Kapitulo 11

Walay Sama Ka Bililhon nga mga Katigayunan sa Balaan nga Templo

Sa unsa nga paagi kita mas makaandam og maayo sa atong mga kaugalingon sa pagdawat og mga panalangin sa templo ug makahatag niini ngadto sa uban?

Pasiuna

Niadtong Marso 1956, sa pagpahinungod sa Templo sa Los Angeles California, si Presidente Harold B. Lee mibalik sa istorya sa usa ka amahan mahitungod sa iyang anak nga lalaki kinsa gihatagan og trabaho sa pagpalupad og eroplano sa makuyaw nga mga misyon atol sa gubat.

“[Ang] amahan miingon ngadto kaniya, ‘Anak, giunsa nimo sa pagbalik nga wala maunsa ngadto sa imong balay paulian…?’ Ang batang lalaki miingon, ‘Ay, sayon kana, Pa, mipalupad lamang ako sunod sa signal.’ Apan ang amahan mipadayon sa pangutana pinaagi sa pagpangutana, ‘Pananglit nawad-an ka sa signal ug adunay nasayop nianang kagamitan sa radyo diin ang tigpalupad makadumdom sa paglupad sa iyang agianan.’ ‘Ay,’ siya miingon, ‘Gamiton ko ang akong kompas.’ ‘Bahin niana, pananglit usa ka pagpusil miguba sa kompas; nan unsa man?

“Ang batang lalaki [namalandong] nga mahunahunaon ug dayon siya miingon, ‘Pa, mosugod ako sa pagpalupad sa akong eroplano nga mas taas ug mas taas pa ibabaw sa aso ug sa gabon ug sa abug sa yuta hangtud ako makaabut sa taas diin makita nako ang mga bitoon, ug kon ako makalupad na niana nga gitas-on, mapahan nako ang akong agianan pinaagi sa mga bitoon. Kana dili gayud mapakyas ug ako makabalik kanunay sa akong agianan balik sa panimalay.’”

Si Presidente Lee mipadayon: “Ubos dinhi sa yuta gawas sa Iyang sagradong presensya adunay mga butang nga mapalit sa salapi, adunay mga butang nga atong gitawag og dungog sa mga katawhan ug ang mga butang nga atong gipaningkamutan ug ingon nga gihunahuna nga labing importante. Apan [ang templo] mao ang asa kita mosaka taas ibabaw sa aso ug gabon niining yutan-ong mga butang ug nagkat-on kita sa pagbasa pinaagi sa mga mahangturong mga bitoon sa Dios og dalan nga mogiya kanato nga wala maunsa balik sa panimalay.”¹

Mga Pagtulun-an ni Harold B. Lee.

Unsa nga mga Panalangin ang atong madawat diha sa panimalay sa Dios?

Kita moanhi [sa templo], sa akong paghunahuna niini, aron sa pagdawat sa kahingpitan sa mga panalangin sa Priesthood. …

Kita moanhi dinhi niining Balaan nga Balay aron sa pagkat-on, sa pag-ila sa Dios ingon nga siya mao, ug unsaon gayud sa matag usa kanato, alang sa atong mga kaugalingon, makahimo sa pagbaton og kahimayaan diha sa iyang atubangan. …

Dinhi niini kita magsugod sa pagpahiluna sa tukurang mga bato sa usa ka mahangturong langitnon nga panimalay, tungod kay dinhi niini nga Simbahan mao ang gahum sa pagbugkos dinhi sa yuta nga ang sama mahimo unta nga pagabugkuson didto sa Langit.²

Sa usa ka paagi kita kinahanglan gayud nga mopaabut sa kamatuoran ngadto sa tanan natong mga katawhan, batan-on ug tigulang, nga sa atong balaan nga mga templo ang pagtuga sa templo mao ang sigurado nga giya sa kalipay dinhi ug kinabuhing dayon sa kalibutan nga umaabut.³

Kon kamo mosulod og usa ka balaan nga templo, kamo pinaagi niana nga dalan nag-angkon og pagpakigdait uban sa mga Santos diha sa mahangturong gingharian, diin ang takna dili na mahunahuna. Sa mga templo sa inyong Dios kamo gitugahan dili sa usa ka naghingaping kabilin sa kalibutanong bahandi, apan uban sa usa ka katigayunan sa mahangturong bahandi nga dili kahatagan og bili.

Ang mga tulumanon sa templo gidesinyo sa usa ka maalamon nga Langitnong Amahan kinsa mipadayag niini ngari kanato niining ulahing mga adlaw isip usa ka giya ug usa ka panalipod sa tibuok nato nga kinabuhi, nga kamo ug ako unta dili mapakyas sa pag-angkon og kahimayaan didto sa celestial nga gingharian, diin ang Dios ug si Kristo nagpuyo.

Hinaut unta nga kamo maningkamot nga makugihon ug magihayan sa pag-andam sa inyong mga kaugalingon sa pag-angkon niining dili mapalit nga mga katigayunan diha sa balay sa Ginoo.⁴

Kita adunay duha ka matang sa pagpadayag: Adunay mga pagpadayag nga atong maingon nga mga pagpadayag nga ipahibalo sa tanan, sama niadtong nasulat diha sa Doktrina ug mga Pakigsaad ug sa laing dapit, nga mahimong ihatag ngadto sa kalibutan. Ug dayon kita adunay unsay atong gitawag og tinakpan nga mga pagpadayag. Kini ipahibalo ug ihatag lamang diha sa sagradong mga dapit diin giandam alang sa pagpadayag sa labing taas nga mga ordinansa nga ila sa Aaronic ug sa Melchizedik nga mga Priesthood, ug kadto nga mga ordinansa anaa sa balay sa Ginoo.⁵

Ingon ka sayo sa 1841, ang Ginoo mipadayag ngadto ni Joseph Smith nga “walay dapit diha sa yuta nga siya makaadto ug ipahiuli pagbalik kadtong nawala nganha kaninyo, o nga iyang gikuha, bisan ang kahingpitan sa priesthood. …

“Kay Ako mopahiangay sa pagpadayag ngadto sa mga butang sa akong simbahan nga gitago gikan sa wala pa ang katukuran sa kalibutan, mga butang nga mahitungod ngadto sa kapaigoan sa kahingpitan sa mga panahon.” (D&P 124:28, 41.)

Kini nga mga pagpadayag, nga mga gitagana ug gitudlo lamang ngadto sa matinud-anon nga mga miyembro sa Simbahan diha sa sagrado nga templo, naghimo sa unsay gitawag og mga “misteryo sa Pagkadiosnon.” Ang Ginoo miingon nga Siya naghatag ngadto ni Joseph “sa mga yawe sa mga misteryo, ug sa mga pagpadayag diin mga sinilyohan. …” (D&P 28:7.) Isip usa ka ganti ngadto sa matinud-anon, ang Ginoo misaad: “Ug ngadto kanila Ako magpadayag sa tanan nga mga misteryo, oo, tanan nga tinago nga mga misteryo sa akong gingharian gikan sa dugay nang panahon. …” (D&P 76:7.)

Diha sa mga sinulat ni Propeta Joseph Smith adunay makit-an nga pagpasabut kalabut niining gitawag og mga misteryo nga gilangkub sa unsay gisulti sa Propeta nga balaang pagtuga. Misulti siya og bahin:

“Migahin ako sa adlaw didto sa ibabaw nga bahin sa tindahan, buot ipasabut didto sa akong pribadong opisina … nakigtambagay [dayon ginganlan niya ang daghan sa unang mga lider], nagtudlo kanila sa mga baruganan ug han-ay sa Priesthood, kalabut sa mga paghugas, mga pagdihog, mga pagtuga ug sa mga paagi sa mga yawe kalabut sa Aaronic Priesthood, ug padayon ngadto sa labing taas nga han-ay sa Melchizedek Priesthood, nagpahimutang sa han-ay kalabut sa Karaang mga Adlaw, ug tanan niadtong mga plano ug mga baruganan diin bisan kinsa nakahimo sa pagkuha sa kahingpitan niadtong mga panalangin nga giandam alang sa Simbahan sa Unang Natawo, ug miabut ug mipuyo diha sa atubangan ni Elohim diha sa mahangturong mga kalibutan.” (The Teachings of the Prophet Joseph Smith, p. 237.)

Si Presidente Brigham Young, diha sa pagpahimutang sa tukurang bato alang sa Templo sa Salt Lake, midugang niining dugang nga katin-awan kalabut sa kahulugan sa pagtuga ug sa katuyoan sa pagtukod sa templo kalabut niana:

“… Ang inyong pagtuga mao, ang pagdawat sa tanan niadtong mga ordinansa diha sa balay sa Ginoo, nga inyong gikinahanglan, human kamo mobiya niini nga kinabuhi, aron kamo makabalik ngadto sa presensya sa Amahan, moagi sa mga anghel kinsa nagbarug isip mga gwardya …ug makaangkon sa inyong mahangturong kahimayaan bisan pa sa yuta ug sa impyerno.” [Discourses of Brigham Young, sel. John A. Widtsoe (1954), 416]⁶.

Sa unsa nga paagi kita makaalagad isip “mga manluluwas sa Bukid sa Zion” alang niadtong kinsa nangamatay.

Kon ang pagdawat sa ebanghelyo importante kaayo ngadto sa kaayohan sa mahangturong kalag sa tawo kamo makahimo sa pagpangutana unsa ang mahitabo sa mga minilyon kinsa nangamatay nga walay kahibalo sa ebanghelyo o sa plano sa Ginoo, diin ang hingpit nga epekto sa iyang pag-ula mahimo nga matuman. Kon ang misyonaryo nga buhat pagahimoon nga gilimitahan diha lamang sa mga buhi, daghan nga mga kalag mahimo nga pagahukman nga walay usa ka paghusay. Matag usa, buotan o dautan tungod sa pag-ula, mabanhaw, tungod “Kay maingon nga diha kang Adan ang tanan nangamatay, maingon man usab diha ni Kristo ang tanan mangabuhi.” (1 Cor. 15:22.) Apan kadto lamang kinsa maghinulsol ug magpabunyag alang sa kapasayloan sa ilang mga sala ang hingpit nga makaangkon sa matubsanong dugo sa iyang pag-ula. … Ang pagbunyag pinaagi sa pagpaunlod alang sa kapasayloan sa mga sala, ang mao lamang nga paagi diin ang tawo makadawat sa ebanghelyo, usa ka yutan-on nga ordinansa, ug busa diha sa plano sa Kaluwasan, ang atong Amahan, uban sa sama nga pagtagad alang sa tanan niyang mga anak, naghatag og paagi alang sa tanang mga miyembro sa iyang Simbahan ug Gingharian sa yuta nga mahimo nga mga “manluluwas diha sa Bukid sa Zion” pinaagi sa paghimo og usa ka buhat nga pagpuli alang niadtong anaa sa kalibutan sa mga espiritu, “ang balay bilanggoanan,” nga dili nila mahimo sa ilang mga kaugalingon.

Kini nga buhat alang sa patay nga gihimo diha sa balaan nga mga templo pinaagi sa mga miyembro sa Simbahan sa pagkatinuod naghimo kanila kinsa naghimo niini nga buhat nga mga “manluluwas” niadtong kinsa namatay nga walay kahibalo sa ebanghelyo, tungod kay pinaagi niana sila makahimo sa pag-angkon sa hingpit nga gasa sa Manluluwas nga gisaad ngadto sa tanang katawhan pinaagi sa iyang pag-ula. Ang kapakisayran niana nga serbisyo nga mahimong buhaton alang niadto nga anaa sa kalibutan sa espiritu, ingon nga kini sa walay pagduha-duha gihimo pinaagi sa mga santos sa mga panahon ni Apostol Pablo ug diin kita karon makahimo alang sa atong kaugalingon nga patay, Iya nga gihatag isip usa ka kapasikaran nga kamatuoran sa pagkabanhaw. Miingon siya: “Kon dili pa, unsa man lamay ipasabut sa mga tawo sa ilang pagpabunyag alang sa mga patay, kon ang mga patay dili man ugaling banhawon?” (1 Mga Taga-Corinto 15:29.) Mga templo niini nga mga panahon gitukod diin kini nga mga buhat nga importante kaayo sa buhat sa kaluwasan mahimo nga himoon pag-usab.⁷

[Ang Ginoo] miingon nga ang mga ganghaan sa impyerno kinahanglang dili makabuntog batok sa Simbahan ni Kristo (Mateo 16:18). Karon ang mga ganghaan sa impyerno makabuntog unta batok sa buhat sa Ginoo kon wala pa mahatag ang ordinansa kalabut sa kaluwasan niadtong kinsa nangamatay. Atol niini nga mga panahon sa dihang ang priesthood nga mohimo sa makaluwas nga mga ordinansa sa ebanghelyo wala sa yuta, dihay mga milyon kinsa mga buhi, kadaghanan kinsa mga matinud-anon nga mga kalag. Kon wala pa untay paagi diin ang makaluwas nga mga ordinansa sa ebanghelyo mahimong himoon alang niadto kinsa namatay nga walay kahibalo sa ebanghelyo, ang mga ganghaan sa impyerno makabuntog unta batok sa plano sa kaluwasan sa atong Amahan.⁸

[Sa atong pagsiksik sa kaliwatan] ang Ginoo dili moabli bisan unsa nga pultahan hangtud kita moabut kutob sa gilay-on nga atong maabut sa atong kaugalingon. Kinahanglan kita nga moadto padulong niana nga walay makaplagan nga kasayuran ug dayon magbaton sa igo nga hugot nga pagtuo sa pagpangayo sa Ginoo sa pagtabang og himo sa agianan aron kita makahimo sa sunod nga lakang. Ug maanaa ang impormasyon nga mahatag nganha kaninyo gikan sa mga tinubdan nga nagpadayag sa kamatuoran nga ang langit ug yuta dili layo.

Daghan kaninyo nakapuyo og panahon sa kinabuhi diin kamo adunay mga minahal kinsa nag-una. Nakabaton kamo og kasigurohan sa pagkaduol, usahay, niadtong kinsa nahimong suod kaayo kaninyo. Ug usahay sila nagdala nganha kaninyo sa impormasyon nga kamo sa laing bahin dili makakuha.⁹

Ako adunay lig-on nga pagtuo dala sa usa ka gamay nga kasinatian diin ako magpamatuod nga adunay mga gahum lapas niini nga kinabuhi nga naglihok sulod kanato. …

Ako adunay yano nga hugot nga pagtuo nga kon inyong buhaton ang tanan nga inyong mahimo, nagsiksik hangtud sa katapusan sa inyong kahigayunan, ang Ginoo motabang kaninyo sa pag-abli og mga pultahan sa pagpadayon sa inyong mga kaliwatan, ug ang langit motabang, ako nakasiguro.¹⁰

Kon kita nagkahiusa sa atong buhat sa templo ug sa atong buhat sa pagsiksik sa atong kaliwatan, dili kita matagbaw sa mga templo nga karon lamang, apan kita adunay igo nga buhat alang sa mga templong umaabut pa, ngadto sa pag-abli sa mga pultahan sa kahigayunan ngadto niadtong nag-una kinsa atong kaugalingon nga kabanay, ug sa ingon maghimo sa atong mga kaugalingon nga mga manluluwas diha sa Bukid sa Zion. Ang atong kapakyasan nga magkahiusa mao ang atong mahimong kapakyasan sa pagpatunhay sa atong panimalay sa pamilya ngadto sa kahangturan.¹¹

Sa unsa nga paagi kita mas makaandam sa atong mga kaugalingon sa pag-apil sa mga panalangin sa templo?

Sa paghimo niining pagpuli nga buhat alang sa patay pinaagi kanato kinsa mga manluluwas diha sa Bukid sa Zion, ang Ginoo buot niini nga pagabuhaton kutob sa mahimo niadtong kinsa walay lama. Sama lamang nga siya buot sa sakripisyo sa hayop nga mga hayop nga walay lama, buot siya kanato nga moanhi dinhi nga putli ug limpyo ug takus sa paghimo sa buhat, ang pagpuli nga buhat, isip mga manluluwas sa Bukid sa Zion.

Ug busa among gitambagan ang atong mga bishop ug ang atong mga stake president sa paghimo og makuti nga pag-amping sa pag-andam sa ilang mga katawhan nga maandam sa pagdawat og rekomend ug sa dili pagtugot kanila sa pag-anhi dinhi kinsa wala makahinulsol sa ilang mga sala, kinsa nakahimo og mga kasaypanan, sa pag-anhi nga dili mahinulsulon, ug ang pagbuhat sa ingon maghugaw niining balaang balay. Nagtuo ako nga walay labaw ka impyerno dinhi sa yuta kay sa usa nga moanhi dinhi nganhi niining duol sa presensya sa atong Amahan uban ang pagbati sa sala ug kahugaw nga anaa gihapon niana nga tawo. Kini usa ka makalaglag ug makahugno nga kasinatian.¹²

Tingali ang labing sagrado nga dapit nga labing duol sa langit dinhi sa yuta mao ang atong templo, nga sa ingon ka duol moadto kita didto nga limpyo ug sa ingon ka duol nga ang atong mga bishops ug mga stake presidents naghimo og mabinantayon nga pagsusi sa tanan kinsa mangayo og rekomend sa pagtan-aw nga, kutob sa mahimo, nagpuyo sila sa gikauyonan nga mga sumbanan [aron sila dili moadto] didto uban sa bisan unsa nga kahugaw nga mohugaw sa espiritu nga gipanghinaut natong maanaa didto.

Hinumdumi kana karon. Hinumdumi kanang sagrado nga mga responsibilidad ug ang atong paglaum nga kita sa atong mga kaugalingon mahimong magsugod sa pagsiguro nga matag panahon kita moadto, kita moadto uban ang limpyo nga mga kamot ug uban ang putli nga mga kasingkasing ug ato kining itudlo ngadto sa uban. [Mga Salmo 24:3–4]¹³

Kita adunay daghan niadtong kinsa gustong moadto sa templo human dayon sila mabunyagi. Kini dugay na nga balaod … nga nag-ingon nga kini kinahanglan sa labing gamay usa ka tuig. … Ang katarungan nganong kita moingon sa labing gamay usa ka tuig mao ang paglaum nga ang mga bishops ug mga stake presidents mabinantayon nga mo-interbyu igo nga makasiguro nga sila anaa sa Simbahan igo sa gidugayon nga makabaton sila og kalig-on ug nga sila nakahibalo sa sukaranan nga mga doktrina sa Simbahan sa dili pa kita magpaabut kanila nga makasabut sa mas taas nga mga ordinansa, ang mga ordinansa sa templo. Busa ang mga pangutana alang niadtong moadto sa templo kinahanglan dili lamang alang sa katakus apan alang usab sa pagdawat sa mga ordinansa sa templo.¹⁴

Ang pagdawat sa tuga nagkinahanglan sa pagdawat sa mga obligasyon sa mga pakigsaad nga sa tinud-anay mao ang paghulagway o pagbutyag sa mga pakigsaad nga ang matag tawo kinahanglan nga nadawat unta diha sa pagbunyag, ingon nga gipasabut pinaagi ni propeta Alma ngadto sa sangputanan nga “kamo matinguhaon sa pag-ipon ngadto sa panon sa Dios, ug pagatawgon nga iyang mga katawhan, ug andam sa pagtambayayong sa usag usa nga mga alantuson, nga sila mahimong magaan; oo, sa paghupay niadto nga nagkinahanglan sa kahupayan, ug mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit nga kamo mahimo nga maana bisan hangtud sa kamatayon” (Mosiah 18:8–9). Bisan hain nga [katawhan] kinsa [mga] andam sa pagbuhat niadto nga mga obligasyon nga gipahayag ni Alma ug “kinsa magpaubos sa ilang mga kaugalingon sa atubangan sa Dios … ug moduol uban ang masulub-on nga mga kasingkasing ug mahinulsulon nga mga espiritu … ug andam sa pagdala diha kanila sa ngalan ni Jesukristo, nga adunay hugot nga tinguha sa pag-alagad kaniya ngadto sa katapusan” (D&P 20:37), walay kinahanglan nga magukon-ukon sa pag-adto sa balaan nga templo ug sa pagdawat, kalabut sa mga pakigsaad nga gihimo, mga saad sa dagkong panalangin pinasikad diha sa pagtuman niana.¹⁵

Unsaon man gayud nato pag-andam [sa pag-adto sa templo]? Usa ka tigkulit nagsulat diha sa mga ganghaan sa Templo sa Carlston Alberta niana nga pagkumpisal ug panghunahuna ni kanhi Elder Orson F. Whitney nga kitang tanan kinahanglan maghunahuna. Misulat siya:

“Mga kasingkasing nga putli nga mosulod niini nga mga bongbong ang gikinahanglan,
Diin naghikyad og bangkite nga wala mahibaloi diha sa malipayon nga mga lawak-tigumanan.
Kaon nga walay bayad, walay bayad kay Dios ang naghatag
Ug tilawi ang balaang kalipay nga langit nagpasundayag.
Dinhi pagkat-on Kaniya kinsa gibuntog ang lubnganan,
Ug ngadto sa mga tawo gihatag ang mga yawe sa Gingharian;
Gihiusa dinhi sa mga gahum nga gibugkos sa karon ug sa nanglabay
Kahingpitan nakaplagan sa buhi ug sa patay.”

Si Presidente Joseph F. Smith nakakuha sa sekreto nianang kahingpitan sa dihang siya miingon: “Dili sayon alang sa mga tawo sa pagbiya sa ilang mga kahilayan, sa pagbuntog sa ilang gihunahuna nang daan nga mga ideya, ug sa pagtugyan sa ilang mga kaugalingong kasingkasing ug kalag ngadto sa kabubut-on sa Dios nga kanunay mas labaw kay sa ilang kaugalingon. … Kon ang mga lalaki ug mga babaye makaamgo nga sila nagkaunlod ngadto sa lawom nga tubig diin ang pagbarug walay kasiguroan, sila kinahanglan nga mosibug, kay sila makasiguro nga ang dalan nga kanunay nila nga giagian modala kanila og labaw ug mas layo gikan sa ilang mga dalan diin dili sayon sa paglakaw og balik. Ang relihiyon sa kasingkasing, ang wala mahaylo ug ang yano nga pakig-abin nga atong gihuptan uban sa Dios, mao ang labing dakong panagang alang sa mga Santos sa Ulahing mga Adlaw.” (Doktrina sa Ebanghelyo, p 9.)…

Nan, uban niana nga pagpalandong…, gibati nako nga ako buot nga mopamatuod nganha kaninyo pinaagi sa usa nako ka kasinatian. Upat ka mga semana lamang ang milabay sa mga oras sa sayong buntag ako dihay mahimayaon nga damgo. Diha niana nga damgo kini ingon og ako diha sa panag-uban sa akong mga kaigsoonan nga gitudloan pinaagi sa Presidente sa Simbahan, ug samtang dihay uban didto, kini ingon og ang tanan nga iyang gisulti alang lamang kanako. … Kana nga damgo mibalik ngari kanako karong adlawa— mibalik ngari kanako uban ang ka tataw nga dili mapugngan, kay kini mao ang mensahe: “Kon ikaw buot nga makakat-on sa paghigugma sa Dios, ikaw kinahanglan gayud nga makakat-on sa paghigugma sa Iyang mga anak ug sa paghigugma sa pagserbisyo sa Iyang mga anak. Walay tawo nga nahigugma sa Dios gawas kon siya nahigugma sa pagserbisyo ug gawas kon siya nahigugma sa mga anak sa atong Langitnong Amahan.”

Ug dayon kini ingon og human ang Presidente nagtudlo niana nga leksyon, nga mituhop og kusog diha sa akong hunahuna, siya miingon, “Mga kaigsoonan, mangluhod kita sa pag-ampo.” Ug ako nahigmata human siya nag-ampo, uban sa labing langitnong pagbati nga sa akong hunahuna ako nakabaton sukad, nahibulong kon ako makapadayon hangtud ako makakab-ut sa taas nga sumbanan sa gugma sa pagserbisyo ug sa gugma alang sa mga anak sa Ginoo nga [nahimong] mituhop [diha kanako] niana nga damgo.¹⁶

Salamat sa Dios alang sa mga pagpadayag pinaagi sa gahum sa Espiritu Santo, nga nagsaksi ngari sa akong kalag nga ako nasayud sa tibuok nakong kalag nga [ang Ginoo] buhi, nga Siya mao ang Manluluwas sa kalibutan. Ako nasayud nga [ang templo] usa ka balaan, sagrado nga dapit diin Siya makapahimutang sa Iyang ulo tungod sa pagkasagrado niana. Hinaut nga kamo kinsa moanhi dinhi moanhi uban ang gibalaan nga mga kasingkasing. uban sa mga mata ug mga hunahuna ug mga kasingkasing nga bug-os ngadto sa Dios aron bation ninyo ang Iyang presensya.¹⁷

Mga Sugyot alang sa Pagtuon

Sa unsa nga mga paagi ang templo nahimo nga “usa ka giya ug panalipod” nganha kaninyo?
Unsaon ninyo sa paghimo og kalainan sa kalibutanong mga bahandi ngadto sa kabuhong sa mahangturong katigayunan nga makuha didto sa templo?
Ngano nga importante nga kita moapil makadaghan kutob sa atong mahimo sa pag-ampo sa templo?
Unsa nga mga panalangin ang miabut kaninyo agi og sangputanan sa paghimo og buhat sa templo ug family history?
Ngano nga kinahanglan gayud nga kita moadto sa balay sa Ginoo uban ang limpyo nga mga kamot ug putli nga mga kasingkasing? Walay labut sa katakus, unsa ang uban nga mga paagi kita makaandam sa pagtambong sa templo?
Ngano nga ang pagkat-on sa paghigugma ug pagserbisyo sa uban importante nga pangandam alang sa pagtambong sa templo?

Samtang kita nag-andam sa pagtambong sa templo, kita kinahanglan nga mohinumdom sa kang Presidente Harold B. Lee nga tambag: “Hinaut nga kamo kinsa moanhi dinhi moanhi uban ang gibalaan nga mga kasingkasing. Uban sa mga mata ug mga hunahuna ug mga kasingkasing nga bug-os ngadto sa Dios aron bation ninyo ang Iyang presensya.”