Kapitulo 16

Panaghiusa aron sa Pagluwas sa mga Kalag

Sa unsa nga paagi nga ang mga baruganan sa pakiglabut [correlation]sa Simbahan nagtabang sa Simbahan ug sa pamilya nga maghiusa sa pagtrabaho aron sa pagluwas sa mga kalag?

Pasiuna

Samtang nagserbisyo isip usa ka miyembro sa Korum sa Napulog Duha ka mga Apostoles, si Harold B. Lee gisangunan sa Unang Kapangulohan sa pagdumala sa usa ka paningkamot aron itumong ang tanang mga programa sa Simbahan sa labing taas nga katuyoan sa ebanghelyo ni Jesukristo––“ang pagpahinabo sa pagka-imortal ug sa kinabuhing dayon sa tawo” (Moises 1:39). Kini nga paningkamot gitawag og correlation. Ang correlation naglakip sa pagpasabut og maayo sa pagka-importante sa pamilya ug sa panimalay pinaagi sa pagsiguro nga ang mga auxiliary sa Simbahan, mga programa, ug mga kalihokan molig-on ug mosuporta sa pamilya. Naglakip usab kini sa pagbutang sa tanang mga organisasyon ug trabaho sa Simbahan ubos sa pagdumala sa priesthood. Niadtong mga 1960, daghang mga lakang ang gihimo aron sa pagkab-ut niini nga mga katuyoan, lakip ang pagbalik sa pagpasabut og maayo sa family home evening ug sa pagribyu sa kurikulum sa Simbahan aron sa pagsiguro nga molig-on kini sa panimalay ug sa pamilya. Ang correlation diha sa Simbahan nagpadayon karon ubos sa direksyon sa Unang Kapangulohan, human ang mga baruganan gipadayag sa Ginoo.

Si Presidente Lee mitudlo: “Ang tanan nga atong gibuhat pagabuhaton ‘uban sa usa ka bug-os nga tinguha ngadto sa himaya sa Dios.’ [D&P 82:19.] Ug unsa ang himaya sa Dios? Sama sa pagpasabut sa Ginoo niini ngadto ni Moises, mao ang pagpahinabo sa pagka-imortal ug sa kinabuhi nga dayon sa tawo. … Sa tanan natong mga paningkamot diha sa … programa sa correlation atong gibutang kanunay kini nga mga pagpaniid diha sa atong hunahuna. Sa yano nga pagkasulti, ang duha lamang nato ka mga katuyoan sa correlation mao ang pagpabilin nga maglihok ang priesthood nga ingon ka tataw sa pagpasabut niini sa Ginoo, uban sa auxiliary nga mga organisayon nga tukmang may kalabutan niini, ug ang ikaduha nga ang mga ginikanan ug ang pamilya mopalambo sa ilang mga calling sumala sa gisugo sa Ginoo. Ug mao nga atong tan-awon nga ang tanan nga gibuhat kinahanglan pagabuhaton uban nianang bugtong nga pangutana sa hunahuna: kini ba nga kalihokan mopalambo sa tinguha sa gingharian, gihuptan ba nato ang bug-os nga tinguha ngadto nianang nag-una nga katuyoan sa organisasyon sa Ginoo––ang pagluwas sa mga kalag, ug ang pagpahinabo sa pagka-imortal ug sa kinabuhi nga dayon sa tawo?”¹

Mga Pagtulun-an ni Harold B. Lee

Sa unsa nga paagi nga ang Simbahan makatabang sa “pagpahinabo sa pagka-imortal ug sa kinabuhi nga dayon sa tawo”?

Aron pag-andam kanato nga madawat sa atubangan sa Ginoo, kita adunay simbahan. Unsa ang gisulti ni Apostol Pablo––mihatag sila og mga apostoles, mga propeta, mga pastor, mga magtutudlo, mga ebanghelista––sa laing pagkasulti, gitukod ang Simbahan––alang sa unsa? “Aron sa pagsangkap sa mga balaan, alang sa buhat sa pag-alagad, alang sa paglig-on sa lawas ni Kristo: Hangtud makab-ut natong tanan ang pagkahiusa sa pagtuo ug sa kahibalo kabahin sa Anak sa Dios, ug makakab-ot sa kahamtong sa pagkatawo.” [Tan-awa sa Mga Taga-Efeso 4:11–13.] Ang Ginoo nasayud nga dili kita hingpit, ug gihatagan kita niya og Simbahan aron sa pagtabang kanato nga mahimo nga mao. ²

Ang buluhaton sa Simbahan dili lamang ang pagtukod sa usa ka katilingbanon nga organisasyon o ang pagbaton alang sa katuyoan niini og bisan unsa nga laing butang kay sa pagluwas sa mga kalag.³

Ang katuyoan [sa Simbahan mao] ang paghingpit sa mga kinabuhi niadtong kinsa mga miyembro sa Simbahan. … Kini [mao] ang pagtudlo sa pagka-miyembro sa organisasyon o mga miyembro sa Simbahan sa mga doktrina ug sa mga pagtulun-an diha niana, nga ang pagka-miyembro unta modangat sa paghiusa sa tinuohan ug ngadto sa kahibalo kabahin sa Anak sa Dios ngadto sa usa ka hingpit nga tawo, diin nga kahibalo mao, sumala sa Magtutudlo sa Iyang Kaugalingon, ingon sa Iyang pagpahayag nianang [halandumon] nga pag-ampo diha sa Bag-ong Tugon, “Ug ang kinabuhi nga dayon mao kini, ang ilang pagpakaila nga mao ang bugtong tinuod nga Dios, ug kang Jesukristo, nga imong pinadala” (Juan 17:3).⁴

Ngano nga mabalaka mahitungod sa organisasyon? … Kita nagkauyon nga maghiusa aron sa pagbuhat sa trabaho sa Ginoo nga mas maayo ug mas sayon pinaagi sa pagbahin-bahin sa trabahoon, pinaagi sa pagtugyan og responsibilidad. Kita nagkauyon nga maghiusa ug himoon ang trabaho sa Ginoo nga mas sayon ug mas maayo pinaagi sa pagdawat ug sa pagbuhat sa responsibilidad, diin naghimo og mga lider sa mga miyembro. Sama ra kini sa giingon sa Magtutudlo sa diha nga mihatag Siya sa Iyang mga tinun-an og usa lamang ka sugo––“Sumunod kamo kanako, ug himoon ko kamong mga mangingisdag tawo”––nga magingon sama sa gibuhat kanato karon––“Kon huptan ninyo ang akong mga sugo, himoon ko kamo nga mga lider ug mga lider taliwala sa akong katawhan.”⁵

Ang Simbahan ug ang gingharian sa Dios usa ka tibuok kalibutan nga simbahan ug walay utlanan diha sa usa ka nasud ni diha sa usa ka katawhan. Ang atong makanunayon nga mga paningkamot mao ang paghatag sa tanang mga Santos sa Labing Halangdon bisan diin sila nagpuyo sa matag kahigayunan sa pagtubo ug sa paglambo ngadto sa labing hingpit kutob sa mahimo, sa paglambo diha sa kalig-on ug diha sa gahum alang sa kaayohan dinhi sa yuta, ug sa pag-angkon sa ganti sa pagkamatinud-anon.⁶

Ngano nga importante ang paglig-on sa pamilya sa tanang butang nga atong buhaton diha sa Simbahan?

Asa man ang unang linya sa panalipod niini nga simbahan? Ang Primary ba? Ang Sunday School ba? Dili kana mao ang paagi nga gipadayag sa atong Langitnong Amahan. Basaha pag-usab ang ika-saysenta y otso nga seksyon sa Doktrina ug mga Pakigsaad. Inyong makita nga gibutang sa Ginoo diha sa atubangan sa mga natad sa panggubatan batok sa mga gahum nga molaglag niini nga mga panalipod ang panimalay, ang unang linya sa panalipod (tan-awa sa D&P 68:25–32).⁷

Ang mga programa sa priesthood naglihok agig suporta sa panimalay; ang mga programa sa auxiliary naghatag og bililhon nga tabang. Ang maalamon nga pagka-lider sa [priesthood] makatabang kanato sa pagbuhat sa atong bahin sa pagkab-ut sa tibuok nga katuyoan sa Dios, “sa pagpahinabo sa pagka-imortal ug sa kinabuhi nga dayon sa tawo” (Moises 1:39). Ang mga pagpadayag sa Dios ug ang pagkat-on sa mga katawhan nagsulti kanato unsa ka mahinungdanon ang panimalay sa paghulma sa tibuok nga kasinatian sa kinabuhi sa indibidwal. … Kadaghanan sa atong gibuhat pinaagi sa organisasyon, niana, nagsuporta, samtang nagtinguha kita sa paglig-on sa indibidwal, ug kinahanglan gayud nga dili kita masayop nga ang suporta mao ang sa kalag.⁸

Ang panimalay [mao] ang pinakapunoan ug labing importante sa tanang mga katukuran sa Dios. Ang yawe sa tibuok natong programa sa correlation gihatag kanato sa diha nga ang Unang Kapangulohan mipahayag sa usa sa labing mahinungdanon nga mga baruganan diin kita motukod: “Ang panimalay mao ang pasikaranan sa matarung nga kinabuhi, ug walay laing paagi ang makapuli niini ni sa pagtuman sa mahinungdanon nga mga kalihokan. Ang labing maayo nga mabuhat sa mga auxiliary mao ang pagtabang sa panimalay sa mga problema niini, paghatag og linain nga tabang ug pagtabang diin kini gikinahanglan.”

Busa, uban niana nga hunahuna, ang matag kalihokan diha sa Simbahan kinahanglan nga planohon og maayo aron sa pagligon––dili pagkuha gikan––sa kalihokan sa usa ka maayo nga pagkahapsay nga panimalay. Kon ang pagka-ginikanan nga pagpangulo huyang, ang mga priesthood home teachers ug mga auxiliary kinahanglan gayud nga mohatag sa gikinahanglan nga pag-agak. Kini nagpasabut sa lintunganay nga matag kalihokan nga gipasiugdahan sa Simbahan kinahanglan gayud nga planohon uban niini nga hunahuna, uban sa piho nga pagpasabut og maayo sa kamahinungdanon sa pag-awhag sa matag pamilya sa pagsunod nga matinud-anon sa matag semana nga home evening, ug sa pag-awhag ug sa pagtabang sa amahan kinsa naghupot sa balaan nga priesthood sa pagbuhat sa ilang tukma nga tahas isip mga pangulo sa ilang mga panimalay.⁹

Ang Dios dili gayud mosugo ni bisan kinsa nga tawo sa pagsakripisyo sa iyang pamilya aron sa pagtuman sa iyang ubang mga katungdanan diha sa gingharian. Unsa na ka daghan kita misulay sa pagpasabut gayud nga ang labing importante nga trabaho sa Ginoo nga ato gayud nga buhaton isip mga amahan ug mga bana mao ang anaa sa sulod sa mga bongbong sa atong kaugalingong panimalay. Ang mga amahan anaa sa usa ka buluhaton diin dili gayud sila mahimong buhian.¹⁰

Samtang naghunahuna ako unsay atong gibuhat karon ug sa posibleng kakusgon niini, ang mga pulong ni Propeta Miqueas miabut, “Apan sa ulahing mga adlaw mahitabo, nga ang bukid sa balay ni Jehova pagatukuron ibabaw sa kabukiran, ug pagabayawon ibabaw sa kabungtoran ug ang mga katawhan magaganayan ngadto kaniya.”

“Ug daghang mga nasud nga moadto, ug moingon, Umari kamo, ug mangadto kita sa bukid ni Jehova, ug ngadto sa balay sa Dios ni Jacob; ug siya magatudlo kanato sa iyang mga dalan, ug kita magalakaw sa iyang mga alagianan: kay ang kasugoan mogula gikan sa Zion, ug ang pulong ni Jehova gikan sa Jerusalem.” (Miq. 4:1–2.)

Moingon ako kaninyo nga mga Santos sa Ulahing Adlaw nga mga inahan ug mga amahan, kon mobarug kamo sa responsibilidad sa pagtudlo sa inyong mga anak diha sa panimalay––mga korum sa priesthood nga nag-andam sa mga amahan, ang Relief Society sa mga inahan––ang adlaw sa dili madugay mobanagbanag sa diha nga ang tibuok kalibutan moduol sa atong mga pultahan ug moingon, “Ipakita kanamo ang inyong paagi aron mahimo namo ang paglakaw sa inyong agianan.”¹¹

Sa unsa nga paagi nga ang mga kapunongan sa auxiliary maghiusa sa pagtrabaho ubos sa direksyon sa priesthood aron sa paglig-on sa pamilya?

Gipahayag sa kinatibuk-an kaayo nga paagi, ang correlation nagpasabut nga … ibutang ang priesthood sa Dios diin nagingon ang Ginoo nga kini himoon––isip sentro ug uyokan sa Simbahan ug sa gingharian sa Dios––ug sa pagbantay nga ang mga pinuy-anan sa Santos sa Ulahing mga Adlaw makaangkon og luna diha sa balaan nga plano sa pagluwas sa mga kalag.¹²

Karon diha nay gitukod sa Simbahan gawas sa mga organisasyon sa priesthood, mga organisasyon sa auxiliary o sama sa gipasabut diha sa Bag-ong Tugon, “mga tabang ug mga pangagamhanan” ingon nga gidugang ngadto sa priesthood [tan-awa sa 1 Mga Taga-Corinto 12:28]. Mahitungod niini nga mga organisasyon si Presidente Joseph F. Smith mihimo niini nga pamahayag: “Ania sa akong hunahuna ang atong mga kapunongan sa auxiliary; unsa sila? Mga tabang sa sukaranan nga mga organisasyon sa Simbahan. Kini dili makabarug nga mag-inusara. Buot akong mosulti ngadto sa Mutual Improvement Associations sa mga Young Men ug Young Ladies, ug sa Relief Society, ug ngadto sa mga Primary, ug ngadto sa mga Sunday School, ug sa mga klase sa Religion, ug sa tanang uban nga mga organisasyon sa Simbahan, nga walay usa niini nga makabarug nga mag-inusara gikan sa Priesthood sa Anak sa Dios, walay bisag usa niini nga maanaa sa usa ka higayon sa pagdawat sa Ginoo kon sila dili maminaw sa tingog ug gikan sa tambag niadtong kinsa naghupot sa Priesthood ug nagdumala ibabaw kanila. Sila ubos sa mga gahum ug awtoridad sa Simbahan, ug dili sila makabarug nga mag-inusara gikan kanila; ni sila makagamit sa bisan unsa nga mga katungod sa ilang mga organisasyon nga magbarug nga mag-inusara gikan sa Priesthood ug sa Simbahan.” [Gospel Doctrine, 5th ed. (1939), 383.]¹³

Sa mahinungdanon, karon nga panahon nga pagpadayag sa pangagamhanan sa Simbahan, ang Ginoo mitapos niini nga pamahayag:

“Tan-awa, kini mao ang paagi nga ang akong mga apostol sa karaan nga mga adlaw, mitukod sa akong simbahan ngari kanako.

“Busa, himoa nga ang matag tawo mobarug sa iyang kaugalingon nga buhatan, ug maghago sa iyang kaugalingon nga balaang tawag; ug himoa nga ang ulo dili moingon ngadto sa mga tiil nga wala magkinahanglan sa tiil; kay kon walay tiil unsaon sa lawas pagbarug?

“Usab ang lawas nagkinahanglan sa matag sakop, aron ang tanan mahatagan og kaayohan, nga ang paagi mahimo nga hingpit.” (D&P 84:108–110.)

Sa tataw, samtang naghunahuna kamo niadtong mga kasulatan, kini gihatag aron sa pagpakita sa panginahanglan alang sa kanunay ug padayon nga mga pakisayud ug mga correlation sa nagkalain-lain nga mga pundok, ang mga korum sa priesthood ug ang mga auxiliary ug ang ubang tanan nga mga yunit sulod sa gingharian sa Dios, sa dili mokubos sa upat ka mga katarungan:

Una, nga ang matag organisasyon magbaton og piho nga kalihokan ug dili kini moilog sa buluhaton sa uban, diin mahimo nga mahisama sa mata nga magsulti ngadto sa kamot, “Wala ako magkinahanglan kanimo.”

Ikaduha, nga ang matag pundok managsama ka importante diha sa trabaho sa kaluwasan, sama nga ang matag bahin sa pisikal nga lawas importante sa usa ka hingpit nga tawo.

Una, nga ang matag organisasyon magbaton og piho nga kali-hokan ug dili kini moilog sa buluhaton sa uban, diin mahimo nga mahisama sa mata nga magsulti ngadto sa kamot, “Wala ako mag-kinahanglan kanimo.”

Ikatulo, nga ang tanan mahimo nga malig-on o matudloan og dungan; ug

Ikaupat, nga ang sistema mahimong magpadayon nga hingpit o sa lain nga pagkasulti, nga sulod sa bayanan sa plano sa organisasyon sa Ginoo alang sa kaluwasan sa iyang mga anak, ang Simbahan mobuhat isip usa ka nahingpit nga gihan-ay nga lawas sa tawo, uban sa matag miyembro nga naglihok ingon sa tuyo niini.¹⁴

Usahay sa nanglabay nga panahon, kita nakahimo og gamay nga sayop ngadto sa mga plano nga daw naghatag og kabug-aton sa atong pagkamay tulubagon alang sa mga programa kay sa mga miyembro. Giawhag namo ang tanan nga nalakip … sa pagsunod nianang sukaranang sugo isip katuyoan niining tanan: “sa pagpahinabo sa pagka-imortal ug sa kinabuhi nga dayon sa tawo” (Moises 1:39). Sa kanunay, kon gusto kita og sukdanan diin kini nga programa o kana nga programa takus: naghatag ba kini mismo og kalamboan sa indibidwal niana nga tumong sa kinabuhing dayon diha sa atubangan sa Amahan? Kon wala, ug kini walay kalambigitan niana, nan kini walay dapit nga i-awhag diha sa Simbahan.¹⁵

Mga Sugyot alang sa Pagtuon ug Panaghisgutan

Ngano nga mahinungdanon nga sa matag butang nga atong buhaton diha sa Simbahan atong hinumduman ang labing importante nga katuyoan sa Simbahan––“ang pagpahinabo sa pagka-imortal ug sa kinabuhing dayon sa tawo”? (Moises 1:39).
Sa unsa nga paagi nga ang Simbahan makatabang kanato sa paghingpit sa atong mga kinabuhi? Sa unsa nga paagi kini makatabang kanato sa “pagtubo ug paglambo ngadto sa labing hingpit kutob sa mahimo”?
Ngano nga ang panimalay mao ang punoang sukaranan ug labing mahinungdanon sa tanang mga katukuran sa Dios. Unsay atong mabuhat diha sa atong mga responsibilidad sa Simbahan aron paglig-on sa pamilya?
Unsa sa inyong hunahuna ang gipasabut ni Presidente Lee sa diha nga miingon siya nga ang priesthood mao ang “sentro ug uyokan sa Simbahan”? Sa unsa nga paagi nga ang tambag nga gihatag diha sa D&P 84:108–10 makatabang kanato sa pagsabut kon sa unsa nga paagi ang mga organisasyon sa priesthood ug ang mga organisasyon sa auxiliary sa Simbahan kinahanglan maghiusa sa pagtrabaho?
Sa unsa nga paagi nga ang mga programa sa priesthood ug ang mga programa sa auxiliary “maglihok agig suporta sa panimalay”? Sa unsa nga paagi kini nga mga programa misuporta sa inyong panimalay?
Sa atong mga paningkamot sa pagserbisyo diha sa Simbahan, ngano nga kinahanglan gayud nga magmabinantayon kita nga ang mga programa dili mahimo nga labaw pa ka importante kay sa mga tawo? Sa unsa nga paagi kita makatuman niini?