Ang Pangalagad ni Harold B. Lee

Ang mosunod nga istorya sa kinabuhi ni Presidente Harold B. Lee, gisulat ni Elder Gordon B. Hinckley, miyembro kaniadto sa Korum sa Napulog Duha ka mga Apostoles, gimantala sa Ensign niadtong Nobyembre 1972 (“Presidente Harold B. Lee: An Appreciation,” 2–11). Ang artikulo nakatabang sa mga miyembro sa Simbahan nga mas makaila pa ni Presidente Lee, nga bag-o lamang nahimong Presidente sa Simbahan.

“Ang istorya ni Harold B. Lee, Presidente sa Simbahan, maistorya sa pipila ka mga pulong: Natawo niadtong Marso 28, 1899, didto sa Clifton, Idaho, anak nga lalaki ni Samuel Marion ug Louisa Emeline Bingham Lee, usa sa unom ka mga anak. Na-edukar sa lokal nga eskwelahan, sa Oneida Academy nga duol sa Preston, sa Albion State Normal School sa Albion, Idaho, ug unya sa Unibersidad sa Utah. Nagsugod og trabaho sa pagtudlo sa edad nga 17, nagserbisyo isip prinsipal sa eskwelahan sa edad nga 18, ug unya prinsipal sa duha ka mga eskwelahan sa Lalawigan sa Salt Lake, Utah. Naminyo ni Fern Lucinda Tanner sa Nobyembre 14, 1923. Namatay si Fern Lucinda sa Septyembre 24, 1962. Naminyo ni Freda Joan Jensen sa Hunyo 17, 1963.

“Nagdumala sa Foundation Press, Inc., 1928–33. Nagserbisyo isip Salt Lake City Commissioner 1933–37, sa dihang nahimo siyang tigdumalang direktor sa programa sa Simbahan sa welfare. Gitawag nga miyembro sa Konseho sa Napulog Duha Abril 6, 1941, Presidente sa Konseho sa Napulog Duha ug unang magtatambag sa Unang Kapangulohan Enero 23, 1970, ug gi-orden ug gi-set apart isip Presidente sa Simbahan Hulyo 7, 1972.

“Kini mao ang yano nga mga kamatuoran sa iyang kinabuhi. Apan kana nga kinabuhi takus kaayo nga hisgutan.

Itandi sa kadaghanang mga lungsod ug mga siyudad, ang Cliffton gamay ra kaayo, ug layo sa dagkong dalan. Apan sa paglabay sa katuigan, kini naila nga mao ang dapit nga natawhan sa ika-onse nga Presidente sa Simbahan.

“Ang amahan ni Presidente Lee, nga si Samuel Marion, miabut sa Clifton gikan sa laing lungsod, sa Panaca, sa habagatang Nevada. Ang inahan ni Samuel (apohang babaye ni Presidente Lee) namatay sa dihang siya nag-edad og walo ka adlaw, ug ang natawo nga kulang sa bulan nga bata gamay kaayo nga ang singsing masulod sa iyang kamot ug ngadto sa iyang bukton. Kinahanglan nga pakan-on siya ginamit ang eye dopper. Ang igsoong babaye sa iyang inahan nagpuyo didto sa Clifton, ug sa edad nga 18, ang batang lalaki mibalhin ngadto sa amihanan aron mopuyo uban sa iyang pamilya.

“Didto iyang gikaila ang itom og buhok, itom og mata nga si Louisa Bingham. Naminyo sila sa Templo sa Logan. Ang panimalay nga ilang gitukod ug diin natawo ang ilang unom ka mga anak diha sa dapit nga layo sa dalan, mga lima ka kilometro sa amihanan sa tindahan.” Ang tindahan, sa sulagma, mao ra ang tindahan sa lungsod. Ang dapit nga layo sa dalan mao ang dalan nga yuta—abug panahon sa ting-init, puno sa snow sa tingtugnaw, ug lapukon sa tingpamulak ug sa tinglarag. …

“Dinhi, walay tsinelas, nagsul-ob og overall si Harold nga nagdako, usa ka batang lalaki taliwala sa ubang probinsyanong mga bata nga lalaki. Dihay pagpangaligo sa Lim-aw sa mga Dudley, apan dili sa Dominggo. Ang amahan anaa sa bishopric, ang inahan anaa sa [organisasyon sa Young Women]—ug ang Dominggo sagrado. Susama kini sa lim-aw, sa umahan ni Bybee, diin si Harold B. Lee nabunyagan.

“Ang kwarta hilabihan sa kanihit niadtong mga panahona. Ang umahan daghan og abut apan ang lugas ug mga patatas barato ra. Ang amahan midugang sa kinitaan sa pamilya pinaagi sa pagpangontrata alang sa pagpamutol og lugas, paglungag og mga atabay, ug pagbuhat og mga kanal sa irigasyon. Apan ang mga anak nga Lee wala masayud nga sila pobre. Ang panimalay ug ang Simbahan mihatag og mga kahigayunan sa kalingawan. Ang bahandi sa balay mao ang piyano. Usa ka Scotish nga babaye, kinsa nakahibalo unsaon sa paghapak sa buko sa tudlo kon motukar og sayop nga nota, nagtudlo kaniya unsaon sa pagpatukar.

“Si Harold hanas sa piyano. Makapaikag nga hunahunaon nga ang gugma alang sa musika, nga giugmad niadtong unang mga panahon, sa wala madugay nahimong mapuslanon sa dihang siya nagserbisyo isip chairman sa Church Music Committee. …

“Usa ka gamay nga karwahe, sa kasagaran gimaneho sa inahan, modala sa mga anak og duha ka mga milya padulong ug gikan sa eskwelahan. Dili kaayo kini makasagang kon ang hangin sa Enero mohuros gikan sa amihanan, ug ang kalapokan problema kon mahilis na ang snow diha sa dalan. Apan mao kadto ang kinabuhi sa Clifton. Sama sa gikomentaryo ni Presidente Lee, ‘Aduna kami sa tanan nga dili mapalit og kwarta.’ Ug uban niini nakahulip sa unsay wala kanamo. Ang hangin limpyo ug linaw, nga hapit tam-is ang lami niini. Ang tubig sama ka tin-aw sa bildo, ug sayon kaayong makita ang naggilak nga mga bato sa ilawom sa sapa. Ang mga bitoon sa kagabhion nagbarug sama sa mga tawo ug mga hayop diha sa panganud—ang batan-ong mga hunahuna matingala sa unsay ilang nakita. Ang mga ulan sa tinginit sama sa mga manna nga nahulog niana nga kamingawan, naghatag og kinabuhi sa yuta. Ang tingpamulak miabut uban sa mabaga kaayong lunhaw nga mga sagbut diin ang daro nibugwal niini sa yuta, sundan sa paglungag sa yuta. Lanog, nag-aso nga mga makina nga naghatag og kusog sa mga tag-as nga koriya ngadto sa mga makina nga maglubo nga maghatag og sinako nga mga trigo, abena [oats], ug sebada [barley]. …

“Kon mahuman na sa elementarya sa lokal nga eskwelahan, ang batang mga lalaki ‘mobiya sa panimalay aron moeskwela sa Oneida Academy, ang gidumala sa Simbahan nga sekondarya nga eskwelahan didto sa Preston usa ka kinse ka milya ang gilay-on. Si Harold 13 anyos pa, ug dinhi iyang unang nakaila si Ezra Taft Benson [kinsa nahimong ika-trese nga Presidente sa Simbahan]. Dayon gisundan sa Albion State Normal School, sa pikas bahin sa Idaho. Dinhi, sa edad nga 17, si Harold B. Lee nakakuha sa iyang sertipiko sa pagtudlo. Malipayon kadtong adlawa alang kaniya ug sa iyang pamilya. Ang hunta sa edukasyon sa distrito mitanyag kaniya og trabaho isip magtutudlo diha sa usa ka gamay nga kwarto sa Silver Star School, tunga-tunga sa Dayton ug Weston, ‘ubos sa dalan’ gikan sa Clifton. Ang suweldo saysenta dolyares matag bulan. Magsakay siya og kabayo sa gilay-on nga napulo ka mga milya sa katapusan sa semana.

“ … Sa pagkasunod tuig, ang hunta mitawag kaniya nga prinsipal sa Oxford School nga adunay upat ka mga kwarto. Usa kadto ka dako nga kahigayunan alang sa 18 anyos nga batan-ong lalaki. Iyang gibiyahe ang upat ka milya padulong ug pauli sakay sa kabayo kada adlaw, ulan o init, maayong panahon o ngil-ad. Uban sa nabansay nga talento sa musika ug abilidad sa basketball, miapil siya sa mga kalihokan sa komunidad sa iyang libre nga oras. Mao kini nga mga panahon, sa dihang ang iyang amahan usa ka bishop, nga si Harold unang daklit nga nakahibalo mahitungod sa programa sa welfare sa Simbahan, nga mao na ang nailhan sa wala madugay. Kaniadto sama sa karon, ang bishop maoy responsable alang sa pag-atiman niadtong nanginahanglan. Si Bishop Lee midumala sa iyang kaugalingong balay tipiganan, sa mga baligya gikan sa iyang kaugalingong tipiganan. Sa gabii, ang pamilya makakita kaniya nga magdala og usa ka sako nga harina, wala sila masayud kon asa dad-a, tungod kay ang dili pagbutyag kalabut niadtong naglisud kinahanglang estrikto nga sundon, basin pa unya og ang tabi-tabi mosangpot sa kaulawan niadtong nagkinahanglan og tabang.

“Kaniadto sama karon, katungod ug responsibilidad sa bishop ang pagrekomendar og batan-ong mga lalaki alang sa misyon. Si Harold nga 21 na, nakatudlo sulod sa upat ka mga tuig. Usa ka tawag nagagikan ni Presidente Heber J. Grant sa pagserbisyo sa Western State Mission.

“Sa kinandadohan nga mga file sa Departamento sa Misyonaryo sa Simbahan mao ang report ngadto sa Unang Kapangulohan mahitungod ni Elder Lee. Kini gipitsahan og Disyembre 30, 1922, ug gipirmahan ni Presidente John M. Knight. Naghatag kini sa panahon sa iyang serbisyo—Nobyembre 11, 1920, hangtud sa Disyembre 18, 1922. Ang lain-laing mga pangutana natubag: ‘Mga kwalipikasyon—Isip usa ka mamumulong, “Maayo Kaayo.” Isip usa ka tigdumalang opisyal, “Maayo.” Aduna ba siyay maayo nga kahibalo sa Ebanghelyo? “Maayo kaayo.” Abtik ba siya? “Kaayo.” Mabuot ba siya ug aduna ba siyay maayong impluwensya? “Oo.” Pamahayag: “Si Elder Lee midumala sa Komperensya sa Denver nga adunay kalainan gikan sa ika-8 sa Agosto 1921 hangtud sa ika-18 sa Disyembre 1922. Usa ka talag-saon kaayo nga misyonaryo.”

“Diha niana nga misyon sa samang higayon anaa ang usa ka batan-ong babaye gikan sa Siyudad sa Salt Lake, nga si Fern Lucinda Tanner. Giisip siya sa iyang mga kauban nga utukan, matahum, ug dili kasagaran ang abilidad sa kasulatan. Sa dihang na-release si Elder Lee, miuli siya sa Clifton sa makadiyot ug dayon miadto sa Siyudad sa Salt lake aron pangitaon ug pangulitawhan ang babaye nga iyang gidayeg didto sa natad sa misyon. Naminyo sila sa Templo sa Salt Lake mga onse ka bulan human siya mipauli.

“Sa kaminyoon natawo ang duha ka matahum nga mga anak nga babaye, si Helen [sa wala madugay nahimong Mrs. L. Brent Goates] ug si Maurine [sa wala madugay nahimong Mrs. Ernest J. Wilkins]. Ang panimalay nga Lee mao ang pundukanan sa mga batan-on sa maong dapit. Ang malumo nga kinaiya ni Sister Lee ug kahanas nga moatubang sa malisud nga mga sitwasyon nakakuha sa pagdayeg sa tanan nga nakaila kaniya. Sa usa ka higayon iyang napahilom ang duha ka bantugan nga mga tawo kinsa nanaway sa ilang mga kauban, ‘Sa inyong paningkamot nga mahimong makiangayon, ayaw kalimot sa pagmabination.’ …

“Ang mga hiyas nga nakahimo ni [Harold B. Lee] nga prinsipal sa duha ka eskwelahan sa dihang nag-edad siya og 18 giila pagusab. Mipadayon sa iyang edukasyon sa Unibersidad sa Utah, gihimo siya nga prinsipal, una sa Whittier School ug dayon sa Woodrow Wilson School sa Lalawigan sa Salt Lake. …

“Nagpuyo siya sa Pioneer Stake human sa iyang kaminyoon, diin ang buluhaton sa Simbahan napun-an og lain. Dayon niadtong 1929, siya gitawag nga usa ka magtatambag sa kapangulohan sa stake. Sa pagkasunod nga tuig gitawag siya isip presidente sa stake. Nag-edad siya niana og 31 anyos, ang labing bata nga presidente sa stake sa Simbahan.

“Ang depresyon miabut sa nasud ug sa kalibutan. Nahagsa ang negosyo, sama sa tenpins sa bowling. Wala nay magpautang. Ang mga bangko nanira ug minilyong dolyares nga mga tiniguman nawala. Ang walay mga trabaho midaghan pag-ayo. Sa dihang ang mga benepisyo nga ilang gihagoan nawala, ang mga tawo naghikog. Dihay mga dapit nga manghatag og mga pagkaon ug pan. Dihay pagkawala sa paglaum ug trahedya. Sa Pioneer Stake labaw sa katunga sa mga miyembro ang walay trabaho.

“Ania ang usa ka hagit, usa ka makahahadlok nga hagit, alang sa batan-ong presidente sa stake. Nabalaka siya, mihilak siya, nag-ampo siya, samtang siya nagtan-aw sa mga tawo, nga sa kanhiay mapagarbuhon ug mauswagon, nga mikunhod tungod kay nawad-an og trabaho ngadto sa kahimtang nga dili na sila makapakaon sa ilang mga pamilya. Dayon dihay miabut nga inspirasyon sa pagtukod og balay tipiganan diin ang mga pagkaon ug mga kagamitan mapundok ug diin kini maapud-apod ngadto sa timawa. Mga proyekto sa pagtrabaho gisugdan, dili lamang sa pagpalambo sa komunidad, apan, labaw ka importante, sa paghatag sa mga tawo og kahigayunan sa pagtrabaho sa unsay ilang nadawat. Usa ka karaan nga building pangnegosyo giguba ug ang mga materyal gigamit sa pagtukod og gymnasium sa stake sa paghatag og sosyal ug mga kagamitan alang sa mga tawo.

“Ang ubang mga stake naghimo sa susama nga mga proyekto, ug niadtong Abril 1936 kini gihiusa aron sa pagporma sa unsay gitawag ni Presidente Heber J. Grant sa una og programa sa seguridad sa Simbahan, nga karon nailhan nga welfare program sa Simbahan.

“Si Harold B. Lee, ang batan-ong lider sa Pioneer Stake, gitawag sa pagdumala sa bag-ong programa taliwala sa walay paglaum ug malisud nga mga adlaw. Ang problema dako kaayo. Lisud kaayo ang pagpundok sa mga butang sa uma aron makapananom ug sa paghimo og proseso ug mga kagamitan sa pagtipig niini. Ang mas lisud nga sagubangon mao ang kinaiya sa mga tawo nga hinawayon sa unsay gibuhat sa Simbahan ug kinsa mibati nga ang welfare kinahanglan anaa sa pagdumala sa gobyerno.

“Apan uban sa pag-ampo ug pag-awhag, uban sa paghago og trabaho, ug uban sa panalangin niya nga giisip nga propeta, mibiyahe siya ngadto sa tanang mga stake sa Zion, ug ang programa naporma ug miuswag.

“Ang dako nga kapanguhaan sa welfare program karon—daghang malamboon nga mga uma, mga planta sa pagproseso ug mga buhatan sa mga delata, mga building nga tipiganan sa mga lugas ug mga galingan, ug ubang mga proyekto nga nagkatag sa kadaghanan sa Amerika—mao ang malamboon ug makapadani nga mga hulagway niadtong unang mga paningkamot. Samtang ang mga programa sa pagtabang sa gobyerno ubos sa pag-ataki kanunay, ang programa sa Simbahan nagpadayon nga gidayeg sa mga tawo sa tibuok kalibutan. Nakaminos ang mga magbubuhis og minilyon ka dolyares tungod kay giabaga sa Simbahan ang mga sagubangunon sa welfare. Nakakita og maayong trabaho ang liboan ka mga lalaki ug mga babaye, lakip na sa daghang mga baldado kinsa gihatagan og kahigayunan nga makapangita sa unsay ilang gikinahanglan. Kadtong kinsa gitabangan niini nga programa naluwas gikan “sa tunglo sa pagkatapulan ug sa pagkadautan sa pagsalig sa tabang.’ Ang dignidad ug pagtahud sa kaugalingon nabuhi. Ug kadtong dili maihap nga mga lalaki ug mga babaye kinsa dili direkta nga gitabangan, apan kinsa miapil sa pagpananom ug pagproseso sa pagkaon ug sa daghan pang uban nga mga trabaho, nagpamatuod sa kalipay nga makita diha sa dili hinakog nga pagserbisyo ngadto sa uban.

“Walay usa nga nagsaksi niini nga programa diha sa kadako sa iyang mga implikasyon ug sa hilabihan nga mga sangputanan ang makahimo og makatarunganong pagduha-duha sa espiritu sa pagpadayag nga maoy nakapamugna ug nakapalapad sa iyang mapuslanon nga gahum alang sa kaayohan. Ngadto ni Presidente Harold B. Lee, ang unang tigdumalang direktor ug dugay nga chairman sa Welfare Committee sa Simbahan, kinahanglang hatagan og pasidungog alang sa dinasig nga direksyon. Sa iyang kaligdong dili siya moangkon niana, ug tukma gayud kay iyang ihatag ang pasidungog ngadto sa Ginoo. Ang Ginoo, sa pagpalambo sa iyang sulugoon, nakaila sa iyang debosyon ug sa iyang hugot nga pagtuo. …

“Nasulayan na sa kalisud niadtong unang mga panahon sa programa sa welfare sa Simbahan, si Elder Lee gitawag ni Presidente Heber J. Grant nga mahimong apostol ug gipaluyohan sa Konseho sa Napulog Duha niadtong Abril 6, 1941.

“Sa okasyon niana nga pagkatudlo, si Elder John A. Widtsoe misulat og editoryal mahitungod sa iyang bag-ong kauban: ‘Puno siya sa hugot nga pagtuo sa Ginoo; dako siya og gugma sa iyang isig-katawo; maunungon sa Simbahan ug sa Nasud; malimtanon sa kaugalingon diha sa iyang debosyon sa Ebanghelyo; gitugahan og kaalam, kalagsik, ug paningkamot; ug gitugahan ug talagsaong gahum sa pagtudlo sa pulong ug kabubut-on sa Dios. Kinsa kadtong mangayo og tabang sa Ginoo iyang himoon nga gamhanang instrumento sa pagpadayon sa mahangturong plano sa tawhanong kaluwasan. … Hatagan siya og kalig-on nga labaw sukad iyang nahibaloan, samtang ang mga pag-ampo sa mga tawo moabut ngadto sa Ginoo alang kaniya.’ (Improvement Era, Mayo 1941, p. 288.)

“Kini ang matinuoron nga mga pulong sa pagdayeg, ug ang mga pulong sa panagna.

“Ang iyang istorya … mao ang pagkamatinuoron sa sagrado kaayo nga pagsalig sa usa ka apostol, kansang tawag mao ang mahimong linain nga saksi ‘sa pangalan ni Kristo ngadto sa tibuok kalibutan.’ [D&P 107:23.]

“Sa pagpadayon niana nga responsibilidad, mibiyahe siya ubos sa sugo sa Unang Kapangulohan ngadto sa daghang mga bahin sa yuta, mopataas sa iyang tingog diha sa kamaayo, sa pagpahayag sa pagkabalaan sa Manunubos sa katawhan.

“Kanunay niyang kutloon ang mga pulong ni Pablo ngadto sa Mga Taga-Corinto: ‘Ug kon ang tingog sa trumpeta dili tin-aw kinsa may maandam aron sa pagdasdas sa panggubatan?’ (1 Mga Taga-Cor. 14:8.) Walay bisan unsa nga dili tinuod sa mensahe ni Harold B. Lee. Walay pagduha-duha, ug uban niana nga kasiguroan sa tinuod nga pagtuo, siya nakapamatuod ngadto sa taas ug ubos og kahimtang sa kalibutan. … Wala gayud siya mosibug gikan sa iyang responsibilidad isip usa ka sulugoon sa Dios sa pagpamatuod sa kamatuoran. Ang mga misyonaryo nadasig sa mas kinasingkasing nga pagpaningkamot, ang mga miyembro sa Simbahan mitubo nga mapasaligon nga mosunod sa ebanghelyo, nasakitan ang mga kasingkasing sa mga investigator samtang siya mopamatuod. Wala niya ilikay ang iyang kaugalingon ug nagbaton og mapig-ot nga iskedyul bisan pa og mahimutang sa peligro ang iyang panglawas. Kadtong iyang suod nakahibalo nga sulod sa daghang mga bulan panagsa ra siya nga walay sakit. … Ang iyang pagkaila sa sakit nakapalantip sa iyang pagkasensitibo ngadto sa pag-antus sa uban. Siya mobiyahe sa layo ug duol aron sa pag-awhag ug pagpanalangin sa mga Santos. Aduna niadtong tua sa daghang mga kayutaan kinsa uban sa pagpasalamat mopamatuod sa milagrusong gahum sa priesthood nga gigamit alang kanila niini nga sulugoon sa Ginoo.

“Sensitibo usab siya sa kaguol, sa kahadlok, sa mga hagit nga giatubang sa mga kalalakin-an nga anaa nagserbisyo sa militar. Sa panahon sa mga katuigan sa Ikaduhang Gubat sa Kalibutan, sa Gubat sa Korea, ug sa gubat sa [Vietnam], siya ang nagdumala sa programa sa Simbahan sa kasundalohan. Kanunay niyang ipahayag ang iyang kaugalingon ngadto sa mga kaigsoonan kabahin sa panginahanglan sa paghatag sa hingpit nga programa sa Simbahan ngadto sa nagserbisyo sa militar, sa tanang mga panalangin ug mga kahigayunan nga gikan niini. Nakabiyahe siya sa yuta ug sa dagat aron makigkita sa mga miyembro sa Simbahan nga anaa sa serbisyo sa militar. Niadtong 1955, mibisita siya sa Korea samtang kana usa ka dapit nga nangandam alang sa gubat, nagsul-ob og patig. … Kadtong iyang gikahimamat dili gayud makalimot sa iyang pagkamabination, sa iyang pagpakabana, o sa iyang pagpamatuod sa nagmando nga gahum sa Dios sa mga kalihokan sa mga tawo. Gihupay niya sila, gihatagan niya sila’g balik og pasalig, daghan ang iyang giluwas nga nahiagum sa mangilngig nga mga sitwasyon.

“Iyang gihupay ang nagbangutan. Gikan sa personal nga kasinatian siya nakahibalo sa kasubo sa pagkamatay sa mga minahal. Wala siya sa Siyudad sa Salt Lake kay nagtambong og komperensya sa stake sa dihang ang iyang pinalanggang asawa nag-ungaw sa kamatayon. Mibiyahe sa kagabhion, nagdali nga moabut ngadto sa iyang kiliran, miabut siya nga patay na kini. Kadto nga iyang mga suod panahon sa masulub-ong mga adlaw human sa kamatayon sa iyang asawa nakabantay og gamay sa hilabihang kasubo sa iyang kahimtang. 1962 kadto. Sa 1965 ang iyang pinalangga nga anak nga babaye nga si Maurine namatay samtang si Elder Lee didto sa Hawaii sa usa ka buluhaton sa Simbahan. Nagbilin kini og upat ka mga anak.

“Kining masakit nga mga kasinatian, lisud nga sagubangon, nakadugang sa iyang pagkasensitibo sa mga giantus sa uban. Kadtong nakasinati og susamang pagkawala nakakita diha kaniya og masinabuton nga higala ug usa kansang nasulayan nga pagtuo nahimong tinubdan sa kalig-on ngadto kanila.

“Niadtong 1963 nakigminyo siya ni Freda Joan Jensen, kinsa nakahatag og kalipay sa iyang kinabuhi sa talagsaong paagi. Edukada ug pino og pamatasan, anad siya sa labing maayo nga katilingban. Babaye siya sa dili kasagaran nga mga kalampusan sa iyang kaugalingong katungod. Nabansay isip magtutudlo, nagtudlo siya sa eskwelahan, dayon misaka ngadto sa nagkalainlaing mga responsibilidad nga pang-administratiba sa pagserbisyo isip superbisor sa primarya nga edukasyon sa Jordan School District sa Lalawigan sa Salt Lake. Nagserbisyo usab siya sa kinatibuk-ang hunta sa Asosasyon sa Primarya. Ang panimalay nga iyang gidumala nahimong dangpanan sa kalinaw alang sa iyang bana ug usa ka dapit sa makapahimuot nga pag-abi-abi ngadto sa tanan kinsa nahatagan og pribilihiyo sa pagsulod niini.

“Si Presidente David O. McKay, nga nakaila sa hingpit nga kahibalo ni Elder Lee sa mga programa sa Simbahan ug sa napamatud-an niyang pang-administratiba nga mga kahanas, mitudlo kaniya nga chairman sa correlation committee sa paghan-ay sa tibuok kurikulum sa Simbahan. Tungod niini midangat ang makuti nga pagribyu sa mga pamaagi sa panudlo nga gigamit na sulod sa daghang mga tuig, uban sa pagtuki sa tanang nagtudlo nga mga organisasyon ug sa mga kagamitan. Ang dako kaayong paningkamot nga gihimo ubos sa iyang direksyon miresulta sa nagkatakdo nga kurikulum nga gidesinyo sa pagtudlo og kahibalo sa matag hugna sa kalihokan sa Simbahan ug sa doktrina ug sa pagtukod og pagka-espirituhanon sa mga miyembro. Ang kalig-on sa iyang pagkapangulo makita dinhi niini nga buhat. Siya makanunayon, ang iyang mga katuyoan tataw nga gipasabut. Ang tibuok Simbahan mao ang nakadawat sa iyang pagserbisyo.

“Sa kamatayon ni Presidente McKay ug sa pagpuli sa kapangulohan ni Joseph Fielding Smith, si Elder Lee nahimong Presidente sa Konseho sa Napulog Duha ug gipili ni Presidente Smith nga iyang unang magtatambag. Samtang nagkinahanglan kini nga siya pulihan sa pagka-chairman sa pipila sa iyang nahaunang mga kalihokan, ang sama nga mga katuyoan gipadayon ubos sa iyang kinatibuk-ang pagpangulo. Ang mga programa gitukod aron sa pagpalambo sa kahanas sa mga magtutudlo sa tibuok Simbahan. Usa ka programa sa pagbansay sa bishop gisugdan. Ang programa sa misyonaryo sa tibuok kalibutan gipalig-on. …

“Sa dihang si Presidente Joseph Fielding Smith malinawong namatay niadtong gabii sa Hulyo 2, 1972, walay pagduha-duha sa mga hunahuna sa mga miyembro sa Konseho sa Napulog Duha kinsa ang mopuli kaniya isip Presidente sa Simbahan. Sa buntag sa Biyernes, Hulyo 7, nagpundok sila sa sagrado nga mga kwarto sa Templo sa Salt Lake. Nianang hilom ug balaan nga dapit, uban sa malumo nga mga kasingkasing, nagtinguha sila sa mga hunghong sa Espiritu. Ang tanang mga kasingkasing nagkahiusa sa pagtubag ngadto niana nga mga honghong. Si Harold Bingham Lee, pinili sa Ginoo, gibansay gikan sa pagkabata sa mga baruganan sa gipahiuli nga ebanghelyo, gihashasan sa tibuok trayenta’y uno ka mga tuig sa pagserbisyo sa pagkaapostol, gitawag nga Presidente sa Ang Simbahan ni Jesukristo sa mga Santos sa Ulahing mga Adlaw ug Propeta, Manalagna, ug Tigpadayag. Ang tanang mga kamot gipandong diha sa iyang ulo, ug siya gi-ordinahan nga dinihugan sa Ginoo ngadto niining dako ug dili matandi nga calling.

“Gipaluyohan pinaagi sa hugot nga pagtuo ug mga pag-ampo sa mga Santos sa tibuok kalibutan, nagbarug siya isip tigdumalang high priest diha sa gingharian sa Dios sa yuta.”

Si Presidente Harold B. Lee nagserbisyo isip propeta sa Ginoo sulod sa 17 ka mga bulan ug 19 ka mga adlaw. Atol niini nga panahon sa kausaban ug paglambo, si Presidente Lee midumala sa pagkatukod sa unang stake didto sa Chile ug sa kinadak-ang yuta sa Asya didto sa Korea. Siya midumala sa unang komperensya sa area nga gihimo didto sa Siyudad sa Mexico, Mexico, ug Munich, Germany. Iyang gipatubo ang programa sa welfare services sa Simbahan sa tibuok kalibutan. Namatay siya niadtong 26 sa Disyembre 1973, sa edad nga 74.

Presidente Harold B. Lee