magtubo nga magkahanap, ang atong pagkaespirituhanon dili magkadugang ang giladmon. Kita, sa atong mga kaugalingon, kinahanglan nga magtuon sa mga kasulatan ug batonan ang adlaw-adlaw nga kinaiya sa pagtuon.¹⁹

Ang paagi nga kamo naglig-on sa inyong pagka-espirituhanon mao [ang] pinaagi sa pagtuon sa ebanghelyo.²⁰

Paningkamot diha sa inyong mga panimalay, ug tudloi ang uban, sa paggahin og pipila ka higayon sa matag adlaw nga maghimo usa ka hilum nga pagpamalandong. Himoa nga may pagtuon sa mga kasulatan bisan treynta ka mga minuto sa matag adlaw. Diha sa sayo nga oras sa buntag, o diha sa gabii kaayo, sumala sa labing moangay sa inyong panahon, tuguti ang inyong mga kaugalingon sa usa ka mainampuon nga pagpamalandong diin kamo makighiuyon ngadto sa Dios ug makighisgot ngadto Kaniya sa mga problema nga lapas sa tawhanong pagsabut, hilabihan ka bug-at alang sa tawhanong kusog.²¹

Himoa nga walay adlaw nga molabay nga dili mobasa gikan niini nga mga basahon. Apan kini dili igo lamang nga mokat-on kalabut sa Iyang kinabuhi ug mga buhat pinaagi sa pagtuon. Ang Magtutudlo mao ang mibalos agi og tubag sa pangutana kon unsaon sa usa nga mahimong makahibalo Kaniya ug sa Iyang doktrina: “Kon tuyoon ni bisan kinsa sa pagbuhat sa iyang kabubut-on, iyang mahibaloan” (Juan 7:17). Naghunahuna ba kamo nga ang usa ka batid sa siyensya mahimo nga usa kinsa wala gayud maka-ekspiremento diha sa usa ka laboratoryo? Mohatag ba kamo sa husto nga pagtagad ngadto sa mga komentaryo sa usa ka kritiko sa musika kinsa wala makahibalo sa musika..? Mao usab, ang usa sama sa inyong kaugalingon, kinsa buot “makaila sa Dios” kinahanglan nga ang maong tawo magbuhat sa Iyang kabubut-on ug mohupot sa Iyang mga sugo ug mogamit sa mga hiyas nga gisunod ni Jesus.²²

Kita anaa sa pagserbisyo sa Ginoo. Kita adunay katungod sa espirituhanong paggiya, kon kita magpuyo nga takus. Ang Dios nagtugot nga kita sa ingon magsunod ug magtuon sa mga kasulatan, ug himoon kini nga usa ka pagbasa nga kinaiya nga kita magtagbaw matag adlaw, nga kita dili mapakyas sa taas nga mga katungdanan diin kita gitawag diha sa gingharian sa atong Amahan.²³

Mga Sugyot alang sa Pagtuon

Sa unsa nga mga paagi nga ang mga kasulatan ingon ka importante sa atong espirituhanong kinabuhi sama nga ang tubig ngadto sa atong pisikal nga kinabuhi? Unsaon sa pagtuon sa mga kasulatan pagtabang kanato sa pagbuntog sa tintasyon?
Sa unsa nga mga paagi nga ang Basahon ni Mormon mogiya kanato ngadto ni Jesukristo? Unsaon sa Basahon ni Mormon pagtabang kanato sa pagmatikod sa kamatuoran gikan sa kasaypanan? Giunsa sa inyong pagtuon sa Basahon ni Mormon pag-impluwensya sa inyong kinabuhi?
Unsa nga mga kasinatian kamo aduna sa pagpangita sa mga tubag sa inyong mga pangutana diha sa mga kasulatan?
Kon kita magtudlo, ngano nga importante nga mosalig diha sa mga kasulatan ug sa mga pagtulun-an sa mga propeta.
Giunsa ninyo paghimo sa pagtuon sa kasulatan nga usa ka nag-una nga pagtagad sa inyong kinabuhi? Giunsa ninyo paghimo ang pag-awhag sa inyong mga anak o sa uban nga mga pamilya sa pagtuon sa mga kasulatan?
Giunsa sa atong pagtuon sa mga kasulatan pagdugang sa atong kasarang sa pagtuman sa taas nga mga katungdanan diin kita gitawag diha sa gingharian sa atong Amahan?

Si Presidente Harold B. Lee nahigugma sa mga kasulatan ug migamit kanila sa pagtudlo sa mga Santos. Miingon siya, “Kon kita dili magbasa sa mga kasulatan adlaw-adlaw, ang atong mga pagpamatuod magtubo nga magkahanap, ang atong pagkaespirituhanon dili magkadugang ang giladmon.”