Kapitulo 18

Pagsangkap diha sa Pamaagi sa Ginoo

Sa unsa nga paagi kita magiyahan ug mapanalanginan sa mga baruganan nga gipadayag sa Ginoo alang sa temporal nga kaayohan sa Iyang mga Santos?

Pasiuna

Samtang nagserbisyo isip presidente sa stake sa panahon sa Dakong Kalisud sa Ekonomiya sa mga 1930, si Harold B. Lee mitukod sa mga paningkamot diha sa iyang stake aron mahaw-as sa makalolooy nga mga kahimtang ang daghang mga miyembro. Iyang nahinumduman sa kaulahian: “Nakigbisog kami uban niining pangutana sa welfare. Dihay diyutay nga mga programa sa trabaho sa gobyerno; ang panalapi sa simbahan gamay. … Ug ania kami uban sa 4,800 sa among 7,300 nga mga tawo [diha sa stake] kinsa sa kinatibuk-an o sa gamay nga bahin nagsalig sa uban. Aduna lamang kami usa ka dapit nga kaadtoan, ug kana mao ang paggamit sa programa sa Ginoo ingon sa gihan-ay diha sa mga pagpadayag.”

Niadtong 1935, si Presidente Lee gitawag ngadto sa opisina sa Unang Kapangulohan ug gihangyo sa pagdumala sa usa ka paningkamot sa pagtabang niadtong nanginahanglan diha sa tibuok Simbahan, ginamit ang kasinatian nga iyang naangkon sa iyang stake. Si Presidente Lee misulti kabahin niini nga kasinatian:

“Nagsugod kini sa among mapainubsanon nga mga paningkamot nga ang Unang Kapangulohan, nasayud nga kami adunay pipila ka mga kasinatian, mitawag kanako usa ka buntag niana naghangyo kon makaadto ba ako sa ilang opisina. … Nanghinaut sila nga ako karon ang mangulo sa kalihokan sa welfare aron maminusan ang kahasol sa gobyerno, sa direkta nga hinabang ug makatabang aron ang Simbahan makaatiman sa kaugalingong mga miyembro nga nanginahanglan.

“Human nianang buntaga nagsakay ako sa akong sakyanan (ang tingpamulak bag-o pa lamang nga nagsugod) kutob sa ibabaw sa City Creek Canyon nga gitawag kaniadto og Rotary Park; ug didto, ako ra gayud sa akong kaugalingon, mihalad ako og usa sa labing mapainubsanon nga mga pag-ampo sa akong kinabuhi.

“Didto ako, usa lamang ka batan-on nga tawo sa akong edad nga mga traynta. Limitado ang akong kasinatian. Natawo ako sa gamay nga lungsod sa Idaho. Wala pa gani kaayo ako makagawas sa mga utlanan sa mga estado sa Utah ug Idaho. Ug karon ibutang ako sa katungdanan diin akong adtoon ang tanang mga miyembro sa Simbahan, sa tibuok kalibutan, mao ang usa sa labing bugat nga mga pagpamalandong nga akong mahanduraw. Unsaon nako sa pagbuhat niini uban sa akong limitado nga panabut?

“Samtang nagluhod ako, ang akong pangamuyo mao, ‘Unsa nga matang sa organisasyon ang akong tukuron aron matuman ang gipabuhat sa Kapangulohan?’ Ug dihay misantop kanako nianang mahimayaon nga buntag nga usa sa langitnong mga katumanan sa gahum sa priesthood sa Dios. Daw may usa ka butang nga nagsulti kanako, ‘Walay bag-ong organisasyon nga gikinahanglan aron sa pag-atiman sa mga panginahanglan niini nga katawhan. Ang tanan nga gikinahanglan mao ang pagpalihok sa priesthood sa Dios. Walay lain pa nga inyong gikinahanglan isip usa nga ikapuli.’

“Uban niana nga panabut, sukad niana, ug uban nianang yano nga paggamit sa gahum sa priesthood, ang programa sa welfare nagpadayon karon sa hilabihan ka kusog, mibuntog sa mga babag nga daw imposible, nga hangtud karon nagbarug kini isip usa ka monyumento sa gahum sa priesthood, kining mga butanga akong makita nga nanghitabo kaniadto nga maoy akong gibasihan.”¹

Mga Pagtulun-an ni Harold B. Lee

Unsa ang pundasyon nga mga baruganan alang sa welfare nga trabaho sa Simbahan?

Diha sa ika-104 nga Seksyon sa Doktrina ug mga Pakigsaad, … atong tataw nga gipasabut sa pipila ka mga pulong ang Programa sa Welfare ingon nga bisan unsang butang nga akong nasayran. Karon paminaw sa unsay gisulti sa Ginoo:

“Ako, ang Ginoo, mipakaylap sa mga kalangitan, ug mibuhat sa yuta, akong kaugalingon gayud nga binuhat; ug tanan nga mga butang nga anaa niini ako. Ug mao kini ang akong katuyoan sa paghatag sa akong mga santos.”

… Nadungog ba ninyo kon unsay gisulti sa Ginoo?

“Kini ang akong katuyoan sa paghatag sa akong mga santos, kay ang tanan nga mga butang ako. Apan kini kinahanglan pagahimoon sa akong kaugalingon nga pamaagi.” …

“Ug tan-awa kini ang pamaagi nga Ako, ang Ginoo, nagtakda sa paghatag sa akong mga santos.”

Karon, tan-awa ang kamahinungdanon niining usa ka pamahayag:

“Aron ang mga kabus ipataas, pinaagi niana ang mga adunahan ipaubos.”

Karon, mao kana ang plano. … Ang Ginoo mipadayon sa pagingon:

“Kay ang yuta puno ug adunay igo ug kapin pa; oo, Ako miandam sa tanan nga mga butang, ug mihatag ngadto sa mga anak sa tawo nga mahimo nga mga tinugyanan sa ilang mga kaugalingon. Busa, kon adunay tawo nga mokuha sa kabuhong diin Ako mibuhat, ug dili mohatag sa iyang bahin, sumala sa balaod sa akong ebanghelyo, ngadto sa mga kabus ug sa mga timawa, siya, uban sa mga dautan, mohangad sa iyang mga mata sa impyerno, nga anaa sa kasakit.” [D&P 104:14–18.]

… Karon unsay gipasabut niya niining hugpong sa mga pulong? Ang Iyang pamaagi mao, “aron ang mga kabus ipataas, pinaagi niana ang mga adunahan ipaubos.” …

“Ang ipataas,” sa pinulongan diha sa diksyonaryo, ug sa paghubad nga nakasiguro ako nga gipaningkamutan sa Ginoo sa paghatag nagpasabut: “Sa pagpataas nga may garbo ug hingpit nga kalipay ngadto sa kalampusan.” Ingon niana ang paagi sa atong pagpataas sa mga kabus, “nga may garbo ug hingpit nga kalipay ngadto sa kalampusan,” ug unsaon nato sa pagbuhat niini? Pinaagi sa paghimo nga ubos ang adunahan.

Karon, ayaw pagkasayop nianang pulong “adunahan.” Wala kana magpasabut sa kanunay og usa ka tawo nga daghan og kwarta. Kana nga tawo mahimo nga kabus sa kwarta, apan mahimo nga adunahan siya sa kahanas. Mahimo nga adunahan siya sa paghukom. Mahimo nga adunahan siya sa maayo nga ehemplo. Mahimo nga adunahan siya sa hilabihan nga pagkamalaumon, ug sa daghang lain nga mga kalidad nga gikinahanglan. Ug kon ang indibidwal nga mga miyembro sa korum sa Priesthood maghiusa sa ilang mga kaugalingon, sa kasagaran atong makita kadtong talagsaon nga mga hiyas nga gikinahanglan sa pagpataas sa mga timawa ug sa nagkalisud uban sa garbo ug hingpit nga kalipay ngadto sa kalampusan diha sa pagtuman. Walay laing labaw pa ka hingpit sa pagtrabaho sa plano sa Ginoo kay sa ingon niana.

Karon, timan-i kining dugang nga panghunahuna, nga ang Ginoo nagsulti kanato sa daghang mga higayon nga ang katuyoan sa tanan niya nga trabaho mao ang pagka-espirituhanon. Nahinumdom ba kamo unsa ang iyang gisulti sa ika-29 nga seksyon sa Doktrina ug mga Pakigsaad?

“Busa, sa pagkatinuod Ako moingon nganha kaninyo nga ang tanan nga mga butang ngari kanako mga espirituhanon, ug wala mahinabo sa bisan unsa nga panahon nga Ako mihatag nganha kaninyo og balaod nga temporal; ni bisan kinsa nga tawo, ni sa mga katawhan, ni kang Adan, nga inyong amahan, kinsa Ako milalang”. [Doktrina ug mga Pakigsaad] 29:34.

… Gitugutan ba ninyo nga ang tanan ninyong gibuhat gihimo uban ang bug-os nga tinguha ngadto sa himaya niana nga indibidwal, ang katapusang kalampusan sa iyang pagka-espirituhanon ibabaw sa iyang pisikal? Ang kinatibuk-an nga katuyoan sa Ginoo sa kinabuhi mao ang pagtabang kanato sa maayo ug pagtudlo kanato nga sa katapusan sa atong mga kinabuhi andam kita alang sa celestial nga kabilin. Dili ba mao kini? Makahatag ba kamo sa matag bukag sa pagkaon nga inyong ihatag, makahatag ba kamo sa matag serbisyo nga inyong gihimo uban nianang mahinungdanon nga katuyoan diha sa hunahuna? Mao ba kini ang paagi sa paghimo niini aron matabangan ang akong igsoon nga lalaki o ang akong igsoon nga babaye aron mas labaw nga maangkon ug mahuptan ang iyang celestial nga kabilin? Mao kana ang katuyoan nga gipahimutang sa Ginoo.²

Ang programa sa welfare adunay dakong kahulugan sa buluhaton sa Ginoo. Kinahanglan gayud nga kita moatiman sa [katawhan] materyal nga mga panginahanglan ug mopatilaw kanila sa matang sa kaluwasan nga kinahanglan nga dili sila mamatay sa dili pa nato mabayaw ang ilang panghunahuna ngadto sa usa ka mas taas nga kahimtang. Diha niana mao ang katuyoan sa programa sa welfare sa Ginoo nga Iyang gibutang diha sa Iyang Simbahan sa matag dispensasyon sukad pa gayud sa sinugdanan. Wala kini magsugod niadtong 1936. Nagsugod kini sa diha nga ang Ginoo nagsugod sa pag-atiman sa Iyang katawhan dinhi sa yuta.³

Kon ang usa ka panimalay mabungkag tungod sa mga panginahanglan sa pagkaon ug kapasilungan ug sinina ug sugnod,… ang unang butang nga kinahanglan atong buhaton mao ang pagtukod og pagbati sa kasigurohan, usa ka pagbati sa materyal nga kaayohan, sa dili pa kita makasugod sa pagbayaw sa pamilya ngadto sa ang-ang diin kita makasilsil kanila kalabut sa hugot nga pagtuo. Mao kana ang sinugdanan, apan gawas kon kita aduna niana nga katuyoan kabahin sa unsay atong gibuhat kalabut sa pagtukod sa hugot nga pagtuo, ang paghatag lamang sa materyal nga tabang mapakyas. Karon, kinahanglan gayud nga makasabut kita nga, kon mosulay lamang kita sa pagtukod sa hugot nga pagtuo sa walay pagbusog una sa ilang mga tiyan ug pagtan-aw nga sila tukma nga gisininaan ug tukma nga gipapuyo ug tukma nga gidasig, tingali mapakyas kita sa pagtukod sa hugot nga pagtuo.⁴

Sa kasagaran gibalik-balik nato ang pamahayag nga gihatag kanato ni Presidente [Heber J.] Grant sa diha nga kining programa sa [welfare] gipasiugdahan. Kini mao ang iyang mga pulong . .:

“Ang atong nag-una nga katuyoan mao ang paghan-ay, kutob tingali sa mahimo niini nga posible, sa usa ka sistema diin ang tunglo sa pagkatapulan mawala, ang mga dautan sa pagpakilimos mawagtang, ug ang pagkagawasnon, kakugi, pagdaginot ug respeto sa kaugalingon sa makausa pa matukod tali sa atong katawhan. Ang katuyoan sa Simbahan mao ang pagtabang sa katawhan nga motabang sa ilang mga kaugalingon. Ang trabaho kinahanglan nga ibalik isip nagdumala nga baruganan sa mga kinabuhi sa atong mga miyembro sa Simbahan.” [Sa Conference Report, Okt. 1936, 3.]

Mibiyahe ako sa tanang Simbahan tungod sa paghangyo sa Unang Kapangulohan uban ni Elder Melvin J. Ballard sa unang mga adlaw sa programa sa welfare aron sa paghisgot uban sa lokal nga mga lider sa Simbahan sa mga detalye nga mahinungdanon sa pagsugod niini. Dihay tulo ka paborito nga mga tudling sa kasulatan nga kasagaran niya nga gikutlo ngadto sa katawhan. Usa ka pamahayag nga sa kasagaran iyang gibalik-balik mao kini: “Kinahanglan gayud nga kita moatiman sa atong kaugalingong katawhan, tungod kay ang Ginoo miingon nga kining tanan kinahanglan nga pagabuhaton nga: ‘… ang simbahan unta mobarug nga may kagawasan ibabaw sa tanan nga mga nilalang ubos sa celestial nga kalibutan.’ (D&P 78:14.)”

… [Mikutlo usab siya] gikan sa ikasiyento kinse nga seksyon sa Doktrina ug mga Pakigsaad: “Sa pagkatinuod Ako moingon nganha kaninyong tanan: Tindog ug pakita aron ang inyong kahayag mao ang usa ka sumbanan alang sa tanan nga mga nasud,” [ug siya mitudlo nga] mao kini ang adlaw sa pagpasundayag sa gahum sa Ginoo alang sa iyang mga katawhan. [D&P 115:5.] Ug usab nagkutlo sa ikausa ka gatus ug upat nga seksyon:

“Busa, kon adunay tawo nga mokuha sa kabuhong diin Ako mibuhat, ug dili mohatag sa iyang bahin, sumala sa balaod sa akong ebanghelyo, ngadto sa mga kabus ug sa mga timawa, siya, uban sa mga dautan, mohangad sa iyang mga mata sa impyerno, nga anaa sa kasakit.” [D&P 104:18.]

Akong gibasa kining kinutlo nganha kaninyo karon aron sa pagpahinumdom kaninyo sa sukaranan nga mga bato diin ang trabaho sa welfare sa Simbahan gipahiluna.⁵

Unsa nga mga kapanguhaan ang kinahanglan nga gamiton aron pagsulbad sa indibidwal nga problema sa welfare?

Unsa ang mga kapanguhaan nga ang Simbahan aduna o tingali inyong tawgon kini og mga tabang, aron sa pagsulbad sa indibidwal nga problema sa welfare? Unsaon ninyo pagsugod sa pagsulbad niini? Pananglitan kinahanglan nga mangutana ako ninyo niini nga pangutana niining higayona. Pananglitan karong gabii usa ka tawag sa telepono ang moabut sa amahan sa usa ka pamilya diin anaa siya sa trabaho, nagdala kaniya sa makapaguol nga pulong nga ang iyang gamay’ng anak nga lalaki nabanggaan sa sakyanan ug gidali sa pagdala sa ospital, grabe ang pagkadaut. Kini nga pamilya adunay gamay ra kaayo nga kinitaan, nga hapit dili paigo aron sa pagsangkap sa pamilya sa pagkaon ug sa mga kinahanglanon. Karon giatubang dayon sa pamilya, ang bayad sa doktor, ang bayad sa ospital––unsaon gayud kaha ninyo sa pagatubang niini?

Nahadlok ako kon pangutan-on ko kamo niana nga pangutana ug patubagon kamo niini dinhi, kadaghanan kaninyo moingon: “Sa tinuod, among hatagan sa mga pundo sa halad sa puasa.” Ug dili kana mao ang pamaagi sa pagsugod sa Programa sa Welfare, ug kana mao ang nahimo natong sayop. Sa sinugdanan, magsugod kita sa indibidwal sa iyang kaugalingon. Dili kita molihok gikan niana nga punto hangtud nga natabangan nato ang indibidwal sa pagbuhat sa tanan niya nga mahimo aron sa pagtabang sa iyang kaugalingong problema. Karon, ang pagbati ug ang atong emosyonal nga simpatiya ang tingali motukmod kanato sa lain nga mga paghukom, apan mao kana ang una, ug dayon moduol kita sa duol nga mga paryente niana nga pamilya. Giwala nato ang pagkahiusa sa pamilya, giwala nato ang kalig-on nga nagagikan sa panaghiusa sa pamilya, kon mapakyas kita sa paghatag sa kahigayunan sa pagtabang nga magtudlo sa paagi diin ang duol nga mga paryente niana nga pamilya, nga naglisud sa hilabihan, makahimo sa pagduol aron sa pagtabang sa ilang kaugalingon.

Dayon, ang sunod nga punto nga atong buhaton mao ang pagtawag sa balay tipiganan alang sa diha-diha nga mga panginahanglan. Diha sa panimalay nga sama niana nga ako pa lamang gihulagway, buot ako nga inyong makita ang bintaha sa paghatag nianang pamilya sa mga sinina, pagkaon, mga gamiton sa pagkatulog, mga sugnod nga gikinahanglan nila sulod sa pipila ka mga bulan aron pag-ilis sa kwarta nga ila sa laing bahin gastohon aron ibayad nianang emerhensya nga bayranan sa ospital, kay sa pagkuha sa mga halad sa puasa ug kwarta ang ihatag ngadto kanila. …

Karon, lapas sa unsay inyong mabuhat gikan sa balay-tipiganan, dayon ang sunod nga butang nga buhaton, dayag lamang, mao ang pagrekomendar ngadto sa bishop sa paggamit sa pundo sa halad sa puasa, diin, siya gitun-an, nga pagagamiton una gikan nianang iyang gisangkap gikan sa iyang kaugalingon nga mga paningkamot ug sa mga paningkamot sa iyang mga lider. Ngadto niana nga katuyoan, kinahanglan gayud nga ibutang nato ang pagtigum sa mga halad sa puasa ug sa pagdugang sa mga halad sa puasa, ug sa pagtudlo sa halad sa puasa, isip usa sa labing importante nga bahin sa Plano sa Welfare. …

Karon, human niana, moabut kita sa aspeto sa pagpahiuli sa maayo nga kahimtang sa atong mga problema. Diha ang Relief Society, ug diha ang mga korum sa Priesthood mohimo sa ilang labing mahinungdanong bahin. Karon unsa ang bahin sa Relief Society diha sa programa sa pagpahiuli sa maayong kahimtang? Sa tinuod, ang unang butang nga inyong buhaton, samtang nagbisita kamo sa panimalay sa naglisud nga pamilya, mao ang pagbuhat ingon sa gikinahanglan sa bishop, paghimo og pagsusi sa mga kahimtang sa panimalay. …

Adtoon ninyo didto aron sa pagsusi, pagtan-aw sa mga kondisyon ug pagpangayo diha sa balay tipiganan, kon kana gikinahanglan, ug pagreport og balik ngadto sa inyong bishop sa mga panginahanglan sa pamilya alang sa iyang pagtugot ug alang sa pagkuha gikan sa balay tipiganan, o gikan sa mga pundo nga anaa iyang gikuptan, kon kana kinahanglan. Ang ikaduhang butang nga inyong buhaton mao ang pagpiho nga ang pagdumala sa mga problema niana nga panimalay gitun-an, ug nga adunay gihan-ay nga palakaw nga magtudlo nga makatabang sa pagsulbad sa mga kalisud nga anaa didto. Kinahanglan gayud nga mobarug kamo nga andam sa pag-atubang sa kalit nga mga panghitabo sa panimalay, sakit, kamatayon, ug ubang mga kondisyon sama niana nga matang, nga magtawag diha sa usa ka inigsuon nga kalooy nga kinahanglan unta nga ipahayag pinaagi sa Relief Society. Dayon, usab, kinahanglan gayud nga kanunay kamo nga tigpalig-on sa moral niini nga bahin sa programa. Kinahanglan gayud nga inyo ang tigbayaw nga kamot, inyo ang mao nga mopatunhay sa sitwasyon sa pamilya panahon sa emerhensya.⁶

Karon mao ang panahon alang sa mga miyembro sa priesthood sa pag-ila sa ilang pundok sa korum. Ang matag korum kinahanglan nga makaila sa ilang mga miyembro ug sa ilang mga panginahanglan ug pangitaon kadtong nalubong sa utang ug sa mabination nga paagi mosugyot kon unsaon nila sa paghaw-as sa utang. Wala pa gayud sukad nga may higayon diin ang usa ka tawo nanginahanglan pag-ayo og usa ka higala kay sa dihang siya nalubong sa utang tungod sa pipila ka susama nga mga kahimtang. Karon mao ang panahon sa paghatag kanila og kalig-on sa panan-awon ug gahum sa pagpadayon. Dili lamang kinahanglan kita motudlo sa mga tawo sa paggawas gikan sa utang apan kita kinahanglan nga motudlo usab kanila sa dili pagpangutang.⁷

Kita nagpaabut sa indibidwal sa pagbuhat sa tanan nga iyang mahimo sa pagtabang sa iyang kaugalingon, bisan kon kini emerhensya alang sa nagbinugtong nga pamilya o alang sa tibuok komunidad, nga ang mga paryente mobuhat sa tanan nila nga mahimo sa pagtabang, dayon ang Simbahan mosunod uban sa mga kagamitan gikan sa balay tipiganan, uban sa mga halad sa puasa aron sa pagsulbad sa ilang mga panginahanglan nga ang kagamitan gikan sa balay tipiganan dili makasangkap, ug sa katapusan, ang Relief Society ug ang mga korum sa priesthood motabang uban sa pagpahiuli sa maayong kahimtang.⁸

Sa unsa nga paagi kita makahimo sa atong panimalay nga mas mapaningkamuton sa kaugalingon?

Aron ang usa ka indibidwal o usa ka komunidad mahimo nga makapatunhay sa kaugalingon, ang mosunod nga lima ka mga lakang kinahanglan gayud nga pagahimoon:

Una: Kinahanglan nga walay pagkatinapulan diha sa Simbahan.

Ikaduha: Kinahanglan gayud nga makakat-on kita sa leksyon sa kinaugalingon nga sakripisyo.

Ikatulo: Kinahanglan gayud nga magpakahanas kita sa paagi sa pagpakabuhi ug pagtrabaho nga maghiusa.

Ikaupat: Kinahanglan gayud nga bansayon nato ang pakig-inigsuonay diha sa atong mga korum sa priesthood.

Ikalima: Kinahanglan gayud nga kita makabaton og kaisug sa pag-atubang sa hagit sa matag adlaw nga mga problema pinaagi sa atong kaugalingong panlimbasog kutob sa mahimo sa indibidwal o lokal nga mga kapanguhaan sa dili pa mohangyo sa uban sa pagduol ug sa pagtabang kanato niana nga solusyon.⁹

Ibutang sa hunahuna nga ang programa sa Welfare sa Simbahan kinahanglan gayud nga magsugod diha kaninyo sa personal ug indibidwal nga paagi. Kinahanglan gayud nga magsugod kini diha sa matag miyembro sa Simbahan. Kinahanglan gayud nga kita magmadaginuton ug mapangandamon. … Kinahanglan nga molihok kamo alang sa inyong kaugalingon ug moapil sa dili pa ang programa sa welfare maaktibo diha sa inyong kaugalingong panimalay. …

Pangitaa ang pamaagi … sa pagtan-aw nga ang pagkaon anaa sa inyong mga panimalay; ug pagtambag sa inyong mga silingan ug mga higala sa pagbuhat sa ingon, tungod kay usa ka tawo nakahupot [sa] panan-awon sa pagkahibalo nga kini gikinahanglan, ug pagakinahanglanon kini sa umaabut, ug nahimong manluluwas sa atong katawhan sa kaniadto.

Karon, dili kita magpakabuang ug magdahum nga tungod kay maayo ra ang kahimtang karon wala nay problema sa umaabut. Ang Ginoo misulti kanato pinaagi sa pagpadayag sa pipila sa mga butang nga nag-una kanato, ug nagpuyo kita sa panahon nga ang katumanan niadtong mga panagna ania na karon. Kita nakugang, ug gani walay panghitabo karon nga wala makita og una sa mga propeta. …

Ang Dios nagtabang kanato sa pagbaton sa kahusay sa atong mga balay ug sa pagtutok sa atong mga mata niadtong kinsa nagdumala niini nga Simbahan ug sa pagsunod sa ilang panudlo, ug dili kita mahisalaag.¹⁰

Ipakita kanako ang usa ka katawhan kinsa “adunay hunahuna sa pagtrabaho,” aron makalikay sa pagkaulipon sa utang, ug sa pagtrabaho nga maghiusa diha sa walay paghinakog nga serbisyo aron makab-ot ang usa ka mahinungdanon nga katuyoan, ug akong ipakita ninyo ang katawhan kinsa nakakab-ot sa labing mahinungdanong posible nga kasigurohan diha sa kalibutan sa mga tawo ug materyal nga mga butang.¹¹

Mga katalagman moigo sa matag dapit. Usa sa labing grabe sa atong mga katalagman mao ang [usa ka linog] didto sa San Fernando Valley [California]. Nabalaka kami sa diha nga milabay ang mga adlaw ug dili kami makatawag tungod kay naguba ang linya sa mga telepono, ug walay laing paagi sa pagkuha og pulong kon naunsa na ang atong mga tawo; busa nakigsulti kami sa atong [mga lider sa priesthood] diha lamang gayud sa gawas sa dapit nga nalinugan ug nangutana kon makabalita ba siya kanamo. Ug ang pulong nibalik, “Maayo ra kaming tanan. Nagpagawas kami sa mga pagkaon gikan sa tipiganan nga among gitigum. Nagtipig kami og mga tubig.” Ang naandan nga tubig nahugawan, ug ang mga tawo nagkalisud ug anaa sa kuyaw tungod sa kahugaw sa tubig; apan ang mga tawo nga naminaw mitipig og tubig ingon man usab mga pagkaon ug ubang mga butang aron makatabang kanila; ug bisan tuod dili silang tanan adunay mga pagkaon ug walay tubig, kadtong kinsa naminaw ug nangandam wala mahadlok, ug naghiusa sa nindot kaayo nga paagi sa pagtinabangay.¹²

Mga Sugyot alang sa Pagtuon ug Panaghisgutan

Sama sa gipasabut ni Presidente Lee, unsa ang pamaagi sa Ginoo sa pag-atiman sa mga kabus ug timawa? (Tan-awa sa D&P 104:14–18.)
Unsa ang pipila sa mga kapanguhaan nga ania kanato nga mahimong ipakigbahin ngadto sa mga kabus?
Ngano nga kinahanglan nga ang atong mga paningkamot sa pagserbisyo sa mga kabus ug timawa ipatumong sa pagtabang kanila nga maandam alang sa kinabuhing dayon? Unsaon nato sa pagbuhat niini?
Ngano nga ang mga indibidwal ug mga pamilya kinahanglan nga mobuhat sa tanan nila nga mahimo aron sa pagtabang sa ilang mga kaugalingon? Unsa nga mga panalangin ang moabut sa mga pamilya kinsa motabang sa ilang kaugalingon sa mga panahon sa panginahanglan? Unsa nga buhat ang gihimo sa mga korum sa priesthood ug Relief Society sa pagtabang niadtong nanginahanglan?
Unsay gipasabut sa pagkahimo nga mapaningkamuton sa kaugalingon? Unsa nga mga lakang ang kinahanglan gayud natong buhaton aron mahimo nga labaw pa ka mapaningkamuton sa kaugalingon?
Ngano nga ang abilidad ug mauyunon nga motrabaho ang importanting sukaranan nga mahimong mapaningkamuton sa kaugalingon? Sa unsa nga paagi kita makatudlo sa atong mga anak sa pagtrabaho?
Unsa nga mga panalangin ang moabut kanato kon mosunod kita sa tambag sa atong mga lider sa pagbayad sa atong mga utang ug sa pagbansay sa pagdaginot sa pagdumala sa atong kwarta?

Ang balay tipiganan sa bishop alang sa Pioneer ug sa mga Stake sa Salt Lake, Siyudad sa Salt Lake, Utah, 1933. Si Harold B. Lee mao ang presidente sa Pioneer Stake nianang panahona.