Kapitulo 3

Ang Kordero Gipatay sukad sa Pagtukod sa Kalibutan

Sa unsa nga paagi nga ang Pag-ula ni Jesukristo mibuntog sa Pagkapukan ni Adan ug makapahimo kanato sa pagbalik ngadto sa presensya sa Amahan?

Pasiuna

Si Presidente Harold B. Lee mitudlo nga kita kinahanglang makasabut sa Pagkapukan sa tawo aron makasabut sa Pag-ula sa Manluluwas, nga nakabuntog sa mga epekto sa Pagkapukan ug nahimong posible ang kinabuhing dayon. Miingon siya, “Unsa ka importante … kini nga makasabut sa Pagkapukan, nga nagkinahanglan sa Pag-ula—nga mao ang misyon ni Ginoong Jesukristo.”¹

Si Presidente Lee sa kasagaran mipamatuod sa balaan nga misyon sa Manluluwas, kon wala pa siya kita dili maluwas gikan sa kamatayon ug sala. Siya mipahayag: “Ang Anak sa Dios … adunay gahum sa pagbuhat sa mga kalibutan, sa pagmando kanila. Mianhi siya dinhi isip ang Bugtong Anak aron sa pagtuman sa usa ka misyon, nga mahimong Kordero nga gipatay sa wala pa ang pagtukod sa kalibutan, sa pagpahinabo sa kaluwasan sa tanang mga katawhan. Pinaagi sa paghatag sa Iyang kinabuhi Iyang giablihan ang pultahan ngadto sa pagkabanhaw ug mitudlo sa paagi diin kita makaangkon sa kinabuhing dayon, nga nagpasabut nga mobalik ngadto sa presensya sa Amahan ug sa Anak. Kana mao si Jesus sa Iyang tanang pagkahalangdon.”²

Kini nga hugna naghisgot sa Pagkapukan ni Adan ug Eva, sa Pag-ula sa Manluluwas nga mibuntog sa mga epekto sa Pagkapukan, ug sa atong mga responsibilidad kon kita buot modawat sa hingpit nga mga panalangin sa Pag-ula.

Mga Pagtulun-an ni Harold B. Lee

Sa unsa nga paagi nga ang Pagkapukan ni Adan ug Eva nakahimo nga posible sa mga panalangin sa pagkamortal?

Si Adan ug Eva … migamit sa ilang kabububt-on ug sa ilang kaugalingong kabubut-on miambit sa bunga, diin sila gisugo sa dili pagkaon, sa ingon sila nahimong ubos sa balaod ni Satanas. Diha niana nga pagsupak, ang Dios karon gawasnon na sa pagpahamtang og hukom kanila. Sila kinahanglang magkat-on nga gawas nga ang Dios maloloy-on nga Amahan, siya usab usa ka makiangayon nga Amahan, ug sa dihang ilang gisupak ang balaod sila ubos sa pagdawat sa silot ug busa sila gisalikway gikan nianang matahum nga tanaman. Nakasinati sila sa tanang dili matag-an nga kausaban sa kahimtang sa kinabuhi sukad nianang higayuna. Sila kinahanglan nga magkat-on nga pinaagi sa ilang pagsupak ilang nadawat ang silot sa usa ka makiangayon nga paghukom. Napugos sila sa pagpangita sa ilang pagkaon pinaagi sa singot sa ilang nawong, kay karon nahimo na silang mga mortal.

… Kasakit, kaalaot, kamatayon, tanan karon misunod, apan niana nga kasakit, nga susama sa atong kaugalingon nga mga kasinatian gikan nianang panahon hangtud karon, dihay miabut nga kahibalo ug pagsabut nga dili gayud unta maangkon gawas kon pinaagi sa kasakit. …

… Gawas sa Pagkapukan nga nakaapekto ni Adan ug Eva, naghimo og kausaban diha kanila, kana nga kausaban nakaapekto sa tanang tawhanong kinaiyahan, sa tanang kinaiyanhon nga mga nilalang, sa tanang nilalang nga mga hayop, mga tanom—tanang mga matang sa kinabuhi nausab. Ang yuta mismo nahimong ubos sa kamatayon. … Giunsa pagkahitabo walay usa nga makapasabut, ug si bisan kinsa ang mosulay sa pagpasabut lapas sa bisan unsay gisulti sa Ginoo kanato. Apan may kausaban nga nahitabo sa tanang matang sa nilalang, nga hangtud nianang higayuna dili pa ubos sa kamatayon. Gikan niana nga higayon ang tanan sa kinaiyahan hinay-hinay nga magkaut-ot hangtud sa panahon niini nga mamatay, human niana adunay gikinahanglan nga pagpahiuli diha sa nabanhaw nga kahimtang. …

… Usa sa labing importante nga mga wali, nagtuo ako nga ang labing mubo nga wali nga gisangyaw sa usa ka tawo, gisangyaw sa Inahan nga si Eva. …

“Kon dili pa unta sa atong kalapasan kita dili unta makaangkon og binhi, ug dili gayud masayud sa maayo ug sa dautan, ug sa kalipay sa atong katubsanan, ug sa kinabuhi nga dayon nga gihatag sa Dios ngadto sa tanan nga masulundon.” [Moises 5:11.]

Mao nga kita, uban ni Eva, maglipay sa Pagkapukan, nga mitugot nga makahibalo sa maayo ug dautan, nga mitugot sa pag-anhi sa mga bata sa pagka-mortal, nga mitugot sa pagdawat sa kalipay sa katubsanan ug sa kinabuhing dayon nga gihatag sa Dios ngadto sa tanan.

Ug mao usab si Adan, nabulahan sa gasa sa Espiritu Santo, “mihimaya sa Dios ug natagbaw, ug misugod sa pagpanagna mahitungod sa tanan nga mga banay sa yuta, nag-ingon: Daygon ang ngalan sa Dios, kay tungod sa akong kalapasan ang akong mga mata nabuka, ug niini nga kinabuhi ako adunay kalipay, ug usab sa unod ako makakita sa Dios.” [Moises 5:10.] …

Hinaut nga ang Ginoo mohatag kanato sa Iyang pagsabut sa importante nga panalangin nga tungod niana miabut kanato, ug atong tahuron sa atong mga hunahuna ug sa atong mga pagtulun an ang importante nga kabilin nga gihatag ni Adan ug Eva kanato, nga tungod sa ilang kasinatian pinaagi sa paggamit sa ilang kaugalingong kabubut-on, sila mikaon sa bunga nga nakahatag kanila og mga kaliwat sa mortal nga kinabuhi ug nakahatag kanato, ilang mga kaliwatan hangtud sa mga henerasyon sa panahon, nianang importante nga panalangin diin madawat usab nato ang kalipay sa atong katubsanan, ug diha sa unod makakita sa Dios ug makaangkon sa kinabuhing dayon.³

Sa unsa nga paagi nga ang Pag-ula sa Manluluwas nakabuntog sa mga epekto sa Pagkapukan?

Ang Ginoong Dios mihingilin ni Adan gikan sa Tanaman sa Eden tungod sa iyang pagsupak. Nag-antus siya og espirituhanong kamatayon. … Apan tan-awa ako moingon nganha kaninyo nga ang Ginoong Dios mihatag ngadto ni Adan sa saad nga siya dili mamatay sa temporal nga kamatayon hangtud Iyang ipadala ang mga anghel sa pagpadayag og paghinulsol pinaagi sa pangalan sa Iyang Bugtong Anak nga pinaagi sa iyang kamatayon, siya makaangkon sa kinabuhing dayon [tan-awa sa D&P 29:41–43]. … Sa dihang si Adan gihinginlan gikan sa Tanaman sa Eden, nagantus siya sa espirituhanong kamatayon, nga mao ang panagbulag sa kasuod diha sa presensya sa Ginoo.⁴

Ngano nga ang Manluluwas gipadala nganhi sa kalibutan? Ang Magtutudlo mismo mitubag niana nga pangutana sa panahon sa iyang pangalagad sa dihang siya miingon: “Kay gipadala sa Dios ang iyang Anak nganhi sa kalibutan, dili aron ang kalibutan iyang pagahukman sa silot, kon dili aron ang kalilbutan maluwas pinaagi kaniya” [Juan 3:17.] …

Maluwas gikan sa unsa? matubos gikan sa unsa? Kabahin niana, una, naluwas gikan sa mortal nga kamatayon pinaagi sa pagkabanhaw sa mga patay. Apan sa laing pagsabut kita naluwas usab pinaagi sa iyang maulaon nga sakripisyo. Kita naluwas gikan sa sala.⁵

Ngadto sa mga Santos sa Ulahing mga Adlaw, ang kaluwasan nagpasabut og kagawasan gikan sa pagkaulipon ug sa mga resulta sa sala pinaagi sa balaan nga kabubut-on, pagkaluwas gikan sa sala ug sa walay katapusang panghimaraut pinaagi sa Pag-ula ni Kristo.

Ako naghunahuna nga walay laing dapit diin kita adunay maanindot nga paghisgot sa plano sa Pag-ula kay sa mga sinulat ni Jacob, nga makita diha sa Basahon ni Mormon, 2 Nephi, ika-9 nga kapitulo. Busa ako motawag sa inyong pagtagad ug moaghat kaninyo sa pagbasa sa makugihon nga paagi sa balik-balik niana nga bililhon nga pagpasabut: …

“O pagkawalay katapusan sa kalooy sa atong Dios, ang Usa nga Balaan sa Israel! Kay siya moluwas sa iyang mga santos gikan niana nga makalilisang nga mangtas ang yawa, ug kamatayon, ug impyerno, ug niana nga lim-aw sa kalayo ug asupre, diin mao ang walay katapusan nga paghasol.

“O pagkawalay katapusan sa pagkabalaan sa atong Dios! Kay siya nasayud sa tanan nga mga butang, ug walay butang nga siya wala mahibalo.

“Ug siya mianhi sa kalibutan aron siya moluwas sa tanan nga mga tawo kon sila mopatalinghug sa iyang tingog; kay tan-awa, siya miantus sa mga kasakit sa tanan nga mga tawo, oo, ang mga kasakit sa tanan nga mga buhi nga binuhat, mga lalaki, mga babaye, ug mga bata, nga nahisakop sa banay ni Adan.

“Ug siya miantus niini aron mabanhaw ang tanan nga mga tawo, nga silang tanan makabarug sa atubangan kaniya sa adlaw sa dako nga paghukom.

“Ug siya misugo sa tanan nga mga tawo nga sila kinahanglan gayud nga maghinulsol, ug magpabunyag sa iyang ngalan, magbaton og hugot nga pagtuo diha sa Usa nga Balaan sa Israel, o sila dili maluwas sa gingharian sa Dios.

“Ug kon sila dili mohinulsol ug dili motuo sa iyang ngalan, ug dili mopabunyag diha sa iyang ngalan, ug molahutay sa katapusan, sila kinahanglan gayud panghimarauton; kay ang Ginoong Dios, ang Usa nga Balaan sa Israel, nakapamulong niini.” [2 Nephi 9:19–24.] …

Ania ang pagpasabut … indibidwal nga kaluwasan, nga moabut sa usag usa, nag-agad sa iyang kaugalingong kinaiya ug sa iyang kaugalingong kinabuhi. Apan kita [usab] adunay unsay atong gitawag og “kinatibuk-ang” [kaluwasan], nga moabut diha sa tanang mga katawhan bisan og sila maayo o dautan, adunahan o kabus, kon sila nabuhi—kini walay kalainan. Ang tanan adunay mga panalangin sa Pag-ula ug sa mga panalangin sa pagkabanhaw nga gihatag ngadto kanila isip libre nga gasa tungod sa maulaong sakripisyo sa Manluluwas. …

Busa, kining sukaranang mga pagtulun-an, yanong mipasabut nga pinaagi sa maulaong gahum ang tanang mga katawhan maluwas, kay maingon nga diha kang Adan ang tanan mangamatay, maingon man usab diha kang Kristo ang tanan mangabuhi nga walay pili. Bisan ang mga anak sa kapildihan kinsa nakahimo og dili mapasaylo nga sala mabanhaw uban sa tanang mga kaliwat ni Adan. … Kita aduna niana nga deklarasyon diha sa Mga Artikulo sa Hugot nga Pagtuo: “Kita nagtuo nga pinaagi sa Pag-ula ni Kristo, ang tanan nga mga katawhan mahimo nga maluwas, pinaagi sa pagsunod sa mga balaod ug mga ordinansa sa Ebanghelyo.” [Mga Artikulo sa Hugot nga Pagtuo 1:3.]⁶

Sa unsa nga paagi nga ang pagbaton og hugot nga pagtuo kang Jesukristo ug ang pagkamasulundon makatugot kanato nga makadawat sa hingpit nga mga panalangin sa pag-ula?

Ang pagka-importante sa kahibalo mahitungod sa Manluluwas ug sa iyang balaan nga misyon gipasabut sa Magtutudlo sa usa ka higayon sa dihang siya misulti ngadto sa mga Pariseo kinsa nagpundok libut kaniya, ingon nga ilang kasagarang gihimo sa tinguha sa pagpakaulaw o paglit-ag kaniya, “Unsay imong hunahuna ni Kristo?” [Mateo 22:42.] …

Sa panahon sa iyang pangalagad dihay [kadtong] mga walay pagtuo kinsa mipahayag sa ilang mga kaugalingon mahitungod sa Magtutudlo. Sa iyang yutang natawhan sa Nazareth sila mabiaybiayong misulti:

“Dili ba siya ang anak sa panday sa kahoy? dili ba ang iyang inahan ginganlan si Maria? ug dili ba ang iyang mga igsoong lalaki mao man sila si Santiago ug si Jose ug si Simon, ug si Judas? … Ug kaniya ilang nakaplagan ang kahigayunan sa pagkapangdol.” [Mateo 13:55, 57.] …

Sa pagtandi, … ang iyang matinud-anong mga sumusunod sama ni Pedro, ang labaw nga pangulo sa mga apostoles mipahayag: “Ikaw mao ang Kristo, ang Anak sa Dios nga buhi” (Mat. 16:16)—ug gikan sa iyang matinud-anon nga si Marta, “Oo, Ginoo: ako nagtuo nga ikaw mao ang Kristo, ang Anak sa Dios, ang moanhi sa kalibutan.” (Juan 11:27.) Ug gikan sa lain niyang mga tinun-an human siya makakita ug makahikap sa Nabanhaw nga Ginoo, si Tomas mipahayag sa iyang pagpamatuod niiing yano nga mga pulong: “Ginoo ko ug Dios ko”! [Juan 20:28.] …

Ako naghunahuna karon sa duha ka managlahi nga mga hitabo. Usa ka suod nga higala nakadawat sa usa niadtong makalilisang nga mga mensahe: “Gikasubo namong ipahibalo kanimo nga ang imong anak nga lalaki namatay sa gubat.” Miadto ako sa iyang balay, ug didto akong nakita ang nagsubo nga pamilya, nanag-iya sa tanang mga butang nga mapalit sa kwarta—bahandi, katungdanan, mga butang nga gitawag sa kalibutan nga madungganon, apan anaa sila uban sa ilang mga paglaum ug mga damgong nahugno nga naglibut kanila, nangita sa butang nga wala nila paningkamuti nga maangkon ug gikan niana nga higayon, ingon og wala gayud maangkon. Ang kahupayan nga ila untang nahibaloan wala diha.

Itandi ko kana sa usa ka talan-awon nga akong nasaksihan didto sa Ospital sa LDS mga unom ka bulan na karon, sa dihang usa sa among matinud-anong presidente sa misyon hapit na mamatay. Nag-antus sa hilabihang kasakit apan diha sa iyang kasingkasing dihay kalipay tungod kay siya nasayud nga pinaagi sa pag-antus kasagaran ang mga tawo makakat-on sa pagkamasulundon, ug ang katungod sa pakigdait ngadto kaniya kinsa mas nag-antus pa og labaw kay sa maantus ni bisan kinsa kanato. Siya, usab, nasayud sa gahum sa nabanhaw nga Ginoo.

Karon kinahanglang pangutan-on nato ang atong mga kaugalingon, agig tubag sa unsay gipangutana sa Magtutudlo kanila sa iyang panahon, “Unsay imong hunahuna ni Kristo?” Kita kinahanglang mangutana sama sa atong pagsulti niini karon, “Unsay atong hunahuna ni Kristo?” ug dayon himoon kining mas gamay pa nga pagka-personal ug mangutana, “Unsay akong hunahuna ni Kristo?” Naghunahuna ba ako kaniya isip Manunubos sa akong kalag? Naghunahuna ba ako kaniya uban sa walay pagduhaduha diha sa akong hunahuna isip mao ang tawo nga nagpakita ngadto ni Propeta Joseph Smith? Nagtuo ba ako nga iyang gitukod kini nga Simbahan dinhi sa yuta? Gidawat ba nako siya isip Manunubos niini nga kalibutan? Matinuoron ba ako sa akong mga pakigsaad, diin diha sa mga tubig sa bunyag, kon ako nakasabut, nagpasabut nga ako mobarug ingon nga saksi kaniya sa tanang mga panahon, ug diha sa tanang mga butang, ug diha sa tanang mga dapit, bisan hain ako, bisan hangtud sa kamatayon?⁷

Ang Ginoo mopanalangin kanato sumala sa tinguha sa atong pagsunod sa Iyang mga sugo. Si Nephi … miingon:

“Kay kami nagkugi sa pagsulat, aron sa pagdasig sa among mga anak, ug usab sa among mga kaigsoonan, sa pagtuo kang Kristo, ug aron makig-uli sa Dios; kay kami nasayud nga pinaagi sa grasya kami maluwas, human sa tanan nga atong mabuhat.” (2 Nephi 25:23.)

Ang dugo sa Manluluwas, ang Iyang pag-ula, moluwas kanato, apan human lamang sa tanan natong mabuhat sa pagluwas sa atong mga kaugalingon pinaagi sa pagsunod sa Iyang mga sugo. Ang tanang mga baruganan sa ebanghelyo mga baruganan sa saad diin ang mga plano sa Makagagahum gipakita ngari kanato.⁸

Ang matag usa kinahanglan gayud nga mobuhat sa tanan sa pagluwas sa iyang kaugalingon gikan sa sala; dayon siya makaangkon sa mga panalangin sa katubsanan pinaagi sa Usa nga Balaan sa Israel, aron ang tanan nga mga katawhan mahimo nga maluwas, pinaagi sa pagsunod sa mga balaod ug mga ordinansa sa ebanghelyo.

Si Jesus miula usab dili lamang alang sa kalapasan ni Adan apan alang sa mga sala sa tanang mga katawhan. Apan ang katubsanan gikan sa indibidwal nga mga sala nag-agad sa indibidwal nga paningkamot, nga ang matag usa pagahukman sumala sa iyang mga binuhatan.

Ang mga kasulatan mihimo niini nga tataw samtang ang pagkabanhaw moabut sa tanan, kadto lamang kinsa misunod ni Kristo ang makadawat sa dugang panalangin sa kinabuhing dayon. Naghisgot mahitungod ni Jesus, si Pablo mipasabut ngadto sa mga Hebreohanon nga “siya nahimong tuburan sa dayong kaluwasan alang sa tanang magasugot kaniya.” (Heb. 5:9.) …

Ang akong mapainubsanon nga pag-ampo mao nga ang tanang mga tawo sa tanang dapit mahimo nga mas makasabut sa hingpit sa kamahinungdanon sa pag-ula sa Manluluwas sa tanang mga katawhan, kinsa naghatag kanato sa plano sa kaluwasan nga mogiya ngadto sa kinabuhing dayon, diin nagpuyo ang Dios ug si Kristo.⁹

Mga Sugyot alang sa Pagtuon ug Panaghisgutan

Unsaon ninyo pagtubag ang pangutana “Unsay inyong hunahuna ni Kristo?”
Ngano nga ang Manluluwas mao ang gipasabut isip ang “Kordero nga gipatay sukad pa sa pagtukod sa kalibutan”? (Pinadayag 13:8).
Sa unsa nga mga paagi nga ang Pagkapukan usa ka panalangin ug pagsulay alang ni Adan ug Eva? Sa unsa nga paagi usab kini nahimong tinubdan sa kalipay ug kasubo alang kanato?
Unsa nga mga matang sa kahibalo ug panabut ang maangkon lamang pinaagi sa paglahutay sa mga pagsulay ug pakigbisog sa pagka-mortal?
Unsa ang espirituhanon nga kamatayon? Unsaon pagbuntog ang espirituhanon nga kamatayon?
Unsa nga mga panalangin sa Pag-ula ang moabut sa tanang mga katawhan isip libre nga gasa? Unsay kinahanglan buhaton nato tagsa-tagsa aron makatagamtam sa tanang mga panalangin sa Pag-ula?
Unsa ang gitudlo sa duha ka mga istorya ni Presidente Lee mahitungod sa mga tawo kinsa nag-atubang sa kamatayon kalabut sa ka-importante sa hugot nga pagtuo diha kang Kristo?
Unsa nga mga kasinatian sa inyong kinabuhi ang nakapalig-on sa inyong pagpamatuod sa Pag-ula sa Manluluwas?
Sa unsa nga paagi nga ang Pag-ula “mogiya kanato ngadto sa kinabuhing dayon, diin nagpuyo ang Dios ug si Kristo”?

Kini nga painting sa Manluluwas mao ang paborito ni Presidente Harold B. Lee ug gisab-it diha sa iyang opisina.