Pag-ampo

Sinsero, kinasingkasing nga pagpakig-istorya sa Langitnong Amahan

Makahunahuna tingali ka og panahon sa imong kinabuhi dihang nanginahanglan ka og balaanong tabang o paggiya. Tingali naay nawala nimo, naa kay importanteng pangutana, o nakasinati og dinalian nga panginahanglan alang sa pagluwas. Ug usahay nangita ka lang og kusog o kaisog nga mopadayon. Ang pag-ampo mao ang sinserong pagdangop sa Dios alang sa tabang ug pagpakigbahin Kaniya sa imong mga gibati, mga hunahuna, ug mga panginahanglan. Ang milagro sa pag-ampo mao nga kon mohangyo ka sa Langitnong Amahan, maminaw Siya nimo (tan-awa sa Jeremias 29:12–13). Bisan kinsa pa ka, bisan unsa pa ang imong mga sayop o pagkadili hingpit, gusto sa Langitnong Amahan nga makig-istorya ka Niya pinaagi sa pag-ampo. Ang hingpit nga gugma sa Dios nagseguro nga pwede natong isulti Kaniya ang bisan unsa, ug maminaw Siya.

Unsa Ang Pag-ampo?

Ang pag-ampo sinsero, kinasingkasing nga pagpakig-istorya ngadto sa Langitnong Amahan. Usa kani sa labing dako nga mga panalangin nga gihatag sa Dios ngadto sa Iyang mga anak aron tinguhaon ang Iyang langitnong giya kada adlaw. Si Jesus nagtudlo, “Busa kamo kinahanglan gayod nga mag-ampo sa kanunay ngadto sa Amahan sa akong ngalan” (3 Nephi 18:19).

Katibuk-ang pagpasabot sa hilisgotan: Pag-ampo

May kalabotan nga mga giya sa pagtuon sa ebanghelyo: Dios nga Amahan, Simbaha ang Dios nga Amahan, Personal nga Pagpadayag, Pagpuasa, Pagsunod sa Ebanghelyo ni Jesukristo

Seksiyon 1

Gidapit sa Dios ang Iyang mga Anak nga Kanunayng Mag-ampo

Imahe

tawong nag-drayb

Gitudloan ni Jesukristo ang Iyang mga sumusunod nga mag-ampo sa Dios nga Amahan (tan-awa sa Mateo 6:5–13; 3 Nephi 17:11–20). Gisugo kita sa Langitnong Amahan sa “pag-ampo sa kanunay” (Doktrina ug mga Pakigsaad 19:38), kay gimahal kita Niya ug nagtinguha sa pagpanalangin kanato. Gusto Niya nga kita magtukod og sumbanan nga modangop Kaniya kada adlaw pinaagi sa pag-ampo. Gusto usab Niya nga padayon kitang mag-ampo sa atong kasingkasing sa tibuok adlaw (tan-awa sa Mosiah 24:11–12; 3 Nephi 20:1). Kon mag-ampo kita sa Langitnong Amahan sa ngalan ni Jesukristo (tan-awa sa 3 Nephi 18:19; 19:6), atong gipakita ang atong hugot nga pagtuo sa atong Manluluwas ug ang atong kaandam sa pagsunod Kaniya. Busa, matinahoron natong isulti ang ngalan sa Ginoo sa pagtapos sa atong pag-ampo, nga moingon og “sa ngalan ni Jesukristo, amen.”

Tungod kay ang pag-ampo mao ang paagi nga makaduol kita sa Dios nga Amahan, atong paningkamotan ang paggamit sa mga pulong nga nagpakita sa atong pagkasinsero ug pagtahod. Si Presidente Dallin H. Oaks mipasabot: “Si Propeta Joseph Smith misulti, ‘Kini usa ka dako nga butang nga mangutana diha sa mga kamot sa Dios, o nga moduol ngadto sa Iyang presensya.’ … Ang espesyal nga pinulongan sa pag-ampo nagpahinumdom kanato sa kadako niana nga pribilehiyo.” Uban sa kasagrado sa pag-ampo diha sa hunahuna, kinahanglan natong gamiton ang “mga puli ngalan sa mga kasulatan kon kita makig-istorya sa Dios—Kanimo ug Kaniya, imbes ang mas komon nga mga pulingalan nga nimo ug imo” kon angay.

Mga butang nga angayang hunahunaon

Ang Ginoo miingon kang Joseph Smith, “Pag-ampo kanunay, aron ikaw mahimo nga magmadaogon; oo, nga ikaw makabuntog ni Satanas ug nga ikaw makalingkawas sa mga kamot sa mga sulugoon ni Satanas nga nagpatunhay sa iyang buhat” (Doktrina ug mga Pakigsaad 10:5). Unsa ang gipasabot sa mag-ampo sa kanunay? Unsa ang pipila ka rason kon nganong ang matag usa nato nanginahanglan og espirituhanong nga proteksyon sa Langitnong Amahan?

Kalihokan alang sa pagkat-on uban sa laing mga tawo

Ang mga kasulatan naglangkob og daghang pananglitan sa pag-ampo. Basaha ang 2 Nephi 4:30–35 ug Alma 34:17–27 nga may kauban, nga mangita sa giya kon kanus-a kita kinahanglang mag-ampo ug kon unsay angay natong iampo. Sa unsang paagi ang sumbanan sa pag-ampo nga makita niini nga mga tudling makaimpluwensya kon unsaon nato sa pag-ampo?

Pagkat-on pa og dugang

Salmo 55:17; Mateo 7:7–11; 2 Nephi 32:8–9; Alma 37:36–37; 3 Nephi 18:15, 18–19; Doktrina ug mga Pakigsaad 19:28
M. Russell Ballard, “Panagtukaw Kamo sa Tanang Panahon, ug Manag-ampo,” Liahona, Nob. 2020, 77–79
David A. Bednar, “Pag-ampo sa Kanunay,” Liahona, Nob. 2008, 41–44

Seksiyon 2

Ang Sinsero nga Pag-ampo Makapaduol Kanimo sa Langitnong Amahan ug ni Jesukristo

Imahe

amahan nga nagkugos og gamayng bata

Sa panahon nga kita mag-ampo, atong mamatikdan ang atong kaugalingon nga nagbalik-balik sa paggamit sa samang mga pulong o hugpong sa mga pulong. Mahunahuna ba nimo ang paggamit sa naandan o walay kahulogan nga mga pulong kada bisita nimo sa imong mga higala o pamilya? Ang atong pagpaningkamot nga sinserong makig-istorya sa ubang tawo kinahanglang mopahinumdom nato kon unsaon pagpakig-istorya sa Langitnong Amahan diha sa pag-ampo. Gusto sa Dios nga sinsero ang atong mga pag-ampo. Sa Basahon ni Mormon, si propeta Enos “mibu-bu sa [iyang] tibuok nga kalag ngadto sa Dios” sa pag-ampo sa pagtinguha og mga panalangin (Enos 1:9). Sa susamang paagi, modangop kita sa Dios alang sa piho nga mga panalangin para sa atong kaugalingon ug sa uban.

Isip usa ka matang sa pagsimba, ang pag-ampo adunay gahom aron mapaduol kita sa Langitnong Amahan (tan-awa sa Doktrina ug mga Pakigsaad 88:62–64). Kon sinsero nga pag-ampo inubanan sa pagpuasa, madawat nato ang espiritu sa pagpadayag ug ang atong mga kasingkasing mahimong putli ug mabalaan (tan-awa sa Alma 17:3; Helaman 3:35).

Mga butang nga angayang hunahunaon

Si Apostol Pablo mitudlo sa mga Santos sa “pag-ampo sa walay hunong” ug sa “pagpasalamat kamo bisag unsa pay modangat kaninyo” (1 Mga Taga-Tesalonica 5:17–18). Para nimo unsay ipasabot sa “pag-ampo sa walay hunong”? Ngano nga ang pagpahayag og pasalamat importante nga bahin sa pag-ampo? Unsay imong mahimo aron mahimong mas dakong bahin ang sinsero nga pag-ampo sa imong mga paningkamot nga mapaduol sa Langitnong Amahan?
Ang Langitnong Amahan maminaw ug motubag sa matag sinsero nga pag-ampo. Ang ubang pag-ampo hilom; ang uban gisulti og kusog. Basaha ang mosunod nga mga ehemplo sa gisulti nga pag-ampo: Mateo 26:39–44; Juan 17:1; 2 Nephi 4:24; Enos 1:4; Joseph Smith—Kasaysayan 1:14. Unsay imong kasinatian sa pag-ampo nga kusog? Unsay imong nakita nga makatabang sa kusog nga pag-ampo?

Kalihokan alang sa pagkat-on uban sa laing mga tawo

Basaha o tan-awa ang “The Soul’s Sincere Desire” ni Sister Carol F. McConkie. Niini nga mensahe, si Sister McConkie miingon, “Pinaagi sa pagtuo mag-ampo kita, maminaw kita, ug mosunod kita, aron kita makakat-on nga mahiusa sa Amahan ug sa Anak.” Hisgoti kon unsay nakat-onan sa matag usa gikan niini nga mensahe. Sa unsang paagi ang pag-ampo isipon nga panahon nga gigahin uban sa Langitnong Amahan?

Pagkat-on pa og dugang

Juan 14:13–14; Santiago 5:16; 2 Nephi 4:34–35
Russell M. Nelson, “Pangayo, Pangita, Panuktok,” Liahona, Nob. 2009, 81–84
David A. Bednar, “Pangayo pinaagi sa Hugot nga Pagtuo,” Liahona, Mayo 2008, 94–97
Neil L. Andersen, “I Hear Him through Sincere Prayer and Reflection,” Inspiration (blog), Dis. 27, 2021, ChurchofJesusChrist.org

Seksiyon 3

Ang Langitnong Amahan Maminaw ug Motubag sa Imong mga Pag-ampo

Imahe

batang babaye nag-ampo panahon sa pagpangaon

Nakahunahuna ka na ba kon ang imong mga pag-ampo gidungog sa Dios? Kanunayng paminawon ug tubagon sa Langitnong Amahan ang atong sinsero nga mga pag-ampo: “Pangayo, ug kamo pagahatagan; pangita, ug kamo makakaplag; panuktok, ug kamo pagaablihan” (Mateo 7:7). Apan ang Ginoo motubag sa atong mga pag-ampo sumala sa Iyang kabubut-on ug panahon (tan-awa sa Mosiah 7:33; Doktrina ug mga Pakigsaad 64:31–32).

“Ang pag-ampo mao ang lihok diin ang kabubut-on sa Amahan ug ang kabubut-on sa anak nagkasinabtanay sa usag usa. Ang tumong sa pag-ampo dili ang pag-usab sa kabubut-on sa Dios apan ang pagsiguro sa atong mga kaugalingon ug sa uban sa mga panalangin nga ang Dios andam nang mohatag, apan sa kondisyon nga kita mangayo niini.”

Mga butang nga angayang hunahunaon

Unsa ang labing dako nga mga tinguha sa imong kasingkasing? Sa unsang paagi ang pagtinguha nga ipahiuyon ang imong kabubut-on sa kabubut-on sa Dios mohulma sa imong mga tinguha ug mga pag-ampo?
Kasagaran tubagon sa Langitnong Amahan ang atong mga pag-ampo pinaagi sa Espiritu Santo. Usahay tubagon ang atong mga pag-ampo dihang magbasa ug magtuon kita sa mga kasulatan. Gamiton usab sa Dios ang ubang tawo aron ihatag ang tabang o mga tubag nga atong gitinguha. Basaha ang mosunod nga mga tudling sa kasulatan aron ikonsiderar ang pipila sa mga paagi nga ang komunikasyon gikan sa Dios mahimong moabot kanimo pinaagi sa Espiritu Santo: 1 Mga Hari 19:12; Doktrina ug mga Pakigsaad 8:2–3; 11:11–14. Kanus-a nimo nahibaloan nga gidungog sa Dios ang imong mga pag-ampo?

Kalihokan alang sa pagkat-on uban sa laing mga tawo

Uban sa imong grupo, ilista ang pipila ka paagi nga pwede natong magamit ang teknolohiya sa pagpakigsulti sa uban. Hisgoti ang pangutana nga “Nganong maglisod man kita usahay sa pagpakigsulti sa epektibong paagi ngadto sa atong Langitnong Amahan?” Basaha og dungan ang 3 Nephi 14:7–11. Unsay gitudlo ni Jesukristo bahin sa kaandam sa Langitnong Amahan nga tubagon ang atong mga pag-ampo?

Pagkat-on pa og dugang

Doktrina ug mga Pakigsaad 88:63–65; 112:10
Thomas S. Monson, “Duol ngadto Kaniya diha sa Pag-ampo ug Hugot nga Pagtuo,” Liahona, Mar. 2009, 5–9
“Prayer” (bidyo), Gospel Library
Richard G. Scott, “Learning to Recognize Answers to Prayer,” Ensign, Nob. 1989, 30–32
James B. Martino, “Dangup ngadto Kaniya ug ang mga Tubag Moabut,” Liahona, Nob. 2015, 58–60
“Are You Really There?” (video), Gospel Library