Kapitulo 24

Sa Katapusan Luwas nga Nakapauli

Anaa ba kita sa luwas nga agianan nga nagpaingon sa atong mahangturong panimalay ug kinabuhi diha sa atubangan sa Amahan?

Pasiuna

Sa tibuok niya nga pangalagad, si Harold B. Lee mipasabut og maayo niini nga pagtulun-an: “Ang mga butang nga atong gipaningkamutan mao ang pagpatunhay sa atong mga kaugalingon ug sa pagpuyo nga sa umaabut makabalik kita sa panimalay ngadto niana nga Dios kinsa mihatag kanato og kinabuhi––balik ngadto sa atubangan nianang mahangturon nga Langitnong Amahan.”¹

Siya nahinumdom: “Sa pipila ka nanglabay nga panahon nakabasa ako og usa ka artikulo nga gisulat sa usa ka bantugan nga tigsulat sa pamantalaan kinsa mipasabut kon giunsa niya sa pagpahigayon alang sa usa ka makahuluganon nga panagsultihanay uban sa pipila ka mga tawo kinsa gusto niya nga ikahinabi. Mangutana siya og sama niini: ‘Mahimo bang sultihan mo ako kon unsa ang gusto nimong ikulit diha sa imong lapida?’ Siya misulti nga daghan ang mohatag og mga tubag sama sa ‘paglingawlingaw,’ ‘miadto sa lain nga miting,’ ug uban pa. Dayon ang tigsulat gipangutana unsa sa iyang kaugalingon ang isulat sa iyang lapida. Mitubag siya sa hilabihan ka hinay ug kamatinud-anon, ‘Sa katapusan, luwas nga nakapauli.’

“Kon ang hingpit nga kahulugan niini nga pamahayag isilsil ngari kanato, tingali pangutan-on usab nato ang atong mga kaugalingon, ‘Hinoon, mahitungod ba sa unsa ang kinabuhi, ug unsa ba ang atong paglaum lapas niini nga kinabuhi, nagtuo, sama sa atong gihimo, sa kinabuhi human niini?’ Hapit tanan, bisan unsa ang iyang relihiyuso nga tinuohan, nagpaabut sa usa ka kinabuhi nga mahimong ipatin-aw sa nagkalain-laing mga paagi. Kon husto ang akong pangagpas, niana, kitang tanan nangandoy nga masulat diha sa atong mga lapida, isip usa ka sulat sa atong nabuhat sa kinabuhi, nga kita ‘luwas nga nakapauli sa katapusan.’”²

Mga Pagtulun-an ni Harold B. Lee

Unsa ang katuyoan sa atong mortal nga kinabuhi?

Unsa ang katuyoan sa kinabuhi…? Ang mao lamang nga tubag makita sa usa sa mga kasulatan diin nagpadayag sa katuyoan sa Dios sa paghatag og kinabuhi sa tanan gayud, ug kana nga katuyoan gipasabut diha sa pagpadayag ngadto ni propeta Moises: “Mao kini ang akong buhat ug ang akong himaya––ang pagpahinabo sa pagka-imortal ug sa kinabuhing dayon sa tawo.” [Moises 1:39.] Kon ang usa ka tawo moginhawa lamang usa ka higayon diha sa mortal nga kinabuhi ug dayon pagakuhaon, o kon siya mabuhi kutob sa edad sa usa ka kahoy, ang katuyoan sa atong Amahan mahuman na unta kutob sa pagbaton og pagkaimortal. Ug kini nga butang nga gitawag og kinabuhing dayon mao ang pagpuyo og maayo nga himoon gayud sa usa ka tawo, pinaagi sa iyang pagpakabuhi, ingon nga naihap nga takus sa kinabuhing dayon diha sa atubangan sa Dios nga Amahan ug sa Anak.³

Ang tawo didto sa kalibutan sa espiritu mao ang anak sa Dios. Ang yuta gilalang ug gihan-ay isip puy-anan nga dapit sa natawo sa langit nga mga espiritu diha sa mortal nga mga lawas aron “pagsulay kanila dinhi, aron pagsuta kon sila mobuhat sa tanan nga butang bisan unsa nga isugo sa Ginoo nga ilang Dios ngadto kanila.” [Tan-awa sa Abraham 3:25.] Ang katuyoan sa Dios sa pagbuhat sa ingon mao ang “pagpahinabo sa pagka-imortal ug sa kinabuhing dayon” o, sa lain nga pagkasulti, isip sangputanan sa malampuson nga mortal nga kinabuhi, sa pagdala sa matag kalag balik ngadto sa atubangan “nianang Dios kinsa naghatag kaniya sa kinabubi” ug may nabanhaw nga lawas nga dili ubos sa kamatayon ug sa ingon nahingpit, sa pagpuyo sa kahangturan diha sa atubangan sa Ginoo nga atong Magtutudlo ug ang Amahan natong tanan.⁴

[Si Presidente George F. Richards] miasoy niini nga istorya, usa ka istorya kabahin sa usa ka batan-on nga lalaki kinsa hilabihan ka matinguhaon nga makakuha og edukasyon. Ang iyang mga ginikanan wala makahimo sa pagpadala kaniya sa kolehiyo, busa milakaw siya ngadto sa kolehiyo sa siyudad, ug human sa makugihon nga pagsusi milampos siya sa pagkakaplag og usa ka dapit [diin] mahimo siya nga mobayad sa iyang abang ug pagkaon. Sa wala madugay usa sa mga propesor sa kolehiyo mihatag kaniya og trabaho sa pagpamutol og kahoy aron ibayad sa iyang matrikula. Ang uban, sa pagkasayud sa iyang kalampusan isip tigpamutol sa kahoy, mipatrabaho kaniya sa pagputol og kahoy alang kanila. Siya sa wala madugay nakakita nga siya wala nay panahon sa pagtambong sa kolehiyo, ug nakontento na siya sa iyang kalampusan isip tigpamutol sa kahoy.

Kini nagpakita sa kahimtang diin nabatunan sa kadaghanan kanato. Mianhi kita sa yuta alang sa piho nga katuyoan––kana mao ang pagbuhat sa atong kaluwasan, o sa lain nga pagkasulti, sa pagandam alang sa kinabuhi nga moabut, nga walay katapusan. Pipila kanato ingon og nakalimot sa katuyoan nga atong nakita, ug nahimo nga kontento sa atong pagpangita alang sa bahandi ug kadungganan nga moabut sa kinabuhi, sa lain nga pagkasulti, nakontento lamang sa “pagpamutol sa kahoy.”⁵

Hinaut unta nga kita kinsa adunay pagpamatuod [ni Jesus] … gikan sa atong mga kasingkasing mangamuyo ngadto sa atong Amahan: “Ginoo, unsay gusto nimo nga akong buhaton?” [Mga Buhat 9:6.]

Ug kon mag-ampo kita sa kinasingkasing ug hugot nga pagtuo, adunay mobalik ngari kanato gikan sa mga kasulatan nga tubag niana nga mainampoong pangutana. Ang tubag sagad nga gibalik-balik, sa usa ug sa laing higayon gibalik-balik, nga ang tanan nga atong buhaton kinahanglan nga buhaton “uban sa usa ka bug-os nga tinguha ngadto sa himaya sa Dios.” [D&P 82:19.] Unsa ang himaya sa Dios? Ang Ginoo misulti kang Moises nga:

“… mao kini ang akong buhat ug ang akong himaya––ang pagpahinabo sa pagka-imortal ug sa kinabuhing dayon sa tawo.” (Perlas nga Labing Bililhon, Moises 1:39.)

Uban niana nga tumong nga kanunay atong giatubang, nagtanaw sa matag binuhatan sa atong mga kinabuhi, ang matag desisyon nga atong gihimo ingon og gihulma paingon sa kalamboan sa atong kinabuhi nga magtugot kanato nga mosulod ngadto sa atubangan sa Ginoo nga atong Langitnong Amahan, aron makab-ut ang pagbaton sa kinabuhing dayon, unsa pa ka daghan nga kaalam ang maanaa diha sa daghang mga butang sa kinabuhi.⁶

Gikan sa mga kasulatan, gikan sa mga sinulat sa dinasig nga mga lider sa Simbahan, ug gikan sa kalibutanon nga mga komentaryo, ang kinabuhing dayon mahimo nga ipasabut isip kinabuhi diha sa atubangan niadtong mga mahangturon nga mga Binuhat, ang Dios nga Amahan ug ang Iyang Anak nga si Jesukristo. Sa pagmubo niana nga pagpasabut, tingali niana kita moingon nga ang kinabuhing dayon, mao ang kinabuhi sa Dios. …

Aron sa kaulahian makabaton niining celestial nga kahamili kinahanglan mao gayud ang walay katapusan nga pagpaningkamot sa tanang mortal nga mga nilalang.⁷

Andam ba kita nga mobarug sa atubangan sa hukmanan sa Dios?

Ang matag usa kaninyo … kinahanglan gayud nga mobarug sa atubangan sa “hukmanan sa usa nga Balaan sa Israel … ug dayon kinahanglan gayud … nga pagahukman sumala sa balaan nga paghukom sa Dios.” (II Nephi 9:15.) Ug sumala sa panan-awon ni Juan, “Mga basahon gipamuklad: usab dihay laing basahon nga gibuklad, nga mao ang basahon sa kinabuhi: ug ang mga patay gipanaghukman pinasikad sa nahisulat diha sa mga basahon, sumala sa ilang mga binuhatan.” (Pin. 20:12.) Ang “mga basahon” nga gisulti nagpasabut ngadto sa “mga talaan [sa inyong mga binuhatan] nga gihuptan ibabaw sa yuta. … Ang basahon sa kinabuhi mao ang talaan nga gihuptan didto sa langit.” (Doktrina ug mga Pakigsaad 128:7.) Kadtong kinsa kaninyo nagpuyo og matarung nga kinabuhi ug namatay nga wala mahimong ulipon sa sala, o kinsa tinuod nga naghinulsol sa inyong mga sala, mosulod ngadto sa “kapahulayan sa Ginoo,” diin nga kapahulayan “mao ang kahingpitan sa himaya sa Ginoo.” [Tan-awa sa D&P 84:24.]⁸

Gisultihan kita gikan sa dinasig nga mga sinulat nga “ang atong mga pulong mohukom kanato (o mohimaya kanato), ang atong mga binuhatan mohukom (o mobayaw kanato) … [tan-awa sa Alma 12:14], samtang gidala kita nga makig-atubang uban sa Halangdon nga Maghuhukom kanatong tanan, malaumon sa pagdawat sa mga pagdayeg sa Magtutudlo: “Maayong pagkabuhat, maayo ug kasaligan nga ulipon.” [Mateo 25:21.] Sukwahi sa kasagaran nga panghunahuna sa mga nagtuon sa relihiyon, nga si Apostol Pedro mao ang tigbantay sa ganghaan sa kinabuhi lapas dinhi, kita gisultihan nga “ang magbantay sa ganghaan mao ang Usa nga Balaan sa Israel; ug wala siya mogamit og sulugoon didto.” (II Nephi 9:41.)⁹

Ang labing dako nga impyerno nga maantus sa usa ka tawo mao ang pagkasunog sa iyang konsyensya. Ang kasulatan miingon nga ang iyang mga hunahuna mao ang mopanghimaraut kaniya, makabaton siya og tin-aw nga panumduman sa tibuok niyang kinabuhi (tan-awa sa Alma 12:14; 11:43). Inyong mahinumduman nga diha sa mga kasulatan nagsulti kini kabahin sa basahon sa Kordero sa kinabuhi, nga usa ka talaan sa kinabuhi sa tawo diin gitipigan didto sa langit. … Ang mga tawo pagahukman sumala sa mga talaan nga gitipigan kabahin sa atong mga kinabuhi. (Tan-awa sa D&P 128:6–70.) Karon, kon mapakyas kita nianang labing taas nga ang-ang sa himaya ug makaamgo unsa ang nawala kanato, adunay pagkasunog sa konsyensya nga mahimong mas grabe kay sa bisan unsa nga pisikal nga matang sa kalayo nga akong gituhoan nga maantos sa usa ka tawo.¹⁰

Kon kita moagi sa ganghaan sa kamatayon … Moingon Siya kanato, “Karon inyong gidala diha sa inyong mga kaugalingon ang akong ngalan. Unsa ang inyong nabuhat sa akong ngalan? Nakahimo ba kamo sukad og pakaulaw sa pangalan ni Ginoong Jesukristo, isip usa ka miyembro sa akong Simbahan?” Hunahunaa ang pagmug-ot, hunahunaa ang Iyang paglingo-lingo sa Iyang ulo ug motalikod ug mopalayo. … Apan hunahunaa kon kita mosugat Kaniya nga usa ka pahiyom mosanag sa Iyang nawong. Iyang itunol ang nagpangamay Niya nga mga bukton ngari kanato, ug moingon kanato, “Akong anak nga lalaki, akong anak nga babaye, kamo nagmatinud-anon sa yuta. Gibantayan ninyo ang pagtuo. Nahuman ninyo ang inyong trabaho. Karon aduna nay usa ka purong-purong nga gitagana alang sa ingon nga sama kaninyo sa akong gingharian.” [Tan-awa sa 2 Timoteo 4:7–8.] Ako walay mahunahunaan bisan unsa nga pagbayaw sa tibuok kalibutan nga molabaw nianang matang sa pagdawat ngadto sa atubangan sa Labing Makagagahum, nianang umaabut nga kalibutan.¹¹

Sa unsa nga paagi kita mangandam aron sa pagsugat sa Ginoo?

Ang Ginoo mitugot kanato og pipila ka dugang pa nga mga adlaw o pipila ka dugang pa nga mga semana o pipila ka dugang pa nga mga tuig samtang nagpadayon ang panahon––dili kini magsapayan unsa kadugay––tungod kay sa pag-ihap sa Labing Makagagahum, ang matag adlaw sa pagpangandam bililhon. Usa ka propeta misulti niini, “Kini nga kinabuhi mao ang panahon alang sa tawo sa pagpangandam sa pagsugat sa Dios; oo, tan-awa ang adlaw niini nga kinabuhi mao ang adlaw sa mga tawo sa paghimo sa ilang mga buluhaton. … Kay tan-awa kon kamo maglangay sa adlaw sa inyong paghinulsol gani hangtud sa kamatayon, … ang yawa … mopatik kaninyo nga iya.” (Alma 34:32, 35.)¹²

Kinahanglan atong hinumduman nga wala kini makahimo og dakong kalainan bisan kon bata pa kita nga mamatay o diha sa kahingkod, ang tanang importante nga butang dili kon kanus-a kita mamatay, apan unsa kita ka andam kon kita mamatay. Kini mao ang adlaw sa pagpangandam alang sa mga tawo nga mangandam sa pagsugat sa ilang Dios. Unsa Siya ka halangdon ug ka maloloy-on sa pagtugot kanato og usa ka tagal sa pagsulay diin nga panahon ang tawo kinahanglan nga maghingpit sa iyang kaugalingon.¹³

Karon mao ang adlaw alang kanato sa pagsugod sa pagsiksik sa atong mga kalag. Nahibaloan na ba ninyo hain ang labing importante sa tanang mga sugo diha kaninyo karon?… Magsugod na ba kamo sa paghimo niini karon? O maghulat ba kamo hangtud nga ulahi na kaayo kini? Ang gamay’ng bata nga lalaki nag-ingon, “Aw, kon modako na ako, niana ako mobuhat sa mao ug sa uban pa.” Ug unsa kana? Sa dihang dako na siya nga batang lalaki, … dayon moingon siya, “Kon maminyo na ako, niana ako mobuhat sa mao ug sa uban pa.” Ug dayon human siya maminyo, kining tanan mausab, ug “Aw, kon moundang na ako og trabaho.” Ug dayon human siya miundang sa trabaho, usa ka mabugnaw nga hangin ang mihuros diha kaniya ug sa kalit nakaamgo siya nga ulahi na kaayo nga nawala na kaniya ang tanan. Ug ulahi na kaayo kini. Ug gani sa tibuok niyang kinabuhi diha kaniya ang tanang kahigayunan nga anaa. Wala lamang siya mopahimulos niini. Karon, karong adlawa, mao kini ang adlaw alang kanato sa pagsugod sa pagbuhat sa usa ka butang mahitungod niini, sa dili pa ulahi ang tanan.¹⁴

[Napahinumduman ako] sa usa ka sugilanon nga gisaysay ngari kanako didto sa mga Isla sa Hawaii sa miaging ting-init mahitungod sa usa ka gamay’ng bata nga babaye kinsa midala sa iyang higala ngadto sa iyang panimalay. Nagdula sila sa palibut ug ang tigulang nga apohan nga babaye diha sa panimalay migahin og daghan sa iyang panahon samtang didto sila sa pagbasa sa Biblia. Sa matag higayon nga kining gamay’ng batang babaye moanha, ang apohan nga babaye nagbasa og Biblia, ug sa katapusan siya miingon, ngadto sa gamay’ng apo nga babaye, “Ngano nga ang imong lola naggahin og daghan kaayo nga higayon sa pagbasa og Biblia?” Ug ang gamay’ng apo nga babaye mitubag, “O, si Lola nagdali-dali og pagtuon alang sa panapos nga eksamin.”

Hinoon, dili kaayo siya sayop. Ug sa akong hunahuna mahimo kining maayo kon kitang tanan magmabinantayon pa og gamay sa ka importante sa pagdali-dali og pagtuon alang sa panapos nga eksamin.¹⁵

Unsa ka dugay kamo naglangay sa adlaw sa inyong paghinulsol gikan sa inyong kaugalingon nga mga kasaypanan? Ang paghukom nga atong atubangon pagahimoon sa atubangan sa Matarung nga Maghuhukom kinsa motan-aw sa atong mga kasarang ug sa atong mga kinutuban, sa atong mga kahigayunan ug sa atong mga kakulangan. Ang usa ka tawo kinsa nakasala ug naghinulsol ug human niana nagpuno sa iyang kinabuhi uban sa mapuslanon nga paningkamot mahimong dili kaayo mawad-an og ingon ka daghan nianang adlaw sa matarung nga paghukom kay sa usa ka tawo kinsa, bisan og wala makabuhat og seryuso nga sala, makalolooy nga napakyas pinaagi sa wala pagbuhat diin siya adunay kasarang ug kahigayunan sa paghimo apan wala maghimo.¹⁶

Samtang naglingkod kita dinhi karon, namalandong sa atong mga kinabuhi, pananglit adunay usa ka butang nga mahitabo sa atong pagbiya niini nga kongregasyon, ug ang atong mga kinabuhi mahunong sa panaw niini. Aduna bay wala mahuman nga buluhaton nga inyo pa unta nga buhaton sa wala pa moabut kana nga panahon diha kaninyo? … Kamo aduna bay pipila ka mga kasaypanan nga kinahanglan tarungon sa wala pa moabut kana nga panahon? Kamo aduna bay bisan kinsa nga mga kapamilya sa pikas bahin nga naghulat kaninyo nga mapasigarbuhon kamo sa pagsugat kon inyong buhaton ang pihong wala mahuman nga mga butang nga kinahanglan inyong buhaton karong adlawa? Andam ba kamo nga makigkita sa mga kapamilya didto, nga nakahimo sa tanan kutob sa inyong mahimo alang sa kalipay sa ilang umaabut nga mga kalagmitan? Kamo aduna bay mga sala nga kinahanglan nga pagahinulsulan sa dili pa kamo mopauli ngadto Kaniya kinsa mihatag kaninyo sa kinabuhi?¹⁷

Dinhi ug karon sa pagka-mortal, matag usa kanato adunay kahigayunan sa pagpili sa matang sa mga balaod nga atong gipili sa pagsunod. Kita karon nagpuyo ug nagsunod sa celestial nga mga balaod nga makahimo kanato nga mga kandidato alang sa celestial nga himaya, o nagsunod kita sa terrestrial nga mga balaod nga makahimo kanato nga mga kandidato alang sa … terrestrial nga himaya, o sa telestial nga balaod. Ang dapit nga atong puy-an didto sa mahangturon nga mga kalibutan matino pinaagi sa pagkamasulundon nga atong gihatag ngadto sa mga balaod niining nagkalain-lain nga mga gingharian sulod sa panahon nga kita ania sa pagka-mortal dinhi sa yuta.¹⁸

Sa unsa nga paagi kamo nangandam sa pagsugat sa Ginoo? … Ang Ginoo miingon, “Busa, ibalaan ang inyong mga kaugalingon aron ang inyong mga hunahuna mahimo nga ipahinungod ngadto sa Dios, ug ang mga adlaw moabut nga kamo makakita kaniya; … ug kini diha sa iyang kaugalingon nga higayon, ug sa iyang kaugalingon nga paagi, ug sumala sa iyang kaugalingon nga kabubut-on.” (D&P 88:68.) Ania ang sundanan nga iyang gihatag kanato sa usa ka pagpadayag …, “Kini mahinabo nga ang matag kalag kinsa mobiya sa iyang mga sala ug moduol ngari kanako, ug motawag sa akong ngalan, ug mosunod sa akong tingog, ug mohupot sa akong mga sugo, makakita sa akong panagway ug masayud nga ako mao.” [D&P 93:1.]¹⁹

Unsa ang ganti alang sa usa ka tawo kinsa magpuyo nga “takus sa usa ka pagpamatuod nga ang Dios buhi ug nga si Jesus mao ang Kristo”?

Ang langit, ingon nga sa kasagaran natong pagtuo niini, mao ang pinuy-anan nga dapit sa matarung, human sila mobiya niining yutan-on nga kinabuhi, ug ang dapit diin ang Dios ug si Kristo nagpuyo. Kabahin niining malipayon nga kahimtang ang Apostol nga si Pablo miingon, “Ang wala makita sa mata, ni madungog sa dalunggan, ni mosantup sa kasingkasing sa tawo, ang gikatagana sa Dios alang kanila nga nahigugma kaniya” (1 Mga Taga-Corinto 2:9).²⁰

Ang kalampusan lain-lain nga mga butang sa lain-lain nga mga tawo, apan alang sa matag anak sa Dios kini sa katapusan mao ang pagpanunod sa iyang presensya ug didto mahimo nga haruhay uban kaniya.²¹

Adunay usa lamang nga katuyoan nga may kalabutan sa trabaho sa atong Amahan, ug mao nga sa katapusan kon kita makahuman na sa atong trabaho dinhi sa yuta, bisan kon nahuman sa mubo nga gintang sa panahon o sa dugay, kita usab makabuntog sa kalibutan ug makaangkon sa katungod ngadto niana nga dapit nga gitawag og Celestial nga Gingharian.²²

Ang usa ka tawo kinsa nagpakabuhi … nga takus sa pagpamatuod nga ang Dios buhi ug nga si Jesus mao ang Kristo, ug kinsa andam nga moduol ngadto Kaniya sa makanunayon nga pagpangutana aron masayud kon ang iyang dalan gitugutan ba, mao ang tawo kinsa nagpuyo sa kinabuhi nga hingpit sa kabuhong niini dinhi ug nangandam alang sa celestial nga kalibutan, diin mao ang pagpuyo sa hangtud uban sa iyang Langitnong Amahan.²³

Mahimo ba nga pahinumduman ko kamo sa pagpamalandong sa katingalahan nga saad sa Ginoo ngadto sa tanan kinsa mga matinud-anon:

“Ug kon ang inyong katuyoan usa ngadto sa akong himaya, ang inyong tibuok kalawasan mapuno sa kahayag ug walay kangitngit diha kaninyo ug kana nga lawas nga napuno sa kahayag makasabut sa tanan nga mga butang.” (D&P 88:67.)

Nga ang matag usa kinsa nagtinguha sa ingon unta makugihon nga makaangkon alang sa iyang kaugalingon nianang dili matarug nga pagpamatuod diin makanunayon nga mobutang sa iyang mga tiil nga lig-on diha sa agianan nga nagpaingon sa tinuod ngadto sa mahimayaong tumong sa pagka-imortal ug kinabuhing dayon mao ang akong mapainubsanon nga pag-ampo.²⁴

Mga Sugyot alang sa Pagtuon ug Panaghisgutan

Sa unsa nga paagi kita usahay sama sa batan-ong lalaki kinsa namutol sa kahoy?
Unsa ang makatabang kanato nga kanunay mopunting sa matag adlaw sa tumong nga luwas nga makapauli ngadto sa atong Amahan sa Langit?
Sa unsa nga mga paagi kamo karon nagpili sa dapit nga inyong puy-an didto sa mahangturon nga mga kalibutan? Unsa ang mga sangputanan sa paglangay-langay sa inyong pagpangandam aron makabarug sa atubangan sa hukmanan sa Dios?
Unsa ang atong mabuhat sa usa pa ka adlaw nga gihatag sa Dios?
Unsay ipasabut niini nga magpuyo uban sa katuyoan nga usa ngadto sa himaya sa Dios? (Tan-awa sa D&P 88:67–68.)
Unsa ang kahulugan niini diha kaninyo ang pagdala diha sa inyong kaugalingon sa pangalan ni Ginoong Jesukristo? Unsa ang atong mabuhat aron sa pagpasidungog sa Iyang ngalan?
Sa inyong pagtuon sa mga pagtulun-an ni Presidente Harold B. Lee unsa ang inyong nakat-unan mahitungod sa paagi sa pagpauli nga luwas ngadto sa Dios?

Si Presidente Harold B. Lee nagtudlo nga ang atong mga paningkamot dinhi sa pagka-mortal kinahanglan nga ipunting sa “pagpuyo og kinabuhi sa hingpit nga kabuhong niini dinhi ug … sa pagpangandam alang sa celestial nga kalibutan.”