Librarya
Simbaha ang Dios nga Amahan

“Simbaha ang Dios nga Amahan,” Mga Hilisgotan ug Pangutana (2023)

Imahe
tawo nga nag-ampo

Giya sa Pagtuon sa Ebanghelyo

Simbaha ang Dios nga Amahan

Pagpakita sa atong gugma ug pasalig ngadto sa Dios

Dihang gipangutana si Jesukristo kon unsa ang labing dako nga sugo, Siya mitubag, “Higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna” (Mateo 22:37). Gipakita ni Jesus sa hingpit sa tibuok Niyang kinabuhi sa yuta kon unsaon paghigugma sa Dios nga Amahan. Iyang gibuhat ang “kabubut-on sa Amahan sa tanan nga mga butang gikan sa sinugdanan” (3 Nephi 11:11). Kon mohunong ka sa pagpamalandong kon unsa ka dako ang gibuhat sa Langitnong Amahan nganha kanimo, imong mahibaloan nga ang imong gugma para Niya ug ang imong tinguha nga sundon Siya molambo (tan-awa sa Mosiah 2:20–24). Ang pagsimba maoy importanteng paagi nga atong mapahayag ang atong pasalamat sa gugma sa Amahan ug sa pagpakita nga kita nagtinguha nga magpaduol ngadto Niya.

Unsay Ipasabot sa Pagsimba sa Dios nga Amahan?

Ang pagsimba sa Dios mao ang paghatag Kaniya sa atong gugma, pagkamasinugtanon, pagtahod, pag-alagad, pagdayeg, pagpasalamat, ug debosyon. Gisugo sa Langitnong Amahan ang Iyang mga anak nga magsimba duyog sa ubang magtutuo ug sa pribado usab. Dili lang ang atong mga paningkamot sa pagsimba ang nagpakita sa atong gugma sa Dios ug sa atong pasalig ngadto Kaniya, apan naghatag usab kini nato og kusog nga tumanon ang Iyang mga sugo.

Katibuk-ang Pagpasabot sa hilisgotan: Pagsimba

May kalabotan nga mga giya sa pagtuon sa ebanghelyo: Dios nga Amahan, Pag-ampo, Sakramento, Mga Templo, Pagsunod sa Ebanghelyo ni Jesukristo

Seksiyon 1

Gisimba Nato ang Dios nga Amahan sa Ngalan ni Jesukristo

Imahe
lalaki ug babaye nag-ampo

Ang Dios nga Amahan mao ang Labing Taas nga Binuhat sa uniberso. Sa ingon niana, naghimo Siya og plano para sa kaluwasan ug kahimayaan sa Iyang mga anak. Gipadala Niya sa yuta ang Iyang Anak nga si Jesukristo aron maghimo og maulaong sakripisyo alang kanatong tanan. Aron madawat ang mga panalangin sa plano sa Amahan, kinahanglan tang motuo Kaniya ug maningkamot sa pagbuhat sa tanan nga Iyang gisugo.

Gisugo si Moises nga “simbah[on] ang Dios, kay kaniya lamang ikaw moalagad” (Moises 1:15). Paglabay sa mga siglo, dihang gitental sa yawa si Jesus nga simbahon siya, si Jesus mitubag, “Simbaha ang Ginoo nga imong Dios ug siya lamang ang alagari” (tan-awa sa Mateo 4:8–10). Sukad sa sinugdan, gisugo sa Dios nga Amahan ang Iyang mga anak nga “mobuhat sa tanan nga buhaton diha sa ngalan sa Anak” (Moises 5:8). Sa atong panahon, si Joseph Smith gisugo, “Sa ngalan ni Jesukristo kamo moalagad [sa Dios].” (Doktrina ug mga Pakigsaad 59:5).

Ang paghimo sa Langitnong Amahan isip ang labing prayoridad sa atong kinabuhi makatabang nato nga mapaduol ngadto Kaniya. Gisugo sa Dios ang mga anak sa Israel, “Dili ka magbaton og lain nga mga Dios gawas kanako” (Exodo 20:3). Ang idolatriya nga gihisgotan sa mga kasulatan nahitabo karon kon himoon nato ang ubang butang o ang mga tawo nga mas importante kay sa Dios ug sa pagsunod sa Iyang mga sugo (tan-awa sa Exodo 20:4–5; Doktrina ug mga Pakigsaad 1:15–16). Sa sukwahi, kon ipakita nato sa Dios nga gihigugma nato Siya sa bug-os natong kasingkasing, sama sa Iyang paghigugma kanato, mobati kita nga mas duol ngadto Kaniya ug mahisama kita Kaniya. Ang labing importanteng paagi nga makasimba kita sa Dios nga Amahan mao ang pagduol sa Iyang Anak nga si Jesukristo pinaagi sa hugot nga pagtuo ug paghinulsol ug sa pagpaningkamot nga maglakaw sa dalan nga motultol sa kinabuhing dayon (tan-awa sa Juan 17:3). Kadtong mohimo sa Langitnong Amahan nga bugtong gipuntingan sa ilang pagsimba mahisama Kaniya sa umaabot (tan-awa sa Doktrina ug mga Pakigsaad 93:19–20).

Mga butang nga angayang hunahunaon

  • Ang pagpili nga motuo nga ang Langitnong Amahan anaa ug ang pagsalig sa Iyang kaalam ug gahom mahinungdanon aron mapainubsanong makaduol sa Dios diha sa pagsimba. Basaha ang Mosiah 4:9–10. Diha bay higayon nga ang imong pagtuo sa Dios nag-aghat nimo sa pagtinguha sa Iyang tabang ug kapasayloan? Nganong ang pagpaningkamot nga kanunayng maghinulsol ug mobiya sa mga sala importanteng bahin sa tinuod nga pagsimba?

  • Atol sa Iyang panahon sa yuta, si Jesuskristo mipakita nato kon unsaon pagsimba ang Langitnong Amahan. Basaha ang Juan 5:19–20, ug ikonsiderar kon unsay gitudlo niini nga tudling bahin sa pagsimba. Unsa ang pipila ka paagi nga atong makat-onan mahitungod sa mga buhat sa Amahan ug sa Anak? Sa unsang paagi ang pagtuon sa buhat sa Dios nga narekord sa mga kasulatan mag-andam nimo sa pagsimba Kaniya?

Kalihokan alang sa pagkat-on uban sa laing mga tawo

  • Tan-awa ang bidyo nga “I Am a Son of God” (6:30). Hisgoti kon unsay gibati sa tanan samtang ilang gitun-an ang sagradong kasinatian ni Moises uban sa Dios. Sa unsang paagi ang paghimo sa atong labing unang prayoridad sa paghigugma sa Dios magprotektar nato gikan sa tentasyon? Sa unsang paagi ang atong mga paningkamot sa pagsimba sa Dios mag-andam nato sa pag-atubang sa mga kalisdanan?

Pagkat-on pa og dugang

Seksiyon 2

Makaangkon Ka og Espirituwal nga Kalig-on Kon Moduyog Ka sa Uban sa Pagsimba sa Dios

Imahe
mga tawo sa simbahan

Ang mga miyembro sa Ang Simbahan ni Jesukristo sa mga Santos sa Ulahing mga Adlaw magpundok kada semana sa lokal nga mga kongregasyon aron mag-ampo, moambit sa sakramento, mokanta og mga himno, magkat-on sa ebanghelyo, ug magpalig-on sa ilangpakigdait sa usag usa. Gisugo sa Ginoo ang mga Santos nga “moadto sa balay alampoanan ug mohalad sa inyong mga sakramento diha sa akong balaan nga adlaw” (Doktrina ug mga Pakigsaad 59:9). Ang katibuk-ang mga komperensiya, nga gipahigayon kaduha kada tuig, importanteng mga panghitabo diin ang mga lider sa simbahan maghatag og mga dinasig nga instruksiyon para sa tibuok kalibotan nga mga miyembro sa Simbahan. Ang pag-apil sa organisadong mga serbisyo sa Simbahan gikonsiderar nga usa ka mahinungdanong paagi sa pagsimba sa Dios nga Amahan.

Agig dugang sa pagsimba sa adlaw sa Igpapahulay, ang mga miyembro sa Simbahan mosimba usab sa templo. Sa balay sa Ginoo, makadawat ang mga miyembro sa Simbahan og mga ordinansa sa pagkapari nga mag-andam nila para sa kinabuhing dayon. Ang paghimo ug pagtuman sa mga pakigsaad nga may kalabotan niadtong mga ordinansa mag-andam nato sa pagpakig-uban sa Dios, buot ipasabot nga mabati nato ang Espiritu sa Ginoo ug madawat ang kalinaw, kusog, ug apil pa gani ang personal nga pagpadayag.

Mga butang nga angayang hunahunaon

  • Gihulagway sa Basahon ni Mormon kon sa unsang paagi magpundok sa Simbahan ang mga miyembro aron dungan nga magsimba. Basaha ang Moroni 6:5–9. Sa unsang paagi ang ilang sumbanan sa pagsimba susama sa unsay gihimo sa mga miyembro sa Simbahan karon? Unsaon nimo paghulagway ang mga panalangin sa pagsimba sa adlaw sa Igpapahulay para sa usa ka tawo nga gusto nimong dapiton sa Simbahan?

  • Sa dedikasyon sa Templo sa Kirtland niadtong 1836, ang Propeta Joseph Smith nag-ampo “nga ang tanan nga mga katawhan kinsa mosulod diha sa ganghaan sa balay sa Ginoo makasinati og pagbati sa gahom [sa Dios]” (Doktrina ug mga Pakigsaad 109:13). Diha bay panahon diin nakatabang nimo nga masinati ang paggahin og panahon sa pagsimba sa balay sa Ginoo aron mabati ang gahom sa Dios?

  • Rebyoha ang mensahe nga “Ang mga Panalangin sa Pagsimba” ni Bishop Dean M. Davies, nga mangita kon sa unsang paagi ang sinserong pagsimba makatabang nimo nga mouswag isip usa ka disipulo ni Jesukristo. Samtang imong gibasa ang pakigpulong, unsa nga mga ideya o mga impresyon ang imong nabatonan bahin sa imong mga paningkamot sa pagsimba?

Kalihokan alang sa pagkat-on uban sa laing mga tawo

  • Gitukod ni Jesukristo ang Iyang Simbahan sa atong panahon aron panalanginan ang Iyang mga sumusunod. Gihisgotan ni Presidente Dallin H. Oaks ang panginahanglan para sa usa ka simbahan diha sa iyang pakigpulong nga gihatag niadtong Oktubre 2021 nga katibuk-ang komperensiya . Dungan nga Rebyohon ang “Ang Panginahanglan alang sa usa ka Simbahan,” nga mangita sa pipila sa mga panalangin nga moabot sa pagsimba kauban ang ubang tumutuo. Unsa ang pipila ka rason kon nganong importante ang pag-apil sa mga serbsiyo sa pagsimba sa Simbahan aron motubo ug mouswag sa espirituwal ang usa ka tawo?

Pagkat-on pa og dugang

Seksiyon 3

Ang Pagsimba sa Diyos Mahimong Bahin sa Imong Adlaw-adlaw nga Kinabuhi

Imahe
babaye sa atubangan sa templo

Ang propeta sa Basahon ni Mormon nga si Alma misangyaw sa ebanghelyo ngadto sa mas kabos nga grupo sa mga tawo, nga sinalikway sa mga serbisyo sa pangpublikong pagsimba “tungod sa ka kabos sa ilang panapot” (Alma 32:2; tan-awa usab sa mga bersikulo 1–12). Iyang gipasabot nga ang pagsimba labaw pa kay sa pagtambong sa mga miting: “Tan-awa, kamo miingon nga kamo dili makasimba sa inyong Dios tungod kay kamo gisalikway gikan sa inyong mga sinagoga. … Kon kamo nagdahom nga kamo dili makasimba sa Dios, kamo nakahimo og dako nga kasaypanan” (Alma 33:2). Gawas pa sa regular nga pagsimba panahon sa mga serbisyo sa Simbahan sa Igpapahulay, makasinati ka og pagbati sa pagsimba sa Dios sa tanan nimong buhaton. Mahimo nimong amumahan ang masimbahon nga kinaiya kon modangop ka sa Langitnong Amahan pinaagi sa pag-ampo (tan-awa sa Alma 32:3–11; 37:36) ug kon magpasalamat ka sa imong mga panalangin (tan-awa sa Alma 34:38). Ang pagpaminaw sa makapabayaw nga musika makaandam nimo sa pagpakig-istorya sa Dios(tan-awa sa Doktrina ug mga Pakigsaad 25:12).

Mga butang nga angayang hunahunaon

  • Nagdahom ang babayeng Samarianhon sa atabay nga ang pagsimba pagahimoon lamang sa sagradong mga dapit. Basaha ang Juan 4:19–26. Unsay gitudlo ni Jesus niining babaye bahin sa tinuod nga pagsimba? Unsa ang pipila ka paagi nga imong maamuma ang pagbati sa pagsimba sa Dios sa imong kinabuhi?

  • Mipaambit si Elder D. Todd Christofferson, “Dako kaayo og kahulogan ngari nako, nga ako bisan unsa nga higayon ug sa bisan unsang kahimtang makaduol pinaagi sa pag-ampo sa trono sa grasya, nga ang akong Langitnong Amahan maminaw sa akong pangamuyo, nga ang akong Manlalaban, kinsa wala makabuhat og sala, kansang dugo gipaagas, mohangyo alang kanako.” Sa unsang paagi ang pagdangop ngadto sa Manluluwas makaapekto sa imong tinguha nga simbahon ang Langitnong Amahan?

Kalihokan alang sa pagkat-on uban sa laing mga tawo

  • Ang pagpaminaw sa maayong musika makatabang nato nga makaugmad og tinguha nga simbahon ang Dios. Ang makapadasig nga mga liriko motultol sa atong mga hunahuna ngadto sa Langitnong Amahan ug sa mga panalangin nga maluluy-on niyang gitagana. Paghimo og lista sa mga kanta nga nakatabang nimong mabati ang gugma sa Dios. Hisgoti og dungan ang pipila ka rason kon nganong gikonsiderar sa Dios ang “awit sa mga matarong” nga sama sa usa ka pag-ampo (Doktrina ug mga Pakigsaad 25:12).

Pagkat-on pa og dugang

Iprinta