Kapitulo 9

Pagpatalinghug sa Tinuod nga Mensahero ni Jesukristo

Sa unsa nga paagi kita mas matinud-anon sa pagsunod sa buhing propeta?

Pasiuna

Si Harold B. Lee nahimo nga ika onse nga Presidente sa Simbahan sa pagkamatay ni Presidente Joseph Fielding Smith niadtong Hulyo 1972. Wala madugay human niana, si Presidente Lee mibisita og usa ka lawak didto sa Templo sa Salt Lake diin ang mga hulagway sa iyang napulo ka mga gisundan gipabitay. “Didto, sa mainampuon nga pagpamalandong,” siya naghinumdom, “Ako nagtan-aw niadtong mga pinintal nga mga tawo sa Dios—matinud-anon, putli nga mga tawo, halangdon nga mga tawo sa Dios—kinsa nag-una kanako sa sama nga calling.” Nagpalandong siya sa kinaiya ug sa mga nakab-ut sa matag usa sa mga propeta niining katapusan nga dispensasyon ug sa hinapos miabut sa katapusang hulagway. “Si Presidente Joseph Fielding Smith diha uban sa iyang mapahiyumong nawong, ang akong pinalanggang propeta kinsa wala mohimo og pauyon-uyon sa kamatuoran. … Ingon og siya nianang daklit nga higayon nagtunol ngari kanako, sama nga kini, usa ka sungkod sa pagkamatarung nga daw nagsulti kanako, ‘Lakaw ug buhata ang ingon.’ …

“Ako nasayud, uban sa usa ka pagpamatuod nga mas gamhanan kay sa panan-aw, nga ingon nga ang Ginoo nagpadayag, ‘Ang mga yawe sa gingharian sa Dios gitugyan ngadto sa tawo diha sa yuta [gikan ni Propeta Joseph Smith ngadto sa iyang manununod hangtud karon], ug gikan dinhi ang ebanghelyo mokaylap ngadto sa tibuok yuta.’” [D&P 65:2.]¹

Ang Presidente sa Simbahan mao lamang ang tawo dinhi sa yuta kinsa mao lamang ang gitugutan sa paggamit sa tanang mga yawe sa priesthood. Usa ka ulahing-adlaw nga propeta nagtudlo: Kon ang Presidente sa Simbahan magluya o dili na makahimo sa pagbuhat sa hingpit sa tanan nga mga katungdanan sa iyang buhatan, ang iyang duha ka Magtatambag, kinsa uban kaniya naglangkob sa Korum sa Unang Kapangulohan, mohimo sa trabaho sa Kapangulohan. Bisan unsa nga dagkong mga pangutana, mga palisiya, mga programa, o mga doktrina mga mainampuon nga gihunahuna sa konseho pinaagi sa mga Magtatambag sa Unang Kapangulohan ug sa Korum sa Napulog Duha ka mga Apostoles. Walay mga desisyon nga magagikan sa Unang Kapangulohan ug sa Korum sa Napulog Duha nga walay hingpit nga panag-uyon sa tanang may kalabutan. Nagsunod niining dinasig nga sumbanan, ang Simbahan mopadayon nga walay paghunong.”²

Isip mga miyembro sa Simbahan sa Ginoo, kita makabaton og hingpit nga pagsalig diha sa paggiya sa buhing propeta, kinsa si Presidente Lee mitawag og “tinuod nga mensahero” sa Ginoo. Si Presidente Lee mitudlo nga “kon ang mga anak sa Ginoo, diin naglakip sa tanan kinsa ania niini nga yuta, walay pagsapayan sa pagkanasudnon, kolor, o tinuohan, mopatalinghug sa tawag sa tinuod nga mensahero sa ebanghelyo ni Jesukristo … ang matag usa mahimo sa takdang panahon nga makakita sa Dios ug makahibalo nga Siya mao.”³

Pinaagi sa pagsunod sa propeta sa Ginoo, kita mahimo nga moabut nga walay kadaot sa atong katapusan nga destinasyon—sa presensya sa atong Amahan sa Langit.

Mga Pagtulun-an ni Harold B. Lee.

Sa unsa nga mga paagi ang Presidente sa Simbahan ang tigbalantay sa gingharian sa Ginoo?

Hinumdumi nga ang pangulo niini nga simbahan dili ang Presidente sa Simbahan. Ang pangulo niini nga simbahan mao ang Ginoo ug Magtutudlo, si Jesukristo, kinsa naghari ug nagmando. … Niining tanan nga mga kaguliyang kita makasiguro nga Siya naggiya, basin pa unya kita makalimot.⁴

“Si [Jesus] mao ang pangulo sa kapunongan, ang Simbahan: kinsa mao ang sinugdanan, ang unang nabanhaw gikan sa patay, nga sa tanan nga mga butang siya unta makaangkon sa kalabaw.” (Mga Taga-Colosas 1:18.) Kini tinuod, hinoon, nga sa matag dispensasyon kon ang iyang ebanghelyo ania sa yuta ug ang iyang Simbahan natukod, ang Ginoo nagtudlo ug nagtugyan og awtoridad ngadto sa usa ka tawo niana nga higayon sa matag dispensasyon kinsa magdala sa title nga presidente sa Simbahan, o propeta, manalagna ug tigpadayag sa Simbahan. Ang mao nga mga title o ang pagtugyan sa mao nga awtoridad, dili maghimo niya “nga Pangulo sa Simbahan,” diin nga title iya ni Jesukristo. Kini naghimo kaniya, hinoon, nga tigpama-ba ug ang usa kinsa molihok puli sa Ginoo ug pinaagi kang kinsa siya mamulong ngadto sa iyang mga katawhan pinaagi sa panudlo, sa paghatag o sa pagpugong sa mga baruganan ug mga ordinansa, o sa pagpahimangno kabahin sa mga paghukom. …

… Ang presidente sa Simbahan mao ang tigbalantay sa Balay o sa Gingharian sa Ginoo. Diha sa iyang mga kamot gitugyan ang mga yawe ngadto sa tanang dapit. Diha sa paggiya sa Ginoo naghatag siya sa mga yawe sa awtoridad ngadto sa mga miyembro sa Simbahan sa pagbunyag, sa pagsangyaw sa ebanghelyo, sa pagpandong sa mga kamot diha sa masakiton, sa pagdumala o sa pagtudlo sa nagkalain-lain nga mga buhatan. Ngadto sa diyutay lamang siya naghatag sa awtoridad sa pagpahigayon sa mga ordinansa sa mga templo o sa pagpahigayon sa mga kaminyoon diha niana “aron sa pagbugkos dinhi sa yuta ug didto sa langit.”⁵

Ang usa ka propeta usa ka dinasig ug gibalaan nga tinudlo nga tigpadayag ug tighubad sa hunahuna ug kabubut-on sa Dios. Naghupot siya sa mga yawe sa gingharian sa Dios sa atong panahon, sama sa gihatag ngadto ni Pedro isip ang yutan-ong pangulo sa Simbahan sa iyang panahon.⁶

Mahimo ba nga ako mobasa og usa ka butang nga gisulat [ni Presidente J Reuben Clark Jr.] alang sa lain nga higayon: “Kinahanglan gayud nga ibutang sa atong hunahuna … nga ang Presidente sa Simbahan lamang, ang Tigdumalang High Priest, … ang adunay katungod sa pagdawat sa mga pagpadayag alang sa Simbahan, bag-o man o paghimo og kausaban, o sa paghatag og may awtoridad nga mga paghubad sa mga kasulatan nga mahimong kabahin sa Simbahan. … Siya lamang ang tigpama-ba dinhi sa yuta alang sa Ang Simbahan ni Jesukristo sa mga Santos sa Ulahing mga Adlaw, ang mao lamang nga tinuod nga Simbahan. Siya lamang ang mahimong makapadayag sa hunahuna ug kabubut-on sa Dios ngadto sa iyang mga katawhan. Walay opisyal sa bisan hain nga Simbahan sa kalibutan aduna niining mahinungdanon nga katungod ug dako nga pribiliheyo.” [Church News, 31 Hulyo 1954, 10.]⁷

Ang usa lamang nga gihatagan og awtoridad sa pagpagula og bisan unsa nga bag-ong doktrina mao ang Presidente sa Simbahan, kinsa, kon siya naghimo, mopadayag niini isip usa ka pagpadayag gikan sa Dios, ug kini dawaton nga ingon pinaagi sa Konseho sa Napulog Duha ug gipaluyohan sa kapunongan sa Simbahan.⁸

Giunsa pagpili ang Presidente sa Simbahan?

Ngadto niadtong kinsa nangutana niini nga pangutana: Giunsa pagpili ang Presidente sa Simbahan? Ang husto ug yano nga tubag kinahanglan nga usa ka kinutlo sa ikalimang artikulo sa hugot nga pagtuo: “Kami nagtuo nga ang usa ka tawo kinahanglan gayud pagatawgon sa Dios, pinaagi sa pagpanagna, ug pinaagi sa pagpandong sa mga kamot niadto kinsa adunay pagtugot sa pagsangyaw sa Ebanghelyo ug sa pagpangalagad sa mga ordinansa niini” (Mga Artikulo sa Hugot nga Pagtuo 1:5).

Ang sinugdanan sa tawag sa usa nga mahimong Presidente sa Simbahan sa tinuod nagsugod sa diha nga siya gitawag, gi-orden, ug gi-set apart nga mahimong usa ka miyembro sa Korum sa Napulog Duha ka mga Apostoles. Ang mao nga tawag pinaagi sa panagna, o sa lain nga mga pulong, pinaagi sa inspirasyon sa Ginoo ngadto sa usa nga naghupot sa mga yawe sa kapangulohan, ug ang mosunod nga pag-orden ug pag-set apart pinaagi sa pagpandong sa mga kamot pinaagi nianang sama nga awtoridad, nagbutang sa matag Apostol diha sa usa ka priesthood korum sa napulog duha ka mga lalaki nga naghupot sa pagka-apostol.

Ang matag Apostol nga gi-orden ubos sa mga kamot sa Presidente sa Simbahan, kinsa naghupot sa mga yawe sa gingharian sa Dios kauban sa tanan nga gi-orden nga mga Apostoles, naghatag ngadto kaniya sa awtoridad sa priesthood nga gikinahanglan sa paghupot sa matag posisyon diha sa Simbahan, bisan ngadto sa posisyon sa pagkapangulo sa Simbahan kon siya gitawag sa may awtoridad nga tigdumala ug gipaluyohan pinaagi sa pagboto sa usa ka magpipili nga katiguman sa mga miyembro sa Simbahan.

… Diha-diha dayon human sa pagkamatay sa usa ka Presidente, ang sunod nga taas nga kahugpungan, ang Korum sa Napulog Duha ka mga Apostoles, mahimo nga awtoridad nga tigdumala, nga ang Presidente sa Napulog Duha diha-diha mahimo nga akting nga Presidente sa Simbahan hangtud usa ka Presidente sa Simbahan opisyal nga i-orden ug paluyohan diha sa iyang katungdanan. …

Ang tanang miyembro sa Unang Kapangulohan ug ang Napulog Duha sa kanunay gipaluyohan isip “mga propeta, manalagna ug mga tigpadayag.” … Kini nagpasabut nga bisan kinsa sa mga Apostoles, nga gipili ug gi-orden, mahimo nga modumala sa Simbahan kon siya gipili pinaagi sa kahugpungan [nga gihubad nga nagpasabut ang tibuok Korum sa Napulog Duha], gitudlo ug gi-orden ngadto niana nga katungdanan, ug gibuligan pinaagi sa pagsalig, pagtuo, ug pag-ampo sa simbahan,” sa pagkutlo gikan sa usa ka pagpadayag mahitungod niini nga hilisgutan, sa usa ka kondisyon, ug kana ingon nga siya mao ang kinadugayan nga miyembro, o ang Presidente niana nga kahugpungan (tan-awa sa D&P 107:22).⁹

Sa diha nga ako milingkod isip usa ka mas batan-on nga miyembro sa Konseho sa Napulog Duha, sa unang pag-usab sa kapunongan sa Simbahan gitugutan ako sa pag-apil sa diha nga si Presidente [Heber J.] Grant namatay. … Samtang ang [bag-ong] Presidente nagtawag sa iyang mga magtatambag ug sila mipahiluna sa ilang mga kaugalingon sa ulohan sa lawak, sa sulod kanako anaa ang pagsaksi nga kini mao ang mga tawo nga ang Ginoo buot nga maanaa sa Kapangulohan sa Simbahan. Kini miabut ngari kanako nga adunay lig-on nga pagtuo nga ingon og kana nga kamatuoran gibudyong sa akong mga dalunggan.

… Hangtud nga ang mga miyembro niini nga simbahan aduna nianang lig-on nga pagtuo nga sila gigiyahan diha sa tarung nga dalan, ug sila adunay usa ka lig-on nga pagtuo nga kini nga mga tawo sa Dios mga tawo kinsa mga dinasig ug sa husto nga paagi gitudlo pinaagi sa kamot sa Dios, sila dili tinuoray nga nakabig.¹⁰

[Ang Ginoo] nagpadayag sa balaod ug Siya nagpili o nagtudlo sa mga opisyales ug naghupot sa katungod sa pagbadlong, pagtarung, o gani sa pagpapahawa kanila sa Iyang pagbuot. Busa ang panginahanglan sa usa ka kanunay nga [pagbinayloay og hunahuna] pinaagi sa usa ka direkta nga pagpadayag tali Kaniya ug sa Iyang Simbahan. Isip usa ka panig-ingnan alang sa nag-unang mga hitabo, gigamit nato ang mga sanglitanan sa tanan nga mga panahon ingon nga gi-rekord diha sa mga kasulatan. Kini nga han-ay sa pangagamhanan nagsugod sa Eden. Ang Dios mitudlo ni Adan sa pagmando sa yuta ug mihatag kaniya sa balaod. Kini gipadayon sa usa ka nabatasan nga pagkasunod-sunod gikan ni Adan ngadto ni Noah ug gikan ni Noah ngadto ni Melchizedek, Abraham, Isaac, Jose, Moises, Samuel ang propeta, Juan, Jesus, ug sa iyang mga Apostoles, ang tanan ug kada usa pinili sa Ginoo ug dili pinaagi sa katawhan.

Tinuod nga ang mga katawhan adunay tingog diha sa pangagamhanan sa gingharian sa Dios, apan sila dili motugyan og awtoridad sa unang bahin, ni sila makapapahawa niini. Sama pananglit: Ang mga katawhan wala magpili sa napulog duha ka mga Apostoles ni Jesukristo, ni sila pinaagi sa tingog sa daghan mahikawan sa ilang pagka-apostol. Ingon nga ang pangagamhanan sa gingharian nga diha nang daan kaniadto pa, busa kini karon gipahiuli. Ang katawhan dili maoy mipili niining talagsaon og modernong Propeta ug Apostol nga si Joseph Smith, apan ang Dios mipili kaniya, sa sama nga paagi nga Siya mipili sa uban nga nag-una kaniya—nga gitawag pinaagi sa dayag nga panan-awon ug pinaagi sa Iyang kaugalingon nga tingog gikan sa mga kalangitan.¹¹

Ako adunay kasayuran nga samtang ako naghunahuna niini nga responsibilidad [isip propeta] ug nahimong igo ka suod sa mga Kaigsoonan sa mga katuigang nanglabay, nga ang usa nga anaa niini nga posisyon anaa ubos sa pagbantay Kaniya kansang serbisyo atong gihimo karon. Dili gayud Siya motugot og usa dinhi niini nga katungdanan sa paggiya sa simbahan nga mahisalaag. Makasiguro kamo niana. Kon ako maghunahuna sa proseso diin ang usa ka tawo moabut sa katungdanan sa pagkapangulo sa Simbahan, naghunahuna ako sa akong kaugalingong kasinatian sulod sa treynta y uno ug tunga ka tuig, ug sa tanan nga mga kahimtang diin miabut sa akong kaugalingong kinabuhi—Pagkaanindot niini nga programa sa pagbansay! Sa diha nga ang pagpuli sa Unang Kapangulohan miabut, gitandi ko kini sa kalainan sa paagi sa mga partido sa politika sa pagdala og presidente sa Tinipong Bansa ngadto sa katungdanan, o sa pag-inagurar og usa ka hari, aron sa pagtan-aw giunsa, pinaagi sa plano sa Ginoo, kini nga mga kausaban paghimo nga walay kahiubos, walay pagaway-away. Ang plano gipahiluna ug ang Ginoo naghimo nga walay kasaypanan, ingon nga Siya namulong ngari kanato.¹²

Ngano nga kinahanglan gayud kitang mosunod sa propeta?

Karon, hinaut nga kini ang adlaw alang kanato sa pagpamalandong sa ligdong nga paagi, sa paghinumdom unsa ang gipamulong na sa Ginoo ngari kanato. Ang Iyang propeta ania sa yuta karong panahona, ug kon kamo buot nga makahibalo sa katapusan nga pagpadayag nga miabut niini nga mga katawhan, tan-awa ang report sa katapusang komperensya ug basaha pag-ayo unsa ang gisulti sa Unang Kapangulohan. … Maangkon ninyo ang labing maayo ug ang katapusan nga pulong nga sukad gihatag gikan sa atong Langitnong Amahan. Dili kita kinahanglan magagad lamang diha sa unsa ang anaa sa upat ka mga basahon sa Simbahan. Agi og dugang sa unsay gisulti sa mga kasulatan ngari kanato, kita aduna sa unsay gisulti sa mga propeta kanato dinhi ug karon, ug kini anaa kanato kon kita buot nga maluwas ngadto sa bungtod sa Zion, kon moabut kini nga mga kuyaw, sa pagpatalinghug ug sa pagsunod.¹³

Kasagaran kaayo karon nga kon ang atong mga kaigsoonan mosulti nga may awtoridad, aduna kitay pipila nga mobarug sa paghagit ug moingon, “Karon asa ba gayud ako makakita og pipila ka kapasikaran nga inyong mahinganlan alang sa inyong mga gipanulti?” Maaghat kita sa pag-ingon, “Balika ug basaha ninyo ang pakigpulong sa pangulo karon sa Simbahan kalabut sa hilisgutan, ug kamo aduna sa tanang awtoridad nga inyong gikinahanglan nga pangitaon, tungod kay kini mao ang paagi sa Ginoo. Ang Iyang propeta ania, ug ang pagpadayag ingon lamang ka gikinahanglan ug susama ra kaimportante sa nakita nga ebidensya kaniadto o sa bisan kanus-a nga panahon sa bisan unsa nga dispensasyon sa ebanghelyo dinhi sa yuta.”¹⁴

Karon ang bugtong kasiguroan nga anaa kanato isip mga miyembro niini nga simbahan mao ang pagbuhat sa tukma unsa ang gisulti sa Ginoo ngadto sa Simbahan niana nga adlaw sa pagorganisar sa Simbahan. Kinahanglan gayud nga kita magkat-on sa pagpaminaw sa tanan nga mga pulong ug mga sugo nga ang Ginoo mohatag pinaagi sa Iyang propeta, “ingon nga siya nakadawat kanila, maglakaw sa tanan nga pagkabalaan diha sa akong atubangan; … ingon og kini gikan sa akong kaugalingong ba-ba, sa tanan nga pagpailub ug hugot nga pagtuo.” (D&P 21:4–5). Maanaay pipila ka mga butang nga nagkinahanglan og pailub ug hugot nga pagtuo. Mahimo nga kamo dili makauyon unsa ang moabut gikan sa awtoridad sa Simbahan. Mahimo nga kini mosupak sa inyong politikanhong mga panghunahuna. Mahimo nga kini supak sa inyong sosyal nga mga panghunahuna. Mahimo kining mosamok sa inyong sosyal nga kinabuhi. Apan kon kamo maminaw niini nga mga butang, ingon og kini gikan sa ba-ba sa Ginoo Mismo, uban ang pagpailub ug hugot nga pagtuo, ang saad mao “ang mga ganghaan sa impyerno dili makabuntog batok kanimo, oo ug ang Ginoong Dios mopatibulaag sa mga gahum sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug sa himaya sa iyang ngalan” (D&P 21:6).¹⁵

Ngadto kaninyo mga Santos sa Ulahing mga Adlaw bisan asa, kana nga saad [sa D&P 21:4–6] mainyo kon kamo mosunod sa pagpangulo nga gibutang sa Dios sulod sa Simbahan, mopatalinghug ngadto sa ilang tambag diha sa pagpailub ug hugot nga pagtuo.¹⁶

Tan-awa ang Presidente sa Simbahan alang sa inyong mga panudlo. Kon ugaling adunay panagbangi, ipabilin ang inyong mga mata diha sa Presidente kon kamo buot nga maglakaw diha sa kahayag.¹⁷

Kon ang atong mga katawhan buot nga magiyahan nga walay kuyaw atol niining [masamok] nga mga panahon sa panglingla ug bakak nga mga hungihong, kinahanglan gayud nga sila mosunod sa ilang mga lider ug mangayo alang sa paggiya sa Espiritu sa Ginoo aron sa paglikay nga mahulog nga biktima sa maliputon nga mga tig-ulog-ulog kinsa, uban sa kalibutanong kaigmat, naningkamot sa pagkuha sa pagtagad ug pagbaton ug sumusunod aron sa pagtuman sa ilang kaugalingon nga mga pagtuo ug usahay dautan nga mga lihok.¹⁸

Karon dihay daghan nga mga katawhan sa mga panahon sa Magtutudlo kinsa wala modawat Kaniya isip anak sa Dios. Dihay uban kinsa miingon, “Oy, Siya anak lamang nga lalaki ni Jose, ang karpentero.” Ang uban miingon, “Siya Prinsipe sa Beelzebu,” nga nagpasabut nga anak nga lalaki sa panulay. Sa diha nga Siya mibuhat sa pipila niini nga mga milagrusong mga butang sila miingon, “Siya usa ka palahubog,” nagpasabut nga siya bag-o pa lamang nag-inom og isug nga bino. Dihay gamay lamang kaayo kinsa makasulti, “Ikaw mao ang Kristo, ang Anak sa buhing Dios.” (Mateo 16:16.) Ngano nga dili tanan makakita Kaniya isip ang Anak sa Dios?

Kita nag-awit, “I wish I could have been with Him then, when He took little babes in His arms.” [Tan-awa ang “I Think When I Read That Sweet Story,” Children’s Songbook, 56.] Daghan sa atong mga katawhan dili modawat Kaniya labaw pa kay sa pagdawat nila sa mga doktrina nga miabut gikan sa mga magtutudlo sa pagkamatarung nga dinasig sa sama nga Manluluwas. Kon kita dili makadawat niadto kinsa nagrepresentar Kaniya dinhi, labi pang dili sayon ang pagdawat sa Magtutudlo mismo, kon Siya magpakita. …

Sa diha nga ako didto sa akong misyon, usa ka grupo namo nga mga misyonaryo miuban sa among presidente sa misyon makausa ngadto sa bilangguan sa Carthage. Nadani sa kahanginan sa dapit diin ang Propeta ug ang iyang igsoon nga lalaki si Hyrum nahiagum sa ilang pagkamartir, gihangyo namo siya sa pagbalik og saysay sa mga panghitabo nga midangat ngadto sa pagkamartir. Nadani ako pag-ayo sa diha nga ang presidente sa misyon miingon niini: “Sa diha nga si Propeta Joseph Smith namatay, dihay daghan kinsa namatay sa espirituhanon nga paagi uban kaniya. Sama niini diha sa matag pag-ilis sa pangagamhanan sa gingharian sa Dios. Sa dihang si Brigham Young namatay, dihay daghan kinsa namatay sa espirituhanon nga paagi uban kaniya, ug ingon man uban ni John Taylor, ug sa kamatayon sa matag Presidente sa Simbahan.” …

Usahay kita mamatay sa espirituhanon nga paagi ug moputol sa atong mga kaugalingon gikan sa lunsay nga espirituhanon nga kahayag ug kalimtan nga niining adlawa, dinhi, ug karon, kita adunay usa ka propeta.¹⁹

Ang dapit niini nga mga tinugahan sa langit nga mga mensahero kinsa nagrepresentar sa Ginoo sa matag dispensasyon sa ebanghelyo dinhi sa yuta mahimo nga ihulagway pinaagi sa usa ka panghitabo nga gisaysay sa usa ka biyahero sa amihanang Uropa. Ang atong biyahero mibiya pinaagi sa usa ka barko gikan sa Stockholm, Sweden, mibiyahe ngadto sa Dagat sa Baltic. Aron mahimo kini, ang barko kinahanglan nga moagi ngadto sa libo o kapin pa ka mga isla. Nagbarug diha sa prowa, ang biyahero nakakita sa iyang kaugalingon nga naghigwaos tungod sa unsay ingon ngadto kaniya usa ka walay pagtagad sa agianan. Ngano nga dili usa ka agianan duol niini nga isla o sa lain ug labi pang makapaikag kay sa usa nga napili sa piloto? Hapit sa kasuko siya nagsulti sa iyang kaugalingon, “Naunsa ang karaan nga piloto? Nawad-an ba siya sa iyang panghunahuna sa direksyon”? Sa kalit siya nakamatikud sa mga timaan subay sa mapa sa agianan nga migawas ingon lamang og mga gunitanan sa silhig nga nagtuybo diha sa tubig. Adunay usa ka tawo nga mainampingong misusi niini nga mga kanal ug gimapahan ang labing walay kuyaw nga agianan alang sa mga barko nga kaagian. Mao usab kini sa agianan sa kinabuhi padulong ngadto sa pagka-imortal ug kinabuhing dayon: “Ang mga inhenyero sa Dios,” pinaagi sa pagsunod og mga plano nga hinimo sa langit, gimapahan ang agianan alang sa labing dili makuyaw ug labing malipayon nga agianan ug nakapasidaan kanato kalabut sa kuyaw nga mga dapit.²⁰

Ang Ginoo moaghat sa Iyang mga suluguon sa paggiya sa Iyang Simbahan sa tarung. Ang Iyang mga propeta modawat sa mga inspirasyon sa Ginoo aron isulti ngadto sa mga miyembro sa Simbahan, “Kini mao ang dalan, lumakaw kamo diha niana”.(Isaias 30:21). Bisan sa mga panahon sa mga krisis nga miabut sa mga adlaw nga kita nagpuyo, ingon nga gipakita sa karong panahon nga pagpadayag, ang hulagway nga buot sa Ginoo nga atong tan-awon mao ang usa sa pagkamakanunayon ug pagkahiusa. Nahinumdom kamo nga Siya miingon ngadto sa Iyang mga disipulo, “Apan ang akong mga tinun-an nagbarug sa balaan nga mga dapit, ug dili mabalhin” (D&P 45:32).²¹

Mga Sugyot alang sa Pagtuon

Kinsa ang tinuod nga Pangulo sa Simbahan? Pinaagi kang kinsa ang Ginoo mohatag ug direksyon ug panudlo ngadto sa Iyang Simbahan?
Giunsa ang bag-ong doktrina pagdala ngadto sa Simbahan?
Unsaon sa Presidente sa Simbahan pag-andam alang sa iyang dako nga mga responsibilidad? Unsaon sa Ginoo paggiya sa pagpili sa mga Presidente sa Iyang Simbahan?
Unsa nga tambag ang gihatag pinaagi sa buhing propeta nga tinong nakapanalangin sa inyong kinabuhi?
Ngano sa inyong hunahuna nga ang pipila ka mga katawhan mopasidungog sa mga propeta sa karaan apan dili mopasidungog sa buhi nga propeta? Unsa ang mga sangputanan sa dili pagpatalinghug sa mga pulong sa buhi nga propeta o sa paghagit sa iyang awtoridad?
Unsa nga mga saad ang gihimo niadtong kinsa nagpatalinghug sa mga pulong ug mga kasugoan sa buhi nga propeta?

Kini nga hulagway nagpakita sa Unang Kapangulohan nga nagpaluyo ni Presidente Harold B. Lee isip ang Presidente sa Simbahan diha sa usa ka sagrado nga nga katiguman niadtong 6 sa Oktubre 1972. Si Presidente N. Eldon Tanner diha sa podium, ug si Presidente Marion G. Romney anaa sa tuo ni Presidente Lee.